Тропарь, кондак и молитва святителю Серафиму, архиепископу Богучарскому

Ме́сяца февраля́ в 13-й день
Святи́теля Серафи́ма, архиепи́скопа Богуча́рскаго

Тропа́рь, глас 4:

Боже́ственною ре́вностию при́сно распала́емь,/ Правосла́вия столп яви́лся еси́/ в Софи́и гра́де возсия́в,/ и благоче́стием твои́м мно́гия лю́ди ко Христу́ приве́л еси́,/ па́стырю до́брый, святи́телю Серафи́ме,// моли́ Христа́ Бо́га, спасти́ся душа́м на́шим.

Ин тропа́рь, глас 5:

Сосу́д Боже́ственных даро́в/ и дом Святы́я Тро́ицы яви́лся еси́,/ чудотво́рче святи́телю о́тче Серафи́ме,/ те́мже, име́я дерзнове́ние ко Го́споду,/ не оста́ви нас си́рых,/ и я́коже обеща́лся еси́,/ испроси́ нам моли́твами твои́ми// мир и ве́лию ми́лость.

Конда́к, глас 4

Подо́бен: Вознесы́йся на Крест:

Вознесы́йся на высоту́ смиренному́дрия,/ благоче́стия учи́тель яви́лся еси́,/ Правосла́вия побо́рниче и стра́нных предста́телю,/ мона́шествующих похвало́ и па́стырю изря́дный./ Те́мже любо́вию зове́м ти:// ра́дуйся, Серафи́ме чудотво́рче.

Моли́тва

О чудотво́рче преди́вный, святи́телю о́тче Серафи́ме! Ты, еще́ жив сый, рекл еси́ ве́рным: я́ко а́ще улучу́ дерзнове́ние у Го́спода, не оста́влю вас си́рых. Сего́ ра́ди, помина́юще глаго́лы твоя́ и дела́ милосе́рдия твоего́ в жи́зни вре́менней, любо́вию припа́даем и усе́рдно про́сим: моли́ся непреста́нно у Престо́ла Царя́ Сла́вы о всех нас, бли́жних и да́льних, при́сных и стра́нных, немощны́х и гре́шных, любо́вию почита́ющих тя. Ты от младе́нства благода́тию Бо́жиею просвеще́н был еси́, в ю́ности же ум соверше́нный стяжа́в, ю́ноши и де́вы умудри́л еси́. Дости́гше же му́жеска во́зраста, усе́рдный де́латель Боже́ственных доброде́телей яви́лся еси́. Сего́ ра́ди утверди́ и нас во благоугожде́нии Бо́гу и, я́ко па́стырь до́брый, и́же изря́дно о́вцы Христо́вы упа́сл еси́, наста́ви нас на путь покая́ния. Я́ко свети́льник Све́та И́стиннаго просвети́ нас и сохрани́ от заблужде́ний и собла́знов ми́ра сего́, и я́ко чудотво́рец ди́вный не преста́й явля́ти ми́лость свою́ всем с любо́вию притека́ющим к тебе́. Па́стырю до́брый, не оста́ви па́ству, в зе́млях Бо́лгарской и Ру́сской и и́нуде су́щую. Бу́ди ско́рый помо́щник призыва́ющим тя от всех конце́в земли́, да просла́вится неизрече́нное милосе́рдие Пастыренача́льника и Го́спода на́шего Иису́са Христа́, при́сно прославля́емаго и спокланя́емаго со Безнача́льным Его́ Отце́м, и Всесвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.