Служба преподобному Макарию Оптинскому

Текст утвержден Священным Синодом
Русской Православной Церкви
17 июля 2020 года
(журнал № 34)

Ме́сяца сентября́ в 7-й день
Преподо́бнаго Мака́рия О́птинскаго

 

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 2:

Днесь лику́ют Небеса́ и оби́тель О́птинская,/ воспева́юще преподо́бнаго Мака́рия,/ дерзнове́ннаго хода́тая пред Го́сподем,/ богому́драго наста́вника,/ па́стыря до́браго слове́сных ове́ц,/ ста́рца благода́тнаго,/ его́же те́плыми моли́твами// спаси́, Христе́ Бо́же, ду́ши на́ша.

Блаже́н еси́, о́тче Мака́рие,/ я́ко непреткнове́нно ше́ствовал еси́/ непреле́стным путе́м свята́го послуша́ния,/ восходя́ по ле́ствице доброде́телей духо́вных,/ отсека́я во́лю свою́/ пред во́лею наста́вника богому́драго, ста́рца Льва,/ той бо огражда́ше тя// от всех сете́й лука́ваго.

Блаже́н еси́, преподо́бне Мака́рие,/ я́ко муж, смы́слы боже́ственными озаря́емь,/ горя́й ду́хом, глаго́лал еси́ от писа́ний оте́ческих/ и учи́л еси́ со вла́стию,/ пита́я словесы́ утеше́ния// вся а́лчущия и жа́ждущия пра́вды Бо́жия.

Сла́ва, глас 4:

Прииди́те, вси и́щущии Бо́га и́стиннаго,/ припаде́м к ра́це блаже́ннаго ста́рца Мака́рия/ и уви́дим, я́ко благ Госпо́дь,/ И́же чрез Свои́х смире́нных уго́дников// подае́т нам мир и ве́лию ми́лость.

И ны́не, предпра́зднства, глас то́йже: Всечестно́е Твое́ Рождество́:

На стихо́вне стихи́ры, глас 6:

Подража́я тезоимени́тому пусты́ннику вели́кому,/ преподо́бне о́тче Мака́рие,/ на враги́ безпло́тныя вельми́ подвиза́лся еси́,/ моли́твами и посто́м о́браз быв твои́м ученико́м,// те́мже и мона́хов мно́жества тя ублажа́ют.

Стих: Честна́ пред Го́сподем// смерть преподо́бных Его́.

На стра́жи се́рдца своего́/ приле́жно стоя́л еси́,/ богому́дре о́тче Мака́рие,/ на стра́сти подвиза́яся,/ трезве́нно храни́л еси́ ум от мы́сленных сете́й лука́ваго,// сего́ ра́ди возше́л еси́ на ка́мень безстра́стия.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Всем подвиго́м благоче́стия,/ преподо́бне о́тче Мака́рие,/ предпоче́л еси́ по́двиг смире́ния/ и, стяжа́в сию́ доброде́тель Христо́ву,/ потща́лся еси́ испо́лнити во́лю Бо́жию// о тебе́ и о ста́де твое́м.

Сла́ва, глас 4:

Лику́й ны́не и весели́ся,/ благослове́нная оби́тель О́птинская,/ град Небе́сный на земли́,/ на седми́ бо столпе́х ве́ры зи́ждешися/ и седмь свети́льников благоче́стия тя осиява́ют:/ си́и суть две седмери́цы ста́рцев благода́тных,/ и́хже дерзнове́нными моли́твами// спаси́, Го́споди, ду́ши на́ша.

И ны́не, предпра́зднства.

Тропа́рь пи́сан на вели́цей вече́рни.

 

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 4.

Подо́бен: Я́ко до́бля:

Ум а́нгельский,/ во пло́ти Боже́ственным Ду́хом носи́мь,/ крин целому́дрия,/ разсужде́ния свети́льник,/ богопи́санная скрижа́ль оте́ческих преда́ний,/ мы́сленная сокро́вищница/ доброде́телей многоце́нных/ в пе́снех да возвели́чится днесь,// Мака́рий богоблаже́нный.

Богоподража́тельнаго смире́ния пропове́дниче,/ кро́тости учи́телю любе́знейший,/ трудолю́бия пра́вило и моли́твы свети́льниче,/ О́птинскаго ста́рчества/ крепча́йшее утвержде́ние,/ стра́ждущим цели́телю/ и засту́пниче оби́димым,/ о́тче преподо́бне Мака́рие,// ста́до твое́ сохрани́ невреди́мо.

Свяще́нная па́мять твоя́,/ я́ко о́блак боже́ственный,/ осеня́ет вся притека́ющия к ра́це моще́й твои́х/ и ороша́ет благода́тию незави́стно/ всяк во́зраст и вся́кое сосло́вие,/ пита́ющи сла́достию твои́х смиренному́дрых уче́ний;/ те́мже, богоно́се о́тче Мака́рие,/ омыва́яй на́шу душе́вную нечистоту́,// в све́тлую ри́зу покая́ния сподо́би оде́ятися.

Сла́ва, глас то́йже. Самогла́сен:

Труба́ боже́ственная,/ от одра́ ле́ности спя́щия возводя́щая,/ устраша́ющая нечести́выя,/ святооте́ческих уче́ний громогла́сное пропове́дание,/ Мака́рие о́тче светоявле́нне,/ твою́ па́мять любо́вию пра́зднующих/ возведи́ на па́жити живо́тныя/ и Царю́ ца́рствующих предста́ви,// я́ко па́стырь до́брый и богоподража́тельный.

И ны́не, предпра́зднства, глас то́йже:

Всечестно́е Твое́ Рождество́,/ Пресвята́я Де́во Чи́стая,/ А́нгелов мно́жество на Небеси́/ и челове́ческий род на земли́ ублажа́ем,/ я́ко Ма́ти была́ еси́ Творца́ всех Христа́ Бо́га./ Того́ моля́щи о нас не преста́й, мо́лимся,/ и́же на Тя по Бо́зе упова́ние поло́жших,// Богоро́дице Всепе́тая и Неискусобра́чная.

А́ще же в пято́к ве́чера, догма́тик гла́са.

Вхо́д. Проки́мен дне. И чте́ния три преподо́бническая.

На лити́и стихи́ра хра́ма. И преподо́бнаго стихи́ры, глас 1:

В не́мощех и боле́знех не изнемога́яй/ и всем приходя́щим сострада́яй/ с любо́вию христоподража́тельною крест богода́нный поне́сл еси́, милосе́рдне Мака́рие,/ те́мже и нас не оста́ви,// с наде́ждою к тебе́ притека́ющих.

Глас 2:

Кто возмо́жет досто́йно воспе́ти, о́тче,/ многополе́зныя труды́ твоя́/ в позна́нии уче́ний оте́ческих,/ я́ко сонасле́дника богоно́снаго Паи́сия/ и сотаи́нника преподо́бнаго Льва,/ откры́л бо еси́ ми́ру сокро́вища многоце́нная,// богому́драя словеса́ святооте́ческая.

Сла́ва, глас 4:

От ю́ности возлюби́вый кни́жную прему́дрость/ и в соверше́нстве позна́вый уче́ние святы́х отце́в,/ поревнова́л еси́, богоглаго́ливе Мака́рие,/ глаго́лы их всей земли́ Ру́сской возвести́ти,/ те́мже всех а́лчущих и жа́ждущих жи́зни подви́жническия// напита́л еси́ уче́нии святооте́ческими.

И ны́не, предпра́зднства, глас то́йже:

Всеми́рная ра́дость от пра́ведных возсия́ нам,/ от Иоаки́ма и А́нны, Всепе́тая Де́ва,/ Я́же премно́гия ра́ди чистоты́/ храм Бо́жий одушевле́нный быва́ет,/ и еди́на вои́стину Богоро́дица познава́ется./ Тоя́ моли́твами, Христе́ Бо́же,/ мир ми́ру низпосли́,// и душа́м на́шим ве́лию ми́лость.

На стихо́вне стихи́ры, глас 2.

Подо́бен: Егда́ от Дре́ва:

Егда́ на́йде на тя раче́ние Вседержи́телево,/ тогда́ стра́сти плотски́я умертви́л еси́/ и, пле́велы греха́ исто́рг,/ дре́во богоразу́мия в се́рдце насади́л еси́/ и уче́нием святооте́ческим бразды́ душе́вныя напои́л еси́./ Те́мже и процвете́, я́ко крин, смиренному́дрие твое́,// богоно́се треблаже́нне о́тче Мака́рие.

Стих: Блаже́н муж боя́йся Го́спода,// в за́поведех Его́ восхо́щет зело́.

Егда́ вкуси́л еси́ от плода́ боже́ственнаго,/ тогда́ мирски́я сла́сти возненави́дел еси́/ и, на ле́ствицу доброде́телей возше́д,/ врат любве́ дости́гл еси́/ и, богопи́санныя скрижа́ли в се́рдце прии́м,/ словесы́ твои́ми и́ночествующих сосло́вие просвети́л еси́./ Те́мже, я́ко име́я дерзнове́ние ко Го́споду,// моли́ спасти́ и просвети́ти ду́ши на́ша.

Стих: Уста́ пра́веднаго поуча́тся прему́дрости,// и язы́к его́ возглаго́лет суд.

Егда́ пу́стынь О́птинская прия́т тя,/ я́ко ма́ти ча́до в не́дра своя́,/ тогда́ небе́сное жи́тельство на земли́ яви́л еси́/ и, и́ноческия уста́вы утверди́в,/ и́стинному послуша́нию бра́тию науча́л еси́,// да во́ли Бо́жией вседу́шно покаря́ются.

Сла́ва, глас 8:

Что тя нарече́м, блаже́нне?/ О́браз ли мона́шескаго зва́ния,/ сла́вы ли Боже́ственныя ревни́теля,/ прее́мника ли досто́йнаго ста́рчества благода́тнаго,/ благоле́пия ли церко́внаго рачи́теля,/ наста́вника ли духо́внаго и иску́снаго,/ уче́ний ли оте́ческих списа́теля,/ свети́льника ли благоче́стия пресве́тлаго?/ Вся сия́ яви́л еси́, о́тче Мака́рие,// моли́ спасти́ся душа́м на́шим.

И ны́не, предпра́зднства.

Тропа́рь, глас 4:

Прему́дрость Боже́ственную по́двиги и труды́ стяжа́в,/ ста́рческаго служе́ния сугу́бую благода́ть восприя́л еси́,/ да́ром же сло́ва свы́ше обогаще́нный,/ Бо́гу и лю́дем усе́рдно послужи́л еси́,/ о́тче богому́дре Мака́рие,/ моли́ Христа́ Бо́га// спасти́ся душа́м на́шим.

 

НА У́ТРЕНИ

На Бог Госпо́дь: тропа́рь предпра́зднства, два́жды. Сла́ва, преподо́бнаго. И ны́не, предпра́зднства.

По 1-м стихосло́вии седа́лен, глас 4:

Уязви́вся любо́вию Христо́вою, ни сокро́вищ тле́нных взыска́л еси́, ни ины́я пре́лести мирска́го жития́ восхоте́л еси́, вся сия́ во уме́ты вменя́я, да Христа́ приобря́щеши, от Него́же получи́л еси́ безце́нный дар любве́ соверше́нныя; Мака́рие преподо́бне, моли́ спасти́ся душа́м на́шим.

Сла́ва, и ны́не, предпра́зднства:

Небе́сная вся ны́не ра́дуются, челове́ческий род ны́не пра́зднует с ни́ми, и проро́цы та́йно вку́пе веселя́тся, Ю́же бо предви́деша обра́зне в дре́вних ро́дех, купину́, и ста́мну, и жезл, о́блак, дверь и престо́л, и ве́лию го́ру, ражда́ется днесь.

По 2-м стихосло́вии седа́лен, глас 4:

Оста́вил еси́ дом и име́ние Христа́ ра́ди и Тому́ Еди́ному после́довал еси́, преподо́бне о́тче Мака́рие, сего́ ра́ди стори́цею получи́л еси́ еще́ в жи́зни вре́менней, благода́ть же ста́рчества восприи́м, живо́т ве́чный насле́довал еси́, житие́м бо свои́м уподо́бился еси́ А́нгелом; те́мже Влады́ку Небе́сных сил моли́, е́же и нам Того́ с ни́ми сла́вити.

Сла́ва, и ны́не, предпра́зднства:

Лучи́ просия́ша всеми́рныя ра́дости рождества́ Твоего́, Де́во Мати́ Мари́е, на земли́, и озари́ша мы́сли любо́вию пою́щих Тя.

По полиеле́и седа́лен, глас 8:

Притеце́м к ра́це преподо́бнаго Мака́рия, и́же небе́сную сла́ву па́че земны́я возлюби́л есть, и к цельбоно́сным моще́м любвеоби́льнаго ста́рца припаде́м со слеза́ми. Сей бо и ны́не мо́лится о ча́дех свои́х, и наставля́ет сло́вом любому́дрия ве́рою и любо́вию к нему́ притека́ющих.

Сла́ва, и ны́не, предпра́зднства:

Обнови́ся, Ада́ме, ра́дуйся, Е́во, весели́ся, Дави́де, благоду́шствуй, А́нно: и́бо Ма́ти Зижди́теля твоего́ ражда́ется пресла́вно; лику́ет обно́вльшися вся земля́, и ра́дуется оде́яна во оде́жду; всяк язы́к лику́я да вопие́т Мари́и: блаже́н дом Дави́дов, я́ко пита́ет Пита́тельницу Жи́зни на́шея.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Я́ко мона́шествующих утвержде́ние/ и по́стников удобре́ние,/ ве́ры правосла́вныя чисте́йшее испове́дание/ и святы́х отце́в писа́ний изъясни́теля,/ в пе́снех вси возвели́чим Мака́рия богому́драго,/ О́птинскаго ста́рчества благоцвету́щее украше́ние,/ смире́ния Христо́ва ца́рскую печа́ть,/ е́юже власть над бе́сы прие́мый/ и тех по́лчища победи́вый;/ те́мже, богому́дре о́тче,/ не премолчи́ моли́тися ко Го́споду,// да утверди́т нас во Правосла́вии и спасе́т ду́ши на́ша.

Кано́н предпра́зднства со ирмосо́м на 6. И преподо́бнаго на 8, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми,/ дре́вний пеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.

Смире́ния сла́дкий плод угото́ва днесь ста́рец богоблаже́нный Мака́рий, грозд доброде́телей и умиле́ния вино́: прииди́те, наслади́теся вси, па́мять свяще́нную того́ пра́зднующе.

Ми́ра отри́нул еси́ тьму, в ми́ре Христо́ве упокоева́яся, пучи́ну жите́йскую ле́гце премину́л еси́ и, вся оста́вив Христа́ ра́ди, сокро́вище духо́вное стяжа́л еси́, ку́плею смире́ния и послуша́ния.

Испи́л еси́ сла́дость Ду́ха и благода́ти хлеб вкуша́л еси́, во отрече́нии твое́м от ми́ра вспять не озира́яся, но, преподо́бнически потруди́вся, дре́во возрасти́л еси́ и́стиннаго богопозна́ния.

Ревну́я получи́ти от Бо́га да́ры разуме́ния, росо́ю Небе́сною угаси́л еси́ пла́мень вожделе́ний и, ту́чами слез напои́в ду́шу свою́, дости́гл еси́ боже́ственнаго безстра́стия.

Ели́ка обеща́ Госпо́дь, воздае́т ти, я́ко смиря́яй себе́ возвы́сится; те́мже мы́сленное Не́бо отве́рзеся тебе́, Мака́рие а́вво богоблаже́нне.

Богоро́дичен: На Тя наде́ющеся, обурева́емии по́мощь обрета́ют, стена́ бо еси́ необори́мая прибега́ющим к Тебе́; те́мже лю́тость враго́в на́ших низложи́, Мари́е, Де́во Богоблаже́нная.

Катава́сия: Крест начерта́в:

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,// несть бо свят, па́че Тебе́, Человеколю́бче.

И́стины сладча́йший глас послу́шал еси́, пре́лести ми́ра отве́ргл еси́, по́сох взем богоприя́тнаго послуша́ния, на высоту́ доброде́телей возше́л еси́, о́тче, уста́вом оте́ческим после́дуя.

Боже́ственныя благода́ти сподобля́емь, преподо́бне, зако́ном Христо́вым пита́еши ум, и ду́шу за́поведьми снабдева́еши, те́мже се́рдцем просвеще́нным вопие́ши: несть свят па́че Тебе́, Человеколю́бче.

Отжени́ злоко́зненнаго де́мона от ста́да твоего́, блаже́нне, не терпи́т бо благоуха́ния смире́ния и отбега́ет, тебе́ прибли́жшуся, те́мже возвесели́ сердца́ вопию́щих: несть свят па́че Тебе́, Человеколю́бче.

Безче́стие бо и укори́зны смиренному́дренно терпя́, нра́ву Влады́чню подража́л еси́, о́тче, те́мже дерзнове́нно вопия́л еси́ ко Христу́ Бо́гу: несть свят па́че Тебе́, Человеколю́бче.

Богоро́дичен: Иде́же хо́щет Бог, естества́ побежда́ется чин, де́вствуеши бо и Отроча́ ражда́еши и во объя́тиих Твои́х Невмести́маго но́сиши, Подаю́щаго моли́твами Твои́ми спасе́ние душа́м на́шим.

Конда́к предпра́зднства, глас 3.

Подо́бен: Де́ва днесь:

Де́ва днесь, и Богоро́дица Мари́я,/ черто́г безконе́чный Небе́снаго Жениха́,/ ражда́ется от непло́дове, Бо́жиим Сове́том,/ колесни́ца Сло́ва благоукраша́ется:/ на сие́ бо преднарече́ся, Боже́ственная дверь,// и Ма́ти су́щия Жи́зни.

И́кос:

И́же от непло́дове плод даде́ся, Богоотрокови́ца Мари́я, Ю́же прови́деша иногда́ боже́ственнии проро́цы Ду́хом; Сию́ мы днесь зря́ще, в не́дрех А́нны игра́ющую, с ве́рным Иоаки́мом, мы́сленне ко учрежде́нию стеце́мся, и су́щия дале́че призове́м, глаго́люще: ми́ра сего́ ны́не воззва́ние; от непло́дна бо чре́ва прозябе́, Боже́ственная дверь, и Ма́ти су́щия Жи́зни.

Седа́лен, глас 6:

О Го́споде ревностию пламене́я, стра́сти и по́мыслы бо́дренною моли́твою отгна́л еси́, алка́л и жа́ждал еси́ моли́твы серде́чныя и, от прему́драго наста́вника вразумля́емь, сла́дость благ Небе́сных вкуси́л еси́, сне́сти бра́шно забыва́яй, преподо́бне, и́мя Сладча́йшаго Иису́са призыва́я непреста́нно.

Ин седа́лен, глас то́йже:

Кре́пкую на де́моны побе́ду, мона́шескаго жития́ о́браз и ста́рчества О́птинскаго похвалу́ в пе́снех воспои́м Мака́рия богоблаже́ннаго, той бо дерзнове́ние ве́лие стяжа́ ко Христу́, смире́нием Тому́ подо́бяся, и мо́лится непреста́нно о душа́х на́ших.

Сла́ва, и ны́не, предпра́зднства, глас 4:

Де́ва Мари́я и Богоро́дица вои́стину, я́ко о́блак све́та днесь возсия́ нам, и от пра́веднику происхо́дит в сла́ву на́шу: не ктому́ Ада́м осужда́ется, и Е́ва от уз свободи́ся. И сего́ ра́ди зове́м, вопию́ще со дерзнове́нием Еди́ней Чи́стей: ра́дость возвеща́ет рождество́ Твое́ всей вселе́нней.

Песнь 4

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы;/ Ты бо еси́, Человеколю́бче,// кре́пость моя́ и хвале́ние.

Красе́н доброде́тельми и́ноческими, друг Женихо́в вои́стину яви́лся еси́, невестово́диши бо и обруча́еши Христу́ возлю́бленных чад Бо́жиих. Приведи́ к Тому́ и нас, Мака́рие о́тче, на тя наде́ющихся.

Ра́дости испо́лни сердца́ на́ша, о́тче, печа́ль и тяготу́ греха́ отыми́ и слеза́ми покая́ния в све́тлыя ри́зы смире́ния облещи́ся помози́ нам, да ве́рная ча́да твоя́ нарица́емся.

На твоя́ моли́твы наде́ющеся, неду́гов многоразли́чных, душе́вных и теле́сных, исцеле́ние прие́млем, воспева́юще просла́вльшаго тя Го́спода, Мака́рие, о́тче наш.

Богоро́дичен: Егда́ на́йде на Тя Дух Святы́й, Сень Боже́ственная одушевле́нная, Христо́с вочелове́чився, Ада́ма обнови́; тем Тя, Де́во, мо́лим: не оста́ви нас во гресе́х погиба́ющих.

Песнь 5

Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Моли́твою непреста́нною к Бо́гу пламене́я, приходя́щих ти сердца́ возгрева́л еси́; помози́ и нам ны́не, о́тче Мака́рие, па́мять твою́ соверша́ющим све́тло, ве́ру несумне́нну соблюсти́.

А́нгельски, преподо́бне, ревну́я о слу́жбе боже́ственней, благозву́чны устроя́еши ли́ки церко́вныя, пе́рвее у́бо в се́рдце твое́м явля́я одушевле́нный Бо́жий орга́н.

Ки́ими гла́сы воспое́м тя? Или́ ки́я трубы́ возвестя́т христоподража́тельное смире́ние твое́? Недоуме́нием объя́ти, немо́лчно вопие́м ти: согреше́ний на́ших очище́ние испроси́, всече́стне.

А́ще и в телеси́ немощне́м пожи́л еси́, но тверде́йши бысть адама́нта душе́вная кре́пость твоя́, осно́вана бо бе на ка́мени ве́ры. Те́мже утвержда́еши немощны́я и па́дшия возставля́еши, о́тче всеще́дре.

Богоро́дичен: Испове́дуем Тя вои́стину Богоро́дицу, Де́во Чи́стая, Ты бо еси́ Сви́ток, в не́мже написа́ся Сло́во О́тчее, Его́же моли́ изгла́дити рукописа́ние грех на́ших.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ сил.

Е́же от святых оте́ц преда́нием назида́емь, чад твои́х богому́дро науча́еши, о́тче наш Мака́рие; те́мже из исто́чника чи́стаго всю зе́млю Ру́сскую напоя́еши.

А́вво богопросвеще́нный, вели́кому дре́внему Мака́рию тезоимени́тый, вся по о́бразу дре́вних уста́вов в скиту́ свята́го Предте́чи устро́ил еси́ и я́ко но́вую Фиваи́ду сей показа́л еси́: не оста́ви и нас твои́м попече́нием.

Взыска́ша наставле́ния твоего́ мно́зи лю́дие, о́тче преподо́бне, мона́си и прости́и, му́жие и жены́, ста́рцы и ю́ноши; ты же всем вся быв, в простоте́ серде́чней на по́льзу душе́вную всех учи́л еси́.

Я́ко дре́во благово́нное процве́л еси́, о́тче Мака́рие, моли́тву серде́чную непреста́нно вознося́, и плод любве́ многокра́тный прине́сл еси́, доброде́тельми смире́ния и милосе́рдия благоуха́яй.

Богоро́дичен: Ороси́ Тя боже́ственный Дождь, и естество́ земно́е нетле́нием процвете́, Де́во Богора́дованная, Ты бо и́стинный Свет родила́ еси́.

Конда́к, глас 3:

Блаже́нству тезоимени́тый,/ девятери́цу блаже́нств испо́лнил еси́/ и тяготы́ притека́ющих к тебе́,/ я́ко благо́е и́го Христо́во, поне́сл еси́,/ о всех душе́ю боле́знуя/ и всех вмеща́я в се́рдце свое́м./ Те́мже не забу́ди нас, чад твоих,// О́птинская похвало́, Мака́рие блаже́нне.

И́кос:

Оте́ческих нра́вов подража́телю и богоно́снаго Паи́сия ди́вный насле́дниче, благода́ть ста́рчества прии́м, сей тала́нт духо́вный преумно́жил еси́, преподо́бне о́тче наш Мака́рие, и незави́стно пре́дал еси́ ученико́м свои́м, с ни́миже досто́йно тя восхваля́ем: Ра́дуйся, усе́рдный де́лателю ни́вы боже́ственныя; ра́дуйся, па́стырю до́брый слове́сных ове́ц. Ра́дуйся, кни́жныя прему́дрости взыска́вый; ра́дуйся, моли́тве серде́чней прилежа́вый. Ра́дуйся, оте́ческих преда́ний храни́телю; ра́дуйся, оби́тели прему́дрый устрои́телю. Ра́дуйся, писа́ньми твои́ми нас умудри́вый; ра́дуйся, о́браз смире́ния нам яви́вый. Ра́дуйся, ча́да с любо́вию назида́вый; ра́дуйся, мно́гия к покая́нию приводи́вый. Ра́дуйся, ста́рцев ди́вных воспита́вый; ра́дуйся, правосла́вную ве́ру в немощны́х душа́х утверди́вый. Ра́дуйся, О́птинская похвало́, Мака́рие блаже́нне.

Песнь 7

Ирмо́с: В нача́ле Безнача́льное Сло́во,/ со Отце́м и Ду́хом,/ Сын Единоро́дный, благослове́н еси́// и превозноси́мый, Бо́же оте́ц на́ших.

Богому́дре ста́рче Мака́рие, собесе́дник духоно́сный был еси́ святи́телем прему́дрым и учи́телем мирски́м, ти́и бо, в простоте́ твое́й Небе́сную му́дрость прозрева́юще, науча́хуся зако́ну боже́ственному.

Апо́стольских преда́ний ве́рный храни́телю, богому́дрых слове́с святы́х усе́рдный списа́телю и оте́ческих творе́ний прему́дрый изда́телю, вся в па́мяти твое́й возвесели́, ди́вный о́тче Мака́рие.

Глави́зна доброде́телей есть смире́ние, и а́ще о́ное стя́жеши, вся тем приобря́щеши, а́ще же ни, всу́е труди́шися, та́ко глаго́лал еси́, блаже́нне о́тче. Помози́ и нам сию́ цари́цу доброде́телей стяжа́ти.

О́птинская свире́ль, возвеселя́ющая ду́шу, и о́вцы Христо́вы зову́щая к па́жити благода́тней, Мака́рий блаже́нный ны́не церко́вное собра́ние созыва́ет, Бо́га в Тро́ице Святе́й прославля́ти.

Богоро́дичен: Ублажа́ем Тя, Богоро́дице Де́во, и хва́лим Тя недосто́йными усты́, Ты бо еси́ Боже́ственная Дверь Царя́ ца́рствующих. Почита́ющих Тя любо́вию, спаси́.

Песнь 8

Ирмо́с: Ру́це распросте́р, Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Слу́жбе Боже́ственней прилежа́в, преподо́бне Мака́рие, вся до́бре в до́ме Бо́жии устроя́л еси́; те́мже и ду́ши стра́ждущих зде исцеле́ние прие́млют, во е́же пе́ти: благослови́те, вся дела́ Госпо́дня, Го́спода.

Иде́же со́брани есмы́ твою́ па́мять творя́ще, та́мо пребу́ди с на́ми, ста́рче благода́тный, и вразуми́ нас богому́дрыми словесы́ твои́ми, и разсужде́ние духо́вное стяжа́ти помози́, да вы́ну пое́м согла́сно: благослови́те, вся дела́ Госпо́дня, Го́спода.

Ве́дуще по́двиги твоя́ сокрове́нныя, о́тче Мака́рие, мо́лим тя приле́жно: вразуми́ нас и наста́ви словесы́ боже́ственными, во е́же пе́ти: благослови́те, вся дела́ Госпо́дня, Го́спода.

Оте́ческое преда́ние да храни́м тве́рдо твои́ми моли́твами, ста́рче ди́вный, и, е́же от тебе́ насле́дие прия́хом, сие́ потщи́мся не расточа́ти, оба́че ту́не от него́ дая́ти тре́бующим, да преумно́жится сла́ва Го́спода во ве́ки.

Богоро́дичен: Богороди́тельнице Чи́стая, Наде́ждо ненаде́емых, души́ моея́ я́звы грехо́вныя очи́сти ми́лостию от Тебе́ рожде́ннаго Све́та непристу́пнаго, Просвеща́ющаго вся́ческая.

Песнь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л,/ и вознесе́ смире́нныя Бог Изра́илев./ В ни́хже посети́ нас Восто́к с высоты́,// и напра́вил ны есть на путь ми́ра.

Ще́дрому Бо́гу служа́, не утаи́л еси́ от дарова́ний духо́вных, преподо́бне, раздава́я всем без ме́ры, никого́же от жа́ждущих лиши́в воды́ живы́я, но, я́ко ма́ти, о ча́дех свои́х и до ны́не пече́шися.

Я́ко ве́рен во́ин Царя́ Небе́снаго, страстьми́ не побежде́н пребы́л еси́, де́моны устраши́л еси́, Мака́рие о́тче, смире́нием тех низлага́я; сего́ ра́ди сла́вим Христа́, тя укре́пльшаго.

Твоя́ свяще́нная па́мять днесь наста́ и я́ко ца́рская трапе́за всем яви́ся, преподо́бне, пита́еши бо всех, к тебе́ притека́ющих, ви́ном любому́дрия и бра́шном смире́ния, да никто́же тощ и неуте́шен оты́дет.

Богоро́дичен: Я́же спасе́нию на́шему послужи́ти угото́вана, от непло́дных ложе́сн А́нниных происхо́дит; Ве́тхий Заве́т прехо́дит, Но́вый же явля́ется, и Со́лнце Пра́вды востае́т нам обетова́нное.

Свети́лен:

Сликовству́ют А́нгельстии чи́ни и мона́хов мно́жества в светоно́сней па́мяти О́птинскаго ста́рца Мака́рия, я́ко собесе́дник бысть о́нем, и други́м яви́ся наста́вник, и святы́х собо́ру соприча́стник.

Сла́ва, и ны́не, предпра́зднства:

Ада́ме, обнови́ся, и Е́ва, возвели́чися, проро́цы, со апо́столы лику́йте и пра́ведными, о́бщая бо ра́дость возсия́, А́нгелов же и челове́ков, от пра́ведных днесь Иоаки́ма и А́нны, Богоро́дица Мари́я.

На хвали́тех стихи́ры, глас 6:

Испо́лнителю трудолю́бный/ святооте́ческих уче́ний,/ ра́зумом и житие́м потща́лся еси́/ ду́шу твою́ очи́стити покая́нием, о́тче Мака́рие./ Дух же Святы́й пе́рстом та́инственным,/ я́ко на скрижа́лех ка́менных,/ в чи́стем се́рдце твое́м/ начерта́ словеса́ боже́ственныя Прему́дрости,/ и́миже послужи́л еси́/ к душе́вней по́льзе и утеше́нию// взыску́ющих и́стиннаго наставле́ния.

Я́ко оте́ц чадолюби́вый,/ пла́кал еси́ с пла́чущими,/ и сора́довался еси́ ра́дующимся,/ утеша́л еси́ скорбя́щих,/ ободря́л еси́ уныва́ющих,/ и неради́вых возставля́л еси́ к де́ланию,/ те́мже и нас не преста́й окормля́ти твои́ми моли́твами,// твою́ па́мять любо́вию соверша́ющих.

О свети́льнице свое́м не нераде́л еси́,/ о́чи у́мныя просвети́в Ду́ха благода́тию,/ те́мже и дар утеше́ния и вразумле́ния прие́м,/ бли́жним и да́льним послужи́л еси́./ Сего́ ра́ди и по честне́м успе́нии твое́м/ источа́еши благода́тную по́мощь// всем с ве́рою и любо́вию к тебе́ притека́ющим.

Сла́ва, глас 2:

С любо́вию послужи́л еси́ лю́дем,/ окормля́яй всех тре́бующих сове́та духо́внаго,/ и ны́не а́ще и умо́лкнуша уста́ твоя́ златослове́сная,/ пи́смена твоя́, богодухнове́нне Мака́рие,/ глаго́лют ве́лиим гла́сом во всей земли́,/ обогаща́юще всех и́щущих спасе́ния// многоце́нным би́сером прему́дрости.

И ны́не, предпра́зднства, глас то́йже:

Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде А́нны сла́вныя,/ Присносу́щнаго Существа́ Боже́ственное пребыва́лище;/ Е́юже безсту́дный ад попра́ся,/ и всеро́дная Е́ва в тве́рдую жизнь вво́дится,/ Той досто́йно возопии́м:/ блаже́нна Ты в жена́х,// и Плод чре́ва Твоего́ благослове́н.

Славосло́вие вели́кое, и отпу́ст.

На Литурги́и слу́жба предпра́зднства, и преподо́бнаго.



-
Яндекс.Метрика