Тропарь и кондак священномученику Георгию Извекову, пресвитеру

Ме́сяца ноября́ в 14-день
Священному́ченика Гео́ргия Изве́кова

Тропа́рь, глас 2:

Правосла́вныя ве́ры ревни́телю/ и тве́рдый ея́ испове́дниче,/ священному́чениче Гео́ргие,/ в се́рдце твое́м при́сно Христа́ воспева́я,/ пе́ния церко́вная слага́л еси́/ и, всеусе́рдно Бо́гу послужи́в,/ вене́ц му́ченический от Него́ прия́л еси́./ Те́мже непреста́нно Го́спода моли́/ Це́рковь Ру́сскую в ми́ре сохрани́ти,/ единомы́слие лю́дем дарова́ти// и спасти́ ду́ши на́ша.

Конда́к, глас 5:

Звездо́ но́вая Це́ркве Ру́сския,/ воспева́телю сла́вы Бо́жия,/ олтаря́ Госпо́дня непоро́чный служи́телю,/ ю́ных наста́вниче и во́инов окорми́телю,/ священному́чениче Гео́ргие./ Ты, Ду́ха Свята́го испо́лнився,/ гони́телем му́жественне рекл еси́:/ гото́в есмь пострада́ти и умре́ти за Христа́./ Те́мже, заточе́ния и смерть небоя́зненно восприе́м,/ ны́не с ли́ки новому́чеников на Небеси́ пребыва́еши// и мо́лишися о спасе́нии душ на́ших.