Тропарь, кондак и молитва преподобномученицам Сходненским Наталии (Баклановой), Екатерине (Константиновой) и Елене (Коробковой)
Ме́сяца ма́рта в 18-й день
Собо́р преподобному́чениц Схо́дненских
Ната́лии, Екатери́ны и Еле́ны
Тропа́рь, глас 4:
Приспе́ день све́тлаго торжества́,/ земля́ Моско́вская ра́дуется,/ наипа́че же лю́дие Схо́дненстии духо́вно торжеству́ют,/ прославля́юще вас, преподобному́ченицы Ната́лие, Екатери́но и Еле́но./ Вы бо, ду́ши своя́ за ве́ру Христо́ву положи́вше,/ венцы́ му́ченическими украси́лися есте́,/ сего́ ра́ди, Престо́лу Святы́я Тро́ицы ны́не предстоя́ще,/ душа́м на́шим мир испроси́те// и ве́лию ми́лость.
Конда́к, глас 3:
Восхва́лим днесь тро́ицу преподобному́чениц Схо́дненских,/ во хра́ме Святы́я Тро́ицы усе́рдно подвиза́вшихся,/ в годи́ну же лю́тых искуше́ний/ ве́ру правосла́вную пред мучи́тели испове́давших/ и кровь свою́ за Христа́ пролия́вших./ Сего́ ра́ди страстоте́рпицам Христо́вым воспои́м:/ ра́дуйтеся, Ната́лие, Екатери́но и Еле́но,/ ве́си Схо́дни засту́пницы богодарова́нныя// и моли́твенницы о душа́х на́ших.
Моли́тва
О святы́я и всехва́льныя неве́сты Христо́вы, преподобному́ченицы Ната́лие, Екатери́но и Еле́но! Вы, от ю́ности Бо́га возлюби́вше, Тому́ еди́ному служи́ти восхоте́ли есте́ и, мона́шеский путь ко спасе́нию избра́вше, в труде́х и моли́твах усе́рдно подвиза́лися есте́. Егда́ же прии́де вре́мя лю́тых гоне́ний на ве́ру правосла́вную и безбо́жнии разори́ша оби́тели ва́ша, призва́ Госпо́дь вас в весь Схо́дненскую, во храм Святы́я Тро́ицы, иде́же усе́рдно подвиза́лися есте́, по́слежде и вене́ц му́ченичества восприя́ли есте́. Те́мже, предстоя́ще пред честны́м о́бразом ва́шим, хва́лим, сла́вим и велича́ем просла́вльшаго вас Го́спода, Ему́же вы с ли́ки новому́чеников Це́ркве Ру́сския ны́не предстои́те, и уми́льно вопие́м: О святы́я му́ченицы! Моли́те Всеблага́го Бо́га, да низпо́слет нам ми́лости Своя́ бога́тыя и в правосла́вней ве́ре нас утверди́т, неве́рующих вразуми́т, отпа́дших от Це́ркве на путь И́стины обрати́т, весь же на́шу Схо́дню и вся ве́си и гра́ды Росси́йския от вся́каго зла сохрани́т, да ти́хое и ми́рное житие́ поживе́м во вся́ком благоче́стии и чистоте́, и сподо́бимся вку́пе с ва́ми прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную, в безконе́чныя ве́ки. Ами́нь.
