Ме́сяца ию́ля в 26-й день
Священному́ченика Се́ргия Стре́льникова, пресви́тера

Тропа́рь, глас 1:

Орша́нския ве́си о́трасль доброцве́тную/ и Мари́йския земли́ благоле́пное украше́ние,/ священному́ченика Се́ргия почти́м,/ и́же, всеусе́рдно бли́жним послужи́в,/ в гоне́ниих лю́тых па́ствы не разлучи́ся/ и житие́ до́брое страда́нием увенча́./ Ны́не же, от моще́й благода́ть источа́я/ и во сла́ве Престо́лу Бо́жию предстоя́,// мо́лит дарова́ти нам мир и ве́лию ми́лость.

Конда́к, глас 2:

В моли́твах твои́х не оскудева́я/ и благоприя́тным хода́тайством огражда́я,/ бу́ди нам те́плый предста́тель пред Го́сподем,/ я́ко да по́мощию твое́ю укрепля́еми,/ со́вестию чи́стою и нра́вы благи́ми себе́ украси́м/ и у́зким путе́м ше́ствовати навы́кнем, зову́ще:/ ра́дуйся, священному́чениче Се́ргие,// Правосла́вия побо́рниче и благоче́стия ревни́телю.