Служба святителю Ионе Ханькоускому

Ме́сяца октября́ в 9-й день
Святи́теля Ио́ны, епи́скопа Ханько́ускаго

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 6, глас 6.

Подо́бен: Все отло́жше:

Похвало́ Козе́льска и Калу́ги сла́во,/ Каза́нскаго вертогра́да богосло́вия украше́ние/ и Маньчжу́рии па́стырю предо́брый,/ вся концы́ оте́чествия и разсе́яния ру́сскаго/ весе́лия боже́ственнаго исполня́еши,/ житие́м бо и писа́нии твои́ми утеша́еши/ и спасе́ния наде́жду подае́ши,/ изнемо́гших от язв грехо́вных благода́ти причаща́еши/ те́плым предста́тельством твои́м,// богому́дре Ио́но, святи́телю Христо́в.

Похва́льную песнь вопие́м ти,/ и́же о Ду́се Боже́ственнем сла́вный учи́телю,/ Писа́ний Боже́ственных сказа́телю преди́вный/ и суему́дренных обличи́телю доброу́мный,/ а́ще и словесы́ твои́ми наслади́хомся,/ оба́че в небреже́нии досе́ле пребыва́ем,/ но моли́ся о нас, богогла́сный Ио́но,/ да и житие́м после́дуем благи́м уче́нием,// и́миже от тебе́ наста́влени бы́хом.

Свято́е восприи́м постриже́ние,/ богоно́се Ио́но,/ в О́птину пу́стынь всели́лся еси́/ и, та́мо в се́рдце свое́м слага́я/ прему́дрых ста́рцев глаго́лы,/ Христо́вым ра́зумом обогати́лся еси́./ Те́мже вси пе́сньми восхваля́ем све́тлыя труды́ твоя́,/ и́миже па́ству твою́ наста́вил еси́,// нра́вом отце́м О́птинским подо́бниче.

Возвесели́ся и возра́довася Русь, во изгна́нии су́щая,/ в ней бо многосве́тлую свещу́ возжже́ Христо́с,/ богому́драго Ио́ну святи́теля,/ во стране́ Маньчжу́рстей инове́рных и отчужде́нных от жи́зни Бо́жия/ доброде́тельным житие́м привле́кшаго./ Того́ моли́твами, Христе́ Бо́же,// низпосли́ нам ве́лию ми́лость.

Христо́ва Ева́нгелия/ ве́рный испо́лнитель быв,/ о́тче преподо́бне Ио́но,/ взалка́вшимся дал еси́ я́сти,/ возжада́вшихся напои́л еси́,/ больны́х же и в темни́це заточе́нных посети́л еси́./ О свя́те Ио́но,/ Влады́ку всех моли́,// спасти́ся нам в День су́дный.

Сла́ва, глас 3:

О́тче Ио́но,/ иера́рху Нова́града тезоимени́те,/ в житии́ тому́ подо́бниче/ и си́рых предста́телю!/ Я́коже бо той, скорбь сиротства́ позна́в,/ вруче́нное ти ста́до до́бре упа́сл еси́,/ оте́чески его́ снабдева́я,/ тем и по сме́рти сия́еши чудесы́./ С ни́мже моли́ся Го́сподеви/ спасти́ и просвети́ти// ве́рно соверша́ющих досточу́дную па́мять твою́.

И ны́не, Богоро́дичен, догма́тик, глас то́йже.

Вход. Проки́мен дне. Чте́ния три святи́тельская.

На лити́и стихи́ры, глас 4:

Любо́вию к Бо́гу и лю́дем дви́жимый,/ о́тче преподо́бне Ио́но,/ со во́ины Христо́вы вмени́лся еси́, духо́вно наставля́я их,/ душе́ю возста́в супроти́в врага́ мы́сленнаго./ Наче́ншейся же бра́ни братоуби́йственней,/ ты, я́ко иере́й Бо́жий,/ защи́титель ве́ры и бли́жняго благодерзнове́нно яви́лся еси́,/ ду́шу свою́ за дру́ги полага́я,/ словесы́ и уче́ньми утеша́я// и о́бразом жития́ твоего́ согрева́я.

Пропове́дует тя Це́рковь Бо́жия/ стра́жа ве́рна ове́ц слове́сных,/ и́хже ты в безго́дие и дни треволне́ний му́дре упа́сл еси́,/ в ве́ре до конца́ соблю́л еси́/ и в моли́тве за них же́ртвеннику Госпо́дню предстоя́л еси́./ Те́мже, святи́телю о́тче Ио́но,/ та́ко просвети́ся свет твой пред челове́ки,/ и́же, ви́девше до́брая дела́ твоя́,// просла́виша Отца́ на́шего Небе́снаго.

Сла́ва, глас то́йже:

Ве́рен Бо́гу и Це́ркви был еси́ да́же до сме́рти,/ свя́тче Ио́но,/ ны́не же со святы́ми, в земли́ Ру́сской просия́вшими,/ моли́ Го́спода о спасе́нии всех,// благоче́стно чту́щих па́мять твою́.

И ны́не, Богоро́дичен, глас то́йже:

Бысть чре́во Твое́ свята́я трапе́за,/ иму́щая Небе́снаго Хле́ба, Христа́ Бо́га на́шего,/ от Него́же всяк яды́й не умира́ет,// я́коже рече́ всех, Богороди́тельнице, Пита́тель.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, о́тче Ио́но,/ благоче́стия кре́пкое утвержде́ние,/ оте́ческих преда́ний неусы́пный храни́телю,/ па́дших кро́ткий и ми́лостивый обличи́телю,/ о ча́дех же свои́х моли́твенниче/ и предста́телю пред Го́сподем усе́рдный,/ Ему́же ны́не во сла́ве предстои́ши,// помина́й нас, любо́вию чту́щих па́мять твою́.

Стих: Честна́ пред Го́сподем// смерть преподо́бных Его́.

Ра́дуйся, о́тче Ио́но,/ иера́рше Бо́жий изря́дный,/ пра́вило ве́ры и доброде́лания,/ тако́в подоба́ше архиере́й нам:/ преподо́бен, че́стен, незло́бив,/ челове́ком удобопристу́пный и ве́рный служи́тель Христо́в,/ Ему́же ны́не во сла́ве предстои́ши,// помина́й нас, любо́вию чту́щих па́мять твою́.

Стих: Что возда́м Го́сподеви о всех,// я́же воздаде́ ми.

Ра́дуйся, о́тче Ио́но,/ благосе́рдый плач о па́стве изгна́нней восприе́мый,/ скорбь о ней в се́рдцы твое́м носи́вый,/ под кресто́м служе́ния бли́жним не изнемоги́й,/ но о ча́дех Руси́ Святы́я со умиле́нием Христу́ моли́выйся,/ мно́гими слеза́ми Го́спода на ми́лость приклони́вый,/ Ему́же ны́не во сла́ве предстои́ши,// помина́й нас, любо́вию чту́щих па́мять твою́.

Сла́ва, глас 6:

Днесь беззако́ннующии умолча́ша/ и ненави́стницы Це́ркве Христо́вы посрами́шася,/ ма́лое же ста́до дерза́ет/ и па́ства, во оте́чествии и в разсе́янии су́щая, све́тло красу́ется/ в боже́ственней па́мяти святи́теля Ио́ны./ Те́мже и мы вопие́м ему́:/ да́руй и нам благослове́ние твое́, о́тче,/ крест свой носи́ти досто́йно/ и, стезе́ю твое́ю ше́ствующе неукло́нно,// сла́ву Небе́сную с тобо́ю улучи́ти.

И ны́не, Богоро́дичен, глас то́йже: Творе́ц и Изба́витель мой:

Тропа́рь, глас 4:

Па́стырь до́брый был еси́ ру́сским лю́дем,/ приста́нище обре́тшим во стране́ чужде́й,/ вся́ко наставля́я их,/ наипа́че же любви́ Христо́вой,/ о́браз ея́ во всем показу́я,/ те́мже, святи́телю о́тче Ио́но,// моли́ Христа́ Бо́га спасти́ся душа́м на́шим.

 

НА У́ТРЕНИ

По 1-м стихосло́вии седа́лен, глас 1:

Та́йну любве́ Бо́жия позна́в, святи́телю Ио́но, глаго́лал еси́:/ по́двиг есть жи́знь за ины́я положи́ти,/ ю́же всю Христу́ Бо́гу пре́дал еси́./ Моли́ся о спасе́нии душ на́ших.

Сла́ва:

Я́ко многоце́нный дар прия́т да́льний град Маньчжу́рский/ святы́я мо́щи твоя́, ханько́уский свети́льниче,/ мир же весь благода́тию, от тебе́ исходя́щею, напоя́ется, воспева́я:/ ра́дуйся, о́тче Ио́но, моли́твенниче о душа́х на́ших.

И ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́ Бо́га, па́че ума́ же и сло́ва,/ непреста́нно моли́ с Вы́шними Си́лами,/ пода́ти оставле́ние грехо́в на́ших и исправле́ние жития́,/ при́сно Тя сла́вящим.

По 2-м стихосло́вии седа́лен, глас 6:

Па́стырь до́брый и наста́вник преди́вный па́стве был еси́, святи́телю Ио́но,/ сего́ ра́ди и мы, я́ко вели́кому свети́льнику Це́ркве на́шея, хвалу́ ти воспева́ем и взыва́ем:/ моли́ Христа́ Бо́га, грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва:

Со тща́нием в виногра́днике Христо́вом потруди́вся, святи́телю Ио́но,/ до́брыя плоды́ доброде́тельми взрасти́л еси́,/ ду́ши бо па́ствы твоея́, в точи́ле гоне́ний и изгна́ния сокруше́нныя,/ до́брое вино́ иска́паша./ Те́мже Госпо́дь твой возра́довася.

И ны́не, Богоро́дичен:

Недви́жимое утвержде́ние ве́ры и честны́й дар душ на́ших,/ Богоро́дицу пе́сньми велича́ем, ве́рнии:/ ра́дуйся, Жизнь Ипоста́сную во чре́ве Твое́м вмести́вшая;/ ра́дуйся, скорбя́щих заступле́ние;/ ра́дуйся, Богома́ти Пречи́стая.

По полиеле́и седа́лен, глас 2:

Святи́телю Христо́в и уго́дниче Ио́но,/ те́плым твои́м предста́тельством о́троки и ю́ныя во огра́де церко́вней соблюди́,/ да не омрача́тся развраще́нием ми́ра сего́/ и вся́ким лжеуче́нием волко́в лю́тых да не уловле́ни бу́дут.

Сла́ва, и ны́не, Богоро́дичен:

Ра́дуется ны́не Иоа́нн, святи́тель Тобо́льский,/ в зе́млю кита́йскую пе́рвых пропове́дников правосла́вия посла́вый,/ иде́же и сла́вный сро́дник его́ просла́вися./ Ра́дуется и Инноке́нтий, свети́льник Ирку́тский,/ благове́стником ве́ры Христо́вы в стране́ да́льней споспе́шник./ Ра́дуются первому́ченицы Кита́йстии, да́же до кро́ве за Христа́ пострада́вшии./ Его́же мо́лят с Преблагослове́нною Богоро́дицею при́сно согреше́ний оставле́ние дарова́ти,/ воспева́ющим досто́йно но́ваго уго́дника Его́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Пе́сньми воспои́м хвалу́ святи́телю Бо́жию Ио́не,/ еди́ному от тех, и́хже мир недосто́ин бе,/ и́же вои́стину христиа́нским жити́ем/ ве́рность Христу́ показа́ша,/ терпе́нием ве́лиим зла́го врага́ посрами́ша// и смире́нием свои́м го́рдость его́ низложи́ша.

Кано́н святи́теля на 8, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припе́в: Святи́телю о́тче Ио́но, моли́ Бо́га о нас.

Твоему́, Христе́, уго́днику хвалу́ досто́йну воспе́ти да́руй ми, Влады́ко,/ от усте́н нечи́стых и ра́зума помраче́нна,/ и моли́твами его́ воздви́гни от разслабле́ния грехо́внаго ду́шу мою́.

Каза́нския земли́ украше́ние пресла́вное яви́лся еси́, о́тче Ио́но,/ служе́нием па́стырства и учи́тельства подви́гся,/ те́мже, све́том ева́нгельским ю́ныя просвеща́я,/ мрак неве́дения дале́че от них отгна́л еси́.

О, гла́са пла́ча твоего́, блаже́нне Ио́но, о лю́дех Руси́, во оте́чествии и в разсе́янии су́щих!/ И́мже и нас покая́нию и исправле́нию науча́еши/ и из се́рдца окамене́вшаго сле́зы изво́диши,/ я́коже дре́вле Моисе́й из ка́мене во́ду,/ да вси с ним зове́м Бо́гу, спаса́ющему нас:/ сла́вно бо просла́вися.

Богоро́дичен: Честна́я ико́на Твоя́ Каза́нская, Влады́чице Богоро́дице,/ Оте́честву на́шему в покро́в и заступле́ние дарова́ся,/ я́ко любо́вию Твое́ю сие́ при́сно озаря́еши, Засту́пнице Усе́рдная./ Те́мже и к жи́зни духо́вней, в Бо́зе сокрове́нней,/ лю́ди Твоя́ недосто́йныя упра́ви.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Язы́к твой, Ду́хом Боже́ственным дви́жимь,/ вои́стину трость кни́жника яви́ся,/ сказу́ет бо пресла́вно Писа́ний сокрове́нная и оте́ческих слове́с потае́нная,/ ерети́чествующих и безбо́жных писа́ния посрамля́ет,/ весели́т же духо́вно пою́щия всечестну́ю па́мять твою́, святи́телю Ио́но.

Я́ко апо́столом и отце́м дре́вним насле́дник и́стинный,/ испове́дание пра́вое ве́ры до́бре свиде́тельствовал еси́/ и, во учи́тельстве подвиза́яся,/ ю́ныя ученики́ твоя́ укрепля́л еси́/ в ве́трех суему́дрий не вла́ятися отню́д,/ оба́че к све́ту Боже́ственных догма́тов взира́ти.

Яви́лся еси́ дре́вних отце́в жития́ подража́тель и́стинен,/ служе́нием бли́жним де́лание моли́твенное раствори́в,/ во обою́ же стра́хом сыно́вним Го́сподеви предстоя́,/ усыновле́ние же и обоже́ние во Христе́ улучи́л еси́.

Богоро́дичен: А́ще и оскуде́ша во дни после́дния наста́вницы духоно́снии,/ но Ты, Пречи́стая Влады́чице, Сама́ Наста́вница ко спасе́нию рабо́м Твои́м бу́ди,/ смоле́бники прии́мши отцы́ богому́дрыя,/ и́хже писа́ньми назида́емся.

Седа́лен, глас 5:

Ве́ры ра́ди ят быв,/ в темни́цу всажде́н был еси́,/ но Бог ин путь тебе́ предначерта́,/ ру́сским лю́дем во блага́я./ Те́мже мо́лим тя:/ моли́ Христа́ Бо́га нам в ве́ре утверди́тися/ во спасе́ние душ на́ших.

Сла́ва, и ны́не, Богоро́дичен:

Сла́досте А́нгелов, скорбя́щих Ра́досте,/ христиа́н Предста́тельнице, Де́во, Ма́ти Госпо́дня,/ заступи́ ны от вся́кия напа́сти и спаси́ ду́ши на́ша.

Песнь 4

Ирмо́с: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста, о Го́споде пра́зднующи.

Оте́ческих писа́ний храни́тель и испо́лнитель тех, святи́телю Ио́но, яви́лся еси́,/ я́же ю́ношам благогове́йне препода́л еси́,/ богоуго́дным же житие́м си́лу слове́с их яви́л еси́.

Христо́во смире́ние стяжа́в и му́жеством препоя́сан,/ исхо́диши на служе́ние но́во/ и, я́ко лев, упова́я на Го́спода,/ пред ски́мны рыка́ющими пра́во ходи́л еси́.

Еди́наго Су́щаго на Небесе́х па́че вся́каго стра́ха убоя́вся,/ Тому́ Еди́ному вся́ким усе́рдием порабо́тал еси́/ и, кова́рствия богобо́рцев оплева́в,/ со Христо́м, Победи́телем сме́рти, наве́ки воцари́лся еси́.

Богоро́дичен: На Тя всю наде́жду спасе́ния на́шего возложи́хом, Богома́ти Неискусобра́чная,/ на по́мощь при́сно призыва́ем Тя:/ спаси́ ны от напа́стей и печа́ли/ и ве́чнаго осужде́ния изба́ви.

Песнь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Ми́лостию к скорбя́щим украси́лся еси́,/ раздава́яй а́лчущим хлеб твой,/ боля́щим же всеусе́рдно послужи́л еси́/ сло́вом па́стырским, моли́твою и увеща́нием.

Град Москва́ хва́лится ю́ностию твое́ю,/ Калу́га же и Каза́нь уче́нием твои́м, О́птина пу́стынь мона́шеством,/ но па́че всех Маньчжу́рия тобо́ю сла́вится,/ я́ко па́стырем ре́вностным и предстоя́телем любвеоби́льным.

Возлюби́л еси́ Го́спода и все́ю кре́постию Тому́ порабо́тал еси́,/ мно́ги ско́рби претерпева́я, ду́ши мно́гих, святи́телю, ко Христу́ наста́вил еси́./ Ему́же моли́ся спасти́ся нам.

Богоро́дичен: Просвети́, Де́во Чи́стая, любо́вию чту́щих Тя и велича́ющих,/ разреши́ стра́сти на́ша,/ уста́ви их бу́рю и лука́ваго собла́зны от среды́ на́шея отжени́/ моли́твами Твои́ми.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Богобо́рцем и инове́рным ве́рою кре́пкою, святи́телю, противуста́л еси́,/ па́ству твою́ от волко́в губи́тельных огради́ти тща́ся,/ гне́ва зло́бствующих ника́коже убоя́лся еси́,/ ниже́ осужде́ния челове́ческа.

Долготерпе́нию твоему́ Небеса́ и земля́ подиви́шася,/ я́ко в са́мых когте́х звери́ных пло́тию держи́мь,/ не преста́л еси́ упова́ти на Го́спода и возвеща́ти и́стину Его́,/ пресла́вно тя, я́коже проро́ка от чре́ва ки́това, свободи́вшаго.

Святи́тельства и́стиннаго о́браз был еси́,/ страсте́й взыгра́ния пе́рвее обузда́в на стра́жи се́рдца твоего́,/ те́мже и о́вцы Христо́вы ко приста́нищу небу́рному му́дре упра́вил еси́.

Богоро́дичен: И́стины свиде́телие и Сы́на Твоего́ служи́телие ве́рнии/ на Тя, Богома́ти, упова́ние свое́ возложи́ша/ и, под кро́вом Твои́м сохраня́еми,/ на огнь и смерть дерза́ху./ И́хже моли́твами и нас укрепи́, Влады́чице на́ша Всепе́тая.

Конда́к, глас 3:

Де́тем не возбрани́л еси́ приходи́ти к тебе́, богоблаже́нне,/ пеки́йся о насу́щных их,/ и хра́мину им созда́л еси́,/ по кончи́не же твое́й сих не оста́вил еси́,/ о́трока бо разсла́бленна в со́нном виде́нии исцели́в./ Сего́ ра́ди вопие́м ти:// ра́дуйся, чудоде́йственниче Ио́но пресла́вный.

И́кос:

К Бо́гу и лю́дем стяжа́в любо́вь и́стинную и нелицеме́рную, святи́телю,/ да лю́бите друг дру́га, де́тем взыва́л еси́,/ и́мже о́браз был еси́ сло́вом и житие́м, любо́вию, ду́хом, ве́рою и чистото́ю./ Сего́ ра́ди чудотворе́ния мно́га и зна́мения Бо́жия си́лы ве́рным о тебе́ яви́шася/ и, со безпло́тными ны́не ликовству́я, неотлуче́н от чад свои́х пребыва́еши./ О соприча́стниче святы́м!/ От бесо́вских наси́лий свои́м предста́тельством нас огради́/ и к Го́рней любви́ сердца́ уязви́, благода́рственно тя воспева́ющих:/ ра́дуйся, чудоде́йственниче Ио́но пресла́вный.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.

Во́ин Христо́в непобеди́мь показа́лся еси́,/ проти́ву безбо́жных тве́рдым испове́данием вооружи́вся/ и отсту́пльшим па́лицею слове́с твои́х противуста́в,/ венце́м испове́дника от Го́спода увенча́лся еси́.

Еди́наго на потре́бу усе́рдно взыска́в,/ жития́ сего́ сластьми́ не прельсти́лся еси́,/ те́мже и поставля́ет тя на све́щнице архиере́йства Госпо́дь,/ да светонаста́вник бу́деши лю́дем Его́.

Днесь, ве́рная овча́та Христо́ва, па́стыря до́браго прославля́ем,/ пред овца́ми свои́ми дерзнове́нно ходи́вшаго/ и тех по и́мени глаша́вшаго/ и ко оби́телем Небе́сным ди́вно наста́вльшаго.

Богоро́дичен: Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ И́мже изба́вихомся от вся́кия беды́, Влады́чице,/ и ве́рно вопие́м:/ поми́луй ста́до Твое́, еди́на Всепе́тая.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Ра́дости присносу́щныя наде́ждею препоя́сався,/ терпе́нием в по́двиг страда́льческий вшел еси́,/ те́мже не посрами́ Госпо́дь упова́ния твоего́,/ с ли́ки святы́х сочета́в тя, пою́щаго:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Ели́цы Писа́ний Боже́ственных разуме́ние прия́сте,/ прииди́те, ку́пно восхвали́те тех сказа́теля богому́драго Ио́ну,/ вопию́ще усто́м его́ сло́во Пода́вшему:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Вои́стину ни еди́н же от ма́лых сих забве́н бысть у тебе́, блаже́нне Ио́но,/ ко всем бо любы́ твоя́ распростре́ся,/ ни́щим и простеце́м, наипа́че же си́рым и убо́гим./ Те́мже и днесь исто́чник неоскудева́ющий сло́ва Бо́жия нам отверза́еши, взыва́ющим:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Богоро́дичен: А́ще и оте́чества земна́го лише́ние попуще́нием Бо́жиим прии́де ве́рным Твои́м,/ оба́че яви́лася еси́ ми́лостивая Уте́шительница им в зна́мении обновле́ния ико́н Твои́х,/ от ни́хже чудеса́ источи́ла еси́./ Те́мже и мы вопие́м Ти:/ Небе́снаго Оте́чества прича́стники соде́лай нас,/ я́ко Блага́я Врата́рница еси́, две́ри ра́йския ве́рным отверза́ющая.

Песнь 9

Ирмо́с: Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

О́тче святи́телю Ио́но!/ Ты, кончи́ну свою́ предзря́,/ со умиле́нием исхо́дное пе́ние приноси́л еси́ Влады́чице, во успе́нии Свое́м ми́ра не оста́вльшей./ Те́мже и нас, бе́дствующих скорбьми́, не оста́ви,/ венце́м увя́зся от Го́спода нетле́нным во ве́ки.

Сме́рти предстоя́, кро́тостию и незло́бием всех прости́л еси́,/ ча́дом же твои́м, любо́вь Христо́ву простира́я,/ де́ти, да лю́бите друг дру́га, рекл еси́./ Те́мже и нас с высоты́ сла́вы Бо́жия благослови́,/ да в едине́нии и любви́ спасе́мся.

И́стинныя сла́вы взыску́я, о́тче Ио́но,/ тле́нную и земну́ю ни во что́же вмени́л еси́./ Те́мже и нам коему́ждо помози́ ру́це разсла́бленнеи на моли́тву возде́ти/ и о́чи душе́внеи горе́ возвести́,/ да гряду́щаго во сла́ве Го́спода бо́дренным се́рдцем усря́щем/ и сла́вы Его́ прича́стницы бу́дем.

Богоро́дичен: Ми́лостива нам Сы́на Твоего́ покажи́, Преблагослове́нная Ма́ти,/ в час су́дный, ве́рнаго уго́дника Твоего́ Ио́ну смоле́бника и засту́пника те́пла прии́мши,/ да гряду́щаго во сла́ве Го́спода бо́дренным се́рдцем усря́щем/ и сла́вы Его́ прича́стницы бу́дем.

Свети́лен:

В пе́снех досто́йных почти́м сла́внаго иера́рха Ханько́ускаго Ио́ну,/ доброде́тельми украси́вшагося,/ от восто́ка да́льняго днесь возсия́вшаго/ и в разсе́янии су́щих све́том Христо́вым просвети́вшаго.

Сла́ва, и ны́не, Богоро́дичен:

Щедро́ты Твоя́, Бо́же, на лю́ди и ста́до Твое́ низпосли́,/ моли́твами Пречи́стыя Твоея́ Ма́тере и всех святы́х Твои́х,/ и нам да́руй ве́лию Твою́ ми́лость.

На хвали́тех стихи́ры на 4, глас 1:

В годи́ну гоне́ния лю́та и́стинный Христо́в служи́тель показа́лся еси́,/ ева́нгельское сло́во утвержда́я,/ во́инов назида́я и утеша́я,/ и благогове́йно Го́сподеви принося́ же́ртву безкро́вную./ Те́мже вопие́м ти:/ о свя́те Ио́но,/ моли́ Его́ от враг ви́димых и неви́димых нас изба́вити// и душа́м на́шим спасе́ние улучи́ти.

А́ще и безмо́лвствуют го́ры и пусты́ни,/ я́же мно́гими скорбьми́ проше́л еси́ в зе́млю Кита́йскую иногда́/ с чудотво́рною ико́ною Богома́тере Табы́нскою,/ но мы тя прославля́ем я́ко ве́ры на́шея утвержде́ние/ и Писа́ний Боже́ственных изъясни́теля,/ иера́рхов похвалу́ и преподо́бных украше́ние,/ си́рых засту́пника и о ни́щих попечи́теля,/ испове́дника кре́пкаго// и моли́твенника те́плаго о душа́х на́ших.

Исхо́ди твои́, о́тче Ио́но,/ исхо́ди живота́ показа́шася,/ се бо, в со́нии ле́гцем яви́вся о́троку боля́щу,/ о пребыва́ющем животе́ свиде́тельствовал еси́:/ возьми́ мои́ но́зе, свои́ же пода́ждь ми, рекл еси́ ему́,/ и удиви́ вся исцеле́нием его́./ Те́мже вопие́м ти:// моли́ся о исцеле́нии душ на́ших.

Рыда́нием неуте́шным возду́х огласи́ся,/ егда́ ты́сящи христолю́бцев гро́бу твоему́ предста́ша,/ провожда́юще небовхо́дное ше́ствие твое́,/ но не оста́вил еси́ си́рых чад твои́х,/ моли́твою твое́ю, чудесы́ и наставле́ньми// утеша́я и укрепля́я ду́ши их во ве́ки.

Сла́ва, глас 6:

Благи́й и ве́рный ра́бе,/ до́брый де́лателю виногра́да Христо́ва,/ святи́тельство твое́ во стране́ Кита́йстей ди́вно бысть:/ да́нный бо ти тала́нт преумно́жил еси́/ и вои́стину христиа́нския кончи́ны сподо́бился еси́,/ те́мже и во оби́тели ра́йския А́нгели тя вознесо́ша./ И ны́не, я́ко вше́дый в ра́дость Го́спода своего́,/ умоли́ Его́, сла́вне Ио́но,// о спасе́нии душ на́ших.

И ны́не, Богоро́дичен, глас то́йже: Богоро́дице, Ты еси́ лоза́ и́стинная:

 

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол ко Евре́ем, зача́ло 335. Аллилу́ия, глас 4: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преблаже́нне Ио́но, подви́жниче преди́вный и о нас к Бо́гу моли́твенниче непреста́нный! Са́ном архиере́йства почте́н быв, ко Христу́ ди́вную любо́вь показа́л еси́ и благода́тию Его́ на труды́ и по́двиги укрепи́лся еси́, па́стве же твое́й и отроко́м послужи́л еси́, сего́ ра́ди, еще́ сый на земли́, ве́лие ко Святе́й Тро́ице дерзнове́ние име́л еси́. Егда́ же о предстоя́щей неча́янней кончи́не весть прия́л еси́, ко Го́споду с ве́рою и смире́нною моли́твою прите́кл еси́ и, во́лю Бо́жию прие́мля, оба́че о па́стве твое́й скорбя́, па́че же о де́тех, о ни́хже попече́ние име́вый, Го́спода проси́л еси́ не оста́вити их си́рых. Ны́не же, прибега́юще к те́плому предста́тельству твоему́, приле́жно мо́лим тя: о́ком благосе́рдым любве́ твоея́ воззри́ на нас гре́шных, по́мощи твоея́ тре́бующих; ве́рныя в ре́вности о ве́ре святе́й поддержи́; борю́щияся со страстьми́ в по́двизех укрепи́; лени́выя ко исправле́нию ско́ро подви́гни; всем же нам по за́поведи Христо́вой люби́ти друг дру́га помози́ и посеще́ния благода́ти Свята́го Ду́ха испроси́, да, вся наставле́ния твоя́ храня́ще, сподо́бимся и мы Ца́рствие Христо́во насле́дити и ку́пно с тобо́ю сла́вити, Отца́, и Сы́на, и Свята́го Ду́ха, во ве́ки веко́в. Ами́нь.



-
Яндекс.Метрика
casino siteleri, bahis siteleri, canlı bahis, mobilbahis, artemisbet, tipobet, tipobet365, truvabet, bonus veren siteler canlı skor casino