Служба священномученику Сергию Мечеву, пресвитеру
Ме́сяца декабря́ в 24-й день
Священному́ченика Се́ргия Мече́ва, пресви́тера
Пое́м слу́жбу его́ во ин день, во́ньже настоя́тель изво́лит.
А́ще ли же пое́м ю́ в 24-й день, зри уста́в в конце́.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры предпра́зднства, и свята́го, глас 1.
Подо́бен: Всехва́льнии му́ченицы:
Прехва́льне о́тче Се́ргие,/ в собо́ре новому́ченик Це́ркве Ру́сския просла́вленный,/ гра́да Москвы́ пресла́вное украше́ние,/ ты бо преда́в всего́ себе́ в ру́це Бо́жии,/ же́ртвенною любо́вию па́стве послужи́л еси́,/ последи́ же я́ко же́ртва всесоверше́нная/ Царю́ сла́вы прине́слся еси́,// Его́же моли́ Оте́честву на́шему мир дарова́ти.
Пресла́вне о́тче Се́ргие,/ чад твои́х учи́вый,/ я́ко ве́рным до́лжно есть гото́вым бы́ти умре́ти за Христа́./ Егда́ же прии́де вре́мя испыта́ния ве́ры,/ и́стиною препоя́сався и в броня́ пра́вды оболки́йся,/ на брань с миродержи́телем тьмы ве́ка сего́ вступи́л еси́,/ и на крест ева́нгельски восле́д Спаси́телю возше́л еси́,// те́мже моли́ ве́рность Христу́ до сме́рти нам дарова́ти.
Богому́дре о́тче Се́ргие,/ защи́тниче ре́вностный догма́тов и преда́ний церко́вных,/ после́дователю ве́рный святы́х оте́ц,/ словесы́ и дея́ньми/ учи́вый Свяще́нное Писа́ние познава́ти,/ и заве́т с Бо́гом утверди́в во кле́ти серде́чней,/ жизнь свою́ в покая́нии провожда́ти,// и ны́не мо́лиши Человеколю́бца Бо́га спасе́ние душа́м на́шим дарова́ти.
А́ще кроме́ предпра́зднства, стихи́ры свята́го на 8 (и́ны стихи́ры зри на лити́и).
Сла́ва, глас 2:
Па́стырие Маросе́йстии,/ дарми́ Свята́го Ду́ха преизоби́льно укра́шени,/ на ни́ве Госпо́дней потруди́вшеся,/ плод стори́цею во ученице́х принесли́ есте́./ Ста́рче пра́ведне Алекси́е,/ уте́шителю бла́гостный, моли́твенниче и чудотво́рче,/ и Се́ргие священному́чениче,/ сораспя́тися призыва́вый Христу́/ и сие́ собо́ю яви́вый:/ разли́чна ва́ша дарова́ния, но Дух еди́н./ Те́мже води́тельством ва́шим// ча́ем спаси́тельных оби́телей дости́гнути.
И ны́не, предпра́зднства.
А́ще кроме́ предпра́зднства, Богоро́дичен, глас то́йже:
Пре́йде сень зако́нная,/ благода́ти прише́дши:/ я́коже бо купина́ не сгара́ше, опаля́ема,/ та́ко Де́ва родила́ еси́/ и Де́ва пребыла́ еси́./ Вме́сто столпа́ о́гненнаго/ пра́ведное возсия́ Со́лнце,/ вме́сто Моисе́я// Христо́с, спасе́ние душ на́ших.
Вход. Проки́мен дне. И чте́ния три
священному́ченику Це́ркве Ру́сския XX ве́ка еди́ному.
Дея́ний святы́х апо́стол чте́ние (глава́ 4):
Во дни о́ны, глаго́лющим апо́столом к лю́дем,/ наидо́ша на них свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пять./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.
Дея́ний святы́х апо́стол чте́ние (глава́ 4):
Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.
Дея́ний святы́х апо́стол чте́ние (глава́ 4):
Во дни о́ны, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
На лити́и стихи́ры предпра́зднства со стихо́вны у́трени или́ я́же екклесиа́рх изво́лит.
И стихи́ры свята́го, глас 1:
Ра́дуется днесь сла́внейший град Москва́,/ и храм святи́теля Никола́я торжеству́ет,/ на моли́тву ве́рных призыва́я,/ во е́же просла́вити па́стыря и́стиннаго,/ любо́вию Христо́вою па́ству возлюби́вшаго,/ и во изгна́нии из глубины́ души́ к ча́дом взыва́вшаго:/ вы – мое́ дыха́ние, вы – мое́ ра́дование,/ вы – мой путь ко Христу́!/ Ка́ко пойду́ без вас?/ Ны́не же мы, наста́вниче наш Се́ргие,/ ча́да чад твои́х,/ любо́вию вопие́м ти:/ ты еси́ наде́жда на́ша и путь ко Христу́;/ да моли́твами твои́ми и́го благо́е понесе́м// и поми́ловани бу́дем.
Днесь созыва́ет нас па́стырь Маросе́йский, глаго́ля:/ прииди́те, ча́да моя́ возлю́бленная,/ прииди́те вси, отягче́ннии печа́льми жите́йскими,/ вни́дите во храм Госпо́день,/ и преми́рныя слу́жбы сея́ приобщи́теся,/ да та́йну ве́лию богослуже́ния позна́ете,/ и да просвети́т Госпо́дь сердца́ ва́ша,/ во е́же де́лы благи́ми Ему́ послужи́ти,// и Ца́рствие Небе́сное насле́дити.
Глас 2:
Сра́дуйтеся с на́ми, А́нгельстии чи́ни и святи́и вси,/ днесь бо пра́зднуем ди́внаго па́стыря Маросе́йскаго Се́ргия торжество́,/ па́ству свою́ я́ко еди́ну семью́ покая́нную и богослуже́бную/ в любви́ ко Го́споду и бли́жним воспита́вшаго,/ во у́зах за Христа́ мно́гая ле́та испове́днически пребы́вшаго/ и ду́ха не угаси́вшаго,/ и сме́ртию свое́ю Бо́га просла́вившаго;/ ны́не же в собо́ре новому́ченик Престо́лу Всевы́шняго предстоя́щаго,// и моля́щагося о спасе́нии Оте́чества на́шего.
Сла́ва, глас 8:
Дру́зи мои́ ве́рнии и ча́да духо́вная,/ вку́пе собери́теся,/ да еди́ными усты́ и еди́ным се́рдцем/ просла́вим Го́спода,/ и Пречи́стую Ма́терь Его́, и святы́х уго́дников Бо́жиих;/ у́тренюет бо дух мой ко хра́му душе́вному коего́ждо чад мои́х,/ я́ко благослове́н наш сою́з от Бо́га,/ да пребу́дем при́сно в едине́нии ду́ха в ве́це сем и бу́дущем,/ – та́ко во изгна́нии взыва́л еси́, о́тче./ Днесь же па́ки с Небесе́ созыва́еши нас на моли́тву,/ да еди́ным се́рдцем и усты́ просла́вим тя,// священному́чениче Се́ргие.
И ны́не, предпра́зднства.
А́ще кроме́ предпра́зднства, Богоро́дичен, глас то́йже:
Егда́ умно́жися непра́вда го́рдых,/ и ца́рство Росси́йское сокруши́ся,/ тогда́ Ма́ти Бо́жия ико́ною Свое́ю Держа́вною яви́ся,/ и я́ко Возбра́нная Воево́да, на брань с неви́димым враго́м/ ве́лий сонм новому́чеников и испове́дников воздви́же,/ те́мже к заступле́нию Ея́ ны́не прибега́ем,/ и мо́лим сохрани́ти Оте́чество на́ше невреди́мо// от всех наве́т вра́жиих.
На стихо́вне стихи́ры предпра́зднства.
А́ще кроме́ предпра́зднства, стихи́ры свята́го, глас 4.
Подо́бен: Я́ко до́бля:
Суд Бо́жий соверша́ется над земле́ю Ру́сскою,/ я́коже предреко́ша отцы́ на́ши,/ оскуде́ бо преподо́бный,/ ума́лишася и́стины от сыно́в Оте́чества на́шего,/ и наста́ глад слы́шания сло́ва Бо́жия./ Оба́че не скорби́те, но ра́дуйтеся, ча́да моя́,/ я́ко наказу́я за грехи́, очища́ет нас Госпо́дь/ и Небе́сною по́мощию не оставля́ет,/ – та́ко утеша́ше па́ству свою́ священному́ченик Се́ргий.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
В се́рдце на́шем брань соверша́ется/ между́ гла́сом со́вести и по́мыслом лука́вым./ Не уподо́бимся у́бо Иу́де, бра́тие,/ лобза́нием преда́вшему на смерть Учи́теля,/ но отве́ргнем злы́я по́мыслы,/ и покая́нием совлече́мся ве́тхаго челове́ка,/ да ца́рствует в се́рдце Госпо́дь,/ – си́це призыва́л еси́ внима́ти себе́,// моли́твенниче наш Се́ргие.
Стих: Честна́ пред Го́сподем// смерть преподо́бных Его́.
Се, что добро́ или́ что красно́,/ но е́же жи́ти бра́тии вку́пе,/ – со проро́ком запове́да нам/ оте́ц наш духо́вный Се́ргий./ Потщи́мся у́бо начерта́ти сие́ на скрижа́лех серде́ц на́ших,/ ева́нгельски друг дру́га возлю́бим,/ и не́мощи бли́жних понесе́м,/ да не лиши́мся по нераде́нию бра́тственнаго сообита́ния,// в нем бо Госпо́дь обеща́ живо́т ве́чный.
Сла́ва, глас 8:
Прииди́те, целому́дрия и благоче́стия рачи́телие,/ услы́шите прему́драго Соломо́на, и́же глаго́лет:/ жена́ му́жественна вене́ц му́жу своему́ быва́ет,/ те́мже, почита́юще священному́ченика Се́ргия,/ воспомя́нем и супру́жницу его́ ве́рную,/ доброде́тельми укра́шенную Евфроси́нию,/ я́же подо́бно ему́ отлуче́на бысть от чад свои́х и гони́ма Христа́ ра́ди,/ оба́че любве́ Бо́жия ника́коже отлучи́ся./ Сего́ ра́ди ве́руем, я́ко чета́ супру́г вку́пе ны́не пребыва́ет,// о́браз любве́ Христо́вы нам явля́ющи.
И ны́не, предпра́зднства.
А́ще кроме́ предпра́зднства, Богоро́дичен, глас то́йже:
Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.
На благослове́нии хле́бов тропа́рь свята́го, два́жды, и тропа́рь предпра́зднства, еди́ножды. А́ще кроме́ предпра́зднства, тропа́рь свята́го, два́жды, и Богоро́дице Де́во: еди́ножды.
Тропа́рь свята́го, глас 4:
От ко́рене пра́веднаго прозя́бл еси́,/ Правосла́вия наста́вниче и ревни́телю,/ и пред Бо́гом во у́зах до сме́рти предстоя́,/ гла́сом немо́лчным па́ству наставля́л еси́,/ священному́чениче Се́ргие./ Моли́ Христа́ Бо́га// спасти́ся душа́м на́шим.
НА У́ТРЕНИ
На Бог Госпо́дь: тропа́рь предпра́зднства, два́жды. Сла́ва, свята́го. И ны́не, предпра́зднства. А́ще кроме́ предпра́зднства, тропа́рь свята́го, два́жды. Сла́ва, и ны́не, Богоро́дичен воскре́сен.
По 1-м стихосло́вии седа́лен, глас 5:
Припа́дая к стопа́м богоно́снаго ста́рца О́птинскаго Анато́лия,/ услы́шал еси́ в се́рдце глас, зову́щий тя послужи́ти Христу́,/ те́мже благи́й яре́м свяще́нства подъя́в,/ па́стырское служе́ние му́ченическим по́двигом увенча́л еси́./ Мы же, припа́дающе ко о́бразу твоему́,/ мо́лим тя, Се́ргие пресла́вне,/ моли́ Человеколю́бца Бо́га,/ да услы́шим глас со́вести на́шея,/ и собла́знов ми́ра отве́ргшеся, Христу́ после́дуем.
Сла́ва, и ны́не, предпра́зднства.
А́ще кроме́ предпра́зднства, Богоро́дичен, глас то́йже:
Влады́чице на́шей Богоро́дице/ те́пле моли́тву вознесе́м,/ прося́ще в ве́ре и благоче́стии лю́ди ру́сския утверди́ти,/ вражду́ и междоусо́бныя бра́ни истреби́ти,/ я́ко мно́гажды земля́ на́ша/ от враг заступле́нием Ея́ спасе́на бысть./ Те́мже и ны́не ве́руем,/ я́ко Держа́вная на́ша Засту́пница/ умо́лит Сы́на Своего́ и Бо́га на́шего/ дарова́ти мир Оте́честву на́шему.
По 2-м стихосло́вии седа́лен, глас 4:
О благоле́пии хра́ма и богослуже́ния ревну́я,/ иконописа́ния и пе́ния церко́внаго покрови́тель яви́лся еси́,/ Се́ргие достохва́льне,/ к позна́нию зако́нов жи́зни ве́чныя возводи́л еси́ ча́да твоя́, глаго́ля:/ храм есть земно́е Не́бо.
Сла́ва, и ны́не, предпра́зднства.
А́ще кроме́ предпра́зднства, Богоро́дичен, глас то́йже:
Христа́ роди́вши, Де́во Чи́стая,/ ра́дости всю вселе́нную испо́лнила еси́,/ те́мже согла́сно лику́ют Не́бо и земля́,/ сла́вяще Тя,/ Богома́ти Всенепоро́чная.
Велича́ние:
Велича́ем тя,/ священному́чениче Се́ргие,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́, и прииди́ во е́же спасти́ нас.
Глаго́лах о свиде́ниих Твои́х пред цари́, и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 6:
Роди́тель твой Алекси́й, ста́рец Моско́вский,/ служе́нием свои́м Бо́гу угоди́в,/ к пра́ведным причте́н бысть,/ ты же, Се́ргие священному́чениче,/ ве́рность Христу́ кро́вию запечатле́в,/ в ли́це новому́чеников Це́ркве Ру́сския ны́не торжеству́еши;/ и та́ко испо́лнися проро́чество ста́рца О́птинскаго Некта́рия,/ и́же предрече́ ти вы́шнюю сла́ву.
Сла́ва, и ны́не, предпра́зднства.
А́ще кроме́ предпра́зднства, Богоро́дичен, глас то́йже:
Во узи́лище заключа́емь/ и непра́ведно осужда́емь,/ священному́ченик Се́ргий/ к Богоро́дице с ве́рою взыва́ше:/ о Засту́пнице усе́рдная,/ Ма́ти Бо́га Вы́шняго,/ изба́ви ны вели́ких бед и зол:/ Ты бо еси́ боже́ственный покро́в рабо́м Твои́м.
Степе́нна, 1-й антифо́н 4-го гла́са. Проки́мен, глас 4: Проидо́хом скво́зе огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Ка́я темни́ца не име́ тя ю́зника,/ кий град и страна́/ не слы́шаша воздыха́ний и моли́тв твои́х:/ Москва́ хва́лится,/ я́ко воспита́ до́браго па́стыря,/ земля́ Волого́дская ра́дуется,/ и́бо во изгна́нии прия́т тя,/ страны́ се́верныя вельми́ сла́вят,/ я́ко ви́деша страда́ния твоя́ во узи́лищи,/ Яросла́вль град чтит па́мять твою́,/ я́ко кровь твою́ прие́мый/ и мо́щи твоя́ в не́дрех свои́х сокры́вый./ Те́мже мо́лим тя:/ в ве́рности Христу́ утверди́ нас,// священному́чениче Се́ргие.
Кано́н предпра́зднства, и свята́го. А́ще кроме́ предпра́зднства, кано́н Богоро́дицы, и свята́го.
Канóн свята́го, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.
Со тре́петом вни́дем в дом Госпо́день,/ и горе́ возвы́сивше сердца́,/ священному́ченику Се́ргию благода́рственную песнь принесе́м,/ я́ко от Бо́га просла́вися.
Престо́лу Бо́жию в ли́це новому́ченик Це́ркве Ру́сския предстоя́,/ я́ко иере́й и му́ченик пресла́вный,/ приими́ моли́твы на́ша, Се́ргие всече́стне,/ днесь тебе́ с любо́вию возсыла́емыя.
Дре́ва до́браго плод соверше́н,/ Се́ргие, па́стырю Маросе́йский,/ от исто́чника свя́тости оте́ческия напая́емь,/ страда́нием твои́м Бо́га просла́вил еси́.
Богоро́дичен: Бо́га без се́мене ро́ждшая/ па́че ума́ челове́ча,/ Де́во Непоро́чная и Ма́ти Бо́жия,/ мо́ли Сы́на Твоего́/ поми́ловати прославля́ющих Тя.
Песнь 3
Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.
Всеросси́йскому Патриа́рху Ти́хону,/ жре́бием Бо́жиим избра́нному,/ всем се́рдцем пре́дан был еси́,/ Правосла́вия побо́рниче, о́тче Се́ргие.
От Мака́рия, святи́теля Моско́вскаго/ и Алта́йскаго апо́стола,/ смире́нию и отверже́нию себе́/ во служе́нии Це́ркви и Оте́честву поуча́лся еси́.
Друго́м твои́м иере́ем,/ в Бу́тове кро́вию свое́ю ве́рность Христу́ запечатле́вшим,/ единоду́шен был еси́,/ с ни́ми же ны́не в собо́ре новому́ченик торжеству́еши.
Богоро́дичен: Утвержде́ние бу́ди и прибе́жище,/ я́ко сме́рти Разруши́теля Ма́ти,/ ве́рою к Тебе́ припа́дающим/ и любо́вию пою́щим Тя.
Конда́к и и́кос предпра́зднства.
Седа́лен свята́го, глас 8:
Незло́бию от Христа́ Спа́са научи́выйся,/ истяза́ния и ра́ны от разбо́йник кро́тко претерпе́л еси́,/ подо́бно Саро́вскому чудотво́рцу моля́ся за оби́дящих тя,/ Се́ргие терпеливоду́шне.
Сла́ва, и ны́не, предпра́зднства.
А́ще кроме́ предпра́зднства, Богоро́дичен:
Ико́ну Бо́жия Ма́тере Фео́доровскую почти́м, ве́рнии,/ я́ко то́ю благослове́ние во гра́де Костроме́ благочести́вому царю́ ру́сскому дарова́ся дре́вле,/ в после́дняя же времена́ убие́ние царя́ страстоте́рпца/ и ве́лия ско́рби держа́ве Росси́йстей предвозвести́шася,/ егда́ во хра́ме Нико́лы Чудотво́рца, и́же в Кле́нниках,/ сле́зы от ико́ны сея́ пролия́шася.
Песнь 4
Ирмо́с: Услы́шах, Го́споди,/ сла́вное Твое́ смотре́ние,/ и просла́вих, Человеколю́бче,// непостижи́мую Твою́ си́лу.
Па́стырей честны́х воспита́л еси́:/ Стефа́на епи́скопа и Бори́са архимандри́та,/ и́же за Христа́ у́зы претерпе́вше,/ Святе́й Це́ркви ве́рно послужи́ша.
О спасе́нии духо́вных чад ревну́я,/ словесы́ Па́вловыми учи́л еси́:/ я́ко у́ды еди́наго Те́ла Христо́ва,/ друг дру́га люби́ти до́лжни есмы́.
Та́йны ми́ра го́рняго,/ я́же святи́и песнопи́сцы ду́хом изобрази́ша,/ пости́гнути призыва́л еси́,/ и моли́твами тех приугото́витися к жи́зни ве́чней.
Богоро́дичен: И́же О́браз ипоста́си О́тчи,/ из Тебе́ прия́т смеше́ние, Богороди́тельнице,/ и истле́вший о́браз просла́ви,/ и сего́ но́ва сотвори́.
Песнь 5
Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас:// ра́зве бо Тебе́ ино́го Бо́га не зна́ем.
Пред Бо́гом умо́м и се́рдцем предстоя́ти/ и во све́те повеле́ний Христо́вых ходи́ти/ па́ству наставля́л еси́,/ помози́ у́бо и нам сие́ испо́лнити.
С Бо́гом в моли́тве соедини́мся,/ и све́том Его́ просвети́мся,/ на сие́ бо зва́ни Творце́м на́шим,/ – та́ко рекл еси́, о́тче, ча́дом твои́м.
Призыва́л еси́ по за́поведи Христо́вой/ ду́хом вы́ну бде́ти и моли́тися,/ дабы́ избе́гнути вла́сти тьмы,/ и невече́рняго све́та дости́гнути.
Богоро́дичен: Просвети́, Пречи́стая,/ омраче́нную ду́шу мою́ све́том Твои́м,/ я́ко Свет ро́ждшая Еди́н Ипоста́сный.
Песнь 6
Ирмо́с: Прообразу́яй Твое́ погребе́ние, Крест и Страсть Ио́на,/ во чре́ве ки́тове, Спа́се, тридне́вновав,/ от внутрь взыва́ше:/ да взы́дет живо́т мой,/ и прии́дет моли́тва моя́ в храм твой Боже́ственный,// о Го́споди ми́лости!
Ма́терь Бо́жию и святы́х на по́мощь призыва́я,/ запове́дал еси́, о́тче Се́ргие,/ в любви́ и едине́нии при́сно пребыва́ти, глаго́ля:/ друг от дру́га да не разлучи́мся, ча́да моя́,/ я́ко да вку́пе пожи́вше,/ улучи́м вку́пе и обоже́ние.
Хра́мом рукотворе́нным разруша́емым,/ хра́мы на́ша душе́вныя да сози́ждем,/ иде́же та́инство покая́ния/ на же́ртвенницех серде́чных соверша́ется,/ и сие́ святи́лище никто́же возмо́жет разори́ти,/ учи́л еси́, о́тче.
Моли́тва твоя́ прия́та бысть я́ко кади́ло,/ священному́чениче Се́ргие,/ се бо чад духо́вных,/ едине́ние в церко́вном обще́нии сохра́ньших,/ не оста́вил еси́ заступле́нием/ в стра́шный час сме́ртный.
Богоро́дичен: Взе́млющаго грех всего́ ми́ра,/ Сы́на Твоего́ и Спа́са на́шего,/ Пренепоро́чная Де́во,/ не преста́й моли́ти/ от ве́чныя сме́рти изба́вити нас,/ по вели́цей Его́ ми́лости.
Конда́к свята́го, глас 8:
Вели́кою любо́вию к та́йне богослуже́ния прилежа́л еси́,/ па́ству свою́ призыва́я после́довати житию́ святы́х оте́ц/ и познава́ти писа́ния их свои́ми дея́ньми,/ за Христа́ страда́ния во у́зах и смерть прия́л еси́,/ те́мже взыва́ем ти:/ ра́дуйся, Се́ргие, па́стырю богому́дрый// и священному́чениче добропобе́дный.
И́кос:
Прииди́те, мучениколю́бцы,/ вни́дем мы́сленно в ма́лую хра́мину,/ иде́же священнострада́лец Се́ргий во изгна́нии/ слу́жбу Бо́жию с духо́вными ча́ды соверша́ше,/ сердца́ же моля́щихся горе́ша любо́вию ко Христу́ па́че свещи́,/ и в пла́мени их же́ртвы духо́вныя/ А́нгелы восходи́ша и низходи́ша./ Прииди́те, отве́рзем две́ри те́сныя темни́цы,/ и вдохне́м ороше́нный слеза́ми возду́х,/ и́же трепета́ от гла́са моли́тв и воздыха́ний его́,/ и воззове́м: ра́дуйся, Се́ргие, па́стырю богому́дрый/ и священному́чениче добропобе́дный.
Песнь 7
Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.
Труды́ мно́гими и моли́твами,/ наипа́че же смире́нием,/ сокры́тое в души́ челове́ческой/ я́сно зре́ти сподо́бился еси́,/ оба́че недосто́йным мнел еси́ себе́/ да́ра сего́ от Бо́га оте́ц на́ших.
Темни́цу я́ко затво́р и я́ко схи́му смерть/ предрече́ ти блаже́нная Ры́бинская ста́рица слепа́я Ксе́ния,/ вене́ц му́ченический прови́девши,/ низходя́щ на тя от Бо́га оте́ц на́ших.
Предте́чи Спа́сова гла́су внима́ти наставля́я и покая́ние пропове́дуя,/ в день рождества́ его́ во у́зы заключе́н был еси́,/ те́мже за и́стину пострада́в, ве́чно ра́дуешися,/ зря несре́дственно Бо́га оте́ц на́ших.
Богоро́дичен: Ра́дость скорбя́щих и отча́янных Ты еси́, Ма́ти Преблага́я,/ с новому́ченики и испове́дники Це́ркве Ру́сския/ моли́ о нас, Благослове́нная,/ ро́ждшагося от Тебе́ Бо́га оте́ц на́ших.
Песнь 8
Ирмо́с: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га,/ по́йте, дела́, я́ко Го́спода,// и превозноси́те во вся ве́ки.
Ни темни́ца, ни я́рость мучи́телей,/ ни страда́ния, ни ра́ны, ни са́мая смерть/ возмого́ша разлучи́ти тя от любве́ Бо́жия,/ е́юже укрепля́яся, воспева́л еси́:/ Го́спода по́йте и превозноси́те во вся ве́ки.
Ве́дый, я́ко прии́де час убие́ну ти бы́ти за Христа́,/ моли́тву в заточе́нии возсыла́л еси́,/ да никто́же из вве́ренных ти душ поги́бнет,/ преда́в себе́ сама́го и чад твои́х в ру́це Го́спода,/ превозноси́маго во вся ве́ки.
Вои́стину блаже́н еси́ ты, Се́ргие многострада́льне,/ и́бо Страсте́й Христо́вых о́бщник сподо́бився бы́ти,/ в же́ртву Живонача́льней Тро́ице прине́слся еси́,/ сла́вя Бо́га, превозноси́маго во вся ве́ки.
Богоро́дичен: Что сие́ стра́нное ви́дим чу́до?/ Де́ва Чи́стая гряде́т в Вифлее́м роди́ти/ пре́жде век рожде́ннаго от Отца́ Сы́на Бо́жия,/ Его́же пое́м и превозно́сим во вся ве́ки.
Песнь 9
Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те:/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.
Бо́га, неизрече́нною му́дростию/ плач при Кресте́ в ра́дость Воскресе́ния преложи́вшаго,/ и смерть му́ченическую отца́ на́шего Се́ргия/ в торжество́ побе́ды ве́ры претвори́вшаго,/ ве́рнии единому́дренно пе́сньми велича́ем.
Ве́рою прося́щия тя спаса́й/ от вся́кия беды́ и грехо́вныя скве́рны, Се́ргие блаже́нне,/ да моли́твами твои́ми/ плоды́ покая́ния в доброде́лании принесе́м,/ ди́внаго во святы́х Свои́х Бо́га велича́юще.
Возвели́чен быв страда́нием,/ прия́л еси́ от Го́спода сла́ву и честь,/ священному́чениче Се́ргие,/ и с новому́ченики Це́ркве Ру́сския воспева́еши Тро́ицу Безнача́льную,/ Ю́же единоду́шно с тобо́ю велича́ем.
Богоро́дичен: Ма́ти у́бо па́че естества́/ позна́лася еси́ Христу́ Богу́ на́шему,/ Неискусобра́чная Присноде́во Чи́стая,/ се бо А́нгели и челове́цы/ единому́дренно Тя пе́сньми велича́ют.
Свети́лен свята́го:
Па́стыря до́браго,/ Та́ин Христо́вых ре́вностнаго служи́теля,/ пропове́дника велегла́снаго, священному́ченика добропобе́днаго,/ велича́ем тя, о́тче наш Се́ргие,/ я́ко светлостьми́ уче́ний и страда́ний твои́х/ ду́ши на́ша просвеща́еши.
Сла́ва, и ны́не, предпра́зднства.
А́ще кроме́ предпра́зднства, Богоро́дичен:
Досто́йно Тя сла́вят Си́лы Небе́сныя,/ и мы недосто́йнии дерза́ем воспе́ти Тя на земли́,/ любо́вию бо Твое́ю, Ма́ти Све́та,// николи́же оставля́еши нас.
На хвали́тех стихи́ры предпра́зднства,
и свята́го, глас 8.
Подо́бен: О, пресла́внаго чудесе́:
Любо́вию оте́ческою воспита́нный/ и благоче́стие ма́тере восприя́вый,/ прее́мник ста́рца Алекси́я яви́лся еси́,/ и ча́да духо́вная я́ко семью́ еди́ну/ в ве́ре, наде́жди и любви́ возрасти́,/ Прему́дрости же Бо́жией приобщи́/ и ко спасе́нию мно́гия приведе́,/ те́мже мо́лим тя,/ сопричи́сли и ны к па́стве твое́й,// па́стырю до́брый, о́тче Се́ргие.
Благода́ть духо́вная,/ в се́рдце твое́м возсия́вши,/ све́тло просвети́ тя,/ Се́ргие всесла́вне,/ егда́ Литурги́ю Боже́ственную/ четыредесятодне́вно соверша́л еси́,/ и прича́стием Святы́х Та́ин укрепи́вся,/ за Христа́ и Це́рковь Его́ Святу́ю/ смерть му́ченическую восприя́ти// произволе́ния испо́лнился еси́.
Во све́те звезды́, над Вифлее́мом возсия́вшия,/ соверша́ем па́мять твою́, о́тче Се́ргие,/ и та́инству воплоще́ния Сы́на Бо́жия приобща́ющеся,/ возсыла́ем ти хвале́бное пе́ние,/ я́ко пропове́дал еси́ Христа́ в нощи́ безбо́жия,/ и за Него́ убие́н был еси́,/ ны́не же с ли́ки А́нгельскими воспева́еши:/ сла́ва в вы́шних Бо́гу,// и мо́лиши на земли́ утверди́ти мир.
А́ще кроме́ предпра́зднства, стихи́ры свята́го на 4.
Сла́ва, глас 8:
О, пресла́внаго чудесе́!/ Я́ко цвет прекра́сный земли́ Ру́сския/ Се́ргий священному́ченик процвете́,/ и в па́мять свою́ нас собира́ет днесь/ славосло́вити и превозноси́ти Человеколю́бца Бо́га,/ дарова́вшаго си́лу Свою́ му́чеником святы́м/ просла́вити и́мя Его́/ во утвержде́ние ве́ры правосла́вныя// до сконча́ния ве́ка.
И ны́не, предпра́зднства.
А́ще кроме́ предпра́зднства, Богоро́дичен, глас то́йже.
(Творе́ние святи́теля Афана́сия Ковро́вскаго.)
Подо́бен: О, пресла́внаго чудесе́:
O, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ O Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
Славосло́вие вели́кое. Тропа́рь свята́го. Сла́ва, и ны́не, предпра́зднства. А́ще кроме́ предпра́зднства: Сла́ва, и ны́не, Богоро́дичен воскре́сен.
А́ще же вели́каго славосло́вия несть, на стихо́вне стихи́ры предпра́зднства.
Сла́ва, свята́го, глас 6:
Я́же во у́зах по страна́м се́верным ше́ствие твое́ кто испове́сть, о́тче Се́ргие сла́вне?/ Труды́, боле́зни, бие́ния,/ я́же во áлчбе и жа́жде злострада́ния,/ разлуче́ние со сро́дники и ча́ды духо́вными,/ и до сме́рти Бо́гу предстоя́ние:/ вся претерпе́л еси́ о укрепля́ющем тя Иису́се Христе́,/ ве́ру сохра́ньше и па́ству в любви́ соблю́дше;/ те́мже, я́ко име́яй дерзнове́ние,/ не преста́й моли́ти Человеколю́бца Бо́га,// укрепи́ти ве́ру правосла́вную во Оте́честве на́шем.
И ны́не, предпра́зднства.
В концé у́трени тропáрь свята́го. Слáва, и ны́не, предпра́зднства.
НА ЛИТУРГИ́И
Блаже́нны от кано́на предпра́зднства, песнь 3-я, и свята́го, песнь 6-я. А́ще кроме́ предпра́зднства, блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 6: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О пресла́вный священному́чениче о́тче наш Се́ргие! Ки́я похвалы́ принесе́м тебе́, па́стырю до́брому, ду́шу свою́ за о́вцы слове́сныя положи́вшему? Ты, пра́веднаго ста́рца Моско́вскаго Алекси́я блага́я о́трасль быв, его́ служе́ние па́стве, от Бо́га да́нней, насле́довал еси́, и ча́да духо́вная во еди́ну семью́ покая́нную и богослуже́бную сою́зом любве́ сочета́в, по за́поведем ева́нгельским жи́ти научи́л еси́. Ка́ко воспое́м боле́зни и боре́ния твоя́, я́же во у́зах и во изгна́нии посреде́ гоне́ний на Це́рковь Ру́сскую претерпе́л еси́? Ки́ими глаго́лы возмо́жем изрещи́ да́же до кро́ве страда́ния твоя́, я́же ве́дает еди́н Госпо́дь? Сла́вно житие́ твое́, честна́ пред Го́сподем и смерть твоя́, досточу́дне! К тебе́ я́ко к чадолюби́вому отцу́ с наде́ждою и любо́вию припа́даем, зову́ще: помози́ нам ве́ру и́стинную и заве́т с Бо́гом в се́рдце храни́ти, ве́чности, в та́йне богослуже́ния явля́емей, приобща́тися, та́же гла́су со́вести в покая́нии внима́ти, писа́ния святы́х оте́ц де́яньми исполня́ти, в служе́нии бли́жним тебе́ сле́довати, испыта́ния и ско́рби, во спасе́ние от Го́спода нам посыла́емыя, со смире́нием приима́ти. По исхо́де же душ на́ших умоли́ Всеблага́го Бо́га прости́ти грехи́ на́ша, да вни́дем в жизнь ве́чную, иде́же ты с ли́ки новому́ченик предстои́ши Престо́лу Всесвяты́я Тро́ицы, сла́вяще Отца́, и Сы́на, и Свята́го Ду́ха. Ами́нь.
УСТАВНЫЕ УКАЗАНИЯ
Служба священномученика Сергия Мечёва может быть спета как в день его памяти, 24 декабря, так и в иной день.
Поскольку 24 декабря — это навечерие Рождества Христова, в этот день служба может быть исполнена только по образцу вседневной: см. в Типиконе устав соединения последований предпразднства Рождества Христова и преподобномученицы Евгении. В этом случае служба священномученика не имеет Божественной литургии и завершается утреней без пения великого славословия. Днем в навечерие будут, как обычно, совершаться Царские часы и великая вечерня с Литургией по чину святителя Василия Великого.
Исключения составляют случаи совпадения 24 декабря с субботой и неделей пред Рождеством Христовым, особенно в тех храмах, где память священномученика Сергия имеет особое почитание. В этих случаях, согласно уставу, Царские часы переносятся на предшествующую пятницу, а богослужение 24 декабря может совершаться в соединении со службой священномученику с полиелеем или бдением, по образцу службы святителю Петру Московскому в эти же дни (см. Типикон).
В иных случаях, с благословения настоятеля храма или монастыря и при его желании спеть службу священномученику Сергию по уставу бдения или полиелея, его память может быть перенесена на 23 декабря или на иной подходящий день.
Ниже приведен устав службы священномученику Сергию 24 декабря, если эта память является храмовым праздником и приходится на субботу или неделю пред Рождеством Христовым.
ЗРИ: А́ще храм священному́ченика Се́ргия случи́тся в суббо́ту пред Рождество́м Христо́вым.
В пято́к на ма́лой вече́рни на Го́споди, воззва́х: стихи́ры хра́ма на 4. Сла́ва, хра́ма: И ны́не, предпра́зднства. На стихо́вне стихи́ры хра́ма со стихо́вны вели́кия вече́рни, с припе́вы их, или́ предпра́зднства, со стихо́вны у́трени. Сла́ва, хра́ма: И ны́не, предпра́зднства. По Трисвято́м тропа́рь хра́ма. Сла́ва, и ны́не, предпра́зднства.
На вели́цей вече́рни на Го́споди, воззва́х, стихи́ры на 8: предпра́зднства 3, и хра́ма 5. Сла́ва, хра́ма: И ны́не, предпра́зднства. Вход. Проки́мен дне. Чте́ние хра́ма. На лити́и стихи́ры хра́ма. Сла́ва, хра́ма: И ны́не, предпра́зднства. На стихо́вне стихи́ры хра́ма. Сла́ва, хра́ма: И ны́не, предпра́зднства. На благослове́нии хле́бов тропа́рь хра́ма, два́жды, и предпра́зднства, еди́ножды.
На у́трени на Бог Госпо́дь: тропа́рь предпра́зднства, два́жды. Сла́ва, хра́ма: И ны́не, предпра́зднства. По кафи́смах седа́льны хра́ма. Сла́ва, и ны́не, предпра́зднства. И чте́ние. Полиеле́й, велича́ние, и седа́лен хра́ма по полиеле́и. Сла́ва, и ны́не, предпра́зднства, или́ Богоро́дичен. И чте́ние. Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36. Стихи́ра хра́ма. Кано́н предпра́зднства со ирмосо́м на 6, глас 2, ирмо́с по два́жды, и хра́ма на 8. Катава́сия: Христо́с ражда́ется: По 3-й пе́сни конда́к и и́кос предпра́зднства, седа́лен хра́ма, два́жды. Сла́ва, и ны́не, предпра́зднства. И чте́ние хра́ма. По 6-й пе́сни конда́к и и́кос хра́ма. По 9-й пе́сни свети́лен предпра́зднства. Сла́ва, хра́ма: И ны́не, предпра́зднства. На хвали́тех стихи́ры на 8: предпра́зднства 4, и хра́ма 4, с припе́вы их: 1-й: Свяще́нницы Твои́ облеку́тся в пра́вду,// и преподо́бнии Твои́ возра́дуются. 2-й: Честна́ пред Го́сподем// смерть преподо́бных Его́. Сла́ва, хра́ма: И ны́не, предпра́зднства. Славосло́вие вели́кое. По Трисвято́м, тропа́рь хра́ма: Сла́ва, и ны́не, предпра́зднства.
На часе́х тропа́рь предпра́зднства, и хра́ма. По Трисвято́м конда́к предпра́зднства и хра́ма глаго́лем пременя́юще.
На Литурги́и блаже́нны от кано́на предпра́зднства, песнь 3-я на 4, и хра́ма, песнь 6-я на 4. По вхо́де тропа́рь предпра́зднства и хра́ма. Сла́ва, конда́к хра́ма: И ны́не, предпра́зднства. Проки́мен дне (суббо́ты), глас 8: Весели́теся о Го́споде// и ра́дуйтеся, пра́веднии. Стих: Блаже́ни, и́хже оста́вишася беззако́ния, и и́хже прикры́шася греси́. И хра́ма, глас 7: Честна́ пред Го́сподем// смерть преподо́бных Его́. Апо́стол суббо́ты пред Рождество́м Христо́вым (к Гала́том, зача́ло 205), и хра́ма (к Ри́мляном, зача́ло 99). Аллилу́ия дне (суббо́ты), глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. И хра́ма, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие суббо́ты пред Рождество́м Христо́вым (от Луки́, зача́ло 72), и хра́ма (от Луки́, зача́ло 106). Прича́стен дне (суббо́ты): Ра́дуйтеся, пра́веднии, о Го́споде, пра́вым подоба́ет похвала́. И хра́ма: В па́мять ве́чную бу́дет пра́ведник, от слу́ха зла не убои́тся.
ЗРИ: А́ще ли случи́тся храм священному́ченика Се́ргия в Неде́лю пред Рождество́м Христо́вым святы́х оте́ц в предпра́зднство, декабря́ в 24-й день, слу́жбу пое́м я́коже предписа́ся в 17-й главе́, О хра́мех.
В суббо́ту на ма́лой вече́рни стихи́ры воскре́сны 4. Сла́ва, хра́ма: И ны́не, предпра́зднства. На стихо́вне стихи́ра воскре́сна, и хра́ма со стихо́вны вели́кия вече́рни, с припе́вы. Сла́ва, хра́ма: И ны́не, предпра́зднства. По Трисвято́м тропа́рь воскре́сен, и отце́в. Сла́ва, хра́ма: И ны́не, предпра́зднства. Ектения́ ма́лая. И отпу́ст.
На вели́цей вече́рни на Го́споди, воззва́х: стихи́ры на 10: отце́в 3, предпра́зднства 3, и хра́ма со сла́вником 4. Сла́ва, отце́в: И ны́не, предпра́зднства. Вход. Проки́мен дне. Чте́ние отце́в, и хра́ма. На лити́и стихи́ра предпра́зднства, и хра́ма. Сла́ва, хра́ма: И ны́не, предпра́зднства. На стихо́вне стихи́ры предпра́зднства, с припе́вы их. Сла́ва, хра́ма: И ны́не, предпра́зднства. На благослове́нии хле́бов тропа́рь отце́в, еди́ножды: и предпра́зднства, еди́ножды: и хра́ма еди́ножды: и чте́ние.
На у́трени на Бог Госпо́дь: тропа́рь воскре́сен, еди́ножды: и отце́в, еди́ножды. Сла́ва, хра́ма: И ны́не, предпра́зднства. По кафи́смах седа́льны отце́в. Сла́ва, и ны́не, предпра́зднства: и чте́ние. Полиеле́й, и седа́лен отце́в: Авраа́ма и Исаа́ка же и Иа́кова: И седа́льны хра́ма по 1-м стихосло́вии, по 2-м стихосло́вии. Сла́ва, по полиеле́и: И ны́не, отце́в: Из недр Оте́ческих: И чте́ние хра́ма. Степе́нна гла́са. Проки́мен и Ева́нгелие хра́ма. Воскресе́ние Христо́во: и стихи́ра хра́ма. Кано́н отце́в со ирмосо́м на 6, и предпра́зднства на 4, и хра́ма на 4. Катава́сия: Христо́с ражда́ется: По 3-й пе́сни конда́к и и́кос отце́в, седа́лен хра́ма. Сла́ва, предпра́зднства: И ны́не, ипакои́ отце́в. И чте́ние хра́ма. По 6-й пе́сни конда́к и и́кос хра́ма. По 9-й пе́сни пое́м Честне́йшую: Свети́лен отце́в. Сла́ва, хра́ма: И ны́не, предпра́зднства. На хвали́тех стихи́ры отце́в 3, и хра́ма 2, и предпра́зднства 3, с припе́вы их. Сла́ва, отце́в: И ны́не, Преблагослове́нна еси́: Славосло́вие вели́кое, и про́чее у́трени.
На часе́х тропа́рь воскре́сен, тропари́ отце́в и хра́ма пременя́юще. Кондаки́ отце́в, предпра́зднства и хра́ма пременя́юще.
На Литурги́и блаже́нны от кано́на отце́в, песнь 3-я на 4: и хра́ма, песнь 6-я на 4. По вхо́де тропа́рь воскре́сен, отце́в, предпра́зднства и хра́ма. Конда́к отце́в: Сла́ва, хра́ма: И ны́не, предпра́зднства. Проки́мен, песнь отце́в, глас 4: Благослове́н еси́, Го́споди Бо́же оте́ц на́ших,// и хва́льно и просла́влено и́мя Твое́ во ве́ки. Стих: Я́ко пра́веден еси́ о всех, я́же сотвори́л еси́ нам. И хра́ма, глас 7: Честна́ пред Го́сподем// смерть преподо́бных Его́. Апо́стол Неде́ли пред Рождество́м Христо́вым (ко Евре́ом, зача́ло 328), и хра́ма (к Ри́мляном, зача́ло 99). Аллилу́ия, отце́в, глас 4: Бо́же, уши́ма на́шима услы́шахом, и отцы́ наши́ возвести́ша нам. Стих: Спасл еси́ нас от стужа́ющих нам, и ненави́дящия нас посрами́л еси́. И хра́ма, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие Неде́ли пред Рождество́м Христо́вым (от Матфе́я, зача́ло 1), и хра́ма (от Луки́, зача́ло 106). Прича́стен воскре́сен: Хвали́те Го́спода с Небе́с, хвали́те его́ в вы́шних. Други́й, отце́в: Ра́дуйтеся, пра́веднии, о Го́споде, пра́вым подоба́ет похвала́.
ЗРИ: А́ще случи́тся храм священному́ченика Се́ргия кроме́ суббо́ты и неде́ли, пое́тся слу́жба хра́ма во ин день.
