Ме́сяца декабря́ в 18-й день
Священному́ченика Фадде́я, архиепи́скопа Тверска́го
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 1.
Подо́бен: Небе́сных чино́в:
Кро́вию му́ченик страны́ язы́ков обнови́вши,/ Це́рковь в пусты́ни лик преподо́бных сокрыва́ет,/ и тех украша́ет красото́ю ева́нгельскою,/ да род христиа́нский обновя́т уче́ний вода́ми,/ от ни́хже еди́наго Фадде́я свята́го почти́м,// му́ченичеством сло́во учи́тельное запечатле́вшаго.
Святи́тельства благода́ть сраствори́в/ и́ночестей нищете́ духоно́сней,/ о еди́нем то́чию попече́ние име́л еси́:/ е́же соедини́тися апо́стольски с наро́дом Бо́жиим,/ и сло́вом сердца́ устро́ити,/ про́чее бо, рекл еси́, приложи́т Христо́с,// я́коже во Ева́нгелии научи́хомся.
Ка́меню драги́й, чи́стый сосу́де,/ кро́тости Христо́вы испо́лненный,/ от ти́хия ке́ллии на престо́л архиере́йский приве́лся еси́,/ да преми́рно конце́м сия́еши,/ высото́ю и глубино́ю ду́ха твоего́// любо́вь Бо́жию ве́рным лю́дем излива́я.
Це́ркве све́тлость, вре́мене на́шего чу́до,/ па́стырь, избра́вый свя́тости путь:/ си́ми имены́ тя святы́й Патриа́рх нарече́,/ святи́телю сла́вный Фадде́е,/ с ни́мже ны́не Це́рковь тя ублажа́ет,// и пое́т я́же па́че си́лы по́двиги твоя́.
Глас 2:
Никто́же восхо́щет отрещи́ся земны́х,/ а́ще не у́зрит свет Христо́в на лице́ пра́веднаго./ Ты же, о́тче Фадде́е, такова́го свиде́теля обре́л еси́,/ па́стыря Кроншта́дтскаго Иоа́нна,/ ева́нгельским глаго́лом путь тебе́ сказу́ющаго:/ а́ще лю́биши Мя, паси́ о́вцы Моя́,/ егда́ же состаре́ешися, зван бу́деши ко страда́нию:// те́мже оста́ви вся и по Мне гряди́.
Се́яти се́мя сло́ва Бо́жия возжеле́в,/ рече́ святи́тель Фадде́й я́коже Па́вел иногда́:/ Тебе́ ра́ди, Го́споди, те́ло мое́ порабоща́ю,/ да не ка́ко ины́м пропове́дуя, неключи́м бу́ду:/ по́двигом бо преподо́бная Мари́я о́браз покая́ния ми́ру даде́,/ по́двигом же апо́столи свет Твой во страны́ пронесо́ша;/ сих же о́бщника и мене́ покажи́, Спа́се,// да де́латель бу́ду жа́твы Твоея́.
Благу́ю часть избра́в, е́же сло́ву внима́ти,/ святи́телю Фадде́е богому́дре,/ па́жити ста́ду Христо́ву угото́вал еси́,/ и во дни гла́да духо́внаго тьмы наро́да препита́л еси́,/ на зов твой теку́щия срета́я с любо́вию,/ и на распу́тия уклони́вшияся привлека́я с ми́лостию;/ те́мже и нас, святы́й па́стырю, наста́ви// от кла́сов церко́вных собра́ти бога́тство.
Учи́телей лжи́вых я́ко медь звеня́щую/ обличи́л еси́, святи́телю пра́ведне,/ па́ству же призва́л еси́ послу́шати со́вести глас,/ высоту́ возвеща́ющ любве́ Бо́жия,/ не в высокому́дрых почива́ющия,/ но па́че со́лнца во святы́х сия́ющия,/ и́же не́бо душ на́ших обновля́ют,/ те́мже мо́лим тя, и нам помози́,// по́двигом и́стинным любо́вь Христо́ву стяжа́ти.
Сла́ва, глас 4:
Не печа́ль, но ра́дость да испо́лнит ду́ши на́ша,/ я́же по́двигу и же́ртвам откры́ем, бра́тие,/ рекл еси́, святи́телю, ю́зники утеша́я,/ посреде́ темни́цы све́том Небе́сным осиява́емь:/ не уныва́йте, Христо́с бо с на́ми есть;/ и вре́мя прии́де христиа́нское настоя́щее;/ те́мже и мы, бо́дренному се́рдцу твоему́ дивя́щеся,/ мо́лим тя по́мощь с Небесе́ пода́ти,/ во е́же умертви́ти у́ды на́ша, я́же на земли́,// да в ра́дости духо́вней Христу́ послу́жим.
И ны́не, предпра́зднства, глас то́йже:
Вифлее́ме, украша́йся,/ воспо́й, гра́де Сио́не,/ ра́дуйся, пусты́не, предобруча́ющи ра́дость:/ звезда́ бо преды́дет в Вифлее́м,/ возвеща́ющи хотя́щаго роди́тися Христа́,/ и верте́п прие́млет Невмести́маго все́ми,/ и я́сли гото́вятся восприя́ти Жизнь ве́чную./ Тому́ вси воспои́м и возопии́м:/ спаси́ ду́ши на́ша, Иису́се Бо́же,// воплоти́выйся нас ра́ди.
Вход. Проки́мен дне. И чте́ния три о́бщая
священному́ченику Це́ркве Ру́сския XX ве́ка еди́ному.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново/ и разуме́вше, я́ко челове́ка некни́жна еста́ и про́ста,/ дивля́хуся, зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те?/ Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше,/ единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ры, глас 1:
Свяще́нными пе́сньми, я́коже цве́ты,/ свяще́нную па́мять украси́м превознесе́нную/ священному́ченика Фадде́я, Тверски́я земли́ моли́твенника,/ и всея́ Це́ркве Ру́сския освяще́ннаго адама́нта ве́ры,/ на всяк день Бо́гу священноде́йствовавша,/ и свяще́нное заколе́ние Тому́ себе́ яви́вша,/ те́мже свяще́нную ра́ку его́ ны́не обстоя́ще,/ моли́твы возно́сим, си́це глаго́люще:/ свяще́ние душ на́ших и боле́зней исцеле́ние,/ свяще́нниче Святы́я Тро́ицы, святи́телю пресла́вный,/ при́зри на усе́рдное моле́ние чад твои́х// и пода́ждь нам от Христа́ Бо́га ве́лию ми́лость.
Глас 5:
Пома́занием свята́го еле́я твоего́,/ святи́телю чудотво́рче Фадде́е,/ исцеле́ния всегда́ прие́млем,/ благодаря́ще Христа́ Бо́га,/ И́же дарова́ нам такова́го засту́пника,/ врача́ неду́гов душе́вных и теле́сных,/ пеку́щася день и нощь о спасе́нии на́шем:/ сло́вом, сквозе́ гоне́ния до нас доше́дшим,/ благода́тию, оби́льно на нас излива́ющеюся,/ све́тлою мы́слию, вся́кое недоуме́ние разреша́ющею,/ те́мже вопие́м ти:// ра́дуйся, люде́й правосла́вных ра́дование и утеше́ние.
Сла́ва, глас 2:
Жи́ти на ра́дость бли́жнему своему́,/ научи́ нас, богому́дре святи́телю,/ слеза́ми омоча́вый ло́же свое́ на вся́ку нощь,/ в не́йже ма́ло упокоева́яйся,/ мно́жае моли́твы твори́л еси́,/ и поуче́ния от сокро́вищ церко́вных собира́л еси́,/ да сло́во и́стины возвести́ши зау́тра во хра́ме Бо́жии,/ те́мже и Христо́с сло́во твое́ сохрани́,/ его́же ны́не я́ко сокро́вище иму́ще,// ра́дости твоея́ о Го́споде Воскре́сшем исполня́емся.
И ны́не, Богоро́дичен, глас то́йже:
О, чудесе́ но́ваго всех дре́вних чуде́с!/ Кто бо позна́ Ма́терь, без му́жа ро́ждшую/ и на руку́ нося́щую всю тварь Содержа́щаго?/ Бо́жие есть изволе́ние Ро́ждшееся./ Его́же я́ко Младе́нца, Пречи́стая, Твои́ма рука́ма носи́вшая/ и Ма́терне дерзнове́ние к Нему́ иму́щая,/ не прeстáй моля́щи о чту́щих Тя,// уще́дрити и спасти́ ду́ши на́ша.
На стихо́вне стихи́ры, глас 5:
Ю́ныя наставля́я наро́ду Бо́жию служи́ти,/ оте́чески веща́л еси́ им:/ не бу́дите я́ко бога́ч о́ный неми́лостивный,/ на всяк день су́етно веселя́йся,/ оба́че Христо́во снизхожде́ние помяну́вше,/ сни́дите к лю́дем погиба́ющим,/ лица́ же не отврати́те ску́дости их духо́вныя:/ служи́тель бо Христо́в, от страсте́й очи́стився,/ нете́сно вмеща́ет ско́рби бли́жняго и ра́ны его́;/ те́мже мо́лим тя, о́тче Фадде́е милосе́рдный,// помози́ и нам бли́жними бы́ти стра́ждущим на земли́.
Стих: Пра́ведник я́ко фи́никс процвете́т,// я́ко кедр, и́же в Лива́не, умно́жится.
И́ноки науча́я те́сными враты́ входи́ти,/ бра́тски возглаго́лал еси́ им:/ не прии́мем гла́са руга́ющихся де́ланию на́шему,/ е́же есть трезве́ние и брань ко страсте́м,/ но, взира́юще на Крест Христо́в,/ скорбьми́ да хва́лимся я́ко бога́тством,/ и́миже любо́вь Бо́жия в сердца́ на́ша излия́ся,/ ве́мы бо, я́ко пути́ жи́зни на́шея/ ко очище́нию се́рдца Христо́с устроя́ет;/ те́мже мо́лим тя, преподо́бне Фадде́е освяще́нный,// и нам от страсте́й очи́ститися, Бо́гу помоли́ся.
Стих: Насажде́ни в дому́ Госпо́дни,// во дво́рех Бо́га на́шего процвету́т.
Чие́ се́рдце не возболе́знует,/ зря Оте́чества разоре́ние и ве́ры попра́ние?/ Рекл еси́, о́тче, со ско́рбию па́стве твое́й:/ ка́ко в ри́зу Креще́ния све́тлу обле́кшиися иногда́,/ фарисе́ем слепы́м ны́не уподо́бишася, глаго́люще:/ не тре́буем покая́ния, но Це́рковь хо́щем обнови́ти?/ Не ве́дят бо раби́ ми́ра сокрове́нную Це́ркве красоту́/ и сла́ву жи́зни Ея́ духо́вную,/ я́же при́сно юне́ется и ве́рных в си́ле обновля́ет;/ оба́че в день Христо́в возсия́ет я́ко неве́ста,// в виссо́н чи́стый оде́яна, в пра́вду святы́х.
Сла́ва, глас 8:
В земли́ Оло́нецтей наста́вник ю́ных наре́клся еси́,/ лю́ди волы́нския и кавка́зския во испыта́ниих укрепи́л еси́,/ па́ства же астраха́нская тобо́ю от льсти огради́ся,/ и преде́лы Тверски́я прия́ша словеса́ твоя́,/ град же Тверь кровьми́ твои́ми освяти́ся/ и цельбоно́сными мощьми́ твои́ми ны́не красу́ется;/ мы же тебе́, святи́телю Фадде́е, си́це вопие́м:// Це́ркве Ру́сския похвала́ ты еси́ вои́стину.
И ны́не, предпра́зднства, глас то́йже:
Восприими́, Вифлее́ме, Бо́жию митропо́лию,/ Свет бо незаходи́мый в тебе́ роди́тися прихо́дит./ А́нгели, удиви́теся на Небеси́,/ челове́цы, просла́вите на земли́,/ волсви́, от Перси́ды пресла́вный дар принеси́те,/ па́стырие, свиря́юще, трисвято́е пе́ние сла́дце воспо́йте:// вся́кое дыха́ние да хва́лит Вседе́теля.
Тропа́рь, глас 1:
Хвала́ Бо́гу и же́ртва жива́я/ житие́ твое́, священному́чениче Фадде́е, яви́ся,/ посто́м, бде́нием и моли́твою Небе́сная дарова́ния прии́м,/ мно́гим до́брый помо́щник и уте́шитель яви́лся еси́./ Па́стырскою же му́дростию и ти́хостию нра́ва укра́шен,/ лука́вства враго́в Христо́вых препобеди́л еси́./ Сла́ва Да́вшему тебе́ во страда́ниих кре́пость,/ сла́ва я́ко му́ченика Венча́вшему тя,// сла́ва Де́йствующему тобо́ю всем исцеле́ния.
НА У́ТРЕНИ
На Бог Госпо́дь: тропа́рь святи́теля, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 6:
Сия́ рече́ святи́тель о кни́зе псало́мстей:/ ко́е бога́тство утеше́ния и учи́лище терпе́ния есть,/ по́двиг бо изъясни́ нам и страда́ние Спаси́теля на́шего!/ Еще́ же и во Ева́нгелии нам откры́ся,/ я́ко Той, на земли́ жи́тельствуя,/ словесы́ псало́мскими излива́ше ду́шу Свою́.// Те́мже со стра́хом Бо́жиим кни́зе сей, о ча́да, внемли́те.
Сла́ва, и ны́не, предпра́зднства:
Из Перси́ды ца́рие зла́то, сми́рну и лива́н, рожде́нному Царю́ и Бо́гу принесо́ша дре́вле; мы же ны́не предпра́зднующе Рождество́ Его́, благочестному́дренне от души́ наде́жду, ве́ру и любо́вь принесе́м Ему́, Де́ву пою́ще.
По 2-м стихосло́вии седа́лен, глас 8:
Сия́ рече́ святи́тель о писа́ниих оте́ческих: восприими́те, о ча́да, сокро́вища ду́ха, словеса́ жи́зни духо́вныя, и́хже мир забве́нию предаде́, и сим испове́днически после́дуйте, до́лжни бо есмы́ утвержда́ти жизнь на́шу на уче́нии и житии́ святы́х оте́ц на́ших, и блаже́ни бу́дем, а́ще не погуби́м да́ра сего́: е́же чрез слы́шание сло́ва Бо́жия а́лчбу души́ утоля́ти.
Сла́ва, и ны́не, предпра́зднства:
Из недр Оте́ческих соше́л еси́, и несказа́нным истоща́нием ю́же по нам нищету́ восприя́л еси́, па́че естества́, Человеколю́бче; в верте́п всели́тися благоволи́л еси́, Го́споди, и я́ко Младе́нец сосцы́ пита́ешися, Зижди́тель и Госпо́дь. Те́мже звездо́ю наставля́еми волсви́, да́ры Тебе́ прино́сят я́ко Влады́це тва́ри; па́стырие и А́нгели дивля́хуся, зову́ще: сла́ва в вы́шних Бо́гу, на зе́млю гряду́щему роди́тися я́ко Челове́ку.
Велича́ние:
Велича́ем тя,/ священному́чениче Фадде́е,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́ и прииди́, во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 4:
Ве́тхаго и Но́ваго Заве́тов писа́ния ска́зоваше святи́тель па́стве свое́й, бо́дрствовати ю́ призыва́я: отве́рзите во́лею, о ча́да, ушеса́ ва́ша к слы́шанию благовествова́ния Христо́ва, да не паде́т на вы кровь святы́х и кровь свиде́телей Иису́совых, но да прозя́бнет се́мя сло́ва Бо́жия на земли́ се́рдца ва́шего, из него́же дре́во ве́лие да возрасте́т, мно́гим сень подава́ющее.
Сла́ва, и ны́не, предпра́зднства:
Ны́не исполня́ются проро́ков прорече́ния: Мари́я бо гряде́т роди́ти челове́ков обновле́ние. Свы́ше предтеку́т Небе́сныя Си́лы, сла́ву возсыла́юще нас ра́ди Хотя́щему роди́тися, ца́рие предхо́дят перси́дстии Тому́ припа́сти веселя́щеся.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Наде́жду восприими́те ны́не, лю́дие, о Святе́й Руси́ боле́знующии:/ еда́ бо мо́жет ко́рень благоче́стия умре́ти,/ израсти́вый такову́ю о́трасль любве́ и ве́ры,/ Фадде́я Тверска́го святи́теля;/ и́же, па́стырю Кроншта́дтскому после́довав,/ Же́ртву Безкро́вную приноша́ше на всяк день,/ сло́ву Бо́жию поуча́яся на вся́ку нощь;/ и́же кро́тостию уста́ запеча́тствова для сло́ва пра́зднаго,/ и ре́вностию о́гненною к му́ченичеству востече́:/ прииди́те, припаде́м к ра́це моще́й его́,/ не истязу́ет бо, ма́ли есмы́ или́ вели́цы,/ но всем по коего́ждо си́ле дар подае́т,// во е́же Це́ркви и Оте́честву послужи́ти.
Кано́н, глас 1.
Песнь 1
Ирмо́с: Го́рькия рабо́ты изба́влься Изра́иль,/ непроходи́мое про́йде я́ко су́шу;/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,// я́ко просла́вися.
Припе́в: Святы́й священному́чениче Фадде́е, моли́ Бо́га о нас.
Греху́ не порабо́тився, му́дре Фадде́е, движе́ния вся душе́вная си́лою ду́ха запеча́тствовал еси́, посту́ навы́к, вся́ко злострада́ние терпе́л еси́, любви́ и́стинней от Христа́ науча́яся, Его́же ны́не на Небесе́х пое́ши, я́ко просла́вися.
Ду́ха скрижа́ль, Ге́рмана преподо́бнаго наста́вника име́л еси́, Фадде́е богозва́нне, ко оте́ческим писа́нием, я́ко еле́нь к вода́м, притека́я, ду́шу слеза́ми обнови́в, Уте́шителя прия́л еси́, Ему́же покланя́емся вси, я́ко просла́вися.
Повива́емаго ру́бищи я́ко Младе́нца, и исцеле́ния подаю́щаго прикоснове́нием риз, Христа́ кро́тким се́рдцем возлюби́в, свя́те Фадде́е, во и́ночестем нище́тнем о́бразе подвиза́лся еси́: те́мже ри́за души́, честны́я мо́щи твоя́, чудесы́ просла́вишася.
Богоро́дичен: Не отлуча́ешися и́ноков богови́дцев, но́ваго Изра́иля, и́же мы́сленное мо́ре страсте́й преидо́ша, и ти́и по до́лгу Тя, Де́во, имену́ют столп о́гнен, ко Отцу́ Све́тов приводя́й от тьмы, Его́же пою́т ве́рнии, я́ко просла́вися.
Песнь 3
Ирмо́с: Не му́дростию и бога́тством да хва́лится сме́ртный свои́м,/ но ве́рою Госпо́днею,/ правосла́вно взыва́я Христу́ Бо́гу,/ и поя́ при́сно:/ на ка́мени Твои́х за́поведей// утверди́ мя, Влады́ко.
Не я́ко еди́ну не́кую от доброде́телей стяжа́л еси́, но по́двигом кра́йним себе́ очи́стив, о́браз Христа́ в души́ яви́л еси́, Ему́же и воззва́л еси́: во е́же пасти́ слове́сное ста́до Твое́ утверди́ мя, Влады́ко.
И́же из глубины́ веко́в ко́рень ве́ры от ю́ности насади́л еси́ во глубину́ серде́чную, и плоды́ духо́вныя прине́сл еси́ Бо́гу, взыва́я: во словесе́х живоно́сных Твои́х утверди́ мя, Влады́ко.
Креще́ния благода́ти отпа́дающим второ́е апо́стольски Христа́ пропове́дал еси́, страж быв ве́ры правосла́вныя, и се́рдцем, ско́рбию терза́емым, Бо́гу взыва́л еси́: утверди́ Це́рковь Ру́сскую, Влады́ко.
Богоро́дичен: Чистота́ де́вства Твоего́, Мари́е Богоневе́сто, си́лы души́ Твоея́ в кре́пости сохрани́, се́рдце же откры́ любви́ к Бо́гу и челове́ком, от ни́хже уневе́ститися Христу́ хотя́щия утверди́, Свята́я Влады́чице.
Седа́лен, глас 4:
Весь о́гнен быв чистоты́ ра́ди жития́ твоего́, и ре́вности о угожде́нии Бо́гу испо́лнен, всех призыва́л еси́, я́коже пра́ведный Иоа́нн иногда́, к Ча́ши Христо́ве спаси́тельней, оба́че в ра́зуме глаго́лал еси́: ны́не се́мя безсме́ртия то́чию восприе́млем, егда́ же стра́сти умертви́ти потщи́мся, то́е возраста́ти на́чнет в сердца́х на́ших та́инственно.
Сла́ва, и ны́не, предпра́зднства:
Безпло́тный воплоща́ется, и Безле́тный в ле́то быва́ет, и пелена́ми повива́ется нас ра́ди, И́же зе́млю повива́яй Госпо́дь мгло́ю, плоть Сам па́че постиже́ния неизме́нно яви́вся от Неискусобра́чныя, те́мже дивя́щеся, поклони́мся вели́кому та́инству.
Песнь 4
Ирмо́с: Слы́ша дре́вле Авваку́м, Христе́, чу́дный Твой слух,/ и стра́хом взыва́ше:/ от ю́га Бог прии́дет, и Святы́й от горы́ приосене́нныя ча́щи,/ спасти́ пома́занныя.// Сла́ва си́ле Твое́й, Го́споди.
Архиере́йство прии́м, труды́ усугу́бил еси́, во одея́ниих ру́бищем Вели́каго Васи́лия подража́я, в посте́х Златоу́стому, во бде́ниих богодохнове́нному Григо́рию; те́мже и естество́ превозше́д, взыва́л еси́: сла́ва си́ле Твое́й, Го́споди.
Ко́е помышле́ние, ко́е чу́вство име́л еси́, на всяк день принося́ Же́ртву Безкро́вную, рцы нам, святи́телю Фадде́е, да си́ми обогати́вшеся, Тро́ице воззове́м: сла́ва е́же о нас смотре́нию Твоему́, Го́споди.
С боле́знию осте́н греха́ из души́ исторга́юще, Це́ркви ма́тери припа́даем по сло́ву твоему́, услажда́ет бо го́ресть Ду́хом Святы́м, в ней живу́щим, те́мже и сла́вныя ми́ра зове́м пе́ти с на́ми: сла́ва снизхожде́нию Твоему́, Го́споди.
Богоро́дичен: В нача́ле мир к бытию́ воззва́в, глас Бо́жий возгреме́: да бу́дет Не́бо, и земля́, и свет, сло́во же Де́вы Чи́стыя вселе́нную обновля́ет: да бу́дет Ми по глаго́лу Арха́нгелову, се бо раба́ Твоя́, Всеси́льне Го́споди.
Песнь 5
Ирмо́с: Свет Твой незаходи́мый возсия́й, Христе́,/ в сердца́ ве́рно пою́щих Тя,/ мир подава́яй нам па́че ума́;/ тем от но́щи неве́дения, ко дню све́том Твои́м теку́ще,// славосло́вим Тя, Человеколю́бче.
Свет Христо́в показа́л еси́ ча́дом твои́м, воспламеня́я чу́вствия ко святы́м помышле́нием, и, я́коже Па́вел, с наро́дом Бо́жиим се́рдцем соедине́н, всем вождь духо́вный был еси́, коему́ждо ста́рец уте́шитель, Христу́ подо́бяся Человеколю́бцу.
Ум чист покая́нием непреста́нным стяжава́ти учи́л еси́, глаго́ля, я́ко сие́ не пусты́нным то́чию подоба́ет, Христо́с бо Ца́рство Бо́жие внутрь се́рдца указа́ и служи́ти Ему́ в Ду́се и и́стине вся призва́, я́ко Судии́ Пра́ведному и Человеколю́бцу.
Словесе́м Бо́жиим внима́ти повеле́л еси́, да окропи́тся се́рдце коего́ждо, и пома́жется си́ми, и питие́ благода́ти Христо́вы да прии́мет; душа́ же да изведе́т то́ки покая́ния, смире́ния и любве́, я́же вода́ми Богоявле́ния одожди́ Христо́с Человеколю́бец.
Богоро́дичен: Не са́ми в себе́ о́браз Бо́жий воскреси́хом, оба́че смире́ние Твое́, Де́во, привлече́ благода́ть, те́мже со А́нгелом Ти взыва́ем: ра́дуйся, Обра́дованная, Ма́ти Христа́ Человеколю́бца.
Песнь 6
Ирмо́с: Во глубину́ поги́бели,/ окая́нное естество́, Христе́ мой Спа́се, дости́гшее дре́вле/ лежа́ше, увы́ мне, в те́мных глубо́ких,/ поне́же Твое́ю Боже́ственною си́лою к Небеси́ взы́де,/ красне́йшим добро́там,/ пожру́ Тебе́, Спа́се, вопие́т,// же́ртву хвале́ния.
Лю́дем росси́йским, уче́ния Це́ркве отмета́ющимся и глаго́лющим, я́ко пре́йде вре́мя покая́ния, вре́мя приближа́ющагося Суда́ со слеза́ми возвести́л еси́, и гром всеми́рных бе́дствий предглаго́лал еси́ не хотя́щим Бо́гови возда́ти же́ртву хвале́ния.
Мечта́ния лука́вых пропове́дников облича́я, рекл еси́, святи́телю: почто́ страстьми́ держи́мых кроме́ по́двига зове́те в свобо́ду Христо́ву, и Це́рковь, я́ко жи́зни ми́ра не вне́млющую, уничижа́ете! Те́мже и проро́чествовати сим возбрани́л еси́, я́ко Ду́ха Бо́жия не иму́щим и не хотя́щим Бо́гови возда́ти же́ртву хвале́ния.
Отягче́нным ку́плями жите́йскими, поко́ем же теле́сным омраче́нным невозмо́жно Бо́гови поспе́шествовати во блага́я, рекл еси́, святи́телю, глаго́л Па́влов помина́яй и, я́ко во́ин до́блий Христо́в, на страда́ния исходя́й.
Богоро́дичен: Бре́ние и персть есмы́ челове́цы, оба́че Тобо́ю, Де́во Богоро́дице, во еди́но Те́ло Христо́во совокупи́хомся, е́же есть Це́рковь Бо́жия, на всяк день Отцу́ Небе́сному принося́щая же́ртву хвале́ния.
Конда́к, глас 4:
Ду́ха не боя́зни, но си́лы, и любве́ и целому́дрия/ даде́ Пастыренача́льник ти, святи́телю Фадде́е,/ во страда́нии бо твое́м благодаре́ние Бо́гу воздава́л еси́,/ и в гоне́ниих стра́ждущия утеша́л еси́, глаго́ля:// не уныва́йте, Христо́с бо с на́ми есть.
И́кос:
Во дни лука́выя и беззако́нныя во стране́ на́шей я́ко А́нгел све́тел яви́лся еси́, святи́телю; дыха́ние же сме́рти повсю́ду ви́дев, путь спасе́ния ве́рным указа́л еси́, глаго́ля: я́коже ка́пли водны́я в мо́ре стремле́ние и́мут, та́ко и мы ду́ши да напра́вим ко исто́чником любве́ Бо́жия, и по апо́столу друг дру́га прии́мем, я́коже Христо́с ны прия́т, тогда́ и А́нгелов по́слет огради́ти ны от печа́лей о зле ми́ра сего́, напосле́док же и Сам вни́дет вечеря́ти с на́ми: не уныва́йте, Христо́с бо с на́ми есть.
Песнь 7
Ирмо́с: Проидо́ша я́ко черто́г, пе́щный пла́мень нестерпи́мый,/ и́же за благоче́стие иногда́,/ о́троцы святи́и показа́вшеся я́ве,/ и согла́сно воспева́юще, песнь поя́ху:// отце́в Бо́же, благослове́н еси́.
Лжепа́стыри, а́ки па́губныя во́лки, отгна́ти научи́ богому́дрый Фадде́й своя́ ча́да духо́вная; и я́коже Христо́с взо́ром кро́тким воздви́же Петра́ к покая́нию иногда́, та́кожде святи́тель заблу́ждшия приведе́ во огра́ду Це́ркве, взыва́ющия: отце́в Бо́же, благослове́н еси́.
От неприя́зни соблюсти́ ученики́ Христо́с Отца́ умоли́, да послу́шавшии сих уве́руют чистоты́ их ра́ди; святи́тель же Фадде́й, апо́столом поревнова́в, себе́ очи́сти, и све́том души́ своея́ ко спасе́нию мно́гия лю́ди приведе́, зову́щия: отце́в Бо́же, благослове́н еси́.
Уве́дев путь Кре́стный Христа́, восходя́ща в сла́ву Свою́, темни́чное страда́ние и изгна́ние облобыза́ Фадде́й крепча́йший, при́сно ра́дуяся и всем утеше́ние подава́я, зло́бу челове́чу претерпева́ше с кро́тостию, глаго́ля: отце́в Бо́же, благослове́н еси́.
Богоро́дичен: Посто́м пла́мень страсте́й победи́ша о́троцы: де́вственная бо телеса́ их не опали́ пещь Вавило́нская во о́браз вселе́ния, Богоотрокови́це, в де́вственную утро́бу Твою́, не опали́вшуюся огне́м Божества́, отце́в Бо́га благослове́ннаго.
Песнь 8
Ирмо́с: Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем воспева́юще, воспои́м:/ да благослови́т тварь вся Го́спода,// и превозно́сит во вся ве́ки.
Взыска́л еси́ дар Бо́жий, е́же и́стинней ве́ре учи́ти ча́да церко́вная; егда́ же не́цыи, во зло низпа́дше, тя преогорчи́ша, упова́л еси́ на Бо́га, И́же ме́ртвыя возставля́ет, и пла́ча го́рце о наро́де росси́йстем, де́ло Христо́во на земли́ соверши́л еси́: те́мже на Небесе́х славосло́виши Его́ во вся ве́ки.
Плоть воздержа́нием кра́йним истончи́л еси́, не хле́бом, но сло́вом Бо́жиим ду́шу животворя́, те́мже яви́л еси́ в злострада́ниих кре́пость, подава́я ю́зником в темни́це от избы́тков свои́х пи́щу и оде́жду, па́че же сло́во утеше́ния; и бу́дущих суде́б открове́нием сих утверди́л еси́ ве́рность Христу́ сохрани́ти во ве́ки.
К тебе́, святи́телю, ны́не прибега́ем, да уврачу́еши ско́рби и боле́зни состра́ждущею любо́вию, е́йже от Пастыренача́льника Христа́ научи́лся еси́, ре́вностию испо́лнився о очище́нии серде́ц на́ших; сего́ ра́ди му́ченическим венце́м укра́шенный, я́коже венце́м любве́ твоея́ ко Го́споду, со А́нгелы воспева́еши Его́ во вся ве́ки.
Богоро́дичен: Сла́ва Твоя́, Дщи Царе́ва, внутрь есть, в сокрове́нных добро́тах се́рдца Твоего́: во смире́нии и ве́рности во́ли Бо́жией, в ве́ре, е́юже яви́лася еси́ Сове́та неизрече́ннаго Таи́нница, чуде́с же Христо́вых нача́ло; те́мже род челове́ческий превозно́сит Тя во вся ве́ки.
Песнь 9
Ирмо́с: Неизглаго́ланное Де́вы та́инство:/ Не́бо бо Сия́, и престо́л Херуви́мский,/ и светоно́сный черто́г показа́ся/ Христа́ Бо́га Вседержи́теля.// Сию́ благоче́стно я́ко Богоро́дицу велича́ем.
Себе́ отве́ргнувся, поревнова́л еси́ о Це́ркви Бо́жией, ми́лость же неизрече́нную и любо́вь к лю́дем явля́я, глаго́лал еси́: не убо́гия оде́жды своея́ стыжду́ся, но студ ми есть, а́ще скорбя́щаго не уте́шу сло́вом. Те́мже тя усе́рдно я́ко па́стыря до́браго велича́ем.
Друг и́скренний свята́го Патриа́рха был еси́, и́же красоте́ души́ твоея́ дивя́ся, рече́: ви́дите ли сей свети́льник Це́ркве Ру́сския? Не всем, но избра́нным то́чию, такову́ю си́лу ду́ха подае́т Христо́с! Те́мже тя ве́рно я́ко сла́ву Це́ркве велича́ем.
Ум свой в жизнь бу́дущаго ве́ка впери́в, Сы́на Бо́жия житию́ притру́дному е́же на земли́ поревнова́л еси́, на всяк день по́двигов исполне́нием себе́ до сме́рти утесня́я, сего́ ради́ в день осмы́й безпеча́льный, лику́я, вшел еси́; те́мже тя пресла́вно я́ко му́ченика велича́ем.
Богоро́дичен: Му́чеников похвала́ Ты еси́, Де́во Чи́стая, Тобо́ю бо укрепля́еми, ко страда́нию дерзну́ша, ве́дуще, я́ко ду́шу Твою́ про́йде ору́жие в распя́тии во́льнем Сы́на и Бо́га Твоего́: те́мже ти́и я́ко Взбра́нную Воево́ду Тя велича́ют.
Свети́лен:
Све́тиши Оте́честву на́шему всегда́, свети́льниче Це́ркве Ру́сския, сла́вне Фадде́е, умерщвле́ние бо страсте́й подъя́л еси́ во́лею, и всыновле́ния Бо́гу сподо́бился еси́ благода́тию, те́мже мо́лим тя, блаже́нне: слепоту́ духо́вных оче́с на́ших прожени́, да сы́нове све́та яви́мся в День Су́дный.
Сла́ва, и ны́не, Богоро́дичен:
Не на кро́вех пропове́дана бысть Боговоплоще́ния та́йна, но сию́ Тебе́ еди́ней, Мари́е, во гра́де Назаре́те Арха́нгел возвести́, зане́ мир слы́шания бе недосто́ин, Твои́ же о́чи вы́ну в руку́ Го́спода Твоего́. Те́мже мо́лим Тя, Пречи́стая: слепоту́ духо́вных оче́с на́ших прожени́, да сы́нове све́та яви́мся в День Су́дный.
На хвали́тех стихи́ры, глас 4.
Подо́бен: Я́ко до́бля:
Ве́мы тя, Фадде́е пресла́вне,/ апо́столов насле́дника:/ ти́и бо бы́ша я́ко ма́ли и про́сти иногда́,/ но ладии́ и мре́жи оста́вльше,/ вселе́нную просвети́ша;/ ты же, попече́ния земна́я отложи́в,/ смири́л еси́ себе́ во е́же Христа́ прия́ти/ и, Ду́ху Бо́жию повину́яся,// уче́ния возгреме́ душа́м на́шим.
А́ще в житии́ от А́нгел ума́лен быв,/ я́ко нося́й смеше́ние пе́рстное,/ ны́не сих ничи́мже ме́ньший яви́лся еси́,/ в со́нме водвори́вся му́ченик но́вых и дре́вних,/ и́же кро́вию ве́ру запечатле́ша/ и пред Бо́гом предста́ша со А́нгелы во еди́нем ли́це;/ с ни́миже ны́не ра́дуяся,/ моли́ся о земне́м оте́честве твое́м,// мир подава́я душа́м на́шим.
Соверше́нных тве́рдую пи́щу,/ сло́во пра́вды Христо́вы,/ я́ко сам соверше́н сый,/ во утвержде́ние ве́ры возглаго́лал еси́;/ чу́вствия же обучи́в обуче́нием до́лгим/ в разсужде́ние до́брых и злых,/ во́лю Бо́жию ча́дом возвести́л еси́,/ и ны́не о па́стве пече́шися неуста́нно,// просвеще́ние подава́я душа́м на́шим.
Кто есть сей па́стырь смире́нный, / и́же из ке́ллии ве́тхия в ри́зе убо́зей/ во у́трии на де́лание исхо́дит,/ и в храм Госпо́день вво́дит па́ству свою́,/ во е́же соверши́ти слу́жбу Бо́жию,/ некни́жныя научи́ти и исцели́ти неду́жныя?/ Сей сла́ва Це́ркве и исполи́н ду́ха есть,/ и́же бога́тство духо́вное// во страда́ниих за ве́ру Христо́ву стяжа́вый.
Сла́ва, глас 6:
Служи́теля Святы́я Тро́ицы, Фадде́я свята́го почти́м,/ той бо, ви́дев хра́мов Бо́жиих разруше́ние ве́лие,/ соде́латися храм Бо́га Жива́го поревнова́,/ кни́гам же духо́вным отъе́млющимся,/ ве́рныя умудри́ я́ко кни́га одушевле́нная,/ в темни́це же заключа́емь, воззва́ со проро́ком си́це:/ ка́мо пойду́ от Ду́ха Твоего́, Го́споди?/ На Небесе́х живе́ши и во ад низхо́диши, Преблаги́й./ И кого́ ны́не убою́ся с Тобо́ю?/ Оба́че Сам мя научи́,/ что ми подоба́ет твори́ти и глаго́лати во сла́ву Твою́,// Изба́вителю мой и Бо́же.
И ны́не, предпра́зднства, глас то́йже:
Верте́пе, благоукраси́ся,/ А́гница бо гряде́т, чревонося́щи Христа́;/ я́сли же, подыми́те, сло́вом разреши́вшаго/ от безслове́снаго дея́ния нас земноро́дных./ Па́стырие, свиря́юще, свиде́тельствуйте чудеси́ стра́шному,/ и волсви́ от Перси́ды,/ зла́то и лива́н и сми́рну, Царю́ принеси́те,/ я́ко яви́ся Госпо́дь из Де́вы Ма́тере./ Ему́же и прини́кши ра́бски Ма́ти поклони́ся,/ и привеща́ше к Держи́мому на объя́тиих Ея́:/ ка́ко все́ялся еси́ Мне?/ Или́ ка́ко прозя́бл еси́ во Мне,// Изба́вителю Мой и Бо́же?
НА ЛИТУРГИ́И
Блаже́нны от кано́на, пе́сни 4-я и 9-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О вели́кий и пресла́вный уго́дниче Христо́в, священному́чениче Фадде́е, свети́льниче пресве́тлый, на све́щнице Це́ркве Правосла́вныя возжже́нный, сосу́де чистоты́ и избра́нное селе́ние Ду́ха Свята́го! Ты во вре́мя гоне́ния безбо́жнаго в земли́ на́шей от сокро́вищницы души́ твоея́ спаси́тельное испове́дание правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ полага́я. Ны́не у́бо при́зри на нас, недосто́йных чад твои́х, любо́вию тя почита́ющих и с ве́рою и несумне́нною наде́ждею тебе́ взыва́ющих: о па́стырю до́брый и ве́рный служи́телю Христо́в! Моли́ Го́спода Бо́га сохрани́тися правосла́вному Оте́честву на́шему и ве́рным лю́дем, да не закосне́ют во окамене́нии серде́ц и нераде́нии о спасе́нии свое́м. Сподо́би нас, путе́м покая́ния ше́ствующе, возлюби́ти Бо́га всем се́рдцем и помышле́нием на́шим и бли́жняго я́ко себе́, и та́ко, по нело́жному сло́ву апо́стола: прибли́житеся Го́споду, и Той прибли́жится вам, унасле́довати вожделе́нная селе́ния ра́йская, иде́же ты с ли́ки святы́х пребыва́еши, прославля́я в Тро́ице сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.