Ме́сяца ию́ня в 25-й день
Преподо́бнаго Ни́кона О́птинскаго, испове́дника
НА МА́ЛОЙ ВЕЧЕ́РНИ
На Го́споди, воззвáх: стихи́ры преподо́бнаго на 4, глас 5:
В день обре́тения главы́ Крести́теля Госпо́дня/ скит Предте́чев обре́л еси́, о́тче Ни́коне,/ и пу́стынь, по жре́бию избра́нную, уви́дел еси́,/ ра́дость неча́янную от Ма́тере Бо́жия прие́м,// утеша́ет бо избра́нных Свои́х Де́ва Пречи́стая. Два́жды.
В попра́зднство рождества́ Предте́чи/ испове́днически сконча́вся,/ рожде́ния в Небе́сное Ца́рствие сподо́бился еси́/ и ли́ку блаже́нных,/ по обетова́нию Христа́ Спаси́теля,// сопричте́н был еси́. Два́жды.
Сла́ва, глас 8:
Преподо́бне о́тче наш Ни́коне,/ о тебе́ ны́не весели́мся,/ вшел бо еси́ в ра́дость Го́спода на́шего,/ мы же тебе́ после́дующе,/ рече́нная тобо́ю помина́ем,/ я́ко духо́вный оте́ц путь указу́ет,/ оба́че самому́ челове́ку сей проити́ подоба́ет,/ да потруди́тся и пону́дит себе́,// е́же восхи́тити Ца́рство Небе́сное.
И ны́не, Предте́чи, глас 8: Виждь Елисаве́т, к Де́ве Мари́и глаго́лющу: (зри на Го́споди, воззва́х: вели́кия вече́рни).
На стихо́вне стихи́ры, глас 4:
Рекл еси́, о́тче, в се́рдце свое́м:/ не преда́м жития́ моего́ смышле́нию моему́,/ но, ра́зум своенра́вный оста́вив,/ потщу́ся послуша́нию прилежа́ти/ и терпе́нием содева́ти ду́шу мою́,/ да обря́щу благоду́шие и ра́дость// ны́не и во ве́ки.
Стих: Блаже́н муж боя́йся Го́спода,// в за́поведех Его́ восхо́щет зело́.
Рекл еси́, преподо́бне, вопроша́ющим:/ се ны́не вре́мя благоприя́тно,/ се ны́не день спасе́ния,/ лю́бящим бо Го́спода вся поспешеству́ют во благо́е/ и во всем прему́дрость и глубина́ им открыва́ется,/ я́ко благода́ть Христо́ва та́яжде// ны́не и во ве́ки.
Стих: Честна́ пред Го́сподем// смерть преподо́бных Его́.
Рекл еси́, испове́дниче, ко Го́споду:/ сла́ва Тебе́, Бо́же, за посыла́емыя ско́рби,/ досто́йное бо по дело́м мои́м прие́млю,/ но помяни́ мя, Влады́ко, егда́ прии́деши во Ца́рствии Твое́м,/ и да бу́дет во́ля Твоя́ свята́я,/ еди́на блага́я и соверше́нная// ны́не и во ве́ки.
Сла́ва, глас 6:
Предстоя́ Престо́лу Бо́жию,/ я́ко еди́н от избра́нных,/ помяни́ в моли́твах недосто́йная ча́да твоя́,/ чту́щая па́мять твою́,// о́тче наш Ни́коне приснопа́мятне.
И ны́не, Предте́чи, глас то́йже: Елисаве́т зача́т Предте́чу благода́ти: (зри на стихо́вне вели́кия вече́рни).
Тропа́рь зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззвáх: стихи́ры Предте́чи, глас 4. И преподо́бнаго, глас то́йже.
Подо́бен: Я́ко до́бля:
Прииди́те, возра́дуемся Го́сподеви,/ воскли́кнем Бо́гу Спаси́телю на́шему,/ я́ко удиви́ ми́лость Свою́ на нас/ и воздви́же в дому́ отце́в на́ших ди́внаго му́жа,/ О́птинскаго ста́рчества прее́мника благода́тнаго,/ новому́чеников Росси́йских звезду́ восходя́щую,/ и́ноков хвале́ние и испове́дников красоту́,/ Ни́кона преподо́бнаго,// Це́ркве Ру́сския се́мя добропобе́дное.
О, коль сладка́ словеса́ твоя́,/ преподо́бне о́тче Ни́коне,/ Спа́са Христа́ благовести́вшая/ и безбо́жную лесть обличи́вшая!/ Ты бо рекл еси́ глас апо́стольский:/ смири́мся под кре́пкую ру́ку Бо́жию,/ Той бо спасе́т зе́млю Ру́сскую в годи́ну лю́тую/ и Це́рковь Свою́ от враг защити́т// десни́цею высо́кою.
Ча́до послуша́ния сладча́йшее,/ ста́рца Варсоно́фия учениче́ возлю́бленный,/ от ю́ности сам себе́ Го́сподеви вдав/ и во́ли своея́ до конца́ совле́кся,/ еди́ныя во́ли Бо́жия/ вседу́шно взыска́л еси́/ и же́ртва жива́я Тому́ яви́лся еси́,/ в ско́рби и в ра́дости воспева́я:// сла́ва Тебе́, Го́споди Бо́же, о всех.
Сто́лпе благоче́стия,/ мона́шествующих пра́вило изве́стное,/ моли́твы свети́ло во тьме безбо́жия,/ му́жества тве́рдое забра́ло,/ испове́дников ру́сских высо́кая похвало́,/ Ни́коне, о́тче всече́стне,/ ста́до твое́ свободи́ из се́тей лука́вых/ и прогони́ враги́ безбо́жныя,// заступа́я нас моли́твами твои́ми.
Сла́ва, преподо́бнаго, глас 8:
Прииди́те, ве́рнии,/ Ни́кона приснопа́мятнаго воспои́м,/ О́птинских преда́ний сокро́вищницу,/ страсте́й искорени́теля и чистоты́ блюсти́теля,/ мона́шествующих уте́шителя кро́ткаго,/ па́стыря доброразсу́днаго и безме́зднаго врача́,/ лампа́ду негаси́мую у Престо́ла Бо́жия,/ благово́нное кади́ло приле́жнаго моле́ния,/ и́мже проше́ния на́ша поспешеству́ются/ и Пра́ведный Судия́ на ми́лость приклоня́ется,/ и та́ко возопии́м:/ ра́дуйся, о́тче прехва́льне,/ преподо́бных насле́дниче,// моли́ спасти́ся душа́м на́шим.
И ны́не, Предте́чи, глас то́йже:
Виждь Елисаве́т, к Де́ве Мари́и глаго́лющу:/ что пришла́ еси́ ко мне, Ма́ти Го́спода моего́?/ Ты Царя́ но́сиши, и аз во́ина;/ Ты Законода́вца, и аз законоположи́теля;/ Ты Сло́ва, и аз глас,// пропове́дающ Ца́рство Небе́сное.
Вход. Проки́мен дне. И чте́ния 3 преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́/ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ра хра́ма.
И стихи́ра преподо́бнаго,
пое́тся иде́же мо́щи его́ почива́ют, глас 1:
Торжеству́йте, христолю́бцы,/ глас хвале́ния возвы́сивше к Бо́гу,/ прославля́юще благоче́стия подви́жника,/ Ни́кона преподо́бнаго ста́рца О́птинскаго,/ и́же Арха́нгельскаго кра́я дости́г,/ та́мо тече́ние испове́днически сконча́,/ зе́млю же сию́ мощьми́ свои́ми благода́тными обогати́./ Таково́е сокро́вище многоце́нное/ в не́дрех свои́х иму́щи,/ от него́же ре́ки исцеле́ний источа́ются,/ воспо́й, земле́ Пи́нежская, лику́ющи:/ сла́ва Тебе́, Бо́же Всеще́дрый,// во святы́х Твои́х почива́яй.
Сла́ва, преподо́бнаго, глас 2:
Прииди́те, празднолю́бных собо́ри,/ пе́сньми воспои́м Ни́кона преподо́бнаго,/ Це́ркве Ру́сския украше́ние,/ ста́рцев зерца́ло святоле́пное,/ и́ноков степе́нь высо́кий,/ испове́дников О́птинских светоза́рную звезду́,/ я́же облиста́ет луча́ми и́стины вся ве́рныя/ и благода́тию утеша́ет сердца́./ Те́мже си́це к нему́ возопии́м:/ при́зри на ны, ча́да твоя́,/ любо́вию рождество́ Предте́чево пою́щая// и свято́е твое́ преставле́ние пра́зднующая.
И ны́не, Богоро́дичен, глас то́йже:
О, чудесе́ но́ваго всех дре́вних чуде́с!/ Кто бо позна́ Ма́терь, без му́жа ро́ждшую/ и на руку́ нося́щую всю тварь Содержа́щаго?/ Бо́жие есть изволе́ние Ро́ждшееся./ Его́же я́ко Младе́нца, Пречи́стая, Твои́ма рука́ма носи́вшая/ и Ма́терне дерзнове́ние к Нему́ иму́щая,/ не прeстáй моля́щи о чту́щих Тя,// уще́дрити и спасти́ ду́ши на́ша.
На стихо́вне стихи́ры преподо́бнаго, глас 2:
Свети́льник благоче́стия днесь возсия́ конце́м,/ всю подсо́лнечную озаряя́й,/ зе́млю Ру́сскую испове́данием святы́м облистава́яй,/ мра́чную безбо́жную нощь разсеява́яй,/ светоно́сное у́тро ве́ры правосла́вныя явля́яй/ и от со́ния страсте́й пробужда́яй,/ Ни́кон преподобноиспове́дник,// вы́ну Христа́ велича́яй.
Стих: Свет возсия́ пра́веднику,// и пра́вым се́рдцем весе́лие.
Ве́рою вооружи́вся, преподо́бне Ни́коне,/ богопроти́вных мно́жества победи́л еси́,/ песнь испове́дания богокра́снаго воспева́я,/ е́юже посрамля́ются злочести́вии/ и утвержда́ются мона́шествующих полцы́,/ О́птинская же пу́стынь хва́лится/ и Це́рковь Ру́сская красу́ется,// Спа́са Христа́ велича́ющи.
Стих: Честна́ пред Го́сподем// смерть преподо́бных Его́.
Днесь челове́цы со А́нгелы торжеству́ют,/ но́вый бо испове́дник к Бо́гу преселя́ется,/ Небеса́ ра́достно отверза́ются,/ и вси святи́и О́птинстии в раи́ собо́рне лику́ют,/ и мы, рачи́телие их, с ни́ми воспои́м,// вку́пе Христа́ велича́юще.
Сла́ва, преподо́бнаго, глас 6:
Вертогра́дарю О́птинский,/ о́тче наш Ни́коне,/ ты де́латель иску́сный показа́лся еси́/ и страж оби́тели неусы́пный:/ егда́ бо зной лю́таго безбо́жия прии́де,/ ты, виногра́дник сей сло́вом животво́рным оби́льно ороша́я,/ Та́йнами Боже́ственными ча́да твоя́ пита́л еси́./ Егда́ же я́ростию врага́ затворе́ни бы́ша хра́ми О́птинстии,/ ты, Безкро́вную Же́ртву напосле́док соверши́в,/ во изгна́ние испове́днически поте́кл еси́/ и, во́ли Госпо́дней со смире́нием повину́яся,/ крест страда́ний му́жественне поне́сл еси́,/ те́мже и в Небе́снем Ца́рствии собо́ру ста́рец О́птинских сочета́лся еси́,/ с ни́миже моли́ся о нас Христу́ Бо́гу,// я́ко послу́шницы есмы́ веле́ний их.
И ны́не, Предте́чи, глас то́йже:
Елисаве́т зача́т Предте́чу благода́ти,/ Де́ва же Го́спода сла́вы,/ целова́стеся о́бе ма́тери,/ и младе́нец взыгра́ся,/ внутрь бо раб хваля́ше Влады́ку./ Удиви́вшися же, ма́ти Предте́чева нача́т вопи́ти:/ отку́ду мне сие́, да Ма́ти Го́спода моего́ прии́де ко мне?/ Да спасе́т лю́ди отча́янныя,// Име́яй ве́лию ми́лость.
Тропа́рь Предте́чи, глас 4:
Проро́че и Предте́че прише́ствия Христо́ва,/ досто́йно восхвали́ти тя недоуме́ем мы, любо́вию чту́щии тя:/ непло́дство бо ро́ждшия и о́тчее безгла́сие разреши́ся,/ сла́вным и честны́м твои́м рождество́м,// и воплоще́ние Сы́на Бо́жия ми́рови пропове́дуется.
Тропа́рь преподо́бнаго, глас 3:
Духо́вному наста́внику прилепи́вся, о́тче Ни́коне,/ восприя́л еси́ му́дрость ста́рчества,/ в послуша́ние же Христо́во себе́ преда́в,/ испове́дническим житие́м Того́ просла́вил еси́,/ и в ли́це святы́х О́птинских водвори́лся еси́,/ с ни́миже моли́ Христа́ Бо́га// спасти́ся душа́м на́шим.
НА У́ТРЕНИ
По 1-м стихосло́вии седа́лен преподо́бнаго, глас 8:
О ста́де Бо́жием па́стырски ревну́я, безбо́жная уста́ безу́мных загради́ти потща́лся еси́, де́монская нападе́ния моли́твою отгоня́я и Пастыренача́льнику сле́довати чад призыва́я. Те́мже Вы́шняго зва́ния сподо́бился еси́, Ни́коне преподо́бне, моли́ Христа́ Бо́га спасти́ся душа́м на́шим.
Сла́ва, и ны́не, глас то́йже:
Его́же исхо́ди от дней ве́чных, Сего́ воплоща́ема во утро́бе Деви́честей ви́дела еси́, пра́ведная Елисаве́то, егда́ Ма́терь Го́спода твоего́ нарекла́ еси́ Де́ву, целова́вшую тя, с Не́юже Христа́ Бо́га моли́, да спасе́т ду́ши на́ша.
По 2-м стихосло́вии седа́лен преподо́бнаго, глас 8:
Ве́ры победоно́сна побо́рника и оте́ческих преда́ний блюсти́теля, прославля́ем тя, Ни́коне, о́тче всече́стне, на кова́рство богобо́рных мучи́телей не приклони́вшася, испове́данием же пра́вым па́ству твою́ утверди́вша, основа́ние тве́рдо иму́ща Христа́, Ка́меня ве́ры. Его́же моли́ зе́млю Ру́сскую в Правосла́вии утверди́ти, и спасти́ ду́ши на́ша.
Сла́ва, и ны́не, глас то́йже:
Зако́на и проро́ков исполне́ние Тя познава́я, Отрокови́це, Заха́рия вопия́ше: благослове́н, Пречи́стая, Плод чре́ва Твоего́, я́ко посети́ и сотвори́ избавле́ние лю́дем Свои́м и дарова́ нам ве́лию ми́лость.
Велича́ние:
Ублажа́ем тя,/ преподобноиспове́дниче Ни́коне,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Псало́м избра́нный:
Терпя́ потерпе́х Го́спода, и внят ми, и услы́ша моли́тву мою́.
Поста́ви на ка́мени но́зе мои́, и испра́ви стопы́ моя́.
Смиря́х посто́м ду́шу мою́.
Полу́нощи воста́х испове́датися Тебе́, седмери́цею днем хвали́х Тя.
Непра́вду возненави́дех и омерзи́х, зако́н же Твой возлюби́х.
Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.
Изба́ви мя от гоня́щих мя, я́ко укрепи́шася па́че мене́.
За словеса́ усте́н Твои́х аз сохрани́х пути́ же́стоки.
По полиеле́и седа́лен преподо́бнаго, глас 8:
При ногу́ ста́рцев О́птинских воспита́н и Боже́ственным Ду́хом просвеще́н, дерзнове́нный пропове́дник ве́ры, мона́шествующих кро́ткий наста́вник и па́стырь до́брый яви́лся еси́, полага́яй ду́шу свою́ за о́вцы. Мучи́телей же беззако́ннующих посрами́в, изгна́ние непра́ведное претерпе́л еси́, Ни́коне преподо́бне, Христа́ Бо́га моли́ пода́ти грехо́в оставле́ние чту́щим любо́вию святу́ю па́мять твою́.
Сла́ва, и ны́не, Богоро́дичен:
Вои́стину Богоро́дицу Тя испове́дуем, Сы́ном Твои́м спа́сшеся, гре́шнии раби́ Твои́, Бо́га бо непостижи́мо родила́ еси́, Кро́вию Свое́ю очища́ющаго нас от вся́каго греха́ и в ра́йское весе́лие вводя́щаго. Его́же с Тобо́ю восхваля́ем.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Луки́, зача́ло 64.
По 50-м псалме́ стихи́ра преподо́бнаго, глас 6:
Днесь прии́де светоно́сная па́мять твоя́,/ Ни́коне преподо́бне,/ озаря́ющи зе́млю Ру́сскую,/ ве́рных же сердца́ просвеща́ющи/ и ли́ца богобо́рных посрамля́ющи,/ я́ко тьма безбо́жия мимохо́дит/ и пра́вда Бо́жия показу́ется:/ ты же, испове́дниче О́птинский,/ ста́рцев житию́ поревнова́вый,/ сугу́бую благода́ть унасле́довал еси́,/ и писа́ньми твои́ми мно́ги на путь и́ноческий наста́вил еси́,/ и ко спасе́нию приве́л еси́.// Моли́ о душа́х на́ших.
Кано́н Предте́чи, и преподо́бнаго, его́же краегране́сие: Я́ко благосла́вную свире́ль тя, Ни́коне, воспою́. Глас 8.
Песнь 1
Ирмо́с: Пои́м Бо́гу, от го́рькия рабо́ты фарао́новы изба́вльшему Изра́иля,/ и о́гненным столпо́м, и све́тлым о́блаком наста́вльшему,// я́ко просла́вися.
Припе́в: Преподо́бне о́тче наш Ни́коне, моли́ Бо́га о нас.
Явля́ющи красоту́ церко́вную, па́мять испове́дника О́птинскаго облиста́ конце́м, и Це́рковь Ру́сская того́ воспева́ет, Христо́вою благода́тию па́ки обновля́ема.
К по́прищу приступи́в неосла́бным умо́м, преподо́бне, прило́ги де́монския отрази́л еси́ и, си́лою Христо́вою укрепля́емь, стра́сти до́блественно низложи́л еси́, Ни́коне, победи́телю тезоимени́тый.
О́птинская сла́ва, ста́рчества печа́ть, мона́хов о́браз и по́стником пра́вило, в пе́снех да восхва́лится днесь преподо́бный Ни́кон, о душа́х на́ших те́плый моли́твенник.
Богоро́дичен: Без се́мене зачала́ еси́, и безболе́зненно родила́ еси́, и млеко́м воздои́ла еси́ воплоще́нное Сло́во, Мариа́м, Боголе́пная Де́во, Твоя́ песносло́вцы при́сно от бед спаса́й.
Песнь 3
Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.
Лучеза́рная па́мять приспе́ преподо́бнаго Ни́кона, рождество́ Предте́чево провожда́ющи, и возсиява́ет конце́м Христо́во смотре́ние спаси́тельное.
А́нгела ли пусты́ни О́птинския тя нарече́м? Трубу́ ли испове́дания благозву́чную? Мона́хов ли предводи́теля, и бесо́в низложи́теля? Богопропове́дниче Ни́коне, о́тче всече́стне!
Го́рняя му́дрствуя, мирска́го треволне́ния уклони́лся еси́, и страсте́й взыгра́ния послуша́нием обузда́л еси́, безмо́лвие же ски́тское возлюби́в, неизрече́нныя та́йны ве́ры, блаже́нне, поче́рпл еси́.
Богоро́дичен: Огнь Боже́ственный во утро́бе прия́ла еси́, и́мже не опали́ся, но освяти́ся естество́ челове́ческое. Те́мже Тя, Богора́дованная, я́ко неопали́мую купину́ и све́щник Бо́жий воспева́ем.
Конда́к и и́кос Предте́чи.
Ин конда́к преподо́бнаго, глас 3:
Тече́ние соверши́в и ве́ру соблю́д,/ и ча́да своя́ во благоче́стии утверди́в,/ ко Престо́лу Пресвяты́я Тро́ицы восте́кл еси́ ра́достно,/ Ни́коне преподобноиспове́дниче,/ со все́ми ста́рцы О́птинскими моли́ непреста́нно,// мир дарова́ти душа́м на́шим.
Седа́лен преподо́бнаго, глас 8:
Пе́рвее по́стническими боре́нии врага́ злоко́зненнаго победи́в, по́слежде испове́данием безбо́жныя посрами́л еси́, О́птинскаго ста́рчества цве́те благоуха́нный и новому́чеников Росси́йских сподви́жниче: с ни́миже предстоя́ Престо́лу Царя́ сла́вы Христа́, моли́ о чту́щих тя, Ни́коне преподо́бне, да зове́м ти: ра́дуйся, о́тче, побе́ды тезоимени́тый.
Сла́ва, седа́лен Предте́чи, глас 8.
Подо́бен: Повеле́нное:
Заха́риин плод, непло́дныя цвет роди́ся днесь нам от обеща́ния, честны́й Иоа́нн Предте́ча Госпо́день, игра́я же во утро́бе ма́терни, пропове́дует и пре́жде рождества́ Соде́теля всех. Сей показа́ неизрече́нное Бо́жие и спаси́тельное явле́ние, сего́ вси почита́ем.
И ны́не, Богоро́дичен, глас то́йже:
Обнови́ла еси́, Чи́стая, Боже́ственным Рождество́м Твои́м, истле́вшее во страсте́х земноро́дных ме́ртвенное существо́, и воздви́гла еси́ вся от сме́рти к животу́ нетле́ния. Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
Песнь 4
Ирмо́с: Твое́ вочелове́чение,/ е́же пре́жде век предопредели́л еси́,/ в после́дняя благоволи́л еси́ соверши́ти, Го́споди,// услы́шах, и стра́хом воспева́х.
Свети́льник ве́ры правосла́вныя, Ни́коне свяще́нне, яви́лся еси́, в нощи́ безбо́жия при́сно светя́й, зарю́ бо Ду́ха в се́рдце прие́м, возблиста́л еси́ светолу́чными пропове́дании.
Любве́ оте́ческия испо́лнен сый, я́коже дои́лица ча́да твоя́ согрева́еши, те́лом у́бо отстоя́, ду́хом же коего́ждо посеща́я, от враг душегуби́тельных моли́твами покрыва́еши и храни́ши.
Апо́стольски ревну́я, преподо́бне, во́лки мы́сленныя от ста́да твоего́ отгоня́еши, и безбо́жная уста́ загражда́еши, и к па́жити богове́дения и́стиннаго па́ству твою́ наставля́еши.
Богоро́дичен: Вседе́тельный Дух на́йде на Тя, Всенепоро́чная, О́тчим благоволе́нием, и Сло́во Бо́жие в Тя всели́ся, и плоть бысть несказа́нно, во спасе́ние на́ше и обновле́ние.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя, и к све́ту за́поведей Твои́х// пути́ моя́ напра́ви, молю́ся.
Ни́кона вси похва́лим пе́сненно, О́птинскаго ста́рчества све́тлый вене́ц, я́ко послуша́ния рачи́теля и по́стников украше́ние, и я́ко орга́н сладкогла́сный, ве́рных сердца́ веселя́яй.
Учениче́ благопослу́шный, о́тче Ни́коне, ты, му́дрость ста́рца твоего́ Варсоно́фия се́рдцем восприе́м, преподо́бием и пра́вдою, я́ко фи́никс, процве́л еси́ и плоды́ разсужде́ния прине́сл еси́.
Ю́ношеския по́хоти презре́в, преподо́бне, и щито́м ве́ры огради́вся, стре́лы лука́ваго сокруши́л еси́ и мече́м моли́твы те́рния страсте́й посе́кл еси́.
Богоро́дичен: Со́лнца сла́вы Небе́сныя, Христа́, колесни́ца мы́сленная яви́лася еси́, Богоро́дице, озаря́ющаго всю тварь Боже́ственною благода́тию.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Ве́ры пра́выя утвержде́ние и Це́ркве украше́ние бысть испове́дание твое́, Ни́коне всече́стне, и мона́шествующим забра́ло кре́пкое, и всем ча́дом твои́м огражде́ние.
Иску́с послуша́ния проше́д, ста́рчества благода́ть унасле́довал еси́, и свети́льник разсужде́ния в нощи́ безбо́жней яви́лся еси́, осиява́я ве́рным стези́ спасе́ния и заблу́ждшия о́вцы во огра́ду церко́вную возвраща́я.
Раче́нием Боже́ственным распали́вся, преподо́бне, темни́чныя у́зы во многоце́нное сокро́вище вменя́л еси́, безче́стие же вся́кое во благу́ю похвалу́, и му́ки тя́жкия во многоплете́нный вене́ц. Те́мже и по́честей Небе́сных дости́гл еси́.
Е́же страда́ти по Христе́ вожделе́вый и ду́шу за о́вцы положи́ти хотя́й, я́ко овча́ на заколе́ние, во изгна́ние, Ни́коне, отведе́н был еси́, иде́же воспе́л еси́ сла́ву Христо́вых Страсте́й.
Богоро́дичен: Ле́ствица Иа́ковля Де́ва пронарече́ся, Е́юже сни́де Христо́с, в плоть от крове́й Ея́ оболки́йся, и па́ки в го́рняя взы́де, па́дшее совозне́с естество́ челове́ческое.
Конда́к преподо́бнаго, глас 1:
Ум и се́рдце я́ко скрижа́ли мы́сленныя/ послуша́нием угла́дил еси́,/ на ни́хже пе́рстом Боже́ственным/ красота́ мона́шества вообрази́ся,/ и сла́ва Бо́жия тя осени́,/ во испове́дании твое́м просия́вшая,/ Ни́коне, о́тче преподо́бне,/ О́птины пу́стыни хвало́ и утвержде́ние,/ моли́ Христа́ Бо́га,// спасти́ся всем, благоче́стно тя почита́ющим.
И́кос:
Твои́х глаго́лов вкуси́вше, о́тче, я́ко сла́дкий тя плод послуша́ния дерза́ем воспе́ти, но дел отню́д не иму́ще, я́ко медь звеня́щи обрета́емся, оба́че на по́мощь твою́ наде́ющеся, со благогове́нием взыва́ем: ра́дуйся, мона́шествующих при́сное утвержде́ние; ра́дуйся, испове́дников сто́лпе кре́пкий. Ра́дуйся, церко́внаго преда́ния немо́лчная уста́; ра́дуйся, трубо́ О́птинская добропобе́дная. Ра́дуйся, му́тный пото́к безбо́жия изсуша́яй; ра́дуйся, о́вцы от чи́стаго исто́чника Правосла́вия напая́яй. Ра́дуйся, смире́ния стезе́ пряма́я к Бо́гу; ра́дуйся, моли́твы негаси́мый свети́льниче. Ра́дуйся, Ни́коне преподо́бне, ди́вный помо́щниче всем, благоче́стно тя почита́ющим.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.
Тече́ние соверши́в непоро́чно и ве́ру соблю́д непрело́жно, беззако́нных собо́рище обличи́л еси́, Ни́коне богому́дре, и преда́ние оте́ческое сохрани́л еси́, тем просла́вив Бо́га отце́в на́ших.
Я́ко добр во́ин Иису́с Христо́в, Его́же ра́ди и во у́зах злострада́л еси́, но сло́во Бо́жие во усте́х твои́х не связа́ся: гони́мь бо и да́же до преде́л Арха́нгельских дости́г, се́верныя концы́ земли́ Ру́сския просвети́л еси́.
Новому́чеников земли́ Ру́сския цве́те благоуха́нный и ста́рчества О́птинскаго ве́нче пресве́тлый, па́мять твою́ све́тло пра́зднующих посети́ и терпе́нию научи́, преподо́бне Ни́коне, да страсте́й треволне́ния свободи́мся.
Богоро́дичен: Исцели́ я́звы души́ моея́, Влады́чице, и ума́ испра́ви движе́ния, моля́щи из Тебе́ воплоще́ннаго Бо́га отце́в на́ших.
Песнь 8
Ирмо́с: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.
Ка́плями слез твои́х у́глие грехо́вное угаси́л еси́, и страда́ньми твои́ми в ве́ре коле́блемых утверди́л еси́, те́мже и по кончи́не то́чиши исцеле́ний струи́ любо́вию тя призыва́ющим, и Христа́ сла́вящим во ве́ки.
О́птинская свире́ль, сострада́льцем твои́м подо́бная, был еси́, Ни́коне преподо́бне: Исаа́кию, сла́вному му́ченику, и ста́рцу Некта́рию, и Ага́питу, бра́ту возлю́бленному, ны́не же в го́рних селе́ниих согла́сно пое́те Христа́ во ве́ки.
Неколеби́мая ве́ра твоя́, о́тче Ни́коне, прича́стника неизрече́нныя сла́вы яви́ тя и лю́та де́моном показа́ и безбо́жным посрамле́ние, Христа́ бо пра́во сла́вил еси́, и сла́виши во ве́ки.
Еле́ем Ду́ха пома́зан, челове́ческая сердца́ благода́тию умягчи́л еси́ и, ве́ру все́яв и испове́данием твои́м возрасти́в, ча́да церко́вная умно́жил еси́, Ни́коне блаже́нне, Христа́ сла́вящая во ве́ки.
Богоро́дичен: Всенепоро́чная Ма́ти Де́во, из Тебе́ возсия́вшаго в естестве́ челове́честем Све́та жили́ще яви́лася еси́, Его́же умоли́ просвети́ти мы́сли на́ша, благоче́стно пою́щих Тя во ве́ки.
Песнь 9
Ирмо́с: Да умолча́т еретико́в собра́ния,/ не и́стинно Богоро́дицу испове́дающих Тя:/ и́бо свы́ше Тя проро́цы предпропове́даша/ Ма́терь бы́ти Бо́жию,/ и Хода́таицу ро́да на́шего.// Тем Тя, Де́во, велича́ем.
О́тче Ни́коне всече́стне, О́птинская похвало́ и новому́чеников на́ших украше́ние, по́двиги по́стническими процветы́й и венце́м испове́дничества увенча́нный, не забу́ди тя велича́ющих.
Све́тиши на Небеси́ церко́внем, страстоте́рпческими сия́я добро́тами, и всех, ве́рою и любо́вию тя велича́ющих, Боже́ственными луча́ми моли́тв твои́х озаря́еши, преподо́бне испове́дниче Ни́коне.
Предстоя́ Престо́лу Судии́ и Царя́ всех, принеси́ мольбу́ о земне́м оте́честве твое́м, преподо́бне, и де́монская по́лчища отжени́ от нас, и собла́знов тьму потреби́, си́лою тебе́ соде́йствующа Всесвята́го Ду́ха.
Оби́тель твою́, преподо́бне, покры́й, и сла́вящия тя в ней от бед и искуше́ний сохраня́й, и Правосла́вие храни́ти во ве́ки нас научи́ и Христа́ велича́ти, тебе́ просла́вльшаго.
Богоро́дичен: Ю́жики Твоего́, Де́во, рождество́ почита́ем, и Ни́кона испове́дника преставле́ние пра́зднуем, с ни́миже Христа́ моли́, Богома́ти, скит Предте́чев и оби́тель твою́ от находя́щих собла́знов изба́вити.
Свети́лен Предте́чи.
Подо́бен: Жены́, услы́шите:
Предте́чево днесь радостотво́рное рожде́ние, се́тование реши́т о́тча безгла́сия, и ро́ждшия непло́дство: возвеща́ет же настоя́щую ра́дость и весе́лие. Те́мже и вся тварь све́тло то́е пра́зднует.
Сла́ва, свети́лен преподо́бнаго:
Во све́те повеле́ний Госпо́дних ходи́в, к ше́ствию Небе́сному стопы́ твоя́ напра́вил еси́, преподо́бне, и, ко Престо́лу восте́к Пресвяты́я Тро́ицы, Трисвяту́ю песнь со отцы́ О́птинскими воспева́еши. Сего́ ра́ди мо́лим тя, Ни́коне, о́тче наш: не забу́ди нас, чад твои́х, путе́м оте́ческим сле́довати хотя́щих.
И ны́не, Богоро́дичен:
Прему́дрость ипоста́сную и Сло́во пресу́щное, Врача́ душ и теле́с ро́ждшая, Де́во Богома́ти, гное́ния и ра́ны души́ моея́ исцели́ и се́рдца моего́ уста́ви боле́зни.
На хвали́тех стихи́ры преподо́бнаго, глас 8.
Подо́бен: О, пресла́внаго чудесе́:
О, пресла́внаго смиренному́дрия!/ К Све́ту И́стинному устремля́яся,/ мирски́я нау́ки оставля́ет ю́ноша,/ поуче́ния же от ста́рцев взыску́ет ра́достно,/ и де́йством Боже́ственнаго Про́мысла/ во изгна́ние отводи́мь быва́ет,/ ве́рность Христу́ да́же до сме́рти сохраня́ет,/ и с любо́вию вся от Него́ прие́млет,// прему́дрость Бо́жию прославля́я.
О, пресла́внаго чудесе́!/ Вертогра́да плод благоуха́нный,/ ста́рцы богому́дрыми возраще́нный,/ Господи́ну виногра́дника прино́сится днесь,/ весели́тся ны́не оби́тель О́птинская,/ и Це́рковь Ру́сская велича́ет испове́дника Ни́кона./ О, каковы́й оте́ц нам дарова́ся!/ Его́же моли́твами, Христе́, спаси́ ду́ши на́ша,// я́ко еди́н Благоутро́бен.
О, пресла́внаго боголю́бия!/ Преподо́бный Ни́кон испове́дник/ красоту́ мона́шества днесь явля́ет,/ послуша́ние да́же до сме́рти показу́я,/ и Христа́, смерть попра́вшаго, испове́дует/ и во страда́ниих хвалу́ Ему́ воспева́ет,/ мы же терпе́нию сему́ и му́жеству дивя́щеся,/ в за́поведех Госпо́дних ходи́ти поуча́емся,// Бо́га ди́внаго во святы́х Свои́х прославля́юще.
О, пресла́внаго долготерпе́ния!/ Преподо́бный Ни́кон О́птинский,/ во у́зах и изгна́нии пребыва́я,/ бла́гость Бо́жию и промышле́ние/ благода́рно славосло́вит,/ и гони́тели благословля́ет/ я́ко ору́дие своего́ спасе́ния,/ нас же терпе́нию скорбе́й науча́ет,// на вся бо свята́я во́ля Бо́жия.
Сла́ва, преподо́бнаго, глас 2:
Скита́ Предте́чева прозябе́ние,/ О́птины пу́стыни благослове́ние,/ Ни́кона, сла́внаго во отце́х,/ пе́сньми духо́вными восхва́лим, вопию́ще к нему́:/ испове́дниче и подви́жниче преди́вный,/ со проро́ком и Крести́телем Госпо́дним моли́ся/ о чту́щих честно́е его́ рождество́,// и твое́ преставле́ние све́тло пра́зднующих.
И ны́не, глас то́йже:
Сло́во безнача́льное во утро́бе, Де́во, нося́щи,/ Елисаве́ти позна́лася еси́ Ма́ти Бо́га Вы́шняго,/ и дом Заха́риин возвесели́ла еси́,/ и всем родо́м челове́ческим прорекла́ еси́,// е́же блажи́ти Тя, Богоневе́сто.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О свяще́нная главо́, преподо́бне о́тче наш Ни́коне, ста́рчества О́птинскаго све́тлый ве́нче и новому́чеников Це́ркве Ру́сския благово́нный цве́те! Ты пе́рвее по́стническими труды́ ду́шу твою́ очи́стив, де́монская по́лчища посрами́л еси́ и послуша́нием, я́ко небовосхо́дною ле́ствицею, на высоту́ доброде́телей восте́кл еси́. В годи́ну же гоне́ний безбо́жных, му́жески терпе́нием вооружи́вся, я́ко па́стырь до́брый и и́стинный сын преподо́бных ста́рцев О́птинских, лю́ди стра́ждущия, покая́нием врачу́я, утеша́л еси́. Сего́ ра́ди от богобо́рных мно́гия ско́рби претерпе́л еси́ и на изгна́ние осужде́н был еси́. Но я́коже тогда́ от па́ствы твоея́ ду́хом не отлучи́лся еси́, па́стырскою свире́лию наставле́ний твои́х о́вцы твоя́ упа́с, си́це и ны́не не оста́ви нас, чад твои́х, но ду́хом при́сно с на́ми пребыва́й, да укрепля́еми моли́твами твои́ми, ве́ру непрело́жну соблюде́м, за́поведи Бо́жия сохрани́ти потщи́мся и еди́ное на потре́бу возлю́бим, е́же прилепля́тися Христу́ Бо́гу и Спа́су на́шему всем се́рдцем, все́ю душе́ю и всем помышле́нием и вы́ну прославля́ти всесвято́е и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.