Ме́сяца июля в 31-й день
Предпра́зднство происхожде́ния Честна́го и Животворя́щаго Креста́
Госпо́дня. И свята́го священному́ченика Вениами́на, митрополи́та
Петрогра́дскаго, и и́же с ним пострада́вших преподобному́ченика
Се́ргия и му́чеников Ю́рия и Иоа́нна

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6:

Измла́да неле́ностно поуча́яся в зако́не Госпо́днем,/ чи́стою любо́вию к Бо́гу возгоре́лся еси́/ и му́ченическаго по́двига жела́нием уязви́лся еси́,/ священному́чениче Вениами́не,/ святи́телю сла́вный Це́ркве Ру́сския./ Егда́ же приведе́ тя Христо́с ко жре́бию о́ному,/ ничесо́же убоя́вся, благода́рне рекл еси́:// сла́ва Тебе́, Бо́гу на́шему, во ве́ки.

Ви́дя Госпо́дь доброде́тели твоя́,/ са́ном архиере́йским возвели́чи тя/ и, во укрепле́ние ве́ры правосла́вныя,/ во дни гоне́ния безбо́жнаго на Це́рковь Ру́сскую/ главо́ю митропо́лии Петрогра́дския поста́ви./ Ты же, священному́чениче Вениами́не,/ па́ству твою́ му́дре ко Христу́ путеводя́,/ о́браз ве́ры и терпе́ния всем яви́л еси́/ и испове́дник непоколеби́мый показа́лся еси́.// Сего́ ра́ди тя с любо́вию прославля́ем.

Избра́нный Бо́гом на престо́л святи́телей Петрогра́дских,/ не дал еси́ поко́я телеси́ твоему́,/ но, во вся преде́лы сто́льнаго гра́да стопы́ твоя́ направля́я,/ ни́щия и неду́жныя посеща́л еси́/ и ду́хом смире́ния и милосе́рдия воеди́но па́ству твою́ собира́л еси́,/ священному́чениче Вениами́не, о́тче наш./ Те́мже мо́лим тя:/ не забу́ди и нас, любо́вию тя почита́ющих,// но ми́лостивно посети́ ду́ши на́ша.

Глаго́лет Госпо́дь во святе́м Ева́нгелии:/ не убо́йтеся от убива́ющих те́ло,/ души́ же не могу́щих уби́ти./ Сего́ ра́ди и ты, свя́те Вениами́не,/ сло́ву Бо́жию после́дуя,/ преще́ний вла́сти безбо́жныя не устраши́лся еси́,/ но, укрепля́емь благода́тию Ду́ха Пресвята́го,/ му́ченическую кончи́ну до́блественне прия́л еси́./ И ны́не моли́ся о всех нас,/ да пребу́дем и мы неколе́блеми и тве́рди в ве́ре правосла́вней// во вся дни живота́ на́шего.

Сла́ва, глас 1:

Бо́гу себе́ преда́вше,/ стезе́ю любве́ в жи́зни сей ше́ствовасте,/ святи́телю Вениами́не и преподобному́чениче Се́ргие,/ вку́пе с духо́вными ча́ды Ю́рием и Иоа́нном,/ егда́ же бу́ря нече́стия на Це́рковь Ру́сскую воздви́жеся,/ вы, преще́ний и лжесвиде́тельств мучи́телей не убоя́вшеся/ и ре́вностию о Бо́зе связу́емии,/ да́же до кро́ве за Христа́ пострада́сте./ Ны́не же, боже́ственным све́том осиява́еми,/ моли́теся приле́жно Бо́гу// дарова́ти нам мир и ве́лию ми́лость.

И ны́не, Креста́, глас то́йже:

Днесь я́ко вои́стину/ святовеща́нный глаго́л Дави́дов коне́ц прия́т:/ се бо я́ве пречи́стых ног Твои́х покланя́емся подно́жию/ и, на сень крилу́ Твое́ю наде́ющеся,/ Всеще́дрый, вопие́м Ти:/ да зна́менается на нас свет лица́ Твоего́./ Правосла́вных люде́й Твои́х рог вознеси́/ честна́го Креста́ Твоего́ воздви́жением,// Христе́ Многоми́лостиве.

Вход. Проки́мен дне и чте́ния.

Дея́ний святы́х апо́стол чте́ние (глава́ 4):

Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4):

Во дни о́ны, ви́дяще иуде́и Петро́во дерзнове́ние и Иоа́нново/ и разуме́вше, я́ко челове́ка некни́жна еста́ и про́ста,/ дивля́хуся, зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те?/ Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.

Дея́ний святы́х апо́стол чте́ние (главы́ 6 и 7):

Во дни о́ны, Стефа́н испо́лнь ве́ры и си́лы/ творя́ше зна́мения и чудеса́ ве́лия в лю́дех./ Воста́ша же не́цыи от со́нма глаго́лемаго Ливерти́нска и Кирине́йска и Алекса́ндрска,/ и и́же от Килики́и и Аси́и, стяза́ющеся со Стефа́ном./ И не можа́ху проти́ву ста́ти прему́дрости и Ду́ху, И́мже глаго́лаше./ Тогда́ подусти́ша му́жи глаго́лющия,/ я́ко слы́шахом его́ глаго́люща глаго́лы ху́льныя на Моисе́я и на Бо́га./ Сподвиго́ша же лю́ди и ста́рцы и кни́жники,/ и напа́дше восхи́тиша его́ и приведо́ша на со́нмище./ Поста́виша же свиде́тели ло́жны глаго́лющия,/ я́ко челове́к сей не престае́т глаго́лы ху́льныя глаго́ля на ме́сто свято́е сие́ и зако́н./ Слы́шахом бо его́ глаго́люща, я́ко Иису́с Назоре́й сей разори́т ме́сто сие́/ и измени́т обы́чаи, я́же предаде́ нам Моисе́й./ И воззре́вше нань вси седя́щии в со́нмищи, ви́деша лице́ его́ я́ко лице́ А́нгела./ Рече́ же архиере́й: а́ще у́бо сия́ та́ко суть?/ Он же рече́: му́жие бра́тие и отцы́, послу́шайте./ Бог сла́вы яви́ся отцу́ на́шему Авраа́му су́щу в Месопота́мии,/ пре́жде да́же не всели́тися ему́ в Харра́нь,/ и рече́ к нему́: изы́ди от земли́ твоея́ и от ро́да твоего́ и от до́му отца́ твоего́,/ и прииди́ в зе́млю, ю́же а́ще ти покажу́./ Тогда́ изше́д от земли́ Халде́йския, всели́ся в Харра́нь,/ и отту́ду, по уме́ртвии отца́ его́,/ пресели́ его́ в зе́млю сию́, на не́йже вы ны́не живете́,/ и не даде́ ему́ насле́дия в ней, ниже́ стопы́ ногу́./ Соломо́н же созда́ Ему́ храм./ Но Вы́шний не в рукотворе́нных це́рквах живе́т, я́коже проро́к глаго́лет:/ Не́бо Мне престо́л есть, земля́ же подно́жие нога́ма Мои́ма./ Кий храм сози́ждете Ми, глаго́лет Госпо́дь, или́ ко́е ме́сто поко́ищу Моему́?/ Не рука́ ли Моя́ сотвори́ сия́ вся?/ Жестоковы́йнии и необре́заннии сердцы́ и ушесы́,/ вы при́сно Ду́ху Свято́му проти́витеся, я́коже отцы́ ва́ши, та́ко и вы./ Кого́ от проро́к не изгна́ша отцы́ ва́ши?/ И уби́ша предвозвести́вшия о прише́ствии Пра́веднаго,/ Его́же вы ны́не преда́теле и уби́йцы бы́сте,/ и́же прия́сте зако́н устрое́нием А́нгельским и не сохрани́сте./ Слы́шаще же сия́, распыха́хуся сердцы́ свои́ми и скрежета́ху зубы́ нань./ Стефа́н же сый испо́лнь Ду́ха Свя́та,/ воззре́в на не́бо, ви́де сла́ву Бо́жию и Иису́са стоя́ща одесну́ю Бо́га, и рече́:/ се ви́жу небеса́ отве́рста и Сы́на Челове́ча одесну́ю стоя́ща Бо́га./ Возопи́вше же гла́сом ве́лиим, затыка́ху у́ши свои́/ и устреми́шася единоду́шно нань,/ и изве́дше вне гра́да, ка́мением побива́ху его́,/ и свиде́телие сне́мше ри́зы своя́ положи́ша при ногу́ ю́ноши нарица́емаго Са́вла,/ и ка́мением побива́ху Стефа́на, моля́щася и глаго́люща: Го́споди Иису́се приими́ дух мой./ Прекло́нь же коле́на, возопи́ гла́сом ве́лиим:/ Го́споди, не поста́ви им греха́ сего́. И сия́ рек у́спе.

На лити́и стихи́ра хра́ма, и святы́м, глас 1:

Креста́ всечестна́го непобори́мая си́ла/ укрепля́ше вас в по́двизе ва́шем,/ святи́телю Вениами́не и преподобному́чениче Се́ргие,/ му́ченицы святи́и Ю́рие и Иоа́нне, бы́сте бо избра́нни, я́ко ве́рнии раби́ Христо́ви,/ сла́внии испове́дницы четверочи́сленнии,/ во о́браз четвероконе́чнаго Креста́ Госпо́дня,// освяща́ющаго концы́ вселе́нныя.

Му́ченицы четверочи́сленнии, непови́нно убие́ннии,/ блаже́н град, и́же прия́т телеса́ ва́ша,/ и земля́, я́же напое́на ва́шими кровьми́,/ вы бо, Христа́ всем се́рдцем возлюби́вше,/ да́же до сме́рти ве́рни Тому́ пребы́ли есте́./ Ны́не же, с ли́ки новому́чеников и испове́дников Це́ркве Ру́сския/ Престо́лу Пресвяты́я Тро́ицы предстоя́ще,/ моли́твы ва́ши Бо́гу вознеси́те,/ да сохрани́т град и страну́ на́шу в ми́ре и единомы́слии// и изба́вит ны от преще́ния Своего́ пра́веднаго.

Сла́ва, глас то́йже:

Егда́ мучи́тели безбо́жнии сме́рти вас предава́ху,/ ты, святи́телю Вениами́не,/ кре́стным зна́мением себе́ огражда́л еси́/ и моли́тву благодаре́ния Бо́гу возноси́л еси́./ Ты же, преподобному́чениче Се́ргие,/ о вразе́х твои́х моли́твенно воздыха́я, вопия́л еси́:/ прости́ им, Бо́же, не ве́дят бо, что творя́т./ Ку́пно с ни́ми и вы, му́ченицы Иоа́нне и Ю́рие,/ страх сме́рти презре́вше,/ ко страда́нию му́жественно потекли́ есте́/. Ны́не же, святи́и, во сла́ве Небе́сней пребыва́юще,// с ли́ки А́нгельскими Святу́ю Тро́ицу прославля́ете.

И ны́не, Богоро́дичен, глас то́йже: Се испо́лнися Иса́иино прорече́ние:

На стихо́вне стихи́ры, глас 2.

Подо́бен: Егда́ от Дре́ва:

Егда́ лжепа́стырие лука́вии/ власть церко́вную восхи́тити и ста́до слове́сное расточи́ти восхоте́ша,/ тогда́ в бе́гство не обрати́лся еси́,/ архиере́ю до́блестный Вениами́не,/ и корми́ло корабля́ церко́внаго,/ е́же вручи́ тебе́ Госпо́дь, а не челове́к,/ в ру́це чужди́х не пре́дал еси́,/ но па́стырь до́брый показа́лся еси́,// полага́яй ду́шу твою́ за о́вцы твоя́.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Егда́ отсту́пники, преда́ния церко́вная отверга́ющия/ и но́выя обы́чаи вводя́щия,/ от Це́ркве Святы́я отлучи́л еси́,/ тогда́ ты, святи́телю Вениами́не,/ те́ми в ру́це безбо́жных пре́дан был еси́,/ и́же на смерть тя непра́ведне осуди́ша./ Сего́ ра́ди му́ченическим венце́м украси́лся еси́/ и Небе́сная сокро́вища обре́л еси́,// све́тлая красото́ гра́да на́шего.

Стих: Честна́ пред Го́сподем// смерть преподо́бных Его́.

Егда́ безбо́жнии мучи́телие/ преще́нии льсти́выми тя устраша́ху/ и во́ли свое́й покори́ти тща́хуся,/ тогда́, иера́рше преди́вне,/ ре́вностию по Бо́зе распала́емь,/ в броню́ пра́вды обле́клся еси́/ и, тве́рдость ве́ры неколеби́мо явля́я,/ му́ченическую смерть прия́л еси́,// ве́рным лю́дем о́браз терпе́ния показу́я.

Сла́ва, глас то́йже:

Ведо́му ти на суди́ще беззако́нное,/ вси ве́рнии на сто́гнах Петро́ва гра́да/ срета́ху тя, страстоте́рпче святы́й Вениами́не,/ и, во умиле́нии серде́чнем коле́на своя́ преклоня́юще,/ со слеза́ми воспева́ху песнь церко́вную:// спаси́, Го́споди, лю́ди Твоя́.

И ны́не, глас то́йже:

Ты ми покро́в держа́вен еси́,/ трича́стный Кре́сте Христо́в:/ освяти́ мя си́лою твое́ю,// я́ко да ве́рою и любо́вию покланя́юся и сла́влю тя.

На благослове́нии хле́бов тропа́рь свята́го два́жды, глас 1:

Свети́льник всесве́тлый во гра́де свята́го Петра́ яви́лся еси́,/ па́стырю до́брый, священному́чениче о́тче Вениами́не./ Любо́вь и милосе́рдие в сердца́х ве́рных насажда́я,/ благотвори́ти призыва́л еси́ терпя́щим глад и нищету́./ Сего́ ра́ди и мы к тебе́ прибега́ем/ и с ве́рою вопие́м ти:/ моли́ Ми́лостиваго Бо́га,/ оте́чество на́ше в Правосла́вии и благоче́стии утверди́ти,/ мир Це́ркви дарова́ти// и душа́м на́шим ве́лию ми́лость.

И тропа́рь Креста́, глас 1:

Спаси́, Го́споди, лю́ди Твоя́,/ и благослови́ достоя́ние Твое́,/ побе́ды на сопроти́вныя да́руя,// и Твое́ сохраня́я Кресто́м Твои́м жи́тельство.

НА У́ТРЕНИ

На Бог Госпо́дь: тропа́рь Креста́, два́жды. Сла́ва, тропа́рь свята́го. И ны́не, тропа́рь Креста́.

По 1-м стихосло́вии седа́лен, глас 3:

Посрами́л еси́, свя́те Вениами́не, лжеучи́тели нечести́выя,/ сло́во ева́нгельское искази́вшия и разделе́ние в Це́ркви произве́дшия./ Тще́тно бо ти́и словесы́ льсти́выми склоня́ху тя от и́стины Христо́вы отступи́ти/ и па́ству, ю́же ти Бог вручи́, оста́вити./ Ты же, святи́телю, десни́цею Бо́жиею укрепля́емь,/ тверд и непрекло́нен до конца́ пребы́л еси́.

Сла́ва, и ны́не, Богоро́дичен:

Пресвята́я Де́во, Отрокови́це Преблагослове́нная,/ блаже́нна еси́, Христа́ Бо́га ро́ждши,/ те́мже облаже́нствуй Того́ во́ли повину́ющияся.

По 2-м стихосло́вии седа́лен, глас 8:

А́ще и торжествова́ху беззако́ннии,/ и́же иска́ша поги́бели твоея́, архипа́стырю и му́чениче достосла́вне,/ но привре́менне и па́мять их поги́бе с шу́мом./ Твое́ же и́мя, я́ко И́стины побо́рника, сия́ет на Небесе́х/ и сла́ва твоя́ во ве́ки пребыва́ет неизме́нна.

Сла́ва, и ны́не, Богоро́дичен:

Пречи́стая Богоро́дице, Спа́са Христа́ неизрече́нно ро́ждшая/ Его́же моли́ со священному́чеником Вениами́ном и все́ми святы́ми,/ во е́же просвети́ти и спасти́ род наш.

Велича́ние:

Велича́ем вас,/ святи́и новому́ченицы Вениами́не, Се́ргие, Ю́рие и Иоа́нне,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ нас.

Глаго́лах о свиде́ниих Твои́х пред цари́ и не стыдя́хся.

Вси язы́цы обыдо́ша мя, и и́менем Госпо́дним противля́хся им.

Тебе́ ра́ди умерщвля́емся весь день, вмени́хомся я́ко о́вцы заколе́ния.

Кре́пость моя́ и пе́ние мое́ Госпо́дь и бысть мне во спасе́ние.

По полиеле́и седа́лен, глас 1:

Испыта́ тя Госпо́дь, святи́телю сла́вне, и обре́те ве́рна Себе́/ и, я́ко зла́то в пещи́ страда́ний, очи́стив,/ я́ко во́лну, убели́ тя./ Ты же, проше́д сквозе́ огнь и во́ду,/ обре́л еси́ ве́чный поко́й, о ка́меню драги́й, украше́ние Це́ркве на́шея.

Сла́ва, и ны́не, Богоро́дичен:

Честне́йши яви́лася еси́ Херуви́м,/ на земли́ ро́ждшая Христа́, всех Влады́ку,/ Чи́стая Всенепоро́чная Влады́чице.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Небеса́ возвесели́шася во страда́нии ва́шем,/ святи́телю Вениами́не и преподобному́чениче Се́ргие,/ му́ченицы Иоа́нне и Ю́рие,/ во́ини честни́и Христа́ Бо́га на́шего четверочи́сленнии./ Ны́не, во Ца́рствии Небе́снем неразлу́чни пребыва́юще,/ моли́теся ко Го́споду// о умире́нии и спасе́нии душ на́ших.

Кано́н святы́х, глас 8. Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припе́в: Священному́чениче Вениами́не, моли́ Бо́га о нас.

От ю́ности Христа́ всем се́рдцем возлюби́в,/ ше́ствовати а́нгельским путе́м изво́лил еси́,/ в моли́твах же неуста́нных пребыва́я,/ же́ртву духо́вную Бо́гови прине́сл еси́, святи́телю Вениами́не.

Я́коже оте́ц чадолюби́вый яви́лся еси́ мно́гим:/ ни́щим и си́рым, стра́нным и убо́гим, грехми́ обремене́нным и в беда́х и боле́знех су́щим,/ сокруше́ния и ра́ны их исцеля́яй,/ Вениами́не сострада́тельне и пресла́вне.

Простира́л еси́ десни́цу по́мощи одержи́мым неду́гом пия́нства,/ воздержа́ние тем пропове́дуя и жи́знь во Христе́ тех устроя́я,/ наипа́че же о́браз кро́тости и милосе́рдия явля́я, Вениами́не всехва́льне.

Богоро́дичен: Обре́т Тя, Всечи́стая, честне́йшую всея́ тва́ри,/ воплоти́тися из Тебе́ благоволи́ Зижди́тель и Бог всех,/ па́дшаго Ада́ма возста́вити промы́сливый.

Песнь 3

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Сло́вом ева́нгельским па́ству твою́ неле́ностно наставля́я, святи́телю Вениами́не,/ ду́шу твою́ за лю́ди по вся дни полага́л еси́./ Сего́ ра́ди Бо́гом просла́влен бысть,/ я́ко досто́йный архиере́й гра́да свята́го Петра́.

Любве́ ра́ди к Бо́гу во́льней нищете́ покори́лся еси́, архипа́стырю Петрогра́дский,/ те́мже во дни испыта́ний лю́тых Христо́с дарова́ ти благода́ть не то́кмо ве́ровати в Него́,/ но и за Него́ пострада́ти.

О слу́жбах Бо́жиих тща́ние явля́я,/ в моли́твах и бде́ниих с па́ствою при́сно пребыва́л еси́,/ хра́мы же Госпо́дни от поруга́ния защища́я,/ правосла́вная бра́тства устроя́л еси́, Вениами́не пресла́вне.

Богоро́дичен: Чистоты́ и де́вства сосу́де избра́нный/ и Сы́на Бо́жия честно́е селе́ние,/ Пренепоро́чную Влады́чицу, прииди́те, ве́рнии, пе́сньми досто́йно почти́м.

Седа́лен, глас 4:

Не поставля́ют свещу́ зажже́нную под спу́дом,/ но на све́щнице, рече́ Госпо́дь./ Та́ко просвети́шася све́том доброде́телей твои́х, о́тче Вениами́не,/ лю́дие Це́ркве Ру́сския,/ соверша́ющии днесь пресла́вно святу́ю па́мять твою́.

Сла́ва, и ны́не, Креста́, глас то́йже.

Подо́бен: Вознесы́йся:

Све́тло не́бо показу́ется па́че со́лнца све́том Кре́стным/ просвеща́ет вся́ческая заре́ю свое́ю./ Те́мже Ты, Человеколю́бче, Спа́се вся́ческих,/ просвети́ ум наш его́ ра́ди и чу́вства:/ мы бо и́мамы того́ ору́жие ми́ру, непобеди́мую побе́ду.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Гони́мыя и му́чимыя небоя́зненно укрепля́л еси́,/ гони́тели же с мучи́тели кро́тко вразумля́л еси́,/ преще́ний тех не страша́ся, святи́телю Христо́в Вениами́не,/ тверд пребыва́я посреде́ всех наве́т вра́жиих.

Стезе́ю пра́вды Христо́вы неукло́нно ше́ствовал еси́/ и па́ству твою́ богому́дре Вениами́не, на путь спасе́ния направля́л еси́, глаго́ля:/ подоба́ет ду́шу свою́ полага́ти за Христа́ да́же до сме́рти.

Не возмого́ша нечести́вии кре́пость души́ твоея́ одоле́ти/ и тве́рдость испове́дания твоего́ победи́ти, священному́чениче досточу́дне,/ ты бо, в се́рдце свое́м побе́дное Креста́ зна́мение нося́,/ ве́ру Христо́ву дерзнове́нно утвержда́л еси́.

Богоро́дичен: О Де́во Неискусобра́чная!/ Ты в рождестве́ Де́вою пребыла́ еси́/ и по рождестве́ Присноде́вою яви́лася еси́./ Тем немо́лчными гла́сы Тя, Влады́чице, велича́ем.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою// Твой мир пода́ждь нам,// Человеколю́бче.

Ще́драго дая́теля лю́бит Госпо́дь,/ вопия́л еси́ в се́рдце твое́м, святи́телю нищелю́бче,/ те́мже, непреста́нное попече́ние о стра́ждущих име́я,/ ве́рных ми́лостыню неоску́дно подава́ти науча́л еси́.

Любо́вию ко а́лчущим боле́знуя,/ моли́тву те́плую ко Пречи́стей Богоро́дице прине́сл еси́/ и ри́зу от честна́го о́браза Ея́,/ я́ко же́ртву доброво́льную, нужда́ющимся пода́л еси́.

Егда́ прии́де вре́мя сму́ты лю́тыя и воста́ния безбо́жных,/ лю́ди от кровопроли́тия прему́дре удержа́л еси́./ Нечести́вии же оболга́ху тя, испове́дниче Христо́в,/ злом за добро́ тебе́ воздава́я.

Богоро́дичен: О Ма́ти Бо́жия, ро́ждшая Всеблаго́е Сло́во!/ Души́ моея́ озлобле́ние исцели́/ и на путь покая́ния напра́ви.

Песнь 6

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Егда́ отсту́пницы нечести́вии,/ преда́ния церко́вная отверга́ющии и нововведе́ния льсти́вно вводя́щии, ополчи́шася на тя,/ тогда́ ты, богому́дре Вениами́не, нело́жно учи́л еси́,/ ка́ко подоба́ет в дому́ Бо́жием жи́ти,/ я́же есть Це́рковь Бо́га Жи́ва, столп и утвержде́ние И́стины.

Егда́ отсту́пницы от ве́ры лжа́ми и клевета́ми оболга́ху тя/ и в ру́це гре́шников преда́ша,/ ты, святи́телю, я́ко и́стинный раб Христо́в, в ве́ре пребыва́я, кро́тце рекл еси́:/ ра́достне ми есть Христа́ ра́ди вся терпе́ти от свои́х и чужди́х.

Пред мучи́тели на суди́щи предстоя́,/ о пра́вде Бо́жией свиде́тельствовал еси́, святи́телю, глаго́ля:/ не вем, я́ко возвести́те ми,/ е́же жи́ти или́ умре́ти./ Оба́че о́чи свои́ горе́ возведу́ и реку́:/ за вся, Го́споди, сла́ва Тебе́.

Богоро́дичен: Гла́с Арха́нгела Гаврии́ла, Де́во Всенепоро́чная, ны́не Тебе́ прино́сим:/ ра́дуйся, Благода́тная, Госпо́дь с Тобо́ю.

Конда́к, глас 6:

От ю́ности крест Христо́в на ра́мо взем,/ и́стинный страж Правосла́вныя Це́ркве яви́лся еси́,/ священному́чениче Вениами́не./ Клевету́, у́зы, оплева́ния, и суд непра́ведный/ от беззако́нных му́жественне претерпева́я,/ святы́ню церко́вную на поруга́ние не пре́дал еси́./ Те́мже и Христо́с да́ром терпе́ния и любве́ тя испо́лни,/ во е́же пред му́ченическою кончи́ною/ со благодаре́нием взыва́ти:// за вся, Го́споди, сла́ва Тебе́.

И́кос:

Яви́ тя Госпо́дь, святи́телю о́тче Вениами́не,/ украше́ние гра́ду на́шему ве́лие,/ ди́внаго предста́теля о лю́дех твои́х,/ и́стиннаго свиде́теля пра́вды Бо́жия,/ наста́вника заблу́ждшим,/ любве́ и кро́тости пра́вило,/ свети́льника во тьме грехо́вней сия́юща,/ му́ченика дерзнове́ннаго,/ испове́дника тве́рдаго,/ столпа́ неколеби́маго Це́ркве на́шея,/ и ве́рнаго служи́теля Своего́, ре́кшаго:/ за вся, Го́споди, сла́ва Тебе́.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

От ю́ности подвиго́м святы́х страстоте́рпцев приобщи́тися жела́я,/ ча́шу страда́ний испи́л еси́, святи́телю Вениами́не./ Те́мже увенча́ тя Госпо́дь венце́м му́ченическим, взыва́юща:/ благослове́н еси́, Го́споди Бо́же, во ве́ки.

Боре́нием вну́тренним в темни́це томи́мь,/ во́ли Бо́жией всеце́ло преда́лся еси́, му́чениче добропобе́дный,/ и, поко́ем Небе́сным испо́лнився, я́ко о́троцы в пещи́ Вавило́нстей воспева́л еси́:/ благослове́н еси́, Го́споди Бо́же, во ве́ки.

Во узи́лищи сый,/ ча́шу страда́ний, предугото́ванную тебе́, до конца́ испи́л еси́, му́чениче пресла́вне,/ и, ве́лиих утеше́ний и ра́дости неизрече́нныя от Ду́ха Свята́го удосто́ився,/ добропобе́дне взыва́л еси́:/ благослове́н еси́, Го́споди Бо́же, во ве́ки.

Богоро́дичен: Вы́шшая Небе́сных сил, еди́на от веко́в Ты яви́лася еси́, Богороди́тельнице,/ Зижди́теля бо и Творца́ вся́ческих родила́ еси́ несказа́нно,/ Всечи́стая Влады́чице.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.

Па́стырей Це́ркве Христо́вы назида́л еси́, му́дре архиере́ю,/ да все упова́ние на Бо́га возложа́т и ве́рою неколе́блемою вооружа́тся,/ Спаси́тель бо наш сохрани́т Це́рковь Свою́ неруши́му до сконча́ния ве́ка.

Христо́с на́ша Жи́знь, Свет и Поко́й,/ с Ни́мже и в темни́це добро́ есть бы́ти,/ си́це наставля́л еси́ па́ству твою́, святи́телю Вениами́не,/ и предуготовля́л еси́ ю́ к страда́нием, взыва́я:/ Го́спода по́йте и превозноси́те во вся ве́ки.

Не аз спаса́ю Це́рковь, но е́ю сам спаса́юся,/ та́ко смире́нно помышля́л еси́, священному́чениче Вениами́не./ Сего́ ра́ди нима́ло страши́лся еси́ о судьбе́ Неве́сты Христо́вы, взыва́я:/ Го́спода по́йте и превозноси́те во вся ве́ки.

Богоро́дичен: Жезл из ко́рене Иессе́ева, Де́во, была́ еси́,/ Цвет возрасти́вши, Христа́ Жизнода́вца,/ благода́ть всем подаю́щаго, взыва́ющим:/ благослови́те, вся дела́ Госпо́дня, Го́спода.

Песнь 9

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

Не посрами́м ве́ры правосла́вныя и упова́ния на́шего,/ я́же есть наде́жда благ ве́чных,/ си́ми словесы́ в гоне́ниих укрепля́л еси́ па́ству твою́, святи́телю Вениами́не,/ исполня́я служе́ние свое́ да́же до сме́рти.

Му́жественне смерть прия́ти уготовля́яся,/ сострада́льцы твоя́ укрепля́л еси́/ и, вся благода́рне претерпева́я,/ мучи́тели твоя́ благослови́л еси́, Вениами́не терпеливоду́шне.

Испо́лнися сло́во апо́стольское во страда́нии ва́шем, му́ченицы четверочи́сленнии,/ я́ко ни скорбь, ни гоне́ния, ни настоя́щая, ни гряду́щая/ не возмо́гут ве́рныя отлучи́ти от любве́ Бо́жия./ Сего́ ра́ди вас ублажа́ем.

Богоро́дичен: Тя, неискусому́жно ро́ждшую Жизнода́вца и Спа́са,/ Богоро́дицу вои́стину испове́дуем и мо́лим приле́жно,/ изба́ви нас от вся́кия ско́рби и боле́зни моли́твами Твои́ми, Ма́ти Де́во.

Свети́лен:

В ми́ре ско́рбни бу́дете,/ но дерза́йте, я́ко Аз победи́х мир, глаго́ла Госпо́дь ученико́м Свои́м./ Сей заве́т Христо́в до́бре храни́л еси́, архиере́ю пра́ведный,/ и побе́дно возше́л еси́ во све́тлыя черто́ги Ца́рства Небе́снаго.

Сла́ва, и ны́не, Креста́:

Крест предпра́зднуется и мир освяща́ется,/ чи́ни А́нгельстии пою́т нас ра́ди Распе́ншагося,/ и торжеству́ют с на́ми и сра́дуются, дави́дски зову́ще:/ соде́ла спасе́ние посреде́ земли́, Влады́ко.

На хвали́тех стихи́ры, глас 8:

Священному́чениче Вениами́не, Це́ркве Христо́вы и́стинный сы́не/ и благостоя́ния ея́ усе́рдный ревни́телю,/ проти́ву лжепа́стырей, тща́щихся расхи́тити ста́до твое́,/ му́жественне стал еси́/ и, не убоя́вся преще́ний и лжесвиде́тельств мучи́телей,/ обрати́л еси́ суд на главу́ суди́вших тя,/ та́же сме́ртию твое́ю Правосла́вие утверди́л еси́.// Сего́ ра́ди тя усе́рдно ублажа́ем.

Ни слове́с плете́нием,/ ни му́дростию челове́ческою,/ но па́че простото́ю и пра́вдою/ про́поведь твоя́, иера́рше досточу́дне, испо́лнена бысть,/ глубины́ серде́чныя достига́ющи/ и ве́ру пра́вую в лю́дех укрепля́ющи./ Сего́ ра́ди, я́ко и́стиннаго па́стыря,// вси тя с любо́вию почита́ем.

Ду́хом ева́нгельския любве́ пламене́я/ и о па́стве твое́й боле́знуя,/ жили́ща стра́ждущих и убо́гих посеща́л еси́/ и, мно́гих на путь и́стины наставля́я,/ во огра́ду церко́вную приводи́л еси́./ Те́мже тя, святи́телю о́тче Вениами́не,/ я́ко па́стыря до́браго и наста́вника ве́рна ве́дуще,// с любо́вию благоче́стно почита́ем.

Клевету́ от челове́к беззако́нных,/ суд непра́ведный и преда́тельство лжебра́тий,/ му́жественне претерпе́л еси́,/ священному́чениче Вениами́не,/ та́же и смерть за Христа́ прия́л еси́/ и жре́бия высо́каго удосто́ился еси́./ Сего́ ра́ди с любо́вию почита́ем тя// и соверша́ем всечестну́ю па́мять твою́.

Сла́ва, глас 6:

Прииди́те, ве́рнии, соста́вим лик,/ торжеству́юще и Бо́га прославля́юще/ в па́мять новому́чеников четверочи́сленных:/ Вениами́на святи́теля и Се́ргия преподобному́ченика,/ вку́пе с му́ченики добропобе́дными Ю́рием и Иоа́нном,/ си́и бо, Це́рковь Христо́ву защища́юще,/ не уклони́шася ско́рби,/ ни убоя́шася темни́цы/ и, я́ко а́гнцы незло́бивии, смерть прия́ша./ Ны́не же в ра́дости святы́х предстоя́т/ и мо́лят Триеди́наго Бо́га// о земне́м оте́честве на́шем.

И ны́не, Креста́, глас то́йже:

Проро́честии гла́си Дре́во свято́е провозвести́ша,/ и́мже дре́вния кля́твы сме́ртныя свободи́ся Ада́м,/ тварь же днесь возноси́му тому́ совозвыша́ет глас,/ я́же от Бо́га прося́щи бога́тыя ми́лости./ Но еди́ный в благоутро́бии, Безме́рный Влады́ко,/ очище́ние бу́ди нам// и спаси́ ду́ши на́ша.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 6: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О избра́нный уго́дниче Христо́в, священному́чениче Вениами́не, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, па́ствы твоея́ предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание правосла́вныя ве́ры изне́сл еси́, и ве́рным лю́дем гра́да свята́го Петра́ па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я, сострада́ние явля́я и братолю́бие утвержда́я. В се́рдце же свое́ Христа́ восприе́м, посреде́ бурь жите́йских серде́чную моли́тву и мир душе́вный храни́л еси́. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Утверди́ нас в ве́ре святе́й, научи́ ны всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином вождь духо́вный, неду́жным врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Оте́чество на́ше и град твой, и непреста́нно сла́вится в них и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.