Ме́сяца ию́ля в 30-й день
Преподо́бнаго Анато́лия О́птинскаго, Мла́дшаго

НА ВЕЛИ́ЦЕЙ ВЕЧЕ́РНИ

На Го́споди, воззвáх: стихи́ры, глас 2.

Подо́бен: Егда́ от Дре́ва:

Егда́ искуси́ся разжже́нная твоя́ любы́/ поруга́нием, осмея́нием и злострада́нием мно́гим,/ тогда́ вои́стину орга́н Уте́шителя Свята́го Ду́ха яви́лся еси́,/ человеколю́бное к мучи́телем показу́я,/ и, ева́нгельски тех благословля́я,/ о вразумле́нии их моли́лся еси́,/ челове́че Бо́жий, Анато́лие,// оби́тели О́птинския украше́ние.

И́стинному Влады́це, Христу́ и Бо́гу на́шему,/ очище́нным умо́м предстоя́ неотсту́пно,/ зва́нный по достоя́нию,/ о́тче богому́дре Анато́лие,/ человеколю́бно о душа́х челове́ческих попече́ние име́я,/ по́мощь и исцеле́ния оби́льно всем подава́л еси́/ и, шата́ния безбо́жных облича́я,// терпе́нием и любо́вию вся препобеди́л еси́.

Егда́ вре́мя прославле́ния твоего́ наста́/ и к со́нму святы́х досто́йне приложи́лся еси́,/ тогда́, Небе́сным Си́лам ра́дость да́руя/ и ве́лие пра́зднество нам устроя́я,/ вся собра́л еси́, о́тче, к похвале́нию твоему́/ и одари́л еси́ ми́ром, Анато́лие./ Да пролие́тся моли́тва твоя́ и ны́не,/ и суд на ми́лость преложи́т Госпо́дь,// и сла́ва бу́дет всем преподо́бным Его́.

Сла́ва, глaс 6:

Возсия́ днесь честна́я па́мять/ преподо́бнаго отца́ на́шего Анато́лия,/ созыва́ющи всех на трапе́зу духо́вную,/ сей бо, ско́рбем наро́да Бо́жия боле́знуя,/ та́ко со дерзнове́нием глаго́лаше:/ с Бо́гом мы вся претерпи́м до конца́./ И сие́ де́лом показу́я,/ себе́ му́жественне приугото́ва в путь,/ его́же и соверши́в, во стране́ живы́х ны́не водворя́ется// и мо́лится о душа́х на́ших.

И ны́не, Богоро́дичен догма́тик: Кто Тебе́ не ублажи́т:

Вход. Проки́мен дне. И чте́ния преподо́бническая 3.

На стихо́вне стихи́ры, глас 5:

Госпо́дни за́поведи и оте́ческая повеле́ния/ душе́ю чи́стою и несумне́нным умо́м/ благоче́стно восприи́м, богому́дре,/ я́ко ще́дрый благоде́латель,/ всех бога́тством Бо́жиим обогаща́еши./ Те́мже, терпе́нию твоему́ дивя́щеся, си́це вопие́м:/ ра́дуйся, преподо́бне о́тче Анато́лие,/ до́брый и кро́ткий уте́шителю,// о́бразом добронра́внаго жития́ твоего́ нас науча́яй.

Стих: Честна́ пред Го́сподем// смерть преподо́бных Его́.

А́нгельски на земли́ пожи́в, богому́дре Анато́лие,/ усе́рдно Амвро́сию преподо́бному послужи́л еси́,/ любо́вию же тому́ подража́я,/ ве́рный учени́к яви́лся еси́./ Ны́не же, Престо́лу Влады́чню вку́пе предстоя́ще,/ моли́теся ко Го́споду, преподо́бнии,// да поми́лует ду́ши на́ша.

Стих: Блаже́н муж, боя́йся Го́спода,// в за́поведех Его́ восхо́щет зело́.

Прииди́те, доброде́тели рачи́телие,/ духо́вный лик досто́йно соста́вльше,/ ублажи́м Анато́лия богому́драго,/ той бо, я́ко де́латель изря́дный,/ испове́дник яви́ся в годи́ну лю́тую/ и, восприе́м от Христа́ воскресе́ния све́тлость,/ всех возлюби́ оте́чески,/ и ны́не во Ца́рствии Небе́снем// мо́лится о оте́честве на́шем.

Сла́ва, глaс 6:

По́двизи и моли́твы преподо́бных отце́в/ оби́тель О́птинскую вертогра́д духо́вный соде́лаша,/ в ней бо богому́дрии ста́рцы подвиза́вшеся,/ мно́гия лю́ди на путь и́стинный наста́виша./ От ни́хже и преподо́бный Анато́лий,/ я́ко ми́лостивый оте́ц и кро́ткий уте́шитель яви́ся,/ и́же, вся́каго приходя́ща николи́же отгна́в,/ но любо́вию свое́ю согрева́я,/ до ны́не дла́ни простира́ет оте́чески// и мо́лит Го́спода поми́ловати ду́ши на́ша.

И ны́не, Богоро́дичен, глас то́йже: Творе́ц и Изба́витель мой, Пречи́стая:

Тропáрь, глaс 2:

Блаже́н еси́, уте́шителю О́птинский Анато́лие,/ яви́ бо Дух Святы́й тя прему́дра наста́вника/ и ве́ры тве́рдаго испове́дника./ Сего́ ра́ди зове́м ти:/ уте́ши ду́ши на́ша смяте́нныя/ и мрак безбо́жия разори́// твои́ми к Бо́гу моли́твами.

НА У́ТРЕНИ

По 1-м стихосло́вии седа́лен преподо́бнаго, глас 2:

Блаже́н еси́, о́тче наш Анато́лие, я́ко, за святу́ю правосла́вную ве́ру му́жественне подвиза́яся, ве́рно пожи́л еси́ и, за свиде́тельство и́стины пострада́в, без кро́ве побе́ду ея́ утверди́л еси́. Те́мже, тя чту́ще, зове́м: ра́дуйся, похвало́ и украше́ние, и утеше́ние на́ше.

Сла́ва, и ны́не, Богоро́дичен:

Блажи́м Тя, Де́во Чи́стая, я́ко родила́ еси́ Иису́са, И́же Сын Вы́шняго нарече́ся, и Ца́рствие Его́ не пре́йдет во ве́ки. Того́ велича́юще, Тя ублажа́ем.

По 2-м стихосло́вии седа́лен преподо́бнаго, глас 2:

Я́ко по́стника благоче́стна и иску́сна, и страда́льца многотерпели́ва, и наста́вника лю́дем Бо́жиим изря́дна и ве́рна, в пе́снех досто́йно Анато́лия восхва́лим, всех возлюби́вшаго.

Сла́ва, и ны́не, Богоро́дичен:

Я́же ми́ру ра́дость су́щи, Богоро́дице Чи́стая, ра́дуйся, Тебе́ зове́м со А́нгелом: сподо́би ра́дости Небе́сныя Тя велича́ющия.

По полиеле́и седа́лен, глас 4:

Стра́сти теле́сныя по́двиги умертви́в, денноно́щными моли́твами дре́вняго зми́я попра́в и струя́ми сле́зными ду́шу от вся́кия скве́рны омы́в, Бо́гу любо́вию вельми́ угоди́л еси́, Анато́лие. Те́мже и дарова́ тебе́ чуде́с благода́ть Иису́с Человеколю́бец, Спас душ на́ших.

Сла́ва, и ны́не, Богоро́дичен:

Боже́ственнаго мя вхо́да, Чи́стая, сподо́би моли́твами Твои́ми, Присноде́во, у́зы лю́тых страсте́й расто́ргни и пла́мене бу́дущаго свободи́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Безме́рна Твоя́, Христе́ Царю́, благода́ть/ и дарова́ние ве́лие:/ не то́кмо бо живы́й немощны́я укрепля́ет,/ но и по сме́рти си́лою Твое́ю/ исцеле́ния подае́т с ве́рою приходя́щим/ уго́дник Твой Анато́лий./ Те́мже взыва́ем Ти, Благи́й Влады́ко:// моли́твами преподо́бнаго Твоего́ спаси́ ду́ши на́ша.

Кано́н Богоро́дицы, и преподо́бнаго, в Богоро́дичнах обнося́й преподо́бнаго и́мя. Глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Го́споди, да́руй ми смысл благи́й, да ску́дными си́лами мои́ми воспою́ Анато́лия Мла́дшаго, О́птинскаго ста́рца вели́каго, я́ко просла́вися.

Вои́стину Свята́го Ду́ха осия́ние от ю́ности сподо́бився прия́ти, душе́вною чистото́ю блиста́еши, преподо́бне, Све́та Трисо́лнечнаго прия́телище.

Прови́девый устрое́ние душе́вное и исцеле́ние от неду́гов ве́дый, уте́шитель показа́лся еси́, Анато́лие, всем изря́ден и иску́сный врач духо́вный.

Я́коже пе́рвии ста́рцы О́птины пу́стыни, Лев и Мака́рий, до́брый быв купе́ц, Анато́лие, Би́сер драгоце́нный предпоче́л еси́, о Не́мже и просла́вися.

К стопа́м вели́каго Амвро́сия усе́рдно припа́дая и досточу́дному Ио́сифу главу́ смире́нно приклоня́я, напита́лся еси́ боголе́пных доброде́телей и обита́лище Свята́го Ду́ха был еси́.

Богоро́дичен: А́ще и заблуди́хом во гресе́х, оба́че на Тя упова́ем, Ма́ти Бо́жия, и наде́емся на милосе́рдие Сы́на Твоего́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.

Улучи́ти жела́я жизнь ве́чную, от страсте́й очи́стил еси́ ду́шу твою́, богому́дре, и, благода́ть восприе́м, исцеле́ния излива́еши к ра́це твое́й притека́ющим.

Вои́стину укра́шен благода́тию и утеше́ние се́ю преподая́ оби́льно, Анато́лие, уте́шителю благода́тный, грехо́в отпуще́ние нам испроси́.

И́мя твое́, преподо́бне Анато́лие, на Восто́ка восто́ков указу́ет, сего́ ра́ди вы́ну к Тому́ устремля́лся еси́, к Нему́же напра́ви нас, пою́щих тя.

Амвро́сию преподо́бному прилепи́вся душе́ю любвеоби́льною, Анато́лие, любо́вию соверше́нною одаря́еши ду́ши всех, пою́щих тя.

Богоро́дичен: Наде́ющеся на Тя, да не поги́бнем, но да изба́вимся от бед, Ма́ти Бо́жия, под кро́вом бо Твои́м храни́ши всех нас, пою́щих Тя.

Седа́лен, глас 6:

Вода́ми духо́вными, я́ко река́, наводня́емь, всю зе́млю на́шу испо́лнил еси́ богому́дрыми утеше́ньми и пресла́вных исцеле́ний дарова́ньми, те́мже, Анато́лие преподо́бне, моли́ о душа́х на́ших.

Сла́ва, и ны́не, Богоро́дичен:

Я́же Бо́га и Спа́са ро́ждшая, моли́ Миронача́льника Преве́чнаго посла́ти вско́ре ми́рови мир, да в ми́ре Того́ славосло́вим.

Песнь 4

Ирмо́с: Услы́шах, Го́споди,/ сла́вное Твое́ смотре́ние,/ и просла́вих, Человеколю́бче,// непостижи́мую Твою́ си́лу.

Духо́вною благода́тию, му́дре Анато́лие, пла́мень стра́стный угаша́еши, предста́телю наш ве́рный и гото́вый всем ве́рным помо́щниче.

Наста́вник ди́вный позна́лся еси́, о́тче, еще́ не су́щу тебе́ в са́не иере́йстем, мно́зи у́бо лю́дие тогда́ узре́ша в тебе́ Бо́жие избра́ние.

Дар прозорли́вости даде́ тебе́ Госпо́дь, е́же вразумля́ти лю́ди Своя́, ты же, о́тче, лю́дем послужи́л еси́ дарова́нною ти благода́тию.

Анато́лие преподо́бне и Некта́рие чу́дне, друг ко дру́гу братолю́бие иму́ще, Христу́ уподо́бистеся, благода́ти Бо́жия стяжа́телие.

Богоро́дичен: А́нгелы чистото́ю превозше́дшая, помози́ нам от грехо́в очи́ститися, я́ко не́мощни есмы́, оба́че те́пле наде́емся на Твою́ по́мощь, Ма́ти Бо́жия.

Песнь 5

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го бо́га не зна́ем.

Очи́стившу ти о́ко у́мное, преподо́бне, благода́ть прия́л еси́, я́ко проро́к, прозрева́ти душ сокрове́нная и предглаго́лати да́льняя и безве́стная.

Саро́вскому подви́жнику уподо́бився, ра́достию Воскресе́ния Христо́ва свети́лся еси́, о́тче, бо́льши бо тоя́, ины́я ра́дости не знал еси́.

Аз всегда́ пребыва́ю зде, с любо́вию глаго́лал еси́, ста́рче му́дрый, те́мже и по сме́рти подае́ши нам недоуме́ний разреше́ние.

Богоро́дичен: Твой, Ма́ти Бо́жия, покро́в моли́твенный осени́ путь Анато́лия преподо́бнаго, ра́зве Сы́на Твоего́, ино́го бо́га не зна́вша.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Врачева́ние безме́здно боля́щим яви́ся Боже́ственный храм оби́тели О́птинския, стяжа́ бо мо́щи твоя́ честны́я, о́тче Анато́лие, я́ко исто́чник, точа́щий исцеле́ния.

Очи́сти сердца́ на́ша и мы́сли хода́тайствы твои́ми, о́тче, и, прии́м приноси́мыя тебе́ моли́твы, испроси́ у Христа́ нам ве́лия ми́лости.

О́тче Анато́лие, теле́сныя боле́зни нахо́дят на нас и собла́зны окружа́ют, но изми́ у́бо ны от сих моли́твами твои́ми, врачу́ в не́мощех и уте́шителю в ско́рбех.

Отверза́я исто́чник благода́тный в тебе́ Госпо́дь, вся призва́ к Себе́ прибега́ти, подава́я, Анато́лие, тобо́ю оставле́ние и лю́тых премене́ние.

Богоро́дичен: Оскуде́хом благоче́стием и в бе́здну отча́яния впадо́хом, но моли́твами Твои́ми, Ма́ти Бо́жия, нас возведи́.

Конда́к, глас 2:

Крест Госпо́день усе́рдно восприи́м,/ о́тче богому́дре Анато́лие,/ Христу́ до сме́рти после́довати возжеле́л еси́,/ испове́дниче и́стины до́блий// и благода́ти сосу́де преди́вный.

И́кос:

Лю́дие Бо́жии, почуди́мся вельми́ о пресла́вных дея́ниих Бо́га на́шего, и честна́го отца́, блаже́ннаго Анато́лия, почти́м, и песнь благода́рственную Христу́ Бо́гу и Пречи́стей Ма́тери Его́ воспои́м, я́ко дарова́ся нам в после́дняя ле́та испове́дник и́стины до́блий и благода́ти сосу́д преди́вный.

Песнь 7

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Боле́зни чад твои́х врачева́вый, о́тче, бде́ния не оставля́л еси́ свои́х боле́зней ра́ди, но со о́троки воспева́л еси́: благослове́н еси́, Бо́же оте́ц на́ших.

По́мыслы своя́ тебе́ открыва́ху бра́тия, оба́че свобо́ды их ника́коже похища́л еси́, о́тче, любо́вию сле́довати науча́я благослове́нному Христу́, Спа́су оте́ц на́ших.

Вои́стину Христа́ Бо́га на́шего, Со́лнца Незаходи́маго, в себе́ стяжа́вый, о́тче Анато́лие, просвети́ неразу́мие на́ше и грехо́в оставле́ние нам испроси́.

Богоро́дичен: Любоблага́я Де́во Ма́ти, я́ко о́блак, ро́су живо́тную но́сиши: те́мже разжже́нную пещь страсте́й мои́х угаси́, моля́щи благослове́ннаго Бо́га оте́ц на́ших.

Песнь 8

Ирмо́с: В купине́ Моисе́ю Де́вы чу́до,/ на Сина́йстей горе́ прообрази́вшаго иногда́,/ по́йте, благослови́те,// и превозноси́те во вся ве́ки.

Твою́ вои́стину честну́ю па́мять почита́ет пу́стынь О́птинская, о излия́нии чуде́с пове́дающи, е́же и ны́не приложи́ еще́, Анато́лие, прише́дшим в сей вертогра́д пресла́внаго прозябе́ния.

Сокруше́ние соста́вов исцели́л еси́ благочести́выя жены́, еле́я и моли́тв твои́х пома́занием, Анато́лие, сотворя́я ю́ пра́здновати ве́село па́мять твою́ и тя, о́тче, благодари́ти.

А́нгельский ум име́я, Анато́лие, вели́кия умы́ отвраща́л еси́ от мудрова́ния плотска́го, си́речь го́рдости мирски́я и духо́вныя, всем глаго́ля: Бо́га еди́наго превозноси́те во вся ве́ки.

Уте́шителю, ста́рче Анато́лие, сиро́т Бо́жия Ма́тере Ша́мординских не оста́вил еси́, науча́я посреде́ молвы́ моли́тв не оставля́ти, но Бо́га пе́ти и благослови́ти во вся ве́ки.

Бу́ри безбо́жия приближе́ние и поги́бели вели́кия прозрева́я, рекл еси́ ча́дом свои́м, Анато́лие, я́ко чу́до воскресе́ния яви́т Госпо́дь во вре́мя Свое́ ве́рным, пою́щим и превознося́щим Его́ во вся ве́ки.

Богоро́дичен: Изведи́ ны, Ма́ти Бо́жия, из ти́ны страсте́й и бла́та ле́ности, да Сы́на Твоего́ потщи́мся пе́ти, благослови́ти и превозноси́ти во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те:/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.

Сло́во де́ятельно и любо́вь имы́й неотпа́дающую, Це́ркве Ру́сския яви́лся еси́ утвержде́ние и проро́к в годи́ну лю́тую, о́тче Анато́лие, сла́ва же и похвала́ оби́тели О́птинския.

Вели́кое вои́стину вмести́лище любве́ яви́лся еси́, преподо́бных сотаи́нниче, и собесе́дниче святы́х, и всех ве́рных уте́шителю!

Освяти́лся еси́, о́тче Анато́лие, благода́тию, ду́шу твою́ за ча́да полага́я: а́ще и без кро́ве побе́ду твою́ соверши́в, с новому́ченики вене́ц прие́млеши, блаже́нне.

Ве́лия си́ла яви́ся в тебе́, преподо́бне Анато́лие, о́тче наш, и не довле́ет к сла́ве твое́й хвале́ние на́ше, оба́че приими́ благода́рственное моле́ние недосто́йных чад твои́х, ве́рою и любо́вию соверша́ющих всечестну́ю па́мять твою́.

Богоро́дичен: Ю́ница благослове́нная, Ма́ти Бо́жия, не оста́ви нас, убо́гих чад Твои́х, но ю́ныя ра́дости испо́лни, да Воплоти́вшагося нас ра́ди хва́ляще велича́ем.

Свети́лен:

Анато́лие о́тче, восто́ку тезоиме́нный, не оста́ви нас кроме́ твоего́ посеще́ния, но к Восто́ку восто́ков, Христу́ Бо́гу на́шему напра́ви ны, да у́зрим свет моли́твами твои́ми.

Сла́ва, и ны́не, Богоро́дичен:

Сла́дость А́нгелов, скорбя́щих ра́дость, христиа́н Предста́тельница, Де́во, Ма́ти Госпо́дня, заступи́ нас и изба́ви ве́чных мук.

На хвали́тех стихи́ры, глас 4.

Подо́бен: Я́ко до́бля:

Сосу́д честне́йший Боже́ственнаго Ду́ха,/ отце́в твои́х дарова́ньми наполня́емь,/ па́стырь до́брый яви́лся еси́,/ гре́шным спору́чник и кре́пость изнемога́ющим,/ ка́ющимся утеше́ние/ и в годи́ну лю́тую ве́рным укрепле́ние:/ ве́лия сла́ва твоя́ и па́мять с похвала́ми,/ о́тче Анато́лие блаже́нне,// моли́твенниче о душа́х на́ших.

От оби́тели и па́ствы твоея́ непра́ведно изгоня́емь,/ ско́рбем и поруга́нием приобщи́лся еси́,/ я́ко адама́нт терпе́ния,/ зло́бу безбо́жных кро́тостию препобеди́вый./ Те́мже удосто́ился еси́ блаже́нныя кончи́ны,/ о́тче Анато́лие свяще́нне,// моли́твенниче о душа́х на́ших.

А́нгеле земны́й и челове́че Небе́сный,/ орга́не Уте́шителя и уте́шителю изря́дный,/ о́блаче разу́мный благода́ти,/ ка́пляй всем вразумле́ния бога́тно,/ преподо́бне Анато́лие,/ испроси́ у Го́спода лю́дем Бо́жиим в ве́ре святе́й укрепле́ние// и Правосла́вию утвержде́ние.

Сла́ва, глас 6:

Ве́рою тве́рдою укрепле́н,/ блаже́нне Анато́лие,/ во́ли Бо́жией всем се́рдцем преда́лся еси́;/ служе́ние свое́ до конца́ соверша́я,/ оби́тели разоря́емыя не оста́вил еси́/ и в моли́тве непреста́нней пребы́л еси́./ Ны́не же, во Оби́тели Небе́сней Пресвяте́й Тро́ице предстоя́,// мо́лишися о душа́х на́ших.

И ны́не, Богоро́дичен, глас то́йже:

Богоро́дице, Ты еси́ Лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ с преподо́бными отцы́ О́птинскими,// поми́ловатися душа́м на́шим.

Славосло́вие вели́кое, и отпу́ст.

На Литурги́и слу́жба преподо́бнаго.