Ме́сяца а́вгуста в 25-й день
Преподобному́ченика Моисе́я (Ко́жина), Солове́цкаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 6:
Преподобному́чениче Моисе́е,/ в ти́хое приста́нище Солове́цкия оби́тели прите́кл еси́,/ поще́нием и слеза́ми, моли́твами и пе́сньми/ непреста́нно прилепля́яся Бо́гу,/ ты в годи́ну гоне́ний на Це́рковь Ру́сскую/ ду́шу свою́ за Христа́ положи́л еси́,/ житие́ свое́ венце́м страда́ния увенча́в./ Наста́ви лю́ди твоя́ пе́ти тя и Бо́га сла́вити и́стинно,// достохва́льный Моисе́е.
Из святы́я оби́тели Солове́цкия/ в помо́рскую страну́ прише́л еси́,/ преподобному́чениче Моисе́е,/ и, я́ко благи́й и ве́рный раб Госпо́день,/ во хра́ме рождества́ Предте́чи, и́же в ве́си Оле́ництей,/ усе́рдно подвиза́лся еси́.// Те́мже почита́ем па́мять твою́ всечестну́ю.
Ра́дуйся, преподобному́чениче Моисе́е,/ ты бо, боле́зни и труды́ благоду́шно терпя́,/ посреде́ мяте́жей мно́гих/ ве́ру и́стинную и любо́вь соверше́нну до конца́ сохрани́л еси́,/ и сла́вную кончи́ну за Христа́ прия́л еси́,/ И́же побе́дными по́честьми тя венча́// и ра́йския сла́дости сподо́би.
О́тче преподо́бне Моисе́е,/ ты в годи́ну тя́жких испыта́ний,/ ве́ру Христо́ву поруга́ему узре́в,/ себе́ сама́го, я́ко же́ртву живу́ю, Бо́гу прине́сл еси́./ Те́мже и Госпо́дь показа́ тя свети́льника Своего́,/ в со́нме новому́чеников земли́ Ру́сския/ на све́щнице церко́внем сия́юща,/ с ни́миже моли́ся о нас ко Святе́й Тро́ице// спасти́ся душа́м на́шим.
Сла́ва, глас то́йже:
Восхва́лим днесь пе́сньми страда́льца оби́тели Солове́цкия/ и подви́жника земли́ Ко́льския,/ преподобному́ченика Моисе́я,/ сей бо, во хра́ме Предте́ченстем/ служи́тель неле́ностный яви́вся,/ тве́рдо Христа́ испове́да/ и, безси́льную де́монскую де́рзость победи́в,/ су́етную я́рость безбо́жных низложи́,/ дерзнове́ние же име́я ко Го́споду,/ ны́не мо́лится со все́ми за Христа́ пострада́вшими// о спасе́нии душ на́ших.
И ны́не, Богоро́дичен, глас то́йже:
Ра́дуйся, звездо́ светоза́рная,/ Свет, пре́жде денни́цы от Отца́ возсия́вший,/ неизрече́нно ро́ждшая,/ Того́ сия́нием озари́ ду́ши на́ша,// спя́щия во тьме и се́ни сме́ртней.
На стихо́вне стихи́ры, глас 4:
Про́мыслом Бо́жиим и челове́ческим избра́нием/ служи́тель ве́рен оби́тели Солове́цкия яви́ся/ и помо́щник в ско́рбех преизря́дных, обре́тших бра́тию зело́./ Помози́ и нам, о́тче Моисе́е,/ ве́рно чту́щим па́мять твою́,// в ве́ре и́стинней утверди́тися.
Стих: Честна́ пред Го́сподем//смерть преподо́бных Его́.
Земна́я отри́нув, Небе́сная возлюби́л еси́/ и, я́ко страда́лец за и́стину,/ проти́ву гони́телей и досади́телей Це́ркве подвиза́яся,/ му́жественно да́же до кро́ве пострада́л еси́/ и Небе́сныя сла́дости вкуси́л еси́,/ страстоте́рпче ди́вный,/ сея́ сла́дости испроси́ и нам у Христа́, Спа́са на́шего,// я́ко моли́твенник о душа́х на́ших.
Стих: Блаже́н муж боя́йся Го́спода,// в за́поведех Его́ восхо́щет зело́.
Во изгна́нии быв,/ скорбь непреста́нную о оби́тели Солове́цтей,/ от безбо́жных разоря́емей,/ воздыха́ньми и слеза́ми растворя́л еси́,/ до́блественный о́тче Моисе́е./ Ны́не же свяще́ннеи ру́це твои́ у Престо́ла Святы́я Тро́ицы простира́я,/ помина́й Ко́льскую зе́млю рожде́ния твоего́/ и оби́тель сла́вную, в не́йже мно́га ле́та подвиза́лся еси́,// и моли́ о спасе́нии сла́вящих тя благоче́стно.
Сла́ва, глас то́йже:
Пе́рвее преподо́бническим по́двигом твои́м/ в житии́ земне́м Бо́гови угожда́л еси́,/ по́слежде му́ченически страда́нием житие́ твое́ сконча́л еси́./ Те́мже венча́ тя Госпо́дь за сугу́быя ско́рби и го́рести,/ наше́дшия на тя в ле́тех сих нече́стия,// и прия́т тя во сла́ву Свою́.
И ны́не, Богоро́дичен, глас то́йже:
К покро́ву Твоему́, Де́во Богоро́дице, прибега́ем и мо́лим Тя:/ ско́ро на по́мощь нам, ве́рно чту́щим Тя, предвари́/ и от враг ви́димых и неви́димых изба́ви,// Ты бо еси́ заступле́ние на́ше.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 5:
Прииди́те, ве́рнии,/ свяще́нное торжество́ преподо́бнаго Моисе́я пе́сньми восхва́лим,/ ревни́теля и защи́тителя оби́тели Солове́цкия/ и моли́твенника ве́си Оле́ницкия,/ и́же во вре́мя гоне́ний на Це́рковь Ру́сскую/ муче́ния тя́жкая претерпе́,/ ны́не же Престо́лу Госпо́дню предстои́т/ и с со́нмом новому́чеников на́ших мо́лится,// да и мы Ца́рствию Христо́ву приобщи́мся. Три́жды.
Прииди́те, боголю́бцы,/ ко Христу́ любо́вию у́тренююще,/ ра́дости преди́внаго Моисе́я прича́стницы бу́дем,/ той бо, святы́ню Правосла́вия во оте́чествии свое́м заступа́я,/ тверд и непрекло́нен в страда́нии яви́ся/ и, врага́ми Христо́выми утесня́емь и изгоня́емь,/ ве́ру и́стинную да́же до сме́рти соблюде́,/ Госпо́дь бо упова́ние тому́ бысть,/ ны́не же Престо́лу Бо́жию предстои́т// и мо́лится о душа́х на́ших. Три́жды.
Прииди́те, христолюби́вии лю́дие,/ восхва́лим ратобо́рца и защи́тителя до́блественнаго святы́нь оте́ческих,/ и́же, во́инству Царя́ Небе́снаго сопричте́н быв,/ земно́е во́инство отве́рже, глаго́ля:/ я́ко несть на́ша брань проти́ву кро́ве и пло́ти,/ но к миродержи́телем тьмы ве́ка сего́,/ к духово́м зло́бы поднебе́сным./ Блаже́н еси́, Моисе́е, живо́т свой положи́вый/ за ве́ру правосла́вную и за и́скренния своя́,// всехва́льный преподобному́чениче Оле́ницкий. Два́жды.
Сла́ва, глас 8:
С печа́лию в се́рдце ото́к Солове́цкий оста́вил еси́,/ свя́те преподобному́чениче Моисе́е,/ и, моли́тву непреста́нную слеза́ми растворя́я,/ о возлю́бленней оби́тели, от безбо́жных разоря́емей, скорбе́л еси́,/ в не́йже мно́гия по́двиги и труды́ поне́сл еси́,/ и во оте́чествии твое́м во дни Па́схи Христо́вы,/ дерза́я о и́мени Го́спода Воскре́сшаго,/ от безбо́жных поноше́ние претерпе́л еси́./ Ны́не же Престо́лу Бо́жию предстоя́,/ прославля́еши Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен, глас то́йже:
Царь Небе́сный за человеколю́бие на земли́ яви́ся/ и с челове́ки поживе́:/ от Де́вы бо Чи́стыя плоть прие́мый/ и из Нея́ проше́дый с восприя́тием,/ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га и соверше́нна Челове́ка/ вои́стину пропове́дающе,/ испове́дуем Христа́ Бо́га на́шего,/ Его́же моли́, Ма́ти Безневе́стная,// поми́ловатися душа́м на́шим.
Та́же вход. Проки́мен дне. И чте́ния три му́ченическая.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз свиде́тель, глаго́лет Госпо́дь Бог,/ и о́трок, его́же избра́х./ Да позна́ете и ве́руете Ми,/ и разуме́ете, я́ко Аз есмь:/ пре́жде Мене́ не бысть ин Бог, и по Мне не бу́дет./ Аз есмь Бог и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ра хра́ма, и свята́го, глас 1:
Во оби́тели Солове́цтей по́двигом и́ноческим до́бре подвиза́лся еси́,/ сла́вный Моисе́е,/ и, в скиту́ Се́ргиевском на Му́ксалме досто́йно зва́ния ходи́в,/ плоды́ Христо́ва смире́ния прине́сл еси́,/ я́ко дре́во благопло́дное./ Те́мже и нам помози́ смире́ние стяжа́ти/ пред Отце́м Небе́сным и бра́тиею на́шею,// да обря́щем ми́лость в День Су́дный.
Сла́ва, глас 4:
На бре́зе Те́рском ли́ку страда́льцев Христо́вых приобщи́вся,/ основа́ние собо́ру Ко́льских новому́чеников положи́л еси́,/ преподобному́чениче о́тче Моисе́е./ Ны́не же с ни́ми Престо́лу Бо́жию предстоя́,/ моли́ Це́ркви Ру́сской в Правосла́вии утверди́тися,/ Оте́честву на́шему в ми́ре сохрани́тися// и спасти́ся душа́м на́шим.
И ны́не, Богоро́дичен, глас то́йже:
При́зри на моле́ние Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи:/ Тя бо еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице, Тя призыва́ющии./ Потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте, и покро́ве,// и спасе́ние душ на́ших.
На стихо́вне стихи́ры, глас 1.
Подо́бен: Небе́сных чино́в:
Ни кня́зя ми́ра сего́, ни гони́телей льсти́вых, претя́щих тебе́,/ убоя́лся еси́, о́тче преподо́бне,/ ве́рою и упова́нием на Го́спода кре́пок быв./ Утверди́ и нас ра́ди любве́ Христо́вы терпе́ти вся му́ки и ско́рби,/ и да́же до сме́рти подвиза́тися о и́стине,// я́коже ты, о́тче преди́вне.
Стих: Проидо́хом сквозе́ огнь и во́ду,// и изве́л еси́ ны в поко́й.
Боже́ственных Та́ин Христо́вых раздая́тель/ и душ людски́х врачева́тель/ яви́лся еси́, о́тче прехва́льне,/ оте́честву своему́ в годи́ну безве́рия свети́льник быв,/ те́мже благода́ть Ду́ха Уте́шителя от юдо́ли сме́ртныя тя возведе́// в вы́шняя Небе́сная селе́ния.
Стих: Свет возсия́ пра́веднику,// и пра́вым се́рдцем весе́лие.
Е́же по о́бразу соблю́д невреди́мо,/ во е́же по подо́бию, я́ко мо́щно, возше́л еси́,/ му́жески бо естество́ пону́див, сопроти́вился еси́ терпели́во/ и, ве́рою нетще́тною во Христа́ окриля́емь,/ не устраши́лся еси́ мучи́тельскаго преще́ния и я́рости богобо́рцев,// преподо́бне Моисе́е страда́льче и но́вый му́чениче Христо́в.
Сла́ва, глас 6:
Распе́ншемуся за ны Христу́ Бо́гу,/ смерть попра́вшему и ад плени́вшему,/ сораспя́лися есте́, страстоте́рпцы приснопа́мятнии,/ Моисе́ем ди́вным возглавля́еми,/ суд бо непра́вый и ско́рбную темни́цу,/ и страда́ния мно́гая да́же до сме́рти претерпе́вше,/ в Це́рковь Небе́сную непреткнове́нно внидо́сте/ и ны́не Святе́й Тро́ице предстоите́,// пребога́тно сия́юще отту́ду блиста́нии чуде́сными.
И ны́не, Богоро́дичен, глас то́йже:
Творе́ц и Изба́витель мой, Пречи́стая,/ Христо́с Госпо́дь,/ из Твои́х ложе́сн проше́д,/ в мя оболки́йся,/ пе́рвыя кля́твы Ада́ма свободи́./ Те́мже Ти, Всечи́стая,/ я́ко Бо́жии Ма́тери же и Де́ве вои́стину/ вопие́м немо́лчно:/ ра́дуйся, а́нгельски, ра́дуйся, Влады́чице,/ предста́тельство, и покро́ве,// и спасе́ние душ на́ших.
На благослове́нии хле́бов тропа́рь преподобному́ченика, два́жды, и Богоро́дице Де́во: еди́ножды.
Тропа́рь, глас 1:
Святы́х Та́ин Христо́вых ве́рный служи́телю,/ покая́ния пропове́дниче и кра́я Ко́льскаго печа́льниче,/ преподобному́чениче Моисе́е,// моли́ Ми́лостиваго Бо́га спасти́ся душа́м на́шим.
НА У́ТРЕНИ
На Бог Госпо́дь: тропа́рь преподобному́ченика, два́жды. Сла́ва, и ны́не, Богоро́дичен, глас 1: Гаврии́лу веща́вшу:
По 1-м стихосло́вии седа́лен, глас 2:
Сове́ту нечести́вых неприча́стен быв, страда́ния за Христа́ я́ко благода́тный дар прия́л еси́, до́блественниче Моисе́е, вмени́в сия́ в ра́дость себе́ и во спасе́ние. Те́мже обре́л еси́ у Го́спода мзду досто́йную и вене́ц живота́. Два́жды.
Сла́ва, и ны́не, Богоро́дичен, глас то́йже:
Предста́тельство ве́рное и́мамы Тя, Пресвята́я Влады́чице, мольба́м и пла́чем земны́м ско́рое услы́шание, боле́знем и ско́рбем те́плое сострада́ние, обремене́нным грехми́ и страстьми́ наде́ждо несомне́нная. Ты бо мо́лиши неусы́пно милосе́рдие Бо́жие за род челове́ческий.
По 2-м стихосло́вии седа́лен, глас 3:
Мужа́йся, Христо́ва Це́рковь, и держа́вствуй над всу́е борю́щими, Христо́ви бо дру́зи крепкоду́шнии о тебе́ пеку́тся во Ца́рствии Небе́снем, оте́чества земна́го не оставля́юще, и́хже о́бщий пра́здник ны́не соверша́ем све́тло. Два́жды.
Сла́ва, и ны́не, Богоро́дичен, глас то́йже:
Возжада́ душа́ моя́ Тебе́, Спа́се мой, я́ко живота́ исто́чник и́маши вои́стину, Свет ми́ру Невече́рний Богоро́дицею возсия́вый. Тоя́ всеси́льными мольба́ми Небе́сных благ сокро́вище отве́рзи ми, Влады́ко Многоми́лостиве.
Велича́ние:
Велича́ем тя,/ преподобному́чениче Моисе́е,/ и чтим по́двиги и страда́ния твоя́,/ я́же за Христа́// претерпе́л еси́.
Псало́м избра́нный:
Весть Госпо́дь путь пра́ведных, и путь нечести́вых поги́бнет.
Рабо́тайте Го́сподеви со стра́хом, и ра́дуйтеся Ему́ с тре́петом.
Ты же, Го́споди, Засту́пник мой еси́, сла́ва моя́, и вознося́й главу́ мою́.
Поми́луй мя, Го́споди, я́ко не́мощен есмь.
Исцели́ мя, Го́споди, я́ко смято́шася ко́сти моя́.
Отступи́те от мене́, вси де́лающии беззако́ние, я́ко услы́ша Госпо́дь глас пла́ча моего́.
Го́споди Бо́же мой, на Тя упова́х, спаси́ мя от всех гоня́щих мя, и изба́ви мя.
По полиеле́и седа́лен, глас 8:
А́нгелом собесе́дник на земли́ бысть, достохва́льный Моисе́е, мы́сленныма очи́ма зря Небе́сная, егда́ же на по́двиг му́ченический призва́ тя Госпо́дь, ты, па́че ду́хом укрепля́яся, не восхоте́л еси́ отри́нути ча́шу сию́, ниже́ пути́ свяще́нническаго уклони́тися, но вся претерпе́л еси́. Ны́не же в Небе́сных оби́телех жи́тельствуя, моли́ся за ны, страда́ния твоя́ чту́щия, да ве́рни повеле́нием Госпо́дним пребыва́ем, друг дру́га лю́бяще и мир в себе́ иму́ще. Два́жды.
Сла́ва, и ны́не, Богоро́дичен, глас то́йже:
Небе́сная Цари́це, Госпоже́ Блага́я, любве́ Боже́ственныя сосу́де преиспо́лненный, Твои́м всеми́лостивным заступле́нием тоя́ сосу́ды че́стны нас сотвори́, да ве́рни повеле́нием Госпо́дним пребыва́ем, друг дру́га лю́бяще и мир в себе́ иму́ще.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Ма́рка, зача́ло 37.
По 50-м псалме́ стихи́ра, глас 6:
Где твое́, сме́рте, жа́ло?/ Где твоя́, а́де, побе́да?/ Всу́е и́щете ве́рных Госпо́дних пожре́ти,/ не и́мате вла́сти ни еди́ныя,/ победи́л бо есть вы Спас душ на́ших Христо́с,/ дарова́в живо́т ве́чный всем земноро́дным,/ ве́рным же Ца́рство Свое́ запове́да,/ того́ насле́дник Моисе́й яви́ся./ Те́мже ны́не па́мять преподобному́ченика воспева́юще,/ нача́ло ве́чнаго жития́ его́ в Бо́зе пра́зднуем// и к по́мощи его́ моли́твенней взыва́ем.
Кано́н Богоро́дицы со ирмосо́м на 6,
и свята́го на 8, глас 6.
Песнь 1
Ирмо́с: Волно́ю морско́ю/ Скры́вшаго дре́вле/ гони́теля мучи́теля,/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.
Припе́в: Святы́й преподобному́чениче Моисе́е, моли́ Бо́га о нас.
Сподо́би, Го́споди, по достоя́нию пе́сньми просла́вити Твоего́ уго́дника, и́мя Твое́ просла́вльшаго, Моисе́я преподобному́ченика, и́же прего́рдаго велиа́ра попра́, и Це́рковь Христо́ву кровьми́ свои́ми украси́.
Ве́ре Христо́ве и любви́ Боже́ственней измла́да прилежа́в, сия́ посреде́ мяте́жей мно́гих до конца́ сохрани́л еси́, боле́зни же и труды́ благоду́шно претерпева́я, за Христа́ сла́вную кончи́ну прия́л еси́, Моисе́е доброхва́льне.
Тя, о́тче преподо́бне Моисе́е, в тя́жкую годи́ну испыта́ний Госпо́дь я́ко свети́льника Своего́ показа́, сия́юща на све́щнице Це́ркве, искуше́нием вра́жиим противоста́вша и ду́ши ве́рных све́том страда́ний за Христа́ просвеща́юща.
Богоро́дичен: Путь ко спасе́нию откры́ла еси́ нам, Богоро́дице, жития́ непоро́чнаго о́браз чисте́йший явля́ющи. Те́мже на Тя взира́юще и Тебе́ моля́щеся, из глубины́ серде́чныя взыва́ем: я́звы грехо́в и стру́пы страсте́й на́ших исцели́, Пречи́стая.
Песнь 3
Ирмо́с: Тебе́, на вода́х/ пове́сившаго всю зе́млю неодержи́мо,/ тварь, ви́девши на ло́бнем ви́сима,/ у́жасом мно́гим содрага́шеся,/ несть свят,// ра́зве Тебе́, Го́споди, взыва́ющи.
Оте́честву земно́му в чи́не во́инстем досто́йно послужи́в, богоревни́ве Моисе́е, во́инству Христо́ву приобщи́тися и еди́ному Бо́гу порабо́тати зело́ возжела́л еси́ и, во оби́тель ото́ка Солове́цкаго всели́вся, в чи́не и́ночестем и са́не иере́йстем благоче́стне пожи́л еси́.
В бра́тстве и́ночестем усе́рдно подвиза́яся, от си́лы в си́лу восходи́л еси́, Моисе́е всехва́льне, и, первонача́льником оби́тели Солове́цкия преподо́бным Зоси́ме, Савва́тию и Ге́рману ревну́я, умиле́нною душе́ю и сокруше́нным се́рдцем Бо́гу моли́твы возноси́л еси́.
Моисе́й, вели́кий во проро́цех, иногда́ жезло́м свои́м я́ко кре́стным зна́мением во́ды Чермна́го мо́ря раздели́ и, со изра́ильтяны я́ко по су́ху проше́д, земна́го обетова́ния дости́же. Ты же, преподобному́чениче Моисе́е, крестоноше́нием плоть свою́ умертви́в, земли́ обетова́ния дости́гл еси́, в не́йже пра́вда живе́т.
Богоро́дичен: Обре́тши благода́ть у Сы́на Твоего́ заступа́ти немощны́й род челове́ческий, Богоро́дице, неусы́пно назира́еши лю́ди христиа́нския, и́ноком же наипа́че покрови́тельствуеши, я́ко а́нгельскому чи́ну подража́телем.
Седа́лен, глас 5:
Егда́ безбо́жнии в темни́цу тя вверго́ша, ты, блаже́нный Моисе́е, я́ко луч Со́лнца Пра́вды яви́лся еси́, посрамля́я мучи́тели, и страда́ньми твои́ми мглу безбо́жия разгоня́я. Те́мже вопие́м ти, страда́льче святы́й: моли́ся за ны ко Го́споду, по́прище жития́ нам досто́йно проити́, ве́чныя поги́бели изба́витися и во́инами све́та яви́тися.
Сла́ва, и ны́не, Богоро́дичен:
Засту́пницу Тя и́мамы пред Бо́гом, Пречи́стая Де́во, не пре́зри раб Твои́х, на предста́тельство Твое́ наде́ющихся, моле́ние на́ше приими́ и по́мощь с Небесе́ низпосли́, да обря́щем спасе́ние душ на́ших.
Песнь 4
Ирмо́с: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,// я́ко Всеси́лен.
Повеле́нию Госпо́дню повину́яся, крест настоя́тельства во оте́чествии свое́м со смире́нием прия́л еси́, Моисе́е достохва́льне. Егда́ же си́ла вра́жия безу́мно на тя и па́ству твою́ воста́, страда́ния, предугото́ванная тебе́, безро́потне восприя́л еси́, Христу́ уподо́битися жела́я.
Ни врага́ ро́да челове́ческаго, ни власте́й богоху́льных, ни ору́жников дерзкосе́рдых, претя́щих тебе́, убоя́лся еси́, священному́чениче Моисе́е, ве́рою и упова́нием на Го́спода кре́пок быв, призыва́я чад свои́х к терпе́нию скорбе́й и стяжа́нию смире́ния Христо́ва.
Правосла́вныя Це́ркве свети́льниче, свяще́нный Моисе́е! Ты, па́че ду́хом укрепля́яся, стра́ха челове́ческаго ника́ко устраши́лся еси́, ниже́ ча́шу страда́ний отри́нути восхоте́л еси́ и, по́двигом му́ченическим неугаси́мо светя́й, вся претерпе́л еси́. Ны́не же у Престо́ла Бо́жия предстоя́, моли́ся о чту́щих тя.
Богоро́дичен: Мо́лим Тя, Богоро́дице Де́во, вра́жиими злоде́йствы обурева́емии: сете́й злоухищре́нных нас свободи́, мучи́тельства страсте́й изба́ви, мир Бо́жий в ду́ши на́ша водвори́, терпе́нием Христо́вым снабдева́ющи.
Песнь 5
Ирмо́с: Богоявле́ния Твоего́, Христе́,/ к нам ми́лостивно бы́вшаго,/ Иса́ия, Свет ви́дев Невече́рний,/ из но́щи у́треневав взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.
Обе́ты и́ноческия изве́стно исполня́я, Моисе́е прехва́льне, па́стырь до́брый слове́сному ста́ду Христо́ву яви́лся еси́, те́мже и стезе́ю страстоте́рпческою вку́пе ше́ствовав, му́ченичества красото́ю украси́лся еси́, о́тче свяще́ннейший.
Все упова́ние твое́ на Го́спода возложи́л еси́, Моисе́е многотерпели́ве, сего́ ра́ди уничиже́ние от беззако́нных и изгна́ние во юдо́ль муче́ний, труды́ и поноше́ния, та́кожде и клевету́ претерпе́в, пострада́ти за Христа́ сподо́бился еси́, преподо́бне.
Во хра́ме Предте́ченстем служи́тель неле́ностный яви́лся еси́, о́тче Моисе́е, тве́рдо Христа́ испове́дуя и напа́сти вра́жия ни во что́же вменя́я, те́мже безси́льную де́монскую де́рзость и су́етную я́рость безбо́жных низложи́л еси́. И ны́не со все́ми за Христа́ спострада́вшими моли́ о спасе́нии душ на́ших.
Богоро́дичен: Над земле́ю Ру́сскою покро́в держа́вный распросте́рши, не оста́вила еси́ нас от злодея́ний льсти́ваго поги́бнути, Засту́пнице Всеми́лостивая. Помози́ нам и ны́не ве́ру и́стинную без стра́ха испове́дати и Правосла́вия побо́рником бы́ти.
Песнь 6
Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию Да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,// ми́лость сию́ оста́вили есте́.
Егда́ мрак безбо́жия пости́же зе́млю Ру́сскую, и Солове́цкую оби́тель в темни́цу обрати́, тогда́ многоско́рбное се́рдце твое́ испо́лнися боле́зней и скорбе́й, я́же и до конца́ му́жественне поне́сл еси́, Христо́в страстоте́рпче, Про́мысл Бо́жий благи́й во всем разумева́я.
Христа́ Подвигополо́жника пред мы́сленным взо́ром всегда́ име́я, о́тче Моисе́е, Тому́ не обину́яся после́довал еси́ и крест свой мужедо́блественно поне́сл еси́, со смире́нием и кро́тостию пра́ведное Его́ попуще́ние восприи́м. Не оста́ви у́бо нас, священному́чениче, па́мять твою́ све́тло почита́ющих.
О́браз смире́ния Христо́ва и любве́ Его́ житие́м твои́м показа́в, и ве́рность Христу́ Влады́це и зва́нию вы́шнему досто́йно сохрани́в, соприча́стник Ко́льским и Солове́цким новому́чеником яви́лся еси́, и Це́рковь Ру́сскую по́двиги свои́ми све́тло украси́л еси́, богому́дре страстоте́рпче.
Богоро́дичен: Влады́чице ми́ра, Ма́ти Всепе́тая, приими́ серде́чную моли́тву раб Твои́х, во умиле́нии Ти приноси́мую, и не лиши́ нас ми́лостиваго Твоего́ заступле́ния, но я́ко Блага́я, спаси́ ду́ши на́ша.
Конда́к, глас 2:
Па́ству твою́ нося́й на ра́менах,/ я́коже дре́вле Моисе́й проро́к наро́д Изра́ильский,/ у́зы темни́чныя и смерть за Христа́ претерпе́л еси́,/ те́мже спаса́й нас моли́твами твои́ми, о́тче Моисе́е,// па́стырю наш преблаже́нный.
И́кос:
Преподо́бным отце́м поревнова́в, во святе́й оби́тели Солове́цтей нело́жно Бо́гу потруди́лся еси́, си́лою же вра́жиею во времена́ безбо́жная от нея́ удале́н, неосла́бне в моли́тве и тве́рдем упова́нии дни жития́ своего́ провожда́л еси́, до́ндеже, му́чеником дре́вним во страда́нии свое́м после́довав, во оби́тели го́рния ко Влады́це своему́ пресели́лся еси́. Сегó рáди ублажа́ем тя, преподобному́чениче Моисе́е, па́стырю наш преблаже́нный.
Песнь 7
Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во гро́бе мертв, бездыха́нен полага́ется/ во спасе́ние нас пою́щих:/ Изба́вителю Бо́же,// благослове́н еси́.
Во оте́чествии свое́м на Помо́рии во изгна́нии пребыва́я, о вели́ких беззако́ниих наро́да ру́сскаго боле́зновал еси́ и, в моли́твах день и нощь подвиза́яся, Бо́гу в Тро́ице Единосу́щному и Неразде́льному взыва́л еси́: Изба́вителю Бо́же, благослове́н еси́.
На бре́зе се́вернем в ве́си Оле́нице многотру́дное житие́ провожда́л еси́, преподо́бне, его́же му́ченически сконча́л еси́, и Христу́ я́ко же́ртва благоуго́дная прине́слся еси́. Мы же, подвиго́м твои́м земны́м дивя́щеся и сла́ву твою́ Небе́сную зря́ще, днесь с весе́лием взыва́ем: Изба́вителю Бо́же, благослове́н еси́.
Егда́ те́рния не́нависти и волчцы́ безве́рия произведе́ земля́ Ру́сская, я́же пле́велами лжи засе́яна бысть от врага́, ты, благове́рный па́стырю Моисе́е, го́ресть земны́я юдо́ли и́злиха позна́л еси́ и смерть за Христа́ прия́л еси́. Ны́не же благ неизрече́нных наслажда́ешися, вопия́: Изба́вителю Бо́же, благослове́н еси́.
Богоро́дичен: Заве́та ве́чнаго Богоизбра́нная Таи́ннице, и Ца́рства Христо́ва Всеми́лостивая Врата́рнице! Го́спода и Влады́ку веко́в умоли́ о нас немощны́х, озлобле́нием вра́жиим му́чимых, Ты бо, Благосе́рдая Ма́ти, Помо́щница те́плая и Хода́таица живота́ ве́чнаго христиа́ном при́сно явля́ешися.
Песнь 8
Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в вы́шних Живы́й/ и во гроб мал странноприе́млется./ Его́же, о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Четыредеся́тницу святу́ю по́стнически соверши́в, Па́сху Госпо́дню с наро́дом Бо́жиим воспева́л еси́, ду́хом пламене́я, да соблюде́т Госпо́дь благоче́стия до́брыя зла́ки и да не пода́влени бу́дут от те́рния, ниже́ смеся́тся с пле́велами, но да принесу́т стори́цею плод ве́рная ча́да Христо́ва, пою́ще и превознося́ще Го́спода во вся ве́ки.
Па́мять твою́ ле́тную пра́зднующе, святы́й новому́чениче Моисе́е, ра́дуемся и ликовству́ем, днесь бо Па́сха твоя́ соверша́ется, в ню́же ты, му́жественне вся претерпе́в, от земли́ к Небе́сным селе́нием восхо́дом невозбра́нным вни́де, Христа́ Воскре́сшаго поя́ и превознося́ во вся ве́ки.
Тро́ичен: Триипоста́сный Бо́же, Сло́вом сотвори́вый вся́ческая и Ду́хом к животу́ призва́вый земна́я и небе́сная! Ты челове́ческое естество́ в подо́бие Свое́ созда́л еси́, оскверне́нное же грехо́м Кро́вию Христа́ Твоего́ па́ки возста́вил еси́, Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Богоро́дичен: Послужи́вши Та́йне Бо́жией, челове́ческому разуме́нию непостижи́мей, сподо́би нас благода́ти Сы́на Твоего́, Пренепоро́чная, не́мощь на́шу укрепи́, житие́ уны́лое ми́лостию Твое́ю обогати́, и ску́дную моли́тву на́шу Ду́ха Свята́го животво́рными дыха́нии раствори́.
Песнь 9
Ирмо́с: Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и, Тя ублажа́ем.
Ча́шу страда́ний му́жественне испи́в, испове́дником и страстоте́рпцем Христо́вым приобщи́лся еси́, Моисе́е пресла́вный, и ны́не Го́споду предстои́ши в го́рнем Ца́рстве Его́ и мо́лишися дерзнове́нно о всех лю́дех, наипа́че же о хотя́щих подо́бным тебе́ бы́ти, я́коже и ты Христу́.
Лик проро́ческий с Моисе́ем и Ааро́ном днесь весели́тся, я́ко коне́ц проро́чествия их на нас испо́лнися; сия́ет бо над Ру́сскою земле́ю Крест Христо́в, и́мже сонм новому́чеников восхо́дит горе́ от земли́ на Не́бо и мо́лится ко Го́споду, да посети́т виногра́д сей и да сподо́бит нас гре́шных вели́чие сла́вы Бо́жия свиде́тельствовати.
Ча́шу страда́ния испи́в, венце́м неувяда́емым украси́лся еси́ во Ца́рствии Небе́снем, богоблаже́нне Моисе́е. Те́мже моли́ о земли́ Ко́льской и оби́тели Солове́цтей, да мир и любо́вь Госпо́дни во ве́ки зде пребу́дут, и нас помина́й, ве́рою и любо́вию тя велича́ющих.
Богоро́дичен: Ца́рства Бо́жия би́сер драгоце́нен да возсия́ет в душа́х на́ших мольба́ми Твои́ми, Пречи́стая Де́во, Нача́льника жи́зни ве́чныя Ма́ти. Помози́ нам, Блага́я, да терпе́нием ду́ши стяжа́вше, воскресе́ния све́тлую ра́дость невозвра́тно Тобо́ю обря́щем.
Свети́лен, глас 3:
Све́том Христо́вым просвеща́емь, мрак беззако́ния попра́л еси́, преподо́бне, и, му́ченическими кровьми́ свяще́нную ри́зу очервлени́в, во Свята́я Святы́х вшел еси́, иде́же свет неизрече́нный и глас пра́зднующих непреста́нный. Два́жды.
Сла́ва, и ны́не, Богоро́дичен:
Свет Живота́ ве́чнаго возсия́ нам Тобо́ю, Благода́тная Мари́е, пло́тию бо родила́ еси́ Жизнода́вца Бо́га, смерть попра́вшаго, мир Собо́ю обнови́вшаго и всем ве́рным воскресе́ние дарова́вшаго.
На хвали́тех стихи́ры на 4, глас 7:
Ре́вностию по Бо́зе распала́емь/ и жа́лостию о до́ме Госпо́дни снеда́емь,/ святы́ни це́ркве Оле́ницкия от расхище́ния и поруга́ния нечести́вых сохраня́л еси́,/ преще́ний же беззако́нныя вла́сти не устраши́лся еси́/ и, да́же до конца́ страда́ния претерпе́в,/ спасе́ние души́ обре́л еси́,/ священному́чениче достохва́льне Моисе́е,// и ны́не сия́еши во сла́ве Госпо́дни. Два́жды.
Зе́млю Ру́сскую, безбо́жными гоне́нии неща́дно жего́мую,/ слеза́ми и кровьми́ твои́ми напои́л еси́,/ испове́данием же Трисо́лнечнаго Све́та/ тьму а́дову посрами́л еси́,/ муче́ния от сыно́в поги́бели восприе́м,/ со святы́ми сро́дники на́шими в вертогра́де Небе́снем водвори́лся еси́./ Те́мже благода́ть моли́тися о нас стяжа́л еси́,// о́тче преподобному́чениче Моисе́е.
Па́ству ве́рных свои́х хле́бом сло́ва Бо́жия насыща́я/ и вино́м прему́дрости богодухнове́нныя напая́я,/ теплото́ю любве́ Христо́вы да́ры сия́ раствори́л еси́,/ священному́чениче Моисе́е добропобе́дне./ И ны́не высо́ким пропове́данием/ веща́еши ча́дом Це́ркве Ру́сския:/ приступи́те ко Го́споду и просвети́теся,// и ли́ца ва́ша не постыдя́тся.
Сла́ва, глас 1:
Бо́льши сея́ любве́ никто́же и́мать,/ да кто ду́шу свою́ положи́т за дру́ги своя́./ Сему́ глаго́лу Спа́сову после́довав,/ Моисе́й всехва́льный/ ду́шу свою́ за па́ству положи́/ и кро́вию свое́ю Це́рковь украси́./ Того́ моли́твами, Христе́ Бо́же наш,/ Оте́чество на́ше в Правосла́вии сохрани́// до сконча́ния ве́ка.
И ны́не, Богоро́дичен, глас то́йже:
Огнь Божества́ во утро́бе неопа́льне вмести́вши,/ киво́т благода́ти свяще́ннейший яви́лася еси́, Де́во Пречи́стая,/ те́мже пла́менем Ду́ха Боже́ственнаго возжига́еши сердца́ ве́рных,/ и ве́чнующему вра́жию пла́мени сих неприкоснове́нных твори́ши./ Возсия́й, Богома́ти, и в нас любве́ Бо́жия немерца́ющий свет,/ от борю́щих враг огражда́ющи,// и огнеды́шащия про́пасти а́довы изба́ви ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Апо́стол к Тимофе́ю, зача́ло 291. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник, от слу́ха зла не убои́тся.