Служба (иная) святителю Тихону, Патриарху Московскому и всея России

Ме́сяца сентября́ в 26-й день
И́на слу́жба святи́телю Ти́хону,
Патриа́рху Моско́вскому и всея́ Росси́и,
испове́днику

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 1:

Избра́нный на путь кре́стный и испове́дный,/ святы́й Патриа́рх да восхва́лится днесь,/ и́же с па́ствою свое́ю ча́шу му́ченичества испи́ за ве́ру правосла́вную,/ воззове́м ему́: святи́телю о́тче наш Ти́хоне,/ прииди́ и осени́ благослове́нием Небесным// Бо́гом со́бранныя лю́ди твоя́.

Во́йны и глад и крова́вая сму́та/ жре́бий твой тя́жкий, святи́телю наш!/ Ты же в покая́нии путь спасе́ния нам указу́я, звал еси́ озло́бленныя:/ возлюби́те бли́жняго своего́,// обрати́теся ко Го́споду, и спасе́теся.

Взыва́ю к вам, архипа́стырие и па́стырие,/ веща́л еси́, свя́те Ти́хоне, Патриа́рше наш:/ сы́нове мои́ и дще́ри во Христе́,/ спеши́те с про́поведию покая́ния,/ противоста́ните враго́м Це́ркве си́лою ве́ры на́шея./ Зове́м вы на страда́ния вме́сте с собо́ю,/ свята́го апо́стола словесы́:// кто ны разлучи́т от любве́ Бо́жия?

Страда́ния мно́гая претерпе́л еси́, о́тче Ти́хоне:/ клеветы́, суды́, заточе́ния,/ преда́тельства лжебра́тий и угро́зы сме́ртныя,/ наси́льства и нападе́ния враго́в Це́ркве Христо́вы;/ но ты пребы́л еси́ му́жествен и кро́ток, веща́я:/ не ожесточа́йте серде́ц ва́ших,// но возмога́йте о Го́споде!

И́ны стихи́ры, глас 2.

Подо́бен: Егда́ от Дре́ва:

Со́лнце кра́сное Це́ркве Ру́сския яви́лся еси́,/ луча́ми ве́ры и любве́ твоея́ согрева́я вся концы́ ея́:/ Хо́лмския преде́лы просвеща́я,/ Аме́рику да́льнюю ко Христу́ приводя́,/ зе́млю Яросла́вскую утвержда́я во благоче́стии,/ Лито́вскую страну́ во дни бра́ни моли́твою твое́ю огражда́я./ В годи́ну же гоне́ний на патриа́ршество Моско́вское возведе́н,/ страж неусы́пный всей Руси́ дарова́н был еси́// от Спа́са душ на́ших, Человеколю́бца.

По́двиг до́брый от ю́ности твоея́ подъе́м,/ спаса́ти мно́гия поста́влен бысть,/ све́точу ми́ра, о́тче наш Ти́хоне,/ страда́льцев за и́стину вдохнови́телю,/ па́ствы путевождю́, разсужде́ния свети́льниче,/ о́бразе сло́ва, жития́, любве́,/ ду́ха кре́пкаго и ве́ры непоколеби́мыя утвержде́ние,/ же́ртво благоприя́тная// Христу́ Человеколю́бцу.

В ке́лии оби́тели Донски́я заключе́н,/ служе́ния у престо́ла Бо́жия лиша́емь,/ но́щи и дни о ми́ре Це́ркве моли́л еси́, святи́телю,/ и ми́ром лю́ди издале́че благословля́л еси́,/ ко огра́де со слеза́ми любве́ притека́ющия,/ ми́ром еди́ным с тобо́ю от купе́ли пома́занныя,/ коле́на душ и теле́с прекло́ньшия,/ и ны́не нас, к моще́м твои́м приходя́щих, утеша́еши// ми́ром чуде́с от Христа́ Человеколю́бца.

Омофо́р святи́тельский на ра́мех твои́х,/ во о́браз овча́те обре́теннаго,/ я́ко бре́мя служе́ния кре́стное/ носи́л еси́, Патриа́рше Ти́хоне,/ восходя́ Голго́фою Росси́йскою в ра́дость ве́чную./ Те́мже и ны́не к Бо́гу приво́диши/ мно́гия лю́ди, усе́рдно взыва́ющия:/ в Правосла́вии нас соблюди́// си́лою Христа́ Человеколю́бца.

Сла́ва, глас 1:

Ви́деша вси концы́ земли́ на́шея/ кре́пость испове́дания твоего́,/ святи́телю о́тче наш Ти́хоне,/ я́ко еди́наго от дре́вних:/ во дни бо гоне́ний от безбо́жных,/ моли́твою со апо́столы, проро́ки и му́ченики соедине́н,/ был еси́ еди́нства Це́ркве побо́рник./ И ны́не лю́ди твоя́ в едине́нии соблюди́,/ Триеди́наго Бо́га воспева́я непреста́нно/ и в по́мощь на́шу призыва́я Богоро́дицу,// еди́ну Чи́стую и Благослове́нную.

И ны́не, догма́тик, глас то́йже: Всеми́рную сла́ву:

Вход. Проки́мен дне.

Чте́ния три священноиспове́днику Це́ркве Ру́сския XX ве́ка.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух cи́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́диe же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.

На лити́и стихи́ры, глас 1:

Святи́теля Ти́хона, Патриа́рха Моско́вскаго,/ во мра́це гоне́ний свети́льника,/ по́двига и милосе́рдия учи́теля,/ завеща́ния сло́во восприи́мем:/ О па́стыри и ча́да церко́вная,/ моли́теся непреста́нно,/ исторга́юще проще́ние Не́ба согреши́вшей земли́,/ да омы́емся вси слеза́ми покая́нными,// и Святы́ми Та́йнами да обнови́мся.

Глас 3:

Глас Святы́я Це́ркве Правосла́вныя/ посреде́ Руси́ разоре́нныя воззва́ дерзнове́нно:/ прииди́те, ча́да, послу́шайте отца́ ва́шего,/ прииди́те, приими́те предстоя́теля от Бо́га вам да́ннаго,/ прииди́те, ви́дите, ка́ко умира́ет на вся́кий день,/ прииди́те, словесе́м того́ после́дуйте,/ припади́те ко Христу́ и моли́теся из глубины́ души́:/ сохрани́, Го́споди, на Руси́ ве́ру правосла́вную,// свята́го Патриа́рха Ти́хона моли́твами.

Сла́ва, глас 8:

Бог любы́ есть,/ и пребыва́яй в любви́ в Бо́зе пребыва́ет,/ я́коже у́чит апо́стол, Христу́ возлю́бленный,/ и ты у́бо, святи́телю Ти́хоне,/ любо́вь к Бо́гу возгрева́я в се́рдце твое́м,/ согрева́л еси́ любо́вию всех приходя́щих к тебе́,/ тем и в преставле́ние Иоа́нна Богосло́ва просла́влен быв,// от любве́ твоея́ не отри́ни нас.

И ны́не, Богоро́дичен, глас то́йже: Небе́сная пою́т Тя:

На стихо́вне стихи́ры, глас 1.

Подо́бен: Небе́сных чино́в:

Во́ли Бо́жия пра́ведный иска́телю и побо́рниче,/ о́тче Ти́хоне, моли́твенниче пла́менный за Це́рковь и зе́млю Ру́сскую,/ любве́ Христо́вы святы́й и кро́ткий подви́жниче,/ засту́пниче безстра́шный неви́нно стра́ждущих!/ Проро́честв твои́х ви́дехом стра́шное сбытие́.// Моли́ спасти́ся душа́м на́шим.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Простоту́, мир и кро́тость с любо́вию/ возгрева́л еси́ в се́рдце твое́м, о́тче Ти́хоне,/ моли́твою ти́хою/ огражда́л еси́ ста́до Христо́во// от волко́в, губя́щих е́.

Стих: Возноше́ния Бо́жия в горта́ни их,// и мечи́ обою́ду остры́ в рука́х их.

Све́тлым о́блаком страда́льцев Христо́вых,/ и́хже на по́двиг укрепи́л есть Собо́р Це́ркве Ру́сския,/ Небеса́ Небе́с освяща́ют нас,/ соше́дшихся в па́мять святы́х собо́рян во храм,/ иде́же ти́и с Патриа́рхом Ти́хоном воспева́ху:// днесь благода́ть Свята́го Ду́ха нас собра́.

Сла́ва, глас 8:

Лику́й, сла́внейший гра́де Москва́,/ во оби́тель бо Донски́я ико́ны Богома́тере,/ иде́же бе заточе́н святи́тель твой Ти́хон,/ стека́ются ны́не лю́дие/ ко святы́м моще́м его́,/ прие́млюще неду́гов осла́бу,/ в христиа́нстем жи́тельстве утвержде́ние,/ в моли́тве дерзнове́ние,// утеше́ние и благослове́ние.

И ны́не, Богоро́дичен, глас то́йже: Безневе́стная Де́во:

Тpопа́pь, глас 1:

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́// и мир Бо́жий лю́дем испроси́.

Ин тропа́рь, глас 3:

В годи́ну тя́жкую Бо́гом избpа́нный,/ в совеpше́нней свя́тости и любви́ Бо́га пpосла́вил еси́,/ во смиpе́нии вели́чие, в пpостоте́ и кpо́тости си́лу Бо́жию явля́я,/ положи́л еси́ ду́шу за Це́pковь, за лю́ди своя́,/ испове́дниче свя́те Патpиа́pше Ти́хоне,/ моли́ Хpиста́ Бо́га,/ Ему́же соpаспя́лся еси́,// и ны́не спасти́ зе́млю Ру́сскую и па́ству твою́.

НА У́ТРЕНИ

По 1-м стихосло́вии седа́лен, глас 3.

Подо́бен: Красоте́ де́вства:

От ю́ности возлюби́в моли́твы по́двиг,/ в годи́ну гоне́ний ве́рныя укрепля́л еси́,/ Боже́ственныя слу́жбы в це́рквах благогове́йне соверша́я,/ и па́ству твою́ приле́жно благословля́я./ И ны́не Престо́лу Бо́жию предстоя́,/ непреста́нно мо́лиши о нас,/ свя́те о́тче наш Ти́хоне.

Слáва, и ны́не, Богоро́дичен:

Та́инству заступле́ния Твоего́,/ и всеси́льному предста́тельству Твоему́/ А́нгели и челове́цы дивя́тся, Богома́ти,/ ка́ко Престо́лу Бо́жию при́сно предстои́ши,/ престо́л Христо́в су́щи?/ Те́мже ра́дующеся вопие́м Ти:/ ра́дуйся, Ма́ти Безневе́стная.

По 2-м стихосло́вии седа́лен, глас 2.

Подо́бен: Благоутро́бия су́щи:

Благоутро́бия Бо́жия не разуме́вше,/ лю́дие Росси́йстии от Го́спода отступи́ша,/ но ты, святы́й Патриа́рше наш, воста́л еси́,/ взыва́я ве́ру Христо́ву храни́ти,/ о не́йже день и нощь в моли́твах подвиза́лся еси́,/ те́мже в па́мять твою́ соше́дшеся, ра́дуйся, вопие́м ти,/ святи́телю Ти́хоне, но́вых му́чеников соприча́стниче.

Сла́ва и ны́не, Богоро́дичен:

Гони́мых су́щи прибе́жище, Богоро́дице,/ Це́рковь Ру́сскую от бед огради́,/ на ча́да ея́, Тебе́ моля́щаяся, при́зри/ и дела́ на́ша, во сла́ву Бо́жию начина́емая, благослови́./ На Тя бо упова́юще, с наста́вники на́шими, новому́ченики и испове́дники, вопие́м Ти:/ ра́дуйся, Пречи́стая Де́во. Велича́ние:

Велича́ем тя,/ испове́дниче свя́те о́тче наш Ти́хоне,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.

Псало́м избра́нный:

Испове́мся Тебе́, Го́споди, всем се́рдцем мои́м о ми́лости Твое́й и и́стине Твое́й.

Госпо́дь Помо́щник мой, на Него́ упова́ се́рдце мое́, и испове́мся Ему́.

Глаго́лах о свиде́ниих Твои́х пред цари́ и не стыдя́хся.

Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

На Бо́га упова́х, не убою́ся: что сотвори́т мне челове́к?

Изведи́ из темни́цы ду́шу мою́, испове́датися и́мени Твоему́.

Поноше́ния понося́щих Ти нападо́ша на мя.

От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

Весели́теся, пра́веднии, о Го́споде, и испове́дайте па́мять святы́ни Его́.

Да испове́дятся Тебе́, Го́споди, вся дела́ Твоя́.

По полиеле́и седа́лен, глас 8.

Подо́бен: Повеле́нное та́йно:

Повеле́нное в Ева́нгелии начерта́в в ра́зуме,/ в ри́зы свяще́нныя, я́ко любя́й Христа́, обле́клся еси́, святи́телю Ти́хоне,/ сказу́я же па́стве сло́во утвержде́ния,/ учи́л еси́ Це́ркве ра́ди, живота́ не щадéти/ и да́же до сме́рти во и́стинней ве́ре стоя́ти,/ ю́же сло́вом моли́твенным и кре́стным по́двигом утверди́в,/ с новому́ченики на Небесе́х взыва́еши:/ Пресвята́я Тро́ице, Бо́же наш, сла́ва Тебе́.

Сла́ва и ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный,/ глаго́ля Неискусобра́чней:/ Приклони́вый схожде́нием Небеса́,/ вмеща́ется неизме́нно весь в Тя,/ Его́же и ви́дя в ложесна́х Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Неве́сто Неневе́стная.

Степе́нна, 1-й антифо́н 4-го гла́са.

Проки́мен, глас 4: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя. Вся́кое дыха́ние: Ева́нгелие от Матфе́я, зача́ло 36.

По 50-м псалме́, Сла́ва: Моли́твами святи́теля Ти́хона: И ны́не: Моли́твами Богоро́дицы:

И стихи́ра, глас 6:

Богому́дре святи́телю Ти́хоне,/ в годи́ну гне́ва Бо́жия, жре́бий патриа́ршества от Бо́га восприи́м,/ ве́ре и покая́нию и пра́ведности/ и чистоте́ и братолю́бию вся научи́л еси́,/ тем и в пусты́ни безбо́жия/ води́тельством твои́м, я́ко Моисе́я иногда́,/ Це́рковь Ру́сская, я́коже столп о́гненный,/ стоя́нием во и́стине пред все́ми возсия́,/ ты же, а́ще и Руси́ избавле́ния не дости́гл еси́,/ я́коже и он земли́ обетова́нныя,/ во дни земна́го жития́ своего́,/ оба́че упова́нием несумне́нным о сем окриля́емь,/ к Небе́сным возлете́л еси́,/ и ны́не в со́нме новому́чеников ру́сских предстоя́,/ возлю́бленное ти Оте́чество зри́ши с высоты́// я́ко Русь Святу́ю вои́стину.

Кано́н, глас 6.

Песнь 1

Ирмо́с: Жезло́м проро́ка разсече́ся/ дре́вле мо́ре Чермно́е,/ прехожде́ние волн разделя́я та́инственно/ в поги́бель во́инству мучи́телеву, ве́рным же во спасе́ние,/ песнь богокра́сную воспева́ющим:// сла́вно просла́вися Христо́с Бог наш.

Любо́вию восхва́лим, ве́рнии,/ святи́теля Ти́хона Патриа́рха на́шего,/ пра́здники его́ сотворя́юще све́тло,/ в венце́ ле́та всего́ пою́ще кончи́ну пра́ведную,/ прославле́ние же и моще́й обре́тение,/ и на престо́л первосвяти́теля Це́ркве Ру́сския в годи́ну ско́рбную избра́ние.

От ю́ности чистоту́ и кро́тость возлюби́в,/ Христа́ ра́ди, А́гнца Пречи́стаго/ и Па́стыря овца́м вели́каго,/ яви́лся еси́ доброде́телей вмести́лище,/ возше́л же еси́ к сла́ве святи́телей,/ венце́м му́ченическим укра́шен.

Стезю́ мона́шескую возлюби́в,/ во объя́тия О́тча припа́л еси́ во смире́нии,/ благода́тию же свяще́нства облече́н,/ усе́рдно поте́кл еси́ на де́ло Христо́во,/ те́мже и объя́тия твоя́ отве́рзл еси́/ коему́ждо ча́ду, от Бо́га тебе́ да́нному.

В земли́ Хо́лмстей ю́ныя уготовля́я/ олтарю́ Бо́жию служи́ти,/ самаго́ себе́ о́браз дал еси́,/ любо́вию о ученице́х неуста́нное попече́ние творя́,/ да не поги́бнет еди́н от ма́лых сих./ Тем и святы́я новому́ченики возрасти́л еси́.

Сла́ва: Како́в подоба́ет архиере́й/ лю́дем христоимени́тым,/ от святы́х оте́ц научи́лся еси́,/ и на путь архипа́стырский в преде́лех Лю́блинских восте́кл еси́,/ сия́нием свя́тости вся к себе́ привлека́я,/ милосе́рдием же страда́ния и ра́ны душе́вныя врачу́я.

И ны́не: Небесе́ и земли́ Цари́ца,/ омофо́ром зе́млю Ру́сскую покрыва́ющи,/ о́бразы Свои́ми вся концы́ ея́ освяща́ет,/ от них ве́рныя утеша́ющи/ воззре́нием ми́лостивным и услы́шанием ско́рым,/ и му́дростию, свы́ше сходя́щею.

Песнь 3

Ирмо́с: На тве́рдем ка́мени ве́ры Твоея́/ утверди́ помышле́ние души́ моея́, Го́споди:/ Тя бо и́мам, Бла́же,// прибе́жище и утвержде́ние.

Житие́ в по́двизе кра́йнейшем,/ в стране́ заокеа́нстей провожда́л еси́,/ святи́телем равноапо́стольным подо́бяся/ и се́рдцем горя́ о сла́ве Христо́ве.

Ду́ши жа́ждущия благода́ти испо́лнишася,/ святи́теля Ти́хона неусы́пным попече́нием,/ хра́мов мно́жество во Аме́рице созда́вшаго/ и пе́рвую оби́тель мона́шескую устро́ившаго.

Служе́ние архипа́стырское е́же возде́лывати и храни́ти/ виногра́д Бо́жий, правосла́вных мно́жество,/ богому́дренно соверша́л еси́, Патриа́рше Ти́хоне,/ ники́мже гнуша́яся, ничто́же боя́ся.

Себе́ вся́ко апо́стольски отве́ргся,/ плод бога́т Бо́гови прине́сл еси́,/ лю́ди алеу́тския, эскимо́сския и крео́льския/ приведы́й от мра́ка язы́ческаго к све́ту Христо́ву.

Сла́ва: Равноапо́стольным подви́жником ре́вностию подо́бяся,/ зе́млю да́льную во гла́де, зиме́ и лише́ниих проше́л еси́,/ та́же и к лю́дем росси́йским пре́жде време́н го́рьких посыла́ешися/ па́ки утвержда́ти ве́ру Христо́ву.

И ны́не: Тя Ма́терь Бо́жию/ позна́вше лю́дие Твои́ от муже́й равноапо́стольных,/ к Тебе́ любо́вию притека́ют/ я́ко Засту́пнице усе́рдней ро́да христиа́нскаго.

Ин конда́к, глас 2:

Ти́хостию нра́ва укра́шен,/ кро́тость и милосе́рдие ка́ющимся явля́яй,/ во испове́дании правосла́вныя ве́ры и любве ко Го́споду/ тверд и непрекло́нен пребы́л еси́,/ святи́телю Христо́в Ти́хоне./ Моли́ся о нас, да не разлучи́мся от любве́ Бо́жия,// я́же о Христе́ Иису́се, Го́споде на́шем.

Седáлен, глaс 8.

Подо́бен: Премýдрость и сло́во:

Три кресты́ во гро́бе твое́м/ обрето́ша и́ноцы Донски́я оби́тели,/ и́же бы́ша во о́браз кре́стнаго жития́ твоего́,/ я́ко мона́ха и первосвяти́теля,/ еще́ же и за Це́рковь страда́льца./ Те́мже мо́лим тя,/ помози́ крест свой понести́ и Христу́ после́довати/ всем с ве́рою притека́ющим/ к чудотво́рным моще́м твои́м.

Слáва, и ны́не:

При Кресте́ Госпо́дни, Богома́ти Чи́стая и Непоро́чная,/ Ма́ти ве́рным всем яви́лася еси́,/ те́мже вопие́м Ти: помози́ жития́ путь непреткнове́нно соверша́ти/ лобыза́ющим ве́рою Кре́ст Сы́на Твоего́/ и радостотво́рныя ико́ны Твоя́.

Песнь 4

Ирмо́с: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́.

Любве́ ра́ди твоея́ нареко́ша тя яросла́встии лю́дие/ отца́ духо́внаго и наста́вника богому́драго,/ скорбя́щим уте́шителя и неве́дущим вразуми́теля,/ лучеза́рный о́браз доброде́телей явля́юща.

Войны́ стра́шныя кровопроли́тие/ в кра́и Ви́ленстем сре́тил еси́,/ и кто пове́сть ве́лия по́двиги твоя́/ в попече́нии о во́инех и о стра́ждущей па́стве твое́й?

Я́коже муж боя́йся Го́спода/ и на вся́ко де́ло благо́е угото́ван,/ Ти́хон досточу́дный, доброде́тельми сия́я,/ на све́щнице моско́встем поставля́ется.

Муж че́стен, непоколеби́м и си́лен был еси́, святи́телю,/ еще́ же и благосе́рд, и сострада́телен, и про́ст./ Тем и кора́бль церко́вный, Бо́гу соде́йствующу,/ пра́во упра́вити возмо́гл еси́.

Сла́ва: Проро́ку Моисе́ю подо́бяся,/ в годи́ну тя́жкую бре́мя наро́да своего́ поне́сл еси́,/ путь спасе́ния лю́дем Бо́жиим указу́я,/ и посреде́ пусты́ни неве́рствия наставля́я.

И ны́не: Ма́ти Бо́жия Всечи́стая,/ от ико́ны Твоея́ Влади́мирския/ ча́ду Твоему́ избра́нному, Ти́хону смире́нному/ жре́бий патриа́ршества ди́вно дарова́ла еси́.

Песнь 5

Ирмо́с: Свет и мир Твой, Христе́,/ рабо́м Твои́м пода́ждь, Бла́же:/ Ты бо еси́ всех мир,/ и сою́з любве́, Человеколю́бче,/ Тя позна́вшим у́тро све́тлое,// и Влады́ку вои́стину и Го́спода.

Бу́ря мра́чная пости́же Русь Правосла́вную:/ мно́зи бо оте́ческую ве́ру презре́ша,/ земна́я па́че Небе́сных избра́вше./ Ты же, свя́те Ти́хоне,/ Це́рковь му́чеников огражда́я,/ к покая́нию отпа́дших призыва́л еси́.

Разори́ся ца́рство Ру́сское правосла́вное,/ самоде́ржцу Всеросси́йскому я́ту рука́ми крамо́льник./ И ме́сто патриа́ршее в Кремли́/ досе́ле пу́сто бя́ше./ Кто у́бо соедини́т лю́ди расточе́нныя,/ а́ще не свети́льник све́та Христо́ва?

От коне́ц земли́ соше́дыйся в первопресто́льнем гра́де Собо́р,/ о Це́ркви Ру́сской попече́ние име́я,/ патриа́ршество возста́вити повелева́ет/ и, страда́нием кре́стным наше́дшим,/ ча́дом церко́вным/ о́бщаго отца́ и моли́твенника поставля́ет.

Избра́ния сего́ не иска́л еси́, святи́телю,/ но жре́бием Бо́жиим попече́ние о всех це́рквах росси́йских восприя́л еси́,/ а́ще и предстоя́ше ти умира́ние за ня́ по вся дни,/ и во́лю Бо́жию прие́м,/ на всеси́льную благода́ть Его́ упова́л еси́.

Сла́ва: Бо́га отве́ргшеся,/ от диа́вола науче́ннии злоде́е,/ Пома́занника Бо́жия с при́сными его́ лю́то уби́ша./ Егда́ же слух умерщвле́ния царе́ва ве́рных дости́же,/ глас свой Патриа́рх с Собо́ром Це́ркве Ру́сския вознесе́,/ злоде́йство облича́я со дерзнове́нием.

И ны́не: Опеча́лися се́рдцем Пречи́стая Де́ва/ о ожесточи́вших братоненавиде́нием сердца́ своя́/ и святота́тственне собо́р Ея́ в Кремли́ устреле́нием поруга́вших./ Оба́че, к Сы́ну Своему́ и Бо́гу ру́це простира́ющи,/ покро́ва Своего́ от земли́ Ру́сския не отъя́ла есть.

Песнь 6

Ирмо́с: Зве́рю бе́здны предае́тся/ проро́к Ио́на, глубине́ морско́й,/ прообразу́я Твое́, Сло́ве, тридне́вное воста́ние;/ тем и взыва́ше:/ из глубины́ преиспо́дния// возведи́ живо́т мой, Благоутро́бне.

О любве́ патриа́ршия ко святы́м Бо́жиим!/ Сей, святи́телю Влади́миру и ины́м мно́гим убие́нным,/ па́мять но́вых му́ченик утвержда́ет,/ и почита́ние собо́ра святы́х ру́сских возставля́ет,/ на усе́рдную моли́тву воздвиза́я ве́рныя.

Гро́зно повеле́л еси́, святи́телю о́тче Ти́хоне,/ ра́спри крова́выя прекрати́ти,/ сего́ ра́ди враг наре́клся еси́ от безбо́жных,/ гоне́ние на тя воздви́гших./ Но во́ины духо́вныя на моли́тву призва́в,/ кора́бль церко́вный му́дре упра́вил еси́.

Гла́ду бы́вшу в стране́ Росси́йстей,/ братоуби́йством умерщвля́емей,/ наро́ды к милосе́рдию призва́л еси́,/ па́стыри же увеща́л еси́ моли́твою проще́ние ей от Го́спода испроша́ти,/ да омы́ется покая́нием/ и Святы́ми Та́йнами да обнови́тся.

Сла́ва: Лю́дем земли́ на́шея гла́дом погиба́ющим,/ на Це́рковь ополча́ется богобо́рец по́лчище,/ Патриа́рх же Всеросси́йский/ о́браз по́мощи указу́ет, сохраня́я святы́ни церко́вныя,/ и за сие́ клеветы́ подъе́млет, и я́ко злоде́й безчелове́чный осужда́ется,/ жизнь вседне́вно полага́я за спасе́ние челове́ков.

Богоро́дичен: Беда́м безчи́сленным на Русь наше́дшим,/ и ве́ре мно́жества люде́й поколеба́вшейся,/ ико́ну Твою́ Держа́вную/ я́ко зна́мение ми́лости Бо́жия яви́ла еси́,/ и попече́ние о му́чимых за Христа́ и о всех ве́рных/ я́ко Засту́пница усе́рдная восприя́ла еси́.

Конда́к, глас 5:

Служе́ние твое́ испо́лнено сто́на и го́ря,/ священному́чениче Ти́хоне, Патриа́рше наш,/ но был еси́ пра́вило ве́ры и о́браз кро́тости,/ побежда́я ра́спри и разделе́ния;/ си́лою смире́ния и любве́ Христо́вы противоста́л еси́ зло́бе сатани́нстей,/ возгла́вил еси́ до́брое во́инство но́вых му́чеников,// Це́рковь Ру́сскую утверди́вших во ве́ки.

И́кос:

Не усыпа́ют по сме́рти святи́и,/ свобо́ду сла́вы чад Бо́жиих улучи́вше,/ но пребыва́ют во благотворе́нии непреста́нно,/ со А́нгелы вку́пе моле́ния на́ша Бо́гу принося́ще./ Та́кожде и ты, святи́телю Ти́хоне,/ те́лом во оби́тели Донсте́й почива́яй,/ милосе́рдствуеши о мона́сех и мирски́х, твоея́ по́мощи прося́щих,/ и коему́ждо стези́ управля́еши, и пече́шися о всех,/ я́коже в житии́ подвиза́лся еси́, па́ству твою́ окормля́я,/ и Це́рковь Ру́сскую утвержда́я во ве́ки.

Песнь 7

Ирмо́с: О́троцы в Вавило́не дре́вле/ во огни́ не опали́шася,/ на му́ки бо дерзну́вше за ве́ру оте́ческую,/ в о́ней непоколе́блеми пребы́ша,/ и зре́ти Го́спода и пе́ти Тому́ сподо́бишася:// Изба́вителю Бо́же, благослове́н еси́.

От меча́ предрека́я поги́бель/ святы́й Ти́хон власти́телем злым,/ свобо́ды у́зником тре́бует/ и жи́зни непра́ведно на смерть осужде́нным,/ я́ко печа́льник гони́мых/ и па́ствы утвержде́ние.

Руси́ благоче́стие упраздни́ти жа́ждущии/ и сме́ртию ды́шущии мучи́телие/ сло́ву гро́зному патриа́ршему не вне́млют/ и на служи́тели Бо́жия ру́ки возлага́ют./ Кровь же но́вых му́ченик/ Це́ркве Ру́сския се́мя благопло́дное бысть.

Прииди́те, досто́йно ублажи́м/ архиере́и, мона́хи и мирски́я,/ ве́рность Патриа́рху Ти́хону сохра́ньшия,/ и на сове́т нечести́вых лжепа́стырей не поше́дшия,/ отрече́ния того́ тре́бовавших,/ и да́же до кро́ве во и́стине пребы́вшия.

Оби́тель Донску́ю узи́лище тебе́ гони́тели сотвори́ша,/ судо́м грозя́ще и пыта́нием слове́сным му́чаще./ Оба́че крепча́е зло́бы их, моли́тва бысть па́ствы твоея́,/ благослове́ния Первосвяти́тельскаго и́щущия/ и вы́ю враго́м Це́ркве и отсту́пником не подклони́вшия.

Сла́ва: Умира́ние за Це́рковь Ру́сскую/ на всяк день претерпева́л еси́, Патриа́рше Ти́хоне:/ обеща́ньми бо свобо́ды собра́тиям твои́м/ от безбо́жных искуша́емь,/ па́ству твою́ от губя́щих огради́л еси́,/ Це́рковь во правосла́вии соблюды́й непоро́чну.

И ны́не: Руси́ расточа́емей/ и любви́ оскудева́ющей и ве́ре умаля́ющейся,/ ме́ре же беззако́ния исполня́ющейся/ и ча́ше гне́ва Бо́жия пролива́ющейся,/ кто помощи́ возмо́гл бы,/ а́ще не Ты, Де́во, чу́дная Ма́ти?

Песнь 8

Ирмо́с: Преподо́бнии Твои́ о́троцы/ в пещи́ Херуви́мы подража́ху,/ Трисвяту́ю песнь воспева́юще:/ благослови́те, по́йте// и превозноси́те во вся ве́ки.

Ве́лию любо́вь к ча́дом твои́м явля́я,/ от них любле́ние досто́йное восприя́л еси́./ Тем и в заточе́нии ти су́щу,/ кре́пкое моле́ние о тебе́ возноша́ху,/ в свобожде́нии же твое́м Бо́га непреста́нно воспева́ху.

Пра́веднаго Алекси́я, па́стыря Моско́вскаго/ погребе́ние мно́ги ве́рныя собра́,/ а́може и ты, святи́телю Ти́хоне,/ от уз разреше́н явля́ешися/ и па́ству твою́ ликова́ния исполня́еши.

Па́ки устреми́шася во хра́мы лю́дие моли́тися с тобо́ю,/ по осла́бе же ма́лей/ тяготу́ сме́ртную тебе́ угото́виша гони́тели,/ но всу́е тьма огустева́ет на земли́,/ на Небесе́х бо му́ченика но́ваго утверди́ся сия́ние.

Неизрече́нный Бо́жий сове́т/ Гаврии́л возвеща́ет Де́ве, обруче́нней Бо́гу,/ в то́йже день и Ти́хон, Патриа́рх Моско́вский,/ на бра́чный пир Христо́в восхо́дит,/ чистото́ю ве́ры увенча́н и цве́ты доброде́телей Небе́сных.

Сла́ва: Со́лнцу заше́дшу Ру́сския земли́,/ со мно́жеством люде́й архиере́е пла́кахуся,/ во оби́тели Донсте́й че́стне погреба́юще те́ло Патриа́рха своеѓо,/ мы же ны́не благода́рно покланя́емся/ моще́м святи́теля, дре́вним подо́бнаго.

И ны́не: Кресту́ предстоя́ла еси́ Сы́на Твоего́,/ Богома́ти Пречи́стая, со апо́столом му́жески,/ му́ченик ликостоя́ния предживопису́ющи,/ стра́ха челове́ческа не устраши́вшихся,/ но ве́ру и любо́вь да́же до конца́ сохра́ньших.

Песнь 9

Ирмо́с: Па́че сло́ва Сло́во еди́на Ро́ждшая,/ ерети́ческая уста́ загради́ безслове́сная./ Не́бо но́вое, раю́ некра́домый, Пречи́стая,// Тя велича́ем.

Скорбь погребе́ния твоего́, святи́телю Ти́хоне, в ра́дость преложи́ся,/ я́ко в Бо́зе упоко́ился еси́ и дерзнове́ние ве́лие обре́л еси́./ Те́мже у Престо́ла Бо́жия предстоя́,/ Це́рковь и Оте́чество на́ше утверди́ моли́твами твои́ми.

Сло́во пронесе́ся в лю́дех,/ я́ко гони́тели мо́щи Свята́го Патриа́рха украдо́ша,/ и не наде́яхуся ве́рнии обрести́ сие́ сокро́вище,/ его́же Госпо́дь яви́ нам, пе́сньми велича́емое.

Наде́жда превозмо́же скорбь,/ егда́ честны́й гроб свята́го Ти́хона лю́дие узре́ша,/ предстоя́тель же Це́ркве Ру́сския святы́я мо́щи открыва́ет/ в но́вых му́ченицех первосвяти́теля.

Сре́тение Госпо́дне ра́дость сугу́бу предлага́ет/ во обре́тении моще́й Ти́хона святи́теля,/ Христа́ Спа́са с Богоро́дицею зело́ возлюби́вшаго/ и ны́не с Ни́ми ве́чно ца́рствующаго.

Сла́ва: Во всех конце́х земли́ па́мять твоя́ вельми́ чти́тся, святи́телю Ти́хоне:/ на Небесе́х бо Бо́га я́ве зри́ши,/ моля́ Его́ мир ми́рови дарова́ти/ и правосла́вным лю́дем едине́ние.

И ны́не: Ра́дуйся, Ма́ти Безневе́стная,/ мир от истле́ния изба́вившая,/ святи́телем и му́чеником похвало́,/ ве́рным всем прибе́жище и утвержде́ние.

Свети́лен:

Свет Христо́в с Небесе́ днесь нам низво́диши/ луча́ми благода́ти све́тлыми,/ Патриа́рше свя́те Ти́хоне,/ светоза́рный хра́ме Ду́ха Свята́го.

Сла́ва, и ны́не:

Сы́на Твоего́, мир просвеща́ющаго,/ умоли́, Влады́чице,/ с новому́ченики Це́ркве Ру́сския/ све́та невече́рняго нас сподо́бити.

На хвали́тех стихи́ры, глас 5.

Подо́бен: Ра́дуйся:

Ра́дуйся, святе́йший о́тче наш Ти́хоне,/ возлюби́вый бо́льше жи́зни па́ству твою́/ и положи́вый ду́шу свою́ за Це́рковь Бо́жию, за Бо́жий наро́д,/ к нему́же со ско́рбию тя́жкою взыва́л еси́:/ се́рдце мое́ гори́т жа́лостию до сме́рти./ Очи́ститеся, бра́тие, от грехо́в свои́х/ и бу́дем вме́сте моли́ти Го́спода: /О́тче наш,// оста́ви нам до́лги на́ша.

Ра́дуйся, святы́й Патриа́рше наш Ти́хоне,/ укрепля́я Це́рковь Ру́сскую на по́двиг Христо́в,/ cобира́я но́вое Христо́во во́инство,/ науча́я ве́рою и любо́вию/ в кро́тости побежда́ти зло́бу вра́жию,/ во смире́нии стяжа́ти си́лу Бо́жию./ Воево́да взбра́нный ны́не сно́ва бу́ди нам!/ Мо́лим, па́стырю люби́мый наш:// не оста́ви чад твои́х во ве́ки.

И́ны стихи́ры, глас 6.

Подо́бен: Все отло́жше:

Все житие́ твое́/ ра́дость ве́рным бе/ и Це́ркве Ру́сския утвержде́ние:/ ты бо, святи́телю Ти́хоне,/ кре́ст патриа́ршества многотру́ден прия́л еси́,/ и Христу́ сораспя́лся еси́,/ дерзнове́нны творя́ на по́двиг бли́жния твоя́,/ страда́ния и заточе́ния и смерть прия́вшия,/ и в Ца́рствии Небе́снем ны́не с тобо́ю торжеству́ющия./ С ни́миже Бо́га моли́ о нас,// духо́вных ча́дех твои́х.

Вся земна́я отложи́в,/ в годи́ну гне́ва Бо́жия/ наро́д ру́сский к покая́нию/ и ве́ре и любви́ и проще́нию звал еси́,/ и кни́жныя и просты́я ко Христу́ привле́кл еси́./ Тем и богому́дрым води́тельством твои́м/ Це́рковь новому́ченик/ во тьме гоне́ний во Оте́честве на́шем возсия́,/ и́стинную свя́тость Руси́ явля́я,/ с ни́миже в Небе́сных кро́вех веселя́ся,// моли́ спасти́ся всем нам.

Сла́ва, глас 6:

Святи́телю о́тче наш Ти́хоне,/ житие́ твое́ многотру́дное/ и кре́стное служе́ние патриа́ршее/ привре́менная забы́ти повелева́ет/ и не себе́ угожда́ти,/ но све́том Христо́вым вся просвеща́ти./ Те́мже мо́лим тя,/ братолю́бия и кро́тости учи́телю,/ помози́ и нам путе́м кре́стным проити́,// да ра́дость Воскресе́ния улучи́м с тобо́ю.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Пло́д Живота́./ Тебе́ мо́лимся:/ моли́ся, Влады́чице,/ со святы́м Патриа́рхом Ти́хоном и новому́ченики Це́ркве Ру́сския,// поми́ловатися душа́м на́шим.

НА ЛИТУРГИ́И

Блаже́нны от кано́на свята́го, пе́сни 1-я и 6-я. Проки́мен, глaс 4: Вознесо́х избра́ннаго// от люде́й Мои́х. Стих: Бог прославля́емь в сове́те святы́х. Апо́cтол к Ефесе́ем, зачáло 233. Аллилýия, глaс 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни. Ева́нгелие от Иоáнна, зачáло 36. Причáстен: В пáмять ве́чную бу́дет пра́ведник, от слу́ха зла не убои́тся.

Моли́тва

О па́стырю до́брый, святи́телю о́тче наш Ти́хоне, Патриа́рше Це́ркве Ру́сския! Ты мно́гия труды́ в жи́зни вре́менней подъя́л еси́. Простота́ и любы́ твоя́, дух ми́рен и кро́ток, та́кожде и сло́во, благода́ти испо́лненное, по се́рдцу бы́ша лю́дем земли́ на́шея, и́же и предложи́ша тя Бо́гу на по́двиг вели́кий и многотру́дный. Егда́ же богобо́рцы и хули́телие воздвиго́ша на Це́рковь Христо́ву гоне́ние, ему́же не бе ра́внаго от ве́ка, Сам Госпо́дь Вседержи́тель избра́ и соде́ла тя Патриа́рха. Ты же, святи́телю, сраспина́яся Христу́ и Це́ркви Его́, со ско́рбию лю́ди к покая́нию призыва́л еси́. И кто изочте́т страда́ния твоя́? Заточе́ние бо темни́чное, клеветы́ и суды́ гони́телей со смире́нием претерпева́я, враго́м Христо́вым моли́твою сле́зною и кро́ткою противуста́л еси́, и архиере́и, пресви́теры, мона́хи и мирски́я на по́двиг му́ченический благослови́л еси́. Те́мже мо́лим тя, святи́телю Христо́в, бу́ди нам дерзнове́нный засту́пник и не оста́ви ны, немощна́я ча́да твоя́. Испроси́ у Го́спода нам грехо́в проще́ние, ве́ры утвержде́ние, скорбе́й осла́бу, по́мыслов чистоту́, да, в покая́нии и моли́тве пребыва́юще, украси́м себе́ целому́дрием, любо́вию и смире́нием, и та́ко Ца́рствия Небе́снаго дости́гнем, иде́же с тобо́ю сподо́бимся прославля́ти Святу́ю Тро́ицу, Отца́, и Сы́на, и Свята́го Ду́ха. Ами́нь.