Служба преподобному Иову Анзерскому

Ме́сяца ма́рта в 6-й день
и ме́сяца ма́я в 29-й день (обре́тение моще́й)
Преподо́бнаго И́ова А́нзерскаго

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1:

О́тче достоблаже́нне И́ове,/ ты, страсте́м Христо́вым покланя́яся,/ безстра́стием ду́шу украси́л еси́,/ си́лою же Боже́ственною окриля́емь,/ на высоту́ доброде́телей возлете́л еси́/ и безпло́тных собесе́дник любе́знейший яви́лся еси́./ С ни́миже ны́не, предстоя́ Престо́лу Всевы́шняго Царя́,// моли́ спасти́ся душа́м на́шим.

О́тче преподо́бне И́ове,/ ты, изгна́ние пра́вды ра́ди претерпе́в,/ пусты́нным и по́стническим житие́м Царю́ Небе́сному угоди́л еси́/ и преподо́бных сосло́вия сокро́вище многоце́нное яви́лся еси́,/ безмо́лвия до́брый рачи́телю,/ чистоты́ усе́рдный храни́телю,/ Госпо́день та́йный собесе́дниче// и дерзнове́нный о нас к Тому́ моли́твенниче.

О́тче преблаже́нне И́ове,/ нестяжа́ние возлюби́в и вся име́ния тле́нная оста́вив,/ Христа́ ра́ди обнища́л еси́,/ И́же обогати́ тя дарова́нии Ду́ха Свята́го/ и в Ца́рствии Свое́м со святы́ми просла́ви./ Те́мже, припа́дающе твое́й бла́гости, уми́льно про́сим,// моли́ и нам сонасле́дником жи́зни ве́чныя бы́ти.

От жи́зни вре́менныя к жи́зни ве́чней преходя́,/ утеша́л еси́ бра́тию, преподо́бне:/ разлуча́яся с ва́ми теле́сне,/ ду́хом при́сно с ва́ми пребу́ду,/ мир име́йте в сердца́х ва́ших,/ в послуша́нии свое́м богоуго́дно вы́ну пребыва́йте,/ никогда́же ме́ста сего́ самово́льне отлуча́ющеся,// любве́ ра́ди ко Христу́ и ко бра́тии по Бо́зе.

Сла́ва, глас 8:

Днесь соше́дшеся, бра́тие,/ восхва́лим преподо́бнаго отца́,/ достоблаже́ннаго И́ова,/ и́же, в по́двизех по́стнических просия́в/ и Го́споду Иису́су сораспя́вся,/ житие́ свое́ богоуго́дне сконча́./ Те́мже, досточу́дне о́тче,/ ве́лие дерзнове́ние име́я ко Святе́й Тро́ице,// моли́ поми́ловатися душа́м на́шим.

И ны́не, Богоро́дичен: Царь Небе́сный:

Вход. Проки́мен дне. Чте́ния три преподо́бническая.

На лити́и стихи́ры, глас 4:

Преблаже́нне о́тче И́ове,/ ты, от ю́ности безмо́лвие возлюби́в,/ в ми́ре я́ко в пусты́ни пожи́л еси́,/ тем и Госпо́дь тя от ца́рских удо́лий взем,/ во оби́тель Солове́цкую пресели́/ и во ото́це А́нзерстем приста́нище ти́хое ти дарова́./ Иде́же, усе́рдно Бо́гу порабо́тав,/ о́чи твоя́ духо́вныя просвети́л еси́/ и, пото́ки сле́зными ду́шу омы́в,/ во оби́тели Небе́сныя путь себе́ угото́вал еси́./ Ны́не же, предстоя́ Престо́лу Царя́ Сла́вы,// моли́ поми́ловатися душа́м на́шим.

Исто́чник воды́, теку́щия в жизнь ве́чную,/ оби́лен в тебе́ яви́ся, о́тче И́ове,/ благода́ть бо Ду́ха неоску́дно источа́л еси́,/ те́мже и исто́чник воды́ на потре́бу оби́тели у Бо́га испроси́л еси́,/ И́же пра́веднаго ра́ди жития́ твоего́/ и мно́гия ины́я щедро́ты пу́стыни твое́й дарова́./ Сего́ ра́ди мо́лим тя, преподо́бне:/ источи́ и нам сицеву́ю во́ду,// от нея́же, пию́ще, улучи́м живо́т ве́чный.

Сла́ва, глас то́йже:

Служи́телю Боже́ственных Та́ин благогове́йный,/ ты, с тре́петом предстоя́ Престо́лу Госпо́дню,/ в Небе́сныя кро́вы ду́хом простира́лся еси́,/ мы же, зря́ще Христа́, священноде́йствующа в тебе́,/ усе́рдно ны́не про́сим тя:/ помози́ и нам, о́тче преподо́бне И́ове,/ досто́йно Христо́вых Та́ин причаща́тися// и Ца́рствия Небе́снаго дости́гнути.

И ны́не, Богоро́дичен: При́зри на моле́ния:

На стихо́вне стихи́ры, глас 2:

Я́ко луч Све́та И́стиннаго,/ возсия́л еси́, о́тче, в безмо́лвней пусты́ни,/ просла́вив ю́ Боже́ственною сла́вою,// тем и от Го́спода прия́л еси́ сла́ву неувяда́емую.

Стих: Честна́ пред Го́сподем// смерть преподо́бных Его́.

Да́нный ти тала́нт приумно́жив,/ плод стори́чный Го́сподеви прине́сл еси́,/ И́же освяти́ тя преподо́бием и пра́вдою,// и Ду́ха Свята́го жили́ще сотвори́.

Стих: Блаже́н муж боя́йся Го́спода,// в за́поведех Его́ восхо́щет зело́.

Ору́жием Бо́жиим вооружи́вся,/ вся ко́зни вра́жия сокруши́л еси́,/ гне́вом пра́ведным возненави́дев вся зла́я,// соверше́нною любо́вию просвети́лся еси́.

Сла́ва, глас 6:

Ра́дуйся, оби́теле Солове́цкая,/ ра́дуйся, пусты́не А́нзерская,/ иму́щи драгоце́ннаго би́сера,/ просвеща́ющаго ли́ки и́ноческия,/ приими́ исто́чника чистоты́ духо́вныя,/ излива́ющагося неоску́дно,/ воспо́й свети́льника ве́ры и ра́зума,/ преподо́бнаго отца́ на́шего И́ова,/ па́стыря до́браго и учи́теля,// и моли́твенника о душа́х на́ших.

И ны́не, Богоро́дичен: Творе́ц и Изба́витель:

Тропа́рь, глас 5:

Безмо́лвия и́стинный рачи́тель быв,/ в пусты́ню во ото́це А́нзерстем всели́лся еси́,/ преподо́бне о́тче И́ове,/ Страсте́м же Госпо́дним усе́рдне покланя́яся,/ и́мя Иису́сово в се́рдце непреста́нно носи́л еси́,/ пустынножи́телей му́дрый наста́вниче,// моли́ Христа́ Бо́га спасти́ся душа́м на́шим.

 

НА У́ТРЕНИ

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Ра́дуйся, Две́ре Госпо́дня непроходи́мая:

По 1-м стихосло́вии седа́лен, глас 2:

Селе́ния Небе́сная зело́ возлюби́в, преподо́бне о́тче,/ хле́бом сле́зным на всяк день пита́лся еси́/ и, за́поведи Госпо́дни ре́вностне исполня́я,/ хлеб нужда́ющимся ми́лостивно раздава́л еси́./ Сего́ ра́ди мо́лим тя,/ да и мы, твои́м заве́том после́дующе,/ покая́нию поревну́ем и милосе́рдие возлю́бим.

Сла́ва, и ны́не, Богоро́дичен, глас то́йже:

Возжеле́ Царь царе́й добро́ты Твоея́, Пречи́стая,/ вся́кия бо святы́ни вмести́лище яви́лася еси́,/ де́вствующая Ма́ти Христа́ Бо́га на́шего./ Моли́ся о нас к Ро́ждшемуся из Тебе́,/ да во приста́нище благооти́шное упра́вит ду́ши на́ша/ и, милосе́рдствуя, пода́ст грехо́в проще́ние.

По 2-м стихосло́вии седа́лен, глас 4:

На Го́спода упова́я,/ вся́кия печа́ли пучи́ну преплы́л еси́/ и, мертв быва́я мяте́жу мирски́х страсте́й,/ жизнь ве́чную унасле́довал еси́./ Сподо́би и нас, преподо́бне, в тягота́х и ско́рбех не стужа́ти си,/ но разуме́ти я́ поле́зны бы́ти ко спасе́нию.

Сла́ва, и ны́не, Богоро́дичен, глас то́йже:

Пресла́вная глаго́лашася о Тебе́, Богоро́дице, Прему́дрости Бо́жия Сокро́вище ди́вное,/ упра́ви прему́дро стопы́ на́ша в зако́не Госпо́дни,/ бу́рю помышле́ний уста́ви,/ се́рдца мяте́ж укроти́/ и наде́ждою ра́дости ве́чныя просвети́ ду́ши на́ша.

По полиеле́и седа́лен, глас 5:

Путь приско́рбный возлюби́в,/ преподо́бнически подвиза́лся еси́, досточу́дне о́тче И́ове,/ и, упова́ние непоколе́блемо на Го́спода возложи́в,/ ра́дость ве́чную насле́довал еси́./ По пра́ведному житию́ твоему́ честна́ кончи́на твоя́ бысть/ и со святы́ми водворе́ние.

Сла́ва, и ны́не, Богоро́дичен, глас то́йже:

Ма́ти Бо́жия, Влады́чице,/ Рождество́м Твои́м освяти́вшая род челове́ческий,/ сия́нием Небе́сныя Твоея́ сла́вы осия́й нас/ и, теплото́ю Боже́ственныя любве́ согрева́ющи,/ ду́ши на́ша хра́мы Бо́жия соде́лай.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ се́рдце твое́ храм Ду́ху Влады́чню угото́вав,/ глаго́лом Госпо́дним неусы́пно внима́л еси́/ и, смире́нием и кро́тостию украси́вся,/ в послуша́ние Бо́жие себе́ повину́л еси́,/ те́мже моли́ о нас Преблага́го Бо́га,/ Его́же возлюби́ душа́ твоя́,/ да отве́рзет нам две́ри покая́ния// и спасе́т ду́ши на́ша.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

И́ове преподо́бне,/ проле́й моли́тву твою́ ко Христу́ Бо́гу,/ да сподо́бит мя, недосто́йнаго, песнь хвале́бную тебе́ воспе́ти/ и по́двиги твоя́ досто́йно просла́вити.

От ю́ности Бо́га возлюби́в, блаже́нне,/ до конца́ Тому́ порабо́тал еси́/ и, благода́тию Того́ обогати́вся,/ мно́гия духо́вныя да́ры приходя́щим раздава́л еси́.

Ви́дя Госпо́дь от младе́нства ре́вность твою́,/ чи́на иере́йскаго удосто́и тя, преподо́бне,/ и па́стве твое́й во спасе́ние дарова́,/ я́ко служи́теля благогове́йна и моли́твенника те́пла.

Богоро́дичен: Не и́мам словесе́ досто́йнаго просла́вити Тя, Богоро́дице,/ ни ра́зума воспе́ти Тя, Влады́чице,/ но то́кмо в ско́рбех усе́рдно вопию́ Ти:/ изба́ви мя рабо́ты вра́жия/ и в не́мощи мое́й Помо́щница ми бу́ди.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Еще́ сый в ми́ре,/ по́стническому житию́, моли́тве и богомы́слию прилежа́л еси́, досточу́дне,/ целому́дрием же укра́шен,/ чистото́ю души́ твоея́ Бо́гови прибли́жился еси́./ Моли́ Того́ усе́рдно, вся́кия скве́рны нам изба́витися.

Благода́ть смире́нием и ве́рою стяжа́в,/ тишину́ и ра́дость души́ твое́й обре́л еси́/ и, благодаре́ние вознося́ Царю́ Небе́сному,/ от си́лы в си́лу восходи́л еси́, преподо́бне.

Пе́нием благоле́пным Го́спода прославля́я,/ мно́гия лю́ди сла́дким гла́сом твои́м во умиле́ние приводи́л еси́, И́ове преблаже́нне,/ и, усе́рдне боже́ственную слу́жбу соверша́я,/ те́плыя моли́твы за па́ству твою́ возноси́л еси́.

Богоро́дичен: Ма́ти Бо́жия Пречи́стая,/ преподо́бным похвало́ и утвержде́ние,/ душ святы́х Невестокраси́тельнице сла́вная,/ моли́ со преподо́бным И́овом Сы́на Твоего́, Христа́ Бо́га на́шего,/ вся́кия грехо́вныя скве́рны нам совлещи́ся/ и слеза́ми покая́ния омы́тися.

Седа́лен, глас 2:

Земна́я оста́вль, Небе́сная обре́л еси́,/ пло́тию обложе́н, безпло́тным подо́бился еси́, свя́те И́ове,/ Боже́ственным же Ду́хом просвеще́н,/ сердца́ челове́ков прозрева́л еси́./ Ны́не, я́ко звезда́, сия́еши на Небеси́ и зри́ши сла́ву Святы́я Тро́ицы,/ Ю́же моли́, преподо́бне,/ да исцели́т не́мощи на́ша/ и сподо́бит Ца́рствия Своего́.

Сла́ва, и ны́не, Богоро́дичен:

Истаява́ет се́рдце мое́, Пречи́стая,/ тща́щееся воспе́ти непости́жную та́йну Рождества́ Твоего́,/ Сло́во бо О́тчее несказа́нно во утро́бу Твою́ вмести́ла еси́,/ и Ма́ти спасе́ния яви́лася еси́ нам.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Моли́твенниче пла́менный, та́йный с Бо́гом собесе́дниче/ и Ду́ха Боже́ственнаго соприча́стниче, преподо́бне о́тче И́ове!/ Ты, слеза́ми лице́ свое́ ороша́я,/ из глуби́ны серде́чныя взыва́л еси́: Го́споди, поми́луй мя!/ Испроси́ и нам твое́ю моли́твою благода́ть Его́ и ми́лость.

Любве́ Христо́вы испо́лнено бе чи́стое се́рдце твое́, досточу́дне,/ бли́жния твоя́ па́че себе́ возлюби́вый,/ зло́бы чуждь быв и мще́ния,/ благодея́нии мно́гими лю́дем угожда́л еси,/ ра́дуяся о вся́кой души́ христиа́нстей.

Не оскуде́ десни́ца твоя́, пита́вшая а́лчущих,/ ниже́ преста́ по́мощь твоя́ стра́ждущим и обремене́нным,/ сло́во твое́ благода́тное малоду́шным ве́ры утвержде́ние бы́сть,/ всем бо подава́л еси́, о́тче, душеполе́зная.

Богоро́дичен: К Тебе́ простира́ю ру́це мои́, Предста́тельнице всем христиа́ном,/ и из глубины́ взыва́ю:/ уте́ши мя в печа́ли мое́й,/ мучи́тельства страсте́й изба́ви,/ Све́том Боже́ственным мрак души́ моея́ просвети́/ и прегреше́ния моя́ прости́ ми, Ма́ти Де́во.

Песнь 5

Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Уве́дев царь земны́й добро́ту твою́ духо́вную, о́тче И́ове,/ избра́ тя наста́вника себе́,/ му́дростию твое́ю назида́яся,/ ты же со смире́нием ца́рское повеле́ние прие́м,/ си́рых и убо́гих попече́нием свои́м не оста́вил еси́,/ в простоте́ се́рдца служе́ние свое́ соверша́я.

Царю́ Небе́сному зело́ че́стен друг яви́лся еси́, преподо́бне,/ Той бо, я́ко зла́то в горни́ле, очи́сти тя испыта́нии кре́пкими./ За словеса́ Госпо́дня ве́рою тве́рдою сохрани́л еси́ пути́ же́стоки, о́тче,/ исполня́яся благи́х преизоби́льно.

За́вистию вра́жиею,/ уничиже́н был еси́ клевето́ю челове́ческою, И́ове,/ изгна́н бо от оте́ческаго гра́да быв,/ во стране́ полу́нощней обре́л еси́ приста́нище/ во оби́тель и́ноческую пресели́вся.

Богоро́дичен: От ю́ности моея́ Го́спода грехопаде́нии прогне́вах,/ не и́мам дерзнове́ния к Тому́, дел бо, досто́йных покая́ния, не сотвори́х,/ оба́че Еди́ну Тебе́ стяжа́х Спору́чницу спасе́ния моего́, Пренепоро́чная,/ Ты в тесноте́ и ско́рби помози́ ми,/ да ско́рби вре́менныя прие́мля в житии́ мое́м,/ муче́ния ве́чнаго избе́гну.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Егда́ всели́лся еси́ в кинови́ю, о́тче И́ове,/ по́стническим житие́м бра́тию удиви́л еси́,/ и́гу Христо́ву смире́нно подклоня́яся,/ те́мже Христо́с ри́зою ра́дования украси́ тя,/ путь преподо́бия и кончи́ну че́стну ти уготовля́я.

Словеси́ Госпо́дню неуста́нно поуча́шеся се́рдце твое́ чи́стое,/ Ду́хом бо Святы́м душа́ твоя́ при́сно жива́ бе,/ благода́ть смире́нием стяжа́л еси́, прему́дре,/ Ца́рству Бо́жию, еще́ на земли́ сый, я́ко небожи́тель приобща́яся.

Безмо́лвия ча́яше душа́ твоя́, блаже́нне, и Бо́гу предстоя́ния несмуща́емаго./ Сего́ ра́ди во ото́к А́нзерский всели́лся еси́,/ иде́же предте́ча твой, Елеаза́р богому́дрый, первонача́льник ски́тский,/ вдохнове́нныя Бо́гу моли́твы принося́,/ дара́ми боже́ственныя благода́ти пусты́ню освяти́л есть.

Богоро́дичен: Пучи́ну беззако́ний мои́х в пучи́не милосе́рдия Твоего́ потопи́, Пречи́стая,/ бу́рю страсте́й мои́х разгоня́ющи,/ и на стези́ покая́ния наста́ви мя.

Конда́к, глас 8:

Боже́ственная восхожде́ния в се́рдце стяжа́в,/ и́хже ра́ди мно́ги ско́рби претерпе́л еси́,/ приста́нище обре́л еси́ в морсте́м ото́це,/ преподо́бнаго Елеаза́ра прее́мник заве́тов быв,/ Покро́вом Бо́жия Ма́тере осеня́емь,/ достоблаже́нне о́тче И́ове,// помина́й нас чту́щих святу́ю па́мять твою́.

И́кос:

От ю́ности избра́нник Бо́жий яви́лся еси́,/ и Того́ путе́м после́довал еси́ невозбра́нно,/ гоне́ния, поноше́ния и ско́рби не поколеба́ша тя, преподо́бне,/ ве́рою Христо́вою окриля́ема./ Те́мже от ца́рских черто́гов отве́ржен быв,/ во оби́тель Солове́цкую преселе́ние я́ко от Десни́цы Бо́жия восприя́л еси́,/ устреми́лся еси́ к пусты́нному ото́ку А́нзерскому,/ иде́же дух твой, безмо́лвия ча́я, жела́емое обре́те./ та́можде и повеле́ние Бо́жия Ма́тере прие́м,/ оби́тель Распя́тию Сы́на Ея́, Христа́ Бо́га на́шего, воздви́гл еси́./ Сего́ ра́ди по́двиг любве́ и милосе́рдия в подража́ние Го́споду до конца́ испо́лнивый,/ во оби́телех Боже́ственныя Любве́ ны́не пребыва́еши,/ достоблаже́нне о́тче И́ове, помина́й нас чту́щих святу́ю па́мять твою́.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Ски́тскаго жития́ нача́льник яви́лся еси́, преподо́бне о́тче И́ове,/ в доброде́телех и́ноков наставля́я,/ наипа́че свято́е послуша́ние блюсти́ увещава́я:/ И та́ко оте́ческою любо́вию чад духо́вных окормля́л еси́,/ попече́нием о па́стве твое́й заве́т Христо́в исполня́яй.

Покая́ния пропове́дниче и Ца́рствия Небе́снаго насле́дниче!/ Ты, на кончи́ну жития́ своего́ и на час Стра́шнаго суда́ взира́я,/ сокруше́нныя моли́твы Распя́тому за ны возноси́л еси́,/ смире́нными слеза́ми ду́шу омыва́яй.

Служе́нию лю́дем па́че пре́жняго посвяти́л еси́ себе́, преподо́бне,/ попече́нию о боля́щих вельми́ прилежа́в,/ на ра́ны их еле́й возлива́я, любо́вию Христо́вою неду́ги цели́л еси́./ Те́мже и мы, грехо́вными я́звами ура́нени,/ во благовре́менную по́мощь тя призыва́ем.

Богоро́дичен: Напа́стьми лю́тыми бори́мь, и стрела́ми вра́жиими уязвля́емь,/ во гно́ищи грехо́в мои́х лежу́, стеня́й,/ но Ты, Влады́чице, терпе́ние мое́ и упова́ние,/ от волн безме́рных искуше́ний изми́ мя/ и во страда́ниих пода́ждь ми утеше́ние.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Ду́хом приобща́яся Страда́нием Госпо́дним,/ посто́м и бдением моли́твенным пло́ть свою́ удруча́л еси́, преподо́бне,/ и се́рдце всено́щными моле́нии усоверша́л еси́,/ о́ком же приснобо́дренным та́йны Боже́ственныя созерца́я, Ду́ху Свято́му оби́тель непоро́чну себе́ сотвори́л еси́.

Вострепета́ душа́ твоя́ свята́я, и возра́довашася смире́нныя ко́сти твоя́, блаже́нне,/ егда́ Влады́чица Всепе́тая в виде́нии яви́ся ти вку́пе с Елеаза́ром чу́дным,/ повелева́ющи оби́тель Распя́тию Сы́на Ея́, Христа́ Бо́га на́шего, воздви́гнути/ и спаси́тельныя Стра́сти Его́ всече́стно просла́вити.

Друга́я Голго́фа гора́ нарече́ся,/ иде́же юдо́ль после́дняя земна́го по́прища твоего́ бысть, И́ове прему́дре,/ сия́ бо труды́ усе́рдными твои́ми и воздыха́нии сле́зными,/ попече́нием Пресвяты́я Богоро́дицы храни́ма,/ во вся́кой святы́ни и пра́вде процвела́ есть.

Богоро́дичен: Жезл си́лы стяжа́вше, Крест Сы́на Твоего́, Богоро́дице,/ тем низлага́ем вра́жия шата́ния,/ любо́вию Тя непреста́нно велича́ющии.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Благоче́стнаго жития́ твоего́, о́тче, ра́ди,/ исто́чник воды́ преизоби́лен даде́ся на потре́бу оби́тели твое́й от Пресвяты́я Богоро́дицы,/ ку́пно же и дар прозре́ния и неду́гов исцеле́ния тебе́ от Бо́га дан бысть./ Те́мже мо́лим тя: исцели́ не́мощи на́ша душе́вныя вку́пе и теле́сныя.

Любо́вию Христо́вою испо́лнено бысть се́рдце твое́, преподо́бне И́ове,/ е́юже вы́ну му́дро врачева́л еси́ поро́ки людски́я./ Егда́ бо та́тие приидо́ша восхи́тити плоды́ трудо́в бра́тских, и Бо́гом нака́зани бы́ша,/ Того́ умоли́в, разреше́ние им испроси́л еси́,/ и трудо́м покая́нным на путь пра́веднаго жития́ наста́вил еси́ я́.

Во гла́се ра́дования а́нгельскаго прехожда́ше душа́ твоя́, блаже́нне, от оби́тели земны́я во оби́тели ве́чныя,/ вся бо испо́лнил еси́ от Го́спода ти повеле́нная,/ никогда́же во́ли Его́ преслу́шав./ И ны́не предстоя́ Престо́лу Всесвяты́я Тро́ицы, вку́пе с новому́ченики Солове́цкими,/ возноси́ о нас моле́ния усе́рдно.

Богоро́дичен: Я́ко испра́вила еси́ пре́жде разсла́бленнаго,/ та́ко и нас, душе́ю и те́лом разсла́бленных, те́плым Твои́м предста́тельством испра́ви,/ да пое́м при́сно вели́чия Твоя́.

Свети́лен:

Свети́льниче, Ду́хом Святы́м возжже́нный,/ в по́двизех сла́вных пожи́л еси́, о́тче, ми́ру светя́,/ прича́стники Све́та Боже́ственнаго ученики́ твоя́ сотворя́я,/ моли́, преподо́бне, Светода́теля Го́спода/ тьмы греха́ и неве́дения нам избежа́ти,/ и во све́тлостех повеле́ний Госпо́дних ходи́ти.

Сла́ва, и ны́не, Богоро́дичен:

Ма́ти Све́та Невече́рняго,/ Свети́ло светоза́рнаго сия́ния,/ Богове́дения све́том серде́чная очеса́ на́ша просвети́,/ да иму́ще свети́льники при́сно горя́щия,/ угото́вим себе́ в сре́тение Жениху́ Христу́,/ И́же мра́ка нощна́го нас изба́вит,/ день незаходи́мый нам да́рует,/ и сы́ны Све́та Своего́ сотвори́т.

На хвали́тех стихи́ры, глас 4:

Кий язы́к изрещи́ возмо́жет по́двиги твоя́, преподо́бне,/ воздержа́нием бо те́ло твое́ увяди́л еси́,/ житие́м же, сло́вом, любо́вию и ду́хом,/ ве́рою и чистото́ю серде́чною,/ вся́кия доброде́тели ви́д испра́вил еси́/ и ду́шу твою́ за дру́ги полага́л еси́./ Те́мже мо́лим тя:/ грехо́вную пре́лесть от серде́ц на́ших отжени́// и в любви́ Госпо́дни нас утверди́.

О́тче преподо́бне И́ове,/ Ду́ха Свята́го сосу́де избра́нный,/ ты, Боже́ственныя любве́ сла́достию уя́звлен,/ посеще́ния Бо́жия Ма́тере сподо́бился еси́,/ Я́же повеле́ ти оби́тель и́ноческую созда́ти/ на прославле́ние во́льныя стра́сти Христа́ и Бо́га на́шего,/ спасе́ния на́шего ра́ди распе́ншагося// и Воскресе́ние нам дарова́вшаго.

Гора́, я́же пре́жде и́мене не иму́щая,/ сла́вою неувяда́емою увенча́ся/ и втора́я Голго́фа от Ма́тере Бо́жия нарече́ся/ Страда́ний ра́ди во́льных Сы́на Ея́, Спа́са на́шего,/ и му́ченик ра́ди, зде в после́дняя времена́ возсия́вших./ Сего́ ра́ди ра́дуются ве́рнии и пра́здник составля́ют, вопию́ще Христу́ Бо́гу:// му́чеников похвала́ и побе́да Ты еси́, Всеси́льне.

Сме́ртный час во уме́ и се́рдце при́сно созерца́я/ и день Су́дный па́мятствуя,/ боле́зненне воздыха́л еси́, о́тче,/ и покая́нными слеза́ми ду́шу твою́ омыва́л еси́./ Те́мже сподо́би и нас пла́чем о гресе́х свои́х/ ми́лость Бо́жию стяжа́ти// и безпреткнове́нно в Ца́рство Небе́сное вни́ти.

Сла́ва, глас 8:

Предава́я чи́стую ду́шу твою́ в ру́це Бо́жии,/ умиле́нно взыва́л еси́, о́тче:/ приими́, Преблаги́й Го́споди, в ми́ре дух раба́ Твоего́,/ от младе́нства Тебе́ еди́наго возжеле́вшаго/ и во́ли Твоея́ вы́ну ча́явшаго./ Рабо́в же Твои́х, и́хже во еди́но ста́до зде собра́л еси́,/ в послуша́нии и вся́ком доброде́лании наста́ви// и в ми́ре и единомы́слии сохрани́.

И ны́не, Богоро́дичен, глас то́йже:

Боле́зни души́ моея́ исцели́, Пренепоро́чная,/ си́лу на вра́жие ополче́ние ми да́руй,/ мою́ нечистоту́ Твое́ю святы́нею очи́сти,/ моле́ния сле́зная моя́ ко Го́споду напра́ви,// и о души́ мое́й пред Ним Предста́тельница бу́ди.

 

На Литурги́и слу́жба вся преподо́бническая.

Моли́тва

O преподо́бне и богоно́сне о́тче наш И́ове! Пусты́ни А́нзерския безмо́лвный обита́телю, обе́тов мона́шеских и́стинный ревни́телю, А́нгелов любе́зный собесе́дниче, и́ноков по Бо́зе ве́рный наста́вниче! Чу́дно житие́ твое́, неисчи́слими по́двизи твои́, ве́лие пред Бо́гом дерзнове́ние твое́! Мо́лим тя, избра́нниче Христо́в, посети́ немощству́ющия ду́ши на́ша, простри́ о нас те́плую к Бо́гу моли́тву твою́, огради́ заступле́нием твои́м оби́тель, тебе́ во изгна́нии прии́мшую и на безмо́лвие тебе́ подви́гшую. Ты неуста́нно в покая́нном пла́чи пребыва́вый, помози́ нам, погиба́ющим в нечу́вствии и окая́нстве, твои́м благода́тным предста́тельством отве́ргнутися вся́кия грехо́вныя скве́рны и плоды́ и́стиннаго покая́ния Го́споду принести́. Ты, украси́вый собо́ю сонм и́ноков солове́цких, украси́ на́ше ску́дное житие́, призыва́я на нас благослове́ние Бо́жие, да оста́вивше вся до́лу влеку́щая, обрати́м мы́сленная oчеса́ на́ша к Бо́гу и и́стинных Небе́сных благ наслади́мся. O досточу́дне И́ове, во смире́нии твое́м возвели́чивыйся и нището́ю твое́ю обогати́выйся! Умоли́ Христа́ Бо́га смире́нием ду́ши на́ша украси́ти, оскуде́вшая сердца́ на́ша Небе́сными дарова́нии испо́лнити. Сподо́би нас нищету́ Христо́ву возлюби́ти и стяжа́ния Еди́наго Ду́ха Свята́го в се́рдце свое́м при́сно жела́ти. Ты, до конца́ за́поведь Бо́жию о любви́ испо́лнивый, неду́гующим и стра́ждущим со усе́рдием вы́ну служи́вый и ве́лию любо́вь к лю́дем до после́дняго издыха́ния в се́рдце носи́вый, научи́ и нас сей вя́щшей доброде́тели, да излие́т Госпо́дь, я́ко от приснотеку́щаго исто́чника, в обнища́вшая сердца́ на́ша ка́пли Боже́ственнаго ми́ра Своея́ Боже́ственныя любве́. Ей, достоблаже́нне И́ове, моли́твенниче к Бо́гу усе́рднейший и благоприя́тнейший, глубино́ю серде́чною сокрове́нныя та́йны Бо́жия созерца́ти сподо́бивыйся, научи́ нас те́плая и сокруше́нная моле́ния к Тому́ простира́ти, и́мя Его́ Сладча́йшее в се́рдце при́сно благода́рно храни́ти. Мо́лим тя, преблаги́й о́тче, богоуго́днаго жития́ твоего́ ра́ди сподо́бившагося посеще́ния Ма́тере Бо́жия, и повеле́ние оби́тель Распя́тию Христа́ Бо́га созда́ти от Нея́ прии́мшаго, испроси́ нам твое́ю благомо́щною моли́твою Тоя́ те́плое заступле́ние и покро́в. Не отлуча́йся нас, раб твои́х, ве́рою тебе́ моля́щихся и во благовре́менную по́мощь тя призыва́ющих. Моли́ за Це́рковь на́шу и за оби́тели святы́я сия́, да процвета́ет в них святы́ня Госпо́дня, да не умолка́ет в земли́ на́шей глас воспева́ющих Бо́га, Емýже подоба́ет сла́ва, честь и поклоне́ние во ве́ки веко́в. Ами́нь.

И́на моли́тва

O преподо́бне о́тче И́ове, предста́телю наш к Бо́гу неусы́пный, моли́твенниче о душа́х на́ших дерзнове́нный, пусты́ни А́нзерския красото́ пресве́тлая, оби́тели Распя́тския си́ло духо́вная! Мно́гими труды́ тя, Бо́гу потруди́вшагося и к ли́ку и́ноческому приобщи́вшагося, сподо́би Пресвята́я Богоро́дица спаси́тельным Страсте́м Христо́вым послужи́ти, го́ру безмо́лвну, ю́же нарече́ Голго́фа, и́ноки насели́ти. О́на же процвете́ чу́дными по́двиги и по́стническим житие́м твои́м и учени́к твои́х, и благода́ть почи́ на ней, и сла́ва Небе́сная озари́ ю́. По́слежде же па́ки оправди́ся и́мя горе́ сей за мно́жество зде претерпе́вших гоне́ния и смерть ве́ры Христо́вы и пра́вды ра́ди, и сла́ва новому́ченников осия́ твою́ оби́тель, я́же ны́не от запусте́ния и поруга́ния воста́, иде́же и святы́я мо́щи твоя́ я́ко многоце́нное сокро́вище во хра́ме тобо́ю созда́ннем обрето́шася. Те́мже, предстоя́ще сей святы́ни, усе́рдно мо́лим тя, достоблаже́нне о́тче: помози́ нам достодо́лжное почита́ние Всечестна́го Креста́ Христо́ва име́ти, благодаре́ние серде́чное за ны распе́ншемуся Христу́ Бо́гу вы́ну приноси́ти, воскресе́ния наде́жду и упова́ние спасе́ния к Тому́ простира́ти и, крест жития́ своего́ взе́мше, путе́м Госпо́дним ше́ствовати. И́ночествующих сподо́би по́двигом до́брым подвиза́тися, и всем ве́рным испроси́ в за́поведех Бо́жиих хожде́ние, доброде́телей исполне́ние и Ца́рствия Небе́снаго присвое́ние, иде́же вси святи́и непреста́нно воспева́ют Всесвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.



-
Яндекс.Метрика
casino siteleri, bahis siteleri, canlı bahis, mobilbahis, artemisbet, tipobet, tipobet365, truvabet, bonus veren siteler canlı skor casino