Служба Собору Московских святых
Ме́сяца а́вгуста в Неде́лю пред 29-м днем
Всех святы́х, в земли́ Моско́вской просия́вших
НА ВЕЛИ́ЦЕЙ ВЕЧЕ́РНИ
По предначина́тельном псалме́, Блаже́н муж: кафи́зма вся. На Го́споди, воззва́х: стихи́ры на 10: воскре́сны 3, Анато́лиева 1, и святы́х 6.
А́ще внутрь попра́зднства Успе́ния, воскре́сны 3, пра́здника 3, и святы́х 6 (после́дния две со стихо́м: Сла́ва Тебе́, Бо́же наш, сла́ва Тебе́).
Стихи́ры святы́х.
Глас 6.
Подо́бен: Все отло́жше:
Ве́рою соше́дшеся, правосла́вных собо́ри,/ восхва́лим днесь Моско́вския святы́я,/ святи́тели и кня́зи благове́рныя,/ преподо́бныя и му́ченики,/ пра́ведныя и Христа́ ра́ди юро́дивыя,/ и жен святы́х сосло́вие,/ ве́домыя и неве́домыя,/ и к ним с любо́вию возопии́м:/ о дру́зи Христо́ви, сосу́ди честни́и,/ прииди́те посреде́ нас неви́димо,/ предначина́юще торжество́ и пе́ние/ и сподобля́юще даро́в невеще́ственных// ваш пра́здник соверша́ющих светоле́пно.
Глас 2.
Подо́бен: Ки́ими похва́льными венцы́:
Ки́ими похва́льными венцы́/ увенча́ем святи́тели Це́ркве Ру́сския?/ Богопропове́дников прее́мники,/ гра́да Москвы́ све́тлая удобре́ния,/ богоразу́мия крила́ми к Небеси́ возне́сшияся,/ и́же за́поведи Госпо́дни сотвори́ша/ и научи́ша лю́ди благоче́стию,/ те́плыя на́ша предста́тели,/ и́хже ра́ди Христо́с/ возноше́ния враго́в низложи́,// име́яй ве́лию ми́лость.
Глас 2.
Подо́бен: Егда́ от Дре́ва:
Све́тите Оте́честву ва́шему всегда́,/ благове́рнии и богому́дрии кня́зие Моско́встии,/ Правосла́вием и доброде́тельми сия́юще,/ и сие́ от па́губы враго́в/ покрыва́ете моли́твами ва́шими при́сно,/ бесо́в тьму отгоня́юще,/ те́мже я́ко прича́стники невече́рния благода́ти,/ и насле́дия ва́шего храни́тели непосты́дныя/ вас почита́ем, досточу́днии,// пою́ще Го́спода, вас просла́вльшаго.
Глас 1.
Подо́бен: Прехва́льнии му́ченицы:
Прехва́льнии новому́ченицы и испове́дницы,/ лю́тое неи́стовство безбо́жных претерпе́вшии,/ и нам терпе́ния и злострада́ния о́браз пода́вшии,/ вас ни земля́ потаи́ла есть,/ ю́же кровьми́ и мощьми́ свои́ми освяти́ли есте́,/ но Не́бо прия́т вы,/ иде́же Христу́ Бо́гу мо́литеся/ дарова́ти Оте́честву на́шему мир// и ве́лию ми́лость.
Глас 5.
Подо́бен: Преподо́бне о́тче:
Преподо́бнии отцы́ и ма́тери,/ в преде́лех Моско́вских подвиза́вшиися,/ в пе́ниих, бде́ниих же и поще́ниих,/ душе́вным благомо́щием и ума́ чистото́ю,/ мона́хов мно́жеству о́брази яви́стеся,/ покая́ния у́глие пречестно́е/ и доброде́телей боже́ственное би́серие,/ Христу́ Бо́гу моли́теся непреста́нно,/ дарова́ти Це́ркви Ру́сской единомы́слие,/ и земли́ на́шей мир,// и душа́м на́шим ве́лию ми́лость.
Глас 4.
Подо́бен: Зва́нный свы́ше:
Свы́ше зва́ни бы́вше,/ отверже́нием себе́ Христу́ после́довасте,/ блаже́ннии юро́дивии и пра́ведницы Моско́встии,/ страх Бо́жий, и́же есть нача́ло прему́дрости,/ основа́ние доброде́телем положи́сте,/ те́мже Небе́сный свет/ облиста́ мы́сленныя о́чи ва́ша,/ и о́ви у́бо мудре́йшим юро́дством диа́вола прехи́трили есте́,/ о́ви же бли́жним послужи́ли есте́/ во сла́ву Христа́ Бо́га на́шего,/ Его́же моли́те// спасти́ и просвети́ти ду́ши на́ша.
Сла́ва, глас 1:
Весели́ся о Го́споде, Моско́вская земле́,/ ра́дуйся и лику́й, Правосла́вием све́тло оде́явшися,/ телеса́ подви́жников ве́ры и свиде́телей и́стины/ в не́дрех свои́х иму́щи, я́ко сокро́вище,/ наслади́ся чуде́с, от них истека́ющих,/ и, ви́дящи полк сей святы́й,/ от ви́димых и неви́димых враго́в тя огражда́ющий,/ благода́рно Спа́су возопи́й:// Го́споди, сла́ва Тебе́.
И ны́не, Богоро́дичен, догма́тик гла́са.
Вход. Све́те ти́хий:
Проки́мен дне: Госпо́дь воцари́ся: и чте́ния три.
Проро́чества Иса́иина чте́ние (глава́ 60):
Свети́ся, свети́ся, Иерусали́ме,/ прии́де бо твой свет, и сла́ва Госпо́дня на тебе́ возсия́./ Се, тьма покры́ет зе́млю, и мрак на язы́ки,/ на тебе́ же яви́тся Госпо́дь, и сла́ва Его́ на тебе́ у́зрится./ И по́йдут ца́рие све́том твои́м, и язы́цы све́тлостию твое́ю./ Возведи́ о́крест о́чи твои́ и виждь собра́ная ча́да твоя́:/ се, приидо́ша вси сы́нове твои́ издале́ча, и дще́ри твоя́ на ра́мех во́змутся./ Тогда́ у́зриши и возра́дуешися,/ и убои́шися и ужа́снешися се́рдцем,/ я́ко приложи́тся к тебе́ бога́тство морско́е и язы́ков и люди́й./ И отве́рзутся врата́ твоя́ при́сно,/ день и нощь не затворя́тся,/ ввести́ к тебе́ си́лу язы́к и ца́ри их ведо́мыя./ Язы́цы бо и ца́рие, и́же не порабо́тают ти, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет,/ кипари́сом и пе́вгом и ке́дром вку́пе, просла́вити ме́сто свято́е Мое́,/ и ме́сто ногу́ Мое́ю просла́влю.
Прему́дрости Иису́са, сы́на Сира́хова, чте́ние (глава́ 44):
Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие имени́ти си́лою, сове́тующе ра́зумом свои́м,/ провеща́вшии во проро́чествах,/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их,/ и́щуще гла́са мусики́йска и пове́дающе по́вести во писа́ниих:/ му́жие бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша,/ и во днех их похвала́./ Суть от них, и́же оста́виша и́мя, е́же пове́дати хвалы́:/ и суть, и́хже несть па́мяти, и погибо́ша я́ко не су́щии,/ и бы́ша я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша:/ с се́менем их пребу́дет до́брое насле́дие,/ исча́дия их в заве́тех:/ оста́ся се́мя их, и ча́да их по них:/ до ве́ка пребу́дет се́мя их,/ и сла́ва их не потреби́тся:/ телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину,/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ра хра́ма.
А́ще внутрь попра́зднства Успе́ния,
стихи́ра пра́здника, глас 3. (Ге́рманово:)
Прииди́те, вси концы́ земни́и,/ честно́е преставле́ние Богома́тере восхва́лим:/ в ру́це бо Сы́на ду́шу непоро́чную положи́./ Те́мже святы́м успе́нием Ея́ мир оживотвори́ся,/ во псалме́х, и пе́ниих, и пе́снех духо́вных// со Безпло́тными и апо́столы пра́зднует све́тло.
Сла́ва, святы́х, глас 8.
(Творе́ние святи́теля Афана́сия Ковро́вскаго:)
Сра́дуйтеся с на́ми, вси ли́цы святы́х/ и вся А́нгельская чинонача́лия,/ духо́вне совоку́пльшеся,/ прии́дем и воспои́м благода́рную песнь Христу́ Бо́гу:/ се бо ве́лий сонм сро́дников на́ших/ предстои́т Царю́ сла́вы/ и моле́бно хода́тайствует о нас./ Си́и суть столпи́ и красота́ ве́ры правосла́вныя;/ си́и уче́нии, и де́лы, и крове́й излия́нии/ Це́рковь Бо́жию просла́виша;/ си́и от всех преде́л земли́ на́шея возсия́ша,/ и ве́ру правосла́вную в ней/ чудесы́ и зна́мении утверди́ша,/ и во ины́я страны́ пронесо́ша,/ апо́стольски ревну́юще;/ ини́и же пусты́ни и гра́ды оби́тельми святы́ми украси́ша,/ а́нгельское житие́ показу́юще;/ мно́зи руга́нии, и ра́нами, и лю́тою сме́ртию/ от сыно́в ве́ка сего́ искуси́шася,/ мно́зи же и ине́ми ви́ды,/ во вся́цем чи́не подвиза́вшеся,/ нам терпе́ния и злострада́ния о́браз пода́ша,/ и вси вку́пе мо́лят ны́не Го́спода/ от бед изба́витися Оте́честву на́шему// и всем нам спасти́ся.
И ны́не, Богоро́дичен, глас 6.
Подо́бен: Все отло́жше:
Возвели́чим Тя вси,/ Пренепоро́чную/ Ма́терь Бо́га на́шего,/ Ю́же освяти́ Дух Пресвяты́й./ Ты бо еси́, Богоро́дице,/ ору́жие на́ше и стена́/ и Святы́я Руси́ Засту́пница,/ к Тебе́ ны́не прибега́ем,/ Тя на моли́тву призыва́ем,/ да изба́виши нас// от враго́в на́ших.
А́ще внутрь попра́зднства Успе́ния, пра́здника, глас 5:
Воспо́йте, лю́дие,/ Ма́тери Бо́га на́шего, воспо́йте:/ днесь бо всесве́тлую ду́шу Свою́ в пречи́стыя дла́ни/ И́же из Нея́ Вопло́щшагося без се́мене предае́т,/ Его́же и мо́лит непреста́нно// дарова́ти вселе́нней мир и ве́лию ми́лость.
ЗРИ А́ще изво́лит настоя́тель, на лити́и в проше́нии Спаси́, Бо́же: помина́ет диа́кон избра́нных Моско́вских святы́х, или́ всех святы́х, в земли́ Моско́вской просия́вших (зри в конце́ слу́жбы).
Проше́ние на лити́и:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́ и покро́вом честны́я и многоцеле́бныя ри́зы Твоея́; предста́тельствы свята́го Архистрати́га Михаи́ла и про́чих Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна, свята́го сла́внаго проро́ка Илии́, свята́го сла́внаго и всехва́льнаго апо́стола Андре́я Первозва́ннаго и всех святы́х сла́вных и всехва́льных апо́стол, и́же во святы́х оте́ц на́ших и вселе́нских вели́ких учи́телей и святи́телей Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мир Лики́йскаго, Чудотво́рца; святы́х равноапо́стольных Мефо́дия и Кири́лла, учи́телей Слове́нских; святы́х равноапо́стольных вели́каго кня́зя Влади́мира и вели́кия княги́ни О́льги;
и́же во святы́х оте́ц на́ших, святи́телей:
Михаи́ла, пе́рваго митрополи́та Ки́евскаго,
первосвяти́телей Моско́вских и всея́ Руси́ Петра́, Феогно́ста, Алекси́я, Киприа́на, Фо́тия, Ио́ны, Фили́ппа, Феодо́сия, Геро́нтия, Си́мона, Иоаса́фа, Мака́рия, Фили́ппа, И́ова, Ермоге́на и Ти́хона,
местоблюсти́теля патриа́ршаго престо́ла священному́ченика Петра́, митрополи́та Крути́цкаго,
митрополи́тов Моско́вских Филаре́та, Инноке́нтия и Мака́рия;
Фео́дора, архиепи́скопа Росто́вскаго, Стефа́на, епи́скопа Пе́рмскаго, Генна́дия и Серапио́на, архиепи́скопов Новгоро́дских;
святи́телей новому́чеников и испове́дников Це́ркве Ру́сския:
священному́чеников: Влади́мира, митрополи́та Ки́евскаго, Вениами́на и Серафи́ма, митрополи́тов Петрогра́дских, Серафи́ма, архиепи́скопа У́гличскаго, Иларио́на, архиепи́скопа Вере́йскаго, Дими́трия, архиепи́скопа Можа́йскаго, Макси́ма, епи́скопа Серпуховска́го, Серафи́ма, епи́скопа Дми́тровскаго, Ники́ты, епи́скопа Оре́хово-Зу́евскаго, Петра́, архиепи́скопа Воро́нежскаго, Никола́я, архиепи́скопа Влади́мирскаго, Павли́на, архиепи́скопа Могиле́вскаго, Серафи́ма, архиепи́скопа Смоле́нскаго, Мака́рия, епи́скопа Вя́земскаго, Ефре́ма, епи́скопа Селенги́нскаго, Васи́лия, епи́скопа Прилу́кскаго, Ио́ны, епи́скопа Ве́лижскаго, Ге́рмана, епи́скопа Вя́зниковскаго, Арка́дия, епи́скопа Бе́жецкаго, Григо́рия, епи́скопа Шлиссельбу́ргскаго, Игна́тия, епи́скопа Скопи́нскаго;
священноиспове́дников: Амвро́сия, епи́скопа Камене́ц-Подо́льскаго, Феодо́сия, епи́скопа Коло́менскаго, Афана́сия, епи́скопа Ковро́вскаго,
и всех святи́телей, в преде́лех Моско́вских подвиза́вшихся и за Христа́ пострада́вших, и я́ко пра́вила ве́ры, о́брази кро́тости и воздержа́ния учи́телие просла́вльшихся;
святы́х сла́вных и добропобе́дных му́чеников: великому́чеников Гео́ргия Победоно́сца и Дими́трия Солу́нскаго, му́ченика Андре́я Стратила́та, му́чеников и испове́дников благове́рнаго кня́зя Михаи́ла Черни́говскаго и боля́рина Фео́дора;
святы́х новому́чеников и испове́дников Це́ркве Ру́сския:
святы́х ца́рственных страстоте́рпцев царя́ Никола́я, цари́цы Алекса́ндры, цесаре́вича Алекси́я, вели́ких княже́н О́льги, Татиа́ны, Мари́и и Анастаси́и,
преподобному́чеников Крони́да, архимандри́та Ра́донежскаго, схиархимандри́та Игна́тия;
священному́чеников пресви́теров Иоа́нна, Константи́на Богоро́дскаго, Алекса́ндра, Фео́дора, Алекса́ндра, Илии́, Гео́ргия, Иоа́нна, Се́ргия;
преподобноиспове́дников архимандри́тов Гео́ргия Дани́ловскаго, Ни́кона, ста́рца О́птинскаго, Се́ргия, Гаврии́ла;
священноиспове́дника пресви́тера Рома́на (во и́ноцех Ио́сифа),
преподобному́чениц вели́кия княги́ни Елисаве́ты, и́нокини Варва́ры и игу́мении Афана́сии,
преподобноиспове́дниц схиигу́мении Фама́ри, и́нокини Параске́вы,
му́чеников Иоа́нна, Михаи́ла, Михаи́ла,
му́ченицы Татиа́ны,
всех новому́чеников, в Бу́тове пострада́вших;
и всех святы́х новому́чеников и испове́дников Моско́вских, за ве́ру во Христа́, Це́рковь Христо́ву и благоче́стие страда́ния претерпе́вших;
святы́х благове́рных князе́й Дании́ла, Иоа́нна и Дими́трия Донска́го Моско́вских, свята́го му́ченика царе́вича Дими́трия и благове́рнаго царя́ Фео́дора; благове́рныя вели́кия княги́ни Евдоки́и Моско́вския (во и́нокинях Евфроси́нии);
преподо́бных и богоно́сных оте́ц на́ших Се́ргия и Ни́кона, игу́менов Ра́донежских, Кири́лла, Михе́я и Диони́сия архимандри́та, Ра́донежских; Алекса́ндра Пересве́та и Андре́я Осля́би; Андрони́ка, Алекса́ндра и Са́ввы Моско́вских, Спа́сских, Андре́я и Дании́ла иконопи́сцев, Кири́лла и Ферапо́нта Белоезе́рских, Варфоломе́я, Иоа́нна Злата́го и Игна́тия ико́нника, Си́моновских, Варлаа́ма и Гедео́на Серпуховски́х, Афана́сия и друга́го Афана́сия, Высо́цких, Мефо́дия Пешно́шскаго, Лео́нтия, Са́ввы и Иа́кова Стромы́нских, Рома́на Киржа́чскаго, Григо́рия Голу́твинскаго, епи́скопа Коло́менскаго, Са́ввы Стороже́вскаго, Стефа́на Ма́хрищскаго, Анто́ния Чу́довскаго, Ио́сифа Во́лоцкаго, Левки́я, Гера́сима Че́рнаго, Кассиа́на Боса́го, Фо́тия ста́рца, Адриа́на и Зоси́мы Волокола́мских, Дави́да и Влади́мира Белопесо́цкаго, Серпуховски́х, Макси́ма Гре́ка, Ни́кона, Васи́лия и Ти́хона Соколо́вских, Ка́рпа Моско́вскаго, Зоси́мы Верхо́вскаго, Анто́ния, архимандри́та Ра́донежскаго, Пи́мена Угре́шскаго, Варна́вы, ста́рца Гефсима́нскаго, Аристо́клия, ста́рца Моско́вскаго, Анато́лия, ста́рца О́птинскаго, Ге́рмана и Алекси́я, ста́рцев Зоси́мовских;
преподо́бных ма́терей Мари́и Ра́донежския, игу́мении Иулиани́и, Евпракси́и, схиигу́мении Еле́ны и Варсоно́фии Моско́вских, Рахи́ли Бороди́нския,
и всех преподо́бных оте́ц и ма́терей, в по́двизех по́стнических в преде́лех Моско́вских просия́вших;
святы́х пра́ведных Алекси́я, пресви́тера Моско́вскаго, и Васи́лия Павлово-Поса́дскаго;
святы́х блаже́нных Христа́ ра́ди юро́дивых и чудотво́рцев Макси́ма, Васи́лия и Иоа́нна Моско́вских, Иоа́нна Можа́йскаго, Ма́рфы и Матро́ны Моско́вских, Матро́ны Анемня́севския, испове́дницы,
и всех святы́х, в земли́ Моско́вской просия́вших, и́хже имена́ Ты Сам, Го́споди, ве́си, и́хже и па́мять ны́не соверша́ем,
святы́х и пра́ведных Богооте́ц Иоаки́ма и А́нны и всех святы́х, мо́лим Тя, Многоми́лостиве Го́споди, услы́ши нас гре́шных, моля́щихся Тебе́, и поми́луй нас.
На стихо́вне стихи́ры воскре́сны.
Сла́ва, святы́х, глас 5.
Подо́бен: Ра́дуйся, Живоно́сный Кре́сте:
Днесь церко́вная разширя́ются не́дра,/ прие́млюща бога́тство Бо́жия благода́ти,/ и ра́дуется Моско́вская земля́,/ па́мять соверша́ющи многоимени́таго ли́ка святы́х,/ я́ко фимиа́м избра́нный, нача́тки и всепло́дие,/ вся угоди́вшия и пре́жде, и по́слежде в ней,/ принося́щи Пресвяте́й Тро́ице,/ и́же благодерзнове́нно мо́лятся// о душа́х на́ших.
И ны́не, Богоро́дичен, глас 8.
(Творе́ние святи́теля Афана́сия Ковро́вскаго.)
Подо́бен: О, пресла́внаго чудесе́:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
А́ще внутрь попра́зднства Успе́ния,
И ны́не, пра́здника.
На благослове́нии хле́бов Богоро́дице Де́во: два́жды,
и тропа́рь святы́х, глас 4:
Днесь проро́чество святи́теля Петра́/ пред оча́ми на́шими сбыва́ется,/ се́рдце бо Росси́и град Москва́/ свы́ше сла́ву ве́лию прие́млет,/ украша́емь, я́ко би́сером честны́м,/ мно́гим со́нмом Бо́жиих уго́дников,/ к ни́мже мы любо́вию возопии́м:/ о пречу́днии святи́телие, испове́дницы и му́ченицы но́вии,/ ца́рственнии страстоте́рпцы и благове́рнии кня́зие,/ преподо́бнии отцы́ и ма́тери,/ и прему́дрии юро́дивии,/ и вси святи́и, зна́емии и незна́емии,/ я́ко благоче́стия столпи́,/ моли́те Христа́ Бо́га// стране́ на́шей в ми́ре спасти́ся.
А́ще внутрь попра́зднства Успе́ния, тропа́рь пра́здника, глас 1:
В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,// и моли́твами Твои́ми избавля́еши от сме́рти ду́ши на́ша. Два́жды.
И тропа́рь святы́х.
НА У́ТРЕНИ
На Бог Госпо́дь: тропа́рь воскре́сен, два́жды. Сла́ва, тропа́рь святы́х, глас 4.
И ны́не, Богоро́дичен, глас то́йже:
Днесь све́тло красу́ется сла́внейший град Москва́,/ я́ко зарю́ со́лнечную, восприе́мши, Влады́чице,/ чудотво́рную Твою́ ико́ну Влади́мирскую,/ к не́йже ны́не мы притека́юще и моля́щеся Тебе́, взыва́ем си́це:/ о пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския/ невреди́мы от всех наве́т вра́жиих// и спасе́т ду́ши на́ша, я́ко Милосе́рд.
А́ще внутрь попра́зднства Успе́ния,
И ны́не, пра́здника, глас 1:
В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,// и моли́твами Твои́ми избавля́еши от сме́рти ду́ши на́ша.
По 1-м и 2-м стихосло́виих седа́льны воскре́сны.
По полиеле́и велича́ние:
Велича́ем вас,/ вси святи́и, в земли́ Моско́вской просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.
И́но велича́ние:
Ублажа́ем вас,/ чудотво́рцы на́ши сла́внии,/ зе́млю Моско́вскую доброде́тельми ва́шими озари́вшии/ и о́браз спасе́ния нам// светоявле́нно показа́вшии.
Псало́м избра́нный:
Ве́лий Госпо́дь и хва́лен зело́ во гра́де Бо́га на́шего, в горе́ святе́й Его́.
Ре́чная устремле́ния веселя́т град Бо́жий, освяти́л есть селе́ние Свое́ Вы́шний.
Сей род и́щущих Го́спода, и́щущих лице́ Бо́га Иа́ковля.
Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их.
Святы́м, и́же суть на земли́ Его́, удиви́ Госпо́дь вся хоте́ния Своя́ в них.
Земля́ даде́ плод свой, благослови́ ны, Бо́же, Бо́же наш, благослови́ ны, Бо́же, и да убоя́тся Его́ вси концы́ земли́.
Посе́м не пе́вше Сла́ва, и ны́не: лик пое́т:
Благослове́н еси́, Го́споди, научи́ мя оправда́нием Твои́м. А́нгельский собо́р: и про́чия тропари́ воскре́сныя по непоро́чнах.
Ипакои́ гла́са.
Сла́ва, седа́лен святы́х, глас 4:
Восхва́лим, ве́рнии, апо́стола Андре́я Первозва́ннаго,/ святы́х равноапосто́льных Мефо́дия и Кири́лла, учи́телей Слове́нских,/ вели́каго кня́зя Влади́мира и княги́ню О́льгу,/ святи́телей Стефа́на Пе́рмскаго, Инноке́нтия и Мака́рия Моско́вских/ и всех во благове́стии Христо́ве потруди́вшихся,/ я́ко тех труда́ми в земли́ Ру́сской ве́ра насади́ся,/ и да́же до ны́не благода́тию Бо́жиею умножа́ется и плод благи́й прино́сит.
И ны́не, глас то́йже.
(Творе́ние святи́теля Афана́сия Ковро́вскаго:)
Притеце́м, ве́рнии, к Боже́ственней и цельбоно́сней ри́зе Спаси́теля на́шего Бо́га,/ благоизво́лившаго сию́ Пло́тию носи́ти и на Кресте́ Святу́ю Кровь Свою́ излия́ти,/ е́юже искупи́ нас от рабо́ты вра́жия./ Те́мже благода́рственно вопие́м Ему́:/ спаси́ первосвяти́теля на́шего и архиере́и,/ Оте́чество на́ше и вся лю́ди честно́ю Твое́ю ри́зою защити́,/ и спаси́ ду́ши на́ша, я́ко Человеколю́бец.
Степе́нна и проки́мен гла́са.
Вся́кое дыха́ние: Ева́нгелие воскре́сное. Воскресе́ние Христо́во: Псало́м 50. Сла́ва: Моли́твами апо́столов: И ны́не: Моли́твами Богоро́дицы: Поми́луй мя, Бо́же: Стихи́ра воскре́сная: Воскре́с Иису́с от гро́ба:
ЗРИ А́ще храм Всех Моско́вских святы́х, проки́мен святы́х, глас 4: Ра́дуйтеся, пра́веднии, о Го́споде,// пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя.
Вся́кое дыха́ние: Ева́нгелие хра́ма Всех Моско́вских святы́х, от Матфе́я, зача́ло 10. Воскресе́ние Христо́во: Псало́м 50.
Сла́ва: Моли́твами всех Моско́вских святы́х,/ Ми́лостиве, очи́сти// мно́жества согреше́ний на́ших.
И ны́не: Моли́твами Богоро́дицы,/ Ми́лостиве, очи́сти// мно́жества согреше́ний на́ших.
Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х,// очи́сти беззако́ние мое́.
И стихи́ра, глас 6.
Подо́бен: Отча́янная:
Отча́яни есмы́ жития́ ра́ди/ и не и́мамы нра́ва доброде́тельна,/ но, я́ко ми́ро, прино́сим Ти, Го́споди,/ моли́твы святы́х сро́дников на́ших,/ тех предста́тельством не отве́ржи ны/ и не пре́зри слез на́ших, Ра́досте А́нгелов,/ но приими́ ны ка́ющияся,/ и́хже не порази́л еси́ согреша́ющих,// вели́кия ра́ди Твоея́ ми́лости.
Кано́н воскре́сен со ирмосо́м на 4, Богоро́дицы на 2, и святы́х на 8.
Áще внутрь попра́зднства Успе́ния, воскре́сен со ирмосо́м на 4, пра́здника на 4, и святы́х на 6.
Кано́н святы́х, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.
Припе́в: Вси святи́и земли́ Моско́вския, моли́те Бо́га о нас.
Первонача́льника и устрои́теля гра́да Москвы́, блаже́нне кня́же Дании́ле, показа́ тя Госпо́дь,/ к Нему́же непреста́нно моля́ся, град твой охраня́й,/ зе́млю на́шу от бед спаса́й,/ правосла́вныя же ру́сския лю́ди посеща́ти ми́лостивно не преста́й.
Святи́телие Христо́ви и чудотво́рцы,/ Пе́тре, Феогно́сте и Алекси́е богому́дрии,/ Правосла́вия наста́вницы, побо́рницы еди́нства Це́ркве и земли́ Ру́сския,/ вы в труде́х и ско́рбех ду́шу свою́ за па́ству положи́ли есте́,/ и гра́ду Москве́ первопресто́льну бы́ти благослови́ли есте́.
Первопресто́льников прее́мницы,/ Киприа́не, афо́нское воспита́ние, слу́жбы Бо́жия пра́вило,/ со сла́вным Фо́тием, ле́тописей собира́телем и е́реси искорени́телем,/ и со Ио́ною, Правосла́вия утвержде́нием,/ моли́теся Христу́ Бо́гу, да спасе́т ду́ши на́ша.
Почти́м досто́йно па́мять первосвяти́телей Моско́вских и всея́ Руси́:/ Мака́рия чу́днаго, кни́жным списа́нием лю́ди просвети́вшаго и святы́х земли́ Ру́сския просла́вившаго,/ и Фили́ппа, Златоу́сту ревни́теля, и́стины побо́рника,/ ду́шу за па́ству положи́вшаго.
Да торжеству́ет Це́рковь Христо́ва/ и да ра́дуется град Москва́,/ я́ко в годи́ну лю́тых искуше́ний/ возсия́ во испове́дании и́стины непоколеби́мый И́ов Патриа́рх,/ и́же в же́ртву жи́ву и непоро́чну себе́ принесе́ Христу́,/ па́ству к покая́нию обрати́ и во благоче́стии наста́ви.
Священному́чениче Патриа́рше Ермоге́не,/ испове́дниче правосла́вныя ве́ры и обличи́телю грехолюби́вых и мяте́жных,/ строи́телю Ру́сския земли́ и неусы́пный о ней моли́твенниче,/ до сме́рти ве́рен Христу́ Бо́гу пребы́л еси́/ и вене́ц жи́зни ве́чныя от Него́ прия́л еси́.
Сла́ва: В годи́ну гоне́ний жре́бием Бо́жиим избра́нный,/ Христо́вы Це́ркве па́стырю до́брый,/ испове́дниче патриа́рше Ти́хоне,/ моли́ Христа́ Бо́га,/ Ему́же сораспя́лся еси́,/ Це́рковь Ру́сскую во единомы́слии соблюсти́/ и спасти́ зе́млю на́шу и па́ству твою́.
И ны́не: Я́ко благода́тное сокро́вище дарова́ла еси́ гра́ду Москве́ ико́ну Твою́ Влади́мирскую,/ е́юже отце́м на́шим многоча́стне и многообра́зне благоде́яла еси́./ Не оскуде́й и ны́не, о Ма́ти Бо́жия,/ утоля́ющи лю́тое на ны воста́ние,/ и зе́млю Ру́сскую спаси́.
Катава́сия по уста́ву.
Песнь 3
Ирмо́с: Еди́не ве́дый челове́ческаго существа́ не́мощь,/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.
Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным пропове́дая,/ мир и ми́лость се́рдцем умиле́нным явля́я,/ па́ству Ру́сскую до́бре сохрани́л еси́./ Бог же зна́меньми и чудесы́ тя просла́ви,/ и засту́пника Це́ркве на́шея яви́.
Це́рковь Христо́ву апо́стольски во язы́цех созида́ли есте́,/ святи́телю Инноке́нтие, потруди́выйся в просвеще́нии Сиби́ри и Аме́рики,/ и святи́телю Мака́рие, зе́млю Алта́я ве́рою пра́вою озари́вый,/ последи́ же первопресто́льному гра́ду Москве́ пресла́вное украше́ние яви́лися есте́.
Ца́рство земно́е в ничто́же вмени́вше,/ самозва́ни прише́дше к подвиго́м,/ Тро́ицу пропове́дали есте́ пред нечести́вым мучи́телем,/ страстоте́рпче Михаи́ле с до́блим Фео́дором:/ Царю́ Сил предстоя́ще,/ моли́те без вре́да сохрани́ти Оте́чество ва́ше, град Москву́ и лю́ди,/ да вас непреста́нно почита́ем.
Благове́рнаго кня́зя Моско́вскаго Иоа́нна почти́м,/ земли́ Ру́сския собира́теля,/ пра́вый суд твори́вшаго и мир водвори́вшаго,/ хра́мов созида́теля и святы́х уго́дников Бо́жиих почита́теля,/ послу́шателя святы́х уче́ний и зело́ ми́лостива к ни́щим,/ и́же Ца́рствие Небе́сное насле́дова.
Вели́ка обре́те в беда́х тя побо́рника земля́ Ру́сская,/ язы́ки побежда́юща./ Я́коже на Дону́ Мама́еву низложи́л еси́ горды́ню,/ на по́двиг сей прия́в благослове́ние преподо́бнаго Се́ргия,/ та́ко, кня́же Дими́трие,/ соблюда́й моли́твами святы́ми/ град твой Москву́ невреди́м/ от всех наве́т вра́жиих.
Днесь ра́дуется град Москва́,/ име́я в себе́ чудотво́рныя твоя́ мо́щи,/ благове́рне му́чениче царе́виче Дими́трие:/ ты бо, я́ко а́гнец незло́бив, от раба́ заколе́н быв,/ душе́вною чистото́ю к Небе́сней высоте́ возлете́л еси́,/ иде́же моли́ся Оте́честву на́шему богоуго́дну бы́ти/ и сыново́м ру́сским спасти́ся.
Сла́ва: На престо́ле ца́рском, благове́рне Фео́доре,/ всего́ себе́ Христу́ Бо́гу пре́дал еси́:/ кро́ток быв, и ми́лостив, и непоро́чен,/ благоче́стию, богомы́слию и посту́ прилежа́,/ моли́твенными бде́нии от ви́димых и неви́димых враг Русь огражда́я./ И ны́не, блаже́нне, не забу́ди лю́ди твоя́, и́хже возлюби́л еси́.
И ны́не: Засту́пнице ве́рных преблага́я и ско́рая,/ Пречи́стая Богоро́дице Де́во!/ Мо́лим Тя пред святы́м и чудотво́рным о́бразом Твои́м Донски́м:/ я́коже дре́вле от него́ заступле́ние Твое́/ гра́ду Москве́ дарова́ла еси́,/ та́ко и ны́не нас от вся́ких бед и напа́стей ми́лостивно изба́ви/ и спаси́ ду́ши на́ша, я́ко Милосе́рдая.
А́ще внутрь попра́зднства Успе́ния, конда́к, глас 2:
В моли́твах Неусыпа́ющую Богоро́дицу,/ и в предста́тельствах непрело́жное упова́ние,/ гроб и умерщвле́ние не удержа́ста:/ я́коже бо Живота́ Ма́терь,/ к животу́ преста́ви,// во утро́бу Всели́выйся присноде́вственную.
И́кос:
Огради́ моя́ помышле́ния, Христе́ мой,/ и́бо сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.
Конда́к святы́х, глас 3:
Возвели́чися ны́не, гра́де Москво́,/ ве́лиих даро́в духо́вных сподобля́яся,/ я́ко сокро́вищница пречестна́я/ святы́ням и моще́м уго́дник Бо́жиих/ и Оте́чество возлю́бленное мно́гим святы́м,/ ко и́хже по́мощи прибега́ем усе́рдно:/ о святы́х Моско́вских ди́вный со́нме,/ ва́шими уче́ньми и дея́ньми,/ вку́пе и страда́ньми за Христа́,/ ду́ши на́ша просвети́те// и спасе́ния нам при́сно хода́таи бу́дите.
И́кос:
Воспои́м, лю́дие, све́тло Дави́дскую песнь:/ мне же зело́ че́стни бы́ша дру́зи Твои́, Бо́же,/ и помяне́м словеса́ Го́спода Спа́са на́шего, я́же рече́ ученико́м Свои́м:/ вы дру́зи Мои́ есте́, а́ще творите́, ели́ка Аз запове́даю вам;/ и почти́м досто́йно святы́х Моско́вския земли́,/ и́хже Го́сподь избра́, да и́дут и соверша́т по́прище во вся́цем зва́нии и плод принесу́т,/ и́же чрез исполне́ние за́поведей Бо́жиих дру́зи Его́ соде́лашася,/ и плод богоуго́днаго жития́ их пребыва́ет во ве́ки,/ и к ним с любо́вию возопии́м:/ о святы́х Моско́вских ди́вный со́нме,/ ва́шими уче́ньми и дея́ньми,/ вку́пе и страда́ньми за Христа́,/ ду́ши на́ша просвети́те// и спасе́ния нам при́сно хода́таи бу́дите.
Седа́лен святы́х, глас 4:
Я́ко пле́нных свободи́тель/ и ни́щих защи́титель,/ немощству́ющих врач,/ правосла́вных побо́рниче,/ победоно́сче великому́чениче Гео́ргие,/ моли́ Христа́ Бо́га/ град Москву́ сохрани́ти невреди́м и спасти́ ду́ши на́ша.
Сла́ва, и ны́не, Богоро́дичен, глас то́йже:
Избра́нной от всех родо́в Засту́пнице ро́да христиа́нскаго,/ благода́рственная пе́ния прино́сим о явле́нии в годи́ну лю́тую в Моско́вских преде́лех ико́ны Ея́ Держа́вныя,/ и велича́ем Пресвяту́ю Богоро́дицу, я́ко земли́ Ру́сския Цари́цу Небе́сную/ и люде́й правосла́вных Влады́чицу Держа́вную.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.
Ра́дуются сла́вный град Москва́ и вся земля́ Ру́сская,/ име́юще печа́льника и засту́пника, Се́ргия богоблаже́ннаго,/ оби́тель же его́ красу́ется,/ храня́щи честны́я его́ мо́щи я́ко сокро́вище благода́тное./ Напи́шем, бра́тие, в сердца́х на́ших заве́т преподо́бнаго отца́:/ воззре́нием на Святу́ю Тро́ицу/ страх пред ненави́стною ро́знию ми́ра сего́ побежда́ти.
Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ преподо́бнии Кири́лле и Мари́е,/ плод благоче́стия, Се́ргия преподо́бнаго, нам яви́вшии,/ с ни́мже усе́рдно моли́те Го́спода,/ низпосла́ти нам дух любве́ и смиренному́дрия,/ да в ми́ре и единомы́слии/ просла́вим Тро́ицу Единосу́щную.
Кулико́вския бра́ни ра́тники духо́вныя воспои́м,/ добропобе́дных Алекса́ндра и Андре́я,/ ти́и бо, благослове́нием преподо́бнаго Се́ргия укрепля́еми,/ тве́рдою ве́рою и любо́вию после́доваша Христу́,/ И́же послушли́в быв да́же до сме́рти, рече́ ученико́м Свои́м:/ бо́льши сея́ любве́ никто́же и́мать, да кто ду́шу свою́ положи́т за дру́ги своя́.
Восхва́лим преподо́бнаго Ни́кона, послуша́ния рачи́теля,/ и кро́ткаго Михе́я, и́же со а́ввою свои́м сподо́бися посеще́ния Пресвяты́я Богоро́дицы,/ с ни́миже Диони́сия архимандри́та, благоче́стия побо́рника и терпе́ния столпа́,/ страда́льца за и́стину и милосе́рдия пучи́ну,/ и́же во вре́мя сму́ты люде́й ру́сских ко свобожде́нию Оте́чества воздви́же.
Преподо́бне о́тче Анто́ние,/ Небе́сное призва́ние чрез Саро́вскаго чудотво́рца и святи́теля Филаре́та прие́мый,/ и и́стинный храни́телю заве́тов а́ввы Се́ргия в лавре того́ бы́вый,/ и благода́тный ста́рче Варна́во, па́стырю кро́ткий, уте́шителю и цели́телю стра́ждущих,/ сло́вом и хле́бом а́лчущих пита́вый,/ о нас Христу́ Бо́гу те́пле моли́теся.
Богому́дре о́тче Крони́де, па́стырю до́брый и и́ноков пра́вило,/ и вси новому́ченицы и испове́дницы земли́ Ра́донежския,/ ве́рная ча́да Се́ргия преподо́бнаго,/ вы за ве́ру во Христа́ страда́ния лю́тая до́блественно претерпе́сте./ Те́мже на Небесе́х прославля́ете Тро́ицу Живонача́льную.
Сла́ва: Богоно́сных отце́в Ра́донежских/ всечестну́ю па́мять чту́ще,/ научи́мся их ве́ре и житию́,/ и́стинному поклоне́нию и служе́нию Пресвяте́й Тро́ице./ Тех бо предста́тельством те́плым ко Го́споду/ мно́гия нам ми́лости низпосыла́ются,/ бе́дствия отгоня́ются и злы́я стра́сти укроща́ются.
И ны́не: В пресла́внем явле́нии Твое́м, Де́во Богоро́дице,/ припаде́ к стопа́м Твои́м преподо́бный а́вва Се́ргий/ и мольбу́ о святе́й оби́тели изря́дно сотвори́,/ да Твои́м Ма́терним ко Христу́ предста́тельством усе́рдно при́сно хода́тайствуеши/ о всех под свяще́нный покро́в Твой прибега́ющих,/ прося́щи нам оставле́ния грехо́в и ве́лия ми́лости.
Песнь 5
Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия// правосла́вно пою́щих Тя.
Преподо́бнии отцы́ Андрони́че и Са́вво,/ в пусты́ни всели́вшеся Се́ргия вели́каго,/ того́ житию́ после́довали есте́,/ сего́ ра́ди сподо́билися бы́ти строи́тели и первонача́льницы/ обе́тныя оби́тели святи́теля Алекси́я,/ ны́не же ду́хом Престо́лу Бо́жию предстоя́ще,/ с преподо́бными Алекса́ндром, Андре́ем и Дании́лом/ моли́теся о гра́де Москве́ и о всех, почита́ющих вас.
От ю́ности к боже́ственней красоте́ устремля́яся,/ чу́дный иконопи́сец земли́ Ру́сския был еси́,/ и богоно́сным твои́м учи́телем поревнова́в,/ во оби́тели Свята́го Спа́са подвиза́яся,/ сия́нием доброде́телей украси́лся еси́, преподо́бне Андре́е,/ и ико́ною Святы́я Тро́ицы всему́ ми́ру пропове́дал еси́/ Еди́нство во Святе́й Тро́ице,/ те́мже яви́лся еси́ Це́ркве на́шея похвала́ и ра́дование.
Фео́дора блаже́ннаго,/ ученика́ преподо́бнаго Се́ргия и святи́теля Росто́вскаго,/ Успе́нскую Си́монову оби́тель в первопресто́льнем гра́де основа́вшаго,/ иде́же преподо́бнии Кири́лл и Ферапо́нт Белоезе́рстии нача́ло подвиго́в свои́х положи́ша,/ с ни́миже Варфоломе́я, Иоа́нна и Игна́тия досточу́дныя/ Тебе́, Христе́ Бо́же, приво́дим моли́твенники, и́хже ра́ди спаси́ нас.
Богоуго́дно пожи́вше, град Се́рпухов по́двиги ва́шими облагоуха́ли и оби́тельми святы́ми украси́ли есте́:/ Варлаа́ме, учениче́ святите́ля Алекси́я и избра́нниче Бо́жия Ма́тере, со сподви́жником твои́м Гедео́ном,/ Афана́сие, ста́рче доброде́тельный и учи́тельный, и други́й Афана́сие, на горе́ Высо́це просия́вшии,/ в Небе́сных кро́вех ны́не пребыва́юще, моли́те спасти́ся нам.
Тро́ицкаго вертогра́да до́брыя о́трасли,/ Григо́рие, в Голу́твине оби́тель до́бре созда́вый,/ Мефо́дие, на Пешно́ше ве́лия труды́ для устрое́ния мона́шескаго жития́ подъя́вый,/ Лео́нтие, Са́вво и Иа́кове Стромы́нстии, моли́твенницы о побе́де проти́ву ви́димых и неви́димых враг,/ те́рния злостра́стия искорени́вше,/ я́ко кри́ни в пусты́нях процвели́ есте́.
Презре́вше ми́ра сего́ кра́сная и су́етная,/ богоно́сному а́вве Се́ргию после́довасте,/ Са́вво, на Сторо́жи недре́мленным пред Бо́гом стоя́нием до́бре ста́до слове́сное упра́вивый,/ Рома́не, трудолю́бный па́стырю Киржа́чский,/ и Стефа́не прему́дре, оби́тели на Ма́хре и Авне́жи реце́ устро́ивый,/ Святе́й Тро́ице предстоя́ще,/ моли́те о душа́х на́ших.
Сла́ва: Заре́ю Ду́ха облиста́емь,/ пресве́тел яви́лся еси́ Правосла́вия свети́льник, Макси́ме преподо́бне,/ из оте́чества на Русь пресели́вся,/ мно́гия труды́ во исправле́нии кни́жнем подъя́л еси́,/ непра́ведная заточе́ния от самодержа́внаго претерпе́в,/ десни́цею Вы́шняго венча́ешися и чудоде́йствуеши пресла́вная./ И о нас хода́тай бу́ди непрело́жен,/ чту́щих любо́вию святу́ю па́мятъ твою́.
И ны́не: Засту́пницу усе́рдную и Ма́терь Го́спода Вы́шняго восхва́лим,/ и сокруше́нным се́рдцем честно́му Ея́ Каза́нскому поклони́мся о́бразу,/ и́мже в новопросвеще́нней стране́ правове́рие утверди́/ и в годи́ну лю́тую первопресто́льный град и Русь спасе́./ Сей и гра́да свята́го Петра́ вели́кое сокро́вище, и всея́ земли́ на́шея пресла́вное бога́тство.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.
Я́ко по́стников удобре́ние и отце́в красоту́,/ ми́лости пода́теля, разсужде́ния свети́льника,/ вси ве́рнии, соше́дшеся, восхва́лим прему́драго Ио́сифа Во́лоцкаго,/ кро́тости учи́теля и ересе́й посрами́теля,/ и с ним чу́дно в по́двизех просия́вших Гера́сима Че́рнаго, Кассиа́на Боса́го и Фо́тия Волокола́мских,/ моля́щихся Го́споду поми́ловатися душа́м на́шим.
Я́ко кри́ни, пусты́нная места́ Моско́вския земли́ облагоуха́ли есте́, преподо́бнии отцы́,/ Левки́е Волокола́мский, на реце́ Ру́зе, Зоси́мо и Адриа́не, на реце́ Сестре́ оби́тели основа́вшии,/ Ни́коне, Васи́лие и Ти́хоне Соколо́встии, на реце́ И́стре в де́брех подвиза́вшиися,/ ве́тхаго челове́ка со грехо́вными страстьми́ совлекли́ся есте́,/ обле́кшеся в но́ваго во Христе́, всечестни́и.
Приими́те благода́рственныя пе́сни на́ша, Серпуховски́х преде́лов украше́ние, богоно́снии отцы́:/ Дави́де, пусты́ню непрохо́дную в вертогра́д духо́вный претвори́вый и чудотворе́нием просла́вленный,/ и Влади́мире Белопесо́цкий, Вы́шним благослове́нием вожде́м духо́вныя дружи́ны поста́вленный,/ земли́ Моско́встей от ви́димых и неви́димых враг в защи́ту и огражде́ние.
Кро́ткия зве́зды мона́шескаго ли́ка:/ Анто́ний Чу́довский, изгна́ние ага́рян предреки́й и му́ченический вене́ц прия́вый,/ Карп, в Зна́менстей оби́тели та́йными по́двиги Бо́гу угоди́вый,/ и Аристо́клий, Афо́нское процвете́ние и гра́да Москвы́ украше́ние,/ я́ко луча́ми, сия́ют доброде́тельми жития́ своего́ преподо́бнии.
Преподо́бнии богому́дрии отцы́ пу́стыни Зоси́мовы,/ ду́хом оби́тели Се́ргиевы напое́нныя:/ Ге́рмане игу́мене, богомы́слия и ста́рчества в ней насади́телю,/ затво́рниче преди́вный Алекси́е, и́мя избра́нника Бо́жия на патриа́рший престо́л жре́бием откры́вый,/ и Игна́тие, му́ченический вене́ц восприе́мый,/ Святе́й Тро́ице предстоя́ще,/ моли́те спасти́ся душа́м на́шим.
Сосу́ди избра́ннии Свята́го Ду́ха, бо́дреннии подви́жницы,/ Зоси́мо, оте́ческаго уче́ния ревни́телю,/ Сиби́рския пусты́ни кра́сное прозябе́ние,/ безмо́лвия рачи́телю и оби́тели неве́ст Христо́вых устрои́телю,/ с Пи́меном, и́же во оби́тели Угре́шской зело́ потруди́ся и мона́хов мно́жество собра́,/ сердца́ на́ша хла́дная моли́твами ва́шими согре́йте, и научи́те друг дру́га тяготы́ носи́ти.
Сла́ва: Богопросвеще́ннии отцы́ Анато́лие и испове́дниче Ни́коне,/ та́йная се́рдца челове́ческаго ве́дуще, наро́да Бо́жия печа́льницы до́блии яви́стеся:/ на путь покая́ния мно́ги наста́висте и в ве́ре утверди́сте./ Ны́не же во сла́ве Бо́жией со все́ми преподо́бными ста́рцы О́птинскими пребыва́юще,/ моли́теся ко Го́споду, да утверди́т Оте́чество на́ше в Правосла́вии и благоче́стии/ и спасе́т ду́ши на́ша.
И ны́не: А́ще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию́ от враго́в,/ но яви́лася есть храни́тельница Афо́на и врата́рница оби́тели И́верския./ И в первопресто́льнем гра́де Москве́ от подо́бия о́браза Твоего́ чуде́сную по́мощь и утеше́ние чту́щим Тя источа́еши, да зове́м Ти:/ ра́дуйся, Блага́я Врата́рнице, две́ри ра́йския ве́рным отверза́ющая.
Конда́к и и́кос воскре́сны.
Песнь 7
Ирмо́с: Тебе́ у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.
Прииди́те, мучениколю́бцы, воспои́м священному́ченика Влади́мира, па́ству Моско́вскую до́бре упа́сшаго,/ в Ки́еве пе́рваго от архипа́стырей в ли́це новому́чеников Ру́сских незло́биво смерть за Христа́ прия́вшаго,/ и с ним святы́х отце́в Поме́стнаго Собо́ра Це́ркве Ру́сския,/ и́же словесы́ и страда́ньми свои́ми ве́рныя в стоя́нии за Правосла́вие утверди́ша.
Священному́ченицы богому́дрии, с апо́стольскою ра́достию страда́ния за Те́ло Христо́во, е́же есть Це́рковь, подъя́вшии,/ Пе́тре, блюсти́телю ве́рный Це́ркве Ру́сския,/ и Правосла́вия побо́рниче Иларио́не,/ помо́щниче усердный первосвяти́теля Ти́хона,/ на Небесе́х ны́не лику́юще,/ моли́те Ми́лостиваго Бо́га, сохрани́ти нас в ми́ре и единомы́слии,/ и в се́рдце начерта́ти заве́т ваш:/ без Це́ркве несть спасе́ния.
Да почтя́тся ны́не святи́тели, муче́нием к Небеси́ восте́кшии:/ Серафи́м Дми́тровский, любо́вию ко Го́споду пламене́вый и душе́ю вознесе́нною Бо́га воспева́вый,/ Ники́та, Оре́хова-Зу́ева похвало́, моли́твою, благоче́стием и прему́дрым юро́дством просия́вый,/ и Дими́трий Можа́йский, заблу́ждших на путь пра́вый наста́вивый.
Торжеству́ет Коло́мна, прославля́ющи святи́теля Феодо́сия, сло́вом и житие́м о́браз ве́рным бы́вшаго,/ и в годи́ну гоне́ния Христа́ му́жественне испове́давшаго;/ лику́ют же и преде́лы Волокола́мстии,/ труды́ и моли́твами священному́ченика Ге́рмана облагоуха́ннии,/ и́же измла́да еди́на Небе́сная помышля́я,/ страда́нием к ве́чней Па́сце нетле́ния востече́.
Да ра́дуются оби́тели Моско́вския,/ прославля́юще игу́мены и ча́да своя́,/ последи́ святи́тельский сан и вене́ц му́ченический восприи́мшия:/ Новоспа́сская – Мака́рия Вя́земскаго и Павли́на Могиле́вскаго,/ Ново-Иерусали́мская – Ио́ну Ве́лижскаго,/ Саввино-Стороже́вская – Петра́ Воро́нежскаго,/ усе́рдныя моли́твенники о душа́х на́ших.
Святи́телие Госпо́дни Серафи́ме Петрогра́дский и Нико́лае Влади́мирский,/ спросия́ седи́не ва́шей богоразу́мие:/ пла́менною любо́вию Святе́й Тро́ице послужи́вше/ и непоколеби́мым страда́нием предочи́стившеся,/ в же́ртву непоро́чну себе́ Христу́ принесо́сте./ Мощьми́ же в Бу́тове почива́юще,/ ду́хом с го́рних высо́т на ны призира́ете,/ сего́ ра́ди вопие́м вам:/ ра́дуйтеся, засту́пницы те́плии.
Сла́ва: Добропобе́днии свиде́телие Христо́ви,/ сме́ртным страда́нием в ро́вы Бу́товския все́яннии,/ я́ко кла́си безчи́сленнии плод стори́чный я́ве прино́сят,/ в ве́ре, наде́жди и любви́ нас утвержда́ют/ и дерзнове́нно о нас мо́лятся:/ кровь бо му́ченическая вои́стину се́мя Це́ркве есть.
И ны́не: Боголюби́вая Цари́це, Неискусому́жная Де́во, Богоро́дице Мари́е,/ со все́ми святы́ми земли́ Моско́вския моли́ за ны Сы́на Твоего́, Христа́ Бо́га на́шего,/ и я́коже дре́вле благода́тию о́браза Твоего́ лю́ди гра́да Москвы́ от смертоно́сныя боле́зни изба́вила еси́,/ та́ко и ны́не нас от ви́димых и неви́димых враг защити́/ и спаси́ ду́ши на́ша.
Песнь 8
Ирмо́с: В пещи́ о́троцы Изра́илевы,/ я́коже в горни́ле/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.
Святи́тель Афана́сий Ковро́вский да восхва́лится,/ многоле́тная страда́ния за Христа́ претерпе́вый и святы́х земли́ Ру́сския воспе́вый,/ и вси архипа́стыри, и́же во гра́де Москве́ в заточе́нии за Христа́ пребы́ша и убие́ни бы́ша,/ с ни́миже и мы взыва́ем:/ Русь Свята́я, храни́ ве́ру правосла́вную,/ в не́йже тебе́ утвержде́ние.
Украше́ние свяще́нников и ве́ры благове́стников воспои́м:/ Алекса́ндра протопресви́тера, сподви́жника ре́вностнаго первосвяти́теля Ти́хона,/ Иоа́нна, отечестволю́бца и пропове́дника,/ Константи́на Богоро́дскаго, раско́ла врачева́теля богому́драго,/ и всех пресви́теров и диа́конов Моско́вских, любве́ ра́ди ко Христу́ и па́стве ду́шу положи́вших.
Потруди́вшияся до́бре в сло́ве и уче́нии пресви́теры почти́м,/ страда́льчески тече́ние сконча́вшия:/ Илию́, кано́ном и преда́нием науча́вшаго,/ и Иоа́нна, сверже́ние безбо́жнаго и́га правосла́вным наро́дом богоно́сцем предсказа́вшаго,/ с ни́ми же Иоа́нна му́ченика, святы́х оте́ц глаго́лы изъясня́вшаго,/ и́же венцы́ пра́вды от Бо́га восприя́ша.
Хода́таи бу́дите за па́ству ва́шу, преподо́бнии отцы́:/ Се́ргие, му́дрый наста́вниче сестр оби́тели милосе́рдия,/ и Гео́ргие, Дани́ловская похвало́, любо́вию стра́ждущих утеша́вый,/ со священноиспове́дником Рома́ном, братств ревни́телей ве́ры насади́телем,/ и все́ми па́стырьми и и́ноки, за испове́дание Христа́ пострада́вшими.
Ве́лия труды́ любве́ и милосе́рдия подъя́л еси́, пра́ведный ста́рче Алекси́е,/ от свята́го па́стыря Кроншта́дтскаго благослове́ние на по́мощь стра́ждущим прие́м,/ мра́ку же беззако́ний наше́дшу,/ беды́ и ско́рби людски́я я́ко вери́ги на ра́мо свое́ возложи́л еси́./ С сы́ном твои́м священному́чеником Се́ргием/ моли́ Христа́ Бо́га, спасти́ся душа́м на́шим.
Тала́нты Бо́гом да́нныя для благоле́пия церко́внаго умно́жившии:/ священному́чениче Гео́ргие, сла́вий добропе́снивый, страда́ния и смерть за Христа́ возжеле́вый,/ и му́чениче Михаи́ле, храм души́ доброде́тельми удобри́вый, хра́мы Бо́жия ико́нным писа́нием украси́вый,/ со все́ми новому́ченики и испове́дники Моско́вскими/ моли́те Святу́ю Тро́ицу о душа́х на́ших.
Сла́ва: О прему́дрии и блаже́ннии Христа́ ра́ди юро́дивии/ Васи́лие, Макси́ме, Иоа́нне Моско́встии и Иоа́нне Можа́йский,/ чу́днии житие́м и ра́зумом,/ с пра́ведным Васи́лием, раско́лов обличи́телем в Поса́де Па́вловстем,/ помози́те нам собла́зны лука́ваго ве́ка сего́ отверга́ти,/ и покая́ние во гресе́х при́сно Бо́гу приноси́ти.
И ны́не: Егда́ по грехо́м на́шим иноплеме́нницы наидо́ша на Русь,/ правосла́внии во́ини ру́сстии на по́ли Бороди́нстем покая́ние и моли́тву пред Смоле́нскою ико́ною Влады́чицы те́пле принесо́ша./ А́ще и плене́н бысть град Москва́,/ но последи́ предста́тельством Пречи́стыя от супоста́т изба́вися,/ те́мже благода́рственная Ей воспева́ем.
Песнь 9
Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.
Да велича́ются преподо́бныя Иулиани́я и Евпракси́я,/ пе́рвыя оби́тели деви́ческия во гра́де Москве́ устрои́тельницы,/ и Евфроси́ния, я́же, по земне́м вдовстве́ Небе́сному Жениху́ себе́ уневе́стивши/ и в кня́жестем черто́зе подви́жнически пожи́вши,/ во зда́нной е́ю оби́тели блаже́нныя кончи́ны сподо́бися.
Восхва́лим преподо́бныя ма́тери на́ша:/ Еле́ну, моли́твенницу и чудотво́рицу,/ житие́ мона́шеское во оби́тели Пречи́стыя Одиги́трии устро́ившую,/ и Варсоно́фию, святи́теля Фили́ппа честну́ю ма́терь, Вознесе́нскую оби́тель основа́вшую,/ о поги́бших ну́ждною сме́ртию и ни́щих попече́ние име́вшую.
Нетле́нною красото́ю кро́ткаго и молчали́ваго ду́ха в по́двизех мона́шеских процве́тшия:/ Рахи́ль, ста́рице Бороди́нская,/ повеле́нием Пресвяты́я Богоро́дицы бли́жним послужи́вшая,/ и Фама́рь, Иве́рии благослове́нныя дщи благоро́дная,/ уте́шительнице, моли́твеннице и испове́днице Христо́ва,/ моли́те спасти́ся нам.
Почти́м преподобному́чениц Христо́вых:/ богому́друю вели́кую княги́ню Елисаве́ту с Варва́рою,/ я́же милосе́рдием, терпе́нием и любо́вию себе́ предочи́стиша,/ и я́ко же́ртвы пра́ведныя Бо́гу принесо́шася,/ и Афана́сию игу́мению,/ все́ю кре́постию Христа́ возлюби́вшую/ и ду́шу за Него́ положи́вшую.
А́гницы Твоя́, Иису́се, и кро́ткия голуби́цы,/ святы́я жены́, в мона́шеском чи́не и во вся́цем зва́нии в преде́лех Моско́вских подвиза́вшияся,/ во вре́мя гоне́ний лю́тых муче́нием и испове́данием любо́вию поже́ршияся Тебе́,/ сочета́шася преподо́бных светле́йшему ли́ку/ и страда́льцев до́блему полку́,/ и мо́лятся о душа́х на́ших.
Воспои́м блаже́нныя ста́рицы Моско́вския,/ в не́мощех, досажде́ниих и теснота́х по Христе́ пребы́ти благоволи́вшия:/ Ма́рфу, моли́твы пра́вило и оби́тели Предте́чевы украше́ние,/ и Матро́ну, Бо́гом умудре́нную и просвеще́нную,/ с ни́ми же и Матро́ну Анемня́севскую,/ испове́днический путь в Москве́ сконча́вшую,/ те́плыя на́ша засту́пницы.
Сла́ва: О вели́цыи сро́дницы на́ши, в преде́лех Моско́вских Бо́гу угоди́вшии,/ имено́ваннии и безыме́ннии, явле́ннии и неявле́ннии,/ Це́ркве Правосла́вныя украше́ние и Оте́чества на́шего похвало́,/ помози́те нам за́поведи ева́нгельския исполня́ти и ве́рными Христу́ да́же до сме́рти бы́ти,/ от нас, я́ко дар, песнь благодаре́ния прие́млюще.
И ны́не: О Де́во Благода́тная, гра́ды и ве́си земли́ Моско́вския честна́го ли́ка Твоего́ изображе́нии,/ я́ко благоволе́ния зна́мении, обогати́вшая,/ благодаре́ние на́ше приими́ и от бед лю́тых нас изба́ви,/ вси бо Тя, я́ко покро́в всемо́щный земли́ на́шея, велича́ем.
Свят Госпо́дь Бог наш: Ексапостила́рий воскре́сен.
Сла́ва, свети́лен святы́х.
Подо́бен: Жены́, услы́шите:
Ра́дуйся, первопресто́льный гра́де Москво́ и вся Моско́вская земле́,/ се бо ча́да твоя́/ Престо́лу Влады́чню во сла́ве предстоя́т,/ я́ко зве́зды небе́сныя сия́юще,/ и светови́дным покая́нием/ к Ца́рствию Небе́сному нас наставля́юще.
И ны́не, Богоро́дичен воскре́сен, или́ святы́х:
При́сно земля́ Моско́вская/ о Тебе́ хва́лится и весели́тся,/ иму́щи Тя Засту́пницу непосты́дную/ и сте́ну неруши́мую,/ не оскуде́й и ны́не, Влады́чице,/ избавля́ти лю́ди Твоя́ от всех бед.
А́ще внутрь попра́зднства Успе́ния, пра́здника:
Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сы́не и Бо́же Мой, приими́ дух Мой.
На хвали́тех стихи́ры воскре́сны 4.
Та́же стихи́ры святы́х 4, глас 1.
Подо́бен: Небе́сных чино́в:
Стих: Хвали́те Его́ в тимпа́не и ли́це,// хвали́те Его́ во стру́нах и орга́не.
Пропове́дуем ми́лость,/ испове́дуем благода́ть, не таи́м благодея́ния,/ я́же дарова́л еси́ нам, Всеми́лостивый Го́споди,/ чрез уго́дников Твои́х,/ и́же от лет дре́вних до после́дних/ в земли́ Моско́вской подвиза́шася.
Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния.// Вся́кое дыха́ние да хва́лит Го́спода.
В моли́твах неусыпа́ющую Богоро́дицу,/ кре́пкое огражде́ние гра́да Москвы́,/ ди́вным заступле́нием и зна́меньми от чудотво́рных ико́н/ при́сно покро́в Свой явля́ющую,/ благода́рно в пе́снех возвели́чим,/ я́ко в предста́тельствах непрело́жное на́ше упова́ние.
Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.
Арха́нгельскими кри́лы покрыва́емый,/ красу́йся и лику́й ны́не, пречестны́й гра́де Москво́,/ созыва́я ча́да твоя́ рабо́тати Го́сподеви со стра́хом/ и ра́доватися Ему́ с тре́петом,/ после́дующа многоиме́нному ли́ку Моско́вских святы́х,/ и́же нам о́браз угожде́ния Бо́гу яви́ша.
Стих: Ди́вен Бог во святы́х Свои́х,// Бог Изра́илев.
О святи́и сро́дницы на́ши,/ приими́те ма́лое сие́ хвале́ние от недосто́йных усте́н/ и просвети́те ду́ши на́ша ва́шими уче́ньми и дея́ньми,/ вку́пе и страда́ньми за Христа́,/ предста́тельством ва́шим мир Бо́жий Оте́честву на́шему испроси́те,/ и утверди́те нас в Правосла́вии.
Сла́ва, стихи́ра ева́нгельская. И ны́не, Богоро́дичен, глас 2: Преблагослове́нна еси́:
Славосло́вие вели́кое.
Тропа́рь воскре́сен: Днесь спасéние: (в неде́ли 1, 3, 5, 7 гласо́в), или́: Воскре́с из гро́ба: (в неде́ли 2, 4, 6, 8 гласо́в).
Ектении́ и отпу́ст.
На часе́х тропа́рь воскре́сен. Сла́ва, святы́х. И ны́не, Богоро́дичен часа́. Конда́к воскре́сен и конда́к святы́х пременя́юще глаго́лем.
А́ще внутрь попра́зднства Успе́ния:
На 1-м часе́: тропа́рь воскре́сен. Сла́ва, святы́х. Конда́к воскре́сен.
На 3-м часе́: тропа́рь воскре́сен. Сла́ва, пра́здника. Конда́к святы́х.
На 6-м часе́: тропа́рь воскре́сен. Сла́ва, святы́х. Конда́к пра́здника.
На 9-м часе́: тропа́рь воскре́сен. Сла́ва, пра́здника. Конда́к воскре́сен.
НА ЛИТУРГИ́И
Антифо́ны изобрази́тельны. Блаже́нны воскре́сны гла́са на 6.
А́ще внутрь попра́зднства Успе́ния, блаже́нны гла́са 4, пра́здника 4.
Блаже́нны святы́х 4, глас 4:
Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще, Мене́ ра́ди.
Вси в пе́снех духо́вных воспои́м согла́сно/ во благоче́стии просия́вшия святы́я Моско́вския земли́,/ я́же Це́рковь Ру́сская воспита́,/ и к ним с любо́вию воззове́м:/ моли́теся, святи́и, о сро́дницех ва́ших,/ усе́рдно па́мять ва́шу прославля́ющих.
Ра́дуйтеся и весели́теся, я́ко мзда ва́ша мно́га на Небесе́х.
Ре́чная устремле́ния, Ду́хом Святы́м напая́емая,/ град Бо́жий Москву́ весе́лия исполня́ете,/ и све́том любве́ ва́шея озаря́ете ве́рных сердца́,/ о собо́ре святы́й и по́лче боже́ственный,/ земли́ на́шея утвержде́ние вы есте́ вои́стину.
Сла́ва: О Тро́ице Честна́я,/ приими́, я́же земля́ Моско́вская прино́сит Ти,/ я́ко нача́тки и я́ко фимиа́м избра́нный,/ вся угоди́вшия и пре́жде, и по́слежде в ней,/ зна́емыя и незна́емыя,/ и моли́твами их от вся́каго вре́да сию́ сохраня́й.
И ны́не: О Де́во Благода́тная,/ гра́ды и ве́си на́ша честна́го ли́ка Твоего́ изображе́нии,/ я́ко благоволе́ния зна́мении, обогати́вшая,/ благодаре́ние на́ше приими́/ и от бед лю́тых Оте́чество на́ше изба́ви,/ вси бо Тя, я́ко покро́в всемо́щный земли на́шея, велича́ем.
Вхо́дное: Прииди́те, поклони́мся: Спаси́ ны, Сы́не Бо́жий, воскресы́й из ме́ртвых:
По вхо́де тропари́ и кондаки́:
В хра́ме Госпо́дском: тропа́рь воскре́сен, тропа́рь святы́х. Сла́ва, конда́к святы́х. И ны́не, конда́к воскре́сен.
В хра́ме Богоро́дицы: тропа́рь воскре́сен, тропа́рь хра́ма, тропа́рь святы́х, конда́к воскре́сен. Сла́ва, конда́к святы́х. И ны́не, конда́к хра́ма.
В хра́ме святы́х: тропа́рь воскре́сен, тропа́рь святы́х, конда́к воскрéсен. Сла́ва, конда́к святы́х. И ны́не, конда́к Успéния, в кий день ни прилучи́тся.
А́ще внутрь попра́зднства Успе́ния: тропа́рь воскре́сен, тропа́рь пра́здника, тропа́рь святы́х, конда́к воскре́сен. Сла́ва, конда́к святы́х. И ны́не, конда́к пра́здника.
Проки́мен воскре́сен, и святы́х, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Апо́стол воскре́сен, и святы́х, ко Евре́ем, зача́ло 330. Аллилуиа́рий воскре́сен, и святы́х, глас 4: Бо́же, уши́ма на́шима услы́шахом, и отцы́ на́ши возвести́ша нам. Ева́нгелие воскре́сное, и святы́х, от Матфе́я, зача́ло 10. Прича́стен воскре́сен: Хвали́те Го́спода с небе́с, хвали́те Его́ в вы́шних. И святы́х: Благоволи́т Госпо́дь в лю́дех Свои́х, и вознесе́т кро́ткия во спасе́ние.
А́ще внутрь попра́зднства Успе́ния, задосто́йник пра́здника.
Моли́тва
Го́споди Бо́же Вседержи́телю, Сло́вом Твои́м утверди́вый Небеса́ и Ду́хом уст Твои́х всю си́лу их, положи́вый свети́ла на тве́рди небе́сней в зна́мения, и во времена́, и во дни, и в ле́та; и бытие́ ви́димых созда́ний Твои́х в кру́ги време́н заключи́вый, благослови́вый нача́тки време́н и чи́сла исполне́ния их освяти́вый, воззри́ на первопресто́льный град Москву́, и́же помяну́в ле́та, проте́кшая над ним, судьба́м Твои́м чуди́тся и в помышле́нии о судьба́х гряду́щаго вре́мене пред лице́м Твои́м, Царю́ веко́в, благогове́ет. Испове́дуем ми́лости Твоя́ дре́вния, и о настоя́щих благодари́м, и о бу́дущих мо́лим. Сла́вим Твое́ благода́тное избра́ние и бога́тый о нас Про́мысл, я́ко ма́лую не́когда весь во град ве́лий возрасти́л еси́; и уго́дником Твои́м святи́телем Петро́м пре́жде сбытия́ предвозвести́л еси́, е́же сла́вну бы́ти гра́ду сему́ во всех граде́х росси́йских и просла́витися Тебе́ в нем; та́же и преноси́мый престо́л Правосла́вия зде утверди́л еси́, и ко́рень единодержа́вия всеросси́йскаго зде насади́л еси́, и престо́л ца́рства возвы́сил еси́, и святы́м Твои́м зде пожи́ти и во благоуха́нии святы́ни почи́ти благоволи́л еси́, и́хже моли́твами, а́ки адама́нтовою стено́ю, от напа́стей град сей огражда́л еси́, и бе́дствующий вско́ре избавля́л еси́, и по ле́тех гоне́ния безбо́жнаго, егда́ святы́ни, хра́мы и оби́тели пору́гани, оскверне́ни и разоре́ни бы́ша, па́ки возставля́еши и но́вым благоле́пием украша́еши. О́тче щедро́т и Го́споди ми́лости! При́зри благосе́рдием на сие́ благода́рственное испове́дание на́ше и не отста́ви ми́лости Твоея́ от нас. Благослови́ град сей и о́бласть его́ бла́гостию Твое́ю, и вене́ц проше́дших лет его́ в гряду́щем да не увяда́ет. Благослови́ и поми́луй первопресто́льника гра́да сего́ и Це́ркве Ру́сския, вели́каго господи́на и отца́ на́шего Святе́йшаго Патриа́рха Кири́лла. Обнови́ и умно́жи благослове́ния Твоя́ на власте́х земли́ Ру́сския и первопресто́льнаго гра́да сего́. Долгоде́нствие, и благоде́нствие, и в де́лех власти́тельских и во всех доброде́телех преуспе́яние им да́руй. Сохрани́ Це́рковь Твою́ Святу́ю неколе́блему на основа́нии Твоего́ Боже́ственнаго Сло́ва, на ка́мени апо́стольския ве́ры, да вся́кое дерзнове́нное своему́дрие челове́ческое не прико́снется киво́ту Бо́жию. Низпосли́, Го́споди, мир на лю́ди Твоя́ и на обраща́ющия сердца́ к Тебе́. Да бу́дет близ боя́щихся Тебе́ спасе́ние Твое́, всели́ти сла́ву в зе́млю на́шу. Ми́лость и и́стина в ней да срета́ются, пра́вда и мир да лобыза́ются. Не преда́ждь нас служи́ти суете́ и непра́вде, но да при́зрим на вся за́поведи Твоя́ и не постыди́мся. Да́руй нам благода́ть и благу́ю ре́вность Твоего́ ве́чнаго Ца́рствия и пра́вды его́ пре́жде и па́че всего́ иска́ти, да и блага́я, вре́менному житию́ потре́бная, вся приложа́тся нам, предста́тельством и покро́вом Преблагослове́нныя Присноде́вы Богоро́дицы и моли́твами святи́телей Петра́, Феогно́ста, Алекси́я, Киприа́на, Фо́тия, Ио́ны, Мака́рия, Фили́ппа, И́ова, Ермоге́на, Филаре́та, Инноке́нтия, Мака́рия и Ти́хона, и всех святы́х, в земли́ Моско́вской просия́вших, с ни́миже во обще́нии ве́ры Тебе́ Еди́ному Триипоста́сному Бо́гу, Безнача́льному Отцу́, и Собезнача́льному Сы́ну, и Соприсносу́щному Свято́му Ду́ху, прино́сим благодаре́ние, поклоне́ние и сла́ву во ве́ки веко́в. Ами́нь.
И́на моли́тва
О ли́че богоизбра́нный, святи́и вси, в земли́ Моско́вской просия́вшии: святи́телие Христо́вы, новому́ченицы и испове́дницы, ца́рственнии страстоте́рпцы и благове́рнии кня́зие, преподо́бнии, пра́веднии, Христа́ ра́ди юро́дивии и жен святы́х сосло́вие! Вы ве́рою правосла́вною, по́двиги благоче́стия, уче́ньми, страда́ньми за Христа́ да́же до кро́ве и мощьми́ свои́ми зе́млю на́шу просвети́ли и освяти́ли есте́, мно́зи же телеса́ своя́, я́ко се́мя ве́ры, в ней оста́висте. Ве́руем, я́ко не то́кмо сла́ву ве́лию на Небеси́, но и дерзнове́ние моли́тися о нас у Престо́ла Бо́жия, и благода́ть подава́ти исцеле́ния душа́м и телесе́м любо́вию чту́щим вас, от Го́спода Бо́га и Спаси́теля на́шего прия́ли есте́. Те́мже мо́лим вы я́ко Небе́сныя предста́тели и сро́дники на́ша: помози́те нам стезя́ми ва́шими к Небе́сному Оте́честву непреткнове́нно ше́ствовати и та́мо сподо́битися ку́пно с ва́ми прославля́ти Отца́, и Сы́на, и Свята́го Ду́ха, во Святе́й Тро́ице Еди́наго Бо́га, во ве́ки веко́в. Ами́нь.
ЗРИ А́ще изво́лит настоя́тель: на лити́и проше́ние, в не́мже вси святи́и, в земли́ Моско́вской просия́вшии, по имено́м помя́нуты суть:
Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́ и покро́вом честны́я и многоцеле́бныя ри́зы Твоея́; предста́тельствы свята́го Архистрати́га Михаи́ла и про́чих Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна, свята́го сла́внаго и всехва́льнаго апо́стола Андре́я Первозва́ннаго и всех святы́х сла́вных и всехва́льных апо́стол, свята́го сла́внаго проро́ка Илии́; и́же во святы́х оте́ц на́ших и вселе́нских вели́ких учи́телей и святи́телей Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мир Лики́йскаго, Чудотво́рца; святы́х равноапо́стольных Мефо́дия и Кири́лла, учи́телей Слове́нских; святы́х равноапо́стольных вели́каго кня́зя Влади́мира и вели́кия княги́ни О́льги;
и́же во святы́х оте́ц на́ших, святи́телей:
Михаи́ла, пе́рваго митрополи́та Ки́евскаго,
первосвяти́телей Моско́вских и всея́ Руси́: Петра́, Феогно́ста, Алекси́я, Киприа́на, Фо́тия, Ио́ны, Фили́ппа, Феодо́сия, Геро́нтия, Си́мона, Иоаса́фа, Мака́рия, Фили́ппа, И́ова, Ермоге́на и Ти́хона;
местоблюсти́теля патриа́ршаго престо́ла священному́ченика Петра́, митрополи́та Крути́цкаго;
митрополи́тов Моско́вских: Филаре́та, Инноке́нтия и Мака́рия;
Фео́дора, архиепи́скопа Росто́вскаго, Стефа́на, епи́скопа Пе́рмскаго, Генна́дия и Серапио́на, архиепи́скопов Новгоро́дских;
святи́телей новому́чеников и испове́дников Це́ркве Ру́сския:
священному́чеников:
митрополи́тов: Влади́мира Ки́евскаго, Вениами́на и Серафи́ма Петрогра́дских;
архиепи́скопов: Петра́ Воро́нежскаго, Иларио́на Вере́йскаго, Дими́трия Можа́йскаго, Павли́на Могиле́вскаго, Серафи́ма У́гличскаго, Серафи́ма Смоле́нскаго, Никола́я Влади́мирскаго;
епи́скопов: Мака́рия Вя́земскаго, Ефре́ма Селенги́нскаго, Васи́лия Прилу́кскаго, Макси́ма Серпуховска́го, Серафи́ма Дми́тровскаго, Ге́рмана Вя́зниковскаго, Григо́рия Шлиссельбу́ргскаго, Ио́ны Ве́лижскаго, Ники́ты Оре́хово-Зу́евскаго, Арка́дия Бе́жецкаго, Игна́тия Скопи́нскаго;
священноиспове́дников:
епи́скопов: Амвро́сия Камене́ц-Подо́льскаго, Феодо́сия Коло́менскаго, Афана́сия Ковро́вскаго,
и всех святи́телей, в преде́лех Моско́вских подвиза́вшихся и пострада́вших за Христа́, и я́ко пра́вила ве́ры, о́брази кро́тости и воздержа́ния учи́тели просла́вльшихся;
святы́х сла́вных и добропобе́дных му́чеников:
великому́чеников: Гео́ргия Победоно́сца и Дими́трия Солу́нскаго,
му́ченика Андре́я Стратила́та,
му́чеников и испове́дников благове́рнаго кня́зя Михаи́ла Черни́говскаго и боля́рина Фео́дора;
святы́х новому́чеников и испове́дников Це́ркве Ру́сския:
святы́х ца́рственных страстоте́рпцев: царя́ Никола́я, цари́цы Алекса́ндры, цесаре́вича Алекси́я, вели́ких княже́н О́льги, Татиа́ны, Мари́и и Анастаси́и;
преподобному́чеников:
схиархимандри́та Игна́тия;
архимандри́тов: Гаврии́ла, Маври́кия, Васи́лия, Амвро́сия, Серафи́ма, Неофи́та, Ге́рмана, Ми́ны, Ти́хона, Иоаса́фа, Крони́да, Ни́кона, Влади́мира, Никано́ра;
игу́менов: Афана́сия, Мефо́дия, Пахо́мия, Варлаа́ма, Иоаса́фа, Евти́хия, Никола́я, Серафи́ма, Серафи́ма, Иоаса́фа, Максимилиа́на, Се́ргия;
иеромона́хов: Мака́рия, Мака́рия, Серафи́ма, Киприа́на, Иларио́на, Евфроси́на, Гаврии́ла, Алекси́я, Ариста́рха, Петра́, Иларио́на, Иоа́нна, Гера́сима, Аполло́са, Ксенофо́нта, Рафаи́ла, Дана́кта, Космы́, Галактио́на,Феодо́сия, Анти́пы, Се́ргия, Ни́ла, Илии́, Ио́ны, Андрони́ка, Васи́лия, Валенти́на, Фео́дора;
архидиакона Серафи́ма;
иеродиа́конов: Инноке́нтия и Феофа́на;
схимона́ха Диони́сия;
мона́хов: Варлаа́ма, Алекси́я и Таврио́на;
послушника Се́ргия;
священному́чеников:
протопресви́тера Алекса́ндра;
протоиере́ев: Иоа́нна, Константи́на Богоро́дскаго, Неофи́та, Алекса́ндра, Васи́лия, Христофо́ра, Фео́дора, Петра́, Никола́я, Никола́я, Илии́, Никола́я, Алекси́я, Дими́трия, Иоа́нна, Иоа́нна, Ми́рона, Илии́, Се́ргия, Васи́лия, Никола́я, Иоа́нна, Никола́я, Алекса́ндра, Дими́трия, Вячесла́ва, Васи́лия, Алекса́ндра, Петра́, Петра́, Симео́на, Алекса́ндра, Па́вла, Петра́, Андре́я, Никола́я, Се́ргия, Алекса́ндра, Никола́я, Никола́я, Алекса́ндра, Васи́лия, Все́волода, Петра́, Алекса́ндра, Алекса́ндра, Вике́нтия, Влади́мира, Па́вла, Се́ргия, Арсе́ния, Дими́трия, Илии́, Па́вла, Константи́на, Матфе́я, Алекса́ндра, Алекси́я, Васи́лия, Васи́лия, Гео́ргия, Дими́трия, Никола́я, Се́ргия, Се́ргия, Михаи́ла, Се́ргия, Алекса́ндра, Алекси́я, Алекси́я, Влади́мира, Илии́, Алекса́ндра, Ви́ктора, Григо́рия, Иоа́нна, Иоа́нна, Яросла́ва, Васи́лия, Васи́лия, Васи́лия, Гео́ргия, Иоа́нна, Наза́рия, Бори́са, Васи́лия, Влади́мира, Иоа́нна, Иоа́нна, Никола́я, Никола́я, Влади́мира, Иоа́нна, Се́ргия, Константи́на, Никола́я, Никола́я, Никола́я, Се́ргия, Се́ргия, Васи́лия, Алекси́я, Никола́я, Васи́лия, Алекса́ндра, Иоа́нна, Алекса́ндра, Алекси́я, Бори́са, Иоа́нна, Никола́я, Никола́я, Петра́, Петра́, Зоси́мы, Иоа́нна, Лео́нтия, Алекси́я, Па́вла, Константи́на, Андре́я, Па́вла, Иоа́нна, Алекси́я, Никола́я, Вениами́на, Петра́, Алекса́ндра, Алекси́я, Се́ргия, Се́ргия, Ипполи́та, Алекса́ндра, Васи́лия, Се́ргия, Алекси́я, Никола́я, Алекси́я, Никола́я, Ни́ла, Петра́, Алекса́ндра, Влади́мира, Никола́я, Се́ргия, Никола́я, Васи́лия, Се́ргия, Васи́лия, Алекса́ндра;
иере́ев: Алекса́ндра, Фео́дора, Матфи́я, Евге́ния, Васи́лия, Михаи́ла, Дими́трия, Се́ргия, Дими́трия, Влади́мира, Алекси́я, Васи́лия, Петра́, Петра́, Вениами́на, Афана́сия, Гео́ргия, Васи́лия, Влади́мира, Петра́, Се́ргия, Зоси́мы, Алекса́ндра, Влади́мира, Емилиа́на, Созо́нта, Васи́лия, Се́ргия, Васи́лия, Васи́лия, Иоа́нна, Никола́я, Петра́, Петра́, Константи́на, Константи́на, Евге́ния, Алекса́ндра, Влади́мира, Дими́трия, Дими́трия, Алекса́ндра, Се́ргия, Петра́, Иа́кова, Никола́я, Иа́кова, Фео́дора, Андре́я, Васи́лия, Космы́, Дании́ла, Илии́, Се́ргия, Алекси́я, Дими́трия, Фео́дора, Алекси́я, Алекси́я, Иоа́нна, Па́вла, Се́ргия, Фео́дора, Михаи́ла, Се́ргия, Алекса́ндра, Никола́я, Се́ргия, Алекса́ндра, Алекса́ндра, Алекси́я, Алекси́я, Андре́я, Арка́дия, Дими́трия, Евста́фия, Иоа́нна, Никола́я, Михаи́ла, Се́ргия, Се́ргия, Симео́на, Иоа́нна, Васи́лия, Влади́мира, Иоа́нна, Иоа́нна, Михаи́ла, Никола́я, Парфе́ния, Алекси́я, Михаи́ла, Иоа́нна, Ви́ктора, Се́ргия, Алекса́ндра, Петра́, Иоа́нна, Васи́лия, Михаи́ла, Дими́трия, Михаи́ла, Константи́на, Иоа́нна, Дими́трия, Васи́лия, Никола́я, Алекси́я, Михаи́ла, Па́вла, Алекса́ндра, Васи́лия, Па́вла, Петра́, Михаи́ла, Алекси́я, Никола́я, Дими́трия, Алекси́я, Аре́фы, Васи́лия, Васи́лия, Петра́, Тимофе́я, Васи́лия, Фео́дора, Па́вла, Иоа́нна, Леони́да, Се́ргия, Алекси́я, Иоа́нна, Васи́лия, Фео́дора, Се́ргия, Васи́лия, Дими́трия, Па́вла, Се́ргия;
протодиа́конов: Никола́я, Никола́я, Алекси́я, Се́ргия, Никола́я;
диа́конов: Никола́я, Елиссе́я, Дими́трия, Иоа́нна, Симео́на, Ио́сифа, Ники́фора, Се́ргия, Евге́ния, Три́фона, Симео́на, Па́вла, Никола́я, Гаврии́ла, Фео́дора, Петра́, Иоа́нна, Григо́рия, Лео́нтия, Никола́я, Се́ргия;
преподобноиспове́дников:
архимандри́тов: Гео́ргия, Се́ргия и Гаврии́ла;
игу́мена Влади́мира;
иеромона́хов: Ни́кона О́птинскаго и Аре́фы;
священноиспове́дников:
протоиере́ев: Петра́ и Рома́на (в и́ночестве Ио́сифа);
иере́ев: Михаи́ла, Гео́ргия, Алекса́ндра, Дими́трия;
диа́кона Па́вла;
преподобному́чениц:
вели́кия княги́ни Елисаве́ты и и́нокини Варва́ры;
игу́мении Афана́сии;
схимона́хинь: Михаи́лы, Алекса́ндры и Рафаи́лы;
мона́хинь: Евге́нии, Антони́ны, Нимфодо́ры, Мари́и, Мстисла́вы, Матро́ны, Еле́ны, Севастиа́ны, Мари́и, Гермоге́ны, Евдоки́и;
и́нокинь: Магдали́ны, Евдоки́и, Татиа́ны, Ири́ны, Алекса́ндры, Ната́лии;
послу́шниц: Ири́ны, Татиа́ны, Татиа́ны, Анастаси́и, Евдоки́и, Екатери́ны, А́нны, Мари́и, А́нны, Ве́ры, Софи́и, Параске́вы, Алекса́ндры, А́нны, Да́рии, Евдоки́и, Матро́ны, О́льги, Ма́рфы, Евдоки́и, Екатери́ны, А́нны, Антони́ны, Ксе́нии, Мари́и, Матро́ны, Наде́жды, Ната́лии, Анастаси́и, Варва́ры, Мари́и, Мари́и, Евдоки́и, Алекса́ндры, Татиа́ны, Евфроси́нии, Алекса́ндры;
преподобноиспове́дниц:
схиигу́мении Фама́ри,
и́нокини Параске́вы и
послу́шницы Ве́ры;
му́чеников:
Алекси́я, Никола́я, Се́ргия, Игна́тия, Петра́, Симео́на, Васи́лия, Иоа́нна, Никола́я, Алекси́я, Матфе́я, Иоа́нна, Ви́ктора, Иоа́нна, Никола́я, Никола́я, Иа́кова, Гаврии́ла, Тимофе́я, Па́вла, Иоа́нна, Иоа́нна, Петра́, Матфе́я, Михаи́ла, Иоа́нна, Михаи́ла, Дими́трия, Дими́трия, Васи́лия, Иоа́нна, Фео́дора, Па́вла, Никола́я, Стефа́на, Михаи́ла, Васи́лия, Михаи́ла, Алекси́я, Се́ргия, Андре́я, Андре́я, Никола́я, Петра́, Иоа́нна, Иоа́нна, Фео́дора, Петра́, Васи́лия, Михаи́ла, Дими́трия, Гаврии́ла, Дими́трия, Ники́фора, Ники́ты, Бори́са, Иоа́нна, Иоа́нна;
испове́дников:
Иоа́нна и Иоа́нна;
му́чениц:
Ната́лии, Татиа́ны, Аполлина́рии, Елисаве́ты, Мари́и, Наде́жды, Елисаве́ты, А́нны, Матро́ны, Ми́лицы, О́льги, Варва́ры, Евдоки́и, О́льги, Елисаве́ты, Ири́ны, Наде́жды, Алекса́ндры, Параске́вы, А́нны, Пелаги́и, Еле́ны;
испове́дницы:
Наде́жды;
и всех святы́х новому́чеников и испове́дников Моско́вских, за ве́ру во Христа́, Це́рковь Христо́ву и благоче́стие в Бу́тове и ины́х ме́стех страда́ния претерпе́вших;
святы́х благове́рных князе́й Моско́вских: Дании́ла, Иоа́нна Калиты́ и Дими́трия Донска́го;
свята́го му́ченика царе́вича Дими́трия и благове́рнаго царя́ Фео́дора;
благове́рныя вели́кия княги́ни Евдоки́и Моско́вския (во и́нокинях Евфроси́нии);
преподо́бных и богоно́сных оте́ц на́ших: Се́ргия и Ни́кона, игу́менов Ра́донежских, и и́же с ни́ми: Кири́лла, Митрофа́на игу́мена, Алекса́ндра Пересве́та и Андре́я Осля́би во́инов, Илии́ ке́ларя, Михе́я, Исаа́кия Молча́льника, Васи́лия Суха́го, Си́мона Смоле́нскаго архимандри́та, Мака́рия, Си́мона экклесиа́рха, Варфоломе́я, Нау́ма, Они́сима вра́таря, Елиссе́я, Иа́кова Яку́та, Иоанни́кия, Некта́рия ве́стника, Епифа́ния Прему́драго, Игна́тия Ра́донежских; Андрони́ка, Са́ввы и Алекса́ндра Спа́сских; Андре́я Рубле́ва и Дании́ла Че́рнаго иконопи́сцев; Кири́лла и Ферапо́нта Белоезе́рских; Варфоломе́я, Иоа́нна Злата́го и Игна́тия ико́нника Си́моновских; Варлаа́ма, Гедео́на, Афана́сия и друга́го Афана́сия Высо́цких, Дави́да, Ники́ты и Влади́мира Белопесо́цкаго, Серпуховски́х; Мефо́дия Пешно́шскаго; Лео́нтия, Са́ввы и Иа́кова Стромы́нских; Рома́на Киржа́чскаго; Стефа́на Моско́вскаго, Михаи́ла, епи́скопа Смоле́нскаго, Григо́рия Голу́твинскаго, епи́скопа Коло́менскаго; Са́ввы Стороже́вскаго, Стефа́на Ма́хрищскаго, Анто́ния Чу́довскаго, Ио́сифа Во́лоцкаго; Ле́вкия, Гера́сима Че́рнаго, Кассиа́на Боса́го, Фо́тия, Адриа́на и Зоси́мы Волокола́мских; Макси́ма Гре́ка; Ти́хона, Васи́лия и Ни́кона Соколо́вских; Ка́рпа Моско́вскаго; Иоаса́фа Бо́ровскаго, Ирина́рха, Дорофе́я, Диони́сия и Анто́ния Ра́донежских; И́ова А́нзерскаго, Зоси́мы Верхо́вскаго, Пи́мена Угре́шскаго, Варна́вы, ста́рца Гефсима́нскаго, Аристо́клия, ста́рца Моско́вскаго, Анато́лия, ста́рца О́птинскаго, Ге́рмана и Алекси́я, ста́рцев Зоси́мовских;
преподо́бных ма́терей: Мари́и Ра́донежския, игу́мении Иулиани́и, Евпракси́и, схиигу́мении Еле́ны, Варсоно́фии Моско́вских и Рахи́ли Бороди́нския,
и всех преподо́бных оте́ц и ма́терей, в по́двизех по́стнических в преде́лех Моско́вских просия́вших;
святы́х пра́ведных: Алекси́я, пресви́тера Моско́вскаго, и Васи́лия Павлово-Поса́дскаго;
святы́х блаже́нных, Христа́ ра́ди юро́дивых и чудотво́рцев: Макси́ма, Васи́лия и Иоа́нна Моско́вских, Иоа́нна Можа́йскаго, Ма́рфы и Матро́ны Моско́вских, Матро́ны Анемня́севския, испове́дницы,
и всех святы́х, в земли́ Моско́вской просия́вших, и́хже имена́ Ты Сам, Го́споди, ве́си, и́хже и па́мять ны́не соверша́ем,
святы́х и пра́ведных Богооте́ц Иоаки́ма и А́нны и всех святы́х, мо́лим Тя, Многоми́лостиве Го́споди, услы́ши нас гре́шных, моля́щихся Тебе́, и поми́луй нас.
