Тропарь, кондак и молитва преподобным Геннадию и Никифору Важеозерским

Ме́сяца февраля́ в 9-й день
Преподо́бных Генна́дия и Ники́фора Важеезе́рских

Тропа́рь глас 1:

Сла́ву ми́ра сего́ презре́вше, преподо́бнии,/ пусты́нное житие́ возлюби́ли есте́,/ ду́ши же Бо́гу до́бре повину́вше,/ посто́м, бде́нием и моли́твою де́моны препобеди́ли есте́/ и, житию́ а́нгельскому непоро́чно поревнова́вше,/ на Небесе́х мзду трудо́в ва́ших восприя́ли есте́./ Сла́ва да́вшему вам кре́пость,/ сла́ва венча́вшему вас,// сла́ва де́йствующему ва́ми всем исцеле́ния.

Конда́к, глас 4:

Жите́йское мо́ре по́двиги ва́шими невла́жно проше́дше,/ кре́пкаго приста́нища Христо́ва дости́гли есте́,/ иде́же Престо́лу Пресвяты́я Тро́ицы предстоя́ще,/ Ники́форе и Генна́дие богому́дрии,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Моли́тва

О пресла́внии и преди́внии уго́дницы Бо́жии, Ники́форе и Генна́дие Важеезе́рстии, се́верныя Фиваи́ды дво́ице достосла́вная! Вы, в преде́лех земли́ Олоне́цкия пресла́вно возсия́вше, сию́ по́двиги ва́шими освяти́ли есте́. Бу́дите всем нам покро́в и огражде́ние, скорбя́щим утеше́ние, неду́гующим исцеле́ние, путеше́ствующим и по мо́рю пла́вающим управле́ние, заключе́нным в темни́цах ско́рое свобожде́ние, в по́двизех и гоне́ниих су́щим терпе́ние и поможе́ние, и всем христиа́ном прибе́жище и заступле́ние, да вы́ну сла́вим просла́вльшаго вас Бо́га во ве́ки веко́в. Ами́нь.