Ме́сяца сентября́ во 2-й день
Священному́ченика Ге́рмана, епи́скопа Вя́зниковскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 1.
Подо́бен: Прехва́льнии му́ченицы:
Прехва́льне священному́чениче Ге́рмане,/ ты чи́стым се́рдцем Бо́га неви́дима узре́л еси́,/ сего́ ра́ди ни темни́ца, ни гоне́ния тя изнури́ша,/ ни глад, ни озлобле́ния тя смято́ша,/ е́же разлучи́ти от любве́ Бо́жия./ Те́мже Христу́, свя́те, моли́ся/ дарова́ти Це́ркви на́шей мир// и душа́м на́шим ве́лию ми́лость.
Всехва́льне священному́чениче Ге́рмане,/ ты кро́вию твое́ю зе́млю освяти́л еси́,/ Го́спода ра́ди умерщвля́емь,/ сего́ ра́ди вене́ц нетле́нный прия́л еси́/ и Ца́рствие Небе́сное насле́довал еси́./ Те́мже Христу́, свя́те, моли́ся/ дарова́ти Оте́честву на́шему мир// и душа́м на́шим ве́лию ми́лость.
Пресла́вне священному́чениче Ге́рмане,/ ты во дни отступле́ния от ве́ры наро́да ру́сскаго,/ Христу́ ре́вностно после́дуя,/ и́стинный архипа́стырь показа́лся еси́,/ и новому́чеником Це́ркве на́шея соприча́стник яви́лся еси́./ С ни́миже ны́не моли́ся/ дарова́ти лю́дем земли́ на́шея// мир и ве́лию ми́лость.
Досточу́дне священному́чениче Ге́рмане,/ ты, мучи́телей безбо́жных не убоя́вся,/ ве́ру Христо́ву тве́рдо испове́дал еси́,/ и па́ствы ра́ди, лю́бящия тя,/ страда́ния лю́тая претерпе́л еси́./ Те́мже ны́не ра́дости Небе́сныя наслажда́яся,/ Бо́гу о нас моли́ся// дарова́ти душа́м на́шим мир и ве́лию ми́лость.
Сла́ва, глас то́йже:
Це́ркве Ру́сския похвало́ и украше́ние,/ святи́телю о́тче Ге́рмане всехва́льне,/ Це́рковь Бо́жия, цве́ты украша́ема, вопие́т ти:/ уго́дниче Христо́в и предста́телю тепле́йший,/ не преста́й моли́тися ко Го́споду// о всех, благоче́стно чту́щих па́мять твою́.
И ны́не, Богоро́дичен, глас то́йже: Всеми́рную сла́ву:
Вход. Проки́мен дне. И чте́ния три.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ра хра́ма, и свята́го, глас 1:
Многообра́зныя ско́рби и муче́ния претерпева́я,/ пресла́вне священному́чениче Ге́рмане,/ Христа́ не отве́рглся еси́,/ ве́ру же пра́вую, я́ко щит кре́пкий, восприе́м,// безбо́жныя посрами́л еси́.
Сла́ва, глас 6:
Весели́ся и лику́й, земле́ Влади́мирская,/ вели́каго подви́жника ве́ры и свиде́теля и́стины/ я́ко сокро́вище безце́нное в себе́ иму́щая,/ наслади́ся чуде́с, от него́ истека́ющих/ и, ви́дящи его́ лик святы́й,/ от ви́димых и неви́димых враго́в тя огражда́ющий,/ благода́рно Спа́су возопи́й:// Го́споди, сла́ва Тебе́.
И ны́не, Богоро́дичен, глас то́йже: Творе́ц и Изба́витель мой, Пречи́стая:
На стихо́вне стихи́ры, глас 2:
Прииди́те, ве́рнии,/ воспои́м священному́ченика Ге́рмана,/ Це́ркве Ру́сския украше́ние,/ ве́ры правосла́вныя кре́пкаго испове́дника,/ жизнь за Христа́ положи́вшаго,/ моля́щагося о нас ко Го́споду,// дарова́ти душа́м на́шим мир и ве́лию ми́лость.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Христу́ усе́рдно после́довав,/ священному́чениче Ге́рмане,/ па́ству в ве́ре наставля́л еси́,/ и в гоне́ниих утвержда́л еси́./ И ны́не моли́ся о нас ко Го́споду,/ да укрепи́т нас благода́тию Свое́ю ве́ру соблюсти́// и венце́в Небе́сных сподо́битися.
Стих: Честна́ пред Го́сподем// смерть преподо́бных Его́.
Архиере́ев красото́ и му́чеников сла́во,/ Ге́рмане блаже́нне,/ с новому́ченики Це́ркве Ру́сския/ моли́ Всеблага́го Бо́га/ Це́рковь Свою́ в ве́ре соблюсти́,// мир умири́ти и спасти́ ду́ши на́ша.
Сла́ва, глас 8:
Святи́телю о́тче Ге́рмане,/ му́чениче прехва́льне/ и о па́стве те́плый моли́твенниче!/ Ты Це́рковь Ру́сскую кро́вию свое́ю украси́л еси́/ и да́же до сме́рти ве́ру соблю́л еси́./ Его́же предста́тельством, Христе́ Бо́же,/ тьму нестрое́ний и бед от нас отжени́,// и спаси́ ду́ши на́ша, я́ко Милосе́рд.
И ны́не, Богоро́дичен, глас то́йже: Безневе́стная Де́во:
Тропа́рь, глас 1:
Небе́снаго Ца́рствия взыску́я,/ измла́да о го́рнем помышля́л еси́/ и, все́ю кре́постию Бо́га возлюби́в,/ благове́стие Христо́во лю́дем возвеща́л еси́,/ во дни же гоне́ний лю́тых/ сквозе́ огнь муче́ний побе́дне преше́л еси́./ Мы же, прославля́юще тя, Ге́рмане прехва́льне,/ си́це тебе́ вопие́м:/ сла́ва Да́вшему ти кре́пость,/ сла́ва Венча́вшему тя,// сла́ва Я́вльшему нам тя те́пла предста́теля.
НА У́ТРЕНИ
По 1-м стихосло́вии седа́лен, глас 1:
Апо́столом Христо́вым подо́бяся, ве́рою и любо́вию, труды́ и словесы́ лю́дем послужи́л еси́ и, мно́гия преде́лы земли́ на́шея во́лею и нево́лею преше́д, терпе́нием искуше́ний и страда́ньми Бо́га просла́вил еси́. Испроси́ у Го́спода сла́вы, Ге́рмане священному́чениче, па́стырем му́дрость, мона́хом усе́рдие в моли́тве, ве́рным же ча́дом церко́вным в Правосла́вии утвержде́ние.
Сла́ва, и ны́не, Богоро́дичен:
Пучи́ною прегреше́ний обурева́емь, к ти́хому приста́нищу Твоея́ мольбы́, Богоро́дице Пречи́стая, прибега́ю и взыва́ю: спаси́ мя моли́твами Твои́ми, держа́вная Засту́пнице.
По 2-м стихосло́вии седа́лен, глас 3:
Му́чеником дре́вним подража́я, ни поноше́ний, ни уничиже́ний, ни гоне́ний, ни уз, ни са́мыя сме́рти убоя́лся еси́, Ге́рмане святи́телю, ве́дая, я́ко ра́йское наслажде́ние и лицезре́ние Христа́ Бо́га ра́дость ве́лия есть, о не́йже стра́сти лю́тыя ни во что вменя́ются и ко́зни враго́в ви́димых и неви́димых побежда́ются. Испроси́ и нам у Го́спода моли́твами твои́ми побе́ды на стра́сти, ра́дости ве́чныя и живота́ несконча́емаго.
Сла́ва, и ны́не, Богоро́дичен:
Боже́ственная ски́ния была́ еси́ Сло́ва, еди́на Пречи́стая Де́во Ма́ти, чистото́ю А́нгелы превозше́дшая, па́че всех мене́ персть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.
Велича́ние:
Велича́ем тя,/ священному́чениче Ге́рмане,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́, и прииди́ во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 4:
Всем житие́м твои́м Го́спода просла́вил еси́, святи́телю о́тче Ге́рмане, па́ствы мно́гия усе́рдный наста́вниче, испове́дниче и му́чениче Христо́в. Бу́ди же пред Бо́гом те́плый моли́твенник и хода́тай о всех, с ве́рою к тебе́ притека́ющих.
Сла́ва, и ны́не, Богоро́дичен:
Пречи́стыя ру́ки Твоя́, Де́во Ма́ти, просте́рши, покры́й упова́ющия на Тя и Сы́ну Твоему́ зову́щия: всем пода́ждь, Христе́, ми́лости Твоя́.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Це́рковь Ру́сская/ велича́ет днесь Ге́рмана чу́днаго,/ па́стырем нача́льника,/ и́ноком наста́вника,/ гони́телей обличи́теля// и ве́ры защи́тителя.
Кано́н Богоро́дицы на 6, и свята́го на 8. Кано́н свята́го, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.
К широте́, блаже́нне, твои́х похва́л напра́ви ума́ на́шего тесноту́, и свет низпосли́ сердца́м на́шим, пою́щим светоно́сную и сла́вную па́мять твою́, Ге́рмане пречу́дне.
По́двигом до́брым в земли́ Ру́сской подвиза́вся, преблаже́нне Ге́рмане, и пред мучи́тели ве́ру правосла́вную испове́дуя, от Христа́ Бо́га Небе́сную жизнь прия́л еси́. Те́мже и нам пода́ждь в ско́рбех по́мощь.
Венце́м му́ченичества увенча́вся, свя́те Ге́рмане, с новому́ченики Це́ркве на́шея Престо́лу Царя́ сла́вы предстои́ши и Бо́гу побе́дную песнь воспева́еши. Помози́ и нам побе́ду над страстьми́ улучи́ти.
Богоро́дичен: С чи́нми А́нгел, Влады́чице, со апо́столы, и святи́тели, и со все́ми святы́ми за ны гре́шныя Бо́гу моли́ся, Чи́стая Богоотрокови́це.
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.
Кра́йнею любо́вию твое́ю вои́стину к нетле́нию от тли преше́л еси́, и ра́достно во оби́тели Небе́сныя всели́лся еси́, А́нгелом соприча́стник быв, святи́телю Ге́рмане прехва́льне.
Я́ко столп непоколе́блем се́рдце твое́ име́я, святи́телю Ге́рмане, любо́вию ко Го́споду пламене́л еси́, не боя́ся ве́ру Христо́ву пропове́дати, те́мже помози́ и нам в любви́ Бо́жией утвержда́тися.
Свято́е житие́ твое́, блаже́нне, све́тло просия́ в стране́ на́шей и озари́ ю́ све́том чуде́с и исцеле́ний. Те́мже испроси́ у Го́спода и нам благода́тную по́мощь, во е́же хоте́ти и де́яти блага́я.
Богоро́дичен: Тя Прему́дрость Бо́жия пречи́стое селе́ние обре́тши, от Твои́х чи́стых крове́й воплоща́ется, и по рождестве́ нетле́нну показа́.
Седа́лен, глас 2:
Безстра́стия добро́тою укра́шен, и преизря́ден спасе́ния рачи́тель быв, святи́телю Ге́рмане, я́ко дре́во, насажде́нное при исхо́дищих вод, доброде́тельми процве́л еси́. Те́мже и нас сподо́би невече́рняго Ца́рствия насле́дники бы́ти.
Сла́ва, и ны́не, Богоро́дичен:
Засту́пницу усе́рдную восхва́лим и честно́му Ея́ поклони́мся о́бразу, и́мже в новопросвеще́нней стране́ правове́рие утверди́ся и в годи́ну лю́тую ма́ти ру́сских градо́в спасе́ся. Сей и гра́да Вя́зники вели́кое сокро́вище, и всея́ земли́ на́шея пресла́вное бога́тство.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.
Безбо́жия глубина́ ника́коже возмо́же погрузи́ти тя, свя́те Ге́рмане, и ре́ки мук не поколеба́ша столпа́ души́ твоея́, держа́вною бо руко́ю спасе́ тя Соде́тель Госпо́дь.
Я́ко дерзнове́ние име́я к Бо́гу, ны́не предстои́ши Небе́сному Царю́, святи́телю Ге́рмане, испроси́ грехо́в оставле́ние нам, пра́зднующим всечестну́ю па́мять твою́.
Плотско́е мудрова́ние умертви́в и тя́жкия му́ки претерпе́в, ду́шу твою́ доброде́тельми украси́л еси́, те́мже Небе́сных красо́т и нас с тобо́ю зре́ти сподо́би.
Богоро́дичен: Пресвята́я Влады́чице, Русь Святу́ю и вся гра́ды и страны́ христиа́нския во и́стине утверди́ и во благоче́стии сохрани́, да прославля́ется в них и́мя Сы́на Твоего́, Христа́ Бо́га на́шего.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.
Святи́телю Ге́рмане богому́дре, те́плый наш предста́телю и засту́пниче, ты све́тло сия́еши луча́ми зна́мений чудоде́йственных, озари́ си́ми и нас, любо́вию чту́щих тя и со упова́нием тебе́ моля́щихся.
Тя иму́щи све́тла би́сера и че́стна во страда́нии твое́м, Свята́я Це́рковь, всеблаже́нне Ге́рмане, украша́ется.
Тве́рдым умо́м на защи́ту ве́ры правосла́вныя стал еси́, богоблаже́нне Ге́рмане, те́мже помози́ и нам во всем наде́жду на Го́спода возлага́ти.
Богоро́дичен: Богоро́дице, Ма́ти Го́спода Иису́са, со все́ми святы́ми и со святи́телем Ге́рманом Того́ моли́, изба́вити ны от всех бед и скорбе́й.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.
Я́ко со́лнце, днесь возсия́ па́мять твоя́, вся озаря́ющи и мрак де́монския зло́бы отгоня́ющи, Ге́рмане пресла́вне, в не́йже ра́достно тя пое́м, благословя́ще Христа́ во ве́ки.
Гоне́ния и глад претерпева́я, в любви́ Иису́сове утверди́лся еси́, святи́телю достоблаже́нне, помози́ и нам сию́ доброде́тель стяжа́ти.
Богоуго́дно тече́ние свое́ на земли́ соверши́в, с новому́ченики ны́не лику́еши, моля́ся о почита́ющих па́мять твою́, Ге́рмане богоизбра́нне.
Богоро́дичен: Спаса́й ста́до Твое́, Ма́ти Бо́жия, безвре́дно от вся́каго зла, Тя бо во обстоя́ниих и́мамы избавле́ние.
Конда́к, глас 2:
Сло́вом Бо́жиим наставля́емь,/ святи́телю о́тче Ге́рмане,/ от ю́ности Христу́ после́довал еси́,/ в годи́ну же лю́тых испыта́ний/ непоколеби́мый щит ве́ры яви́лся еси́,/ ны́не на Небесе́х Бо́гу с ли́ки му́ченик предстоя́,// моли́ спасти́ся душа́м на́шим.
И́кос:
Христа́ всем се́рдцем возлюби́в, священному́чениче Ге́рмане, по́двиги испове́дничества прия́л еси́ и му́ченическаго венца́ сподо́бился еси́. Сего́ ра́ди земля́ Ру́сская ны́не тя прославля́ет, о не́йже Бо́гу моли́твы при́сно возно́сиши. Мы же, ве́ру твою́ и любо́вь помина́юще, со благогове́нием вопие́м ти: ра́дуйся, па́стырю ди́вный; ра́дуйся, ра́бе Христо́в благи́й и ве́рный; ра́дуйся, Це́ркве Ру́сския похвало́ и утвержде́ние.
Песнь 7
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.
В незло́бии житие́ провожда́я, па́стырь усе́рдный яви́лся еси́, свя́те Ге́рмане, безбо́жная же ополче́ния одолева́я, Христу́ усе́рдно после́довал еси́.
Я́ко крин благово́нен и я́ко ши́пок красе́н посреде́ те́рния гоне́ний на ве́ру Христо́ву в земли́ на́шей яви́лся еси́, о́тче Ге́рмане, те́мже тя прославля́ем.
Просвеще́н благода́тию Свята́го Ду́ха, блаже́нне, муче́ния и страда́ния му́жественне терпе́л еси́, взыва́я: препе́тый отце́в Госпо́дь и Бог, благослове́н еси́.
Богоро́дичен: Испо́лни уста́ на́ша хвале́ния Твоего́, Госпоже́, и покажи́ ны насле́дники ве́чныя сла́вы Ца́рствия Сы́на Твоего́.
Песнь 8
Ирмо́с: Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.
Предстоя́ Престо́лу Влады́ки и Го́спода, моли́ся о нас, священному́чениче Ге́рмане богому́дре, да обря́щем ми́лость в час Су́дный.
Красе́н яви́лся еси́, священному́чениче Ге́рмане, пома́зався кро́вию честна́го муче́ния, и добро́тами сего́ украси́вся, страда́льцев украше́ние и святи́телей о́бразе.
От рук беззако́нных убие́ние прие́м, же́ртва благоприя́тная Бо́гу прине́слся еси́, святи́телю о́тче Ге́рмане, те́мже тя ны́не достодо́лжно прославля́ем.
Богоро́дичен: Пречи́стая Влады́чице, Небе́сная Цари́це, ро́ждшая Соде́теля всех и Бо́га, даждь нам сло́во, Препе́тая, я́ко да возмо́жем пе́ти Тя, су́щую Засту́пницу ро́да на́шего.
Песнь 9
Ирмо́с: Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и, Тя ублажа́ем.
А́ще и тща́хуся безбо́жнии в темни́цах те́мных сокры́ти тя, священному́чениче терпеливоду́шне, оба́че Госпо́дь яви́ тя испове́дника Своего́ всем конце́м земли́ на́шея.
Дерзнове́ние ко Влады́це всех име́я, свя́те Ге́рмане, Тому́ моли́ся во благоче́стии нам пребыва́ти, и спасти́ся душа́м на́шим.
Днесь па́мять твоя́, святи́телю и испове́дниче, па́че со́лнца возсия́, всех ве́рных сердца́ веселя́щи, мы́сли просвеща́ющи и неду́ги врачу́ющи, ю́же све́тло пра́зднуем.
Богоро́дичен: Просвети́, Чи́стая, ду́шу мою́, грехми́ потемне́вшую, и ве́чнующаго пла́мене изба́ви мя хода́тайством Твои́м, я́ко да с весе́лием просла́влю Твое́ вели́чие.
Свети́лен:
Пресве́тлым све́том Со́лнца Пра́вды озаря́емь, святи́телю Христо́в Ге́рмане, просвеще́ние испроси́ нам, грехми́ омраче́нным, да возмо́жем воспе́ти светоза́рное твое́ торжество́.
Сла́ва, и ны́не, Богоро́дичен:
О Де́во Благода́тная, зе́млю на́шу изображе́нии честна́го ли́ка Твоего́, я́ко зна́меньми благоволе́ния, обогати́вшая! Приими́ благодаре́ние сие́ и от лю́тых бед Оте́чество на́ше изба́ви, вси бо Тя, я́ко Цари́цу ро́да христиа́нскаго, велича́ем.
На хвали́тех стихи́ры, глас 5.
Подо́бен: Ра́дуйся, Живоно́сный Кре́сте:
Ра́дуйся, священному́ченниче Ге́рмане,/ светоза́рное Боже́ственнаго Ду́ха обита́лище,/ му́чениче непоколеби́мый,/ па́стырю кро́ткий и ми́лостивый!/ Ты страда́ньми Ца́рствия Небе́снаго дости́гл еси́,/ те́мже моли́ Всеблага́го Бо́га,/ да укрепи́т нас благода́тию Свое́ю,/ во е́же благоче́стно житие́ соверша́ти// и спасти́ся душа́м на́шим.
Ра́дуйся, Ге́рмане пресла́вне,/ Це́ркве Ру́сския похвало́ и утвержде́ние,/ и́стинный сы́не Оте́чества на́шего,/ святи́телей благо́е украше́ние!/ Ты, же́ртву безкро́вную пе́рвее благогове́йне соверша́я,/ по́слежде себе́ сама́го в же́ртву живу́ю прине́сл еси́,/ и ве́рность Христу́ да́же до сме́рти яви́л еси́./ Ему́же ны́не о нас те́пле моли́ся,// низпосла́ти душа́м на́шим мир и ве́лию ми́лость.
Ра́дуйся, Ге́рмане пречу́дне,/ Це́ркве Ру́сския сто́лпе непоколеби́мый!/ Ты во дни гоне́ний в земли́ на́шей/ темни́чныя у́зы и рабо́ты го́рькия му́жественне претерпе́л еси́,/ и смерть, я́ко приобре́тение блаже́нныя жи́зни,/ досто́йно и ра́достно сре́тил еси́./ Те́мже Христу́, свя́те, моли́ся,/ дарова́ти Оте́честву на́шему мир// и душа́м на́шим ве́лию ми́лость.
Сла́ва, глас 6:
Прииди́те, ве́рнии,/ соста́вим лик пресве́тлаго торжества́/ в па́мять священному́ченика Ге́рмана,/ сей бо, ско́рби и боле́зни претерпева́я,/ ми́ру сему́ распя́ся/ и жизнь свою́ Христу́ Бо́гу предаде́./ Ны́не в ра́дости святы́х предстои́т Престо́лу Бо́жию/ и мо́лит Триеди́наго Бо́га// о спасе́нии душ на́ших.
И ны́не, Богоро́дичен, глас то́йже:
Богоро́дице, Ты еси́ Лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы и священному́чеником Ге́рманом,// поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша. Прича́стен: В па́мять ве́чную бу́дет пра́ведник, от слу́ха зла не убои́тся.