Акафист святителю Иоанну Тобольскому, Сибирскому чудотворцу
Ака́фист святи́телю Иоа́нну Тобо́льскому, Сиби́рскому чудотво́рцу
Конда́к 1
Возбра́нный чудотво́рче и прему́дрый па́стырю, свети́льниче Бо́жий,/ осия́вый страны́ Сиби́рския,/ восхваля́ем тя любо́вию, свя́те Иоа́нне,/ о чудесе́х твои́х ра́дующеся./ Ты же, предстоя́й су́щему в невече́рней сла́ве Царю́ Небе́сному,/ моли́ от вся́ких бед сохрани́тися пою́щим ти:// Ра́дуйся, святи́телю о́тче наш Иоа́нне, Сиби́рский чудотво́рче.
И́кос 1
А́нгелы удиви́л еси́ пресла́вным житие́м твои́м, святы́й о́тче, серафи́мски возже́г свяще́нный пла́мень ве́ры в Зижди́теля Прему́драго, и возлюби́л еси́ ма́лых сих, и́хже Бог Сло́во бра́тию Свою́ нарица́ет. Те́мже и мы, покланя́ющеся ти, взыва́ем:
Ра́дуйся, тве́рдый ка́меню ве́ры правосла́вныя;
ра́дуйся, све́точе любве́ христиа́нския.
Ра́дуйся, пра́вды Христо́вы служи́телю;
ра́дуйся, и́стины Бо́жия носи́телю.
Ра́дуйся, просла́вивый Отца́ Небе́снаго до́брыми де́лы твои́ми;
ра́дуйся, ца́рствуяй во сла́ве Бо́жией со все́ми святы́ми.
Ра́дуйся, любо́вию твое́ю объе́мляй стра́ждущия;
ра́дуйся, моли́твою твое́ю спаса́яй погиба́ющия.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 2
Ви́дя жите́йское мо́ре, бу́рею напа́стей воздвиза́емое, к ти́хому приста́нищу оби́тели Пече́рския прите́кл еси́, крестолю́бче, и отре́кся тле́ннаго ми́ра, Ве́чному Бо́гу воспе́л еси́: Аллилу́ия.
И́кос 2
Ра́зум чист от Бо́га тебе́ дарова́ся, о́тче Иоа́нне, и ты, я́ко ве́рный раб, де́лавый и труди́выйся, умно́жил еси́ благода́ти тала́нт, те́мже призва́ тя Госпо́дь в ра́дость ве́чную. Мы же пое́м ти, богому́дре:
Ра́дуйся, бде́нием чистоту́ ума́ сохрани́вый;
ра́дуйся, поще́нием стра́сти плотски́я умертви́вый.
Ра́дуйся, зми́я лука́ваго смире́нием победи́вый;
ра́дуйся, бога́тство нетле́нное получи́вый.
Ра́дуйся, се́рдце вели́кое в терпе́нии стяжа́вый;
ра́дуйся, о́рле, к Небеси́ умозре́нием воспари́вый.
Ра́дуйся, по пути́ кре́стному ше́ствовавый;
ра́дуйся, Ца́рствие Небе́сное насле́довавый.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 3
Си́лою Креста́ неустраши́мо подвиза́лся еси́, преподо́бне Иоа́нне, проти́ву кня́зя ми́ра сего́, во́инствуя за Це́рковь и водружа́я зна́мение побе́ды Христо́вы с пе́снию: Аллилу́ия.
И́кос 3
Име́я неоску́дное милосе́рдие ко вся́кому челове́ку, о́тче Иоа́нне, яви́лся еси́ скорбя́щим утеше́ние, заблу́ждшим вразумле́ние, оби́димым заступле́ние, о си́рых и вдови́цах неусы́пное попече́ние и всем помо́щник во спасе́нии. Благодари́м о тебе́ Бо́га, ди́внаго во святы́х Свои́х, и тебе́ прино́сим пе́ние сие́:
Ра́дуйся, во́лю твою́ во́ли Бо́жией сообразова́вый;
ра́дуйся, ве́рою благода́ть позна́вый.
Ра́дуйся, благода́тию доброде́тели стяжа́вый;
ра́дуйся, всего́ себе́ ни́щим отда́вый.
Ра́дуйся, в ми́лости неизме́нный;
ра́дуйся, врачу́ безме́здный.
Ра́дуйся, немощны́м от всея́ души́ послужи́вый;
ра́дуйся, и́стинно Христу́ угоди́вый.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 4
Бу́рю за́висти воздви́же лука́вый в сердца́х рабо́в самолю́бия, да погуби́т де́ло твое́, и научи́ го́рдыя клевета́ти пред цари́ на тя, побо́рниче благоче́стия. Бог же изведе́ пра́вду твою́, я́ко свет, и спасе́ тя, во смире́нии пою́ща Христу́: Аллилу́ия.
И́кос 4
Слы́ша стена́ния бе́дствующих во дни гла́да, призва́л еси́ духо́вная ча́да твоя́ с тобо́ю хлеб насу́щный раздая́ти тре́бующим, до́брый и бо́дрый па́стырю, ду́ши челове́ческия милосе́рдием назида́яй, и от гла́да и безвре́менныя сме́рти лю́ди спаса́яй. Те́мже в честь и сла́ву приими́ пе́ние сие́:
Ра́дуйся, Хле́бом Небе́сным насыще́нный;
ра́дуйся, питие́м безсме́ртия напое́нный.
Ра́дуйся, Бо́га Сло́ва учениче́ неизме́нный;
ра́дуйся, Ду́хом Святы́м осене́нный.
Ра́дуйся, Отцу́ Небе́сному всыновле́нный;
ра́дуйся, Пресвяты́я Тро́ицы хра́ме одушевле́нный.
Ра́дуйся, от бед и скорбе́й избавле́ние;
ра́дуйся, лука́вых серде́ц исправле́ние.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 5
Богоразу́мия звездо́, возсия́л еси́ во тьме неве́дения, о́тче Иоа́нне, луча́ми ева́нгельскаго уче́ния проника́я в сердца́ челове́ческая и подвиза́я всех воспева́ти Со́лнцу Пра́вды Христу́: Аллилу́ия.
И́кос 5
Ви́дя мрак неве́дения, челове́ки покрыва́ющий, бога́тство уче́ния Христо́ва расточи́л еси́ ще́дро, и неуста́нно труди́лся еси́, о́тче Иоа́нне, си́лу в моли́тве от Исто́чника прему́дрости почерпа́я. Сего́ ра́ди почита́ем твою́ светоно́сную па́мять, взыва́юще:
Ра́дуйся, украше́нный седи́ною любому́дрия;
ра́дуйся, позлаще́нный доброде́телию смиренному́дрия.
Ра́дуйся, богодухнове́нный учи́телю;
ра́дуйся, духо́внаго просвеще́ния покрови́телю.
Ра́дуйся, яснотеку́щая струя́ богове́дения;
ра́дуйся, И́стиннаго Све́та пропове́дание.
Ра́дуйся, я́ко о́троки умудря́еши;
ра́дуйся, я́ко младе́нцем ра́зум открыва́еши.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 6
Пропове́дник сла́вы Бо́жия де́лом и сло́вом был еси́, о́тче Иоа́нне, те́мже избра́ тя прее́мника себе́ святи́тель Феодо́сий, с ни́мже во Ца́рствии Небе́снем пое́ши: Аллилу́ия.
И́кос 6
Возсия́л еси́ в дому́ Бо́жии, свети́льниче Христо́в Иоа́нне, егда́ избра́ша тя ве́рнии во архиере́я, по блаже́нней кончи́не свята́го Феодо́сия. Его́же па́ству ве́рно упа́сл еси́, пою́щу тебе́:
Ра́дуйся, я́ко оде́я тя Прему́дрость безле́тная;
ра́дуйся, я́ко украси́ тя Красота́ пресве́тлая.
Ра́дуйся, в ри́зу спасе́ния облече́нный;
ра́дуйся, влады́ко смире́нный.
Ра́дуйся, венце́м сла́вы венча́нный;
ра́дуйся, архипа́стырю избра́нный.
Ра́дуйся, о́вцы твоя́ сохрани́вый;
ра́дуйся, по́двиг любве́ соверши́вый.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 7
Хотя́ получи́ти Небе́сную сла́ву, блаже́нне Иоа́нне, списа́л еси́ кни́ги мно́гия, в ни́хже науча́еши ве́рныя упова́ти на Бо́га и в ско́рби пе́ти Ему́: Аллилу́ия.
И́кос 7
Но́вый чудотво́рец святи́тель Феодо́сий боля́щу ти, о́тче Иоа́нне, яви́ся и повеле́ тебе́ соверша́ти Литурги́ю. Ты же а́бие воста́ от одра́ боле́зни здрав и вознесе́ благодаре́ние Христу́. О сем ра́дующеся, пое́м ти:
Ра́дуйся, таи́нниче моли́твенныя сла́дости;
ра́дуйся, храни́телю благода́тныя ра́дости.
Ра́дуйся, в ско́рби и боле́зни Небе́снаго Врача́ призва́вый;
ра́дуйся, по ве́ре твое́й исцеле́ние прия́вый.
Ра́дуйся, благоуха́ния цве́те, возрасты́й в безсме́ртие;
ра́дуйся, высото́ю жития́ твоего́ посрами́вый нече́стие.
Ра́дуйся, я́ко призыва́ющим тя помога́еши;
ра́дуйся, я́ко в со́ниих и виде́ниих ве́рныя посеща́еши.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 8
Стра́нное чу́до ви́дим в тебе́, богоно́сне Иоа́нне, ты бо в ста́рости, я́ко ю́ный, испо́лнен сил, послужи́ти Христу́ в Сиби́рь прише́л еси́, веща́ние же и́стины Правосла́вия труды́ твои́ми про́йде до земли́ Кита́йския, и но́вии лю́дие Бо́жии научи́шася пе́ти: Аллилу́ия.
И́кос 8
Весь был еси́ в Бо́зе, Его́же пропове́дал еси́ во стране́ изгна́ния, умножа́я ста́до спасе́нных, те́мже Це́рковь велича́ет тя, пою́щи:
Ра́дуйся, лю́ди от и́дол ко Христу́ обраща́яй;
ра́дуйся, ико́нами Богома́тере духо́вных чад благословля́яй.
Ра́дуйся, я́ко хла́дную Сиби́рь благода́тно согрева́еши;
ра́дуйся, я́ко нощь скорбе́й отгоня́еши.
Ра́дуйся, я́ко всем состра́ждеши;
ра́дуйся, я́ко пра́вилом жития́ твоего́ всех назида́еши.
Ра́дуйся, темни́ц посети́телю;
ра́дуйся, и́стинный Христо́в служи́телю.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 9
Все твое́ се́рдце отда́л еси́ во исполне́ние ева́нгельския пра́вды, те́мже мно́гая до́брая дела́ соверши́л еси́, боголюби́вый о́тче, в кра́ткое вре́мя служе́ния твоего́ в Тобо́льске, та́йно благотворя́ и у́зники посеща́я во и́мя Иису́са Христа́, Ему́же всех призыва́еши возглаша́ти: Аллилу́ия.
И́кос 9
Вети́йство челове́к не мо́жет сложи́ти досто́йную похвалу́ святы́ни твое́й, о́тче, я́ко Сам Бог просла́ви тя чу́дною кончи́ною жития́ твоего́, ю́же прови́дя, соверши́л еси́ Литурги́ю и, послужи́в трапе́зе ни́щих в дому́ твое́м, уедини́лся еси́ на моли́тву и та́ко отше́л еси́ ко Го́споду, пред ико́ною Богома́тере приклони́вся. Мы же во умиле́нии пое́м ти:
Ра́дуйся, усну́вый пло́тию на земли́;
ра́дуйся, живы́й душе́ю на Небеси́.
Ра́дуйся, со апо́столы Христу́ покланя́яйся;
ра́дуйся, с му́ченики венча́яйся.
Ра́дуйся, в собо́ре святы́х оте́ц сия́яй;
ра́дуйся, в ли́це преподо́бных воспева́яй.
Ра́дуйся, ико́ну Богома́тере дарова́вый Тобо́льску во благослове́ние;
ра́дуйся, я́ко сия́ чудотво́рная ико́на есть на́ше огражде́ние.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 10
Спасе́ние душа́м на́шим испроси́, о́тче святы́й Иоа́нне, да возсия́ют пра́вда и мир посреде́ па́ствы твоея́, и в Це́ркви вели́цей испове́мыся Бо́гу: Аллилу́ия.
И́кос 10
Стена́ еси́ бе́дным и сиро́тствующим, ми́лостиве святи́телю Иоа́нне, утеше́ние на́ше во дни ско́рби, исцеле́ние неду́гующим, просвеще́ние слепотству́ющим. Сего́ ра́ди, припа́дающе ко святы́не твое́й, зове́м ти:
Ра́дуйся, я́ко де́ло земна́го жития́ твоего́ продолжа́еши;
ра́дуйся, я́ко на стра́жи спасе́ния на́шего пребыва́еши.
Ра́дуйся, по́стниче и моли́твенниче, злы́я ду́хи изгоня́яй;
ра́дуйся, де́вственниче, разсла́бленныя укрепля́яй.
Ра́дуйся, Бо́жий свети́льниче, зре́ние уясня́яй;
ра́дуйся, пропове́дниче ве́ры, слух исцеля́яй.
Ра́дуйся, я́ко мно́зи припа́дают к тебе́ освяща́емии;
ра́дуйся, я́ко издале́ча мо́лятся тебе́ спаса́емии.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 11
Пе́ние сие́, я́ко дар смире́нный, приими́ от нас, о́тче Иоа́нне, и соверше́нный дар любве́ нам испроси́, да у́зрим сла́ву Бо́жию и в Небесе́х услы́шим: Аллилу́ия.
И́кос 11
Светоза́рное со́лнце, возше́дшее во тьме грехо́вней, зри́шися, о́тче преподо́бне, Живы́й бо во ве́ки дарова́ тебе́ власть и по сме́рти изгоня́ти де́моны и собира́ти ве́рныя на моли́тву, те́мже две сте лет притека́ху ко гро́бу твоему́ лю́дие и завеща́ху ро́ду гряду́щему велича́ти тя:
Ра́дуйся, я́ко ту́чи неве́рия разгоня́еши;
ра́дуйся, я́ко мра́чныя ду́ши ве́рою озаря́еши.
Ра́дуйся, я́ко наде́жду спасе́ния оживля́еши;
ра́дуйся, я́ко отча́янныя спаса́еши.
Ра́дуйся, я́ко па́дшия возставля́еши;
ра́дуйся, я́ко уны́лыя воздвиза́еши.
Ра́дуйся, я́ко вся́ку сле́зу бе́дствующих отъе́млеши;
ра́дуйся, я́ко сле́зы покая́ния исторга́еши.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 12
Благода́ть исцеле́ния пролия́ся от святы́х моще́й твои́х, о́тче Иоа́нне, и собра́шася от всех конце́в земли́ Росси́йския ча́да твоя́ под се́нию ма́тере церкве́й сиби́рских на ме́сто погребе́ния твоего́, и возопи́ша Бо́гу: Аллилу́ия.
И́кос 12
Пою́ще Ми́лостиваго Бо́га, свет в душа́х и горя́щия свещи́ в рука́х иму́ще, срето́ша ве́рнии честны́я и многоцеле́бныя мо́щи твоя́, преподо́бне Иоа́нне, архиере́и же пронесо́ша их о́крест Софи́йския це́ркве. Тогда́ со слеза́ми умиле́ния ви́деша вси, я́ко Не́бо и земля́ сторжеству́ют с на́ми, тре́петно взыва́юще:
Ра́дуйся, А́нгелом сожи́телю;
ра́дуйся, го́рния Це́ркве служи́телю.
Ра́дуйся, я́ко па́ству твою́ моли́твами покрыва́еши;
ра́дуйся, я́ко пред чу́дною ико́ною Богома́тере мощьми́ почива́еши.
Ра́дуйся, я́ко Первообра́зную лицезри́ши;
ра́дуйся, я́ко Пресвяте́й Тро́ице предстои́ши.
Ра́дуйся, Бо́гови принося́й о нас кади́ло умилостивле́ния;
ра́дуйся, неусы́пный хода́таю на́шего спасе́ния.
Ра́дуйся, святи́телю о́тче наш Иоа́нне, Сиби́рский чудотво́рче.
Конда́к 13
О вели́кий святи́телю Иоа́нне, приими́ моле́ние сие́ на́ше и, принося́ его́ ко Престо́лу Всевы́шняго, испроси́ стране́ на́шей ми́ра и ве́ры утвержде́ния, лю́дем же оправда́ния пред очи́ма Стра́шнаго Судии́ и насле́дия Ца́рствия Бо́жия, во е́же приноси́ти песнь хвалы́: Аллилу́ия.
Сей конда́к глаго́лется три́жды.
И па́ки чте́тся и́кос 1-й, и конда́к 1-й.
Моли́тва
О па́стырю до́брый, святи́телю о́тче наш Иоа́нне, пра́ведный путь жития́ твоего́ приведе́ тя к Ве́чному Со́лнцу Пра́вды. Ты бо все́ю душе́ю взыска́л еси́ Бо́га, возлюби́л еси́ Его́ па́че сея́ вре́менныя жи́зни. Мы же удали́хомся Бо́жия благосты́ни, ходя́ще по злей свое́й во́ли, возлюби́хом су́етная наслажде́ния, вознераде́хом о спасе́нии душ на́ших, затвори́хом се́рдце для слы́шания сло́ва Боже́ственнаго и отверго́хомся братолю́бия. О бла́гостный святи́телю Иоа́нне! Не попусти́ нам поги́бнути в ти́не грехо́в на́ших, но вознеси́ о нас моле́ние ко Го́споду, да поми́лует нас и да́рует нам покая́ние, да не поглоти́т нас бе́здна лихои́мства, зло́бы и лжи, да умо́лкнет междоусо́бная брань, да изба́вится земля́ на́ша гла́да и вся́каго гне́ва Бо́жия, да воцари́тся мир среди́ ми́ра земна́го. Услы́ши нас гре́шных, свя́тче Бо́жий, яви́ нам чу́дное заступле́ние твое́, посети́ нас си́рых, ни́щих, бе́дствующих и заблу́ждших ове́ц твоего́ ста́да: неду́ги на́ша исцели́, укрепи́ си́лы к терпели́вому несе́нию креста́ жи́зни, внемли́ стена́нию стра́ждущих, рыда́нию одино́ких, при́зри на сле́зы немощны́х и печа́льных. Мы боле́знуем душе́ю и изнемога́ем се́рдцем; моли́ся, побо́рниче и́стины, да возвратя́тся отпа́дшии в ло́но Це́ркве Христо́вы, да сла́вится и́мя Бо́жие в нас, да ца́рствует пра́вда и любы́ в земли́ на́шей, и мир Христа́ Бо́га на́шего да сподо́бимся прия́ти, ра́дость же о Го́споде да возсия́ет в сердца́х на́ших, и благослови́м пречестно́е и великоле́пое и́мя Единосу́щныя и Неразде́льныя Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
