Служба священномученику Сергию Кедрову
Ме́сяца ноября́ в 3-й день
Священному́ченика Се́ргия Ке́дрова
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Све́тиши Оте́честву твоему́ при́сно,/ сла́вный Се́ргие священному́чениче,/ покрыва́яй ны от па́губы враго́в/ и льсти де́монския лука́выя,/ те́мже упова́ние на заступле́ние твое́ возложи́вше,/ днесь торжеству́ем па́мять твою́,/ честны́й защи́тниче наш,/ ве́рою и любо́вию пою́ще Го́спода,// тя просла́вльшаго.
Яви́лся еси́ во вре́мя благопотре́бно/ му́ченик Христо́в и́стинен,/ о проще́нии грехо́в убива́ющих тя моля́ся;/ сего́ ра́ди дерзнове́ние пред Го́сподем стяжа́в,/ вознеси́ моли́твы на́ша ко Престо́лу Его́,/ да прии́мем, я́же про́сим:/ спасе́ние душа́м и земли́ Моско́встей заступле́ние,/ ве́рою и любо́вию пою́ще Го́спода,// тя просла́вльшаго.
Христо́вы за́поведи в се́рдце нелицеме́рно храня́,/ ми́лостыню та́йно твори́л еси́;/ сло́во и́стины пропове́дуя,/ на путь страда́ний небоя́зненно вступи́л еси́/ и живо́т свой за и́стину положи́л еси́./ Те́мже обетова́ния Христа́ Го́спода,/ И́же есть И́стина, Путь и Живо́т,/ ны́не восприе́млеши// и мо́лишися о душа́х на́ших.
И́ны стихи́ры, глас 6.
Подо́бен: Все отло́жше:
Вся собра́ к весе́лию ве́рныя/ свяще́нная и сла́вная па́мять Се́ргия,/ священному́ченика и христопропове́дника,/ обличи́теля нечести́вых,/ и правосла́вных преда́ний кре́пкаго храни́теля,/ да́же до сме́рти пострада́вшаго,// и ны́не моля́щагося о душа́х на́ших.
Богому́дре и богоприя́тне Се́ргие,/ добропобе́дный во́ине Христа́ Бо́га,/ ты, глаго́лы жи́зни ве́чныя благовеству́я,/ ча́да твоя́ до́бре упа́сл еси́,/ и ве́ры ра́ди да́же до кро́ве пострада́л еси́,/ днесь же предстоя́ Престо́лу Бо́жию,// моли́ся о душа́х на́ших.
Созда́тель твой Госпо́дь,/ от чре́ва ма́терня избра́ тя, о́тче Се́ргие,/ пропове́дати и́мя Его́ пред все́ми людьми́/ и Безкро́вную Же́ртву приноси́ти,/ напосле́док и самому́ закла́тися,/ Той же и даде́ тебе́ си́лу и кре́пость/ вся до конца́ претерпе́ти./ Ны́не же я́ве зри́ши Его́ лице́м к лицу́// и мо́лишися о душа́х на́ших.
Сла́ва, глас 1:
Ве́лиим Твои́м милосе́рдием, Христе́,/ кровь Твою́ за ны пролия́л еси́,/ и па́ки милосе́рдуеши о нас,/ подава́я рабо́м Твои́м, Бла́же,/ кровь свою́ пролия́ти за Тебе́./ Те́мже у́бо мо́лим Тя:/ моли́твами священному́ченика Твоего́ Се́ргия,/ даждь нам му́жественне испове́дати Тя Творца́,/ и по обетова́нию прейти́ от жи́зни вре́менныя// к ве́чному зре́нию лица́ Твоего́.
И ны́не, Богоро́дичен, глас то́йже:
Всеми́рную сла́ву,/ от челове́к прозя́бшую/ и Влады́ку ро́ждшую,/ Небе́сную дверь воспои́м, Мари́ю Де́ву,/ Безпло́тных песнь и ве́рных удобре́ние:/ Сия́ бо яви́ся не́бо и храм Божества́,/ Сия́, прегражде́ние вражды́ разруши́вши,/ мир введе́ и Ца́рствие отве́рзе;/ Сию́ у́бо иму́ще ве́ры утвержде́ние,/ Побо́рника и́мамы из Нея́ ро́ждшагося Го́спода./ Дерза́йте у́бо, дерза́йте, лю́дие Бо́жии,/ и́бо Той победи́т враги́,// я́ко Всеси́лен.
Вход. Проки́мен дне. И чте́ния три о́бщая
священному́ченику Це́ркве Ру́сския XX ве́ка еди́ному.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ры, глас 1:
Весели́мся о Го́споде, лю́дие,/ ра́дуимся, све́тло оде́ющеся,/ приходя́ще в па́мять блаже́ннаго Се́ргия,/ днесь бо с на́ми и с Небе́сными во́и,/ предстои́т Престо́лу огнезра́чному Царя́ Христа́// и при́сно мо́лится о душа́х на́ших.
Сла́ва, глас 8:
Про́стым о́ком души́ твоея́,/ свя́тче Бо́жий Се́ргие,/ сама́го себе́ све́тла соблю́л еси́/ и свети́льник милосе́рдия па́стве твое́й яви́лся еси́,/ никогда́же гре́шнаго отвраща́яся,/ но обетова́нием ми́лости Христо́вы к покая́нию воздвига́я./ Ны́не же у Престо́ла Бо́жия мо́лишися// поми́ловатися душа́м на́шим.
И ны́не, Богоро́дичен, глас то́йже.
Подо́бен: О, пресла́внаго чудесе́:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
На стихо́вне стихи́ры, глас 8:
Что тя нарече́м, священному́чениче Се́ргие?/ Апо́столов ли подража́теля, я́ко лю́дем Христа́ возвести́л еси́?/ Иере́я ли Бо́жия, я́ко Безкро́вную Же́ртву Ему́ при́сно приноси́л еси́?/ Му́ченика ли, я́ко кровь твою́, блаже́нне, пролия́л еси́?/ Сего́ ра́ди Престо́лу Бо́жию предстои́ши со все́ми святы́ми,/ и́хже мно́гая имена́/ и пребо́льшая дарова́ния.// Моли́ спасти́ся душа́м на́шим.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Заключе́ну ти бы́вшу в темни́цу,/ священному́чениче блаже́нне,/ вся весь твоя́ потрясе́ся, реку́щи:/ что сие́ есть, и что нам бу́дет,/ и что зна́мение ско́рбное сие́?/ Наро́ди же глаго́лаху:/ я́ве скорбь сия́ к сме́рти./ Мы же, собра́вшеся в пречестне́м хра́ме сем,/ мо́лим тя, Се́ргие свя́те:/ сподо́би нас в тве́рдом испове́дании вся терпе́ти// и моли́ спасти́ся душа́м наши́м.
Стих: Честна́ пред Го́сподем// смерть преподо́бных Его́.
Челове́к зван и избра́н был еси́,/ священному́чениче Се́ргие блаже́нне,/ добро́тою бо души́ твоея́ и ми́лостию/ одея́ние бра́чное стяжа́л еси́,/ и мно́гая ча́да твоя́ в ве́ре укрепи́л еси́./ Ны́не же на пи́ре бра́чнем А́гнца/ с новому́ченики Бу́товскими весели́шися,// и мо́лиши спасти́ся душа́м на́шим.
Сла́ва, глас то́йже:
О́тче священному́чениче Се́ргие!/ О тебе́ ра́дуемся пред Бо́гом на́шим/ и, сконча́ние жи́зни твоея́ пресла́вно почита́юще,/ на по́мощь твою́ упова́ем/ и во умиле́нии серде́ц на́ших си́це вопие́м:/ испра́ви пути́ на́ша по за́поведем Госпо́дним,/ да любо́вию друг ко дру́гу избы́точествующе,/ непоро́чни во святы́ни утверди́мся/ в прише́ствие Го́спода на́шего Иису́са Христа́,// Ему́же сла́ва во ве́ки.
И ны́не, Богоро́дичен, глас то́йже:
Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.
Тропа́рь, глас 3:
Це́ркве Ру́сския сто́лпе непоколеби́мый,/ священному́чениче Се́ргие,/ Та́ин Бо́жиих соверши́телю и до́блий страда́льче,/ Бо́гу от ю́ности ве́рно послужи́вый,/ предста́тельством Бо́жия Ма́тере от боле́зни исцеле́вый,/ в темни́це мно́гая муче́ния претерпе́вый,/ и за Христа́ да́же до кро́ве пострада́вый,/ не преста́й Ему́ моли́тися,/ да спасе́т ду́ши на́ша,// я́ко Человеколю́бец.
Сла́ва, и ны́не, Богоро́дичен, глас то́йже:
Тя, хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м Страсть,// изба́ви нас от тли, я́ко Человеколю́бец.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Еще́ ти су́щу на земли́ с на́ми, священному́чениче Се́ргие приснопева́еме, поуче́нием Го́спода Иису́са Христа́ внима́л еси́. Ны́не же в вы́шних Ему́ предстоя́, не преста́й моля́ся о любо́вию тя сла́вящих.
Сла́ва, и ны́не, Богоро́дичен:
Наде́ждо христиа́н, Всесвята́я Де́во, Его́же роди́ла еси́, Бо́га, па́че ума́ и сло́ва, непреста́нно моли́ с Небе́сными Си́лами дарова́ти отпуще́ние согреше́ний всем нам и исправле́ние жития́, ве́рою и любо́вию Тя сла́вящим.
По 2-м стихосло́вии седа́лен, глас 3:
Во всем бла́га па́стве твое́й ища́, ду́шу твою́ за ню́ положи́л еси́, Се́ргие досточу́дне. Мы же, зря́ще тя доброде́тельми вся́ческими укра́шена и вели́ка ве́рою, помо́щника ско́раго в ско́рбех тебе́ обрета́ем, и Бо́га, ди́внаго во святы́х Свои́х, сла́вим.
Сла́ва, и ны́не, Богоро́дичен:
Красоте́ де́вства Твоего́ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице: ку́ю Ти похвалу́ принесу́ досто́йную? Что же возымену́ю Тя? Недоумева́ю и ужаса́юся. Те́мже я́ко повеле́н бых, вопию́ Ти: ра́дуйся, Благода́тная.
Велича́ние:
Велича́ем тя,/ священному́чениче Се́ргие,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу твою́, и прииди́ во е́же спасти́ нас.
Глаго́лах о свиде́ниих твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 8:
О, ди́внаго смотре́ния Бо́жия! Ка́ко пе́рвее Же́ртву Безкро́вную благогове́йне соверша́я, по́слежде, я́ко всепло́дие, себе́ сама́го в же́ртву живу́ю прине́сл еси́, священному́чениче Се́ргие! Мы же, весе́лия духо́внаго испо́лненнии, со умиле́нием зове́м ти: моли́ Христа́ Бо́га, ве́рным да́же до сме́рти нам пребы́ти Ему́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя без се́мене ро́ждшую Бо́га пло́тию, вси ублажа́ем, ро́ди челове́честии: огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода. Тем, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти: моли́ Христа́ Бо́га, согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Я́ко иере́й принося́ Же́ртву Безкро́вную,/ напосле́док сам себе́ в же́ртву живу́ю прине́сл еси́,/ мы же, ча́да твоя́, со умиле́нием вопие́м:/ о́тче Се́ргие священному́чениче,/ при́сно ко Го́споду моли́ся,/ мир лю́дем дарова́ти// и душа́м на́шим ве́лию ми́лость.
Кано́н Богоро́дицы, глас 4: Сотрясо́шася лю́дие, смято́шася язы́цы: Творе́ние Иоа́нна Дамаски́на.
И кано́н священному́ченика Се́ргия, глас то́йже.
Песнь 1
Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́,/ души́ трича́стное потопи́, молю́ся,/ да Тебе́ я́ко в тимпа́не,/ во умерщвле́нии телесе́// побе́дное воспою́ пе́ние.
Человеколю́бче Христе́, всех Царю́! Сподо́би ны гре́шныя, воспе́ти ны́не песнь пресла́вному му́ченику Твоему́, ве́ры ра́ди убие́нному и страда́ньми свои́ми Тя просла́вльшему.
От избы́тка се́рдца глаго́лем усты́ на́шими пе́сненныя сия́ хвалы́, Се́ргие богоприя́тне, да поне́ от слове́с на́ших оправди́мся, чту́щии твою́ па́мять ве́рно.
От Твои́х Твоя́ прие́мляй, И́же во́лею прине́слся еси́ за ны, Го́споди, приими́ сро́дника на́шего Се́ргия, вознося́щаго ны́не моли́твы пред огнезра́чным Престо́лом Твои́м.
Богоро́дичен: Де́во Всепе́тая Богоро́дице, ро́ждшая Преве́чное Сло́во, Христа́, моли́ся при́сно о нас, недосто́йных рабе́х Твои́х.
Катава́сия: Отве́рзу уста́ моя́:
Песнь 3
Ирмо́с: С высоты́ снизше́л еси́ во́лею на зе́млю,/ превы́шше вся́каго нача́ла,/ и смире́нное возне́сл еси́,/ из а́да преиспо́дняго,/ естество́ челове́ческое:// несть бо свят па́че Тебе́, Человеколю́бче.
Иерусали́мстей ико́не Пресвяты́я Влады́чицы во дни боле́зни твоея́, му́чениче, мольбы́ возсыла́ше супру́жница твоя́, и услы́шана бысть моли́тва ея́, да послу́жиши Бо́гу и Це́ркви, и кровь твою́ пролие́ши за Христа́, излия́вшаго за нас Кровь Свою́.
Воста́в от одра́ боле́зни твоея́, преблаже́нне Се́ргие, еди́ному Христу́ Бо́гу ве́рно послужи́л еси́, предста́тельством Присноде́вы, скорбя́щих Уте́шительницы.
Си́лу цели́тельную, е́юже врачева́л еси́ боля́щия во дни жи́зни Твоея́ земны́я, Го́споди, и ны́не изле́й на ны моли́твами священному́ченика Се́ргия, и вся душе́вныя на́ша неду́ги исцели́.
Богоро́дичен: Моля́щимся пред честны́ми ико́нами Твои́ми, Де́во Ма́ти, подава́й вся я́же ко спасе́нию потре́бная, мо́жеши бо, я́ко Ма́ти Всемогу́щаго Бо́га.
Седа́лен, глас 8:
В хра́ме Бо́жии стоя́ще, му́чениче свя́те, мольбы́ возсыла́ем ти и, засту́пника непреобори́ма тя име́юще, со упова́нием глаго́лем: сподо́би нас предста́тельством твои́м пред Бо́гом обрести́ ве́лию ми́лость, Се́ргие, о́тче наш.
Сла́ва, и ны́не, Богоро́дичен:
В хра́ме стоя́ще сла́вы Твоея́, на Небеси́ стоя́ти мним, Богоро́дице, двере Небе́сная, отве́рзи нам две́ри ми́лости Твоея́.
Песнь 4
Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
Моли́ся за ны, священному́чениче Се́ргие, да не тща бу́дет в нас благода́ть Бо́жия, но да потруди́мся во сла́ву Его́, не́мощи на́ша препобежда́юще.
Го́споду Бо́гу Твоему́ еди́ному, во Святе́й Тро́ице покланя́емому, послужи́л еси́, свя́те Се́ргие, Той бо бе хвала́ твоя́ и Бог твой, и сотвори́ тебе́ вся сла́вная и просла́ви пред А́нгелы и челове́ки.
Помози́ моли́твенником твои́м, Се́ргие свя́те, да сотвори́м плоды́ досто́йныя покая́ния, и и́стинная ча́да Авраа́мова яви́мся, и на ло́не его́ почи́ем с тобо́ю во ве́ки.
Богоро́дичен: Ма́рфино благоде́лание и Мари́ино благове́рие да́руй нам соверши́ти, Де́во Свята́я, да во обои́х преуспе́вше, Небе́сная насле́дим.
Песнь 5
Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к све́ту у́мному// вознося́й Моего́ Божества́.
Оста́вил еси́ вся вре́менная и вслед Спаси́теля Христа́ поше́л еси́, те́мже стори́цею прия́л еси́ мзду твою́ и живо́т ве́чный насле́дил еси́.
От пе́рваго часа́ да́же до сме́рти до́бре потруди́выйся в виногра́де Госпо́дни, испроси́ и нам, поне́ во единыйна́десять час прише́дшим, мзду спасе́ния улучи́ти.
А́ще и умерщвле́н был еси́ те́лом, священному́чениче Се́ргие, оба́че ду́хом твои́м ко́зни диа́вольския посрами́л еси́, Христа́ име́я кре́пкое прибе́жище.
Богоро́дичен: Стена́ необори́мая и покро́в всемо́щный страда́льцем земли́ Ру́сския яви́лася еси́, Пресвята́я Де́во, те́мже Тя велича́ем.
Песнь 6
Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в;/ но я́ко Бог, из глубины́/ возведи́ живо́т мой,// Многоми́лостиве.
И́стинный оте́ц и па́стырь де́тем твои́м и па́стве твое́й яви́лся еси́, Се́ргие богоблаже́нне, научи́ и нас о́браз благонра́внаго жития́ ча́дом на́шим подава́ти.
Ту́не дар свяще́нства прия́л еси́, о́тче Се́ргие, ту́не и я́звы духо́вныя чад твои́х врачева́л еси́, те́мже мзду трудо́в твои́х от Бо́га на Небесе́х восприя́л еси́.
В день сла́внаго прише́ствия Твоего́, Милосе́рде Христе́, одесну́ю Тебе́ ста́ти сподо́би нас предста́тельством достохва́льнаго Се́ргия, кровь свою́ за Тя пролия́вшаго.
Богоро́дичен: Тя Предста́тельницу тве́рдую пред Бо́гом стяжа́вше, Богороди́тельнице, к Тебе́ прибега́ем и Тобо́ю спаса́емся, Де́во Ма́ти Бо́жия.
Конда́к, глас 2.
Подо́бен: В моли́твах:
В страда́ниих тве́рдаго испове́дника,/ все упова́ние на Бо́га и Ма́терь Его́ возло́жшаго,/ восхва́лим днесь Се́ргия добропобе́днаго,/ и́же, я́ко же́ртва непоро́чная,/ во всесожже́ние принесе́ся еди́ному Христу́ Бо́гу,// прославля́ющему святы́я Своя́.
И́кос:
От нечи́стых усте́н, оба́че се́рдца лю́бящаго, му́ченику Твоему́, Го́споди, Се́ргию, днесь пе́ние похва́льное прино́сим, и́же в житии́ свое́м сло́вом и де́лом усе́рдно Тебе́ послужи́ и за́поведи Твоя́ изря́дно сохрани́. Его́же мольбы́ приими́ о нас недосто́йных, вся бо возмо́жна Тебе́ еди́ному, прославля́ющему святы́я Своя́.
Песнь 7
Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,// Бо́же оте́ц на́ших.
Христа́ еди́наго насы́титися жела́я, по вся дни Безкро́вную Же́ртву приноси́л еси́, о́тче Се́ргие, немо́лчно благословля́я Бо́га отце́в на́ших.
Мольба́м твои́м, Се́ргие богопослу́шне, благопослу́шна соде́лал еси́ Спа́са, Его́же послу́шают и мо́ре, и ветр, и вся.
Еди́наго в Тро́ице Бо́га отце́в на́ших испове́дуя, Тому́ в житии́ твое́м да́же до сме́рти ве́рно послужи́л еси́, священному́чениче Се́ргие.
Богоро́дичен: Разори́ сове́ты супоста́т, борю́щих нас, и вознеси́ моли́твы за мир к Сы́ну и Бо́гу Твоему́, Де́во Благослове́нная.
Песнь 8
Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д ороси́л еси́,/ и научи́л еси́ пе́ти:/ вся дела́, благослови́те, по́йте Го́спода.
Всу́е разруша́ли есте́ Це́рковь Бо́жию, законопресту́пницы нечести́вии, сего́ ра́ди сы́нове ва́ши яви́шася вам судии́ и похва́льное пе́ние ку́пно со все́ми Се́ргию добропобе́дному прино́сят.
В кле́ти души́ твоея́ моли́лся еси́, свя́те Се́ргие: не введи́ нас в напа́сть, О́тче Небе́сный, но изба́ви нас от лука́ваго.
Вку́пе со все́ми святы́ми, от ве́ка Бо́гу угоди́вшими, наипа́че же с пострада́вшими от безбо́жных в земли́ на́шей, моли́ся, свя́те Се́ргие, Оте́честву на́шему в ми́ре при́сно пребыва́ти.
Богоро́дичен: Прему́дрость и Сло́во в Твое́м чре́ве заче́нши неопа́льно, Ма́ти Бо́жия, ми́ру родила́ еси́ мир Содержа́щаго, и во объя́тиих носи́ла еси́ Пищеда́теля всех и Творца́ тва́ри.
Песнь 9
Ирмо́с: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая;/ и́бо Бог из Тебе́ воплоти́ся за милосе́рдие.// Те́мже Тя я́ко Богоро́дицу велича́ем.
Свя́те Се́ргие добропобе́дне, вку́пе с новому́ченики Бу́товскими, соблюда́й ча́да твоя́ ненаве́тна от всех зол вра́жиих и бу́ди нам защи́тник пред Престо́лом Судии́ и Бо́га на́шего.
Ини́и тя поя́ша во дни ста́рости твоея́, священному́чениче Се́ргие, и ведо́ша, а́може не хоте́л еси́. Те́мже у́бо и Бо́га просла́вил еси́ сме́ртию твое́ю, свя́те.
Во вла́сти Твое́й положи́вый времена́ и ле́та, Всеси́льне Го́споди, моли́твами свята́го Се́ргия и новому́чеников Це́ркве Ру́сския при́зри ми́лостивно на ны, да рече́м с весе́лием: се вре́мя благоприя́тно, се день спасе́ния.
Богоро́дичен: Испове́дуем Тя, Де́во, Спаси́тельницу и Помо́щницу на́шу, и вопие́м: помози́ нам в многомяте́жном сем житии́, и Ца́рствия Небе́снаго сподо́би хода́тайством Твои́м.
Свети́лен:
Мирско́е и́го разу́мно отве́рг, о́тче Се́ргие богому́дре, Христо́вы за́поведи соблю́л еси́ и страда́ньми твои́ми прича́стник Ца́рствия Небе́снаго яви́лся еси́, те́мже моли́ Светода́вца Бо́га спасти́ и просвети́ти ду́ши на́ша.
Сла́ва, и ны́не, Богоро́дичен:
О Тебе́ хва́лимся, Богороди́тельнице, и к Бо́гу Тя и́мамы те́плую Предста́тельницу, те́мже мо́лимся: све́том незаходи́мым нас просвети́, да просла́вим Христа́, свет нам показа́вшаго.
На хвали́тех стихи́ры на 4.
Новому́чеников, глас 5.
(Творе́ние святи́теля Афана́сия Ковро́вскаго.)
Подо́бен: Ра́дуйся:
Прииди́те, Небе́снии предста́телие на́ши, к нам,/ ва́шего ча́ющим ми́лостивнаго посеще́ния,/ и изба́вите озло́бленныя мучи́тельскими преще́нии/ лю́таго неи́стовства неве́рных,/ от ни́хже, я́ко пле́нницы и на́зи, гони́ми есмы́,/ от ме́ста на ме́сто ча́сто преходя́ще/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.
И свята́го Се́ргия, глас и подо́бен то́йже:
Ра́дуйся, священному́чениче Се́ргие,/ Оте́чества твоего́ и́стинный засту́пниче,/ в дому́ твое́м по за́поведем Госпо́дним пожи́вый/ и в них сро́дники и ча́да духо́вная ходи́ти научи́вый,/ зало́г свяще́нства до́бре сохрани́вый/ и кро́вию твое́ю Це́рковь Ру́сскую украси́вый./ Те́мже со умиле́нием взыва́ем:/ укрепи́ нас непоро́чно в за́поведех Бо́жиих ходи́ти/ и ве́рность Христу́ сохрани́ти,// подаю́щему ми́рови ве́лию ми́лость.
Ра́дуйся, священному́чениче Се́ргие,/ честны́й наш предста́телю и па́стырю./ Ты, благоче́стием утверди́в житие́ твое́,/ я́ко домоправи́тель ве́рный,/ хле́бом жи́зни ве́чныя пита́л еси́ ча́да твоя́;/ последи́ же, я́ко па́стырь до́брый,/ да́же до кро́ве за Христа́ пострада́л еси́./ Те́мже кла́няющеся тебе́ взыва́ем:/ помози́ нам благоче́стие стяжа́ти/ и Бо́га всем се́рдцем люби́ти,// подаю́щаго ми́рови ве́лию ми́лость.
Сла́ва, глас 6:
Всечестна́я па́мять му́ченика Се́ргия приспе́,/ созыва́ющи к весе́лию ве́рныя,/ те́мже у́бо вси рцем:/ ра́дуйся, свети́льниче су́щим во тьме,/ да́руяй нам све́тло и́стину узре́ти;/ ра́дуйся, богому́дрый па́стырю,/ ча́да церко́вная све́том Ева́нгелия просвеща́яй;/ ра́дуйся, я́ко Же́ртву Безкро́вную благогове́йне соверша́я,/ себе́ сама́го в же́ртву живу́ю прине́сл еси́./ Прииди́ ны́не посреде́ нас неви́димо/ и сподо́би даро́в невеще́ственных,// твой пра́здник пе́сньми соверша́ющих.
И ны́не, Богоро́дичен, глас то́йже:
Богоро́дице, Ты еси́ Лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ со святы́ми апо́столы и му́ченики// поми́ловати ду́шы на́ша.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О избра́нниче и уго́дниче Христо́в, священному́чениче Се́ргие, земли́ Моско́вския благо́е прозябе́ние и кра́сный пло́де, Це́ркве Ру́сския сто́лпе непоколеби́мый, сро́дников твои́х наста́вниче и Небе́сный предста́телю! Ты от ю́ности твоея́ свяще́нства дар прии́м, пред престо́лом Вседержи́теля служе́ние безпоро́чно соверша́л еси́; егда́ же боле́знь пости́же тя, чу́дным предста́тельством Бо́жия Ма́тере со одра́ боле́зни твоея́ воста́л еси́. Во дни же гоне́ния лю́таго ду́шу твою́ за Христа́ и лю́ди положи́л еси́, и жи́зни ве́чныя со все́ми святы́ми сподо́бился еси́. Ны́не у́бо при́зри на нас, недосто́йных чад тво́их, умиле́нною душе́ю и сокруше́нным се́рдцем тя призыва́ющих. Бу́ди нам я́ко благосе́рдый оте́ц и те́плый моли́твенник, и умоли́ Го́спода Бо́га, да прости́т согреше́ния на́ша и изба́вит а́довых уз и ве́чнаго муче́ния. Укрепи́ нас в ве́ре, помози́ всегда́ твори́ти во́лю Бо́жию и научи́, е́же люби́ти Еди́наго Бо́га всем се́рдцем, все́ю душе́ю и все́ю кре́постию, и бли́жняго своего́, я́ко себе́. Да та́ко пожи́вше, сподо́бимся вку́пе с тобо́ю непреста́нно прославля́ти всесвято́е и великоле́пое и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
