Ме́сяца сентября́ в 21-й день
Преподобному́ченика Маври́кия (Полета́ева)
и му́ченика Васи́лия Кондра́тьева

Тропа́рь, глас 5:

На ка́мени благоче́стия утверди́вся,/ па́стырь ре́вностный яви́лся еси́,/ преподобному́чениче Маври́кие сла́вне./ Моли́твою и посто́м, я́ко мече́м обоюдоо́стрым, вооружи́вся,/ вра́жеския наве́ты препобеди́л еси́,/ о слу́жбе церко́вней да́же во у́зах раде́я,/ тя́жкия му́ки и са́мую смерть за Христа́ во смире́нии прия́л еси́,/ и на по́двиг Васи́лия сострада́льца твоего́ укрепи́л еси́./ Те́мже ны́не моли́ся/ благода́ть Свята́го Ду́ха нам стяжа́ти// и Ца́рствия Небе́снаго дости́гнути.

Конда́к, глас 1:

Благослове́ние Кроншта́дтскаго па́стыря Иоа́нна исполня́я,/ путь служе́ния Це́ркви и лю́дем избра́л еси́,/ о во́инех же земны́х попече́ние име́я,/ сам во́ин Христо́в добропобе́дный яви́лся еси́/ и, а́нгельскаго жития́ взыску́я,/ под сень преподо́бнаго Се́ргия устреми́лся еси́,/ иде́же служе́ния во хра́ме Всех святы́х сподо́бился еси́,/ преподобному́чениче Маври́кие./ Во дни же гоне́ний на Це́рковь Ру́сскую,/ вку́пе с му́чеником Васи́лием да́же до сме́рти пострада́л еси́./ И ны́не со все́ми святы́ми Тро́ицу Живонача́льную прославля́я,/ моли́ спасти́ся душа́м на́шим.