Ме́сяца ноября́ в 28-й день
Преподобному́чеников Рафаи́ла и Вике́нтия О́птинских

НА ВЕЧЕ́РНИ

На Го́споди, воззва́х: стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ увенча́ем Рафаи́ла и Вике́нтия,/ разделе́нныя гоне́нием/ и совоку́пленныя ду́хом,/ му́чеников равностоя́тели?/ О́ваго у́бо я́ко бесо́в прогони́теля,/ о́ваго же я́ко страсте́й умертви́теля;/ сих бо вои́стину безсме́ртныя сла́вы венцы́/ венча́ет Христо́с Бог наш,// име́яй ве́лию ми́лость.

Ки́ими пе́сненными добро́тами/ воспое́м Рафаи́ла и Вике́нтия?/ О́птинския зве́зды мы́сленныя,/ твердь церко́вную озаря́ющия,/ жития́ ста́рцев досто́йныя подража́тели,/ побо́рники оте́ческих преда́ний,/ ревни́тели ве́ры и благоче́стия,/ воздержа́ния рачи́тели/ и моли́твы изря́дныя де́латели,/ е́юже Христа́ стяжа́ша блаже́ннии,// подаю́щаго ве́лию ми́лость.

Ки́ими духо́вными пе́сньми/ похва́лим Рафаи́ла и Вике́нтия?/ Безбо́жия зи́му разори́вшия,/ све́тлыя Сло́ва лучи́,/ доброде́тели и кро́тости зерца́ла,/ О́птины пу́стыни украше́ния,/ мона́шествующим укрепле́ние,/ сыново́м Росси́йским но́вую похвалу́,/ Це́ркве изря́дныя служи́тели,/ и́миже Христо́с богобо́рныя низложи́,// име́яй ве́лию ми́лость.

Сла́ва, глас 6:

Пра́вды и́го подъя́сте,/ и, крест на ра́мена взе́мше,/ страда́ньми зе́млю Ру́сскую украси́сте,/ и, те́рния безбо́жия искорени́вше,/ цве́ты благоче́стия пра́ведным о Бо́зе житие́м насади́сте./ Сего́ ра́ди плоды́ ве́чныя жи́зни стяжа́сте, доблему́дрии,/ о нас Христа́ моли́те, Рафаи́ле и Вике́нтие,// ве́рою и любо́вию соверша́ющих ва́ше торжество́.

И ны́не, Богоро́дичен, глас то́йже: Кто Тебе́ не ублажи́т:

На стихо́вне стихи́ры, глас 2.

Подо́бен: Егда́ от Дре́ва:

Рафаи́ле, бесо́в прогони́телю,/ неду́гов душе́вных цели́телю,/ мона́хов похвало́, свяще́нников украше́ние,/ сто́лпе ве́ры непоколеби́мый,/ ты, безбо́жныя изобличи́в моли́твою,/ ве́рныя к славосло́вию Бо́га возста́вил еси́./ Изба́ви ста́до твое́ от волко́в лю́тых,/ тя бо моли́твенника Бо́гу прия́тна стяжа́хом// и, тобо́ю хва́лящеся, торжеству́ем.

Стих: Честна́ пред Го́сподем// смерть преподо́бных Его́.

Вике́нтие, по́стников похвало́,/ ча́до избра́нное Некта́рия преподо́бнаго,/ кро́тости сосу́де,/ уста́ молчали́вая,/ у́ме чи́стый и к Бо́гу моли́твенный,/ тве́рдая на стра́сти побе́до,/ разреши́ ны от неду́гов душе́вных,/ и вся восхваля́ющия тя// просвети́ богоуго́дными твои́ми моли́твами.

Стих: О Тебе́ хва́лимся весь день,// и о и́мени Твое́м испове́мыся во век.

Рафаи́ле, свяще́нников добро́то,/ Вике́нтие, мона́хов сла́во,/ О́птинстии страда́льцы,/ преподо́бных сы́нове,/ за Христа́ пострада́вшии и безбо́жныя посрами́вшии,/ приле́жно Бо́гу со дерзнове́нием моли́теся,/ е́же избежа́ти нам сете́й вра́жиих,/ и ва́ми Бо́гу прибли́житися,// и в рай сла́дости всели́тися.

Сла́ва, глас 8:

О́птина пу́стынь ва́ми хва́лится,/ доброму́дрии во́ини Христо́вы,/ вы бо я́ко стре́лы избра́нны в ту́ле яви́стеся,/ и многомяте́жное по́лчище безбо́жных уязви́сте,/ и, бе́сы лука́выя посрами́вше,/ к Не́бу страда́нием устреми́стеся,/ иде́же со Христо́м пребыва́юще,// мо́литеся о душа́х на́ших.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

Дво́ице боголюби́вая и благонра́вная,/ О́птинския оби́тели цве́ти благоуха́ннии,/ во́ини избра́ннии му́ченическаго ли́ка,/ страда́ньми свои́ми зе́млю Ру́сскую просла́вльшии,/ Рафаи́ле доблему́дре и Вике́нтие сла́вне,/ моли́теся Христу́, добропобе́днии,// умири́ти мир и спасти́ ду́ши на́ша.

НА У́ТРЕНИ

По 1-м стихосло́вии седа́лен, глас 1:

Посто́м укрепля́еми и кресто́м огражда́еми, мо́ре жите́йское невреди́мо преплы́ли есте́, всехва́льнии, и, лю́тую бу́рю преше́дше, ти́хими и непреста́нными моли́твами врага́ победи́ли есте́, Рафаи́ле и Вике́нтие, моли́теся Христу́ о нас, па́мять ва́шу ны́не соверша́ющих.

Сла́ва, и ны́не, Богоро́дичен:

От мяте́жа страсте́й и треволне́ний жите́йских ду́шу мою́ изми́, Богоневе́стная Де́во, и к тишине́ добронра́внаго жития́ напра́ви мя, при́сно бе́дствующаго, да спаса́емый покро́вом Твои́м вы́ну возсыла́ю Тебе́ благода́рственная.

По 2-м стихосло́вии седа́лен, глас 8.

Подо́бен: Прему́дрости:

Из оби́тели О́птинския изгна́ннии и в темни́цах затворя́емии, преще́ний вра́жиих не устраши́лися есте́, Рафаи́ле и Вике́нтие, оба́че испове́данием ва́шим уста́ клеветли́вая загради́ли есте́, и Бо́га страда́нием и сме́ртию просла́вили есте́. Моли́теся и нам, во оби́тели ва́шей подвиза́ющимся, ве́ру правосла́вную сохрани́ти и доброде́телей плоды́ Христу́ принести́.

Сла́ва, и ны́не, Богоро́дичен:

В ско́рбех ско́рая Помо́щница, в беда́х покро́в и заступле́ние, в изнеможе́нии су́щим всеси́льное укрепле́ние Ты еси́, Богодарова́нная Де́во Пречи́стая, с новому́ченическими ли́ки и А́нгельскими во́инствы непреста́нно моли́ да́ти нам грехо́в разреше́ние, и жития́ исправле́ние, и ве́ры утвержде́ние, я́ко да обря́щем ми́лость в День Су́дный.

Кано́н, глас 4,

его́же краегране́сие: Сла́внии венцено́сцы да пою́тся све́тло.

Песнь 1

Ирмо́с: Воспою́ Тебе́, Го́споди Бо́же мо́й,/ я́ко изве́л еси́ лю́ди из рабо́ты еги́петския,// покры́л же еси́ колесни́цы фарао́новы и си́лу.

Светоно́сная па́мять ва́ша, преподобному́ченицы, да озари́т ве́рных сердца́ и освети́т помышле́ния душ на́ших.

Любо́вию подви́гшеся к Распя́тому за ны, теле́с свои́х не пощаде́сте в по́двизех, но сраспя́стеся Христу́ посто́м и моли́твою непреста́нною.

Адама́нта крепча́йшаго Вике́нтия по́стническое житие́ пою́, и Рафаи́ла па́стырскую ре́вность прославля́ю, и Христу́ ве́рою зову́: ди́вна во святы́х Твои́х си́ла.

Богоро́дичен: Воплоти́ся нас ра́ди Пребезнача́льное Сло́во от Твои́х, Неискусобра́чная Де́во, ложе́сн, и смерть разори́ Кресто́м, и живо́т подаде́ и нетле́ние.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,// несть бо свят па́че Тебе́, Человеколю́бче.

Не му́дростию мирско́ю, не бога́тством и си́лою хва́лятся преподо́бнии Твои́, Христе́ Бо́же, но Твое́ю нището́ю и страда́ньми: несть бо свят па́че Тебе́, Человеколю́бче, взыва́юще.

Источи́ся благода́ть от усте́н твои́х, Рафаи́ле, в правосла́вном испове́дании всекра́сном, нечести́вых ужаса́ющем и де́моны прогоня́ющем.

И твое́ тве́рдое испове́дание, Вике́нтие, я́ко гора́ непоколеби́мая пребы́сть, воспяща́я мо́ре жите́йское и во́лны богобо́рныя уничижа́я.

Богоро́дичен: Весть от го́рних высо́т прии́м Гаврии́л, Тебе́ целова́ние принесе́, Богора́дованная, я́ко зачне́ши Сло́во О́тчее и роди́ши пло́тию Безле́тнаго.

Седа́лен, глас 4.

Подо́бен: Ско́ро предвари́:

В ско́рбех и беда́х, в гоне́ниих и гла́дех до́блественне проидо́сте, всехва́льнии, и я́ко зла́то в горни́ле искуше́ний искуси́стеся, О́птинстии подви́жницы. Те́мже изба́вите нас от належа́щих скорбе́й, ва́шими ко Христу́ моли́твами.

Сла́ва, и ны́не, Богоро́дичен:

Лет превы́шше и пре́жде век, Бо́га в ле́то родила́ еси́ преесте́ственне, пло́тию Бо́га и Челове́ка, Пречи́стая. Те́мже Тя Богоро́дицу и́стинно и госпо́дьственне вси испове́дающе, приле́жно Ти вопие́м: сла́вы ве́чныя нас сподо́би.

Песнь 4

Ирмо́с: Среде́ двою́ разбо́йнику/ позна́лся еси́ на Кресте́, Христе́ Бо́же,/ взя́тся со́лнце стра́хом,/ и луна́ ста в чи́не свое́м:// сла́ва си́ле Твое́й, Го́споди.

Еле́ем по́стничества во оби́тели О́птинстей пома́застеся, преподо́бнии, и, моли́твою чресла́ ва́ших по́мыслов препоя́савше, к му́ченичеству устреми́стеся, пою́ще: сла́ва си́ле Твое́й, Го́споди.

Нога́ми ста́сте на правоте́, ру́ки же подъя́сте ко Всевы́шнему, и во усте́х испове́дание кра́сное держа́сте, взыва́юще: сла́ва си́ле Твое́й, Го́споди.

Богоро́дичен: Ца́рскою порфи́рою оде́яна, Де́во, в неве́стнический приво́диши черто́г и́же де́вство обещава́ют обе́ты и́ноческими и до кро́ве подвиза́ются, вопию́ще: сла́ва си́ле Твое́й, Госпоже́ Пречи́стая.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,// воспева́ем Тя, Человеколю́бче.

Ева́нгельским сло́вом воспита́вся изде́тска, от ю́ности сло́во де́лом испо́лнил еси́, те́мже подаде́ тебе́ Сло́во Бо́жие власть на де́моны, и́хже сло́вом твои́м изгна́л еси́, свя́те Рафаи́ле.

На Го́спода наде́жду возложи́в, не убоя́лся еси́ челове́ческаго преще́ния, те́мже изгна́ние и нищету́ доблему́дренно поне́сл еси́, и Го́спода возвели́чил еси́ испове́данием твои́м, сла́вне Вике́нтие.

О́птинския страда́льцы пе́сненно да воспою́тся, и́же, лю́тыя безбо́жныя зимы́ не убоя́вшеся, Го́спода я́ко кра́сное со́лнце в сердца́х свои́х носи́ша, те́мже и лед безбо́жия растопи́ша моли́твами свои́ми.

Богоро́дичен: Со́лнца Пра́вды черто́же огнезра́чный, моя́ непра́вды попали́ Твои́ми моли́твами, и возсия́й мне све́тлою заре́ю обраще́ния, и на стези́ доброде́лания напра́ви.

Песнь 6

Ирмо́с: Да не погрузи́т мене́ бу́ря водна́я,/ ниже́ пожре́т мене́ глубина́:/ отве́ржен бо есмь/ во глубины́ се́рдца морска́го зол мои́х./ Тем зову́, я́ко Ио́на:/ да взы́дет от тли зол живо́т мой// к Тебе́, Бо́же.

Цевни́цы, дви́жимыя Ду́хом, яви́лися есте́, Рафаи́ле и Вике́нтие, и, умерщвле́ние страсте́й по́стничеством стяжа́вше, я́ко тимпа́ны, безбо́жия лжу оглуши́ли есте́.

И́стиннии побо́рницы оте́ческих преда́ний яви́лися есте́, доблему́дрии О́птинстии отцы́, вы бо, в боле́знех су́ще, по́двига не оста́вили есте́, и в гони́тельных озлобле́ниих Христа́ пости́гли есте́.

Да заградя́тся моле́нии ва́шими уста́ безбо́жных в коне́ц, и да прии́дут ти́и в ра́зум и́стины, Бо́га бо не ве́дуще и Христа́ не прославля́юще, при́сно служи́телей Его́ в пребезу́мии свое́м умертви́ти тща́тся.

Богоро́дичен: А́ще и сни́де Безпло́тный во утро́бу Твою́, и в плоть от крове́й Твои́х облече́ся, Чи́стая, но и по рождестве́ Де́ву Тя испове́дуем и присноде́вственныя добро́ты Твоя́ воспева́ем.

Конда́к, глас 2.

Подо́бен: Тве́рдыя:

Тве́рдии ве́ры столпи́,/ в нощи́ безбо́жия свети́льницы благоче́стия светле́йшии/ и на стра́сти му́жественне подвиза́вшиися,/ лука́вых бесо́в прогони́телие,/ Рафаи́ле и Вике́нтие,/ моли́теся ко Го́споду,/ в Правосла́вии Оте́честву ва́шему утверди́тися// и спасти́ся душа́м на́шим.

И́кос:

А́нгельскому житию́ поревнова́вше, во оби́тель О́птинскую притекли́ есте́, преподобному́ченицы Рафаи́ле и Вике́нтие, иде́же от богоно́сных отце́в до́брому по́двигу навы́кше, на стра́сти вельми́ подвиза́лися есте́ и мудрова́ние пло́ти умертви́ли есте́, во дни же гоне́ний лю́тых в земли́ на́шей ве́рность ко Христу́ да́же до сме́рти яви́ли есте́. Те́мже, я́ко ве́лие дерзнове́ние к Нему́ стяжа́вшии, моли́теся, Оте́честву ва́шему в Правосла́вии утверди́тися и спасти́ся душа́м на́шим.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди// Бо́же оте́ц на́ших.

Послуша́нию навы́к своея́ во́ли отсече́нием и царю́ да́же до проли́тия кро́ве послужи́в, Рафаи́ле, па́ки в полк и́ноческий вчини́лся еси́ бра́тися со враги́ неви́димыми.

О́птинских ста́рцев чудеса́, исцеле́ния и моли́твенная бде́ния ви́дев, тех богоуго́дному житию́ все́ю душе́ю подража́л еси́, Рафаи́ле, те́мже и даде́ся ти от Бо́га благода́ть исцеле́ния.

Ю́ношески проти́ву греха́ подвиза́тися восхоте́л еси́, Вике́нтие, те́мже пост я́ко трапе́зу сла́дкую возлюби́л еси́, и ста́рцу Некта́рию во всем послу́шен был еси́. Сего́ ра́ди и ве́тхаго мудрова́ния совле́клся еси́.

Богоро́дичен: Тобо́ю, Богоневе́стная Де́во, врази́ на́ши побора́ются, Тобо́ю де́мони низлага́ются, я́ко Помо́щница, Засту́пница и Взбра́нная Воево́да ро́ду челове́ческому нарекла́ся еси́.

Песнь 8

Ирмо́с: Царя́ Христа́,/ Его́же испове́даша плене́ннии о́троцы,/ в пещи́ глаго́люще ве́лиим гла́сом:// вся дела́, по́йте Го́спода.

Светоно́сная па́мять ва́ша, треблаже́ннии отцы́, кра́сным испове́данием блиста́ется и озаря́ет ве́рных сердца́, вопию́щих: вся дела́, по́йте Го́спода.

Я́коже дре́вле в халде́йстей пещи́ трие́ богому́дрии о́троцы в ве́ре не поколеба́шася, та́ко и терпеливоду́шнии Вике́нтий, Рафаи́л и священному́ченик Серафи́м в пещи́ гоне́ний не устраши́шася, вопию́ще: вся дела́, по́йте Го́спода.

Тро́ичен: С Серафи́мы ны́не песнь хвале́бную пое́те и с преподо́бными отцы́ О́птинскими Тро́ицу Единосу́щную богосло́вите, зову́ще: вся дела́, по́йте Го́спода.

Богоро́дичен: Вы́шши Херуви́м взя́тся сла́ва Твоя́, Богоро́дице, я́ко Бог, почива́яй на них, все́лься в Тя, и воплоти́ся нас ра́ди, и Тебе́ Де́ву сохрани́ Чи́стую.

Песнь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л,/ и вознесе́ смире́нныя Бог Изра́илев./ В ни́хже посети́ нас Восто́к с высоты́,// и напра́вил ны есть на путь ми́ра.

Еди́наго Христа́ всем се́рдцем возлюби́вше, страда́ний лю́тых не убоя́стеся, Вике́нтие сла́вне и Рафаи́ле доблему́дре, те́мже и смерть му́ченическую претерпе́вше, вене́ц жи́зни от Него́ прия́сте. О нас моли́теся, па́мять ва́шу соверша́ющих.

Тве́рдое испове́дание ве́ры ва́шея, преподо́бнии отцы́, де́моны устраши́, льсти́вая уста́ безбо́жных загради́ и я́ко чи́стая же́ртва Бо́гу принесе́ся, Его́же превозно́сим во вся ве́ки.

Ле́тняя ва́ша па́мять, преподобному́ченицы Вике́нтие и Рафаи́ле, притече́ я́ко светоно́сный день, тьму потребля́ющи нече́стия и сердца́ распала́ющи любо́вию ко Го́споду.

Богоро́дичен: От де́вственных крове́й Твои́х, Де́во Всенепоро́чная, плоть Творца́ всех истка́ся, в ню́же Он обле́кся, воцари́ся над язы́ки, я́ко Бог Изра́илев, и Тебе́ яви́ Цари́цу ми́ру всему́ и Госпожу́ ро́ду избра́нному.

Свети́лен.

Подо́бен: Не́бо звезда́ми:

Украси́ся твердь церко́вная ва́шими страда́ньми, богоно́сцы терпеливоду́шнии, и тьма безбо́жия просвети́ся ва́шим тве́рдым испове́данием ве́ры правосла́вныя. О нас моли́те, му́ченицы святи́и, тьмы грехо́вныя нам изба́витися и све́та невече́рняго дости́гнути.

Сла́ва, и ны́не, Богоро́дичен:

Тьму потреби́ла еси́ греха́, ро́ждши Христа́ Жизнода́вца, доброде́тельми и нетле́нием украси́вшаго на́ше естество́ в воплоще́нии. Сего́ ра́ди благода́рне зове́м Ти: ра́дуйся, Де́во, Свет неизрече́нно роди́вшая.

На хвали́тех стихи́ры, глас 4.

Подо́бен: Дал еси́ зна́мение:

Ве́лиим зна́мением/ безбо́жныя ужаси́л еси́,/ жену́ одержи́му исцели́в,/ и уста́ богоху́льная/ загради́л еси́, Рафаи́ле,/ клеве́щущая на Врача́ всех челове́ков./ Сего́ ра́ди сла́вим тя просла́вльшаго/ Иису́са Всеси́льнаго,// Спа́са душ на́ших.

Посто́м умертви́в стра́сти/ и доброде́тельми ду́шу оживи́в,/ моли́твою непреста́нною/ о́чи душе́вныя просвети́л еси́/ и, нощь безбо́жия разори́в,/ свети́льник неугаси́мый показа́лся еси́./ Те́мже моли́ся, богому́дре Вике́нтие,/ Христу́ Всеси́льному// спасти́ и просвети́ти ду́ши на́ша.

Я́ко столпи́ церко́внии,/ я́ко свети́льницы пресве́тлии,/ я́ко во́ини Христо́вы/ яви́лися есте́, Рафаи́ле и Вике́нтие:/ вы бо ору́жием Креста́ и глаго́лом испове́дания/ на де́моны побе́ду стяжа́ли есте́,/ и безбо́жныя враги́ посрами́ли есте́/ любо́вию ко Го́споду// и Спа́су ду́ш на́ших.

Сла́ва, глас 8:

До́брый по́двиг соверши́сте,/ богому́дрии страда́льцы Рафаи́ле и Вике́нтие,/ вы бо, зако́нно подвиза́вшеся/ и стра́сти плотски́я умертви́вше,/ страда́нием в нетле́ние облеко́стеся/ и же́ртвы одушевле́нныя Бо́гу бы́сте./ Сего́ ра́ди любо́вию вам вопие́м:/ моли́теся Христу́, добропобе́днии,/ утверди́ти в Правосла́вии Оте́чество ва́ше// и спасти́ ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.

НА ЛИТУРГИ́И

Блаже́нны от кано́на святы́х, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Апо́стол к Ри́мляном, зача́ло 99. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: Ра́дуйтеся, пра́веднии, о Го́споде, пра́вым подоба́ет похвала́.