Ме́сяца декабря́ в 16-й день
Священному́ченика Арка́дия (Оста́льскаго), епи́скопа Бе́жецкаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 6:
Апо́стольския благода́ти прее́мниче/ и сла́вы му́чеников соприча́стниче,/ Арка́дие богопросла́вленне,/ ты, во у́зах темни́чных пребыва́я,/ за и́стину Христо́ву до́бле подвиза́лся еси́,/ и ду́шу свою́ за ню́ положи́л еси́./ Те́мже усе́рдно к тебе́ взыва́ем:/ моли́ся ко Го́споду,// ве́ру святу́ю сохрани́ти и спасти́ся душа́м на́шим. Два́жды.
Прииди́те, ве́рнии,/ в пе́снех восхва́лим Арка́дия богоизбра́ннаго,/ сей бо, сло́во и́стины пропове́дуя,/ житие́м свои́м его́ утверди́,/ Христо́вою же любо́вию влеко́м,/ с му́ченики венча́ся./ Сего́ ра́ди те́пле к нему́ взыва́ем:/ моли́ся, священному́чениче,/ Оте́честву твоему́ в ми́ре пребыва́ти// и спасти́ся душа́м на́шим. Два́жды.
И́ны стихи́ры, глас то́йже.
Подо́бен: Все отло́жше:
Все отложи́в жите́йское попече́ние,/ трудо́м архипа́стырским ре́вностне преда́лся еси́,/ Арка́дие свяще́ннейше,/ сего́ ра́ди гра́ды и ве́си апо́стольски обходи́л еси́,/ ничто́же земно́е себе́ стяжава́я,/ но Небе́сная взыску́я,/ да после́дуеши во всем Пастыренача́льнику Христу́// и моли́твенник яви́шися о спасе́нии душ на́ших. Два́жды.
Все отри́нув привре́менных мечта́ние,/ мучи́телей суровство́ презре́л еси́,/ священному́чениче Арка́дие,/ те́мже Христо́в свиде́тель и́стинный показа́лся еси́/ гони́телем и ве́рным,/ отпа́дшим и соу́зником,/ бли́жним и да́льним,/ да вси в позна́ние прии́дут Сы́на Бо́жия,/ Его́же со дерзнове́нием моли́// о спасе́нии душ на́ших. Два́жды.
Сла́ва, глас 8:
Арка́дие небому́дренне,/ сла́вы Бо́жия ревни́телю,/ и па́ствы твоея́ а́нгеле до́брый,/ ты пе́рвее Безкро́вную Же́ртву с любо́вию принося́,/ последи́ кро́вию свое́ю священноде́йствие сло́ва и́стины запечатле́л еси́./ Те́мже, Христу́ сораспе́нся/ и во сла́ву Его́ возше́д,/ моли́ся, страда́льче блаже́нне,// спасти́ся душа́м на́шим.
И ны́не, Богоро́дичен, глас то́йже:
Царь Небе́сный за человеколю́бие на земли́ яви́ся/ и с челове́ки поживе́:/ от Де́вы бо Чи́стыя плоть прие́мый/ и из Нея́ проше́дый с восприя́тием,/ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га/ и соверше́нна Челове́ка вои́стину пропове́дающе,/ испове́дуем Христа́ Бо́га на́шего,/ Его́же моли́, Ма́ти Безневе́стная,// поми́ловатися душа́м на́шим.
Вход. Проки́мен дне. И чте́ния три.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново/ и разуме́вше, я́ко челове́ка некни́жна еста́ и про́ста,/ дивля́хуся, зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те?/ Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше,/ единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ра, глас 1:
Арка́дие богопросвеще́нне,/ Оте́честву поле́зная разумева́я,/ и разоре́ние Руси́ Святы́я прозрева́я,/ священному́ченика Патриа́рха Ермоге́на ше́ствием моле́бным почти́л еси́,/ и се́ятелей сму́ты но́выя обличи́л еси́,/ те́мже в житии́ многотру́днем Христа́ испове́дуя,/ ве́рен Ему́ да́же до сме́рти пребы́л еси́.// Моли́ о чту́щих па́мять твою́.
Сла́ва, глас 2:
Христо́ва во́ина добропобе́днаго,/ Небе́сным во́инством сора́тника земна́го,/ земно́му во́инству па́стыря многомоли́твеннаго,/ священному́ченика Арка́дия пе́сненно почти́м,/ усе́рдно к нему́ взыва́юще:/ свя́тче Бо́жий,/ Оте́чество твое́ от междоусо́бныя бра́ни сохрани́,/ от вся́кия е́реси и раско́ла изба́ви// и во и́стине Христо́вой па́ству твою́ соблюди́.
И ны́не, Богоро́дичен, глас то́йже:
Смире́ния на́шего не пре́зри,/ Благослове́нная Богоро́дице,/ и моли́твы новому́чеников и испове́дников Це́ркве на́шея приими́,/ нече́стие от земли́ Ру́сския отвраща́ющи/ и обстоя́ния грехо́внаго избавля́ющи,// да сла́вим Тя во ве́ки, держа́вная Помо́щнице.
На стихо́вне стихи́ры, глас 2.
Подо́бен: До́ме Евфра́фов:
Свети́льниче Це́ркве Ру́сския,/ священному́чениче Арка́дие,/ жезл епи́скопский я́коже крест/ благослове́нием святи́теля Ти́хона восприя́л еси́,// с ни́мже моли́ Христа́ Бо́га спасти́ся нам.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Святы́х твои́х наста́вников,/ священному́чеников Амвро́сия, Фадде́я и Проко́пия,/ глаго́лы в се́рдце восприи́м,/ житию́ их небоя́зненно после́довал еси́,// Арка́дие блаже́нне.
Стих: Честна́ пред Го́сподем// смерть преподо́бных Его́.
Свяще́нники, во у́зах содержи́мыя,/ хле́бом насу́щным препита́л еси́,/ обурева́емыя укрепля́л еси́/ и стра́ждущия утеша́л еси́,// Арка́дие чу́дне.
Сла́ва, глас то́йже:
Святы́я Тро́ицы пропове́дниче,/ Арка́дие небому́дренне,/ во благоде́нствии земна́я расточи́вый,/ во страда́нии Небе́сная стяжа́вый,/ Трисо́лнечным све́том уны́ния тьму просвети́,// во е́же спасти́ся нам.
И ны́не, Богоро́дичен, глас то́йже:
Пречи́стыя Де́вы/ служи́телю чи́стый,/ Арка́дие свяще́нне,/ моли́ Влады́чицу Держа́вную,/ ве́ру пра́вую во Оте́честве твое́м утверди́ти// и спасти́ся душа́м на́шим.
Тропа́рь, глас 4:
От ю́ности Це́ркви Христо́ве себе́ предобручи́в,/ страда́ти за Христа́ возжеле́л еси́/ и кре́постию твое́ю не изнемо́гл еси́,/ вседне́вно ду́шу за па́ству полага́я./ Те́мже последи́ и смерть от мучи́телей прия́л еси́,/ священному́чениче Арка́дие сла́вне,// и те́плый о нас пред Бо́гом моли́твенниче.
НА У́ТРЕНИ
По 1-м стихосло́вии седа́лен, глас 4:
Сло́ва Бо́жия служи́телю, священному́чениче Арка́дие достохва́льне! Ты, зе́млю Волы́нскую апо́стольски обходя́, заблу́ждшия о́вцы взыска́л еси́ и во огра́ду церко́вную ввел еси́, те́мже и страда́ние Христа́ ра́ди восприе́м, дерзнове́ние пред Бо́гом обре́л еси́. Моли́ спасти́ся душа́м на́шим.
Сла́ва, и ны́не, Богоро́дичен:
О Всепе́тая Влады́чице Богоро́дице, му́чеников испове́дание и ве́нче, А́нгелы сла́вимая, челове́ки воспева́емая, и всего́ ми́ра вожделе́нная Помо́щнице! Изба́ви Це́рковь Ру́сскую вся́каго обстоя́ния, еди́на Благослове́нная.
По 2-м стихосло́вии седа́лен, глас 5:
Па́стырю до́брый, Арка́дие сла́вне, егда́ на суд непра́ведный призва́н был еси́, тогда́ лю́бящая тя ча́да в темни́цу с тобо́ю внидо́ша, пе́сньми свяще́нными ту оглаша́юще. С ни́миже и на́шу любо́вь приими́, свя́тче Бо́жий.
Сла́ва, и ны́не, Богоро́дичен:
Те́плая Предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со А́нгелы, умире́ние да́ти ми́рови, и спасе́ние, и ве́лию ми́лость.
По полиеле́и седа́лен, глас 4:
Святи́телю Арка́дие ми́лостиве! Ты, к ни́щим и гла́дным сострада́ния испо́лнився, все достоя́ние твое́ истощи́л еси́ и ве́рныя подража́ти ти подви́гл еси́, да просветя́тся вси любо́вию Христо́вою.
Сла́ва, и ны́не, Богоро́дичен:
В покая́нии припа́даем к Тебе́, Влады́чице, проще́ния беззако́ний на́ших испроша́юще, и в ра́дости сла́вим Тя, спасе́ния на́шего Нача́льнице, со Арха́нгелом воспева́юще: ра́дуйся, Неве́сто Неневе́стная.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.
По 50-м псалме́ стихи́ра, глас 6:
Благове́стника богому́драго,/ лю́ди волы́нския во Правосла́вии утверди́вшаго,/ во у́зах солове́цких содержи́маго,/ и с му́ченики бу́товскими смерть прии́мшаго,/ святи́теля Арка́дия восхва́лим пе́сньми,/ той бо ны́не, Престо́лу Бо́жию предстоя́,// со дерзнове́нием мо́лится о спасе́нии душ на́ших.
Кано́н, глас 7.
Песнь 1
Ирмо́с: Изме́ншему Бо́гу Изра́иля/ от мо́ря Чермна́го,/ побе́дную песнь пои́м,// я́ко просла́вися.
Арка́дия небому́драго, на земли́ за Христа́ пострада́вша, воспои́м со А́нгелы, я́ко во святы́х просла́вися.
Ре́вностию боже́ственною от ю́ности пали́ма и свяще́нства призва́ние восприи́мша, пои́м Арка́дия, я́ко во святы́х просла́вися.
Ко пропове́данию сло́ва Бо́жия благода́тию влеко́м, гра́ды и ве́си обходи́л еси́, о́тче Арка́дие, отпа́дшия взыску́я и Христу́ воспева́я, я́ко сла́вно просла́вися.
Богоро́дичен: А́нгелов удивле́ние, и челове́ков прибе́жище, Богороди́тельнице Пречи́стая, немо́лчное хвале́ние Тебе́ прино́сим, я́ко в Сы́не Твое́м сла́вно просла́вилася еси́.
Песнь 3
Ирмо́с: Утверди́ся ве́рою Христо́ва Це́рковь,/ и́бо непреста́нно пе́сньми вопие́т, пою́щи:/ Свят еси́, Го́споди,// и Тя пое́т дух мой.
Де́лы сло́во известву́я, ни́щим вся разда́л еси́ и житие́м твои́м Христа́ просла́вил еси́, Его́же вы́ну в ду́хе твое́м воспева́л еси́.
И́стины свиде́телю, Арка́дие светоза́рне! Ско́рби вре́мене многотру́днаго не смути́ша тя, но к вя́щшей ре́вности поусти́ша Христа́ просла́вити, Его́же вы́ну в ду́хе твое́м воспева́л еси́.
Апо́столом подо́бяся, ве́рныя призыва́л еси́, о́тче Арка́дие, ни́щим послужи́ти, гла́дныя напита́ти Христа́ ра́ди, Его́же вы́ну в ду́хе твое́м воспева́л еси́.
Богоро́дичен: Неискусобра́чная Де́во Богоро́дице, Ты священному́ченика Арка́дия чи́ста от собла́знов ми́ра сего́ многостра́стнаго соблюла́ еси́, и с ним пое́т Тя дух мой.
Седа́лен, глас 5:
Стра́ха несть в любви́, рече́ апо́стол, те́мже и ты, святи́телю Арка́дие, любо́вь соверше́нну стяжа́в, за дру́ги ду́шу положи́л еси́ и, дерзнове́ние ко Христу́ име́я, мо́лиши при́сно о нас, страда́ния твоя́ почита́ющих.
Сла́ва, и ны́не, Богоро́дичен:
Утоли́ боле́зни многовоздыха́ющия души́ моея́, утоли́вшая вся́ку сле́зу от лица́ земли́: Ты бо челове́ков боле́зни отгоня́еши, и гре́шных ско́рби разруша́еши, Тебе́ бо вси стяжа́хом наде́жду и утвержде́ние, Пресвята́я Ма́ти Де́во.
Песнь 4
Ирмо́с: Услы́шах слух Твой, Го́споди,/ я́ко яви́лся еси́ на земли́,/ за е́же спасти́ ны,// тем вопие́м: сла́ва си́ле Твое́й, Го́споди.
Ева́нгельскаго благове́стия дар с да́ром свяще́нства восприя́л еси́, о́тче, те́мже и сло́во и́стины небоя́зненно возвеща́л еси́, поя́: сла́ва си́ле Твое́й, Го́споди.
Боговеща́нными твои́ми глаго́лы вожди́ и во́ины ру́сския укрепи́л еси́, о́тче, и лю́ди заблу́ждшия научи́л еси́ правосла́вно Христа́ испове́дати и воспева́ти: сла́ва си́ле Твое́й, Го́споди.
О́тче Арка́дие, ты святи́телю Христо́ву Ти́хону в вели́ком и ма́лом ве́рен пребы́л еси́, те́мже со мно́гими христиа́ны в темни́цу всажде́н быв, ку́пно с ни́ми Христа́ воспева́л еси́: сла́ва си́ле Твое́й, Го́споди.
Богоро́дичен: Предста́тельством Бо́жия Ма́тере утвержда́емь, Арка́дие чу́дне, в гоне́ниих и темни́цах не́мощь пло́ти ду́хом препобежда́л еси́, и Сы́ну Пречи́стыя немо́лчно воспева́л еси́: сла́ва си́ле Твое́й, Го́споди.
Песнь 5
Ирмо́с: К Тебе́ у́тренюю/ и Тебе́ вопию́, Благоутро́бне Го́споди:/ омраче́нную грехми́ ду́шу мою́,// све́том озари́в за́поведей Твои́х, наста́ви.
Ужасо́шася лю́дие, егда́ на смерть обреко́ша тя безбо́жнии, ты же, о́тче Арка́дие, всего́ себе́ Бо́гу пре́дал еси́, све́том за́поведей Его́ просвеще́н и наста́влен.
Да́нным ти благослове́нием патриа́ршим, блаже́нне Арка́дие, крест служе́ния архиере́йскаго, с ним же ско́рби и у́зы восприя́л еси́, во след Христа́ стопы́ своя́ направля́я.
Ревну́я о сла́ве Госпо́дни, я́ко архиере́й Бо́жий, служе́ние пасха́льное возгла́вити та́йно дерзну́л еси́, Арка́дие сла́вне, па́ству лу́бенскую све́том за́поведей Христо́вых просвеща́я.
Богоро́дичен: Покро́в и прибе́жище, Богоро́дице, страда́льцем Христо́вым я́вльшися, и ны, страстьми́ стужа́емыя, ко спасе́нию наста́ви.
Песнь 6
Ирмо́с: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:// Всеси́льне Спа́се, поми́луй нас.
Го́рних, о́тче, взыска́л еси́, в до́льних я́ко стра́нник и пришле́ц скита́яся и при́сно взыва́я: Всеси́льне Спа́се, поми́луй нас.
О́тче многострада́льне Арка́дие, ты боле́зни и ско́рби мно́гия в житии́ твое́м претерпе́л еси́, сло́во Бо́жие пропове́дуя и моля́ся: Всеси́льне Спа́се, поми́луй нас.
Воскресе́ние Твое́, Христе́ Спа́се, Арка́дий доблему́дрый дерзнове́нно воспе́л есть, со стра́ждущею па́ствою свое́ю взыва́я: Всеси́льне Спа́се, поми́луй нас.
Богоро́дичен: Все упова́ние на Сы́на Твоего́, Богороди́тельнице, возлага́я, Арка́дий терпеливоду́шный с ве́рными воспева́ше: Всеси́льне Спа́се, поми́луй нас.
Конда́к, глас 2:
Нра́вом кро́ток и се́рдцем ми́лостив быв,/ во о́браз Спа́сов, священному́чениче Арка́дие,/ убо́гим достоя́ние твое́ расточи́л еси́,/ любо́вию же Христо́вою обогаще́н,/ на Голго́фу Ру́сскую возше́л еси́,/ те́мже с новому́ченики Це́ркве на́шея,/ Престо́лу Святы́я Тро́ицы предстоя́,// сла́ву Воскресе́ния улучи́л еси́.
И́кос:
А́нгела земна́го и челове́ка Небе́снаго зрим тя, о́тче Арка́дие небому́дренне, не свои́х си взыска́вый, но я́же к по́льзе и спасе́нию бра́тий твои́х. Те́мже Жито́мир град пропове́данием твои́м украша́ется, Гали́ция правосла́вная воспева́ет, го́ры Кавка́зския стра́нствии твои́ми освяща́ются, ла́вра Не́вская пасха́льным пе́нием оглаша́ется, о́строви Солове́цтии долготерпе́ние твое́ почита́ют, Москва́ тя у́зника и испове́дника Христо́ва прие́млет, и вся земля́ Ру́сская с новому́ченики Це́ркве на́шея воспева́ет, ты бо, Престо́лу Святы́я Тро́ицы предстоя́, сла́ву Воскресе́ния улучи́л еси́.
Песнь 7
Ирмо́с: В пещь о́гненную вве́ржени, преподо́бнии о́троцы/ огнь в ро́су преложи́ша,/ воспева́нием си́це вопию́ще:// благослове́н еси́, Го́споди Бо́же оте́ц на́ших.
Си́лою Христа́ Воскре́сшаго дерзнове́ние прия́л еси́, Арка́дие до́блестне, за дру́ги своя́ ду́шу положи́ти, воспева́я: благослове́н еси́, Го́споди Бо́же оте́ц на́ших.
Пе́щи о́гненныя гоне́ний лю́тых не убоя́лся еси́, о́тче Арка́дие, в ру́ки мучи́телей себе́ предая́, се́рдцем же воспева́я: благослове́н еси́, Го́споди Бо́же оте́ц на́ших.
Основа́ние тве́рдое кано́ны церко́вныя поставля́я, прельще́нныя увещава́л еси́, Арка́дие, без епи́скопа ничто́же твори́ти, да вси еди́ным се́рдцем воспою́т: благослове́н еси́, Го́споди Бо́же оте́ц на́ших.
Богоро́дичен: Ми́лостивая Засту́пница, ю́ности твоея́ Храни́тельница, Богоро́дица, свя́те Арка́дие, во у́зах тебе́ яви́ся, да не изнемо́жеши, воспева́я: благослове́н еси́, Го́споди Бо́же оте́ц на́ших.
Песнь 8
Ирмо́с: Еди́наго Безнача́льнаго Царя́ сла́вы,/ Его́же благосло́вят Небе́сныя Си́лы,/ и трепе́щут чи́ни А́нгельстии,/ по́йте, свяще́нницы,// лю́дие, превозноси́те Его́ во ве́ки.
С новому́ченики солове́цкими, о́тче Арка́дие, гла́дом, мра́зом, и рабо́тами го́рькими томи́мый, взыва́ти не преста́л еси́: лю́дие, превозноси́те Христа́ во ве́ки.
Отца́ Небе́снаго слуго́ ве́рный, всеще́дре о́тче Арка́дие, собра́тиям во у́зах служи́ти потща́лся еси́, милосе́рдие па́че си́лы явля́я, да превозно́сят с тобо́ю Бо́га во ве́ки.
Арка́дие христоподража́тельне, ты судия́м непра́ведным рекл еси́: а́ще мене́ и́щете уби́ти, собра́тий мои́х оста́вите. Те́мже превозно́сим во святы́х ди́внаго Бо́га во ве́ки.
Богоро́дичен: Небе́снаго челове́ка и земна́го а́нгела, священному́ченика Арка́дия, служе́нием во у́зах Тя, Богома́ти, просла́вивша, велича́ем, и с ни́мже превозно́сим Тя во вся ве́ки.
Песнь 9
Ирмо́с: Всепе́тая, Небе́с превы́шшая,/ Безнача́льное Сло́во безсе́менно заче́ншая,/ и воплоще́ннаго Бо́га ро́ждшая челове́ком,// тем Тя вси велича́ем.
Глаго́лы жи́зни в се́рдце нося́, сия́ пропове́дал еси́ немо́лчно, о́тче Арка́дие, и ве́рен да́же до сме́рти Христу́ пребы́л еси́; тем тя вси велича́ем.
Пло́тию тле́нную смерть прия́л еси́, архиере́ю Христо́в Арка́дие, во рву бу́товстем погребе́н быв, оба́че со святы́ми Престо́лу Бо́жию предстои́ши во сла́ве; тем тя вси велича́ем.
Ли́ку новому́ченик сочета́вся, святи́телю о́тче Арка́дие, дерзнове́нно мо́лиши ны́не о утвержде́нии Це́ркве Ру́сския; тем тя вси велича́ем.
Богоро́дичен: Ины́я наде́жды ра́зве Тебе́ не стяжа́хом, Влады́чице: дом Твой, зе́млю на́шу, от враг заступи́, Тя бо с новому́ченики Це́ркве Ру́сския при́сно велича́ем.
Свети́лен:
Свети́льниче Це́ркве Ру́сския, о́бласть тьмы разсе́явый, Арка́дие богопросла́вленне, моли́ за ны, да све́том Христо́вым озари́мся.
Сла́ва, и ны́не, Богоро́дичен:
Све́тлостию чистоты́ Твоея́ Херуви́мы и Серафи́мы превозше́дшая, Богороди́тельнице браконеиску́сная, све́том Сы́на Твоего́ пою́щия Тя просвети́.
На хвали́тех стихи́ры, глас 5.
Подо́бен: Ра́дуйся:
Ра́дуйся, святи́телю Арка́дие,/ Ева́нгелия пропове́дниче,/ нестяжа́ния и ми́лости сокро́вище,/ сосу́де чи́стый Ду́ха Свята́го,/ сла́вы Бо́жия ревни́телю,/ небоя́зненно за ве́ру подвиза́выйся/ в годи́ну гоне́ний лю́тых,/ и кровь твою́ за Христа́ пролия́вый,// Его́же моли́ дарова́ти душа́м на́шим ве́лию ми́лость. Два́жды.
Ра́дуйся, святи́телю Арка́дие,/ от ю́ности Бо́гом предызбра́нный,/ целому́дрия рачи́телю,/ благоче́стия свети́льниче,/ в нощи́ безбо́жия горя́й и светя́й,/ заблу́ждшия ко спасе́нию наставля́яй,/ те́мже и ны, грехи́ мно́гими отягче́нныя,/ из глубины́ уны́ния возведи́,// Христа́ моля́ дарова́ти нам ве́лию ми́лость.
Ра́дуйся, святи́телю Арка́дие,/ ми́лости бога́тство неистощи́мое,/ любве́ ева́нгельския о́бразе,/ братолю́бия пра́вило,/ вдови́цам и сирота́м прибе́жище,/ скорбя́щим утеше́ние,/ во у́зах су́щим помо́щниче,/ изнемога́ющим в по́двизе укрепле́ние,// ты бо моли́твами твои́ми да́руеши нам ве́лию ми́лость.
Сла́ва, глас 8.
Подо́бен: О, пресла́внаго чудесе́:
О, пресла́внаго чудесе́!/ Смире́ние си́лу препобежда́ет,/ изгна́ние возво́дит в дом О́тчий,/ и у́зы в ца́рское благоле́пие претворя́ются:/ се бо за Христа́ пострада́вый,/ священному́ченик доблему́дрый Арка́дий/ с новому́ченики Це́ркве Ру́сския/ прославля́ет Святу́ю Тро́ицу// и мо́лит при́сно спасти́ся нам.
И ны́не, Богоро́дичен, глас и подо́бен то́йже:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до днесь зе́млю Ру́сскую покрыва́ет/ и лик Свой во о́бразех многоиме́нных/ во утеше́ние на́ше явля́ет./ О Влады́чице Держа́вная!/ Не преста́ни и впредь во утвержде́ние Правосла́вия// ми́лости на ны излива́ти до ве́ка. Ами́нь.
Вели́кое славосло́вие. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Прича́стен: В па́мять ве́чную бу́дет пра́ведник, от слу́ха зла не убои́тся.