Тропарь, кондак и молитва священномученику Владимиру Панькину

Ме́сяца ма́рта в 24-й день
Священному́ченика Влади́мира Па́нькина

Тропа́рь, глас 2:

Ре́вностию по Бо́зе распала́емь,/ священному́чениче Влади́мире прехва́льне,/ гони́телей безбо́жных не убоя́лся еси́/ и, Христу́ да́же до сме́рти после́довав,/ сын ве́рный Це́ркве Ру́сския яви́лся еси́,/ и ны́не, Престо́лу Бо́жию предстоя́,// моли́ спасти́ся душа́м на́шим.

Конда́к, глас 6:

Восхва́лим, ве́рнии,/ во свяще́нницех изря́днаго/ и в му́ченицех пресла́внаго,/ Влади́мира богому́драго,/ и́же, лише́ний и муче́ний не убоя́вся,/ в годи́ну лю́тых гоне́ний свяще́нство, я́ко дар, восприя́т/ и, сме́рти от безбо́жных неви́нно пре́дан быв,/ зе́млю Казахста́нскую кро́вию свое́ю обагри́./ Те́мже к нему́ с любо́вию возопии́м:/ моли́ Христа́ Бо́га/ в ве́ре правосла́вней нам утверди́тися// и спасти́ся душа́м на́шим.

Моли́тва

О уго́дниче Христо́в, священному́чениче Влади́мире, па́стырю земли́ Казахста́нския! Ты в годи́ну гоне́ний безбо́жных на Це́рковь Ру́сскую, ве́ру неколе́блему сохрани́л еси́ и па́ству, тебе́ вруче́нную, па́че жи́зни земны́я возлюби́л еси́, те́мже и кончи́ну от безбо́жных чрез мно́гия ра́ны и я́звы претерпе́л еси́. Не оста́ви и нас, ны́не па́мять твою́ почита́ющих, и не преста́й моли́тися ко Го́споду, да пода́ст нам ве́ры укрепле́ние, терпели́вное креста́ прия́тие, Сло́ва Бо́жия разуме́ние и любве́ друг ко дру́гу умноже́ние. Помози́ па́стырем на́шим по́двигом до́брым подвиза́тися, да в чистоте́ соблюда́ется ве́ра правосла́вная в стране́ на́шей Казахста́нстей, да умножа́ются хра́мы и оби́тели на́ши и да сохраня́ется в них ста́до Христо́вых слове́сных ове́ц. Умоли́ Го́спода Бо́га, да сподо́бит и нас без поро́ка прейти́ по́прище жития́ земна́го, да ку́пно с тобо́ю сподо́бимся прославля́ти во Ца́рствии Небе́снем Отца́, и Сы́на, и Свята́го Ду́ха. Ами́нь.