Служба новомученикам Коломенского духовного училища
Ме́сяца сентября́ в 4-й день
Новому́чеников Коло́менскаго духо́внаго учи́лища
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.На Го́споди, воззва́х: стихи́ры на 8, глас 5.
Подо́бен: Ра́дуйся, Живоно́сный Кре́сте:
Ра́дуйся, собо́ре му́чеников но́вых,/ Це́ркве Ру́сския украше́ние,/ прозябе́ние вертогра́да духо́внаго,/ во гра́де Коло́мне насажде́ннаго!/ Вы, ве́рныя лю́ди от тьмы грехо́вныя огражда́юще,/ во дни гоне́ний лю́тых столпи́ непоколеби́мии яви́стеся/ и, те́ло убива́ющих, но души́ погуби́ти не могу́щих, не убоя́вшеся,/ ве́ру кровьми́ ва́шими запечатле́ли есте́./ Мы же, в день сей соше́дшеся,/ уми́льно вам глаго́лем:/ бу́дите духо́внии наста́вницы на́ши// и моли́твенницы те́плии пред Го́сподем.
Ра́дуйся, собо́ре му́чеников но́вых,/ Го́сподем ди́вно просла́вленный!/ Вы, от ю́ности Отца́ Небе́снаго возлюби́вше,/ во учи́лище духо́вное гра́да Коло́мны притекли́ есте́/ и, крест па́стырский на ра́мена взе́мше,/ ве́ру свою́ кровьми́ му́ченическими запечатле́ли есте́./ Мы же, в день сей соше́дшеся,/ уми́льно вам глаго́лем:/ бу́дите духо́внии наста́вницы на́ши// и моли́твенницы те́плии пред Го́сподем.
Ра́дуйся, Григо́рие богому́дре,/ до́блий страда́льче и служи́телю Та́ин Бо́жиих,/ Це́ркве Ру́сския звездо́ многосве́тлая,/ Ева́нгелия Христо́ва усе́рдный провозве́стниче!/ Ты, во дни гоне́ний мно́гая страда́ния претерпева́я,/ да́же до сме́рти Бо́га испове́дал еси́./ Ны́не же с Небе́сными Си́лами Престо́лу Вседержи́теля предстои́ши/ и благоприя́тныя моли́твы за вся лю́ди возно́сиши,// и́же ве́рою и любо́вию тя почита́ют.
Ра́дуйся, Ни́коне приснопа́мятне,/ мона́хов наста́вниче и па́стырей о́бразе!/ Ты, от ю́ности своея́ Бо́гу и лю́дем служи́ти восхоте́в,/ и́мя Христо́во безбоя́зненно пропове́дал еси́,/ ю́ных же в ве́ре кро́тко наставля́я/ и в тре́звости мно́гия утвержда́я,/ па́стырь до́брый яви́лся еси́/ и ве́ру правосла́вную да́же до сме́рти испове́дал еси́./ Моли́ о нас Пресвяту́ю Тро́ицу,// ве́рою и любо́вию тя почита́ющих.
Ра́дуйтеся, Па́вле, Се́ргие и Гео́ргие,/ благода́ти Бо́жия сокро́вище неоску́дное,/ гра́да Коло́мны моли́твенницы неусы́пнии/ и учи́лища духо́внаго покрови́телие всехва́льнии!/ Вы, крест на ра́мена своя́ прии́мше/ и лише́ния земна́го не убоя́вшеся,/ вся кра́сная ми́ра сего́ ни во что́же вмени́сте/ и на Небеси́ венцы́ му́чеников прия́сте./ Те́мже при́сно мо́лим вас, отцы́ досточу́днии:/ помина́йте нас недосто́йных,// ве́рою и любо́вию вас почита́ющих.
Ра́дуйтеся, Вениами́не, Алекса́ндре и Иоа́нне приснопа́мятнии,/ новому́ченицы богому́дрии!/ Вы, сло́во и́стины лю́дем возвеща́юще,/ житие́м свои́м благоче́стие утверди́ли есте́,/ ско́рби же мно́гия претерпе́вше,/ за Го́спода да́же до кро́ве страда́ния подъя́ли есте́/ и, венцы́ нетле́нныя досто́йно восприи́мше,/ Ца́рствия Небе́снаго прича́стницы яви́лися есте́./ Ны́не ру́це свои́ горе́ вознося́ще,/ прославля́ете Триеди́наго Бо́га на́шего// и мо́литеся о спасе́нии душ на́ших.
Сла́ва, глас то́йже:
Влады́ко Многоми́лостиве,/ в Тро́ице сла́вимый и покланя́емый!/ Благода́рственное пе́ние прино́сим Ти, недосто́йнии раби́ Твои́,/ я́ко дарова́л еси́ нам пресла́вных хода́таев и моли́твенников,/ учи́лища Коло́менскаго покрови́телей,/ новому́чеников приснопа́мятных./ Ти́и бо зело́ возлюби́ша Тя/ и, мук теле́сных не убоя́вшеся,/ да́же до сме́рти ве́ру и́стинную испове́даша./ Ны́не же со все́ми святы́ми// славосло́вие Тебе́ непреста́нно возно́сят.
И ны́не, Богоро́дичен, глас то́йже: В Чермне́м мо́ри:
Вход. Проки́мен дне. И чте́ния новому́чеников.
Дея́ний святы́х апо́стол чте́ние (глава́ 4):
В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
К Тимофе́ю посла́ния
свята́го апо́стола Па́вла чте́ние (глава́ 4):
Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и Ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.
К Евре́ем посла́ния
свята́го апо́стола Па́вла чте́ние (глава́ 11):
Бра́тие,/ святи́и вси ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ львов,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и уз и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.
На лити́и стихи́ра хра́ма, и новому́чеников, глас 8:
Дво́ице ди́вная,/ святи́и Се́ргие и Варва́ро,/ ма́лыя це́ркве созда́тели чу́днии!/ Вы, брак че́стен сохра́ньше,/ житие́м свои́м Бо́гу угоди́ли есте́/ и, во дни гоне́ния безбо́жнаго от Го́спода не отступи́вше,/ му́ченическими кровьми́ ве́ру свою́ запечатле́ли есте́./ Ны́не о всех нас моли́теся,// с ве́рою к вам притека́ющих.
Сла́ва, глас 1:
О Дими́трие, служи́телю олтаря́ изря́дный!/ Ты житие́ свое́ чи́сто сохрани́л еси́,/ моли́твы, я́ко фимиа́м благоуха́нный, ко Го́споду вознося́,/ те́мже, я́ко Стефа́н первому́ченик,/ мно́го от безбо́жных претерпева́я,/ ревни́тель ве́ры показа́лся еси́,/ и Христа́ да́же до сме́рти теле́сныя испове́дал еси́./ Ны́не же вку́пе с му́ченики всехва́льными/ воспева́еши Отца́ и Сы́на и Свята́го Ду́ха,// в Тро́ице Еди́наго Бо́га.
И ны́не, Богоро́дичен.
На стихо́вне стихи́ры, глас 2.
Подо́бен: Егда́ от Дре́ва:
Священному́ченицы Иоа́нне и Васи́лие,/ Балаши́хинския земли́ па́стырие до́брии,/ Коло́менскаго учи́лища духо́внаго цве́ти благоуха́ннии!/ От ю́ности Бо́гу послужи́ти возжеле́вше,/ па́ству свою́ сло́вом и́стины наставля́ли есте́,/ сего́ ра́ди скорбь и тесноту́ от безбо́жных претерпе́вше,/ смерть за Христа́ смире́нно прия́ли есте́./ Ны́не же вку́пе предстои́те пред Го́сподем сла́вы// и мо́литеся о душа́х на́ших.
Стих: Го́споди, Госпо́дь наш,// я́ко чу́дно и́мя Твое́ по всей земли́.
Па́стырю ди́вный, Иа́кове богому́дре,/ Христа́ пропове́дниче усе́рдный,/ Пресвяты́я Де́вы почита́телю ре́вностный,/ благоче́стия рачи́телю до́блий!/ Ты па́ству свою́ от греха́ пия́нства огражда́л еси́/ и трезве́нию духо́вному науча́л еси́./ Ны́не же, свиде́телю ве́рный,/ моли́ся Триеди́ному Бо́гу на́шему// спасти́ся душа́м на́шим.
Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.
Прииди́те, вси ве́рнии,/ просла́вим уго́дников Бо́жиих,/ новому́чеников всехва́льных,/ вертогра́да Коло́менскаго ло́зы многопло́дныя:/ ти́и бо, Христа́ распя́таго и воскре́сшаго пропове́давше,/ в жизнь ве́чную му́ченически внидо́ша./ Мы же, зря́ще сия́ зве́зды пресве́тлыя, вопие́м:/ моли́те Ми́лостиваго Бо́га// спасти́ся душа́м на́шим.
Сла́ва, глас и подо́бен то́йже:
Днесь лику́ют ученицы́ и учи́телие,/ прославля́юще Небе́сных покрови́телей свои́х,/ новому́чеников богому́дрых,/ ве́ры правосла́вныя ревни́телей,/ и умиле́нно глаго́лют:/ о дру́зи Христо́ви,/ моли́твенницы на́ши те́плии,/ хода́таи неотсту́пнии пред Го́сподем!/ Испроси́те нам в ве́ре утвержде́ние,/ наде́жды исполне́ние,/ му́дрость духо́вную,/ любо́вь нелицеме́рную// и ве́лию ми́лость.
И ны́не, Богоро́дичен, глас то́йже: О, чудесе́ но́ваго:
На благослове́нии хле́бов тропа́рь новому́чеников, два́жды, и Богоро́дице Де́во: еди́ножды.
Тропа́рь, глас 5:
Ма́терь позна́вше Христо́ву Це́рковь,/ учи́лище благода́ти и и́стины возлюби́сте,/ догма́ты же правосла́вными утвержде́ни,/ столпи́ непоколеби́мии ве́ры яви́стеся/ и, заве́ты ева́нгельския до́бре испо́лнивше,/ му́ченическими кровьми́ ри́зы своя́ обагри́сте./ О страстоте́рпцы прехва́льнии,/ помина́йте нас, чту́щих любо́вию па́мять ва́шу,// да обря́щем у Христа́ Бо́га ве́лию ми́лость.
Ин тропа́рь, глас то́йже:
Ма́терь позна́вше Христо́ву Це́рковь,/ страстоте́рпцы прехва́льнии,/ благода́ти и и́стины испо́лненнии,/ не словеси́ то́кмо научи́стеся,/ но Ду́ху Животворя́щему после́довасте/ и, му́ченическими кровьми́ ри́зы своя́ обагри́вше,/ столпи́ непоколеби́мии ве́ры яви́стеся./ Те́мже мо́лим вы,// помина́йте чту́щих любо́вию па́мять ва́шу.
НА У́ТРЕНИ
На Бог Госпо́дь: тропа́рь новому́чеников, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 2:
Вонми́те моле́нию на́шему, новому́ченицы всехва́льнии и добропобе́днии, бу́дите нам помо́щницы во уче́нии и в боре́нии со страстьми́ мно́гими. Упова́ем бо предста́тельством ва́шим ве́ру правосла́вную сохрани́ти, доброде́телем навы́кнути и Ца́рствия Небе́снаго дости́гнути.
Сла́ва, и ны́не, Богоро́дичен, глас то́йже:
Велере́чивый язы́к мой укроти́, горды́ню се́рдца моего́ низложи́ благода́тию Ду́ха Всесвята́го, Богоро́дице Де́во, я́ко Ты о ми́ре, Чи́стая, хода́тайствуеши при́сно, Ма́ти Бо́га Жива́го и Цели́тельнице душ на́ших.
По 2-м стихосло́вии седа́лен, глас 3:
Днесь притеце́м, лю́дие, к собо́ру новому́ченик богому́дрых, ученико́в вертогра́да Коло́менскаго, и житие́ их пе́сньми просла́вим, я́ко ти́и, Христа́ испове́дающе, кровьми́ ве́ру свою́ запечатле́ли суть.
Сла́ва, и ны́не, Богоро́дичен, глас то́йже:
Мно́гими грехми́ отягче́ннии, прибега́ем к Тебе́, Пресвята́я Де́во, и из глубины́ серде́чныя взыва́ем Ти: Христа́ Бо́га на́шего умоли́ о душа́х на́ших, да пода́ст нам ве́лию ми́лость.
Велича́ние:
Велича́ем вас,/ святи́и новому́ченицы и испове́дницы Це́ркве Ру́сския,/ и чтим честна́я страда́ния ва́ша,/ я́же за Христа́// претерпе́ли есте́.
И́но велича́ние:
Велича́ем вас,/ святи́и новому́ченицы и наста́вницы на́ши,/ и чтим честна́я страда́ния ва́ша,/ я́же за Христа́// претерпе́ли есте́.
Псало́м избра́нный: Бог нам прибе́жище и си́ла:
По полиеле́и седа́лен, глас 5:
Торжеству́ем па́мять ва́шу, Коло́менскаго учи́лища новому́ченицы прехва́льнии. Словеса́ бо Госпо́дня от ю́ности своея́ возлюби́вше, да́же до сме́рти Тому́ после́довасте. Ны́не же с со́нмом А́нгельским предстоя́ще, непреста́нно мо́литеся о ве́рою и любо́вию па́мять ва́шу пра́зднующих.
Сла́ва, и ны́не, Богоро́дичен, глас то́йже:
Не пре́зри моле́ний на́ших, Де́во Чи́стая, от уст серде́чных Тебе́ возноси́мых: Засту́пница бу́ди нам, от вся́каго зла и лука́вствия избавля́ющи. Моли́ Ми́лостиваго Бо́га, да поми́лует нас в День Су́дный.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.
По 50-м псалме́ стихи́ра, глас 6:
Наста́ день све́тлаго торжества́,/ град Коло́мна ра́дуется,/ торжеству́я в па́мяти собо́ра новому́ченик учи́лища духо́внаго,/ ти́и бо яви́шася ю́ным наста́вницы и му́дрым утвержде́ние,/ святы́х соприча́стницы и Ца́рствия Христо́ва насле́дницы./ Ны́не же о нас Всеблага́го Бо́га усе́рдно мо́лят,// дарова́ти нам оставле́ние прегреше́ний на́ших и ве́лию ми́лость.
Кано́н Богоро́дицы, и новому́чеников, глас 8. Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Припе́в: Святи́и новому́ченицы, моли́те Бо́га о нас.
Ны́не сподо́би нас, Го́споди Человеколю́бче, воспе́ти му́чеников Твои́х достохва́льных, ревни́телей ве́ры правосла́вныя, да́же до кро́ве за Тя пострада́вших.
При́зрите на славосло́вие на́ше, духо́внаго учи́лища Коло́менскаго воспи́танницы и покрови́телие, да́руйте нам в ве́ре правосла́вней утвержде́ние и душа́м на́шим спасе́ние.
Днесь прославля́ем тве́рдаго ве́ры испове́дника, Григо́рия богому́драго, святи́телю Ти́хону в труде́х церко́вных помо́щника, преподо́бнаго Серафи́ма Вы́рицкаго сомоли́твенника, и Це́ркве Христо́вы му́ченика непобеди́маго.
Богоро́дичен: Мно́гими содержи́мь напа́стьми, к Тебе́ прибега́ю, спасе́ния иски́й: о Ма́ти Сло́ва и Де́во, от тя́жких и лю́тых мя спаси́.
Песнь 3
Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.
Ю́ных наста́вниче до́брый и тре́звости и́щущих помо́щниче, Ни́коне преподо́бне! Ты, гони́телей не убоя́вся, сло́во Христо́во да́же до сме́рти пропове́дал еси́. Ны́не же позна́лся еси́ гра́да Коло́мны моли́твенник те́плый и засту́пник ве́рный.
Па́стырю до́брый ста́да Христо́ва, Алекса́ндре досточу́дне, сло́во Бо́жие лю́дем возвеща́л еси́ усе́рдно, и му́чеником дре́вним тве́рдостию ве́ры уподо́бился еси́. Ны́не же мо́лишися Пастыренача́льнику о спасе́нии душ на́ших.
Житие́ многотру́дное пожи́л еси́, Па́вле богому́дре, незло́бием и долготерпе́нием искуше́ния побежда́я и по за́поведи Госпо́дни враго́в проща́я. Те́мже и крест свой досто́йно поне́сл еси́, и му́ченическия сме́рти не убоя́лся еси́, ча́я со Христо́м соедине́ния и жи́зни бу́дущаго ве́ка.
Богоро́дичен: Предста́тельство и покро́в жи́зни моея́ полага́ю Тя, Богороди́тельнице Де́во, Ты мя окорми́ ко приста́нищу Твоему́, благи́х вино́вна, ве́рных утвержде́ние, еди́на Всепе́тая.
Седа́лен, глас 3:
Прииди́те, мучениколю́бцы, собо́р страстоте́рпцев досточу́дный восхва́лим, духо́внаго учи́лища на́шего до́брое прозябе́ние, гра́да Коло́мны ди́вное украше́ние и Це́ркве Ру́сския похвалу́. Вознесе́м к ним моли́твы усе́рдныя: о уго́дницы Бо́жии, бу́дите нам наста́вницы во благоче́стии и чистоте́, и моли́твенницы те́плии пред Го́сподем.
Сла́ва, и ны́не, Богоро́дичен, глас то́йже:
Ле́ствице Небе́сная, от земли́ на Не́бо к Бо́гу нас возводя́щая! Не пре́зри моле́ния на́ша, Де́во Пречи́стая, но вонми́ словесе́м люде́й многогре́шных; не оста́ви нас лише́нных бы́ти Твоего́ те́плаго заступле́ния и по́мощи ско́рыя, Ты бо еси́ Хода́таица ди́вная пред Го́сподем.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.
Всем се́рдцем Бо́га возлюби́л еси́, сло́во Его́ до́бре пропове́дав, Гео́ргие священноиспове́дниче, сего́ ра́ди лю́дие богопроти́внии суду́ непра́ведному преда́ша тя. Ты же, во изгна́нии лише́ния и боле́зни досто́йно претерпева́я, блаже́нныя кончи́ны сподо́бился еси́, и Ца́рствия Небе́снаго прича́стник яви́лся еси́.
Воста́ша лжесвиде́телие на тя, Се́ргие приснопа́мятне, я́ко ре́вностный пропове́дник покая́ния и сла́вы Христо́вы был еси́. Те́мже гоне́ния, рабо́ты тя́жкия и смерть му́ченическую от безбо́жных прие́м, предстои́ши ны́не пред Престо́лом всех Царя́ и мо́лишися о ве́рою и любо́вию па́мять твою́ чту́щих.
От пия́нства тя́жкаго лю́ди отвраща́я, Иа́кове богому́дре, поуча́л еси́ ко Пресвяте́й Богоро́дице притека́ти и по́мощи Ея́ неотсту́пно проси́ти. Та́же и крест му́ченический на ра́мена своя́ подъя́л еси́, кро́вию свое́ю ве́ру засвиде́тельствовав и досто́йно вене́ц от Го́спода прии́м.
Богоро́дичен: Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.
Я́коже труба́ духо́вная, от сна грехо́внаго пробужда́ющая, был еси́, Илие́ досточу́дне, оба́че ненави́стен бысть глас благове́стия твоего́ слу́ху люде́й нечести́вых. Сего́ ра́ди тесноту́ и гоне́ния прии́м, вене́ц му́ченический от Христа́ улучи́л еси́.
Свеща́ светоза́рная, во тьме неве́рия сия́ющая, был еси́, Иоа́нне приснопа́мятне, я́ко ни лише́ний мно́жество, ни ско́рби теле́сныя поколеба́ти возмого́ша ве́ры твоея́. Ны́не же со все́ми святы́ми песнь побе́дную непреста́нно Бо́гу воспева́еши.
Грозд виногра́да Христо́ва был еси́, Васи́лие богому́дре, земли́ Балаши́хинския пресла́вное прозябе́ние, во дни гоне́ний ве́ру непоколеби́му показа́в. Те́мже мо́лим тя: о́тче досточу́дне, изба́ви нас от всех наве́т вра́жиих.
Богоро́дичен: Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.
Песнь 6
Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
Бо́га и бли́жняго своего́ всем се́рдцем возлюби́л еси́, Алекса́ндре досточу́дне, и ве́ру во Христа́ до конца́ испове́дал еси́. Те́мже вене́ц страда́ний му́ченических вку́пе со святы́м Се́ргием прии́м, ны́не мо́лишися о всех, ве́рою и любо́вию па́мять твою́ почита́ющих.
Подо́льския земли́ украше́ние яви́лся еси́, Алекса́ндре богому́дре, па́стырю до́брый и и́стинный, ко Христу́ ве́рныя приводя́й и от сете́й вра́жиих огражда́яй. Муче́ний же теле́сных не убоя́вся, досто́йно вене́ц от Бо́га прия́л еси́.
Ни боле́зни теле́сныя, ни темни́ца стра́шная возмого́ша тя разлучи́ти от любве́ Бо́жия, священному́чениче Пе́тре, Мыти́щинския земли́ изря́дная похвало́. Ны́не же с со́нмом новому́чеников Це́ркве Ру́сския предстои́ши пред Престо́лом Госпо́дним и возно́сиши моле́ния о чту́щих па́мять твою́.
Богоро́дичен: Предста́тельницу Тя живота́ вем, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу, и молю́ся всегда́, от тли страсте́й мои́х изба́вити мя.
Конда́к, глас 3:
Огнь благода́ти от Ду́ха восприи́мше,/ святи́и новому́ченицы учи́лища Коло́менскаго,/ огня́ безбо́жия не убоя́стеся/ и, Христа́ правосла́вно испове́давше,/ кровьми́ свои́ми ве́ру запечатле́сте./ Те́мже всех нас во благоче́стии утверди́те,/ уча́щим и уча́щимся просвеще́ние пода́йте,// богосло́вцы и му́ченицы пресла́внии.
И́кос:
Сосу́ди красне́йшии, благода́ти Свята́го Ду́ха испо́лненнии, вертогра́да Коло́менскаго кри́ни благоуха́ннии! Днесь по́двиги ва́ша досто́йныя прославля́юще, ве́ре и чистоте́ науча́емся и, припа́дающе к вам, со умиле́нием взыва́ем: всех нас во благоче́стии утверди́те, уча́щим и уча́щимся просвеще́ние пода́йте, богосло́вцы и му́ченицы пресла́внии.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́
По́двигом до́брым подвиза́лся еси́, Вениами́не досточу́дне, Ева́нгелие Христо́во безбоя́зненно пропове́дуя и мре́жами сло́ва ве́рных Го́сподеви уловля́я. Вразуми́ и нас за́поведем Бо́жиим после́довати и Ца́рствия Небе́снаго дости́гнути.
Гони́телей не убоя́лся еси́, о́тче Иоа́нне приснопа́мятне, и, в терпе́нии злострада́ний кре́пость духо́вную обре́т, му́ченически по́прище земно́е сконча́л еси́. Те́мже и вене́ц нетле́нный досто́йно прии́м, вы́ну мо́лишися Триеди́ному Бо́гу на́шему, да поми́лует нас в День Су́дный.
Труды́ мно́гия и му́ки тя́жкия за ве́ру правосла́вную претерпе́в, Це́ркве Христо́вы испове́дник непобеди́мый яви́лся еси́, о́тче Алекса́ндре. Те́мже и смерть тебе́ приобре́тение бысть, и жизнь со Христо́м ‒ достоя́ние ве́чное.
Богоро́дичен: На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́: оте́ц на́ших Бо́же, благослове́н еси́.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.
Преще́ния нечести́вых ни во что́же вмени́в, служе́ния па́стырскаго не отве́рглся еси́, о́тче Дими́трие досточу́дне. Те́мже, Спаси́теля воскре́сшаго безстра́шно пропове́дав, му́ченическаго венца́ сподо́бился еси́ и возше́л еси́ в селе́ния Небе́сная, иде́же со Христо́м во ве́ки пребыва́еши.
Диа́конское служе́ние до́бре соверша́я, священному́чениче Дими́трие, ве́ру правосла́вную в чистоте́ соблю́л еси́, и страда́ния за Христа́ да́же до кро́ве прия́л еси́. Не оста́ви нас, о́тче долготерпели́ве, и вонми́ моле́нием на́шим, да с тобо́ю в ве́це гряду́щем Бо́га прославля́ем.
Воспева́ем по́двиги ва́ша, новому́ченицы Христо́вы, я́ко пра́вило ве́ры яви́лися есте́, гра́да Коло́мны ве́лия похвало́, учи́лища духо́внаго покрови́телие и наста́вницы, ю́ных в ве́ре и благоче́стии утвержде́ние. Не оста́вите ча́да ва́ша духо́вная, па́мять ва́шу любо́вию чту́щая.
Богоро́дичен: По́мощи, я́же от Тебе́, тре́бующия не пре́зри, Де́во, пою́щия и превознося́щия Тя во ве́ки.
Песнь 9
Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.
Тя, Небе́снаго Царя́, славосло́вим непреста́нно, яви́л бо еси́ нам собо́р новому́чеников Твои́х, во учи́лищи Коло́менстем воспита́нных, па́стырей богому́дрых, смерть за ве́ру правосла́вную прии́мших и ве́чную жизнь насле́довавших.
Благоче́стно на земли́ пожи́ли есте́, новому́ченицы приснопа́мятнии. Вы бо, страда́ния за Христа́ претерпе́вше, Небе́сныя сла́вы от Него́ удосто́илися есте́. Те́мже моли́теся о гра́де свое́м и о всех лю́дех, па́мять ва́шу пе́сньми велича́ющих.
Ны́не Це́рковь Ру́сская воспева́ет вас, новому́ченицы на́ши, кри́ни прекра́снии, сла́достию жития́ ва́шего благоуха́ющии. Напита́йте нас некта́ром Христо́ва уче́ния, да просла́вим Бо́га, подаю́щаго всем я́же ко спасе́нию проше́ния.
Богоро́дичен: То́ка слез мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.
Свети́лен, глас 6:
Све́та Незаходи́маго благове́стницы громогла́снии, моли́твенницы те́плии, служи́телие усе́рднии Пастыренача́льника Христа́, му́ченицы достохва́льнии, вонми́те моле́нием на́шим и бу́дите хода́таи пред Го́сподем, да пода́ст нам прегреше́ний оставле́ние, ми́рови мир и ве́лию ми́лость.
Сла́ва, и ны́не, Богоро́дичен, глас то́йже:
Ты еси́ Скоропослу́шница на́ша, проше́нием чад Твои́х вне́млющая, Богоро́дице Де́во, моли́ Сы́на Твоего́, Христа́ Бо́га на́шего, мир ми́рови дарова́ти и душа́м на́шим ве́лию ми́лость.
На хвали́тех стихи́ры, глас 1.
Подо́бен: Небе́сных чино́в:
Сосу́ди избра́ннии, священному́ченицы приснопа́мятнии,/ во учи́лищи Коло́менстем воспита́ннии!/ Вы, крест на ра́мена своя́ подъе́мше/ и гони́телей безбо́жных не убоя́вшеся,/ Христа́ му́жественно пропове́дали есте́.// Те́мже вас ве́рою почита́ем.
Цве́ти благоуха́ннии, испове́дницы Христо́вы,/ покрови́телие учи́лища на́шего!/ Вы, от ю́ности благоче́стию навы́кше,/ в земли́ Моско́встей духо́вно процвели́ есте́/ и плоды́ сла́дкими ча́да ва́ша напита́ли есте́.// Те́мже вас с наде́ждою почита́ем.
Адама́нти тве́рдии, страстоте́рпцы достосла́внии,/ гра́да Бо́жия ка́мение многоце́нное!/ Вы, гони́телем не покори́вшеся,/ служе́ние па́стырское ве́рно соверша́ли есте́/ и кровь свою́ за Христа́ пролия́ли есте́.// Те́мже вас любо́вию почита́ем.
Сла́ва, глас 8:
Днесь па́мять ва́шу пе́сньми духо́вными воспева́ем,/ ученицы́ Христо́вы и́стиннии./ Вы, пе́рвее уче́ние в Коло́менстем учи́лищи восприи́мше,/ зе́млю серде́ц свои́х возде́лали есте́/ и, се́мена догма́т правосла́вных насе́явше,/ плоды́ благоче́стия и чистоты́ возрасти́ли есте́,/ и лю́ди, гла́дом духо́вным ги́блющия, напита́ли есте́./ Ны́не же с ва́ми торжеству́ем и мо́лимся:// не забу́дите чад ва́ших, благогове́йно вас почита́ющих.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
НА ЛИТУРГИ́И
Блаже́нны от кано́на, пе́сни 3-я и 6-я, на 4. Проки́мен, глас 7: Бог нам прибе́жище// и си́ла. Стих: Помо́щник в ско́рбех, обре́тших ны зело́. Апо́стол ко Евре́ем, зача́ло 134. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 105‒106. Коне́ц: В терпе́нии ва́шем стяжи́те душа́ ва́ша. Прича́стен: Ра́дуйтеся, пра́веднии, о Го́споде, пра́вым подоба́ет похвала́.
Моли́тва
О новому́ченицы достохва́льнии, вертогра́да духо́внаго цве́ти благоуха́ннии и гра́да Коло́мны пресла́вное украше́ние! Вы, изде́тска нача́тки пра́вых уче́ний восприе́мше и во благоче́стии утверди́вшеся, бо́льших дарова́ний жела́юще дости́гнути, во град Коло́мну приидо́сте и во учи́лище духо́вное собра́стеся. Зде же не то́кмо богосло́вию поуча́стеся, но, и́стиннаго любому́дрия взыску́юще, умо́м и се́рдцем позна́сте, я́ко ничто́же есть превы́ше любве́, я́же друг ко дру́гу и ко Христу́, Бо́гу на́шему. Те́мже и Той возлюби́ вас и поста́ви па́стыри и учи́тели Це́ркве Своея́. Егда́ же прии́де брань от безбо́жных, вы, лише́ния, изгна́ния и муче́ния му́жественне претерпе́вше, тве́рдостию ве́ры мучи́тели посрами́ли есте́ и, я́ко во́ини добропобе́днии, си́лою Бо́жиею ухищре́ния вра́жия препобеди́ли есте́. Ны́не же по́двиги ва́ша почита́юще и чистоту́ ве́ры прославля́юще, мо́лим вас, новому́ченицы: помяни́те нас во святы́х и благоприя́тных моли́твах ва́ших ко Го́споду. Недосто́йни есмы́ нарещи́ся насле́дники ва́шея ре́вности и благоче́стия, я́же в вас зрим, достосла́внии, оба́че сподо́бите ны поне́ вма́ле причасти́тися духо́вных дарова́ний ва́ших. Отве́рзите мы́сленныя о́чи на́ши, е́же зре́ти Го́спода Иису́са Христа́, у́ши, е́же слы́шати глас ева́нгельских за́поведей, ра́зум же наста́вите внима́ти уче́нию церко́вному, и вся у́ды на́ша покори́те в послуша́ние зако́ну Бо́жию, да Христо́вы бу́дем, плоть распя́вше со страстьми́ и похотьми́. И та́ко, позна́вше любо́вь Христо́ву, просла́вим ди́внаго во святы́х Свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.
