Служба святителю Зиновию исповеднику, митрополиту Тетрицкаройскому

Ме́сяца февраля́ в 23-й день

Святи́теля Зино́вия испове́дника,
митрополи́та Тетрицкаро́йскаго, в схи́ме Серафи́ма

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ любо́вию Христо́вою/ уязви́лся еси́, Зино́вие досточу́дне,/ тогда́, себе́ и ми́ра отве́ргся,/ в пу́стынь Гли́нскую всели́лся еси́/ и, отцу́ духо́вному во́лю и мудрова́ние покори́в,/ ве́лиим послуша́нием и смире́нием обогати́лся еси́,/ молча́ньми же и боре́ньми с по́мыслы моли́тву непреста́нную стяжа́в,/ я́ко ю́ный Заха́рия Ски́тский// Ду́ха Свята́го испо́лнился еси́.

Егда́ гре́х ра́ди на́ших/ врази́ Госпо́дни воздвиго́ша главу́,/ тогда́ ве́ру правосла́вную/ тве́рдо испове́дал еси́,/ и, у́зы темни́чныя и рабо́ты го́рькия/ я́ко благо́е и́го Христо́во претерпева́я,/ во упова́нии тверд пребы́л еси́,/ и моли́тву сугу́бую о Святе́й Це́ркви и Оте́честве возноси́л еси́,/ те́мже, вся́ ору́жия Бо́жия прии́м,// в день лют духо́в зло́бы низложи́л еси́.

Егда́ восхожде́ния свяще́нная/ в се́рдце твое́м положи́л еси́,/ го́рняя му́дрствуя и духодви́жною моли́твою Христо́ви прилепля́яся,/ тогда́ во́ду жи́ву богоразу́мия источи́л еси́,/ и, святи́тельства са́ном почте́н бы́в,/ о́тче Зино́вие, строи́телю Бо́жиих Та́ин,/ па́ству твою́ де́лом и сло́вом поуча́л еси́,/ и, луча́ми любве́ согрева́я и световодя́,// ко спасе́нию наста́вил еси́.

Сла́ва, глас 6:

Святи́телю о́тче Зино́вие,/ Бо́жия Ма́тере избра́нниче и уго́дниче,/ ты, во уде́ле Ея́ И́верстем усе́рдно подвиза́яся,/ явле́ния Пречи́стыя сподо́бился еси́,/ та́же в годи́ну бра́ни свяще́нныя/ равноапо́стольную Ни́ну узре́л еси́,/ Спа́са Христа́ за ги́бнущия лю́ди умоля́ющую,/ в ме́ру же во́зраста духо́внаго дости́гнув,/ в го́рняя преста́вился еси́,/ иде́же ны́не мо́лишися Святе́й Тро́ице/ дарова́ти Це́рквам Бо́жиим едине́ние и благостоя́ние,// и душа́м на́шим ве́лию ми́лость.

И ны́не, Богоро́дичен, глас то́йже: Кто Тебе́ не ублажи́т, Пресвята́я Де́во:

Вход. Проки́мен дне. Чте́ния три преподо́бническая.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́достию се́рдца Христа́ велича́ем,/ пра́зднующе днесь па́мять твою́,/ святи́телю о́тче Зино́вие,/ послуша́ния и кро́тости рачи́телю,/ смире́ния и терпе́ния о́бразе./ Ты, все упова́ние возложи́в на Бо́га,/ ве́рность и му́жество яви́л еси́/ и, у́зы темни́чныя со смире́нием претерпева́я,/ испове́дник ве́ры правосла́вныя показа́лся еси́,/ любо́вию же се́рдце всем отве́рсто име́вый,/ мно́гия лю́ди ко спасе́нию приве́л еси́.// Моли́ о душа́х на́ших.

Стих: Уста́ моя́ возглаго́лют прему́дрость,// и поуче́ние се́рдца моего́ ра́зум.

Лику́й, оби́теле Гли́нская,/ взыгра́йте, го́ры Иве́рии и Ура́льская земле́,/ моли́твами, труда́ми и страда́нии/ святи́теля Зино́вия облагоуха́нныя,/ архипа́стыря до́браго/ и подви́жника благоче́стия преди́внаго,/ и́же со апо́столом бо́льши не имя́ше ра́дости,/ да слы́шит ча́да своя́ во и́стине ходя́щая./ Те́мже, ве́рнии, вознесе́м моли́твы священноиспове́днику до́блему,/ Небе́сным лико́м сопричте́нному,/ е́же в ве́ре правосла́вней нам утверди́тися// и спасти́ся душа́м на́шим.

Стих: По́йте Го́сподеви, преподо́бнии Его́,// и испове́дайте па́мять святы́ни Его́.

Си́лою Ду́ха Свята́го укрепля́емь,/ мно́гия ско́рби в темни́це претерпе́л еси́,/ моли́тву же я́ко щит прие́м,/ ду́шу свою́ духо́вне пита́л еси́,/ и соу́зники сло́вом утеша́л еси́,/ свя́те Зино́вие богоприя́тне,/ пра́вило трезве́ния Боже́ственнаго/ и ми́лости кла́дязю неисчерпа́емый,/ те́мже и со Ио́вом Влады́це глаго́лал еси́:/ слу́хом у́бо у́ха слы́шах Тя пе́рвее,/ ны́не же о́ко се́рдца моего́ ви́де Тя,// Спа́са и Изба́вителя ду́ш на́ших.

Сла́ва, глас 6:

Уго́дников Бо́жиих усе́рдный почита́телю,/ первосвяти́телей собесе́дниче,/ архипа́стырей наста́вниче,/ ста́рцев духоно́сных сотаи́нниче,/ святи́телю о́тче Зино́вие,/ честны́я мо́щи твоя́, я́ко сокро́вище/ и зало́г едине́ния с Це́рковию Ру́сскою, Иве́рии оста́вил еси́,/ те́мже град Тбили́си тобо́ю хва́лится/ и вси концы́ Земли́ Ру́сския воспева́ют тя,/ мы же, соверша́юще с любо́вию па́мять твою́, взыва́ем:// моли́ спасти́ся душа́м на́шим.

И ны́не, Богоро́дичен, глас то́йже:

Богоро́дице, Ты еси́ Лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,// поми́ловати ду́ши на́ша.

Тропа́рь, глас 2:

Гли́нския пу́стыни до́брое воспита́ние,/ Бо́жия Ма́тере изря́дный уго́дниче,/ правосла́вныя ве́ры неколеби́мый испове́дниче,/ святи́телю о́тче Зино́вие,/ ты, я́ко оре́л небопа́рный,/ па́ству твою́ крила́ми моли́твы и любве́ покрыва́л еси́,/ те́мже, от гор Кавка́зских в Небе́сныя оби́тели всели́вся,// моли́ Христа́ Бо́га спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен: Вся па́че смы́сла:

По 1-м стихосло́вии седа́лен, глас 7:

Удивля́хуся ста́рцы, зря твое́ в ю́ных ле́тех благоче́стие и послуша́ние ве́лие, и́хже ра́ди благослове́ние Бо́жие бысть на всех де́лех твои́х, о́тче Зино́вие богоприя́тне. Те́мже и архиере́я от гони́телей спасл еси́, тебе́, еще́ и́ноку су́щу, чин святи́тельский предре́кша.

Сла́ва, и ны́не, Богоро́дичен, глас 1:

Ра́дуйся, Благода́тная Богоро́дице Де́во, во объя́тиях Cвои́х Предве́чнаго Младе́нца и Бо́га носи́вшая, проси́ Его́ да́ти ми́ру умире́ние и душа́м на́шим спасе́ние: Ты бо еси́, Влады́чице, Взыска́ние поги́бших.

По 2-м стихосло́вии седа́лен, глас 1:

А́ще не обратите́ся, и бу́дете я́ко де́ти, рече́ Госпо́дь, не вни́дете в Ца́рство Небе́сное, и и́же у́бо смири́тся я́ко отроча́, той есть бо́лий во Ца́рствии Небе́снем. Ты же, о́тче Зино́вие, сло́во сие́ де́лом испо́лнил еси́ и, младе́нческое незло́бие стяжа́в, сугу́бую любо́вь к духо́вным ча́дом яви́л еси́.

Сла́ва, и ны́не, Богоро́дичен, глас то́йже:

Боголюби́вая Цари́це, Неискусому́жная Де́во Богоро́дице Мари́е, моли́ за ны Тебе́ возлюби́вшаго и ро́ждшагося от Тебе́ Сы́на Твоего́, Христа́ Бо́га на́шего, пода́ти нам оставле́ние прегреше́ний, ми́рови мир, земли́ плодо́в изоби́лие, па́стырем святы́ню и всему́ челове́ческому ро́ду спасе́ние.

Велича́ние:

Велича́ем тя,/ священноиспове́дниче Зино́вие,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

И́но велича́ние:

Ублажа́ем тя,/ преподобноиспове́дниче Зино́вие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Псало́м избра́нный: Терпя́ потерпе́х Го́спода:

По полиеле́и седа́лен, глас 1:

Стра́сти, я́ко зве́ри лю́тыя, укроти́л еси́, Зино́вие богому́дре, те́мже и заступле́нием святи́теля Никола́я от зве́ря лю́та спасе́н был еси́, бра́тии же усе́рдне служа́, зверонра́вие ненави́дящих и оби́дящих кро́тостию побежда́л еси́.

Сла́ва, и ны́не, Богоро́дичен, глас то́йже:

Еди́на кре́пкая Предста́тельница ро́ду челове́ческому, Богоро́дице Де́во, непреста́нно моли́ с новому́ченики и испове́дники Це́ркве Ру́сския Его́же родила́ еси́ па́че естества́ Бо́га и Сло́ва, е́же спасти́ зе́млю на́шу, в не́йже и́мя Твое́ при́сно восхваля́ется.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Сти́х: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Святи́телю о́тче Зино́вие,/ ты, глаго́лы апо́стола со тща́нием исполня́я,/ яви́л еси́ в ве́ре доброде́тель,/ в доброде́тели же ра́зум,/ в ра́зуме воздержа́ние,/ в воздержа́нии терпе́ние,/ в терпе́нии благоче́стие,/ во благоче́стии братолю́бие,/ в братолю́бии любо́вь,// я́же николи́же отпа́дает.

Кано́н, глас 8

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Че́рмное мо́ре,/ пои́м Ему́, я́ко Изба́вителю на́шему Бо́гу,// я́ко просла́вися.

Пу́стынь Гли́нская да возра́дуется о ча́дех свои́х, сокрове́нно подвиза́вшихся и Бо́гу угоди́вших, и́же, я́ко исто́чницы, благоче́стием напои́ша концы́, в и́хже собо́ре да воспое́тся святи́тель Зино́вий.

Ре́вностию по Бо́зе от ю́ности уязви́лся еси́ и во оби́тель и́ноков, я́ко еле́нь на исто́чники во́дныя, устреми́лся еси́, последи́ же во́ду жи́ву Богове́дения ве́рным источи́л еси́.

Егда́ чрез послуша́ние и смире́ние Боже́ственное разсужде́ние стяжа́ и жезло́м доброде́телей страсте́й мо́ре пресече́, тогда́ со апо́столом глаго́лал еси́: живу́ не ктому́ аз, но живе́т во мне Христо́с.

Богоро́дичен: Ка́ко Отроча́ мла́до преве́чен Бог яви́ся? Или́ где ви́дена бысть Де́ва Ма́ти? И́стинно па́че ума́ обоя́, Богороди́тельнице Чи́стая.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.

Добро́ и красно́, е́же жи́ти бра́тии вку́пе, пое́т Дави́д, та́ко и святи́тель Зино́вий преподо́бных ста́рцев Гли́нских сподви́жник яви́ся: Серафи́мов обои́х и Андрони́ка кротча́йшаго.

Зино́вие богоприя́тне, ты, я́ко град верху́ горы́ стоя́, прибе́жище ве́рным ча́дом Це́ркве Ру́сския был еси́, на не́йже ми́лость удиви́ Госпо́дь, огради́в ю́ Свое́ю благода́тию.

Ре́вность по Бо́зе со упова́нием на ми́лость Его́ сочета́л еси́, и ча́шу страда́ний за Христа́ с наро́дом Бо́жиим испи́л еси́, спасе́ние от Го́спода и утвержде́ние Правосла́вия прозрева́я.

Богоро́дичен: Светода́вца и Нача́льника жи́зни на́шея ро́ждши, Чи́стая Богоро́дице, яви́лася еси́ благода́ти живоно́сный Исто́чник и Дверь непристу́пнаго Све́та.

Седа́лен, глас 2:

Строи́тель Та́ин Бо́жиих быв, апо́стольски во а́лчбе, жа́жде, хла́де, страда́ниих и скита́ниих пребыва́л еси́, гоне́ния и хулу́ незло́биво терпя́. Тем мо́лим тя, о́тче Зино́вие: моли́ся о ча́дех твои́х, и́хже благовествова́нием во Христе́ Иису́се роди́л еси́, подо́бным тебе́ бы́ти, я́коже ты Христу́.

Сла́ва, и ны́не, Богоро́дичен:

Ма́терь Бо́жию измла́да всем се́рдцем возлюби́в, покро́ва Ея́ сподо́бился еси́, святи́телю о́тче Зино́вие, те́мже явле́нием Ея́ от одра́ сме́ртна воздви́жен был еси́, и Це́ркви Бо́жией па́ки ве́рно послужи́л еси́, по вся дни Засту́пницу усе́рдную усе́рдно воспева́я.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й,// сла́ва снизхожде́нию Твоему́.

Егда́ пло́тию немощствова́ше, святи́телю, тогда́ ду́хом наипа́че обновля́лся еси́, на боже́ственней стра́жи вы́ну стоя́ и благода́рным се́рдцем ми́лость и си́лу Бо́жию прославля́я.

Хвали́тися со апо́столом то́кмо о Кресте́ Христо́вом возжеле́л еси́, и́мже тебе́ мир распя́ся и ты ми́ру, та́ко и нас укрепи́ те́сным путе́м ше́ствовати в жизнь ве́чную.

Горе́ у́мныма очи́ма взира́я, ника́коже прило́ги вра́жиими подви́глся еси́, Про́мысл Бо́жий небому́дренно созерца́я.

Богоро́дичен: Пребезнача́льное Нача́ло, вопло́щься из Тебе́, Богороди́тельнице, нача́ло прие́млет и пребы́вает собезнача́льно и соприсносу́щно Отцу́ и Ду́хови.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// и́мя Твое́ имену́ем.

Осия́н быв от мы́сленнаго Со́лнца Пра́вды, на всех лучи́ любве́ во Христе́ простира́л еси́ и, свет стезя́м твои́м за́поведи Госпо́дни полага́я, о́ко души́ всегда́ чи́сто име́л еси́.

Смире́нною моли́твою ум в го́рняя вознося́, блаже́нную нищету́ ду́ха стяжа́л еси́, Зино́вие досточу́дне, помози́ и нам сра́мных ру́бищ страсте́й совлещи́ся.

Прильпе́ душа́ твоя́ ко Го́споду в моли́тве непреста́нней, и сокрове́нна жизнь во Христе́ твоя́ бысть, о́тче Зино́вие, те́мже Бог поста́ви тя на све́щнице святи́тельства и да́ром исцеле́ний обогати́.

Богоро́дичен: Бысть чре́во Твое́ простра́ннейшее Небе́с, чистота́ же Твоя́, Де́во, я́коже пре́жде, невреди́ма пребы́сть, Христо́с бо, Со́лнце Пра́вды, я́ко от черто́га жени́х, из Тебе́ яви́ся.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся,/ те́мже, я́ко Ио́на, та́ко вопию́ Ти:/ возведи́ от тли живо́т мой,// Благоутро́бне Го́споди.

О душа́х чад твои́х, во всех конце́х земли́ Ру́сския и Иве́рии су́щих, моли́лся еси́, святи́телю Зино́вие, в се́рдце о́ная при́сно име́я, во е́же сожи́ти с ни́ми и умре́ти, и Христу́ непоро́чны предста́вити.

Даде́ тя Госпо́дь Це́ркви па́стыря и учи́теля в созида́ние Те́ла Христо́ва, те́мже плодоно́сну доброде́тельми па́ству твою́ соде́лал еси́, и богоно́сный ко́рмчий во обстоя́ниих яви́лся еси́.

Александри́йския Це́ркве предстоя́теля от беды́ смертоно́сныя спа́сл еси́, Про́мыслом Бо́жиим и а́нгелом Храни́телем наставля́емь, те́мже и нам па́мять сме́ртную и кончи́ну христиа́нскую у Го́спода испроси́.

Богоро́дичен: Злата́я кади́льница была́ еси́, Огнь бо во утро́бе Твое́й всели́ся, Сло́во от Ду́ха Свя́та, и челове́ческим зра́ком в Тебе́ ви́деся, Богороди́тельнице Чи́стая.

Конда́к, глас 5:

Послуша́ния до́брый рачи́тель быв/ и смире́нием себе́ украси́в,/ в любо́вь, я́ко соу́з соверше́нства, обле́клся еси́/ и непреста́нною моли́твою к Бо́гу восте́кл еси́,/ Ца́рствие же Небе́сное вну́трь себе́ обре́т,/ ко и́стинней жи́зни во Христе́ па́ству твою́ путеводи́л еси́./ Те́мже помина́й нас, чту́щих святу́ю па́мять твою́, да зове́м ти:// ра́дуйся, Зино́вие богому́дре.

И́кос:

Священному́ченику Зино́вию в тве́рдом испове́дании Христа́ подо́бяся и ду́шу твою́ за па́ству полага́я, за́поведь Пастыренача́льника до конца́ испо́лнил еси́, боже́ственною же любо́вию пламене́я, и́мя Серафи́м в вели́цей схи́ме прия́л еси́, и обоюдоо́стрым мече́м Сло́ва Бо́жия и моли́твы херуви́мски врата́ се́рдца твоего́, я́ко мы́сленнаго рая́, храни́л еси́, соблюда́я его́ невхо́дно прило́гом вра́жиим. Те́мже, уго́дниче Христо́в и предста́телю тепле́йший, не преста́й моли́тися о ча́дех твои́х, да зове́м ти: ра́дуйся, Зино́вие богому́дре.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием, о́троцы поя́ху:// благослове́н еси́, Бо́же оте́ц на́ших.

Правосла́вныя ве́ры ревни́теля и защи́тника, благове́рнаго кня́зя Алекса́ндра Не́вскаго, в по́мощь всегда́ призыва́л еси́, во святе́м хра́ме его́ три́десять и пять лет служе́ние усе́рдно соверша́я.

Раб Бо́жий и господи́н над страстьми́ яви́лся еси́, огне́м Боже́ственнаго стра́ха ты́я попали́в, те́мже моли́твами твои́ми помози́ и нам чрез покая́ние пла́мене гее́нскаго изба́витися.

Егда́ во у́зах жа́ждею ве́лиею пали́мь бя́ше, тогда́ моли́твою дождь с небесе́ сведе́ и соу́зники напои́, та́ко и нам, во у́зах греха́ су́щим и жа́ждею духо́вною томи́мым, помози́, святи́телю Зино́вие.

Богоро́дичен: Ты Бо́га еди́на пресла́вно родила́ еси́, Де́во, и Рождество́м Твои́м челове́ческое естество́ обнови́ла еси́, Мари́е, и Е́ву прама́терь перворо́дныя кля́твы разреши́ла еси́, Богороди́тельнице Чи́стая.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.

Боле́зни и ско́рби благоду́шно терпя́, ду́хом пламене́л еси́, свя́те Зино́вие, испове́дуя, я́ко лю́бящим Бо́га вся поспешеству́ют во благо́е.

От бед изба́ви нас, призыва́ющих тя, святи́телю Зино́вие, ты бо, си́лою Бо́жиею победи́в врага́, прия́л еси́ благода́ть неду́ги теле́сныя и стра́сти душе́вныя цели́ти.

Моли́твою покая́нною о гресе́х наро́да ко Го́споду взыва́л еси́, егда́ огне́м лю́тыя бра́ни Оте́чество на́ше объя́то бысть, последи́ же милосе́рдие Бо́жие благода́рно просла́вил еси́.

Богоро́дичен: О, ди́внаго слы́шания! О, ужа́снаго ви́дения и стра́ннаго зача́тия Де́вы! Ка́ко Бог бысть Сын Жены́ и ка́ко безму́жная Ма́ти роди́ Бо́га! Вои́стину па́че ума́ и словесе́ несказа́нна.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице,/ обоя́ устро́ишася./ Тем Тя, вся племена́ земна́я,// непреста́нно велича́ем.

Непреста́нно о ве́чнем бытии́ помышля́я, небохо́дною стезе́ю по земли́ ше́ствовал еси́, свя́те Зино́вие, и, в ме́ру во́зраста исполне́ния Христо́ва дости́гнув, блаже́нною кончи́ною в Бо́зе упоко́ился еси́.

От го́рних высо́т при́зри на ны, святи́телю о́тче Зино́вие, я́ко оре́л птенцы́ твоя́ крила́ми любве́ покрыва́я, и те́плою моли́твою на путь спасе́ния наставля́я.

Ю́же дре́вле предвозвести́ проро́ческое сосло́вие, Ма́терь Бо́жию я́сно зре́ти сподо́бился еси́, о́тче Зино́вие, чрез все житие́ сугу́быя ми́лости Ея́, тебе́ явле́нныя, воспева́я.

Богоро́дичен: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́, Его́же пое́т вся тварь и трепе́щут Вы́шнии чи́ни. Того́ моли́, Всечи́стая, спасти́ся душа́м на́шим.

Свети́лен.

Подо́бен: Жены́, услы́шите:

Лампа́ду неугаси́мую Ду́ха Свята́го в се́рдце возже́г, разсужде́ния свети́льник яви́лся еси́, святи́телю Зино́вие, ны́не же во Све́те Невече́рнем пребыва́я, к све́ту покая́ния наставля́еши ве́рою и любо́вию чту́щих па́мять твою́.

Сла́ва, и ны́не, Богоро́дичен:

Богоро́дице Де́во, ра́дуйся, Благода́тная Мари́е, Госпо́дь с Тобо́ю, благослове́нна Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших.

На хвали́тех стихи́ры, глас 1.

Подо́бен: Небе́сных чино́в:

Святи́телю Зино́вие, печа́льниче и уте́шителю,/ приими́ от нас умиле́нное пе́ние,/ ча́ющих твои́м предста́тельством/ получи́ти от Бо́га грехо́в оставле́ние,/ в доброде́телех преспе́яние// и ве́чное душа́м спасе́ние.

Серафи́мскою любо́вию/ к Бо́гу пламене́я,/ в послуша́нии Херуви́мскую ре́вность яви́л еси́,/ со а́нгельскою же кро́тостию бли́жним сострада́я,/ вся во бла́го Це́ркви и Оте́честву упра́вити тща́лся еси́,// святи́телю Христо́в Зино́вие.

Сло́во и́стины Христо́вы пра́во пра́вил еси́,/ ра́дость на Небесе́х о ка́ющихся сотворя́я,/ те́мже Престо́лу Бо́жию ны́не предстоя́,/ моли́ Человеколю́бца Бо́га/ и нам десна́го сподо́битися стоя́ния// в день Стра́шнаго Суда́ Христо́ва.

И́ноком и преподо́бным ста́рцем оби́тели Гли́нския/ в годи́ну гоне́ний собесе́дник и соу́зник был еси́,/ дни́й же тече́ние сконча́в,/ во оби́тели Отца́ Небе́снаго пресели́лся еси́,/ нам же мо́щи твоя́ святы́я оста́вил еси́,// я́ко сосу́д, испо́лненный благода́ти.

Сла́ва, глас 8:

На скрижа́лех се́рдца твоего́/ за́поведи Госпо́дни запечатле́л еси́/ и, Ду́ха Свята́го испо́лнився,/ Ца́рствие Бо́жие, прише́дшее в си́ле, внутрь себе́ узре́л еси́,/ в ско́рбех же и боле́знех терпе́ние Ио́вле явля́я,/ кре́ст страда́ний Христа́ ра́ди смире́нно подъя́л еси́./ Те́мже ны́не, святи́телю о́тче Зино́вие,/ во оби́тели Небе́сныя всели́вся,// моли́ спасти́ся душа́м на́шим.

И ны́не, глас то́йже:

Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя. Апо́стол ко Ефесе́ем, зача́ло 233. Аллилу́ия, глас 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни. Ева́нгелие от Луки́, зача́ло 64. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О свяще́нная главо́, святи́телю и испове́дниче Христо́в Зино́вие, па́стырю до́брый, Гли́нския пу́стыни воспита́ние и Це́ркве Святы́я украше́ние! Ты, во́ли Бо́жией во всем повину́яся, послуша́ние, смире́ние, терпе́ние, разсужде́ние и непреста́нную моли́тву во и́ночестем житии́ стяжа́л еси́, наипа́че же и́стинныя любве́ испо́лнен быв, вся́кою доброде́телию себе́ украси́л еси́. Помози́ и нам путе́м сим ше́ствовати и восхожде́ния к Бо́гу в се́рдце свое́м полага́ти. О испове́дниче Христо́в непоколеби́мый! Ты во дни гоне́ний лю́тых в земли́ на́шей, преще́ний мучи́телей безбо́жных не убоя́вся, ве́ру правосла́вную небоя́зненно испове́дал еси́, любо́вию же ко Христу́ распаля́емь, темни́чное заключе́ние и мно́гия боле́зни безро́потне претерпе́л еси́. Укрепи́ и нас во мно́зех обстоя́ниих сло́вом и житие́м правосла́вную ве́ру тве́рдо испове́дати. О при́сный наш засту́пниче и те́плый моли́́твенниче! Ты во дни брани свяще́нныя во Оте́честве на́шем покая́нную моли́тву Бо́гу возноси́вый, и равноапо́стольную Ни́ну за погиба́ющия лю́ди сле́зно Спа́су Христу́ моля́щуюся узре́вый, научи́ и нас во дни лю́тых испыта́ний, я́ко наказа́ние Бо́жие за грехи́, сия́ разуме́ти, плода́ми же покая́ния и сле́зными моли́твами на ми́лость Го́спода приклоня́ти. О богому́дрый и преди́вный святи́телю! Ты Про́мыслом Бо́жиим едине́нию Церкве́й послужи́вый, и чу́дным о́бразом первоиера́рха Це́ркве Александри́йския от беды́ изба́вивый, моли́ ны́не Христа́ Пастыренача́льника о благостоя́нии Святы́х Бо́жиих Церкве́й и соедине́нии всех, по сло́ву Госпо́дню, да вси еди́но бу́дут. О чадолюби́вый и му́дрый наста́вниче! Ты, святи́тельское служе́ние вку́пе со ста́рческим дарова́нием усе́рдно соверша́я, первосвяти́телей и архипа́стырей собесе́дник, и подви́жников благоче́стия сотаи́нник был еси́. И ны́не наставля́й на путь спасе́ния всех, с ве́рою к тебе́ притека́ющих и любо́вию святу́ю па́мять твою́ почита́ющих. О избра́нниче и уго́дниче Бо́жия Ма́тере! Ты во уде́ле Ея́ И́верстем подвиза́выйся и явле́ния от Нея́ сподо́бивыйся, научи́ и нас всеми́лостивую Влады́чицу, я́ко пе́рвую о нас пред Бо́гом Хода́таицу, благода́рно велича́ти и арха́нгельское пе́ние Ей при́сно возглаша́ти. Ей, уго́дниче Бо́жий, святи́телю Христо́в Зино́вие! Днесь предстоя́ Престо́лу Святы́я Тро́ицы, помога́й нам те́плым твои́м оте́ческим заступле́нием, да, изба́вльшеся осужде́ния в день Стра́шнаго Суда́, сподо́бимся вку́пе с тобо́ю и все́ми святы́ми во Ца́рствии Небе́снем прославля́ти пречестно́е и великоле́пое и́мя Отца́, и Сы́на, и Свята́го Ду́ха, во ве́ки веко́в. Ами́нь.