Молитва священномученику Петру, митрополиту Крутицкому

Ме́сяца сентября́ в 27-й день
Священному́ченика Петра́, митрополи́та Крути́цкаго

Моли́тва

О святы́й священному́чениче Пе́тре, святи́телю сла́вный земли́ Ру́сския, архиере́йство я́ко крест в годи́ну лю́тых испыта́ний прие́мый, ча́шу го́рькую страда́ний испи́вый и престо́л патриа́рший до́бре соблюды́й, ве́рою вся претерпе́вый и смире́нием благода́ть ве́лию стяжа́вый! Ку́ю похвалу́ воздади́м ти? И ка́ко, во гресе́х и не́мощех су́ще, дерзне́м призыва́ти тя? Оба́че ве́мы, я́ко со все́ми святы́ми земли́ на́шея, наипа́че же со святы́м патриа́рхом Ти́хоном, не престая́ мо́лишися у Престо́ла Пресвяты́я Тро́ицы о Це́ркви Ру́сской, да сохрани́т ю́ Госпо́дь от вся́каго зла и искуше́ния, да пра́во пра́вят сло́во и́стины архипа́стыри и па́стыри ея́, да не изсяка́ет ве́ра в сердца́х людски́х, да в сове́те мно́зе разреша́ется вся́кое нестрое́ние и вся любо́вию всем да быва́ет! О пресла́вный страда́льче! Ты, я́ко оте́ц чадолюби́вый, ве́си вся потре́бная нам, сего́ ра́ди еди́наго взыску́ем: тебе́ подража́тели бы́ти, я́коже и ты Христу́, да крест свой прии́мше, я́ко бре́мя благо́е и ле́гкое, путе́м у́зким ше́ствуем и та́ко оби́телей Небе́сных дости́гнем, иде́же вку́пе с тобо́ю и все́ми святы́ми сподо́бимся прославля́ти пречестно́е и великоле́пое и́мя Отца́, и Сы́на, и Свята́го Ду́ха, в безконе́чныя ве́ки. Ами́нь.



-
Яндекс.Метрика