Служба преподобномученикам Гуслицким Серафиму, Иоасафу и Петру

Ме́сяца ноября́ в 19-й день
Преподобному́чеников Гу́слицких
Серафи́ма (Булашо́ва), Иоаса́фа (Кры́мзина) и Петра́ (Ма́монтова)

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 1.

Подо́бен: Небе́сных чино́в ра́дование:

Преподо́бнии му́ченицы Христо́ви,/ во́лю свою́ в ру́це Бо́жии преда́вше,/ по́двигом до́брым подвиза́стеся/ и, кровь свою́ пролия́вше,/ венца́ми до́блими увязо́стеся./ Те́мже ве́лию ми́лость прии́мше,/ Престо́лу Го́спода предстои́те// и мо́литеся о душа́х на́ших.

Преподо́бнии му́ченицы Христо́ви,/ во и́ночестем ли́це усе́рдне потруди́вшеся,/ в ско́рбех и гоне́ниих ве́ру правосла́вную сохрани́ли есте́/ и, крест свой на ра́мена взе́мше,/ любо́вь Бо́жию, я́же есть кре́пльши сме́рти, яви́ли есте́./ Ны́не в черто́зе Небе́снем пребыва́юще,/ Престо́лу Го́спода предстои́те// и мо́литеся о душа́х на́ших.

Преподо́бнии му́ченицы Христо́ви,/ в смире́нии и кро́тости Небе́сному Влады́це подража́юще,/ о́гненныя стре́лы зло́бы угаси́ли есте́/ и, за́поведи Госпо́дни соблюда́юще,/ диа́вола му́жественне посрами́ли есте́./ Ны́не в го́рних селе́ниих пребыва́ете/ и Престо́лу Го́спода предстои́те,// моля́щеся о душа́х на́ших.

Преподо́бнии страстоте́рпцы,/ цве́ти ра́йстии са́да Христо́ва,/ Серафи́ме, Иоаса́фе и Пе́тре,/ благоуха́нием по́двигов и страда́ний ва́ших,/ Це́рковь Ру́сскую украси́ли есте́/ и оте́чество ва́ше земно́е просла́вили есте́./ Те́мже моли́те Христа́ Бо́га// да спасе́т ду́ши на́ша.

Сла́ва, глас 8:

Прииди́те, христоимени́тии лю́дие,/ просла́вим преподобному́чеников Гу́слицких,/ и́же, за́поведи Христо́вы сохрани́вше,/ в Ца́рствие Бо́жие внидо́ша/ и мзду обеща́нную прия́ша./ Ны́не в ли́це святы́х почива́юще,/ прославля́ют Отца́ и Сы́на и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. И чте́ния три му́ченическая.

На лити́и стихи́ра хра́ма.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйтеся, новому́ченицы Гу́слицтии,/ те́плии засту́пницы на́ши,/ Ца́рствия Небе́снаго насле́дницы,/ Ду́ха Свята́го прича́стницы,/ ве́лие дерзнове́ние ко Спа́су иму́щии!/ Моли́теся о Це́ркви Ру́сстей,/ да сло́во и́стины е́ю неуста́нно возвеща́ется,/ христоиме́ннии лю́дие в ве́ре правосла́вней утвержда́ются// и в единомы́слии Бо́га прославля́ют.

Стих: Честна́ пред Го́сподем// смерть преподо́бных Его́.

Ра́дуйтеся, новому́ченицы Гу́слицтии,/ Серафи́ме, Иоаса́фе и Пе́тре,/ а́нгели земни́и и челове́цы Небе́снии!/ Вы, же́ртву безкро́вную усе́рдне приноси́вше,/ же́ртва жива́я Го́сподеви соде́ластеся/ и кровь ва́шу за ве́ру пролия́сте./ О преподо́бнии му́ченицы Христо́ви,/ испроси́те нам проще́ние согреше́ний,// я́ко предста́телие на́ши те́плии пред Го́сподем.

Стих: Блаже́н муж боя́йся Го́спода,// в за́поведех Его́ восхо́щет зело́.

Ра́дуйтеся, преподо́бнии му́ченицы Христо́ви!/ Вы, собла́зны лука́ваго отве́ргше,/ крест свой му́жественне подъя́ли есте́/ и, в темни́це заточе́ние претерпе́вше,/ лю́тыя сме́рти не убоя́лися есте́./ Те́мже я́ко же́ртвы непоро́чныя Го́споду прине́сшеся,/ ны́не во оби́телех Небе́сных пребыва́ете/ и нас на по́двиги доброде́лания// моли́твами ва́шими укрепля́ете.

Сла́ва, глас 2:

Егда́ оскуде́ ве́ра в земли́ на́шей,/ беззако́ннии воздвиго́ша брань братоуби́йственную/ и воста́ша на христоимени́тыя лю́ди,/ тогда́ новому́ченицы и испове́дницы пресла́внии,/ ре́вностию о Бо́зе вооружи́вшеся,/ му́жественне подвиза́шася,// да утверди́тся Це́рковь Ру́сская.

И ны́не, Богоро́дичен, глас то́йже: О, чудесе́ но́ваго:

Тропа́рь, глас 4:

Днесь све́тло красу́ется оби́тель Гу́слицкая,/ прославля́ющи преподо́бных му́ченик свои́х,/ Серафи́ма, Иоаса́фа и Петра́,/ ти́и бо, гоне́ний многоразли́чных и сме́рти не убоя́вшеся,/ ве́ры правосла́вныя тве́рдии испове́дницы яви́шася/ и, крест страда́ния на ме́сте муче́ния в Бу́тове подъе́мше,/ венцы́ нетле́нными от Христа́ увязо́шася./ Те́мже, новому́ченицы святи́и,/ моли́те Всеми́лостиваго Спа́са/ долго́в разреше́ния нам дарова́ти// и душа́м на́шим ве́лию ми́лость.

НА У́ТРЕНИ

По 1-м стихосло́вии седа́лен, глас 1:

Се́мя ева́нгельское всем се́рдцем восприи́мше, преподобному́ченицы добропобе́днии, благода́тию Ду́ха Свята́го возрасли́ есте́, воздержа́нием же и терпе́нием, я́ко клас зре́лый, в жи́тницу Небе́сную принесе́ни бы́сте. Те́мже со все́ми святы́ми ликовству́юще, моли́те спасти́ся душа́м на́шим.

Сла́ва, и ны́не, Богоро́дичен:

Наста́ви ны на путь покая́ния, уклоня́ющихся при́сно к безпу́тием зол и Преблага́го Го́спода прогневля́ющих, Неискусобра́чная Благослове́нная Мари́е, Засту́пнице усе́рдная ро́да христиа́нскаго.

По 2-м стихосло́вии седа́лен, глас 7:

Кто досто́йную похвалу́ принесе́т подвиго́м ва́шим, преподо́бнии страда́льцы? Вы бо, ева́нгельски неключи́мыя рабы́ себе́ почита́юще, тве́рдым испове́данием ве́ры да́же до сме́рти Христу́ угоди́ли есте́. Те́мже любо́вию велича́ем вас, те́плых моли́твенников о душа́х на́ших.

Сла́ва, и ны́не, Богоро́дичен:

Стена́ и покро́в еси́, Влады́чице, и приста́нище небу́рное всем, в беда́х су́щим и к Твоему́ заступле́нию с ве́рою притека́ющим. Те́мже и мы усе́рдно вопие́м Ти: соблюди́ зе́млю Ру́сскую в Правосла́вии и единомы́слии, Де́во Пречи́стая.

Велича́ние:

Велича́ем вас,/ преподобному́ченицы Серафи́ме, Иоаса́фе и Пе́тре,/ и чтим по́двиги и страда́ния ва́ша,/ я́же за Христа́// претерпе́ли есте́.

Псало́м избра́нный:

1-й лик: Весть Госпо́дь путь пра́ведных, и путь нечести́вых поги́бнет.

2-й лик: Рабо́тайте Го́сподеви со стра́хом, и ра́дуйтеся Ему́ с тре́петом.

1-й лик: Ты же, Го́споди, Засту́пник мой еси́, сла́ва моя́, и вознося́й главу́ мою́.

2-й лик: Поми́луй мя, Го́споди, я́ко не́мощен есмь: исцели́ мя, Го́споди, я́ко смято́шася ко́сти моя́.

1-й лик: Отступи́те от мене́, вси де́лающии беззако́ние, я́ко услы́ша Госпо́дь глас пла́ча моего́.

2-й лик: Го́споди Бо́же мой, на Тя упова́х, спаси́ мя от всех гоня́щих мя, и изба́ви мя.

1-й лик: По́мощь моя́ от Бо́га, спаса́ющаго пра́выя се́рдцем.

2-й лик: Да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди.

1-й лик: Ты, Го́споди, сохрани́ши ны, и соблюде́ши ны от ро́да сего́ и во век.

2-й лик: Возда́ст ми Госпо́дь по пра́вде мое́й, и по чистоте́ руку́ мое́ю возда́ст ми.

1-й лик: С преподо́бным преподо́бен бу́деши, и с му́жем непови́нным непови́нен бу́деши.

2-й лик: Зако́н Госпо́день непоро́чен, обраща́яй ду́ши; свиде́тельство Госпо́дне ве́рно, умудря́ющее младе́нцы.

По полиеле́и седа́лен, глас 4:

Оби́тель Гу́слицкая ны́не торжеству́ет, прославля́ющи преподо́бныя му́ченики своя́, ти́и бо, на ме́сте сем нача́ло подвиго́м положи́вше, по́ты и слеза́ми ду́ши своя́ возде́лаша, по́слежде страда́ния и изгна́ния пра́вды ра́ди претерпе́вше, кро́вию свое́ю зе́млю Бу́товскую обагри́ша. Те́мже, святи́и, моли́теся за ны ко Го́споду.

Сла́ва, и ны́не, Богоро́дичен:

На Тя, Богоро́дице, упова́ние возлага́ем, ве́рнии лю́дие, да не постыди́мся никогда́же, но иму́ще Тя покро́в и сте́ну неруши́мую, вопие́м Ти: ра́дуйся, Благода́тная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Ма́рка, зача́ло 37.

По 50-м псалме́ стихи́ра, глас 6:

О преподо́бнии му́ченицы Христо́ви,/ Серафи́ме, Иоаса́фе и Пе́тре,/ а́нгели земни́и и челове́цы Небе́снии!/ Вы, же́ртву безкро́вную усе́рдне приноси́вше,/ же́ртва жива́я Го́сподеви соде́ластеся/ и кровь ва́шу за ве́ру пролия́сте./ Ны́не же во све́те невече́рнем пребыва́юще,/ те́плии предста́телие на́ши,// помина́йте соверша́ющих честну́ю па́мять ва́шу.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Припе́в: Святи́и преподобному́ченицы Серафи́ме, Иоаса́фе и Пе́тре, моли́те Бо́га о нас.

Трие́ му́ченицы преподо́бнии, благода́тию Живонача́льныя Тро́ицы я́вственно просвеща́еми, терпели́вно за ве́ру Христо́ву подвиза́шася и лесть безбо́жную му́жественне посрами́ша.

По́двиги ва́шими и кровьми́ му́ченическими земля́ Гу́слицкая освяти́ся, вы же, на Христа́ все упова́ние возложи́вше, во оби́тели Небе́снаго Отца́ всели́лися есте́.

Яви́ нам Госпо́дь преподо́бных отце́в Серафи́ма, Иоаса́фа и Петра́ и венца́ми побе́дными их увенча́, да просла́вим Бо́га, ди́внаго во святы́х Свои́х, и испра́вимся покая́нием.

Богоро́дичен: Па́че ума́ родила́ еси́, о Де́во, и по рождестве́ яви́лася еси́ де́вствующи па́ки. Тем немо́лчными гла́сы, ра́дуйся, Тебе́, Влады́чице, ве́рою несомне́нною вопие́м.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

На Бо́га упова́ние возлага́я, преподобному́чениче Серафи́ме, по́двиги по́стническими и страда́ньми за Христа́ ве́ру пламене́ющую стяжа́л еси́, сего́ ра́ди во оби́телех Небе́сных с безпло́тными ли́ки весели́шися.

На ка́мени ве́ры утверди́вся, преподо́бне Пе́тре, и му́жественно гоне́ния претерпева́я, ве́чнующаго утеше́ния сподо́бился еси́, те́мже и нас в правосла́вней ве́ре утверди́.

Непра́ведному суди́щу предстоя́, Бо́га Еди́наго Судию́ име́л еси́, о́тче Иоаса́фе, и, путе́м Госпо́дним ше́ствуя, собла́зны безбо́жных отри́нул еси́. Сего́ ра́ди вку́пе с новому́ченики тя велича́ем.

Богоро́дичен: Смире́нно приношу́ Ти моле́ние, благоутро́бная Ма́ти, и к Твоему́ прибега́ю милосе́рдию: не отврати́ мя, неразу́мнаго, от лица́ Твоего́.

Седа́лен, глас 8:

Мирска́го мяте́жа удали́вшеся, новому́ченицы Це́ркве Ру́сския, преподо́бнии Серафи́ме, Иоаса́фе и Пе́тре, еди́но на потре́бу взыска́ли есте́ и благу́ю часть в Ца́рствии Небе́снем насле́довали есте́.

Сла́ва, и ны́не, Богоро́дичен:

О Всепе́тая Богоро́дице Влады́чице, преподо́бных похвало́, му́чеников сла́во, А́нгелы восхваля́емая и челове́ки воспева́емая, и всего́ ми́ра кре́пкая Помо́щнице, изба́ви Це́рковь Ру́сскую вся́каго зла́го обстоя́ния, Еди́на Благослове́нная.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Тро́ицы равночи́сленнии, преподо́бнии отцы́ Гу́слицтии, треми́ доброде́тельми Ду́ха Свята́го све́тло укра́шеннии, ве́рою несумне́нною, наде́ждею изве́стною, любо́вию нелицеме́рною в ми́ре просия́ли есте́.

Испове́дающе небоя́зненно Христа́ Бо́га на́шего, тве́рдою ве́рою все безбо́жие мучи́телей попра́сте, преподо́бнии отцы́, и венцы́ нетле́нныя обрето́сте.

С благогове́нием притеце́м, ве́рнии, к светоно́сным отце́м и светоза́рным му́чеником, тьму бо страсте́й на́ших разгоня́ют и пе́ти нас подвиза́ют: сла́ва си́ле Твое́й, Го́споди.

Богоро́дичен: Обновля́ет челове́чество но́во Отроча́ преве́чный Бог, я́влься от Де́вы и Челове́к быв. Тому́ воспои́м: сла́ва си́ле Твое́й, Го́споди.

Песнь 5

Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Во́ини иску́снии Царя́ Небе́снаго, новому́ченицы Це́ркве Ру́сския, полк боже́ственный соста́вивше и ве́рою Христо́вою вооружи́вшеся, свободи́те от ра́бства диа́вольскаго лю́ди, безбо́жием плене́нныя.

Благода́ть Свята́го Ду́ха возсия́ в сердца́х ва́ших, преподо́бнии страда́льцы, сего́ ра́ди ран и муче́ний теле́сных не убоя́вшеся, у́зкими враты́ и те́сным путе́м го́рняго Сио́на дости́гли есте́.

Я́ко ча́да Бо́жия непоро́чна, святи́и новому́ченицы, непови́нни и це́ли, посреде́ ро́да стропти́ва и развраще́нна, я́коже свети́ла в ми́ре, яви́лися есте́.

Богоро́дичен: О Влады́чице Богоро́дице, бу́ди нам щит и заступле́ние во дни испыта́ний, находя́щих на ны, ра́зве бо Тебе́ ино́го предста́тельства не ве́мы.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Во́лны нече́стия и безбо́жия сокруши́шася о ка́мень ве́ры твоея́, свя́те Пе́тре, те́мже и благода́ть за ны моли́тися прия́л еси́.

Егда́ разлучи́ша безбо́жнии ду́шу твою́ от телесе́, о́тче Серафи́ме, па́че Бо́гу соедини́лся еси́, достоблаже́нне, и Христа́ приобре́л еси́. Те́мже моли́ся о почита́ющих тя.

Житие́ и страда́ния твоя́, преподо́бне Иоаса́фе, украси́ша Це́рковь Ру́сскую, сего́ ра́ди с новому́ченики тя велича́ем.

Богоро́дичен: Смире́нно приношу́ Ти моле́ние, благоутро́бная Ма́ти, и к Твоему́ прибега́ю милосе́рдию: не отврати́ мя, неразу́мнаго, от лица́ Твоего́.

Конда́к, глас 6:

Преподобному́ченицы Твои́, Го́споди,/ руга́нием и ра́нами искуше́ния мно́гая прия́ша,/ еще́ же у́зами и темни́цею томи́ми бы́ша./ Оба́че да́же до кро́ве проти́ву греха́ подвиза́вшеся,/ пра́вду соде́яша и Воскресе́нию Твоему́ приобщи́шася./ Тех моли́твами, Христе́ Бо́же,/ да́руй нам с терпе́нием предлежа́щий по́двиг соверши́ти// и Ца́рствия Небе́снаго дости́гнути.

И́кос:

Я́ко до́блии ору́жницы Бо́га на́шего, преподобному́ченицы пресла́внии Серафи́ме, Иоаса́фе и Пе́тре, по́двиги ва́шими ко Христу́ востекли́ есте́, ны́не же Престо́лу Бо́жию предстоя́ще, оби́тель ва́шу в ми́ре сохрани́те и моли́теся о нас, любо́вию вас почита́ющих и вопию́щих си́це: ра́дуйтеся, страстоте́рпцы Христа́ Бо́га на́шего; ра́дуйтеся, вене́ц нетле́нный от Него́ прие́мшии. Ра́дуйтеся, Правосла́вия непобеди́мии испове́дницы; ра́дуйтеся, Ца́рствия Небе́снаго насле́дницы. Ра́дуйтеся, земли́ Моско́вския до́брое прозябе́ние; ра́дуйтеся, оби́тели на́шея пресла́вное украше́ние. Ра́дуйтеся, прибега́ющих к вам му́дрии наста́вницы; ра́дуйтеся, призыва́ющих вас ско́рии помо́щницы. Ра́дуйтеся, преподобному́ченицы пресла́внии, оби́тели Гу́слицкия похвало́ и утвержде́ние.

Песнь 7

Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме Сла́вы Твоея́, Го́споди.

Раско́льническая мудрова́ния отри́нув, о́тче Серафи́ме преподо́бне, и́стину в Це́ркви Правосла́вней обре́л еси́ и, и́ноческия обе́ты приле́жно исполня́я, до конца́ ве́рен и послушли́в Го́сподеви пребы́л еси́, во дни же гоне́ний лю́тых венца́ му́ченическаго сподо́бился еси́.

Милосе́рдный Госпо́дь, ви́дя страда́ния и боле́зни твоя́, десно́ю Свое́ю руко́ю покры́ тя, преподобному́чениче Иоаса́фе, и во огни́ лю́тых испыта́ний по́мощь ти подаде́.

Преще́ний и клеветы́ мучи́телей не убоя́вся, преподобному́чениче Пе́тре, во́ли Госпо́дней всего́ себе́ пре́дал еси́ и, си́лою Животворя́щаго Креста́ укрепля́емь, всех науча́л еси́ Христу́ вопи́ти: благослове́н еси́, Бо́же оте́ц на́ших.

Богоро́дичен: На Тя, Богоро́дице, упова́ние возлага́ем ве́рнии лю́дие, да не постыди́мся никогда́же, но иму́ще Тя покро́в и сте́ну неруши́мую, вопие́м Ти: ра́дуйся, Благода́тная, Госпо́дь с Тобо́ю.

Песнь 8

Ирмо́с: Ру́це распросте́р Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Боже́ственною любо́вию распала́еми, дре́вним отце́м уподо́билися есте́, преподо́бнии страда́льцы, и лю́тая муче́ния претерпе́ли есте́. Те́мже моли́те Го́спода, да не оскуде́ет в земли́ Ру́сстей ве́ра правосла́вная.

Даде́ся вам благода́ть, преподобному́ченицы святи́и, не то́кмо во Христа́ ве́ровати, но и о Нем страда́ти, те́мже у́зы тя́жкия и смерть лю́тую претерпе́вше, ны́не во Ца́рствии Небе́снем ра́дуетеся и весели́теся, мзду мно́гую обре́тше.

Словеса́ Дави́дова прие́млюще, се что добро́ или́ что красно́, но е́же жи́ти бра́тии вку́пе, вы, преподо́бнии, в ду́се братолю́бия и́ноческий по́двиг соверша́ли есте́, те́мже любо́вь Христо́ву стяжа́вше, за ве́ру и́стинную му́жественне пострада́ли есте́.

Богоро́дичен: Егда́ прии́деши во сла́ве суди́ти вся́ческая, Влады́ко Го́споди, десны́м овца́м сопричти́ мя гре́шнаго, Ма́тере Твоея́ мольба́ми, да сла́влю Тя во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́:// тем веселя́щеся, Тя, Богоро́дице, велича́ем.

За́поведь Госпо́дню исполня́юще, преподо́бнии страстоте́рпцы, крест свой на ра́мена взя́ли есте́ и стопа́м Христо́вым после́довали есте́, достосла́внии.

Оболга́ния, хуле́ния и истяза́ния мно́гая претерпе́вше, преподо́бнии страда́льцы, Христа́ по́двиги ва́шими просла́вили есте́. Его́же о нас приле́жно моли́те, да спасе́т ду́ши на́ша.

А́ще и те́лом сокруше́ни бы́сте, оба́че све́тлость ва́ша душе́вная возсия́ благода́тию Ду́ха Свята́го. Те́мже Христа́ Бо́га моли́те зе́млю Ру́сскую от прока́зы безбо́жия исцели́ти, преподобному́ченицы блаже́ннии Серафи́ме, Иоаса́фе и Пе́тре.

Богоро́дичен: Богоро́дице Де́во, моли́ Сы́на Твоего́ и Бо́га на́шего со все́ми святы́ми, в земли́ Ру́сстей просия́вшими, да изба́вит Оте́чество на́ше от неве́рия и сохрани́т неруши́му Це́рковь Правосла́вную.

Свети́лен:

Све́та преу́мнаго заре́ю просвеща́емии, преподобному́ченицы Гу́слицтии прехва́льнии, в нощи́ гоне́ний безбо́жных, я́ко свети́льницы Христо́ви многосве́тлии яви́лися есте́ и, страда́ньми свои́ми зе́млю на́шу просвети́вше, тьму нече́стия в ней разсе́яли есте́.

Сла́ва, и ны́не, Богоро́дичен:

Под Твою́ ми́лость прибега́ем, Богоро́дице Де́во, моле́ний на́ших не пре́зри в ско́рбех, но от бед изба́ви нас, Еди́на Чи́стая и Благослове́нная.

На хвали́тех стихи́ры, глас 1:

О́тче Серафи́ме прехва́льне,/ преподо́бный му́чениче Христо́в,/ оклевета́н от безбо́жных быв,/ поноше́ние претерпе́л еси́,/ за враго́в же моля́ся,/ кончи́ну му́ченическую прия́л еси́/ и я́ко же́ртва благоприя́тная Го́сподеви прине́слся еси́.// Те́мже помина́й нас, чту́щих святу́ю па́мять твою́.

Преподо́бне о́тче Иоаса́фе,/ путь мона́шества от ю́ности избра́в,/ житие́м доброде́тельным досто́йныя плоды́ Влады́це прине́сл еси́,/ оба́че Христо́с путь превосхо́днейший угото́ва ти,/ венце́м страда́ния украси́в./ Ны́не же, па́стырю наш до́брый,/ во святы́х оби́телех пребыва́еши// и и́маши ве́лию ми́лость ко Го́споду моли́тися за ны.

Му́чениче Христо́в, преподо́бне о́тче Пе́тре,/ измла́да Бо́га возлюби́в,/ вся мирска́я во уме́ты вмени́л еси́/ и, во оби́тель Гу́слицкую прише́д,/ и́ноческаго зва́ния сподо́бился еси́./ Во дни же гоне́ний на Це́рковь Ру́сскую/ преще́ний безбо́жных не убоя́вся,/ тве́рдость в ве́ре показа́л еси́./ Те́мже моли́ся, преподобному́чениче,/ от страсте́й грехо́вных нам изба́витися// и жи́зни ве́чныя сподо́битися.

Я́ко зве́зды пресве́тлыя,/ на тве́рди церко́вней возсия́ли есте́,/ новому́ченицы Гу́слицтии,/ вы бо, И́стины побо́рницы яви́вшеся,/ безбо́жных ко́зни сокруши́ли есте́/ и нече́стие в земли́ на́шей обличи́ли есте́./ Те́мже Ца́рствия Небе́снаго дости́гше,/ моли́те Ми́лостиваго Бо́га,/ грехо́в оставле́ние нам дарова́ти// и спасти́ся душа́м на́шим.

Сла́ва, глас 6:

Днесь, ве́рнии, соше́дшеся,/ воспои́м и просла́вим преподо́бных му́чеников/ Серафи́ма, Иоаса́фа и Петра́,// ти́и бо предстоя́т Престо́лу Бо́жию/ и мо́лятся о душа́х на́ших.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́;/ Тебе́ мо́лимся: моли́ся, Влады́чице,/ со святы́ми преподобному́ченики Гу́слицкими,// поми́ловатися душа́м на́шим.

НА ЛИТУРГИ́И

Блаже́нна от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в Це́ркви преподо́бных. Апо́стол к Тимофе́ю, зача́ло 291. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник:

Моли́тва

О всеблаже́ннии уго́дницы Христо́ви, испове́дницы Це́ркве Ру́сския пресве́тлии, тричи́сленнии му́ченицы Серафи́ме, Иоаса́фе и Пе́тре, ве́ры правосла́вныя побо́рницы и всех христиа́н те́плии предста́телие! Вы, в годи́ну лю́тых гоне́ний терпе́нием му́жеским обле́кшеся, оболга́ния и хуле́ния зло́бная, еще́ же и ра́ны многоразли́чныя от нечести́вых мучи́телей претерпе́ли есте́ и, дре́вним му́чеником подража́юще, любо́вию ко Христу́ Бо́гу возгоре́лися есте́. Ны́не же Престо́лу Вседержи́телеву предстоя́ще, испроси́те моли́твами ва́шими ве́ры правосла́вныя укрепле́ние, Оте́честву на́шему на враги́ одоле́ние и сыново́м Росси́йским спасе́ние. Моли́теся, да помо́жет Госпо́дь бра́тии оби́тели Гу́слицкия обе́ты и́ноческия сохрани́ти, всем же ве́рным да́рует покая́ние всеце́лое и любо́вь соверше́нную. Бу́дите нам тве́рдии хода́таи пред Го́сподем в час отше́ствия на́шего, да со все́ми святы́ми сподо́бимся в Ца́рствии Небе́снем досто́йно воспева́ти Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.