Ме́сяца сентября́ в 10-й день
Священному́ченика Уа́ра, епи́скопа Ли́пецкаго
НА ВЕЧЕ́РНИ
На Го́споди, воззва́х: стихи́ры на 8: пра́здника 3, и свята́го 5. Стихи́ры священному́ченика Уа́ра, глас 5.
Подо́бен: Ра́дуйся:
О́тче священному́чениче Уа́ре,/ я́ко Дави́да от стад о́вчих/ Госпо́дь восприя́т тя/ пасти́ Це́рковь Свою́ в годи́ну гоне́ний,/ тве́рдость произволе́ния твоего́ ве́дый,/ и я́ко страда́льца зако́нна/ венча́ тя Христо́с Бог,// име́яй ве́лию ми́лость. Два́жды.
О́тче трудолю́бне Уа́ре,/ Ева́нгелия пропове́дниче,/ каре́лом благовести́ти потща́лся еси́,/ и па́ству ли́пецкую под криле́ собра́л еси́,/ ве́рныя от ересе́й и собла́знов храня́,/ облече́н си́лою свы́ше:/ ю́же подаде́ ти Христо́с Бог,// име́яй ве́лию ми́лость.
О́тче доблему́дренне Уа́ре,/ свята́го Патриа́рха Ти́хона послу́шниче/ и священному́чеником Ли́пецким сомоли́твенниче,/ Ду́хом Бо́жиим с си́ми води́мый!/ А́ще и проше́л еси́ посреде́ се́ни сме́ртныя,/ не убоя́лся еси́ зла:/ я́ко с тобо́ю пребы́сть во страда́ниих Христо́с Бог,// име́яй ве́лию ми́лость.
О́тче крестоно́сне Уа́ре,/ тя́жкое и́го рабо́тное во у́зах караганди́нских/ ве́рою во благо́е и́го Спаси́теля на́шего претвори́вый,/ боле́зни и лю́тыя ра́ны я́ко я́звы Его́ прия́л еси́./ Те́мже, я́ко до конца́ вся претерпе́вша,/ Небе́снаго Ца́рства сподо́би тя Христо́с Бог,// име́яй ве́лию ми́лость.
Сла́ва, глас 6:
Прииди́те, ве́рнии,/ сни́демся в це́рковь Госпо́дню,/ да просла́вим свиде́теля Христо́ва,/ земли́ Каре́льския моли́твенника,/ наро́да Казахста́нскаго предста́теля,/ и засту́пника гра́да на́шего,/ доблему́драго священному́ченика Уа́ра,/ пра́во пра́вивша сло́во и́стины,/ и пострада́вша му́жески,/ и нам заве́т оста́вивша/ жи́ти благоче́стно// и ходи́ти досто́йно пред Бо́гом.
И ны́не, пра́здника.
Вход. Проки́мен дне. И чте́ния 3
священному́ченику Це́ркве Ру́сския XX ве́ка еди́ному.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново/ и разуме́вше, я́ко челове́ка некни́жна еста́ и про́ста,/ дивля́хуся, зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те?/ Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше,/ единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
А́ще изво́лит настоя́тель твори́ти бде́ние, на лити́и стихи́ра хра́ма.
И свята́го, глас 8.
Подо́бен: Что вас нарече́м:
Что тя нарече́м, Уа́ре святи́телю:/ ка́меня ли ве́ры, я́ко Це́рковь гони́мую утверди́;/ Ца́рства ли насле́дника, я́ко тле́нная оста́ви;/ во́ина ли, до́блестно бо му́ки претерпе́;/ Христо́ва ли таи́нника, вся любо́вию проща́юща?/ Мно́гая твоя́ имена́,/ и бо́льшая дарова́ния:// моли́ спасти́ся душа́м на́шим.
Сла́ва, глас 6:
Ли́пецкая земля́ торжеству́ет днесь/ в па́мяти святи́теля своего́ Уа́ра,/ Каре́лия хва́лится труда́ми благове́стия его́,/ и сте́пи Казахста́нския кро́вию его́ освяща́ются./ Мы же умиле́нно вопие́м:/ Це́рковь Ру́сскую твои́ми моли́твами сохрани́,// священнострада́льче Уа́ре.
И ны́не, пра́здника, или́ Богоро́дичен, глас то́йже:
Преблагослове́нна еси́, Влады́чице,/ держа́вная Засту́пнице ро́да на́шего,/ страда́льцев утвержде́ние и ве́рных похвало́./ И ны́не не отста́ви ми́лости Твоея́ от нас,/ спаса́ющи рабы́ Твоя́ от вся́ких лю́тых,/ да сла́вится свято́е и благослове́нное и́мя Твое́// по всей земли́.
На стихо́вне стихи́ры священному́ченика Уа́ра, глас 7:
Презре́в вре́менная,/ святы́й священному́чениче Уа́ре,/ и на суди́щи му́жески испове́дав Христа́,/ вене́ц му́ченический от Него́ прия́л еси́,/ и ны́не, име́я дерзнове́ние,/ Того́ моли́, я́ко Бо́га Всеси́льна,/ па́ству Ли́пецкую утверди́ти// и мир умири́ти.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Всехва́льне священному́чениче Уа́ре,/ ничто́же тя разлучи́ от любве́ Христо́вы:/ ни сро́дство, ни дру́жество, ни благ земны́х обеща́ние,/ ни заточе́ния и сме́рти преще́ние,/ я́ко бо сокро́вища му́ки вмени́в,/ Христу́ сораспя́лся еси́.// Того́ моли́ спасти́ ду́ши на́ша.
Стих: Честна́ пред Го́сподем// смерть преподо́бных Его́.
Священному́чениче Уа́ре богому́дре,/ а́нгеле Це́ркве Ли́пецкия,/ тя ни земля́ потаи́ла есть,/ ни зло́ба люде́й богопроти́вных сокры́ла есть,/ но отверзо́шася тебе́ ра́йския две́ри,/ и в со́нме новому́ченик Христу́ предстои́ши./ Моли́ за па́ству твою́,// ве́рою твоя́ страда́ния почита́ющую.
Сла́ва, глас 2:
Кто не почуди́тся, кто не просла́вит/ тве́рдость доблему́дренныя души́ твоея́,/ Уа́ре, свиде́телю ве́рный?/ Обе́та бо да́ннаго во о́трочестве твое́м,/ е́же служи́ти олтарю́ Госпо́дню,/ ника́коже отступи́л еси́,/ и в темни́це вопроша́ющим тя отвеща́л еси́:// в Него́же ве́рую, во ве́ки не отве́ргуся.
И ны́не, самогла́сен пра́здника, глас то́йже.
Тропа́рь священному́ченика Уа́ра, глас 4:
Правосла́вныя ве́ры ревни́телю,/ раско́лов искорени́телю и безбо́жия обличи́телю,/ моли́твою и трудо́м Творцу́ твоему́ да́же до кро́ве послужи́л еси́,/ пе́рвый святи́телю Ли́пецкий Уа́ре,// о нас Христу́ Бо́гу моли́ся.
НА У́ТРЕНИ
На Бог Госпо́дь: тропа́рь пра́здника, два́жды. Сла́ва, священному́ченика Уа́ра. И ны́не, пра́здника.
По 1-м стихосло́вии седа́лен свята́го, глас 4:
О ди́вный о́строве Валаа́ме,/ опло́те Правосла́вия лю́дем каре́льским!/ О красото́ суро́вая,/ руко́ю Бо́жиею созда́нная/ и по́двиги преподо́бных освяще́нная!/ Та́ко воспева́л еси́, Уа́ре, па́стырю усе́рдный,/ ше́ствие многолю́дное корабле́м во оби́тель устроя́я.
Сла́ва, и ны́не, пра́здника.
По 2-м стихосло́вии седа́лен свята́го, глас 8:
Святи́теля Ли́пецкаго Уа́ра богому́драго,/ па́ству под криле́ собра́вшаго,/ и лжеуче́ния но́вая обличи́вшаго,/ ве́рнии восхва́лим, глаго́люще:/ ра́дуйся, утвержде́ние гра́ду на́шему.
Сла́ва, и ны́не, пра́здника, или́ Богоро́дичен, глас 8:
Днесь велича́ет ра́достно Спаси́теля Ли́пецк град, я́ко свет со́лнечный восприе́м чудотво́рную Твою́ ико́ну, Влады́чице Богоро́дице, и с любо́вию сла́вит Тя, Ма́терь Бо́жию, и ми́лости и цельбы́ Твоя́, на нас излия́нныя, я́ко повеле́ла еси́ обнести́ о́браз Твой чудотво́рный о́крест гра́да Ли́пецка, да очи́стится святы́нею Твое́ю возду́х от я́зи смертоно́сныя, и да возблагодаря́т вси лю́дие неизрече́нную любо́вь Святы́я и Неразде́льныя и Живонача́льныя Тро́ицы. (Тропа́рь Пресвяте́й Богоро́дице в честь Ея́ ико́ны Страстна́я Ли́пецкая.)
Велича́ние:
Велича́ем тя,/ священному́чениче Уа́ре,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
И́но велича́ние:
Велича́ем тя,/ святи́телю Ли́пецкий о́тче наш Уа́ре,/ и чтим честна́я страда́ния твоя́,/ я́же за Христа́// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́, и прииди́ во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 8:
Ни сро́дников и друго́в разлуче́ние, ни пи́щи и кро́ва лише́ние, ни у́зы и ра́ны, ниже́ и́но что от страша́щих чу́вственных ника́коже поколеба́ти тве́рдость твою́ возмого́ша: вра́жия бо сове́ты вконе́ц разори́л еси́ кре́постию непрело́жнаго на Христа́ упова́ния. Те́мже ве́рным утеше́ние подае́ши, священному́чениче свя́те Уа́ре. Моли́ Христа́ Бо́га, грехо́в оставле́ние дарова́ти пра́зднующим любо́вию святу́ю па́мять твою́.
Сла́ва, и ны́не, пра́здника.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Распя́таго посреде́ двою́ разбо́йнику/ Бо́га и́стинна пред безбо́жными испове́дал еси́,/ святи́телю Уа́ре богому́дре,/ за и́мя Христо́во к разбо́йником причте́н,/ от ни́хже ра́ны и смерть прия́л еси́:/ те́мже и сла́вою Небе́сною венча́ешися/ от Пострада́вшаго за ны и Воскре́сшаго,/ И́же прославля́ет сла́вящих Его́,/ да́руя нам безконе́чную жизнь,// и ве́лию ми́лость.
Кано́н пра́здника, и свята́го, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.
Припе́в: Святы́й священному́чениче Уа́ре, моли́ Бо́га о нас.
Гряди́те, лю́дие, Уа́ра священнострада́льца пе́сньми почти́м, побе́ды венце́м увенча́на, и с ли́ки новому́ченик Христа́ Жизнода́вца пою́ща, я́ко просла́вися.
Во святе́м Креще́нии и́мя Петро́во восприи́м, нра́ву того́ уподо́бился еси́, свя́те Уа́ре, и ка́мень ве́ры яви́лся еси́, в не́мже ди́вный во святы́х Бог просла́вися.
От ма́терних пеле́н Го́сподеви возложе́на, и обе́т служи́ти Це́ркви Его́ до конца́ соблю́дша, священному́ченика Уа́ра воспои́м, в не́мже Христо́с просла́вися.
Богоро́дичен: Моли́твами Твои́ми води́мь я́ко о́блаком дре́вле, Богороди́тельнице Мари́е, испове́дник Росси́йских боже́ственный полк, Христа́ Победи́теля воспева́ет, я́ко просла́вися.
Катава́сия: Крест начерта́в:
Песнь 3
Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.
Ве́рою и любо́вию пламене́я, лю́ди каре́льския приити́ ко Христу́ научи́л еси́, свои́м их язы́ком благовеству́я о Ца́рствии Бо́жии, и пе́нием ди́вным сердца́ умягча́я.
Ста́рцев валаа́мских собесе́дниче, свя́те Уа́ре, ше́ствия моле́бная корабле́м во оби́тель их устроя́л еси́, лю́ди Бо́жия ко Христу́ путеводя́щую.
Па́стыря до́бра тя позна́ша ве́рнии кра́я Каре́льскаго, благоче́стию науча́юща, ду́ши и телеса́ врачу́юща, вся́кую ну́жду их предваря́юща и ко спасе́нию наставля́юща.
Богоро́дичен: Утверди́ нас во Христе́, Всеблага́я, моли́твами уго́дника Твоего́ Уа́ра, и стра́хом боже́ственным, Чи́стая, от земли́ возведи́ нас, пою́щих Тя.
Конда́к и и́кос пра́здника.
Седа́лен свята́го, глас 6:
Я́коже со́лнце, ту́чами сокрыва́емо,/ от све́та своего́ не престае́т:/ та́ко и ты, священному́чениче Христо́в Уа́ре,/ от па́ствы ну́ждею удале́нный,/ и служе́ния церко́внаго отреше́нный,/ о лю́дех Бо́жиих и о гоня́щих тя/ моли́тися не преста́л еси́./ Те́мже любо́вию Небе́сною/ осия́й нас, пою́щих тя.
Сла́ва, и ны́не, пра́здника.
Песнь 4
Ирмо́с: Услы́шах, Го́споди,/ слух Твоего́ смотре́ния,/ и просла́вих Тя,// Еди́не Человеколю́бче.
Услы́ша до́брый па́стырь Уа́р слух расхище́ния ста́да церко́внаго и, послуша́нием святы́м препоя́сався, взыска́ти поги́бшия ско́ро изы́де.
Свято́му Патриа́рху Ти́хону ве́рно после́дуя, свя́те Уа́ре, жезл святи́тельский я́коже крест прия́л еси́, и во́лки во оде́ждах о́вчих обличи́л еси́.
Па́стырем о́браз и ве́рным чадолюби́вый оте́ц яви́лся еси́, па́ству Ли́пецкую под криле́ собира́я, и сло́вом ева́нгельским в годи́ну гла́да духо́внаго напитова́я.
Богоро́дичен: Услы́шавше, Влады́чице, о явле́нии ико́ны Твоея́ Держа́вныя, страда́льцы Христо́вы главы́ своя́ восклони́ша, на чуде́сную Твою́ по́мощь упова́юще.
Песнь 5
Ирмо́с: Сеннопи́санный мрак гада́ний разори́в,/ и ве́рных прибы́тием и́стины,/ Богоотрокови́цею озари́в сердца́,// и нас све́том Твои́м, Христе́, наста́ви.
Хлеб Небе́сный и Ча́шу Жи́зни на земны́й хлеб премени́ти никто́же да дерзне́т, в годи́ну лю́тую ве́рным святи́тель глаго́лаше: оба́че вкуси́те и ви́дите, я́ко благ Госпо́дь.
Хра́мы Бо́жия ви́дя оскверня́емы и я́ко ово́щная храни́лища сотворя́емы, со проро́ком возопи́л еси́, Уа́ре: не помяни́ беззако́ний на́ших, Го́споди.
Уз и темни́ц не страши́тися ве́рныя увещава́я, святи́телю пресве́тле Уа́ре, све́том Христо́вым де́монский мрак отгна́л еси́, и вся превозмо́гл еси́ о Го́споде, укрепля́ющем тя.
Богоро́дичен: Светоно́сный о́блаче, Богоро́дице, Со́лнца Христа́ на руку́ носи́вшая, ра́достию о Бо́зе Спа́се озаря́ющи му́ченики, и нас све́том Твои́м, Блага́я, наста́ви.
Песнь 6
Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,// и́стины же Ду́хом пожру́ Тебе́.
Ко Го́споду от уз темни́чных вопия́ше страда́лец доблему́дренный Уа́р: Ты мя укрепи́, Всеси́льне Спа́се, в пра́вде Твое́й до конца́ устоя́ти.
Суде́й непра́ведных преще́ния, и лжесвиде́телей наве́ты посрами́л еси́, свиде́телю нело́жный пра́вды Бо́жия, ея́же не терпя́ху тьмы служи́телие.
Ча́да твоя́ пла́чущая утеша́я, злом за зло не воздава́ти запове́дал еси́, но пра́вдою Христо́вою досто́йно пожи́ти: сия́ и нам, о́тче, твори́ти помози́.
Богоро́дичен: К Тебе́, Пречи́стая, взыва́ху томи́мии во у́зах испове́дницы: Ты возведи́ от а́да лю́ди ру́сския, да Твой покро́в и по́мощь воспое́м во ве́ки.
Конда́к, глас 8:
От ю́ности на служе́ние Це́ркви призва́нный,/ Ева́нгелия све́тлый пропове́дниче,/ о наро́де попечи́телю и учи́лищ устрои́телю,/ душ и теле́с врачева́телю ми́лостивый,/ священному́чениче Уа́ре,/ вся претерпе́л еси́ за Христа́, ны возлюби́вшаго,// Его́же моли́ спасти́ся душа́м на́шим.
И́кос:
Прииди́те, ве́рнии,/ к подвиго́м святы́х возведе́мся мы́слию:/ притеце́м ко страда́льцу Христо́ву Уа́ру/ и вку́пе с ним Казахста́нскую зе́млю дости́гнем,/ да ви́дим, ка́ко во у́зах от ме́ста на ме́сто гони́мь быва́ше,/ ка́ко в го́рьких рабо́тах тя́жко тружда́шеся,/ ка́ко наг, пи́щи и кро́ва лише́н, в пусты́ни пути́ углажда́ше,/ ка́ко во мра́чнем узи́лищи от разбо́йник сме́рти пре́дан бысть./ Но во всех сих препобеди́л есть за возлюби́вшаго ны Христа́,/ Его́же мо́лит ны́не спасти́ся душа́м на́шим.
Песнь 7
Ирмо́с: Купина́ в горе́ огненеопа́льная,/ и росоно́сная пещь халде́йская,/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве, Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших.
Купина́ не опали́ся огне́м, и пещь халде́йская о́троки не вреди́. Тя же, священному́чениче Уа́ре, ни долгота́ ше́ствия сме́ртнаго, ни широта́ пусты́ни изгна́ния, от любве́ Христо́вы ника́коже разлучи́, пою́ща: благослове́н Бог оте́ц на́ших.
Твоему́ в веще́ственней пло́ти страда́нию удиви́шася ли́цы безпло́тных, Уа́ре: ка́ко рабо́ты го́рькия, пи́щи и сна лише́ние, мраз и зной нестерпи́мый кро́тко претерпе́л еси́, благословля́я Бо́га оте́ц на́ших.
Кто не воспла́чет, о терпе́нии твое́м умили́вся, смире́нне святи́телю, я́ко со ине́ми страда́льцы, гла́дом и му́ками изморе́нными, пути́ углажда́ше в пусты́ни: те́мже и нам путь ко Христу́ указу́еши, испове́дниче Бо́га оте́ц на́ших.
Богоро́дичен: Купино́ю проображе́нная дре́вле, и пе́щию росоно́сною, Влады́чице Чи́стая, но́выя му́ченики в горни́ле скорбе́й соблюла́ еси́ душе́ю нетле́нны, до конца́ претерпе́ти вся укрепи́вши, и пе́сни дре́вней тех научи́вши: благослове́н Бог оте́ц на́ших.
Песнь 8
Ирмо́с: В пещи́ о́трочестей/ прообрази́л еси́ иногда́ Твою́ Ма́терь, Го́споди:/ о́браз же Сия́ из огня́ изыма́ше, неопа́льно входя́щия./ Ю́же пое́м я́вльшуюся Тобо́ю конце́м днесь,// и превозно́сим во вся ве́ки.
Во у́зах караганди́нских со испове́дники мно́гими тя́жкими труды́ изнуря́емь, ца́рственное души́ твоея́ досто́инство соблю́л еси́, Уа́ре святи́телю, Го́спода превознося́ во вся ве́ки.
Ле́ствица к Небеси́ восхожде́ния бысть тебе́ степь казахста́нская, иде́же земны́я вся́кия ве́щи совле́кся, на голго́фу твою́, Уа́ре, возше́л еси́, и во́лею Христу́ соряспя́лся еси́.
В терпе́нии му́ченицы благода́тию укрепи́вшеся, ра́дующеся упова́ние улучи́ша: вме́сто безче́стия, венцы́: за у́зы темни́чныя, рай: за е́же со злоде́и осужде́ние, со А́нгелы житие́ и блаже́нство.
Богоро́дичен: Побе́ду во бра́нех, и ра́дость в ско́рбех, земли́ Росси́йския боже́ственный покро́в отцы́ на́ши позна́ша Тя, Влады́чице: Ю́же пое́м, сы́нове их хотя́ще бы́ти, и превозно́сим во вся ве́ки.
Песнь 9
Ирмо́с: Я́же пре́жде со́лнца/ свети́льника Бо́га возсия́вшаго,/ пло́тски к нам прише́дшаго, из боку́ Деви́чу,/ неизрече́нно воплоти́вшая, Благослове́нная Всечи́стая,// Тя, Богоро́дице, велича́ем.
Прииди́те, мучениколю́бцы, све́тлаго торжества́ наслади́мся, е́же святы́й Уа́р днесь предлага́ет: о, наде́жды исполне́ние! О, любве́ воздая́ние! О, побе́да ве́ры, мир победи́вшая!
Прииди́те, вси благоче́стно жи́ти хотя́щии, благода́тию му́ченик укрепи́мся, и сло́во Христо́во па́ки услы́шим: в ми́ре ско́рбни бу́дете: но дерза́йте, я́ко Аз победи́х мир.
Прииди́те, вся племена́ и язы́цы, у́зрите безчи́сленное мно́жество му́ченик от степе́й казахста́нских до мо́ря Бе́лаго, и свиде́тельство их па́ки услы́шите: я́ко Христо́с Иису́с вчера́ и днесь, То́йже и во ве́ки.
Богоро́дичен: Просла́вим, ве́рнии, Обра́дованную Богоро́дицу, со святы́м Уа́ром и мно́жеством му́ченик: ра́дуйся, сокро́вище упова́ния на́шего, ра́дуйся, ми́ру спасе́ние. Тя, всех ра́дости вину́, велича́ем.
Свети́лен.
Подо́бен: Черто́г Твой:
Черто́г Твой ви́дев, Спа́се мой, украше́нный,/ ри́зу святи́тельскую сла́вный Уа́р кровьми́ украси́./ Просвети́ мя того́ светлостьми́,/ Светода́вче, и спаси́ мя.
Сла́ва, и ны́не, пра́здника.
На хвали́тех стихи́ры на 6: пра́здника 3, и священному́ченика Уа́ра 3.
Стихи́ры священному́ченика, глас 1.
Подо́бен: Небе́сных чино́в:
Небе́сным чино́м ра́дование,/ земноро́дным в наде́жди утвержде́ние/ честна́я па́мять твоя́, святи́телю Уа́ре, яви́ся:/ моли́ за ны, и́же ве́рою к тебе́ прибега́ющия,/ тя бо предста́теля те́пла// в ли́це новому́ченик стяжа́хом.
Небе́снаго Царя́ воево́до,/ святи́телю Уа́ре достосла́вне,/ полка́ па́стырей духо́вных предводи́телю,/ му́жески Це́рковь Ли́пецкую заступи́л еси́/ и, зе́млю казахста́нскую ороси́в кровьми́,// вене́ц нетле́нный от Христа́ прия́л еси́.
Небе́сныя сла́вы му́чеников соприча́стниче,/ от вели́кия ско́рби прише́дших,/ и убели́вших ри́зы своя́ Кро́вию А́гнчею:/ с ни́ми моли́ непреста́нно,/ Уа́ре священнострада́льче,// во и́стинней ве́ре нам, ча́дом твои́м, устоя́ти.
Сла́ва, глас 4:
Ра́дуется ны́не Ли́пецкая земля́/ в торжестве́ твое́м, Уа́ре добропобе́дне,/ ты бо в годи́ну сму́тную чистоту́ Правосла́вия сохрани́в,/ во́лки в ко́жах о́вчих отгна́л еси́,/ и па́ству твою́ во и́стине утверди́л еси́,/ и ны́не во сла́ве Христу́ предстоя́,// при́сно мо́лиши спасти́ся душа́м на́шим.
И ны́не, пра́здника.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на пра́здника, пе́снь рядова́я, на 4, и священному́ченика Уа́ра, песнь 3-я, на 4. Проки́мен, аллилуиа́рий, прича́стен пра́здника и свята́го. Апо́стол и Ева́нгелие дне и свята́го. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О свяще́нная главо́, архипа́стырю предо́брый слове́снаго твоего́ ста́да, священному́чениче Уа́ре! Ты в честне́м свяще́нстве твое́м дом твой до́бре упра́вил еси́: научи́ и нас в до́мех на́ших жи́ти согла́сно. В просвеще́нии каре́лов усе́рдно потруди́лся еси́: помози́ и нам во благове́стии подвиза́тися. Прише́дшей на зе́млю на́шу годи́не гоне́ний, во архиере́йстем чи́не тве́рдость упова́ния твоего́ и чистоту́ ве́ры яви́л еси́: и нас научи́ в мо́ри собла́знов и лжеуче́ний ум све́тел и се́рдце чи́сто сохрани́ти. Ко страда́нию за и́мя Христо́во Про́мыслом Бо́жиим возведе́н был еси́: укрепи́ и нас, чад твои́х, ве́рных пребы́ти, егда́ прии́дет на ны испыта́ния час. О святи́телю Ли́пецкий, мо́лит тя ны́не па́ства твоя́: сохрани́ град и зе́млю на́шу от междоусо́бныя бра́ни, ересе́й и раско́лов, от мо́ра и гла́да и вся́кия па́губы. Да в ми́ре и тишине́ на земли́ пожи́вше, с тобо́ю, о́тче, на па́житех ве́чных со все́ми святы́ми обря́щемся, в черто́зех Бо́га, в Тро́ице воспева́емаго и покланя́емаго во ве́ки веко́в. Ами́нь.