Служба преподобноисповеднику Севастиану Карагандинскому
Ме́сяца апре́ля в 6-й день
Преподо́бнаго Севастиа́на Караганди́нскаго, испове́дника
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 5.
Подо́бен: Ра́дуйся:
Ра́дуйся, богоно́сне о́тче Севастиа́не,/ измла́да Христа́ Бо́га возлюби́вый/ и чистото́ю Тому́ прилепи́выйся,/ де́тскою же ве́рою после́довавый,/ в простоте́ се́рдца Тому́ послужи́вый/ и ра́зум духо́вный от Него́ прие́мый,/ ты вся, я́же в ми́ре сем, скоротеку́щая и тле́нная презре́в,/ в светоза́рную Óптину пу́стынь прише́л еси́,/ иде́же любому́дрию ста́рцев духоно́сных научи́вся,/ о́браз любве́ ева́нгельския ве́рным показа́л еси́,// испроси́ нам мир и ве́лию ми́лость.
Ра́дуйся, богому́дре Севастиа́не,/ Боже́ственному Про́мыслу себе́ коне́чне вручи́вый/ и гоне́ния от безбо́жных кро́тко претерпе́вый,/ ты, в хла́дную пу́стынь Караганди́нския земли́ со́слан быв,/ в боле́знех И́овле терпе́ние показа́л еси́,/ и в страда́ниих Дави́дово смире́ние яви́л еси́,/ по́слежде равноа́нгельно на земли́ пожи́в,/ в и́стинней ве́ре и благоче́стии лю́ди утверди́л еси́./ Ны́не же в ра́дости святы́х Престо́лу Бо́жию предстоя́,/ моли́ Триеди́наго Бо́га,// дарова́ти душа́м на́шим мир и ве́лию ми́лость.
Ра́дуйся, досточу́дне Севастиа́не,/ собо́ра преподо́бных ста́рцев Óптинских соприча́стниче,/ целому́дрия о́бразе и воздержа́ния пра́вило,/ благоче́стия провозве́стниче и умиле́ния исто́чниче,/ Правосла́вия до́брый рачи́телю,/ уста́вов óптинских тве́рдый храни́телю,/ Пресвяты́я Богоро́дицы и Крести́теля Госпо́дня ве́рный служи́телю,/ исцеле́ний струе́ незави́стная,/ мона́шествующих свети́льниче пресве́тлый,/ и всему́ ста́ду твоему́ до́брый па́стырю:// моли́ спасти́ся душа́м на́шим.
Ра́дуйся, преблаже́нне о́тче Севастиа́не,/ а́нгельски на земли́ пожи́вый/ и смире́нием свои́м де́монов победи́вый,/ ты бо лю́ди, греху́ служи́вшия и рабо́тавшия,/ апо́стольски ко огра́де Небе́сней упра́вил еси́/ и све́том благоче́стия просвети́л еси́,/ и́же, богопроти́вную горды́ню попра́вше,/ Бо́га и́стиннаго в душа́х и телесе́х свои́х просла́виша./ Те́мже помози́ и нам во благоче́стии утверди́тися/ и Христу́ усе́рдно послужи́ти,// подаю́щему ве́рным мир и ве́лию ми́лость.
Ра́дуйся, преподо́бне Севастиа́не,/ во́лею Христу́ сораспны́йся/ и всеконе́чне греху́ уме́рый,/ нетле́нию же и безсме́ртию воскресы́й/ и а́нгельски во пло́ти пожи́вый./ Ты, десни́цею Бо́жиею окормля́емь,/ треволне́ние безбо́жнаго нече́стия преплы́л еси́/ и, му́жественне гоне́ния претерпе́в,/ блаже́ннаго упокое́ния со святы́ми сподо́бился еси́,/ е́же насле́довати и нам помози́,// благоче́стно соверша́ющим па́мять твою́.
Ра́дуйся, достоблаже́нне Севастиа́не,/ светле́йшею оде́ждою свяще́нства украше́нный,/ ты, благода́ть Свята́го Ду́ха досто́йне восприи́м,/ чи́стым умо́м и смире́нным се́рдцем/ благогове́йне Безкро́вную Же́ртву Бо́гу приноси́л еси́,/ и́стины же ра́ди Боже́ственныя/ тя́жкия рабо́ты и темни́чная заключе́ния претерпе́л еси́,/ иде́же и у́зники сло́вом утеша́я,/ несомне́нною наде́ждою на Христа́ тех укрепля́л еси́./ Те́мже и нас во благоче́стии утверди́// и испроси́ душа́м на́шим ве́лию ми́лость.
Ра́дуйся, досточу́дне Севастиа́не,/ тече́ние воздержа́ния непрело́жно соверши́вый,/ и ве́ру святу́ю непоро́чно соблюды́й,/ венце́м пра́вды украше́нный,/ его́же угото́ва ти Христо́с Госпо́дь,/ по достоя́нию воздая́ние подава́я,/ я́ко священнотаи́ннику чи́сту и па́стырю до́брому,/ я́ко а́нгелу земно́му и страда́льцу терпели́вному./ Те́мже, блаже́нства изгна́нных пра́вды ра́ди сподо́бився,/ моли́ о нас Всеще́драго Бо́га// спасти́ся душа́м на́шим.
Сла́ва, глас 8:
Его́же от младе́нства возлюби́л еси́,/ Eго́же во уме́ твое́м при́сно моли́твою обноси́л еси́,/ Его́же чистото́ю се́рдца твоего́ стяжа́л еси́,/ Его́же ра́ди вся сла́дкая ми́ра отри́нул еси́,/ Его́же ра́ди гоне́ния, ли́шения и бие́ния благода́рне претерпе́л еси́,/ святы́х святе́йшаго Иису́са Сладча́йшаго,/ И́же даде́ ти благода́ть Боже́ственную/ не то́кмо в Него́ ве́ровати,/ но и по Нем страда́ти,/ моли́ дарова́ти Оте́честву на́шему мир и благоде́нствие,// и душа́м на́шим ве́лию ми́лость.
И ны́не, Богоро́дичен, глас то́йже:
Царь Небе́сный за человеколю́бие на земли́ яви́ся/ и с челове́ки поживе́:/ от Де́вы бо Чи́стыя плоть прие́мый/ и из Нея́ проше́дый с восприя́тием,/ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га и соверше́нна Челове́ка/ вои́стину пропове́дающе,/ испове́дуем Христа́ Бо́га на́шего,/ Его́же моли́, Ма́ти Безневе́стная,// поми́ловатися душа́м на́шим.
Та́же вход. Проки́мен дне. Чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух cи́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́диe же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На стихо́вне стихи́ры, глас 2:
Преподо́бне Севастиа́не испове́дниче,/ светоно́сная па́мять твоя́/ мно́жество мона́хов и христоимени́тых люде́й собра́,/ псалмы́ и пе́сньми восхвали́ти Го́спода,/ и просла́вити по́двиги и дея́ния твоя́,/ ты бо, я́ко крин благоуха́нный,/ в пусты́ни Караганди́нской процве́л еси́/ и дара́ми духо́вными ту́ю облагoуха́л еси́,// подвиза́я херуви́мски воспева́ти Бо́гу: Аллилу́ия.
Стих: Честна́ пред Го́сподем// смерть преподо́бных Его́.
Небе́сныя пресве́тлыя оби́тели/ восприя́ша тя, но́ваго граждани́на,/ преподо́бне Севастиа́не прозорли́ве,/ в ни́хже со А́нгелы и преподо́бных оте́ц собо́ры ра́дуяся,/ со апо́столы, проро́ки и святи́тели лику́я,/ с му́ченики и пра́ведники торжеству́я,/ с весе́лием Присносу́щней Тро́ице предстои́ши// и херуви́мскую песнь воспева́еши: Аллилу́ия.
Стих: Блаже́н муж боя́йся Го́спода,// в за́поведех Его́ восхо́щет зело́.
Е́же боже́ственный язы́ков апо́стол Па́вел ви́дев, написа́:/ я́ко о́ко не ви́де, и у́хо не слы́ша,/ и на се́рдце челове́ку не взыдо́ша,/ я́же угото́ва Бог лю́бящим Его́./ Сих по преставле́нии твое́м, блаже́нне Севастиа́не, дости́г,// непреста́нно Триипоста́сному Божеству́ херуви́мскую песнь взыва́еши: Аллилу́ия.
Сла́ва, глас 5:
Пе́сни духо́вныя прино́сим Ти, Христе́,/ Сы́не Единоро́дный и Преве́чнаго Отца́ Сло́ве Соприсносу́щный,/ в после́дния дни от Присноде́вы Пречи́стыя и Ду́ха Свята́го воплоти́выйся,/ Крест и смерть и погребе́ние пло́тию за грехи́ на́ша претерпе́л еси́,/ и сла́вно я́ко Бог воскре́сл еси́,/ челове́ка возводя́ в первообра́зное блаже́нство,/ сие́ страда́ньми и тве́рдым испове́данием/ преподо́бный Севастиа́н дости́же,/ иде́же Престо́лу Бо́жию предстоя́,/ прославля́ет Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен, глас то́йже:
Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый Пра́вды,/ просвети́ти хотя́ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,// непреста́нно моли́ спасти́ся душа́м на́шим.
Тропа́рь, глас 3:
Тро́ицы Святы́я служи́телю,/ земны́й а́нгеле и Небе́сный челове́че,/ О́птинскаго ста́рчества прее́мниче,/ Христо́в священнотаи́нниче и испове́дниче,/ Ду́ха Свята́го оби́тель всечестна́я,/ преподо́бне о́тче Севастиа́не досточти́ме,/ испроси́ ми́рови мир// и душа́м на́шим ве́лию ми́лость.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
А́ще и посреде́ молвы́ жите́йския в заточе́ниих темни́чных пло́тию пребыва́л еси́, преподо́бне Севастиа́не, но, моли́тву Иису́сову непреста́нно творя́, с Бо́гом мы́слию всегда́ пребы́л еси́. Мы же, ве́дуще тя моли́твенника те́пла, про́сим: не оста́ви нас немощны́х, но благода́ть Свята́го Ду́ха привлецы́ на нас и просвети́ на́ша смы́слы, прило́ги вра́жии омраче́нныя.
Сла́ва, и ны́не, Богоро́дичен, глас то́йже:
Услы́ши, Всесвята́я Влады́чице, глас рабо́в Твои́х, от боле́зненныя души́ вопию́щих, и мно́гих лю́тых зол пода́ждь оставле́ние, изба́ви нас негаси́маго огня́ гее́нскаго и поста́ви одесну́ю Сы́на Твоего́, день бо и нощь предста́тельствуеши о нас.
По 2-м стихосло́вии седа́лен, глас 1:
Попра́хом обе́ты, я́же во святе́м Креще́нии обеща́хом соблюсти́. Увы́ нам, что сотвори́м? Ка́ко яви́мся пред лице́м Пра́веднаго Судии́? Или́ что отвещава́ем Ему́? К тебе́ притека́ем, преподо́бне Севастиа́не богоно́се, и про́сим: бу́ди наш те́плый засту́пник пред Го́сподем, да пода́ст нам оставле́ние грехо́в и ми́лость в День Су́дный.
Сла́ва, и ны́не, Богоро́дичен, глас то́йже:
Упра́ви к Небе́сным ду́ши на́ша, Влады́чице Чи́стая, от мно́жества прегреше́ний во глубину́ поги́бели погрузи́вшияся, и в час стра́шный сме́ртный де́монов оглаго́лющих и вся́кия му́ки исхити́ нас, покрыва́ющи пречи́стым омофо́ром ми́лости Твоея́.
Велича́ние:
Ублажа́ем тя,/ преподобноиспове́дниче Севастиа́не,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Псало́м избра́нный:
Терпя́ потерпе́х Го́спода, и внят ми и услы́ша моли́тву мою́.
Поста́ви на ка́мени но́зе мои́, и испра́ви стопы́ моя́.
Смиря́х посто́м ду́шу мою́.
Полу́нощи воста́х испове́датися Тебе́, седмери́цею днем хвали́х Тя.
Непра́вду возненави́дех и омерзи́х, зако́н же Твой возлюби́х.
Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.
Изба́ви мя от гоня́щих мя, я́ко укрепи́шася па́че мене́.
За словеса́ усте́н Твои́х аз сохрани́х пути́ же́стоки.
По полиеле́и седа́лен, глас 6:
Прииди́те днесь, христоимени́тых люде́й мно́жество, соше́дшеся в па́мять досточти́маго отца́ и ста́рца на́шего, и обстоя́ще всеблагогове́йно честну́ю и многоце́нную его́ ра́ку, ра́достно лик псало́мский соста́вим и моле́бно возопии́м: преподо́бне о́тче Севастиа́не, на Небеси́ предстоя́ Христу́ Бо́гу на́шему и Пречи́стей Де́ве и Ма́тери Его́, моли́ся, е́же изба́витися нам наве́тов вра́жиих, умири́тися ми́ру и спасти́ся душа́м на́шим.
Сла́ва, и ны́не, Богоро́дичен, глас то́йже:
Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя, но Сама́ заступи́ и поми́луй мя.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 38.
По 50-м псалме́ стихи́ра, глас 6:
Преподо́бне Севастиа́не испове́дниче,/ ева́нгельски Бо́га возлюби́в,/ ми́ра красоту́ и су́етную сла́ву оста́вил еси́/ и, во оби́тель О́птинскую всели́вся,/ по́двиги благоче́стия до́бре соверши́л еси́,/ та́же и изгна́ние претерпе́в,/ в темни́чном заключе́нии гла́дом и жа́ждею томи́мь был еси́,/ оба́че Христа́, посо́бствующа тебе́, обре́л еси́,/ Его́же моли́ приле́жно нам, почита́ющим тя,/ в ве́ре правосла́вней утверди́тися// и спасти́ся душа́м на́шим.
Кано́н, глас 3.
Песнь 1
Ирмо́с: Су́шу глубороди́тельную зе́млю/ со́лнце наше́ствова иногда́:/ я́ко стена́ бо, огусте́ обапо́лы вода́/ лю́дем пешомореходя́щим и богоуго́дно пою́щим:// пои́м Го́сподеви, сла́вно бо просла́вися.
Моле́бное тебе́ пе́ние предначина́я, недоуме́ю, о́тче преподо́бне, ка́ко досто́ит воспева́ти тя? Оба́че же от любве́ приноше́ние мое́ приими́ и устне́ мои́ отве́рзи, я́ко да возвещу́ хвалу́ твою́, Севастиа́не досточти́ме.
Мо́ре страсте́й ты немо́кренно мину́л еси́, преподо́бне, от враго́в не вреди́вся: бесо́в ополче́ния кро́тостию и смире́нием во глубину́ преиспо́днюю низве́ргл еси́, безбо́жных же челове́к хуле́ния моли́твою усмири́л еси́, поя́ Го́сподеви, сла́вно бо просла́вися.
Погуби́ огне́м моли́тв твои́х, чудоно́сче Севастиа́не, супоста́ты, злы́я по́мыслы моя́, и́же в бе́здну отча́яния мя влеку́т, но защити́ мя и истрeби́ я́, я́коже дре́вле Моисе́й погруже́нныя еги́птянов колесни́цы и триста́ты.
Богоро́дичен: Мои́х прегреше́ний, Влады́чице, плени́цы расто́ргни, и томя́щий мя грех, Присноде́во, низложи́, я́ко да Тобо́ю спаса́емь, благода́рне воспева́ю Тя всегда́, Всенепоро́чная.
Песнь 3
Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,/ несть свят, несть пра́веден// па́че Тебе́, Го́споди.
Де́латель усе́рдный за́поведей Госпо́дних быв, и непреста́нно в них поуча́яся, многообра́зныя му́ки в гоне́нии со смире́нием претерпе́л еси́, преподо́бне. Сего́ ра́ди в ра́дость Го́спода твоего́ вшел еси́, вопия́: несть свят и несть пра́веден па́че Тебе́, Го́споди.
Всего́ себе́ Бо́гови возложи́в, преподо́бне, яви́лся еси́ жили́ще Пресвята́го Ду́ха, и Áнгелом и преподо́бных лико́м единонра́вен. Те́мже в Небе́сных кро́вех с преподо́бными Óптинскими ста́рцы ны́не водворя́яся, единогла́сно воспева́еши: несть свят, несть пра́веден па́че Тебе́, Го́споди.
А́гнца Бо́жия, взе́млющаго грехи́ всего́ ми́ра, пропове́дуя, незло́биве о́тче Севастиа́не, страда́ния за Христа́, я́ко а́гнец, кро́тко претерпе́л еси́, и гони́телей зверонра́вных тве́рдым твои́м испове́данием посрами́л еси́, не ве́дущих пе́ти: несть свят и несть пра́веден па́че Тебе́, Го́споди.
Богоро́дичен: Благоутро́бием Твои́м, Богороди́тельнице, вся́каго мя изба́ви осужде́ния, к Тебе́ прибега́юща, и Тебе́ припа́дающа, и призыва́юща Твою́ благомо́щную по́мощь.
Седа́лен, глас 4:
Ми́ра красоту́ и я́же в нем тле́нная ни во что́же вменя́я, пусты́ннаго пребыва́ния со Óптинскими ста́рцы па́че возжеле́л еси́ и, чистото́ю жития́ свяще́нства оде́жду убели́в, поноше́ния за Христа́ и гоне́ния, ра́дуяся, прия́л еси́ и, я́ко крин се́льный, безпло́дную пусты́ню и град Караганду́ облагоуха́л еси́, преподо́бне о́тче Севастиа́не досточти́ме. Те́мже ны́не жи́тель гра́да Небе́снаго показа́лся еси́, в не́мже со А́нгелы и собо́ром всех святы́х ликовству́я, помяни́ и нас, ве́рою и любо́вию тя почита́ющих.
Сла́ва, и ны́не, Богоро́дичен:
Мно́жества скве́рных помышле́ний смуща́ют мой ум, и вожделе́ния стра́стная востаю́т на ду́шу мою́. Кто исцели́т мя, Пречи́стая? Или́ кто испове́сть воста́ния и озлобле́ния неви́димых враго́в мои́х? Но Твои́ми всеси́льными моли́твами, Блага́я, от всех сих заступи́ мя и соверше́нное избавле́ние ми да́руй.
Песнь 4
Ирмо́с: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.
Со ста́рцы Óптинскими ны́не предстоя́ Престо́лу Тро́ицы Живонача́льныя, преподо́бне Севастиа́не, моли́ о гра́де твое́м и святе́м хра́ме, его́же созда́л еси́ рука́ма твои́ма, и не отступа́й от нас ду́хом, но при́сно с на́ми пребыва́й, да благода́рне вопие́м: сла́ва си́ле Твое́й, Го́споди.
Ве́рою и любо́вию теплоту́ духо́вную стяжа́в, зи́му лю́тую и пусты́ни зной терпе́нием твои́м победи́л еси́, Христо́в испове́дниче. За́поведь же Госпо́дню, е́же зло́му не проти́витися, да́же до конца́ испо́лнил еси́ и за гони́телей моли́лся еси́, благи́х Вино́внику вопия́: сла́ва си́ле Твое́й, Го́споди.
Испо́лнися на тебе́, преподо́бне Севастиа́не, глаго́л Христо́в: а́ще Мене́ изгна́ша, и вас иждену́т. Те́мже угото́вав ду́шу твою́ во искуше́ние, мно́гая страда́ния, темни́чное заключе́ние, поноше́ния и ско́рби му́жественне претерпе́л еси́, благода́рне моля́ся: сла́ва си́ле Твое́й, Го́споди.
Богоро́дичен: Поми́луй мя, еди́на Богома́ти, и спаси́ ду́шу мою́ окая́нную, де́лы и страстьми́ погубля́емую от бесо́в лука́вых. И пре́жде исхо́да моего́ покая́нием и исправле́нием сию́ очи́стити помози́ ми.
Песнь 5
Ирмо́с: К Тебе́ у́тренюю всeх Творцу́,/ преиму́щему всяк ум ми́рови,/ зане́ свет пoвeле́ния Твoя́,// в ни́хжe нacта́ви мя.
Го́рькия рабо́ты в темни́чнем заключе́нии поне́сл еси́, и поноше́ния от безбо́жных претерпе́л еси́, преподо́бне, по сих же в ми́ре благоче́стно пожи́в, лю́ди в ве́ре наста́вил еси́. Моли́ спасти́ся душа́м на́шим.
Ничто́же возмо́же разлучи́ти тя от любве́ Бо́жия, преподо́бне, сего́ ра́ди ника́коже уклони́лся еси́ от те́снаго пути́, вводя́щаго в живо́т ве́чный, его́же во дни светоза́рныя Па́схи дости́гл еси́ и ве́рный сын Це́ркве Ру́сския яви́лся еси́.
Плоть свою́ распя́в со страстьми́ и похотьми́, стяжа́л еси́ в души́ твое́й, преподо́бне, боже́ственныя плоды́ Ду́ха: любо́вь, ра́дость, мир, долготерпе́ние, бла́гость, милосе́рдие, ве́ру, кро́тость, воздержа́ние. Помози́ и нам друг дру́га тяготы́ носи́ти, и та́ко испо́лнити зако́н Христо́в.
Богоро́дичен: Упова́ние мое́, спасе́ние и похвала́ Ты еси́, Пречи́стая, те́мже к покро́ву Твоему́ прибега́ю, не гнуша́йся мене́, грехи́ мно́гими ны́не поглоще́ннаго, но, предвари́вши, спаси́ мя.
Песнь 6
Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,// я́ко Петра́ мя, Упра́вителю, спаси́.
Пое́м мона́шеския по́двиги твоя́, честву́ем у́зы кажде́нии и псалмы́, покланя́емся моще́м твои́м, арома́ты страда́ний и терпе́ния облагоуха́нным, и, ди́вному во святы́х Свои́х Триеди́ному Бо́гу покланя́ющеся, ублажа́ем тя, досточти́ме.
Не дал еси́ сна дово́льна очи́ма твои́ма, ни ве́ждома дрема́ния, до́ндеже сподо́бился еси́ ви́дети селе́ния пра́ведных, пою́щих Па́сху Бо́жию спаси́тельную. Сея́ ра́дости и нас прича́стники сподо́би бы́ти моли́твами твои́ми.
Боже́ственным Про́мыслом упра́влен бысть, преподо́бне Севастиа́не, послужи́ти лю́дем гра́да Караганды́ и равноа́нгельное житие́ та́мо яви́ти, да позна́ют Бо́га и́стиннаго и бу́дут во и́стиннем Сы́не Его́ Иису́се Христе́, ве́рующе, я́ко Сей есть и́стинный Бог и Живо́т ве́чный.
Богоро́дичен: Красоту́ сла́вы Твоея́ сподо́би ми узре́ти, егда́ и́мам от пло́ти моея́ разлучи́тися, Пречи́стая Влады́чице, Ты бо еси́ мое́ утеше́ние, ра́дование и умиле́ние.
Конда́к, глас 3:
В ра́дость Го́спода Воскре́сшаго вше́дшаго,/ преподо́бным Óптинским ста́рцем слико́вника,/ му́чеников и испове́дников соприча́стника,/ священнотаи́нником Бо́жиим сослужи́теля,/ земна́го а́нгела и Небе́снаго челове́ка,/ гра́да Караганды́ боголе́пное украше́ние,/ Казахста́нския страны́ богомо́льца изря́днаго,/ Це́ркве Ру́сския досто́йную похвалу́,/ ублажи́м, ве́рнии, засту́пника на́шего/ и с весе́лием тому́ возопии́м:// ра́дуйся, Севастиа́не, преподо́бне о́тче наш.
И́кос:
Ева́нгельскому словеси́ ра́достною душе́ю от младе́нства внима́л еси́, преподо́бне, и, ум твой ко и́стинному Све́ту впери́в, душетле́нныя стра́сти до конца́ потреби́л еси́, смире́нным же и безмо́лвным житие́м преди́вен яви́вся, те́плый о нас ны́не хода́тай к Бо́гу показа́лся еси́. Его́же моли́ дарова́ти нам покая́ние и́стинное и братолю́бие нелицеме́рное, да тебе́ я́ко те́плаго хода́тая ублажа́юще, с весе́лием зове́м: ра́дуйся, Севастиа́не, преподо́бне о́тче наш.
Песнь 7
Ирмо́с: Трие́ о́троцы в пещи́ Тро́ицу прообрази́вше,/ преще́ние о́гненное попра́ша,/ и пою́ще вопия́ху:// благослове́н еси́, Бо́же оте́ц на́ших.
Нището́ю духо́вною долготерпе́ние и бога́тство доброде́телей стяжа́л еси́, и́миже Влады́це Небе́сному угоди́л еси́ и Ца́рство ве́чное унасле́довал еси́, вопия́: благослове́н еси́, Бо́же оте́ц на́ших.
Огнь лю́тый гоне́ний и пла́мень богопроти́вныя я́рости роса́ бысть тебе́, блаже́нне, ты бо фарао́на мы́сленнaго тече́нием слез и пото́ком моли́тв твои́х потопи́л еси́, в ра́дости душе́вней вопия́: благослове́н еси́, Бо́же оте́ц на́ших.
В седмери́цею разжже́нной пещи́ злохуле́ний, гоне́ний и искуше́ний неврежде́н сохрани́лся еси́, преподо́бне страда́льче, и мене́ из пла́мене грехо́внаго неопа́льно изми́, да я́коже в житии́ твое́м, та́ко и в чудесе́х просла́вится благослове́нный Бог оте́ц на́ших.
Богоро́дичен: Я́ко разбо́йник, взыва́ю Ти: помяни́ мя, Человеколю́бче. Пла́чу, я́ко блу́дный, и вопию́: ка́ющася приими́, согреши́вша спаси́, Богоро́дицы ра́ди, Многоми́лостиве.
Песнь 8
Ирмо́с: Веще́ственнаго огня́ пла́мень/ Невеще́ственным увяди́ша богозри́мии о́троцы, и поя́ху:// благослови́те, вся дела́ Госпо́дня, Го́спода.
Тече́ние ве́ры твоея́, я́ко со́лнце, Караганди́нскую зе́млю облиста́, до́блественне Севастиа́не, ты бо, я́ко и́нок страда́лец и боже́ственный иере́й, сугу́бо в ней потруди́лся еси́, науча́я лю́ди воспева́ти: благослови́те, вся дела́ Госпо́дня, Го́спода.
Путь жития́ простра́нный, я́ко па́губный и скорбь ве́лию душа́м принося́щий, облича́л еси́, богому́дре, но призыва́л еси́ лю́ди в долготерпе́нии терно́вное ше́ствие у́зкаго пути́ твори́ти, вопия́: благослови́те, вся дела́ Госпо́дня, Го́спода.
Правосла́вным христиа́ном испроси́, преподо́бне страда́льче, мир, здра́вие и спасе́ние, и на враги́ одоле́ние, да в ра́дости душе́вней возопие́м: благослови́те, вся дела́ Госпо́дня, Го́спода.
Богоро́дичен: Наляцы́ и ца́рствуй, Иису́се, Царю́ ца́рствующих, правосла́вным спобо́рствуя и всех окормля́я к Ца́рству безконе́чныя Твоея́ сла́вы, моли́твами неизрече́нно Ро́ждшия Тя.
Песнь 9
Ирмо́с: На Сина́йстей горе́ ви́де Тя в купине́ Моисе́й,/ неопа́льно Огнь Божества́ заче́ншую во чре́ве;/ Дании́л же Тя ви́де го́ру несеко́мую;/ жезл прозя́бший, Иса́ия взыва́ше,// от ко́рене Дави́дова.
О́птина пу́стынь, от богопроти́вных разоре́на бы́вши, ны́не с весе́лием лику́ет, я́ко цельбоно́сныя мо́щи духоно́сных ста́рец яви́ в ней Бог. С не́ю же и Караганда́ свесели́тся, име́ющи в себе́ мо́щи еди́наго от них, преподобноиспове́дника Севастиа́на.
Све́тлостию по́двигов богоприя́тных просия́л еси́, о́тче, и восприя́л еси́ благода́ть моли́тися за ны, те́мже вспомоществу́й ве́рным в по́двизех спасе́ния, я́ко сосу́д благода́ти Бо́жия изря́дный.
Непристу́пным све́том осиява́емь и в вы́шних оби́телех со святы́ми водворя́яся, не прeста́й моли́тися, о́тче досточти́ме, Зижди́телю вся́ческих о ста́де, тобо́ю со́бранном, во е́же всем нам спасти́ся.
Богоро́дичен: Пощади́ нас, Го́споди, егда́ прии́деши суди́ти ми́ру всему́, и не осуди́ по дело́м на́шим, но ми́лостию Твое́ю спаси́ нас моли́твами Пречи́стыя Богоро́дицы, предста́тельством преподо́бнаго Севастиа́на испове́дника и всех святы́х, от ве́ка Тебе́ благоугоди́вших.
Свети́лен, глас 6:
Светоно́сное и́мя Иису́сово, его́же всегда́ во уме́ и се́рдце моли́твою держа́л еси́, богопросвеще́нне Севастиа́не, но́ваго тя, Моисе́ю подо́бнаго, Богови́дца соде́ла, во мрак та́инственный священнота́йне входя́щаго. Те́мже и на́ша ду́ши, мра́ком грехо́вным покрове́нныя, просвeти́ заре́ю любве́ Иису́совы, и на безстра́стия го́ру смире́нием возведи́.
Сла́ва, и ны́не, Богоро́дичен, глас то́йже:
Светоза́рная Бо́жия пала́то и недоуме́нный Светода́вца престо́ле, Ма́ти Безневе́стная, просвeти́ нас све́том Сы́на Твоего́, да о́браз Бо́жий, помраче́нный страстьми́, па́ки сла́вою первозда́нною просия́eт в нас, вои́стину Богоро́дицу Тя испове́дающих.
На хвали́тех стихи́ры, глас 2:
Богому́дре о́тче Севастиа́не,/ ду́шу твою́ и те́ло от страсте́й очи́стив,/ Свято́му Ду́ху оби́тель прекра́сная яви́лся еси́,/ И́же тя сла́вна прозорли́вца конце́м земли́ на́шея показа́,/ и в чудесе́х вели́ка свети́льника соде́ла,/ просвеща́ющаго во тьме грехо́в су́щия,/ те́мже я́ко наста́вника тя всем ве́рным,// соше́дшеся, досточе́стно ублажа́ем.
Я́ко му́дрый строи́тель,/ не на песце́ самонаде́яния,/ но на ка́мени ве́ры Христо́вы/ дом доброде́тели твоея́ смире́нием созда́л еси́,/ те́мже ни ка́я скорбь и теснота́,/ ниже́ ко́е искуше́ние и беда́,/ ни гоне́ние, ни муче́ние/ не возмого́ша разлучи́ти тебе́ от любве́ Бо́жия,/ досточти́ме богому́дре о́тче Севастиа́не.// Моли́ спасти́ся душа́м на́шим.
Вся пристра́стия мирска́я оста́вил еси́:/ ни име́ния когда́, блаже́нне Севастиа́не, стяжа́в,/ ни сла́достей мирски́х в житии́ вожделе́в,/ ни сла́вы су́етныя возлюби́в./ Те́мже егда́ Воскре́сший Госпо́дь возгласи́ тебе́,/ ра́достно душе́ю твое́ю к Нему́ прише́л еси́/ и, я́ко испове́дник, в черто́зе Áгнчем водвори́лся еси́,/ я́ко еди́н от страда́льцев Казахста́нския земли́/ и блаже́нный сонасле́дник Христа́ Бо́га,/ Ему́же не преста́й моля́ся,// спасти́ и просвети́ти ду́ши на́ша.
Сла́ва, глас 6:
Ве́лие вои́стину чу́до зрим:/ ка́ко ты, богоно́се Севастиа́не,/ в ми́ре живы́й и собла́зны отвсю́ду обстои́мь,/ равноа́нгельныя доброде́тели испо́лнил еси́,/ и проти́ву духо́в зло́бы во пло́ти подвиза́яся,/ тех кре́пость низложи́л еси́,/ проти́ву же неи́стовства гони́телей безбо́жных/ кро́тость и смире́ние яви́л еси́,/ моли́тву безпреста́нно соверша́я./ Безсме́ртия сла́вою от Подвигополо́жника Христа́ увенча́нный,/ не преста́й моля́ся Тому́,/ дарова́ти Оте́честву на́шему мир// и душа́м на́шим ве́лию ми́лость.
И ны́не, Богоро́дичен, глас то́йже:
Богоро́дице, Ты еси́ Лоза́ и́стинная,/ возрасти́вшая нам Плод живота́./ Тебе́ мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О пречестна́я и свяще́нная главо́, благода́ти Свята́го Ду́ха испо́лненная, Спа́сoво со Отце́м обита́лище, ста́рцев О́птинских учениче́ и прее́мниче, гра́да Караганды́ светле́йшее украше́ние, Казахста́нския страны́ бoгодарова́нный моли́твенниче, Це́ркве Ру́сския па́стырю богопросла́вленный, си́рым и вдови́цам засту́пниче, немощны́х врачу́ безме́здный, пра́вило ве́ры и благоче́стия, преподо́бных сожи́телю и му́чеников соприча́стниче, богоно́сне о́тче наш Севастиа́не досточе́стне! К тебе́ усе́рдно прибега́юще, моле́ние те́плое прино́сим: пода́ждь и на́шему убо́жеству от сокро́вищницы души́ твоея́, смире́нием твои́м горды́ню на́шу низложи́, безстра́стием стра́сти на́ша попали́, бо́дрствованием на́вык ле́ности от нас отжени́, сле́зными то́ки лед нечу́вствия на́шего растопи́, бде́нием от сна грехо́внаго нас возста́ви, моли́твою твое́ю от ду́ха уны́ния свободи́ и любо́вию братолю́бны нас сотвори́. Пода́ждь нам, свя́тче Бо́жий, дух кро́тости и смире́ния, дух чистоты́ и благоче́стия, свободи́ нас от многонеду́жия страсте́й и ко и́стинному покая́нию приведи́. Во уме́ твое́м непреста́нно име́яй на Кресте́ за нас распя́вшагося Сы́на Бо́жия, Того́ сладча́йшее и́мя непреста́нно носи́ти во уме́ и в се́рдце и нас научи́, да любо́вию Тому́ пламене́юще, стра́шный о́ный День Су́дный сре́тити угото́вимся, и в Ца́рствие Небе́сное вни́ти с тобо́ю сподо́бимся, е́же сла́вити и воспева́ти Триеди́ную держа́ву Бо́га на́шего, Отца́, и Сы́на, и Ду́ха Свята́го, во ве́ки. Ами́нь.
