Акафист Рождеству Пресвятой Богородицы

Ака́фист Пресвяте́й Богоро́дице в честь Ея́ Рождества́

Конда́к 1

Избра́нней от всех родо́в Бо́жией Ма́тери,/ Небесе́ и земли́ Цари́це,/ освяти́вшей род челове́ческий прише́ствием к нам/ во всечестне́м рождестве́ Свое́м,/ благогове́йная пе́ния прино́сим Ти раби́ Твои́, Богоро́дице./ Ты же, я́ко прише́дшая на утеше́ние и спасе́ние на́ше,/ от вся́ких нас бед свободи́, да зове́м Ти:// Ра́дуйся, Пречи́стая, весь мир рождество́м Свои́м возвесели́вшая.

И́кос 1

Арха́нгел Гаврии́л по́слан бысть к пра́ведней А́нне, егда́ та в ско́рби непло́дства своего́ возопи́ ко Го́споду из глубины́ серде́чныя, узре́вши в са́де свое́м гнездо́ пти́чие, птенцы́ ма́лыя иму́щее, и благовести́ ей ра́дость ве́лию, глаго́ля: "Услы́шана моли́тва твоя́, сле́зы же твоя́ пред Бо́гом внидо́ша, и се роди́ши Дщерь преблагослове́нную, о Не́йже возблагословя́тся вся коле́на земна́я, нарече́тся же и́мя Ей — Мари́я". Сему́ ра́достному обетова́нию чудя́щеся, возопие́м Преблагослове́нней:

Ра́дуйся, от благоро́днейшаго ца́рскаго ко́рене Иоаки́мом произраще́нная;

ра́дуйся, от свяще́ннейшаго архиере́йскаго ро́да А́нною рожде́нная.

Ра́дуйся, прароди́телей на́ших от тли сме́ртныя свободи́вшая;

ра́дуйся, роди́телей Твои́х поноше́ния безча́дства разреши́вшая.

Ра́дуйся, свята́я врата́, на восто́к зря́щая, рождество́м Свои́м е́же от непло́дове отве́рзшая;

ра́дуйся, де́вственная две́ре заключе́нная, вхо́да Святи́теля Вели́каго ожида́ющая.

Ра́дуйся, слез ма́тере Твоея́ на ра́дость премене́ние;

ра́дуйся, тоя́ поноше́ния в лю́дех отъя́тие.

Ра́дуйся, вели́кое ро́ждшим Тя утеше́ние;

ра́дуйся, всему́ ми́ру наслажде́ние.

Ра́дуйся, па́дшаго Ада́ма воззва́ние;

ра́дуйся, слез Е́виных избавле́ние.

Ра́дуйся, Пречи́стая, весь мир рождество́м Свои́м возвесели́вшая.

Конда́к 2

Ви́дящи пра́ведная А́нна вели́каго Арха́нгела явле́ние, и слы́шавши глаго́лы его́, поклони́ся Бо́гу и рече́: "Жив Госпо́дь Бог, я́ко а́ще рожду́ отроча́, дам е́ в слу́жбу Ему́, да бу́дет служа́ и хваля́ и́мя Его́ свято́е день и нощь во вся ле́та живота́ своего́". Испо́лнися же ра́дости неизглаго́ланныя и тече́ во Иерусали́м со тща́нием, да та́мо в це́ркви воспое́т Бо́гу благода́рственно: Аллилу́ия.

И́кос 2

Ра́зум чист имя́ше пред Бо́гом пра́ведный Иоаки́м, оба́че от люде́й отве́ржен бысть во хра́ме безча́дия ра́ди, и в ско́рби сей и́де в пусты́ню, и та́мо моля́ся со слеза́ми, рече́: "Не вложу́ во уста́ моя́ пи́щи, ни в дом мой возвращу́ся, но сле́зы моя́ пи́щею ми да бу́дут и пусты́ня — до́мом, до́ндеже посети́т мя Госпо́дь Бог Изра́илев". И се А́нгел Госпо́день яви́ся ему́ и благовести́, я́ко роди́тся ему́ Дщерь, о Ея́же рождестве́ ра́дость бу́дет всему́ ми́ру. Се́ю ра́достию испо́лнився, и́де в Иерусали́м, и та́мо ку́пно с А́нною просла́виша Бо́га, глаго́люще Обетова́нней:

Ра́дуйся, от лет дре́вних все́ми ча́емая;

ра́дуйся, от всех проро́к я́ве предрече́нная.

Ра́дуйся, от сложе́ния ми́ра Бо́гом предызбра́нная;

ра́дуйся, от паде́ния прароди́телей гре́шным обетова́нная.

Ра́дуйся, сове́те неизрече́нный предве́чнаго попече́ния;

ра́дуйся, о́бразе благонапи́санный Боже́ственнаго Предве́дения.

Ра́дуйся, сви́тче одушевле́нный, в не́мже пе́рстом Бо́жиим написа́ся Сло́во;

ра́дуйся, исто́чниче присноживо́тный, из него́же изоби́льно источи́ся благове́стие Христо́во.

Ра́дуйся, Боготка́нная порфи́ро, в ню́же облече́ся Предве́чное Сло́во;

ра́дуйся, благоуха́нное ми́ро, в не́же всели́ся благода́ть Ду́ха Пресвята́го.

Ра́дуйся, па́че зла́та вся́каго блиста́ющая, нерукотворе́нная пала́то Прему́дрости Бо́жия;

ра́дуйся, у́тра вся́каго со́лнечнаго светле́йшая, жили́ще Христо́во.

Ра́дуйся, Пречи́стая, весь мир рождество́м Свои́м возвесели́вшая.

Конда́к 3

Си́ла Вы́шняго осени́ тогда́ к зача́тию заматоре́вшую во днех свои́х пра́ведную А́нну, и непло́дная тоя́ ложесна́ я́ко ни́ву показа́ благопло́дную, да прозя́бнет от нея́ на ра́дость всему́ ми́ру, в ско́рби погиба́ющему, село́ сла́дкое, Преблагослове́нная Де́ва Мари́я, всем хотя́щим жа́ти спасе́ние и воспева́ти из глубины́ душе́вныя: Аллилу́ия.

И́кос 3

Иму́ще, Пречи́стая, роди́тели Твои́ житие́ непоро́чное, зача́ша Тя в ста́рости до́брей, не плотски́м сласте́м прилежа́ще, но в целому́дрии и воздержа́нии подвиза́ющеся, да яви́тся в рождестве́ Твое́м не естества́ произволе́ние, но благода́ти Бо́жия си́ла, естества́ чин побежда́ющая, и да позна́ют вси, я́ко моли́тва вку́пе и воздыха́ние непло́дства прозябе́ Тя плод живоно́сен ми́ру. Сего́ ра́ди почита́юще всесла́вное зача́тие Твое́, пое́м Тебе́ сицева́я:

Ра́дуйся, непло́дныя ма́тере увеселе́ние;

ра́дуйся, безча́дных роди́телей утеше́ние.

Ра́дуйся, от су́ха ко́рене Иессе́ова прозя́бшая;

ра́дуйся, и цвет от него́ Христа́ произрасти́вшая.

Ра́дуйся, я́ко еще́ в зача́тии Твое́м естества́ уста́вы побежда́ются;

ра́дуйся, я́ко сим Твоего́ де́вства в рождестве́ сохране́ние предвозвеща́ется.

Ра́дуйся, я́ко отто́ле возве́яша ве́три, спасе́ния провозве́стницы;

ра́дуйся, я́ко отону́дуже плод ражда́ти благода́ть начина́ет.

Ра́дуйся, я́ко Тобо́ю естества́ на́шего непло́дство побежда́ется;

ра́дуйся, я́ко Тобо́ю прама́терняя кля́тва разреша́ется.

Ра́дуйся, всеми́рныя ра́дости провозвеще́ние;

ра́дуйся, нача́ло на́шего спасе́ния.

Ра́дуйся, Пречи́стая, весь мир рождество́м Свои́м возвесели́вшая.

Конда́к 4

Бу́рею печа́лей и скорбе́й мно́гих одержи́ми бы́вше пра́веднии роди́тели Твои́, Пречи́стая, я́ко до ста́рости безпло́дни бы́ша, мня́ху себе́ недосто́йны име́ти насле́дие во Ца́рствии Бо́жием. Сострада́ше же с ни́ми от ве́ка о непло́дстве естества́ на́шего вся тварь, суете́ повину́вшися: стене́т у́бо Ада́м, я́ко проклята́ бысть земля́ его́ ра́ди; рыда́ет же и Е́ва, я́ко умно́жишася печа́ли и боле́зни ея́; совоздыха́ет же с ни́ми и весь род челове́чь, тле́нию приобщи́вся. Егда́ же, о Богома́ти, рождество́м Твои́м разреши́ся дре́внее непло́дство и тле́ние потреби́ся, вся тварь благода́рственне о Тебе́ возопи́ Бо́гу: Аллилу́ия.

И́кос 4

Услы́ша Госпо́дь Бог пра́ведных Иоаки́ма и А́нны воздыха́ния и дарова́ им, по обетова́нию Арха́нгелову, Дщерь Пречи́стую и Преблагослове́нную, Де́ву Мари́ю, спасе́ния на́шего нача́ло и Хода́таицу, о Ея́же рождестве́ Не́бо и земля́ возра́довастася, А́нгели и Арха́нгели возвесели́шася, лю́дие же, просла́вивше Бо́га, воспе́ша си́це:

Ра́дуйся, Мари́е, вели́кое всея́ тва́ри чу́до;

ра́дуйся, Дщи Дави́дова, Госпо́дня же Ма́ти.

Ра́дуйся, еди́ная в жена́х благослове́нная;

ра́дуйся, от А́нгел на Небесе́х препросла́вленная.

Ра́дуйся, заре́ незаходи́мая, свет ми́рови возсия́вшая;

ра́дуйся, лампа́до неугаси́мая, нощь скорбе́й просвети́вшая.

Ра́дуйся, я́ко виде́ние зра́ка Твоего́ А́нгелом пресла́достно;

ра́дуйся, я́ко явле́ние Твое́ ми́ру челове́ком прера́достно.

Ра́дуйся, но́вый раю́, на земли́ насажде́нный;

ра́дуйся, све́тлый черто́же, Небе́сному Царю́ преукраше́нный.

Ра́дуйся, пала́то Ду́ха Пресвята́го;

ра́дуйся, ски́ния Бо́га с челове́ки.

Ра́дуйся, Пречи́стая, весь мир рождество́м Свои́м возвесели́вшая.

Конда́к 5

Боготе́чную звезду́, от Назаре́та возсия́вшую и весь мир просвети́вшую, зрим Тя, Пресвята́я Де́во; мал бо бе град, его́же освяти́ла еси́ рождество́м Твои́м, и презира́емь бе у люде́й, я́коже всем глаго́лати: "От Назаре́та мо́жет ли что́ добро́ бы́ти?" — оба́че немощна́я и уничиже́нная избра́ Бог, да кре́пкая посрами́т, и яви́ от Назаре́та Тя всему́ ми́ру цвет неувяда́емый, де́вством присноцвету́щий, всех святы́х святе́йшую Де́ву, греха́ во всем житии́ Свое́м ни еди́наго же позна́вшую, да вси о Тебе́ благода́рственно воспое́м Бо́гу: Аллилу́ия.

И́кос 5

Ви́девше роди́тели Твои́ чу́дное рождество́ Твое́, Пречи́стая, принесо́ша Бо́гу да́ры вели́кия, и благослове́ни бы́ша от свяще́нник и от всех люде́й, я́ко восприя́вшии благослове́ние Бо́жие, и сотвори́ша учрежде́ние ве́лие в дому́ свое́м, веселя́щеся ду́хом и прославля́юще Бо́га. Помина́юще же обетова́ние А́нгельское, почита́ху Тя, я́ко Госпожу́ Свою́, и поклони́вшеся, воспе́ша Тебе́ си́це:

Ра́дуйся, пре́жде всех век пронарече́нная Ду́ха Свята́го Неве́сто;

ра́дуйся, в после́дняя времена́ я́вльшаяся Сы́на Бо́жия Ма́ти, Де́во.

Ра́дуйся, Бо́гу Отцу́ Дщерь от всех родо́в избра́нная;

ра́дуйся, Живонача́льныя Тро́ицы заря́ми ди́вно осия́нная.

Ра́дуйся, вся Небе́сныя Си́лы без разсужде́ния превосходя́щая;

ра́дуйся, вся де́монския ра́ти посрамля́ющая и отгоня́ющая.

Ра́дуйся, всему́ ро́ду челове́ческому всемо́щная Засту́пнице;

ра́дуйся, всем ка́ющимся гре́шником всеми́лостивая Хода́таице.

Ра́дуйся, честны́х жен похвало́;

ра́дуйся, чи́стых дев сла́во.

Ра́дуйся, от ма́лаго Назаре́та добро́ всему́ ми́ру прине́сшая;

ра́дуйся, да́же до после́дних земли́ любо́вию Свое́ю всех покры́вшая.

Ра́дуйся, Пречи́стая, весь мир рождество́м Свои́м возвесели́вшая.

Конда́к 6

Пропове́дница прише́ствия Христо́ва в мир Тобо́ю, Богоро́дице, бысть пра́ведная Елисаве́та, егда́, узре́вши Тя, в дом ея́ гряду́щую, изы́де на сре́тение Твое́ и возопи́ гла́сом ве́лиим: "Благослове́нна Ты в жена́х, и благослове́н Плод чре́ва Твоего́. И отку́ду мне сие́, да прии́де Ма́ти Го́спода моего́ ко мне?" Си́це и мы, пресла́вное рождество́ Твое́ я́ко посеще́ние земли́ на́шея пра́зднующе, срета́ем Тя приве́тствием сим: благослове́нна Ты в жена́х, и благослове́н Плод чре́ва Твоего́, Ему́же вси благода́рственно да воспое́м: Аллилу́ия.

И́кос 6

Возсия́ ра́дость рождества́ Твоего́, Пречи́стая, не то́чию пра́ведным роди́телем Твои́м, но и всем бли́жним и дале́че су́щим, и да́же до коне́ц вселе́нныя: я́ко Бог на разу́мных Престо́лех почива́яй Престо́л Свят Себе́ предугото́ва уже́ на земли́, и Заря́ но́вая яви́ся, предвозвеща́ющи Со́лнца пра́вды Христа́ прише́ствие ско́рое. Сего́ ра́ди воспое́м Ти, Чи́стая, си́це:

Ра́дуйся, заре́ светле́йшая, вели́каго Со́лнца Христа́ Провозве́стнице;

ра́дуйся, луче́ незаходи́мая, Невече́рняго Све́та Роди́тельнице.

Ра́дуйся, огне́м Твои́х моли́тв челове́ки от страсте́й очища́ющая;

ра́дуйся, росо́ю Твоея́ благода́ти пла́мень гее́нны охлажда́ющая.

Ра́дуйся, о́блаче Све́та Боже́ственнаго, вся́кое помраче́ние разоря́яй;

ра́дуйся, благоуха́нное кади́ло, моли́твы ве́рных к Сы́ну Твоему́ вознося́щее.

Ра́дуйся, Небе́сный киво́те, от превы́шних к земны́м пренесе́нный;

ра́дуйся, огнеобра́зный престо́ле, Небе́сному Царю́ на земли́ угото́ванный.

Ра́дуйся, ски́нию Дави́дову па́дшую возста́вившая;

ра́дуйся, превы́шний Иерусали́м Небе́сный на земли́ яви́вшая.

Ра́дуйся, пречестну́ю багряни́цу от крове́й Твои́х А́гнцу Бо́жию приугото́вившая;

ра́дуйся, Боготка́нную порфи́ру Сло́ву Бо́жию от пло́ти Твоея́ истка́вшая.

Ра́дуйся, Пречи́стая, весь мир рождество́м Свои́м возвесели́вшая.

Конда́к 7

Хотя́й долготерпели́вый Госпо́дь яви́ти бе́здну человеколю́бия Своего́ к па́дшему дре́вле в раи́ ро́ду челове́ческому, даде́ та́мо прароди́телем на́шим обетова́ние, я́ко се́мя жены́ сотре́т главу́ зми́я, в после́дняя же времена́ испо́лни на Тебе́, Пречи́стая, первообетова́ние Свое́, избра́в Тя Еди́ну от всех родо́в в Ма́терь Себе́, да рождество́м Твои́м сотре́ши главу́ дре́вняго зми́я, сего́ ра́ди благода́рственно воспое́м Бо́гу: Аллилу́ия.

И́кос 7

Но́вая стра́шная и чу́дная та́инства Твоя́, Богоро́дице, и но́вый яви́лся есть Исто́чник жи́зни вме́сто Е́вы чу́вственныя: та бо, повину́вшися зми́ю, нача́ло положи́ отвраще́ния лица́ Бо́жия от челове́к и печа́ль роди́ жена́м. Твой же Сын, о Де́во, И́же Е́вину утро́бу осуди́ ражда́ти ча́да в боле́знех, во Твое́ чре́во всели́ся безболе́зненно, ключи́ де́вства невреди́вый в рождестве́ Твое́м. Сего́ ра́ди Тобо́ю ра́дуется па́дшее челове́ческое естество́, вме́сто дре́вния кля́твы свобо́ду Христо́ву получи́вше: Тебе́ после́дующа, жены́ я́ве враги́ побежда́ти начина́ют, де́вства держа́щася и вопию́ща Тебе́ такова́я:

Ра́дуйся, Боже́ственною сла́вою преукраше́нная;

ра́дуйся, чистото́ю де́вства превознесе́нная.

Ра́дуйся, па́дшее челове́ческое естество́ обожи́вшая;

ра́дуйся, жен от дре́вния печа́ли свободи́вшая.

Ра́дуйся, красото́ю де́вства Твоего́ Гаврии́ла удиви́вшая;

ра́дуйся, пресве́тлою чистото́ю Твое́ю А́нгельския собо́ры неизмери́мо превозше́дшая.

Ра́дуйся, две́ре непроходи́мая, Еде́м заключе́нный отве́рзшая;

ра́дуйся, кни́го запечатле́нная, недове́домыя та́йны Бо́жия вмести́вшая.

Ра́дуйся, благоуха́нный кри́не де́вства;

ра́дуйся, неувяда́емый цве́те чистоты́.

Ра́дуйся, Небе́сное де́вство на земли́ насади́вшая;

ра́дуйся, две́ри ра́йския па́дшим отве́рзшая.

Ра́дуйся, Пречи́стая, весь мир рождество́м Свои́м возвесели́вшая.

Конда́к 8

Стра́нное рождество́ Твое́ от непло́дове ви́дяще сла́сти неприча́стное, но от целому́дрия и воздержа́ния просия́вшее, устрани́мся су́етнаго ми́ра, и вся́каго нецелому́дрия душе́внаго и теле́снаго, умы́ и сердца́ на Небеса́ прело́жше. На сие́ бо пришла́ еси́ в ми́р, Ма́ти целому́дрия, да ни́жняя возведе́ши к го́рней высоте́, и да научи́ши всех чи́стыми усты́ и нескве́рным се́рдцем воспева́ти Бо́гу: Аллилу́ия.

И́кос 8

«Вся добра́ еси́, бли́жняя Моя́, и поро́ка несть в Тебе́. Воста́ни, прииди́, Голуби́це Моя́, яви́ Ми зрак Твой и услы́шан сотвори́ Ми глас Твой, я́ко глас Твой сла́док и о́браз Твой красе́н. Еди́на еси́ ма́тере Твоея́, избра́нна еси́ роди́вшей Тя», — та́ко глаго́лаше Сын Твой и Госпо́дь, Пречи́стая, срета́я е́же от непло́дове рождество́ Твое́. Сему́ Боже́ственному гла́су вне́млюще, дерза́ем воспева́ти Тебе́ такова́я:

Ра́дуйся, Цари́це, одесну́ю Царя́ Христа́ предста́вшая;

ра́дуйся, Влады́чице, в ри́зы позлаще́ны де́вства оде́янная и преукраше́нная.

Ра́дуйся, Ея́же добро́ты возжела́ Царь Небе́сный;

ра́дуйся, И́мже бли́жнею и до́брою в жена́х нарече́на была́ еси́.

Ра́дуйся, восходя́щая от пусты́ни, я́ко о́блак ды́ма, сми́рну и лива́н кадя́й;

ра́дуйся, ми́ро излия́нное, благоуха́ние от Небе́снаго Мирова́рца износя́щее.

Ра́дуйся, вертогра́де заключе́нный, в него́же никто́же возмо́жет взы́ти;

ра́дуйся, кла́дезю запечатле́нный, от его́же глубины́ никто́же возмо́жет испи́ти.

Ра́дуйся, блиста́ющаяся, я́ко у́тро, во тьме седя́щим;

ра́дуйся, восходя́щая, я́ко луна́, избра́нная, я́ко со́лнце.

Ра́дуйся, исто́чниче воды́ живо́тныя, приснотеку́щия от Престо́ла Бо́жия;

ра́дуйся, дре́во жи́зни, присноцвету́щее посреде́ рая́.

Ра́дуйся, Пречи́стая, весь мир рождество́м Свои́м возвесели́вшая.

Конда́к 9

Вся́кое естество́ А́нгельское ра́достию возра́довася, прославля́юще Бо́га, егда́ по рождестве́ Твое́м, Пречи́стая, святи́тель вели́кий со иере́и и людьми́ избра́нными прии́де в дом роди́телей Твои́х, моли́твы благода́рственныя возсыла́юще. Егда́ же благослови́ Тя, воздви́же глас свой, глаго́ля: "Бо́же оте́ц на́ших, благослови́ младе́нца сего́ и да́руй Ей и́мя, да бу́дет просла́влено во вся ро́ды". И нарече́ Тебе́ и́мя Мари́я, вели́кое и благода́тное, лю́дем пресла́достное, де́моном же стра́ха испо́лнено, и возопи́ с весе́лием: Аллилу́ия.

И́кос 9

Вети́и многовеща́ннии, я́ко ры́бы безгла́сныя, недоумева́ют, ка́ко воспе́ти Твою́ равноа́нгельскую от младе́нческих пеле́н чистоту́, Пречи́стая, ю́же дарова́ Ти Госпо́дь, да предста́вит Тя Ма́терь Свою́, не иму́щу скве́рны, или́ поро́ка, или́ не́что от таковы́х, но да бу́деши свя́та и непоро́чна. Сего́ ра́ди ма́ти Твоя́ со тща́нием соблюда́ше Тя в непоро́чней чистоте́, да ника́коже одушевле́нному киво́ту Бо́жию ко́снется рука́ скве́рных: та бо освяти́ ло́же Твое́ и себе́ саму́ отчужда́ше от вся́кия скве́рны и призва́ чи́стыя де́вы храни́ти поко́й Твой. И егда́ сосца́ми пита́ше Тя, моли́тву де́яше, да с млеко́м ма́терним наипа́че напита́ешися Бо́жиим сло́вом. Такове́й непоро́чней чистоте́ Твое́й чудя́щеся, вопие́м Ти си́це:

Ра́дуйся, от младе́нчества Твоего́ ни еди́наго греха́ позна́вшая;

ра́дуйся, от рождества́ Твоего́ всех святы́х святе́йшая.

Ра́дуйся, моли́твою па́че млека́ отдое́ная;

ра́дуйся, сло́вом Бо́жиим па́че хле́ба насыще́нная.

Ра́дуйся, Небе́сное произраста́ние, на земли́ насажде́нное;

ра́дуйся, ра́йское прозябе́ние, от роди́телей Твои́х воспита́нное.

Ра́дуйся, чи́стая Голуби́це, Ея́же чистоты́ не бе досто́ин мир весь;

ра́дуйся, нескве́рная А́гнице, Ея́же непоро́чность яви́ Ю́ досто́йну Ма́терь Христу́.

Ра́дуйся, ма́нием Вседержи́теля от непло́дове плод возсия́вшая;

ра́дуйся, досто́йное Твоея́ чистоты́ рождество́ восприя́вшая.

Ра́дуйся, я́ко от восто́к со́лнца до за́пад хва́льно и́мя Твое́;

ра́дуйся, я́ко от всех родо́в благослове́нна Ты в жена́х.

Ра́дуйся, Пречи́стая, весь мир рождество́м Свои́м возвесели́вшая.

Конда́к 10

Спасти́ хотя́й мир от пре́лести вра́жия, Человеколю́бец Госпо́дь избра́ Тя от земна́го ро́да, от ма́лаго гра́да и от непло́дныя утро́бы в Ма́терь Себе́, от ве́ка предопределе́нную, проро́ки же дре́вле пропове́данную, Хода́таицу бы́ти на́шего спасе́ния, да бу́деши печа́льным и в беда́х су́щим ско́рое утеше́ние и мирска́го непло́дства разреше́ние, всем же во мра́це греха́ блужда́ющим да яви́ши Со́лнце пра́вды Христа́, во е́же пе́ти Ему́: Аллилу́ия.

И́кос 10

Стена́ еси́ и прибе́жище всем челове́ком, Богоро́дице Де́во, Твое́ рождество́ пра́зднующим: Ты бо от черто́га ма́лаго град Бо́жий су́щая, е́же бы́ти начина́еши, и от утро́бы неражда́ющия исхо́д соверша́еши, да угото́ваеши вход Святи́телю Вели́кому: Еди́н бо Бог Тобо́ю про́йде стра́нною стезе́ю, неопа́льну Тя сохрани́в. Сего́ ра́ди со дерзнове́нием зове́м Ти, еди́ней чи́стей и благослове́нней, такова́я:

Ра́дуйся, на Небесе́х преблагослове́нная;

ра́дуйся, на земли́ препросла́вленная.

Ра́дуйся, А́нгелов ра́досте и увеселе́ние;

ра́дуйся, земноро́дным отра́до и утеше́ние.

Ра́дуйся, Го́рлице богогла́сная и незло́бивая;

ра́дуйся, Ю́нице кро́ткая и ти́хая.

Ра́дуйся, Ду́ха Всесвята́го хра́ме святе́йший;

ра́дуйся, Небе́снаго уневе́щения черто́же чисте́йший.

Ра́дуйся, росо́ Аермо́нская, на го́ры Сио́нския соше́дшая;

ра́дуйся, алава́стре ми́ра многоце́ннаго, зе́млю облагоуха́вший.

Ра́дуйся, гра́де Бо́жий, от черто́га ма́лаго прозябе́ние;

ра́дуйся, в Назаре́те гра́де от су́ха ко́рене произраста́ние.

Ра́дуйся, Пречи́стая, весь мир рождество́м Свои́м возвесели́вшая.

Конда́к 11

Пе́ние благода́рственное воспева́ют ду́хом Иоаки́м чу́дный и пра́ведная А́нна, я́ко ви́деша на земли́ Ма́терь Созда́теля, Ю́же роди́ша, Дщерь Мари́ю. С ни́ми же и мы, Влады́чице, равночи́сленныя песка́ морска́го пе́сни прино́сим Ти, восхваля́юще пресла́вное от непло́дных ложе́сн рождество́ Твое́, благода́рственно воспева́юще Бо́гу: Аллилу́ия.

И́кос 11

Светоприе́мную свещу́, в нощи́ богоневе́дения рождество́м Твои́м пресла́вно возжже́нную, ви́дим Тя, Пресвята́я Де́во: всем бо во тьме греха́ и се́ни сме́ртней седя́щим возсия́ла еси́ свет, ра́дость, благода́ть и разреше́ние дре́вния кля́твы, Е́вы ра́ди бы́вшия: из Тебе́ бо возси́я Со́лнце пра́вды Христо́с Бог наш, просвеща́яй су́щия во тьме, вопию́щия в похвалу́ Тебе́ такова́я:

Ра́дуйся, заре́ дне невече́рняго, врата́ Ца́рствия Христо́ва отве́рзшая;

ра́дуйся, денни́це светле́йшая, спасе́ние нам возвести́вшая.

Ра́дуйся, звездо́ незаходи́мая, Вели́кое Со́лнце в мир сей вводя́щая;

ра́дуйся, свеще́ светоза́рная, дре́внюю тьму грехо́вную разгоня́ющая.

Ра́дуйся, исто́чниче живоно́сный, жизнь всем подаю́щий;

ра́дуйся, свети́льниче, пре́жде со́лнца Свет нам источи́вший.

Ра́дуйся, еще́ су́щей тьме, заря́ми благода́ти нас просвети́вшая;

ра́дуйся, Ма́ти Све́та у́мнаго, благода́тию всю вселе́нную озари́вшая.

Ра́дуйся, Неве́сто черто́га светосия́ннаго;

ра́дуйся, сия́нием ри́зы Своея́ всю поднебе́сную облиста́вшая.

Ра́дуйся, Же́но, облече́нная в со́лнце, в мир на спасе́ние погиба́ющим я́вльшаяся;

ра́дуйся, под нога́ма Свои́ма луну́ иму́щая, от двоюна́десяте звезд увенча́нная.

Ра́дуйся, Пречи́стая, весь мир рождество́м Свои́м возвесели́вшая.

Конда́к 12

Благода́ти тезоимени́тая блаже́нная А́нна весели́тся и хва́лящися вопие́т: "Непло́ды су́щи, роди́х Бо́жию Ма́терь, Ея́же ра́ди осужде́ние Е́вино разреши́ся и я́же в печа́лех боле́знь". И та́ко ра́дующися, даде́ обе́т привести́ Дщерь свою́ ро́ждшуюся Бо́гови, да бу́дет Ему́ в дар соверше́н от всех родо́в земны́х, челове́ком же в ве́чное утеше́ние и ра́дование, во е́же пе́ти им вы́ну: Аллилу́ия.

И́кос 12

Пое́м Твое́ пречи́стое рождество́, чтим и несказа́нное зача́тие, покланя́емся са́мым пелена́м Твои́м, Неве́сто Богозва́нная и Де́во; славосло́вят же с на́ми вку́пе Твое́ в мир прише́ствие А́нгелов и Арха́нгелов чи́ни и душ святы́х собо́ри: о́бщая бо ра́дость возсия́ на Небеси́ и на земли́ от пра́ведных Иоаки́ма и А́нны рождество́м Твои́м, Богоро́дице, его́же прославля́юще, вопие́м Ти такова́я:

Ра́дуйся, Всенепоро́чная, по Святе́й Тро́ице о́бщая всех А́нгел и челове́к Влады́чице;

ра́дуйся, Всеблагослове́нная, по Уте́шители о́бщая всех на Небеси́ и на земли́ Уте́шительнице.

Ра́дуйся, красото́ в десни́це Госпо́дни, украша́ющая блажа́щих Тя всех Небе́сных;

ра́дуйся, утеше́ние Вседержи́телево, возвеселя́ющее призыва́ющих Тя всех земны́х.

Ра́дуйся, не́бо небе́с, вся А́нгельския си́лы без сравне́ния превосходя́щее;

ра́дуйся, чу́до чуде́с, всех челове́ков персть в Те́ло Бо́жие созида́ющее.

Ра́дуйся, Цари́це цари́ц, всей вселе́нней преде́л соде́ловавшая грехо́вному растле́нию;

ра́дуйся, свята́я святы́х всей Це́ркве Христо́вы, нача́ло положи́вшая на́шему спасе́нию.

Ра́дуйся, Боголе́пная Деви́це, всех време́н и веко́в Бо́жие благослове́ние;

ра́дуйся, Богоизбра́нная Отрокови́це, всех язы́к и родо́в благода́тное примире́ние.

Ра́дуйся, сто́лпе де́вства, всем де́вства жела́ющим добро́ту де́вства я́ве низпосыла́ющая;

ра́дуйся, две́ре спасе́ния, всем спасе́ния ча́ющим по́мощь вско́ре подаю́щая.

Ра́дуйся, Пречи́стая, весь мир рождество́м Свои́м возвесели́вшая.

Конда́к 13

О всепе́тая Ма́ти, от непло́дове ро́ждшаяся на спасе́ние ми́ру, ны́нешняя на́ша о всечестне́м рождестве́ Твое́м прие́мши приноше́ния, не оста́ви нас во вре́мя живота́ на́шего, от вся́кия напа́сти и пле́на вра́жия изба́ви нас и от непло́дства душе́внаго разреши́ всех, о Тебе́ вопию́щих: Аллилу́ия.

Сей конда́к глаго́лется три́жды.
И па́ки чте́тся и́кос 1-й, и конда́к 1-й.

Моли́тва

О Пресвята́я и Богоизбра́нная Де́во, Влады́чице на́ша Богоро́дице, Небеси́ и земли́ Цари́це, на ра́дость и утеше́ние всему́ ми́ру от безпло́дных и безча́дных роди́телей Бо́гом дарова́нная! Роди́вшися Бо́жиим Промышле́нием, Ты разреши́ла еси́ непло́дствие ро́ждшия Тя, и ны́не непло́дная сердца́ на́ша плодоно́сна сотвори́ предста́тельством Твои́м у Престо́ла Вседержи́телева, непло́дствовати же соде́лай ны злы́ми де́лы, гнилы́ми словесы́ и нечи́стыми помышле́ньми. О Всеблаже́нная, да яви́мся ча́да Бо́жия, доброде́телей благопло́дие при́сно принося́щая. Ты утоли́ла еси́ пречи́стым рождество́м Твои́м плач прама́тере на́шея Е́вы и пра́ведныя роди́тели Твоя́ изба́вила еси́ поноше́ния безча́дства, и ны́не утоли́ плач и воздыха́ния многоболе́зненных душ на́ших и изба́ви всех нас поноше́ния злых дел на́ших, страсте́й безче́стия и вся́каго порабоще́ния вра́жескаго. Наипа́че же да́руй нам, Пресвята́я Богоро́дице Де́во, во всесве́тлый день Рождества́ Твоего́ чи́стым се́рдцем разуме́ти и па́мятовати, с коли́кою ра́достию и благодаре́нием непло́дная утро́ба святы́я пра́ведныя А́нны ноша́ше Тя, да и мы не то́чию словесы́, но наипа́че де́лы свои́ми вы́ну бу́дем со умиле́нием серде́чным прославля́ти Тя, вопию́ще: сла́ва рождеству́ Твоему́, Чи́стая; сла́ва де́вству Твоему́, Ма́ти Безневе́стная. Ку́пно же с Тобо́ю сподо́би нас непреста́нно сла́вити и велича́ти Всесвяты́й Плод Твой, Сло́во воплоще́нно, Ему́же сла́ва подоба́ет, честь и поклоне́ние, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.