Тропарь, кондак и молитва страстотерпцу Евгению Боткину

Ме́сяца ию́ля в 4-й день
Свята́го страстоте́рпца Евге́ния Бо́ткина врача́

Тропа́рь, глас 5:

О́браз милосе́рдия Христо́ва явля́я,/ страстоте́рпче врачу́ Евге́ние,/ еле́й сострада́ния и вино́ серде́чныя любве́/ на ра́ны недýжных и стра́ждущих возлива́л еси́./ Те́мже благода́ти испо́лнився,/ не устраши́лся еси́ смерть от богобо́рцев прия́ти,// да живе́ши со Хриcто́м во ве́ки.

Конда́к, глас 3.

Подо́бен: Де́ва днесь:

Благоро́дству тезоимени́тый,/ дyши́ благоро́дством просия́л еси́, страстоте́рпче:/ до́бре бо Го́споду и бли́жним послужи́л еси́/ и житие́ твое́ кро́вию запечатле́л еси́./ Те́мже к лико́м му́ченическим сопричте́ тя// Подвигополо́жник Хриcто́с Бог наш.

Моли́тва

О пресла́вный и добропобе́дный страстоте́рпче Христо́в, цели́телю и врачу́ Евге́ние, и́стинный во́ине Святы́я Це́ркве, Оте́честву на́шему сла́во и похвало́! Ты чрез все житие́ твое́ бе́дным и стра́ждущим послужи́л еси́, и царю́ боговенча́нному с супру́жницею его́ и ча́ды до́брый врач и друг при́сный показа́лся еси́, любо́вь нелицеме́рную ко всем челове́ком явля́я. Ты, не убоя́вся безбо́жнаго гоне́ния, Царю́ Небе́сному и царю́ земно́му да́же до сме́рти ве́рен пребы́л еси́ и, я́ко пле́нник, ку́пно с ца́рственными страда́льцы с ме́ста на ме́сто преходи́л еси́, до́ндеже врата́ми пра́вды в Ца́рство Небе́сное вшел еси́. Те́мже мо́лим тя, врачу́ изря́днейший, не преста́й моли́тися о нас ко Го́споду, да исцели́т я́звы душ и теле́с на́ших, да пода́ст нам си́лу за́поведи Его́ животво́рныя соблюда́ти, да изба́вит нас от безбо́жия и вся́каго греха́, Оте́чество же на́ше в Правосла́вии сохрани́т до сконча́ния ве́ка. Ами́нь.