Тропарь, кондак и молитва священномученику Леониду Серебренникову
Ме́сяца декабря́ в 25-й день
Священному́ченика Леони́да Сере́бренникова, пресви́тера
Тропа́рь, глас 5:
Восхва́лим, ве́рнии, пресви́тера Леони́да,/ земли́ Приаму́рския украше́ние,/ доброде́тели своя́ я́ко тала́нты умно́женныя Христу́ прине́сшаго./ Претерпе́в бо жесто́кий мраз, поноше́ния и страда́ния/ и искуше́н быв, я́коже сребро́ в горни́ле,/ предаде́ ду́шу свою́ Страда́вшему за ны./ Сего́ ра́ди венце́м му́ченическим укра́шен,/ во сла́ве Престо́лу всех Влады́ки предстои́т,// моля́ непреста́нно о всех нас.
Конда́к, глас 2:
Стопа́м отца́ твоего́ после́дуя,/ под покро́вом Богома́тере де́латель жа́твы Госпо́дни яви́лся еси́./ Егда́ же сгусти́шася гро́зныя ту́чи испыта́ний,/ не угасе́ свети́льник ве́ры твоея́,/ священному́чениче Леони́де,/ но ве́рен пребы́л еси́ Христу́ да́же до сме́рти./ Тем зове́м ти:/ моли́ Ми́лостиваго Бо́га/ зе́млю Ру́сскую от восто́к да́же до за́пад// при́сно покрыва́ти заступле́нием Свои́м.
Моли́тва
О святы́й священному́чениче Леони́де, Спа́са Христа́ уго́дниче, земли́ Дальневосто́чныя похвало́, новому́чеников и испове́дников Це́ркве Ру́сския соприча́стниче! Ты, доброде́тельным житие́м, усе́рдным служе́нием и му́ченическою кончи́ною Ца́рствие Небе́сное стяжа́в, ны́не с ли́ки святы́х во сла́ве неизрече́нней пребыва́еши. Сего́ ра́ди мо́лим тя, моли́твами твои́ми ко Го́споду испроси́ нам покая́ние нелицеме́рное, исправле́ние жития́ грехо́внаго, к бли́жним милосе́рдие и сострада́ние, во обстоя́ниих многоразли́чных му́жество и долготерпе́ние. Наипа́че же моли́ Христа́ Бо́га, да не оста́вит нас гре́шных без Своея́ вели́кия и бога́тыя ми́лости, не то́кмо в привре́меннем ве́це сем, но и в бу́дущем, безконе́чнем, иде́же вку́пе с тобо́ю да сподо́бимся сла́вити Отца́, и Сы́на, и Свята́го Ду́ха, во ве́ки веко́в. Ами́нь.
