Ме́сяца ноября́ в 6-й день
Преподо́бнаго Варлаа́ма Ке́ретскаго, чудотво́рца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4:
Ду́ха Свята́го теплото́ю жела́ние се́рдца твоего́ согре́в/ и зи́му страсте́й умертви́в,/ погрузи́л еси́ страсте́й воста́ние в пучи́не скорбе́й,/ свя́те о́тче Варлаа́ме,/ в ладии́ те́сней носи́мь по мо́рю полно́щному,/ многоко́зненную си́лу де́монскую низложи́л еси́/ и, ту́ю не́мощну показа́в,/ Небе́сная во́инства терпе́нием свои́м удиви́л еси́,/ я́ко по́стников подража́тель и преподо́бных сотаи́нник,// с ни́миже моли́ся Го́сподеви поми́ловатися душа́м на́шим. Два́жды.
Яви́лся еси́ исцеле́ний струя́ оби́льная,/ богоблаже́нне о́тче Варлаа́ме,/ ты бо, путе́м у́зким и приско́рбным ше́ствовав,/ многомяте́жнаго пла́мене у́глие страсте́й угаси́л еси́/ и не дал еси́ сна очи́ма твои́ма,/ ниже́ пло́ти твое́й упокое́ния,/ те́мже у́бо а́ще и теле́сне преста́вился еси́,/ но ду́хом Бо́гу предстои́ши,// Его́же моли́ спасти́ся душа́м на́шим.
Волнобу́рныя молвы́ жития́ избежа́в,/ три ле́та по хла́дному мо́рю ше́ствовал еси́,/ земны́х и тле́нных наслажде́ние презре́в,/ ко оти́шию же пеще́ры святы́я дости́гнув/ и со зверьми́ жи́тельствуя,/ пусты́нныя по́двиги усе́рдно подъя́л еси́,/ и де́монская ополче́ния и многоко́зненную си́лу их посрами́л еси́.// Те́мже твою́ па́мять при́сно пе́сньми восхваля́ем ве́рно.
Сла́ва, глас 8:
Прииди́те, мона́шествующих мно́жество,/ днесь Варлаа́ма пе́сньми и пе́ньми восхва́лим, глаго́люще:/ ра́дуйся, пресла́вне Варлаа́ме, Помо́рия пресве́тлый свети́льниче;/ ра́дуйся, отца́ духо́внаго благочести́вая о́трасле;/ ра́дуйся, я́ко звезда́ полно́щная, воздержа́ния и терпе́ния высота́ми сия́я, яви́лся еси́;/ ра́дуйся, я́ко мно́га чудеса́ о Христе́ сотвори́л еси́;/ ра́дуйся, целому́дрия и воздержа́ния сто́лпе, и́мже де́монская свире́пства искорени́шася;/ ра́дуйся, я́ко плотска́я мудрова́ния умертви́л еси́;/ ра́дуйся, преподо́бне Варлаа́ме,// покая́нием просвеща́яй ду́ши на́ша.
И ны́не, Богоро́дичен, глас то́йже:
Аз, Де́во Свята́я Богоро́дице,/ к покро́ву Твоему́ прибега́ю:/ вем, я́ко обря́щу Тобо́ю спасе́ние,// мо́жеши бо, Чи́стая, помощи́ мне.
Проки́мен дне.
На стихо́вне стихи́ры, глас 1.
Подо́бен: Небе́сных чино́в:
Блаже́нне Варлаа́ме,/ ты, ве́тхаго челове́ка со страстьми́ совле́кся,/ во Христа́ вои́стину обле́клся еси́/ и мно́гая вра́жия ополче́ния посрами́л еси́./ Те́мже ве́рно ны́не соше́дшеся в па́мять твою́,// велича́ем просла́вльшаго тя Го́спода.
Стих: Честна́ пред Го́сподем// смерть преподо́бных Его́.
Страсте́й победи́телю,/ пло́ти томи́телю,/ язы́ка возде́ржниче,/ о всех моли́твенник быв, о́тче Варлаа́ме,/ приими́ любо́вию торжеству́ющия// всесвяще́нную па́мять твою́.
Стих: Блаже́н муж боя́йся Го́спода,// в за́поведех Его́ восхо́щет зело́.
Чи́стыми твои́ми моли́твами/ Бо́гу прибли́жився,/ благода́ть и́маши нечи́стыя ду́хи от челове́к отгоня́ти./ Приими́ ны́не пе́ние чад твои́х, преподо́бне,/ ра́достно торжеству́ющих в честне́й твое́й па́мяти,// Варлаа́ме, о́тче наш.
Сла́ва, глас 8:
У́зами моли́тв твои́х,/ богоблаже́нне о́тче Варлаа́ме,/ мно́гая бесо́в ополче́ния связа́л еси́,/ си́лою же Бо́жиею укрепля́емь,/ над страстьми́ воцари́лся еси́/ и упра́влен был еси́, доброхва́льне, в Ца́рствие Небе́сное// во спасе́ние душ на́ших.
Сла́ва, и ны́не, Богоро́дичен, глас то́йже:
Небе́сная пою́т Тя,/ обра́дованная Ма́ти Безневе́стная:/ и мы славосло́вим неизсле́димое Твое́ рождество́, Богоро́дице,// моли́ спасти́ся душа́м на́шим.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.На Го́споди, воззва́х: стихи́ры на 8, глас 2:
Прииди́те, лю́бящии пресла́вныя по́двиги святы́х,/ восхва́лим преподо́бнаго Варлаа́ма из Ке́рети,/ той бо собла́зны ми́ра сего́ превозмо́гл есть/ и, живо́т свой ни во что́же вмени́в,/ о́браз покая́ния и терпе́ния яви́л есть./ Мы же прославля́ем Бо́га, ди́внаго во святы́х Свои́х,// подаю́щаго нам мир и ве́лию ми́лость. Три́жды.
Прииди́те, возра́дуемся, лю́дие земли́ се́верныя,/ пра́зднующе па́мять му́жа добропобе́днаго,/ преподо́бнаго отца́ на́шего Варлаа́ма,/ той бо, многотру́дным путе́м земна́го и водна́го стра́нствия ше́ствуя,/ ве́рою несумне́нною и терпе́нием кре́пким/ востече́ на предлежа́щий ему́ по́двиг,/ и лю́тыя ко́зни вра́жия посрами́./ Сего́ ра́ди сла́вою ве́чною// увенча́ уго́дника Своего́ Человеколю́бец Госпо́дь. Три́жды.
Богоно́сне преблаже́нне Варлаа́ме,/ все плотско́е мудрова́ние ду́ху повину́л еси́,/ поще́ния и изнуре́ния теле́снаго страда́ньми утверди́вся,/ я́ко зла́то, в горни́ле искуше́но, сия́я, яви́лся еси́/ и прия́телище Ду́ха Пресвята́го был еси́./ Помина́й нас, чту́щих па́мять твою́ свяще́нную,/ и умоли́ Го́спода, да ми́лостив нам бу́дет// во мно́жестве Своея́ бла́гости. Два́жды.
Сла́ва, глас 6:
Покая́ния о́браз нело́жно восприи́м,/ му́жески в мо́ри с супру́жницею ме́ртвою ше́ствовал еси́/ и, ладию́ гроб сотвори́в,/ потща́лся еси́ плоть порабо́тити ду́ху./ Те́мже жи́тель пусты́нный яви́лся еси́,/ пра́вило доброде́тели изве́стнейшее,/ о́тче наш Варлаа́ме,/ пло́ти бо и ми́ра отре́кся,/ па́че естества́ по́двиг поне́сл еси́,/ не самому́ себе́ живы́й,/ но Христу́, живу́щу в тебе́,// Его́же моли́ спасти́ся душа́м на́шим.
И ны́не, Богоро́дичен, глас то́йже:
Кто Тебе́ не ублажи́т, Пресвята́я Де́во?/ Кто ли не воспое́т Твоего́ пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся,/ естество́м Бог сый/ и естество́м быв Челове́к нас ра́ди,/ не во двою́ лицу́ разделя́емый,/ но во двою́ естеству́ несли́тно познава́емый./ Того́ моли́, Чи́стая, Всеблаже́нная,// поми́ловатися душа́м на́шим.
Вход. Проки́мен дне. Чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́/ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ра хра́ма, и свята́го стихи́ры, глас 5:
Преподо́бне о́тче Варлаа́ме,/ ты, измла́да возлюби́в добро́ту Влады́ки Христа́/ и к Нему́ жела́ние невозвра́тно име́я,/ в правове́рии и благоче́стии подвиза́лся еси́./ Егда́ же супоста́т диа́вол искуси́ тя, о́тче преподо́бне,/ ты ру́ку свою́ на ве́сла кре́пко возложи́л еси́/ и, мно́ги ско́рби претерпева́я,/ отню́д вспять не зрел еси́,/ стопы́ твоя́ по словеси́ отца́ духо́внаго направля́я,/ вся ко́зни вра́жия препобеди́л еси́,// и вене́ц побе́дный от Го́спода прия́л еси́.
Бу́ри океа́на хла́дна не убоя́вся,/ проти́ву зе́льнаго обурева́ния/ любо́вию Христо́вою согрева́емь был еси́,/ досточу́дне о́тче Варлаа́ме,/ чу́вственныя же стра́сти смири́в воздержа́ния брозда́ми,/ ре́вность к Небе́сным на мо́ри и на земли́ показа́л еси́,/ и вся́кое плотско́е жела́ние ду́хови покори́л еси́./ Тем ны́не в Небе́сных селе́ниих водворя́яся,// моли́ о душа́х на́ших.
Сла́ва, глас то́йже:
Боготе́чней звезде́ полно́щней уподо́бився,/ вся бре́ги страны́ се́верныя обте́кл еси́,/ досточу́дне Варлаа́ме,/ и, я́ко денни́ца, Со́лнцу Пра́вды предходя́щая,/ Тому́ еди́ному после́довав,/ равноа́нгельно в пеще́ре пожи́л еси́,/ те́мже ны́не на Небесе́х со А́нгелы Христу́ предстои́ши,// со дерзнове́нием моля́ся о душа́х на́ших.
И ны́не, Богоро́дичен, глас то́йже:
Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый Пра́вды, просвети́ти хотя́/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,// непреста́нно моли́ спасти́ся душа́м на́шим.
На стихо́вне стихи́ры, глас 1.
Подо́бен: Небе́сных чино́в:
Наста́, богоно́сне Варлаа́ме,/ со́лнца светле́йший твой пра́здник,/ и́же озаря́ет приходя́щия к тебе́ ве́рою,/ и безсме́ртием благоуха́ет,/ и душа́м источа́ет исцеле́ния,// Варлаа́ме преподо́бне, моли́твенниче о душа́х на́ших.
Стих: Честна́ пред Го́сподем// смерть преподо́бных Его́.
Пучи́ною морско́ю, я́ко по су́ху, небоя́зненно проходя́,/ безпло́тныя враги́ струя́ми слез твои́х потопи́л еси́,/ богому́дре Варлаа́ме преподо́бне,/ и, чуде́с дар от Бо́га восприи́м,/ многоразли́чныя стра́сти исцеля́еши,/ моля́ся о спасе́нии душ на́ших.
Стих: Блаже́н муж боя́йся Го́спода,// в за́поведех Его́ восхо́щет зело́.
Я́ко хра́брый во́ин Христо́в,/ проти́ву князе́й ве́ка сего́ воста́л еси́,/ многотру́дную епитимию́ соблюда́я./ Мы же, дивя́щеся Бо́жию о тебе́ промышле́нию,/ ко Влады́це Христу́ припа́даем,// ско́рби на́ша в ра́дость претворя́ющему.
Сла́ва, глас 8:
Ру́це твои́ на ве́сла возложи́л еси́,/ преподо́бне о́тче Варлаа́ме,/ Боже́ственная повеле́ния испо́лнил еси́/ и не возврати́лся еси́ вспять,/ но, ше́ствуя путе́м те́сным и приско́рбным/ до конца́ вчине́ннаго ти испыта́ния, Го́споду угоди́л еси́,// И́же и просла́ви тя.
И ны́не, Богоро́дичен, глас то́йже:
Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.
На благослове́нии хле́бов тропа́рь свята́го, два́жды, и Богоро́дице Де́во: еди́ножды.
Тропа́рь, глас 1:
Боже́ственною свы́ше просвети́вся благода́тию,/ ева́нгельски Христу́ после́довал еси́,/ благослове́нием духо́внаго отца́ своего́/ всем се́рдцем во́лю Бо́жию твори́л еси́,/ сего́ ра́ди восприи́м си́лу на врага́ сопроти́внаго,/ не убоя́лся еси́ морски́я тяготы́, ниже́ хла́да уклони́лся еси́,/ во свое́м пла́че по Бо́зе не усыпа́я и проти́ву зе́льнаго обурева́ния пла́вая,/ в ладии́ ма́лей по вода́м ше́ствие твори́л еси́/ и, равноа́нгельное житие́ пожи́в,/ по преставле́нии чуде́с благода́ть источа́еши,/ те́мже вси тебе́ возопие́м:/ Варлаа́ме блаже́нне,/ моли́ Христа́ Бо́га,// да спасе́т ду́ши на́ша.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен, глас 1: Гаврии́лу веща́вшу:
По 1-м стихосло́вии седа́лен, глас 4:
Путе́м те́сным и приско́рбным три ле́та по хла́дному мо́рю ше́ствовал еси́, крест свой на ра́мо взем, преподо́бне о́тче наш Варлаа́ме. Ужасе́ся не́бо о сем, и океа́н ве́лий вострепета́ зело́. Мы же, дивя́щеся сему́, умолко́хом в стра́се Бо́жии, пра́ведных бо ду́ши в руце́ Его́ суть.
Сла́ва, и ны́не, Богоро́дичен:
Обнови́ла еси́, Чи́стая, Боже́ственным Рождество́м Твои́м истле́вшее страстьми́ земноро́дных ме́ртвенное существо́ и воздви́гла еси́ вся от сме́рти к животу́ нетле́ния. Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
По 2-м стихосло́вии седа́лен, глас 5:
Земны́х и тле́нных наслажде́ние презре́в, преподо́бне Варлаа́ме, Христу́ после́довал еси́ и, пусты́нное житие́ возлюби́в, пеще́ру в жили́ще себе́ обре́л еси́ и две́ри ея́ загради́л еси́, со зверьми́ же обита́я, тяготы́ пустынножи́тельства претерпе́л еси́ и полки́ де́монов му́жественне отрази́л еси́. Те́мже твою́ па́мять при́сно пе́сньми восхваля́ем.
Сла́ва, и ны́не, Богоро́дичен:
Ужа́сно чу́до зача́тия, и несказа́нен о́браз рождества́ в Тебе́ позна́ся, Присноде́во Чи́стая, ужаса́ет мой ум и удивля́ет помышле́ние, сла́ва Твоя́, Богоро́дице, всем простира́емая во спасе́ние душ на́ших.
По полиеле́и седа́лен, глас 8:
Погрузи́л еси́ страсте́й все воста́ние в пучи́не скорбе́й, свяще́нный о́тче, три ле́та по полно́щному мо́рю в ладии́ с ме́ртвою ше́ствуя, до́ндеже те́ло ея́ истле́, и, та́ко грехо́в проще́ние от Бо́га Всеми́лостиваго восприе́м, жизнь безконе́чную по сме́рти насле́довал еси́. Те́мже днесь Христо́ва Це́рковь пра́зднует твою́ досточу́дную па́мять, преподо́бных украше́ние.
Сла́ва, и ны́не, Богоро́дичен:
Наста́ви ны на путь покая́ния, уклоня́ющияся при́сно к злым безпу́тием, и Преблага́го прогне́вающия Го́спода, Неискусобра́чная Благослове́нная Мари́е, прибе́жище отча́янных челове́ков, Бо́жие обита́лище.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бен и пра́веден был еси́, Варлаа́ме,/ и свети́льник боже́ственный и светоно́сный,/ егда́ же враг тя запя́т,/ морски́я тяготы́ и хла́да не убоя́лся еси́,/ в пла́че по Бо́зе не усыпа́я,/ в ма́ле ладии́ по вода́м ше́ствие твори́л еси́,/ ми́лость же Бо́жию покая́нием сниска́в,/ преди́вная чудеса́ лю́дем в земли́ Помо́рской яви́л еси́.// Те́мже и нас не оста́ви моли́твами твои́ми.
Кано́н преподо́бнаго, глас 8. Песнь 1
Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спа́сл еси́ немо́кренно, Го́споди,/ и ввел еси́ я́ в го́ру святы́ни, вопию́щия:/ пои́м Тебе́, Бо́гу на́шему,// песнь побе́дную, я́ко просла́вися.
Припе́в: Преподо́бне о́тче наш Варлаа́ме, моли́ Бо́га о нас.
Препе́тая Единосу́щная Тро́ице, Преблаги́й Бо́же, И́же па́че ума́ да́ры рабо́м Свои́м дая́й, и нам све́тлую посли́ благода́ть, всех страсте́й очища́ющую, песнь ны́не начина́ющим.
Тя́жкия ско́рби и боле́зни со смире́нием претерпева́я, и псалмо́в пе́ние усе́рдно ко Христу́ вознося́, благода́тию Бо́жиею победи́тель на ду́хи лука́выя показа́лся еси́, о́тче Варлаа́ме. Помози́ и нам сете́й лука́ваго избе́гнути.
Стра́сти душетле́нныя воздержа́ния брозда́ми победи́в, и ве́лиим посто́м гре́шную плоть свою́ усмири́в, ду́шу твою́ покая́ния слеза́ми очи́стил еси́. Моли́ о нас, о́тче преподо́бне, да и мы скве́рны грехо́вныя очи́стимся.
Богоро́дичен: Вели́кий во проро́цех Моисе́й Тя написа́ иногда́ скрижа́ль богообра́зне, све́щник све́та, и сень, и жезл процве́тший, Всенепоро́чная, и ру́чку, ма́нну нося́щую, Е́юже возведо́хомся от земли́ к высоте́.
Песнь 3
Ирмо́с: Утвержде́й руко́ю Твое́ю, Сло́ве Бо́жий, Небеса́,/ просвеще́нием Твоего́ и́стиннаго позна́ния,// утверди́ и нас на Тя наде́ющихся сердца́.
Уби́йству супру́жницы науще́нием зми́я лука́ваго соверши́вшуся, те́ло ея́ земли́ преда́л еси́ и во град Ко́лу ко иере́ю блаже́нному Феодори́ту прите́кл еси́, о соде́янных тобо́ю в я́рости и невоздержа́нии известву́я и слеза́ми зе́млю ороша́я.
Услы́шав иере́й о соде́янных тобо́ю, дае́т ти и́го, е́же ме́ртвую во гро́бе носи́ти, до́ндеже истле́ет те́ло ея́, самому́ же в посте́ и моли́тве пребыва́ти и таково́ воздержа́ние име́ти, я́ко и ры́бу то́чию на Па́сху вкуша́ти.
Таково́е запреще́ние прии́м, преподо́бне, те́ло супру́жницы твоея́, во гро́бе лежа́щее, в ладию́ вложи́л еси́ и сам в ню́, я́коже во гроб, вшел еси́, да с ме́ртвою по мо́рю стра́нствуеши.
Богоро́дичен: Ю́же ле́ствицу дре́вле Иа́ков ви́де, прообразу́ющу о Тебе́, Богома́ти, рече́: степе́нь Бо́жия сия́, я́же досто́йно слы́шиши; ра́дуйся, Обра́дованная, Госпо́дь с Тобо́ю.
Седа́лен, глас 8:
А́ще и восхоте́ диа́вол ду́шу твою́ умертви́ти, грехо́м уби́йственным ту окаля́в, оба́че ты, о́тче, волна́ми морски́ми носи́мь, мо́рем слез покая́нных омы́л еси́ ю́. Те́мже и оживи́ ю́ Госпо́дь, и хода́тая мно́гих душ непосты́дна тя поста́ви.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя без се́мене ро́ждшую Бо́га пло́тию, вси ублажа́ем, ро́ди челове́честии: огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода. Те́мже, А́нгельский и человече́ский род, досто́йно сла́вим пресвято́е Рождество́ Твое́ и согла́сно вопие́м Ти: моли́ Христа́ Бо́га, согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Песнь 4
Ирмо́с: Услы́шах, Го́споди, слух Твой и убоя́хся,/ я́ко неизрече́нным Сове́том, Бог сый Присносу́щный,/ от Де́вы проше́л еси́ вопло́щся./ Сла́ва снизхожде́нию Твоему́, Христе́,// сла́ва си́ле Твое́й.
Ви́дел еси́ морску́ю пучи́ну нечи́сту и челове́ки непроходи́му от мно́жества че́рвия, корабле́й о́стовы верте́ти естество́м навы́кших. Сих, преподо́бне Варлаа́ме, cвяще́нныя воды́ кропле́нием отгна́л еси́.
Ру́це иногда́ уби́йством окровавле́ннеи, ны́не же чи́сте и свя́те возде́еши к Вы́шнему, о нас моля́, преподо́бне, во е́же обрести́ нам благода́ть и грехо́в оставле́ние, и бу́дущих благ сподо́битися моли́твами твои́ми.
Бу́рю и дождь, и вся́кую возду́шную тя́гость терпя́, потща́лся еси́ за́поведь отца́ своего́ духо́внаго сохрани́ти, те́мже от Вседержи́теля Бо́га вене́ц побе́дный прия́л еси́, да́руя страсте́й исцеле́ние и бесо́в отгна́ние.
Богоро́дичен: Уста́ви неуста́вное смуще́ние, Чи́стая Ма́ти Бо́жия, е́же к Сы́ну Твоему́ направля́ющи движе́ние воспева́ющих: сла́ва си́ле Твое́й, сла́ва, Христе́, прише́ствию Твоему́.
Песнь 5
Ирмо́с: Мрак души́ моея́/ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,// да у́тренюя сла́влю Тя.
Ме́ртвую, я́ко жи́ву, в пусты́ню Чупу́ с собо́ю прине́сл еси́, преподо́бне, и та́мо, моли́твою и посто́м на врага́ вооружи́вся, по́мощь от Вы́шняго прия́л еси́, и стре́лы лука́выя терпе́нием сокруши́л еси́.
Слы́шав о оби́тели в Пе́чензе, святы́м Три́фоном зи́ждемей, того́ труды́ и по́двиги ви́дети восхоте́л еси́. И ту пребы́в ма́лое вре́мя, проро́чески тому́ о гряду́щем проре́кл еси́.
Селе́ние Три́фоново оставля́я и па́ки к Ке́рети возвраща́яся, сие́ изре́кл еси́, преподо́бне: о Три́фоне, сподо́бился еси́ оби́тель воздви́гнути и бра́тию собра́ти, оба́че лю́дие ме́ста сего́ бу́дут зле неукроти́ми, я́ко зве́ри ди́вии, тех ве́тхою я́ростию и остроже́лчием превозше́дшии.
Богоро́дичен: Улови́ти мя всегда́ и́щет прелука́вый, от того́ сете́й исхити́ мя, Влады́чице, и боже́ственным кро́вом крилу́ Твое́ю це́ла соблюди́.
Пеcнь 6
Ирмо́с: Бе́здна грехо́в и прегреше́ний бу́ря мя смуща́ет,/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,// о Упра́вителю, и спаси́.
Чу́вственныя стра́сти брозда́ми воздержа́ния победи́в, чудоде́йственне Варлаа́ме, чистото́ю душе́вною боже́ственно вооружи́лся еси́, безстра́стие же и целому́дрие стяжа́в, Бо́гови наипа́че прибли́жился еси́.
Богозда́нная Чупска́я пу́стынь, я́ко путь, в Не́бо веды́й, прия́т тя, всехва́льне о́тче Варлаа́ме, иде́же со зверьми́ ди́виими му́жески подвиза́лся еси́, благода́ть же Ду́ха Свята́го оби́льну стяжа́в, мно́гим путь спасе́ния яви́л еси́.
Ю́ности цвет воздержа́нием увяди́в, во оде́жду бра́чную обле́клся еси́, к Ве́чери уготовля́яся, на ню́же и зван бысть, доброде́тельми же просия́в, вы́шняго черто́га нестаре́ющегося дости́гл еси́.
Богоро́дичен: Тя о́бщее любоче́стие, Всенепоро́чная, на́шего естества́ вси сла́вим, уста́ еди́на бы́вше, и еди́но согла́сие соверши́вше.
Конда́к, глас 1:
Все у́мное жела́ние к Бо́гу впери́в,/ жите́йския молвы́ до конца́ отри́нул еси́,/ в моли́твах, слеза́х и злострада́ниих плоть свою́ изнуря́я,/ проти́ву неви́димаго врага́ до́бре подвиза́лся еси́/ и, того́ ко́зни до конца́ победи́в,/ путь морски́й челове́ком без вре́да от ядови́таго че́рвия сотвори́л еси́./ В Небе́сныя же черто́ги всели́вся,/ ны́не со А́нгелы Святе́й Тро́ице предстои́ши,/ Ю́же моли́ сохрани́тися нам от враг ви́димых и неви́димых,/ и ненаве́тны нас соблюди́ от скорбе́й, зол и боле́зней,/ да твои́ми моли́твами спасе́мся,// Варлаа́ме преподо́бне о́тче наш.
И́кос:
Отве́рзи ми устне́, преблаже́нне, богоприя́тными твои́ми моли́твами, да воспою́ пресла́вное твое́ житие́ и боле́зненную я́зву, ю́же на мо́ри Христа́ ра́ди претерпе́л еси́. Ты, о́тче досточу́дне, многоко́зненнаго врага́ победи́в и ра́вно А́нгелом житие́ стяжа́в, столп наро́ду Помо́рскому на мо́ри и пра́вило све́тлое и́ноком на земли́ яви́лся еси́. Ны́не же со А́нгелы Святе́й Тро́ице предстои́ши, Ю́же моли́ сохрани́тися нам от враг ви́димых и неви́димых, и стра́сти душевре́дныя до конца́ победи́ти, да твои́ми моли́твами спасе́мся, Варлаа́ме преподо́бне о́тче наш.
Песнь 7
Ирмо́с: О́троцы богочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя ороша́еми,/ песнь воспева́ху глаго́люще:// превозноси́мый отце́в и нас Бо́же, благослове́н еси́.
В моли́твах бо́дренное и в поще́нии крепкоду́шное, терпе́ние во искуше́ниих неосла́бное, ума́ чистото́ю, преподо́бне, показа́л еси́, земли́ бо и земны́х досто́йно отступи́в, Небе́сное обре́л еси́ наслажде́ние, воспева́я: благослове́н Бог оте́ц на́ших.
Остр ум име́я во е́же себе́ внима́ти, стра́сти душетле́нныя успи́л еси́ и снопы́ благопло́дия пожа́л еси́, пита́я благоче́стно восхваля́ющия тя и пою́щия: благослове́н Бог оте́ц на́ших.
Кро́ток, и ми́лостив, и чист быв, кро́тких зе́млю дости́гл еси́, о́тче Варлаа́ме, укроти́ настоя́щую бу́рю се́рдца моего́, да в тишине́ боже́ственней быв, песносло́влю твоя́ по́двиги и воспева́ю: благослове́н Бог оте́ц на́ших.
Богоро́дичен: У́глем Иса́ия от Серафи́ма от oлтаря́ очища́ется, возопи́ велегла́сно: се, Де́ва во чре́ве прии́мет и роди́т Сы́на, и нареку́т и́мя Ему́ Емману́ил, е́же есть сказа́емо: с на́ми Бог. Ему́же вопие́м: благослове́н Бог оте́ц на́ших.
Песнь 8
Ирмо́с: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.
Цели́ши незави́стно ве́рно призыва́ющия тя, врач от Бо́га показа́вся, блаже́нне, и лука́вых духо́в прогони́тель, я́ко звезда́ всесве́тлая от пусты́ни, возсия́в чуде́с луча́ми, просвеща́я вопию́щих: Го́спода по́йте и превозноси́те Его́ во ве́ки.
Ору́жие пе́ние име́л еси́, моли́тву же сте́ну, непоро́чную сле́зу омыва́лище скве́рнам душе́вным, па́мять же сме́ртную сожи́тельницу стяжа́в, преподо́бне, то́ю ум очи́стил еси́, и Бо́га зре́ти сподо́бился еси́, поя́: Го́спода по́йте и превозноси́те Его́ во ве́ки.
Мо́щи твоя́ источа́ют ве́рным исцеле́ние, па́мять же твоя́, блаже́нне, сия́ющи па́че со́лнца и всем ду́ши просвеща́ющи, ра́дости исполня́ет пою́щих: Го́спода по́йте и превозноси́те Его́ во ве́ки.
Богоро́дичен: Ум у́бо есть Нерожде́нный Оте́ц, обра́зно прему́дрыми предрече́ся; Сло́во же Собезнача́льно, Соесте́ственный Сын; и Дух Святы́й, И́же в Де́ве от Сло́ва созда́ воплоще́ние.
Песнь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стину Бо́га,/ вы́шшую пречи́стых Сил,// немо́лчными славословле́нии велича́ем.
Еди́ной любви́ Христо́вой приложи́в свою́ ду́шу, Варлаа́ме преподо́бне, я́ко за́поведей Бо́жиих испо́лнитель, благода́ть мно́гих чуде́с прия́л еси́, всехва́льне. Те́мже тя почита́ем.
Сокро́вище моще́й твои́х, Варлаа́ме, исто́чник показа́ся исцеле́ний, к ни́мже всяк притека́я, во́ду благода́ти незави́стно почерпа́ет и избавля́ется вся́ких страсте́й душе́вных и теле́сных. Сего́ ра́ди, преподо́бне, тя ублажа́ем.
О тро́ице присноблаже́нная, равноче́стнии отцы́ Феодори́те, Три́фоне и Варлаа́ме, я́ко еди́но блаже́нство иму́щии от Бо́га, призыва́ющих и восхваля́ющих вас от всех лю́тых спаса́йте те́плым предста́тельством ва́шим.
Богоро́дичен: Тесни́т мя широта́ вели́чий Твои́х, Влады́чице, подавля́ющи сло́во от ча́стости, и пресла́вно ми случа́ется е́же недоумева́тися от благомо́щества, те́мже толи́ко Тя Возвели́чившаго сла́вим.
Свети́лен:
Чу́вственныя стра́сти теле́сныя победи́в мно́гими по́двиги, тягото́ю ве́лиею и терпе́ния брозда́ми, чудоде́йственниче Варлаа́ме, и безпло́тных ревнова́ние на земли́ и на мо́ри показа́в, вся плотска́я жела́ния ду́ху повину́л еси́, тем ны́не в Небе́сных селе́ниих водворя́яся, моли́ о душа́х на́ших.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во, я́ко от Тро́ицы Еди́наго родила́ еси́, Богоро́дице, и но́сиши на боже́ственную руку́ Пребога́тое Сло́во, Непреме́нно и Неизме́нно.
На хвали́тех стихи́ры на 4, глас 6:
Благода́ть Ду́ха, о́тче Варлаа́ме,/ тебе́ возсия́вши, све́тло просвети́ тя,/ отсю́ду ума́лил еси́ страсте́й нощь,/ и безстра́стия день пости́гл еси́,/ чи́сте чисте́йшему Све́ту совоку́плься,/ в Не́мже жи́тельствуя, не забу́ди, богогла́се,// ве́рою пою́щих свяще́нную твою́ па́мять. Два́жды.
Благода́ть, жела́нную тебе́, Варлаа́ме, нося́ Небе́сную,/ земны́х небре́гл еси́,/ сего́ ра́ди избра́ тя Госпо́дь на страда́льческое житие́,/ ты же, я́ко безпло́тен пребыва́я,/ ско́рби и боле́зни поне́сл еси́/ и слеза́ми огнь стра́сти грехо́вныя изсуши́л еси́./ Ны́не, богоприя́тне, присносу́щныя сла́дости исто́чника воды́,/ теку́щия в живо́т ве́чный,// благоче́стно наслажда́ешися.
Благода́ть исцеле́ний духо́вных/ от Бо́га досто́йно прия́л еси́,/ Варлаа́ме преподо́бне,/ е́юже пре́лесть духо́в лука́вых низложи́в,/ ратобо́рец на бесо́в яви́лся еси́/ и врач боле́зней неисце́льных показа́лся еси́,/ источа́еши бо, я́ко во́ды, благода́тныя струи́,/ от ни́хже напая́еми,// воспева́ем па́мять твою́.
Сла́ва, глас 8:
Страда́нием неча́янным пе́рвее тя́жко искуси́вся,/ в пусты́ни же посто́м тече́ние боже́ственное соверши́в,/ на Небеса́ возше́л еси́/ и ны́не Христу́ предстои́ши,/ Варлаа́ме о́тче преподо́бне,// моля́ся те́пле за ны, пою́щия тя.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в Це́ркви преподо́бных. Апо́стол к Кори́нфяном, зача́ло 176. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.