Акафист святителю Макарию, митрополиту Московскому и всея Руси
Ака́фист святи́телю Мака́рию чу́дному,
митрополи́ту Моско́вскому и всея́ Руси́
Конда́к 1
Избра́нный и чу́дный архиере́ю Це́ркве Ру́сския,/ гра́да Москвы́ первопресто́льниче,/ блаже́нне святи́телю Мака́рие,/ восхваля́ем тя ны́не мы недосто́йнии./ Ты же, я́ко име́я дерзнове́ние у Святы́я Тро́ицы,/ предста́тельством твои́м Небе́сным помога́й нам,/ су́щим в беда́х и ско́рбех, да взыва́ем ти:// Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
И́кос 1
А́нгела земна́го и челове́ка Небе́снаго прославля́ем тя, от земны́х бо к Небе́сным оби́телем возше́л еси́, Правосла́вия ревни́телю. И ны́не, предстоя́ Престо́лу Святы́я Тро́ицы вку́пе с ли́ки чудотво́рцев Росси́йских, не преста́й моля́ся о воспева́ющих тя:
Ра́дуйся, ко́рене блага́го ве́тве многопло́дная;
ра́дуйся, благочести́вых роди́телей пло́де богодарова́нный.
Ра́дуйся, от ю́ности Бо́га всем се́рдцем твои́м возлюби́вый;
ра́дуйся, поста́ и моли́твы ре́вностный блюсти́телю.
Ра́дуйся, я́ко измла́да му́дрости прилежа́л еси́;
ра́дуйся, я́ко Бо́гови еди́ному рабо́тати возжеле́л еси́.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 2
Ви́дя тщету́ мирска́го жития́, блаже́нне святи́телю Мака́рие, во огра́ду оби́тели преподо́бнаго Пафну́тия Бо́ровскаго удали́лся еси́, иде́же и́мя еги́петскаго пусты́нника, мона́шествующих наста́вника, Мака́рия Вели́каго, прия́л еси́ и, я́ко звезда́ небосве́тлая, восходя́щая на тве́рди церко́вней, весь живо́т свой Бо́гу пре́дал еси́, се́рдцем и усты́ непреста́нно поя́ Ему́: Аллилу́ия.
И́кос 2
Ра́зум твой, науче́нием кни́жным в Пафну́тиеве Бо́ровстем монастыри́ просвеща́емый, богомы́слию пре́дал еси́, блаже́нне Мака́рие, моли́твою и поще́нием во служе́ние Бо́гу себе́ уготовля́я. Восхваля́юще же ны́не твоя́ блага́я тща́ния, взыва́ем ти си́це:
Ра́дуйся, Христо́в яре́м носи́ти, отложи́в вся мирски́я сла́сти, изво́ливый;
ра́дуйся, ю́ность твою́, я́ко же́ртву непоро́чну, отверже́нием от ми́ра Бо́гу принесы́й.
Ра́дуйся, в посте́х и по́двизех твои́х доброде́тельми украси́выйся;
ра́дуйся, а́нгельски во пло́ти пожи́вый.
Ра́дуйся, мона́шескаго послуша́ния све́тлый о́бразе;
ра́дуйся, и́ноков оби́тели Бо́ровския украше́ние.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 3
Си́лою Вы́шняго, уготовля́вшаго тя во спасе́ние мно́гих, досточу́дне святи́телю, ведо́м был еси́ от си́лы в си́лу во святе́м житии́ твое́м. Ты же день и нощь поуча́лся еси́ в зако́не Госпо́дни, при́сно взыва́я Бо́гу: Аллилу́ия.
И́кос 3
Име́я чи́стое житие́ и ду́шу непоро́чну, в мона́шеския ри́зы обле́клся еси́, еще́ млад сый, и, по́двигом до́брым тружда́яся, иску́с многотру́днаго жития́ проше́д и са́ном архимандри́та оби́тели Лу́жецкия от первосвяти́теля Дании́ла почте́н быв, ре́вностно подвиза́лся еси́ о спасе́нии Бо́гом да́ннаго тебе́ ста́да слове́снаго, с ни́миже и мы днесь ра́достно взыва́ем:
Ра́дуйся, красото́ смиренному́дрия и воздержа́ния;
ра́дуйся, о́бразе кро́тости и послуша́ния.
Ра́дуйся, собо́ров и́ноческих похвале́ние;
ра́дуйся, преподо́бных и пра́ведных сонасле́дниче.
Ра́дуйся, прему́дрый мона́хов наста́вниче;
ра́дуйся, до́брый о них попечи́телю.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 4
Бу́ри страсте́й избежа́в, архипа́стырски труди́лся еси́, святи́телю о́тче Мака́рие, досто́йный служи́тель святы́я Софи́и, Прему́дрости Бо́жия, яви́лся еси́ и сокро́вища прему́дрости ре́вностно собира́ти потща́лся еси́ ко просвеще́нию наро́дов росси́йских, науча́я разу́мно пе́ти Бо́гу: Аллилу́ия.
И́кос 4
Слы́шаху бли́жнии и да́льнии лю́дие о труде́х твои́х неуста́нных, и́миже труди́лся еси́ на ка́федре богоспаса́емых градо́в Вели́каго Нова́града и Пско́ва, и дивя́щеся ра́довахуся, я́ко изволе́нием Бо́жиим прия́л еси́ жезл архипа́стырства. Мы же, о́вцы па́жити твоея́, све́том твоего́ богоразу́мия озаря́еми, вопие́м ти:
Ра́дуйся, на престо́ле святи́тельстем досто́йно возсе́дый;
ра́дуйся, архиере́ю и прему́дрый учи́телю.
Ра́дуйся, в по́двизе учи́тельства неуста́нный ревни́телю;
ра́дуйся, виногра́да Христо́ва усе́рдный де́лателю.
Ра́дуйся, я́ко твои́м благослове́нием некреще́нная лопь све́том Ева́нгелия просвеще́на бысть;
ра́дуйся, благочи́ния монасты́рскаго му́дрый устрои́телю.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 5
Боготе́чному со́лнцу уподо́бился еси́, блаже́нне Мака́рие, егда́ во́лею Пастыренача́льника Христа́ на све́щнице Це́ркве Ру́сския собо́ром архиере́ев поста́влен был еси́, да све́тиши све́тло Оте́честву твоему́. Мы же Небе́сному Царю́, Триеди́ному Бо́гу, ди́вно просла́вльшему тя, пое́м: Аллилу́ия.
И́кос 5
Ви́девше тя правосла́внии лю́дие, сия́юща мно́гими дарова́ньми я́ко свети́ло пресве́тлое, ра́довахуся. Ты же, до́брый па́стырю Христо́в, мучениколю́бец сый, собо́рне уста́вил еси́ пра́зднования твори́ти святы́м но́вым чудотво́рцем земли́ на́шея, и́хже Госпо́дь Бог просла́ви, я́коже Своя́ уго́дники, мно́гими чудесы́ и зна́меньми. Мы же, чудя́щеся о такове́й неизрече́нней бла́гости Бо́жией, Це́ркви на́шей Ру́сской дарова́нней, уми́льно взыва́ем ти си́це:
Ра́дуйся, святи́телю, дру́ги Бо́жия достоле́пно просла́вивый;
ра́дуйся, дея́ния подви́жников росси́йских писа́нию преда́вый.
Ра́дуйся, труды́ и по́двиги муже́й святы́х в пе́снех почты́й;
ра́дуйся, о́бразы но́вых чудотво́рцев благогове́йно писа́вый и лобыза́вый.
Ра́дуйся, научи́вый па́ству досто́йно покланя́тися святы́м но́вым чудотво́рцем;
ра́дуйся, я́ко ку́пно с си́ми святы́ми ны́не и от на́с славосло́вие прие́млеши.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 6
Пропове́дник ве́ры правосла́вныя и ревни́тель благоче́стия сло́вом и житие́м был еси́, достосла́вне святи́телю, блаже́нне Мака́рие, и потща́лся еси́ труды́ неле́ностными нра́вы и обы́чаи люде́й земли́ Ру́сския испра́вити, науча́я непреста́нно воспева́ти Бо́гу: Аллилу́ия.
И́кос 6
Возсия́л еси́, я́ко звезда́ лучеза́рная, в Це́ркви Ру́сской све́том Христо́ва уче́ния и ре́вностию твое́ю о сла́ве Бо́жией, иера́рше блаже́нне, и созва́л еси́ вели́кий Собо́р, Стогла́в нарица́емый, ко исправле́нию и утвержде́нию в доброде́телех ве́рных чад церко́вных, внима́ющих уче́нию Христо́ву и похваля́ющих тя си́це:
Ра́дуйся, благочи́ния церко́внаго стро́гий блюсти́телю;
ра́дуйся, я́ко тобо́ю ве́ра Христо́ва утверди́ся.
Ра́дуйся, чте́ния и пе́ния боже́ственнаго иску́сный учи́телю;
ра́дуйся, собла́знов и нестрое́ний му́дрый искорени́телю.
Ра́дуйся, я́ко страх Бо́жий, нача́ло прему́дрости, в сердца́х пасо́мых насажда́л еси́;
ра́дуйся, я́ко пра́ведныя жи́зни о́браз ве́рным подава́л еси́.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 7
Хотя́й враг спасе́ния ро́да челове́ческаго нару́шити ми́р Це́ркве на́шея, воздви́же ерети́ческое мудрова́ние в лю́дех о Божестве́, и о Це́ркви, и о ве́ре христиа́нстей. Мы же, тре́петни су́ще о такове́м злоче́стии, прославля́ем святи́теля Мака́рия, правосла́вных догма́тов защи́тителя, взыва́юще Бо́гу: Аллилу́ия.
И́кос 7
Но́ваго тя Петра́ Александри́йскаго и Никола́я Мирлики́йскаго зри́м, святи́телю Мака́рие: о́вии бо отсеко́ша А́рия безу́мнаго, раздра́вшаго Це́рковь, я́ко ри́зу Христо́ву, ты же ерети́ческая лжемудрова́ния собо́рне осуди́л еси́, пре́лесть их посрами́в, да не се́ют пле́вел зло́бы своея́ в ро́де челове́честем, и та́ко утвержде́н бысть и́стинный зако́н Христо́в. Мы же, ча́да Це́ркве Правосла́вныя, благода́рне прославля́ем тя, блаже́нне Мака́рие:
Ра́дуйся, Правосла́вия вели́кий ревни́телю;
ра́дуйся, ста́да Христо́ва от волко́в хи́щных ве́рный огради́телю.
Ра́дуйся, жезло́м догма́тов лжему́дрствование посрами́вый;
ра́дуйся, небрегу́щия о святы́ни от Це́ркве Бо́жия отлучи́вый.
Ра́дуйся, презри́тели законоположе́ний церко́вных низложи́вый;
ра́дуйся, гро́ме, поража́яй злочести́вых.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 8
Стра́нника и прише́льца в ми́ре сем себе́ помышля́я, святи́телю о́тче наш Мака́рие, в по́двизех и посте́х при́сно пребыва́я, кро́ток же, смире́н и ми́лостив был еси́, отроко́м в незло́бии подража́я всегда́, соверше́н умо́м быв, поя́ Всеми́лостивому Бо́гу: Аллилу́ия.
И́кос 8
Весь ум твой, святи́телю, впери́л еси́ к Бо́гу, па́стырски вруче́нное тебе́ от Христа́ ста́до упа́сл еси́, лица́ бо си́льных не стыдя́ся, наставля́л еси́ их на пу́ть спасе́ния. Сего́ ра́ди чту́ще святу́ю па́мять твою́, любо́вию ти вопие́м:
Ра́дуйся, вели́кий благоче́стия сто́лпе;
ра́дуйся, святопома́занная главо́, честны́й наш учи́телю.
Ра́дуйся, Христа́ Го́спода все́ю душе́ю и се́рдцем возлюби́вый;
ра́дуйся, христиа́нскаго благоче́стия и́стинный ревни́телю.
Ра́дуйся, неутоми́мый пропове́дниче Ева́нгелия Христо́ва;
ра́дуйся, ка́меню драги́й, всю зе́млю Ру́сскую украша́яй.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 9
Всего́ себе́ впери́в в прему́дрость кни́жную, мно́гими труды́ и по́двиги Вели́кия Мине́и Че́тия соста́вил еси́ во сла́ву Бо́жию, в похвалу́ святы́х и в науче́ние всему́ ро́ду правосла́вному. Мы же, дивя́щеся дарова́нней ти от Бо́га прему́дрости, прославля́ем тя, зову́ще Бо́гу: Аллилу́ия.
И́кос 9
Вети́и любому́дрии прославля́ют дея́ния сла́вных ми́ра сего́, ты же, пчеле́ уподобля́яся, во еди́но собира́л еси́ жития́ и́же в посте́х просия́вших и за Христа́ кровь свою́ пролия́вших. Мы же, писа́нии твои́ми просвеща́еми, пое́м и благодари́м тя, толи́ких трудо́в твои́х ра́ди, и преусе́рдно прино́сим ти сицева́я:
Ра́дуйся, кни́жную прему́дрость, я́ко би́сер, собра́вый;
ра́дуйся, печа́тание книг боже́ственных благослови́вый.
Ра́дуйся, сокро́вища прему́дрости ча́дом Бо́жиим яви́вый;
ра́дуйся, и́миже лю́ди росси́йския просвети́вый.
Ра́дуйся, граждани́не Иерусали́ма Небе́снаго;
ра́дуйся, духо́вный па́стырю слове́сных ове́ц.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 10
Спасти́ хотя́ ду́шу твою́, святи́телю, поко́я духо́внаго возжеле́л еси́, хотя́ оста́вити первосвяти́тельский престо́л и па́ству росси́йскую, но, умоле́н быв от собо́ра святи́телей и самоде́ржцем держа́вным, показа́л еси́ нам о́браз послуша́ния Це́ркви Христо́ве, да пое́м Бо́гу: Аллилу́ия.
И́кос 10
Стена́ и кре́пкое огражде́ние земли́ Ру́сския был еси́, святи́телю, мно́гими доброде́тельми украси́выйся, по́стнически пожи́в, тече́ние сконча́в, ко отше́ствию от земна́го бытия́ прибли́зился еси́ и пре́дал ду́шу свою́ в ру́це Бо́га Жи́ва. Собо́р же наро́да мно́га, сте́кшеся ко одру́ твоему́ и ви́девше лице́ твое́, я́ко свет сия́юще, чи́стаго и непоро́чнаго жития́ твоего́ ра́ди, просла́виша Бо́га, дарова́вшаго такова́го свети́льника, вопию́ще:
Ра́дуйся, пре́д кончи́ною твое́ю усе́рдно и надо́лзе пред о́бразом Богома́тере моли́выйся;
ра́дуйся, ми́рно и ра́достно час кончи́ны твоея́ сре́тивый.
Ра́дуйся, я́ко пресве́тлое житие́ твое́ на земли́ преше́л еси́;
ра́дуйся, я́ко в честне́м преставле́нии твое́м лице́ твое́ я́ко све́т сия́юще яви́ся.
Ра́дуйся, я́ко и по преставле́нии твое́м с на́ми пребыва́еши;
ра́дуйся, я́ко и по сме́рти твое́й нас не оставля́еши.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 11
Пе́ние на́ше моле́бное не пре́зри, богому́дре и блаже́нне о́тче, се бо, любо́вию подвиза́еми, к честно́му о́бразу твоему́ притека́ем и, прославля́юще Триеди́наго Бо́га, мо́лим ти ся: моли́ся вы́ну у Престо́ла Го́спода Сла́вы изба́витися нам от мяте́жей и треволне́ний, да благода́рне зове́м Бо́гу: Аллилу́ия.
И́кос 11
Светода́тельная свеща́ яви́лся еси́ стране́ на́шей, Мака́рие чу́дне, и по сме́рти свое́й. Те́мже сия́нием уче́ний и трудо́в твои́х озаря́еми, почита́ем святу́ю па́мять твою́. Просвети́ у́бо о́чи на́ши душе́вныя, да благода́рно взыва́ем ти:
Ра́дуйся, святи́телей Моско́вских досто́йный прее́мниче;
ра́дуйся, о па́стве твое́й усе́рдный пред Бо́гом предста́телю.
Ра́дуйся, о утоле́нии гне́ва Бо́жия, и́же на зе́млю Ру́сскую, моли́выйся;
ра́дуйся, вме́сто вре́менных ве́чная бла́га нам подава́яй.
Ра́дуйся, свети́льниче многосве́тлый, све́том и́стиннаго богопозна́ния нас озаря́яй;
ра́дуйся, би́сере честны́й, сия́нием Небе́сныя сла́вы сердца́ на́ша увеселя́яй.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 12
Благода́ть Госпо́дню и благовре́менную по́мощь испроси́ нам, святи́телю Мака́рие, во дни нестрое́ний и бу́ди нам в ско́рбех уте́шитель и в беда́х засту́пник. Мо́лим тя, иера́рше блаже́нне, проле́й за нас те́плую моли́тву ко Го́споду, да сохрани́т Це́рковь Правосла́вную неврежде́нну от ересе́й и раско́лов и спасе́т вопию́щих Ему́: Аллилу́ия.
И́кос 12
Пою́ще пресла́вное житие́ твое́ и богому́драя дея́ния, святи́телю о́тче Мака́рие, блаже́нству тезоимени́тый, восхваля́ем Пода́теля всех благи́х Бо́га, дарова́вшаго в после́дняя времена́ стране́ на́шей вели́каго чудотво́рца. Озари́, иера́рше чу́дный, нас светоли́тием твоея́ благода́ти, увеселя́я сердца́ на́ша пе́ти ти со умиле́нием:
Ра́дуйся, Правосла́вия побо́рниче нелицеме́рный;
ра́дуйся, архиере́ев добро́то, свяще́нников и и́ноков похвало́.
Ра́дуйся, звездо́, сия́ющая во тьме су́щим;
ра́дуйся, первопа́стырю и учи́телю христоимени́тых люде́й земли́ на́шея.
Ра́дуйся, иконопи́сче благогове́йне, дела́ рук свои́х посвяща́яй Бо́гу;
ра́дуйся, от Царя́ Небе́снаго вене́ц сла́вы прие́мый.
Ра́дуйся, блаже́нне Мака́рие, похвало́ Це́ркве Христо́вы и преди́вный чудотво́рче.
Конда́к 13
О чудотво́рче пресла́вный и боголюбе́зный па́стырю, первосвяти́телю изря́дный, вели́кое украше́ние церко́вное, всем архиере́ем и иере́ем неле́ностный учи́телю, всея́ Росси́йския па́ствы и́стинное управле́ние, святи́телю Мака́рие чу́дне! Ми́лостивно прие́м сие́ ма́лое моле́ние на́ше, в похвалу́ тебе́ приноси́мое, умоли́ Го́спода Бо́га дарова́ти мир душа́м на́шим, Це́ркви и стране́, да взыва́ем при́сно: Аллилу́ия.
Сей конда́к глаго́лется три́жды.
И па́ки чте́тся и́кос 1-й, и конда́к 1-й.
Моли́тва
О вели́кий святи́телю, Це́ркве Ру́сския первопресто́льниче, гра́да Москвы́ па́стырю и учи́телю, о́тче наш Мака́рие блаже́нне, до́бре по́двиг жития́ твоего́ соверши́вый и дерзнове́ние у Го́спода стяжа́вый! К тебе́ во умиле́нии серде́ц на́ших припа́даем и усе́рдно мо́лим: бу́ди о нас те́плый предста́тель у Престо́ла Вседержи́телева и умоли́ Всеблага́го Бо́га, да не пре́зрит нас, во мно́гия и лю́тыя грехи́ впа́дших, но да́рует нам вся блага́я и потре́бная, я́же ко спасе́нию. Ве́мы бо, я́ко не́мощни есмы́, но мо́лим тя усе́рдно, святи́телю Бо́жий, предста́тельством твои́м сохрани́ невреди́мо всеросси́йскую па́ству, ю́же во святи́тельстве твое́м до́бре упа́сл еси́. Архиере́ем и пресви́тером у Го́спода испроси́ му́дрость, во е́же пра́во пра́вити сло́во Боже́ственныя и́стины, же́ртвенную любо́вь и ре́вность о спасе́нии, да не поги́бнет ни еди́н от па́ствы их; и́ночествующих в по́двизех укрепи́; в ми́ре живу́щим и́стинный и потре́бный им, и́же во Христе́ Иису́се, о́браз жи́тельствования покажи́; ве́ру на́шу укрепи́, любви́ нелицеме́рней друг ко дру́гу научи́, в наде́жди на милосе́рдие Бо́жие утверди́. Еще́ же мо́лим тя, святи́телю, испроси́ нам у Всеми́лостиваго Бо́га ду́ха ра́зума и прему́дрости, да украси́мся и́стинным богове́дением спаси́тельных писа́ний святы́х оте́ц и му́дростию их творе́ний. Ей, святи́телю Бо́жий, о ми́ре всего́ ми́ра Го́спода умоли́, страну́ на́шу твои́м предста́тельством в ми́ре и безмяте́жии соблюди́, вся лю́ди Оте́чества на́шего в до́брем расположе́нии друг ко дру́гу сохрани́ и чу́жды междоусо́бных нестрое́ний покажи́, вся́кий град и вся́кую весь до́бре сохрани́, святу́ю ве́ру в лю́дех непоро́чну соблюди́. Бу́ди всем нам ско́рый помо́щник в ну́ждах на́ших, да тобо́ю окормля́еми, ми́рно и благоче́стно поживе́м в жи́зни сей, да сподо́бимся и ве́чных благ восприя́тия на Небеси́, сла́вяще и превознося́ще Отца́, и Сы́на, и Свята́го Ду́ха, и твое́ ми́лостивое предста́тельство, во ве́ки веко́в. Ами́нь.
