Служба общая исповеднику Российскому XX века единому

Слу́жба о́бщая
испове́днику Росси́йскому ХХ ве́ка еди́ному

В Е́ Ч Е Р

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Прехва́льне испове́дниче и́мярек,/ ты во дни гоне́ний на Це́рковь Росси́йскую/ не убоя́лся еси́ мучи́телей безбо́жных/ и, ве́ру Христо́ву испове́дав,/ страда́ния претерпе́л еси́,/ свиде́тельства же ра́ди и́стины/ благода́тию Бо́жиею храни́м был еси́/ и в ми́ре почи́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Испове́дниче и́мярек до́блий,/ ты в годи́ну безбо́жия во оте́честве на́шем,/ я́ко и́стинный во́ин Христо́в,/ любо́вию к Бо́гу распала́ем,/ ве́ру правосла́вную испове́дал еси́/ и, у́зы темни́чныя и рабо́ты го́рькия/ в сла́дость духо́вную восприе́м,/ во упова́нии тверд пребы́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Испове́дниче му́дре и́мярек,/ ты, во дни испыта́ния ве́ры в земли́ на́шей/ Христу́ с любо́вию после́дуя,/ страда́нием во́льным и испове́данием тве́рдым/ о́браз ве́рным показа́лся еси́/ и, немощны́я в ве́ре укрепи́в,/ утеше́ние лю́дем правосла́вным/ и учи́тель благоче́стия яви́лся еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Сла́ва, глас 8:

Испове́дниче сла́вне и́мярек,/ ты на Бо́га все упова́ние возложи́л еси́/ и Той тя просла́ви во Ца́рствии Небе́снем,/ иде́же со сро́дники на́шими,/ новому́ченики и испове́дники Росси́йскими,/ ве́рою, наде́ждею и любо́вию Ему́ угоди́вшими,/ прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния три преподо́бническая.

На стихо́вне стихи́ры, глас 4.

Подо́бен: Я́ко до́бля:

Я́ко благи́й раб и ве́рный,/ вве́ренный ти тала́нт благоче́стия/ испове́данием Христа́ преумно́жил еси́,/ те́мже в ра́дость Го́спода вшел еси́/ и, ве́лие дерзнове́ние от Него́ восприем,/ мо́лишися о земли́ на́шей// и о ве́рою чту́щих па́мять твою́.

Стих: Бог мой еси́ Ты,// и испове́мся Тебе́.

Егда́ прииде Госпо́дь испытати лю́ди Своя́,/ блаже́нна тя раба́ и бдя́ща обре́те,/ испове́дниче и́мярек всече́стне,/ не ктому́ раба́, но дру́га нарече́ тя,/ и, я́ко ве́рнаго стра́жа до́му Своего́/ над мно́гими тя поста́ви// и дарова́ моли́твенника те́пла о душа́х на́ших.

Стих: Отве́рзите мне врата́ пра́вды,// вшед в ня, испове́мся Го́сподеви.

Помина́я сло́во Госпо́дне:/ несть раб бо́лий го́спода своего́,/ а́ще Мене́ изгна́ша и вас иждену́т,/ гоне́ния и страда́ния за Христа́ любве́ ра́ди претерпе́л еси́./ Те́мже, блаже́нства изгна́нных пра́вды ра́ди сподо́бився,/ любве́ соверше́нныя дости́гл еси́,// испове́дниче до́блий и́мярек.

Сла́ва, глас 6:

Прииди́те, вси ве́рнии,/ досто́йно воспои́м и́мярек сла́внаго,/ сей бо, по́двиг страда́ния и испове́дничества соверши́в/ и последи́ благоче́стно пожи́в,/ Бо́гу в ми́ре ду́шу пре́дал еси́/ и от су́щих зде к ве́чным жили́щем преста́вился еси́,// иде́же мо́лится о душа́х на́ших.

И ны́не, Богоро́дичен: Творе́ц и Изба́витель:

Тропа́рь, глас 4:

Страда́ния за Христа́ претерпе́в,/ ве́ру Правосла́вную сохрани́л еси́/ и, терпе́нием гони́тели Це́ркве Ру́сския посрами́в,/ благоче́стно в зако́не Госпо́дни пожи́л еси́,/ испове́дниче сла́вне и́мярек,/ престо́лу Бо́жию предстоя́,// моли́ спасти́ся душа́м на́шим.

Н А   У́ Т Р Е Н И

На Бог Госпо́дь: тропа́рь то́йже.

По 1-м стихосло́вии седа́лен, глас 4:

К Бо́гу Вы́шнему воззва́л еси́,/ испове́дниче досточу́дне и́мярек:/ поми́луй мя, Го́споди,/ я́ко врази́ нечести́вии попра́ша мя,/ и изба́ви ду́шу мою́ от сме́рти,/ о́чи от слез и но́зе от поползнове́ния,/ да благоугожду́ пред Тобо́ю во све́те живы́х.

Сла́ва, и ны́не, Богоро́дичен:

Стена́ непобеди́мая лю́дем правосла́вным еси́, Богоро́дице Де́во, / к Тебе́ бо притека́юще, невреди́ми пребыва́ем,/ и па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ Ра́дуйся, Благода́тная, Госпо́дь с Тобо́ю.

По 2-м стихосло́вии седа́лен, глас 4:

Егда́ непра́веднии оболга́ша тя и кня́зи лю́дстии ра́нам жесто́ким преда́ша,/ ты, испове́дниче и́мярек, на Бо́га упова́я, моли́лся еси́:/ Го́споди, Го́споди, кто подо́бен Тебе́,/ испове́мся Тебе́ в се́рдце мое́м,/ и язы́к мой поучи́тся пра́вде Твое́й, весь день хвале́ Твое́й.

Сла́ва, и ны́не, Богоро́дичен:

О Всепе́тая Богоро́дице Влады́чице, му́чеников испове́дание и ве́нче, / А́нгелы сла́вимая и челове́ки воспева́емая,/ и всего́ ми́ра возжеле́нная Помо́щнице,/ изба́ви Це́рковь Ру́сскую вся́каго обстоя́ния,/ Еди́на Благослове́нная.

Велича́ние:

Велича́ем тя,/ испове́дниче святы́й и́мярек,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

1-й лик: Испове́мся Тебе́, Го́споди, всем се́рдцем мои́м о ми́лости Твоей и и́стине Твое́й.

2-й лик: Госпо́дь Помо́щник мой, на Него́ упова́ се́рдце мое́, и испове́мся Ему́.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

1-й лик: На Бо́га упова́х, не убою́ся, что сотвори́т мне челове́к.

2-й лик: Изведи́ из темни́цы ду́шу мою испове́датися и́мени Твоему́.

1-й лик: Поноше́ния понося́щих Ти нападо́ша на мя.

2-й лик: От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

1-й лик: Весели́теся, пра́веднии, о Го́споде и испове́дайте па́мять святы́ни Его́.

2-й лик: Да испове́дятся Тебе́, Го́споди, вся дела́ Твоя́.

По полиеле́и седа́лен, глас 4:

Бо́га ре́вностне испове́дуя, сла́вне и́мярек,/ страда́ния от безбо́жных нивочто́же вмени́л еси́,/ те́мже дарова́ся ти благода́ть да́же до конца́ благоче́стне пожи́ти./ Ны́не же, во Ца́рствии Бо́жии наслажда́яся жи́зни ве́чныя,/ моли́ спасти́ся душа́м на́шим.

Сла́ва, и ны́не, Богоро́дичен:

Недви́жимое утвержде́ние ве́ры/ и спасе́ние душ на́ших,/ Богоро́дицу пе́сньми велича́им, ве́рнии:/ ра́дуйся, Правосла́вия Огражде́ние,/ ра́дуйся, земли́ Ру́сския Покро́ве,/ ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Бог мой еси́ Ты,// и испове́мся Тебе́. Стих: Испове́мся Тебе́, я́ко услы́шал мя еси́, и был еси́ мне во спасе́ние. Вся́кое дыха́ние: Ева́нгелие от Луки́, зача́ло 64.

По 50-м псалме́ стихи́ра, глас 6:

Егда́ в гоне́нии боле́зни сме́ртныя одержа́ша тя,/ испове́дниче Христо́в и́мярек,/ ве́ры правосла́вныя не отступи́л еси́/ и Бо́га ре́вностне прославля́л еси́,/ И́же и воздаде́ ти вене́ц пра́вды,// я́ко побо́рнику необори́му.

Кано́н, его́же краегране́сие кроме́ Богоро́дичнов осми́ пе́сен:

Кре́пость моя́ и пе́ние мое́ Госпо́дь. Глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,// побе́дную песнь пою́ща.

Кре́стною си́лою укрепля́ем,/ изгна́ния многоле́тняя претерпе́л еси́,/ глад и хлад, я́ко дар Бо́жий восприе́м./ Те́мже, и́мярек, испове́дник сла́вный яви́лся еси́.

Ру́сския Це́ркве сын ве́рный быв,/ поруга́ния, насмея́ния и лжесвиде́тельства испыта́л еси́/ и безбо́жники сло́вом безмо́лвным обличи́л еси́,/ страда́льче изря́дный и́мярек.

Во испове́дание и́стины, я́ко в броню́ кре́пкую, обле́клся еси́, и́мярек,/ и, во́ин Христо́в непобеди́мый я́влься,/ сло́вом, я́ко мече́м обоюдоо́стрым, враги́ Бо́жия посрами́л еси́.

Богоро́дичен: Разреши́ся кля́тва, печа́ль преста́,/ Благослове́нная бо и Благода́тная Отрокови́ца ве́рным Ра́дость породи́,/ Христа́ Бо́га на́шего.

Песнь 3

Ирмо́с: Водрузи́вый на ничесо́мже зе́млю повеле́нием Твоим/ и пове́сивый неодержи́мо тяготе́ющую,/ на недви́жимем, Христе, ка́мени за́поведей Твои́х// Це́рковь Твою́ утверди́, Еди́не Бла́же и Человеколю́бче.

Пра́ведных ду́ши в руце́ Бо́жией,/ и не прико́снется их му́ка:/ си́ми словесы́ укрепля́емь, и́мярек крепкоду́шне,/ теле́сная страда́ния му́жественне претерпе́л еси́/ и о́браз испове́дания ве́ры сыново́м ру́сским яви́л еси́.

Огради́вся си́лою кре́стною, и́мярек,/ страда́ния и изгна́ния от безбо́жных претерпе́л еси́/ и, ве́ру непоро́чно сохрани́в,/ в ми́ре благоче́стне пожи́л еси́./ Сего ра́ди и вене́ц пра́вды от Христа́ Подвигополо́жника прия́л еси́.

Смути́ся земля́ Ру́сская,/ я́ко опустоши́ ю́ беззако́ние ве́лие,/ ты же, и́мярек великоимени́те, по́двиги испове́дничества благоуха́я,/ я́ко крин се́льный посреде́ пусты́ни, процве́л еси́.

Богоро́дичен: И́же от Отца́ пре́жде всех век рожде́на,/ Ты, Ма́ти Бо́жия, неискусому́жно родила́ еси́./ Те́мже Тя вси, Богоро́дицу правосла́вно испове́дуем.

Седа́лен, глас 3:

Ненави́дящия Го́спода посрами́л еси́,/ и́же хотя́ху тя, испове́дниче и́мярек, Христа́ отлучи́ти и сме́рти преда́ти./ Ты же, к Бо́гу ум твой впери́в,/ я́ко птица, се́ти ловя́щих изба́вился еси́/ и в кро́вы Небе́сныя возлете́л еси́,/ иде́же, в ли́це новому́чеников и испове́дников Росси́йских пребыва́я,/ мо́лишися о спа́сении душ на́ших.

Сла́ва, и ны́не, Богоро́дичен:

Ки́йждо иде́же подвиза́ется, усе́рдно к Тебе́ притека́ет, Богоро́дице,/ несть бо ино́го Прибе́жища, спаса́ющаго ду́ши на́ша, я́ко Ты, Всепе́тая.

Песнь 4

Ирмо́с: Боже́ственное Твое́ разуме́в истоща́ние/ прозорли́во Авваку́м, Христе, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Терпе́нием вооружи́вся, поте́кл еси́ на предлежа́щий ти по́двиг, испове́дниче и́мярек,/ и, преще́ния мучи́телей не убоя́вся,/ непоколеби́м пребы́л еси́, егда́ смути́ся Ру́сская земля́.

Мал бе в бра́тии твое́й, я́коже и Дави́д в ро́де свое́м, / оба́че избра́ тя Госпо́дь, испове́дниче и́мярек сла́вне, со все́ми му́ченики/ отъя́ти поноше́ние сыно́в Це́ркве Ру́сския.

Обле́клся еси́ пе́рвее в све́тлыя оде́жды Креще́ния,/ та́же в по́двизе испове́дания ты́я убели́л еси́, свя́те./ Те́мже, вшед в черто́г Небе́сный,/ зри́ши Лице́ Све́та Непристу́пнаго.

Богоро́дичен: Невмести́маго во чре́ве прие́мши,/ без боле́зни родила́ еси́, Всенепоро́чная Ма́ти,/ и по рождестве́ Де́ва Нетле́нна пребыла́ еси́.

Песнь 5

Ирмо́с: Одея́йся Све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Я́ко сын дне, во све́те заповедей Христо́вых ходил еси́, святе и́мярек,/ и ду́шу твою́ по́двигом испове́дания освяти́л еси́,/ ны́не же по́чести по достоя́нию от земны́х прие́млеши.

Изведе́ тя на по́двиг Госпо́дь,/ егда́ лю́ди росси́йстии отступи́ша Це́ркве Христо́вы,/ и́мже я́ко свети́льник ве́ры яви́лся еси́,/ темни́цы смра́дныя и рабо́ты лю́тыя претерпева́я.

Пре́жде да́же не приити́ дню Госпо́дню вели́кому и стра́шному,/ нощь безбо́жия ду́хом бо́дренным просвеща́л еси́,/ дни лука́выя испове́данием Христо́вым изоблича́я.

Богоро́дичен: Пра́вду и Избавле́ние нам ро́ждши, Христа́, без се́мене,/ естество́ пра́отца от кля́твы свободи́ла еси́, Богоро́дице.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,// я́ко Благоутро́бен.

Егда́ бу́ря гоне́ний Це́рковь Ру́сскую одержа́ше,/ ты, и́мярек блаже́нне, утвержде́ние и по́мощь от Го́спода прие́м,/ во́лны многомяте́жныя му́жественне преше́л еси́.

Не уразуме́ша безбо́жнии мучи́тели,/ ка́ко за Христа́ стра́ждеши, и́мярек,/ и в по́двизе твое́м Го́спода испове́дуеши./ Сего́ ра́ди и осуди́шася.

Испо́лнися на тебе́ глаго́л Христо́в: а́ще Мене́ изгна́ша и вас иждену́т./ Те́мже, угото́вав ду́шу твою́ во искуше́ние,/ мно́гая страда́ния, поноше́ния и ско́рби претерпе́л еси́.

Богоро́дичен: Испо́лнися на Тебе́ проро́чество Симео́ново/ и ору́жие про́йде ду́шу Твою́,/ те́мже му́чеником и испове́дником Стена́ Неруши́мая и По́мощь при́сно быва́еши, Богома́ти.

Конда́к, глас 2:

Я́ко звезда́ но́вая Це́ркве Ру́сския яви́лся еси́,/ терпеливоду́шне и́мярек испове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре Правосла́вней утверди́тися// и спасти́ся душа́м на́шим.

И́кос:

Даждь ми сло́во, Сло́ве Бо́жий,/ по достоя́нию восхвали́ти по́двиги до́бляго и́мярек,/ но́ваго испове́дника, в земли́ Росси́йстей возсия́вшаго,/ в страда́ниих терпели́ваго и в благоче́стии кро́ткаго,/ Небе́сным лико́м сопричте́ннаго,/ иде́же ны́не Триеди́наго Бо́га воспева́ет и мо́лит непреста́нно/ нам, сро́дником его́,/ в ве́ре Правосла́вней утверди́тися/ и спасти́ся душа́м на́шим.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Егда́ посети́ Госпо́дь зе́млю Ру́сскую мно́гими испыта́нии грех ра́ди на́ших,/ тогда́ яви́л еси́ тве́рдость в по́двизе твое́м, и́мярек сла́вне,/ испове́данием ве́ры Христо́вой пла́мень безбо́жия угаша́я.

Му́жеством и кре́постию ду́шу твою́ украси́в,/ ве́рность Христу́ в житии́ твое́м сохранил еси́/ и, мно́гия ско́рби претерпе́в, ве́чнаго поко́я дости́гл еси́,/ иде́же прославля́еши Бо́га оте́ц на́ших.

Отложи́в страх муче́ния, к по́двигу испове́дания му́жественне устреми́лся еси́, и́мярек, Христа́ еди́наго возжеле́в,/ Ему́же ны́не пое́ши:/ благослове́н еси́, Бо́же оте́ц на́ших.

Богоро́дичен: Бо́га пло́тию родила́ еси́, Всенепоро́чная,/ Еди́наго от Тро́ицы,/ Ему́же вси пое́м:/ Бо́же, благослове́н еси́.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте// и превозноси́те во вся ве́ки.

Его́же о́троцы в пещи́ испове́даша,/ Того́ и ты в пла́мени страда́ний пред мучи́тели просла́ви, науча́я всех взыва́ти:/ да благослови́т земля́ Ру́сская Го́спода/ и превозно́сит во вся ве́ки.

Го́спода испове́дайте, я́ко Благ,/ поуча́л еси́ псало́мски, му́дре и́мярек,/ и Той поспеши́т сыново́м ру́сским на спасе́ние,/ Благослове́нный во ве́ки.

Отца́, Сы́на и Ду́ха Свята́го житие́м твои́м испове́дал еси́, страда́льче Христо́в,/ помози́ и нам по́двигом до́брым подвиза́тися,/ тече́ние жи́зни соверши́ти и ве́ру непоро́чну сохрани́ти.

Богоро́дичен: Тя, Богоро́дицу Пречи́стую,/ па́че ума́ и словесе́ ро́ждшую Го́спода и при́сно де́вствующую,/ благослови́м и превозно́сим во вся ве́ки.

Песнь 9

Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка,/ Восто́к и́мя Ему́,// Его́же велича́юще, Де́ву ублажа́ем.

Сла́ву во испыта́ниих еди́ному Бо́гу возда́л еси́,/ испове́дниче Христо́в приснопа́мятне,/ сего ра́ди и Той тя/ в ли́це новому́чеников и испове́дников Росси́йских просла́ви.

Процвете́ Це́рковь на́ша новому́ченики и испове́дники Росси́йскими,/ не отри́ну бо Госпо́дь лю́ди Своя́./ Ты же, испове́дниче сла́вный и́мярек, вку́пе с ни́ми пребыва́я,/ мо́лиши сохрани́тися ве́ре Правосла́вней в земли́ на́шей.

Ору́жием благоволе́ния венча́ тя Госпо́дь,/ испове́дниче блаже́нне и́мярек,/ и́мже и нам на враги́ неви́димыя спобо́рствуй/ и моли́ Христа́ Бо́га сохрани́тися ве́ре Правосла́вней в земли́ на́шей.

Богоро́дичен: С новому́ченики и испове́дники Росси́йскими, Пречи́стая, и все́ми святы́ми/ умоли́ Еди́наго во святы́х Почива́ющаго/ сохрани́ти зе́млю на́шу, славосло́вящую Тя во вся ве́ки.

Свети́лен:

Светода́вец Христо́с Бог наш, исхо́ды у́тра и ве́чера украси́вый,/ Све́та Невече́рняго тя, испове́дниче и́мярек, сподо́би./ Те́мже, во све́тлостех святы́х пребыва́я,/ и нас све́том незаходи́мым просвети́,/ да, в ра́дости лику́юще, просла́вим Свет нам Показа́вшаго.

Сла́ва, и ны́не, Богоро́дичен:

Ди́вно и неизрече́но Рождество́ Твое́, Богоро́дице,/ И́мже спасла́ еси́ род челове́ческий,/ те́мже мо́лим Тя:/ све́том незаходи́мым нас просвети́,/ да, в ра́дости лику́юще, просла́вим Свет нам Показа́вшаго.

На хвали́тех стихи́ры, глас 6.

Подо́бен: Все отло́жше:

Благода́тию свы́ше облече́нный,/ испове́дниче всече́стне, и́мярек,/ я́ко и́стинный раб Христо́в,/ в ве́ре Правосла́вней непоколеби́м пребы́л еси́/ и, гони́телей благословля́я, глаго́лал еси́:/ а́ще и истя́жете те́ло мое́,/ ду́шу не возмо́жете разлучи́ти от любве́ Бо́жия,/ я́же о Христе́ Иису́се Го́споде на́шем,/ на Него́же еди́наго упова́ю// и Ему́ еди́ному возношу́ хвалу́.

Дре́вним испове́дником подо́бяся,/ испове́дниче му́жественный и́мярек,/ в годи́ну гоне́ний на Це́рковь Ру́сскую/ се́рдцем ве́ровал еси́ пра́во,/ усты́ же Христа́ испове́дал еси́ во спасе́ние/ и, ра́ны нивочто́же вмени́в,/ о срамоте́ поноше́ния небре́гл еси́./ Те́мже, безбо́жных посрами́в мучи́телей,/ блаже́нство в дому́ Госпо́дни улучи́л еси́,// иде́же во ве́ки веко́в Его восхваля́еши.

Воспои́м, боголюби́вии лю́дие,/ пе́сньми и пе́нии духо́вными/ святу́ю па́мять и́мярек достохва́льнаго,/ и́же Правосла́вие добропобе́дным гла́сом/ небоя́зненно пред мучи́тели испове́да/ и мно́гим путь спасе́ния показа́./ Те́мже ра́дуются ны́не А́нгельстии чи́ни/ и сликовству́ют святи́и земли на́шея,/ с ни́миже и испове́дник сла́вный// прославля́ет Христа́ Бо́га на́шего.

Сла́ва, глас 8:

Сла́вою и че́стию нетле́нною,/ я́ко подви́жника добропобе́дна,/ венча́ тя Христо́с Подвигополо́жник,/ испове́дниче Христо́в и́мярек,/ и Ца́рствие Небе́сное дарова́,/ иде́же, с собо́ром новому́чеников и испове́дников Росси́йских/ в непристу́пнем све́те пребыва́я,// прославля́еши Тро́ицу Живонача́льную и Неразде́льную.

И ны́не, Богоро́дичен:

Сра́дуются с на́ми у́мная вся Чинонача́лия,/ духо́вный совоку́пльше лик,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ су́щии зри́телие виде́ния,/ на возду́се моле́бно простира́ющу всечестне́и Свои́ ру́це,/ прося́щу умире́ния ми́ру/ и земли́ Ру́сской утвержде́ния,// и спасе́ния душ на́ших.

Славосло́вие вели́кое и отпу́ст.

Н А   Л И Т У Р Г И́ И

Блаже́нна от кано́на, пе́снь 3-я и 6-я.

Проки́мен, глас 7: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя.

Апо́стол к Ефесе́ем, зача́ло 233.

Аллилу́ия, глас 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни.

Ева́нгелие от Матфе́я, зача́ло 38.

Прича́стен: В па́мять ве́чную бу́дет пра́ведник:

Моли́тва

О пресла́вный и добропобе́дный испове́дниче Христо́в и́мярек, Це́ркве Ру́сския украше́ние, земли́ на́шея кра́сный пло́де, сро́дников твои́х похвало́ и о́бразе!

Ты, не убоя́вся мучи́телева преще́ния, ве́ру правосла́вную небоя́зненно испове́дал еси́ и, боле́зни и страда́ния му́жественне с любо́вию ко Христу́ претерпе́в, врата́ми пра́вды в Небе́сное Ца́рство вшел еси́. Те́мже мо́лим тя: вознеси́ ны́не те́плую моли́тву твою́ ко Го́споду о Оте́честве на́шем, да утверди́т его́ в ве́ре Правосла́вней до сконча́ния ве́ка, нас же, чту́щих па́мять твою́, да укрепи́т спаси́тельныя за́поведи Его́ соблюда́ти; да изба́вльшеся от греха́ и ве́чныя му́ки, вку́пе с тобо́ю сподо́бимся воспева́ти достопокланя́емое и́мя Отца́, и Сы́на, и Свята́го Ду́ха, во ве́ки веко́в. А́минь.