Молитва Пресвятой Богородице пред Ее иконой, именуемой «Смоленская-Белгородская»
Ме́сяца октября́ во 2-й день
и ме́сяца ию́ля в 28-й день
Пра́зднование Пресвяте́й Богоро́дице
ра́ди ико́ны Ея́, имену́емыя «Смоле́нская-Белгоро́дская»
Моли́тва
О Пречу́дная Цари́це Богоро́дице, Небе́снаго Царя́ Христа́ Бо́га на́шего Ма́ти, Пречи́стая Одиги́трие Мари́е, земли́ Белогра́дския изря́дная Засту́пнице и Храни́тельнице! Приими́ усе́рдное моле́ние на́ше, со умиле́нием Тебе́ приноси́мое, и я́коже дре́вле во мра́це полу́нощи честно́ю ико́ною Твое́ю град наш осия́ла еси́, та́ко и ны́не просвети́ нас гре́шных све́том Боже́ственным, ко спасе́нию путь нам указу́ющи. О Всеблага́я Путеводи́тельнице на́ша! Изба́ви нас от вся́кия зло́бы и напа́сти, беды́ и ско́рби, гла́да и боле́зни, наипа́че же от страсте́й, борю́щих нас, и от окамене́ннаго нечу́вствия. Се́рдцем сокруше́нным и с тве́рдым упова́нием мо́лим Тя: Ма́терним Твои́м предста́тельством испроси́ нам у Сы́на Твоего́ и Бо́га на́шего в ве́ре и благоче́стии утвержде́ние, ста́рым укрепле́ние, ю́ным целому́дрие, заблу́ждшим вразумле́ние и всем вся ко спасе́нию потре́бная, да под покро́в Твой прибега́юще и по́мощи у святи́теля и чудотво́рца Иоаса́фа и всех святы́х земли́ на́шея прося́ще, при́сно просла́вим в Тро́ице Святе́й сла́вимаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
