Служба священномученику Кириллу, митрополиту Казанскому
Ме́сяца ноября́ в 7-й день
Священному́ченика Кири́лла, митрополи́та Каза́нскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Прииди́те, ве́рнии, почти́м святи́теля Кири́лла,/ благоче́стия тве́рдаго побо́рника,/ свети́льника земли́ Ру́сския,/ во стране́ пусты́нней днесь почи́вшаго,/ и́же, тяготу́ дел и го́речь страда́ний отложи́в,/ на Небеси́ Присноживу́щему взыва́ет:/ утверди́, Го́споди, Це́рковь Ру́сскую/ и низложи́ шата́ния враго́в Ея́,// да лю́дие, ходя́щии во тьме, ви́дят свет ве́лий.
Мир до́льний ущедря́я,/ Христо́с со Отце́м и Ду́хом Святы́м/ оби́тель твори́т во избра́нных Свои́х,/ и́хже весь мир недосто́ин есть;/ те́мже избра́ннаго от ми́ра воспои́м,/ Кири́лла, священному́ченика богоприя́тна,/ и́же, се́рдце освяти́в страда́нием,/ тече́ на муче́ние за Це́рковь Христо́ву,// ю́же не возмо́гут врата́ а́дова одоле́ти.
Иоа́нну, чудотво́рцу Кроншта́дтскому,/ и́ноков и па́стырей наста́внику,/ пе́ние надгро́бное прине́сл еси́,/ святи́телю Кири́лле, кро́ткий послу́шниче,/ последи́ же, я́ко му́ченик и́стинный,/ Небе́снаго черто́га дости́гл еси́/ и та́мо отца́ духо́внаго во сла́ве узре́л еси́,/ веселя́щася с но́выми му́ченики и глаго́люща:// се аз и де́ти, я́же ми даде́ Бог.
Небе́сных гра́ждан люби́теля/ прославля́ет тя ны́не страна́ Тамбо́вская,/ в ней бо до́бре потруди́лся еси́,/ святи́телю Кири́лле, смире́нный па́стырю,/ и апо́стола ея́, Питири́ма чу́днаго,/ в ли́це святы́х просла́вил еси́,/ Феофа́на же богому́драго почита́я,/ тому́ духо́вне подража́л еси́,// сего́ ра́ди с ни́ми ку́пно лику́еши.
И́ны стихи́ры, глас 6.
Подо́бен: Все отло́жше:
Отцы́ Собо́ра Це́ркве Ру́сския,/ Ду́хом Святы́м води́ми,/ поставля́ют на престо́л первосвяти́тельский/ смире́ннаго Ти́хона, архипа́стыря до́браго,/ не самовла́стием того́ облека́юще,/ но зна́мение побе́ды Бо́жия явля́юще./ Те́мже лик но́вых му́ченик/ патриа́ршим и́менем украси́ся/ и в земли́ Ру́сской возсия́ пресве́тло,/ от ни́хже и святи́тель Кири́лл, митрополи́т Каза́нский,/ днесь на́ми прославля́ется,/ я́ко ве́ры неусы́пный страж// и храни́тель до́ма Госпо́дня.
Све́тлое торжество́ гра́да Каза́ни приспе́,/ с ни́мже вси гра́ди земли́ на́шея ра́дуются,/ и вся Це́рковь Ру́сская красу́ется/ в па́мяти святи́теля Кири́лла,/ архипа́стыря преизя́щнаго/ и му́ченика добропобе́днаго,/ посту́, моли́тве и богомы́слию прилежа́щаго,/ кро́вию свое́ю свяще́нную оде́жду обагри́вшаго/ и от страда́ния в Боже́ственную сла́ву прише́дшаго,/ иде́же со все́ми святы́ми/ предстои́т Престо́лу Святы́я Тро́ицы,/ и мо́лится дарова́ти душа́м на́шим// мир и ве́лию ми́лость.
Любодру́жное свято́е еди́нство/ всеусе́рдно возлюби́в от ю́ности,/ му́жественне к страда́нию поте́кл еси́,/ со дру́ги разлуча́яся,/ оба́че а́нгельския кре́пости испо́лнен,/ изгна́ние я́ко жи́тельство безмо́лвное вмени́л еси́,/ и те́сное жили́ще я́ко го́рницу Сио́нскую,/ иде́же неуста́нно моля́ся/ и сло́вом и́стины заблу́ждшия назида́я,/ во единомы́слие церко́вное мно́гия приве́л еси́,/ и я́ко еди́н от дре́вних отце́в просия́л еси́,/ вели́чие ве́ры явля́я,// священному́чениче Кири́лле досточу́дне.
Ка́я страда́ния претерпе́л еси́,/ ки́ими добро́тами обогати́лся еси́,/ ки́я венцы́ от Бо́га прия́л еси́,/ священному́чениче Кири́лле терпеливоду́шне?/ Непости́жно есть лю́бящим тя:/ ка́ко, подобостра́стен нам быв челове́к,/ уз мирски́х до конца́ совле́клся еси́,/ жития́ ра́ди кре́стнаго?/ Ка́ко, скорбьми́ отвсю́ду утесня́емь,/ и́менем Госпо́дним вся победи́л еси́,/ призыва́я Его́ со дерзнове́нием мно́гим?/ И ны́не помоли́ся о нас, уго́дниче Христо́в,// чту́щих святу́ю па́мять твою́.
Сла́ва, глас то́йже:
Сло́во Госпо́дне услы́шал еси́,/ святи́телю о́тче Кири́лле:/ Ца́рство Мое́ несть от ми́ра сего́,/ те́мже, к стопа́м Влады́чним любо́вию устреми́вся,/ я́ко би́сер многоце́нный/ уче́ние Христо́во обре́л еси́,/ во уничиже́ниих и ско́рбех земны́х сокрове́нное./ Ны́не же, муче́ния багряни́цею укра́шенный,/ Престо́лу Бо́жию во сла́ве предстои́ши/ и све́том Небе́снаго блаже́нства// ве́рныя лю́ди озаря́еши.
И ны́не, Богоро́дичен, глас то́йже: Кто Тебе́ не ублажи́т, Пресвята́я Де́во:
Вход. Проки́мен дне. И чте́ния 3 му́ченическая.
На лити́и стихи́ра хра́ма.
Сла́ва, глас 2:
Не вы Мене́ избра́сте, но Аз вы избра́х,/ сие́ сло́во Госпо́дне на тебе́ испо́лнися,/ святи́телю Кири́лле, о́тче наш,/ Созда́тель бо твой Госпо́дь украси́ тя дарова́нии,/ и Це́ркви Свое́й в час испыта́ния яви́ я́ко и́стины побо́рника,/ в раи́ же све́тлости всели́ тя, подая́ весе́лие ве́чное,/ зане́ во стра́нствии земне́м Того́ возлюби́л еси́/ всем се́рдцем, е́же очи́стити потща́лся еси́,/ все́ю душе́ю, ю́же за дру́ги твоя́ положи́л еси́,/ все́ю мы́слию, е́юже Сло́ву Бо́жию прилежа́л еси́.// Моли́ся о нас, да со избра́нными сопричте́ни бу́дем.
И ны́не, Богоро́дичен.
На стихо́вне стихи́ры, глас 5.
Подо́бен: Ра́дуйся:
Ра́дуйся, святи́телю Кири́лле пресла́вне,/ вы́шняго Ца́рствия насле́дниче,/ и Небе́сному Влады́це Го́споду/ в ско́рбех и гоне́ниих подо́бниче:/ Сей бо, кро́ва на земли́ не име́я,/ поруга́ние и смерть лю́тую прия́т безче́стно,/ ты же зи́му и зной пусты́ни терпе́л еси́,/ та́же пи́щи, сна лише́ние и со злоде́и заточе́ние,/ еще́ же во у́зах от гра́да во град прехожде́ние/ и от суде́й лука́вых изрече́ние,/ я́ко пови́нен есть сме́рти./ Те́мже, я́ко дар Небе́сный, восприи́м страда́ния,/ Христа́ приобре́л еси́,// подаю́щаго ми́ру ве́лию ми́лость.
Стих: Пра́ведник я́ко фи́никс процвете́т,// я́ко кедр, и́же в Лива́не, умно́жится.
Ра́дуйся, святи́телю Кири́лле всече́стне,/ и́стины тве́рдый испове́дниче,/ ты бо, ве́ры поруга́ние ви́дев,/ пред гони́тели со дерзнове́нием рекл еси́:/ сие́, очи́ма на́шима зри́мое,/ скорбь есть Це́ркве, но не смерть Ея́,/ во́ля Бо́жия несть челове́к дея́ние,/ но попуще́ние, к покая́нию зову́щее;/ оба́че си́лен Бог прости́ти грехи́ на́ша,/ и Це́ркви Свое́й дарова́ти житие́ ми́рно и безпеча́льно./ Те́мже, ны́не благоде́нствующи,/ па́ства Всеросси́йская взыва́ет ти:// испроси́ нам ве́ру тве́рду и ве́лию ми́лость.
Стих: Насажде́ни в дому́ Госпо́дни,// во дво́рех Бо́га на́шего процвету́т.
Из глубины́ темни́чныя взыва́я,/ си́це веща́л есть святи́тель Кири́лл пречу́дный:/ не от ми́ра Це́рковь Правосла́вная,/ мир апо́стольски освяща́ющая,/ но Те́ло Христо́во, Ду́хом созида́емое,/ Ца́рствие Бо́жие, с Небесе́ сше́дшее,/ и прича́стники Боже́ственнаго естества́ нас творя́щее,/ ма́ти, ча́да на служе́ние братолю́бное воздвиза́ющая/ и ко спасе́нию их наставля́ющая,/ и ка́ко сия́ земны́х ра́ди благ от Небе́сныя сла́вы отсту́пит?/ Те́мже да неколе́блема пребу́дет в служе́нии Це́рковь Ру́сская,/ е́йже моли́твами но́вых му́ченик подае́т Христо́с// благостоя́ние и ве́лию ми́лость.
Сла́ва, глас то́йже:
О ча́да светообра́зная церко́вная!/ Весели́теся днесь в па́мяти святи́теля честна́го,/ сей бо, во све́те невече́рнем Бо́гу предстоя́, взыва́ет:/ при́зри, Бо́же, с Небесе́ на зе́млю Ру́сскую,/ а́ще и попра́ша лю́дие ея́ иногда́ труды́/ и тече́ния слез преподо́бных Твои́х,/ но кро́ве ра́ди пролиты́я но́вых му́ченик,/ возста́ви зе́млю сию́ и приведи́ воспева́ти:// Светода́вче Го́споди, сла́ва Тебе́.
И ны́не, Богоро́дичен, глас то́йже: Храм и дверь еси́:
На благослове́нии хле́бов тропа́рь свята́го, два́жды, и Богоро́дице, Де́во: еди́ножды.
Тропа́рь свята́го, глас 3:
Вели́ка в ско́рбех уте́шителя/ обре́те тя Це́рковь Ру́сская, свя́те Кири́лле,/ ты бо, в годи́ну гоне́ния ча́шу страда́ний прие́м,/ жа́ждущия пра́вды воеди́но собра́л еси́,/ я́ко оре́л небе́сный под криле́ птенцы́ своя́,/ и вся научи́л еси́/ ве́ры до́брому испове́данию./ Те́мже в ли́це но́вых му́ченик/ Престо́лу Бо́жию предстои́ши,// моля́ся о чту́щих любо́вию па́мять твою́.
Ин тропа́рь, глас 5:
Я́коже со́лнце светоза́рное,/ возсия́ днесь па́мять твоя́, святи́телю Кири́лле,/ луча́ми благода́ти озаря́ющи ве́рных сердца́/ к прославле́нию ди́внаго во святы́х Свои́х Бо́га,/ дарова́вшаго тебе́ кре́пость во испове́дании и терпе́ние в ско́рбех./ Те́мже мо́лим тя:/ не премолчи́ о нас ко Го́споду/ и изба́ви от вся́каго зла,/ Це́рковь Ру́сскую от раздо́ров и нестрое́ний сохрани́,/ мир ми́рови испроси́// и душа́м на́шим ве́лию ми́лость.
НА У́ТРЕНИ
На Бог Госпо́дь: тропа́рь священному́ченика, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Та́йну ве́лиих по́двигов твои́х, святи́телю, о сем позна́хом: я́ко от ю́ности словеса́ ева́нгельская, я́ко сребро́ разжже́но, приле́жно в се́рдце слага́я, вседу́шне Христа́ возлюби́л еси́. Те́мже и Це́ркви Правосла́вней чрез все житие́ усе́рдне послужи́л еси́ и сла́вы Небе́сныя сподо́бился еси́.
Сла́ва, и ны́не, Богоро́дичен:
Приста́нище нам обурева́емым бу́ди, Пресвята́я Влады́чице, не и́мамы бо кре́пости, и произволе́ния тве́рда не стяжа́хом. Оба́че упова́ем моли́твами Твои́ми пути́ спаси́тельнаго не уклони́тися и заве́т святи́теля Кири́лла испо́лнити: а́ще кто хо́щет го́рняго Иерусали́ма дости́гнути, вся́ку я́зву стра́стнаго се́рдца из ко́рене му́жески да исто́ргнет.
По 2-м стихосло́вии седа́лен, глас 2:
Егда́ вре́мя испове́дания ча́дом Це́ркве Ру́сския наста́, тогда́ сме́рти ника́коже устраши́лся еси́, священному́чениче добропобе́дне, зало́г Ца́рствия Небе́снаго в се́рдце име́я. Те́мже и ны́не сме́ртию смерть Попра́вшаго во Ца́рствии Небе́снем духо́вне созерца́еши.
Сла́ва, и ны́не, Богоро́дичен:
Воспои́м, лю́дие, по́мощь и заступле́ние Де́вы Чи́стыя, помина́юще оте́ц на́ших, при́сно в беда́х и напа́стех пред Не́ю с мольбо́ю припа́дающих, и зрак чудотво́рнаго Ея́ о́браза в се́рдце нося́щих.
Велича́ние:
Велича́ем тя,/ священному́чениче Кири́лле,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́, и прииди́ во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 5:
Кий о́браз в се́рдце твое́м зрел еси́, святи́телю, от беззако́нных убива́емь? Сы́на ли Бо́жия, на Кресте́ ви́сяща во тьме часа́ шеста́го? Стефа́на ли, о уби́йцах моля́щася: не поста́ви им, О́тче, греха́ сего́? Це́рковь ли Ру́сскую, сму́тою терза́ему? Оба́че в ру́це Бо́жии вся пре́дал еси́, взыва́я: спаси́, Спа́се, ду́ши ве́рно покланя́ющихся Тебе́.
Сла́ва, и ны́не, Богоро́дичен:
Что Тя нарече́м, Богоро́дице? Приста́нище ли духо́вное, рай сла́дости Небе́сныя или́ Хода́таицу жи́зни неконча́емыя? Вся бо иму́щи, Еди́на непоро́чная и до́брая в жена́х, о нас моли́ся Христу́ Бо́гу, спасти́ся душа́м на́шим.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Целому́дрия от ю́ности испо́лнен,/ страда́ньми го́рькими и моли́твами сле́зными/ во глубину́ смиренному́дрия снизше́л еси́,/ и терпе́ние тве́рдое богоподража́тельное стяжа́л еси́./ Те́мже и плод кра́сный любве́ Христо́вы прине́сл еси́,/ е́юже воспламени́ сердца́ на́ша,// святи́телю Кири́лле богому́дре.
Кано́н, глас 1.
Песнь 1
Ирмо́с: Пои́м, вси лю́дие,/ от го́рькия рабо́ты фарао́ни Изра́иля Изме́ншему,/ и во глубине́ морсте́й нога́ми немо́крыми Наста́вльшему,/ песнь побе́дную,// я́ко просла́вися.
Припаде́м, бра́тие, ко Го́споду, промышле́ние творя́щему о Це́ркви Свое́й святе́й, Ему́же но́вии му́ченицы и испове́дницы Ру́сстии воспева́ют непреста́нно песнь побе́дную, я́ко просла́вися.
Воспои́м, бра́тие, Це́ркве Ру́сския украше́ние, святи́теля Кири́лла богому́драго, от ю́ности Христа́ возлюби́вшаго и чистото́ю жития́ Бо́га просла́вившаго.
Прославле́ние святи́теля Питири́ма в Це́ркви Ру́сстей труда́ми твои́ми сверши́ся, пресла́вне Кири́лле, те́мже ны́не ку́пно с ним ча́дами ея́ прославля́ешися.
Богоро́дичен: Де́во Чи́стая, примире́ния ски́ние, Не́бо Бо́жие на земли́ и ко гра́ду Небе́сному ле́ствице! Прозябе́нием Твои́м от непло́дове мир возвесели́ся, те́мже мо́лимся: пода́ждь благопло́дие земли́ Ру́сстей, уде́лу Твоему́ избра́нному.
Песнь 3
Ирмо́с: Утверди́ мене́, Христе́,/ на недви́жимом ка́мени за́поведей Твои́х,/ и просвети́ мя све́том лица́ Твоего́:/ несть бо свят па́че Тебе́,// Человеколю́бче.
Утверди́л еси́ се́рдце твое́, свя́те Кири́лле, ми́рови умре́ти и, а́нгельским о́бразом украси́вся, воззва́л еси́ Христу́: Твой есмь аз, спаси́ мя, Еди́не Человеколю́бче.
В бде́ниих и поще́ниих страстьми́ обнища́в, бога́тство дарова́ний духо́вных прия́л еси́. Те́мже и нас от страсте́й изба́ви моли́твами твои́ми, Кири́лле многострада́льне.
Оде́жду свяще́нную кро́вию украси́в, блаже́нне Кири́лле, в Це́рковь Небе́сную свяще́нно вшел еси́, иде́же Святе́й Тро́ице предстоя́, взыва́еши: несть свят па́че Тебе́, Человеколю́бче.
Богоро́дичен: Чу́дно Твое́, Богоотрокови́це Мари́е, во храм Госпо́день вхожде́ние, храм бо яви́лася еси́ Бо́гу, те́мже и приведу́тся де́вы вслед Тебе́: ду́ши взыску́ющих спасе́ние.
Ин конда́к, глас 3:
Столп и же́ртва Це́ркве Христо́вы быв,/ сию́ непоколеби́му от искуше́ний лука́ваго прему́дро соблю́л еси́/ и, ко́зни вра́жия тве́рдым умо́м разори́в,/ еди́ну Це́рковь апо́стольскую пропове́дал еси́,/ Кири́лле богоблаже́нне,/ святи́телей Ру́сских похвало́,// моли́ спасти́ся душа́м на́шим.
Седа́лен, глас 2:
Се́рдце твое́, святи́телю Кири́лле, горе́ устремля́емо, чи́сто прираже́ний стра́стных показа́ся, сего́ ра́ди помышле́ния светови́дная породи́. Уста́ же твоя́ восприя́ша глаго́л Бо́жий, я́ко меч духо́вный, во е́же враги́ расточи́ти и ста́до Христо́во укрепи́ти.
Сла́ва, и ны́не, Богоро́дичен:
Светоно́сная Сло́ва пала́та, ковче́г, позлаще́нный Ду́хом, яви́лася еси́, Пресвята́я Де́во. Те́мже мо́лим Тя: вку́пе со святы́ми сро́дники на́шими Христу́ моли́ся, от страсте́й очи́стити, правосла́вно Богоро́дицу испове́дающих Тя.
Песнь 4
Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́ вопия́:/ внегда́ прибли́житися ле́том, позна́ешися;/ внегда́ приити́ вре́мени, пока́жешися.// Сла́ва си́ле Твое́й, Го́споди.
Се́рдце сокруше́нно и умиле́ния испо́лнено име́я, у́зким и ско́рбным путе́м неотсту́пно ше́ствовал еси́, о́тче Кири́лле. Те́мже и ро́ва страсте́й избе́гл еси́, и я́ко град на горе́ стоя́й яви́лся еси́.
Святи́тельства ри́зу све́тлу сохрани́л еси́, и о́вцы слове́сныя до́бре упа́сл еси́, я́же, чужда́го гла́са не послу́шавше, тебе́ после́доваша. К сим же и нас сопричти́, пою́щих: сла́ва Го́споду, ди́вному во святы́х Свои́х.
Моли́твою усе́рдною дух твой к Бо́гу воскриля́л еси́, святи́телю, труды́ ко трудо́м на всяк день прилага́я, да процвете́т, я́ко крин, земля́ Ру́сская. Ю́же и ны́не соблюди́ от го́рдых супоста́т невоева́ну, моли́твами твои́ми.
Богоро́дичен: Дверь Небе́сная яви́лася еси́, Де́во, вход отверза́ющи Архиере́ю вели́кому Христу́, нас ра́ди Небеса́ проше́дшему. Те́мже глас а́нгельский Тебе́ взыва́ем: ра́дуйся, Благода́тная, Госпо́дь с Тобо́ю.
Песнь 5
Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия,// правосла́вно пою́щих Тя.
Кто изъясни́т красоту́ души́ твоея́, блаже́нне Кири́лле, и кто изсле́дит е́же ко гре́шным твое́ милосе́рдие, о ни́хже и ны́не неотсту́пно мо́лишися Христу́: спаси́ и поми́луй, Го́споди, правосла́вно пою́щих Тя.
Даде́ся тебе́ благода́ть от Бо́га благоле́пно погребсти́ те́ло пра́веднаго Иоа́нна Кроншта́дтскаго, па́стыря Всеросси́йскаго; с ни́мже ны́не моли́ Христа́, е́же све́том любве́ просвети́ти нас, правосла́вно Его́ почита́ющих.
Сло́во Бо́жие и писа́ния оте́ческая предпоче́л еси́ му́дрости ве́ка сего́, святи́телю, сего́ ра́ди боже́ственным отце́м во всем после́довав, ны́не мо́лишися Христу́: све́том любве́ Твоея́, Го́споди, просвети́ правосла́вно пою́щих Тро́ицу Единосу́щную.
Богоро́дичен: Я́ко дождь на руно́ низше́д, во утро́бу Деви́чу всели́лся еси́, Христе́, и па́че со́лнца ми́ру возсия́л еси́, Све́те ра́зума, и я́ко Младе́нец на руку́ Де́вы Ма́тере положи́лся еси́, Сло́ве Бо́жий. Ея́же моли́твами просвети́ сердца́ пою́щих Тя.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.
Егда́ бе́здна страда́ния обы́де зе́млю на́шу, тогда́ со слеза́ми моли́лся еси́, святи́телю, о безви́нно убие́нных и о спасе́нии люде́й Росси́йских, взыва́я: ми́лостив бу́ди нам, Бо́же, Ты бо кре́пость немощству́ющих и исправле́ние.
Свята́го патриа́рха Ти́хона ча́до послу́шное быв, во́лю того́ всеусе́рдно испо́лнити потща́лся еси́, сего́ ра́ди непреткнове́нно и Ца́рства Небе́снаго дости́гл еси́, иде́же о спасе́нии люде́й Росси́йских мо́лиши: ми́лостив нам бу́ди, Бо́же, Ты бо кре́пость на́ша и исправле́ние.
Со апо́столы и му́ченики, со святи́тели и преподо́бными, я́ко ве́рный учени́к Христо́в всели́лся еси́, свя́те Кири́лле. Сего́ ра́ди и ны́не при́зри от свята́го жили́ща твоего́ на нас, спасе́ние улучи́ти ча́ющих и вопию́щих: спаси́ лю́ди Твоя́, Бо́же наш, Ты бо кре́пость немощству́ющих и исправле́ние.
Богоро́дичен: Его́же ста́рец Симео́н прия́т на ру́ки своя́, Того́, Влады́чице Чи́стая, моли́ о нас, я́ко Сы́на Твоего́, да ми́лость обря́щем, егда́ прии́дет на о́блацех суди́ти ми́ру всему́, Ты бо еси́ упова́ние христиа́ном, Богоро́дице Де́во.
Конда́к, глас 5:
Лучеза́рною твое́ю благода́тию нас просвети́,/ пою́щих му́жества твоего́ кре́пость,/ я́же вои́телем тьмы бе непристу́пна,/ и моли́твами твои́ми Це́рковь Ру́сскую в единомы́слии утверди́,/ и от бед оте́чество на́ше огради́,// святи́телю Кири́лле, му́чениче сла́вный.
И́кос:
Егда́ все житие́ твое́ Бо́гу пре́дал еси́, тогда́ прия́т тя Госпо́дь, я́ко кова́ч желе́зо, в ру́це Свои́ и в горни́ле страда́ний искуси́ тя. Сего́ ра́ди дарова́ся тебе́ си́ла и благода́ть, кре́пость и прему́дрость, и, я́ко свет, пред челове́ки дела́ твоя́ просвети́шася в похвалу́ Пресвяты́я Тро́ицы. И ны́не моли́твами твои́ми Це́рковь Ру́сскую в единомы́слии утверди́, и от бед оте́чество на́ше огради́, святи́телю Кири́лле, му́чениче сла́вный.
Песнь 7
Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́ поя́ху,/ и благословля́ху глаго́люще:// благослове́н Бог оте́ц на́ших.
Пре́жде Креста́ преобрази́ся Госпо́дь пред ученики́ Свои́ми. Ты же, о́тче, в светоза́рный день Преображе́ния во у́зы заключе́н быв, отсе́ле восхожде́ние на крест нача́л еси́, небоя́зненно глаго́ля: благослове́н Бог оте́ц на́ших.
Во узи́лищи мра́чнем пе́ние побе́дное Христу́ воспе́л еси́, испове́дниче сла́вне: блаже́ни изгна́ни пра́вды ра́ди. Те́мже умудри́ и нас во вся́цей ско́рби Царю́ Небесе́ и земли́ досто́йно воспева́ти: благослове́н Бог оте́ц на́ших.
В темни́це хла́дней Па́сху пою́ще и Го́спода очи́ма ве́ры зря́ще, во у́зах су́щии с тобо́ю, свя́те Кири́лле, дивля́хуся благогове́инству служе́ния твоего́. Те́мже, на му́ки и смерть угото́вани, Христу́ глаго́лаху: подава́й нам и́стее Тебе́ причаща́тися в невече́рнем дни Ца́рствия Твоего́.
Богоро́дичен: Осуди́ся на Крест Судия́ живы́х и ме́ртвых, безче́стие претерпе́ Царь Сла́вы, сме́рти вкуси́ И́же да́руяй ми́рови жи́знь. Сего́ ра́ди, уясни́вше стра́шное сие́ смотре́ние, грехо́в оставле́ние про́сим улучи́ти нам моли́твами Твои́ми, Де́во Пречи́стая.
Песнь 8
Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,// и превозноси́те во вся ве́ки.
Смиренному́драго Ти́хона патриа́рха сотаи́нник и Петра́ крепча́йшаго сострада́лец яви́лся еси́, о́тче Кири́лле богоблаже́нне, и ны́не с си́ми Небе́сныя сла́вы наслажда́ешися, Христа́, мир от тли грехо́вныя спа́сшаго, превознося́ во ве́ки.
Ве́ру непоро́чну сохра́ньше, испове́дницы мно́зи прихожда́ху к тебе́, Кири́лле богому́дре: Афана́сий и Дамаски́н, святи́телие сла́внии, Алекса́ндр преподо́бный и друзи́и, да ку́пно с тобо́ю расточе́нныя лю́ди Це́ркве Ру́сския соберу́т, Христа́ превознося́ще во ве́ки.
Твое́ крестоно́сное в ве́ре стоя́ние еди́нство Це́ркве Ру́сския сохрани́, и́мя бо твое́, в моли́твах по всей Руси́ ку́пно возноси́мое, разделе́ние соедини́, сомне́ние умири́ и любо́вь умно́жи.
Богоро́дичен: Ра́дость Воскресе́ния Сы́на Твоего́ пе́рвее прия́ла еси́, Богома́ти, Той бо обетова́ние даде́ ученико́м Свои́м: па́ки узрю́ вы, и возра́дуется се́рдце ва́ше. Моли́ся, Госпоже́, и нам Влады́чния ра́дости сподо́битися.
Песнь 9
Ирмо́с: Неизглаго́ланное Де́вы та́инство:/ Не́бо бо Сия́, и Престо́л Херуви́мский,/ и светоно́сный черто́г показа́ся/ Христа́ Бо́га Вседержи́теля.// Сию́ благоче́стно я́ко Богоро́дицу велича́ем.
Изде́тска Креще́ние водо́ю и Ду́хом прии́м, последи́ же кро́вию свое́ю испо́лнил и соверши́л еси́ е́, да в ри́зу бе́лую за Сло́во Бо́жие убие́нных облече́шися и но́вую песнь на земли́ живы́х Христу́ воспое́ши.
Егда́ приспе́ час кончи́ны твоея́, стра́ха мучи́телей безбо́жных не устраши́лся еси́, и равноа́нгельное житие́ сме́ртию му́ченическою запеча́тал еси́. Сего́ ра́ди со А́нгельскими ли́ки ны́не Христа́ созерца́еши.
Мзды своея́ не лиша́ется, и́же ча́шу воды́ ученику́ подаде́. Сего́ ра́ди рцы нам, о́тче святы́й, ку́ю мзду Евдоки́я, печа́льница твоя́, улучи́ла есть, вся тяготы́ с тобо́ю поне́сшая? Ве́мы бо, я́ко в ли́це му́ченик Христу́ предстои́т.
Богоро́дичен: К жи́зни присносу́щней на объя́тиих Сы́на Твоего́ возше́дшая, Пречи́стая, ма́тернима Твои́ма рука́ма в ве́чныя кро́вы о и́мени Его́ пострада́вшия прия́ла еси́. Те́мже и нас в час кончи́ны на́шея ми́лостивно сря́щи.
Свети́лен, глас 6:
Пресве́тлым лице́м и ми́лостивным о́ком при́зри на ча́да твоя́, благогове́йно соверша́ющая па́мять твою́, святи́телю, и Све́та Пода́теля моли́ спасти́ и просвети́ти ду́ши на́ша.
Сла́ва, и ны́не, Богоро́дичен:
Стена́ и покро́в бу́ди нам, Влады́чице, да Тобо́ю пре́йдем сте́ну, ю́же суета́ жите́йская воздви́же. Не пре́зри, Чи́стая, моле́ния на́шего, моли́твенника бо на сие́, Кири́лла сла́внаго, Тебе́ предлага́ем.
На хвали́тех стихи́ры, глас 4.
Подо́бен: Дал еси́ зна́мение:
Служе́ния и́го Боже́ственное/ и бре́мя е́же о Христе́ страда́ния,/ ра́дуяся, подъя́л еси́,/ святи́телю Кири́лле терпели́ве,/ отту́ду и дар прия́л еси́,/ е́же звездо́ю путево́дною Це́ркви бы́ти/ и и́стину, я́же есть Христо́с, яви́ти./ Его́же и мы воспомя́нем глас:// и́го Мое́ бла́го, и бре́мя Мое́ легко́ есть.
Ра́дость воскресе́ния возвеща́я/ и благодаре́ние за вся Бо́гу воздая́,/ Безкро́вную Же́ртву в темни́це приноси́л еси́,/ святи́телю Кири́лле свяще́нне,/ соу́зницы же твои́ воспева́ху пе́ние Воскре́сшему Христу́,/ непристу́пным све́том блиста́ющему/ и стра́ждущим о и́мени Его́ реку́щему:/ ра́дуйтеся и весели́теся,// я́ко мзда ва́ша мно́га на Небесе́х.
Му́дростию свы́ше осоле́н и со единому́дрыми ми́рствуяй,/ свята́го патриа́рха прее́мник духо́вный был еси́,/ святи́телю Кири́лле всече́стне./ С ни́мже име́яй еди́н дух во двою́ телесу́/ и е́же о Це́ркви помышле́ние еди́но,/ еди́нства Ея́ и и́стины ра́ди смерть прия́л еси́,/ заве́т Пастыренача́льника Христа́ испо́лнив:/ име́йте соль в себе́,// и мир име́йте между́ собо́ю.
Све́тлостию братолю́бия увенча́н и свято́му патриа́рху после́дуя,/ сме́ртию за Христа́ усоверши́лся еси́,/ святи́телю Кири́лле всехва́льне./ Петру́ же крепча́йшему спострада́в,/ о нем и о Це́ркви сле́зно моли́лся еси́,/ с ни́мже ны́не на Небеси́ ра́дуяся,/ помина́й па́ству Всеросси́йскую, тебе́ пою́щую:/ бо́льши сея́ любве́ никто́же и́мать,// да кто ду́шу свою́ положи́т за дру́ги своя́.
Сла́ва, глас 1:
Кто возмо́жет свяще́нства высоту́ разуме́ти:/ ка́ко пе́рстен челове́к служи́тель Бо́жий быва́ет/ и Огнь Боже́ственный в причаще́ние ве́рным подае́т,/ Та́инство соверша́я, всех сокро́вищ вы́шшее,/ и ми́лостивно обязу́ет стру́пы люде́й согреша́ющих,/ в се́рдце нося́ преда́ния апо́стольская и оте́ческая?/ Сего́ ра́ди, святи́телю Кири́лле, Це́ркве Ру́сския похвало́,/ испроси́ па́стырем земли́ на́шея, е́же в пра́вду облещи́ся,/ лю́дем же уче́нию сих приле́жно внима́ти,// да бу́дет еди́но ста́до и еди́н Па́стырь Христо́с.
И ны́не, Богоро́дичен, глас то́йже:
Успе́ние Твое́, Пречи́стая,/ апо́стольский лик пе́сньми почти́,/ и А́нгели кри́лы покрыва́ху свяще́нное те́ло Твое́;/ страда́льцем же Христо́вым, от беззако́нных та́йно убие́нным,/ в ме́стех пусты́нных и непрохо́дных/ никто́же от челове́к пе́ние надгро́бное сотвори́,/ оба́че Ты Сама́ предста́ла еси́, Влады́чице,/ со А́нгельскими доброгла́сными чи́нми./ И ны́не вси концы́ земни́и/ но́вых му́чеников прославля́ют// во хра́ме Госпо́дни, во дво́рех Бо́га на́шего.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О пречу́дный святи́телю Кири́лле, но́вых му́ченик и испове́дник украше́ние, свята́го патриа́рха Ти́хона ве́рный после́дователю и Це́ркве Ру́сския вели́кое свети́ло! По и́мени твоему́ та́ко и житие́ твое́ бысть, ты бо в дому́ Бо́жии сла́достию слове́с церко́вных воспита́нный, в ю́ных ле́тех благода́ть свяще́нства прия́л еси́, и па́ству твою́ богоуго́дно жи́ти поуча́л еси́. Помози́ ны́не па́стырем Це́ркве на́шея в сердца́х свои́х дар любве́ Христо́вы возгрева́ти, о́троки наста́ви, е́же в кро́тости и смире́нии возраста́ти, и вся лю́ди правосла́вныя научи́ си́лу благоче́стия благи́ми де́лы стяжева́ти. Ты, святи́телю Кири́лле, пра́вило мона́шескаго жития́ яви́лся еси́, архиере́ев похвала́ и градово́м в ве́ре утвержде́ние. Сего́ ра́ди споспе́шествуй и́ноком в ду́се и и́стине ре́вностно подвиза́тися, архипа́стыри научи́ сло́во пра́вды Христо́вы в ми́ре сем непоро́чно храни́ти. Заступи́ страну́ на́шу от наше́ствия иноплеме́нник, гра́ды и ве́си ея́ от вся́ких бед сохрани́, до́мы ми́ром огради́ и вся ча́да ея́ заблу́ждшая на путь покая́ния наста́ви. Ве́мы вои́стину и усты́ испове́дуем, я́ко мо́жеши испроси́ти у Великодарови́таго Бо́га, ели́ка хо́щеши, ты бо пра́вды ра́ди изгна́ние и заточе́ние претерпе́ти сподо́бился еси́, и посреде́ злострада́ний и кра́йния нищеты́ бога́тство благоду́шия яви́л еси́, ты и ве́ру правосла́вную пред си́льными ми́ра сего́ небоя́зненно испове́дал еси́. Вразуми́ нас, в доброде́телех убо́гих, земно́му бога́тству сердца́ не прилага́ти и укрепи́ нас, немощны́х, в час испыта́ния ве́ру во Христа́ сохрани́ти. И я́коже во и́стине стоя́л еси́, егда́ вознесо́шася до небе́с и низпадо́ша до бездн во́лны смут церко́вных, та́ко умудри́ и нас приле́жно ве́ре на́шей поуча́тися и в ра́зум и́стины восходи́ти, избира́юще пра́вая, блага́я и поле́зная. Ты смерть за Христа́ прия́л еси́ я́ко вене́ц пра́веднаго жития́ твоего́, та́ко напра́ви и нас не прилепля́тися сла́ве и дово́льству ве́ка сего́, но по́чести вы́шняго зва́ния иска́ти, да твои́ми оте́ческими моли́твами возмо́жем земно́е на́ше житие́ без поро́ка прейти́, христиа́нскую кончи́ну улучи́ти и сподо́битися в Ца́рствии Небе́снем ку́пно с тобо́ю прославля́ти Отца́, и Сы́на, и Свята́го Ду́ха, Тро́ицу Единосу́щную, во ве́ки веко́в. Ами́нь.
