Служба священномученику Петру, архиепископу Воронежскому
Ме́сяца января́ в 25-й день
Священному́ченика Петра́, архиепи́скопа Воро́нежскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 4:
Прииди́те, хвалу́ воздади́м Го́сподеви Бо́гу на́шему,/ па́мять святи́теля Его́ прославля́юще,/ служи́теля ве́рна, па́стыря непоро́чна,/ испове́дника и му́ченика Христо́ва тве́рда:/ той бо, сло́во Госпо́дне соблю́д,/ вся до конца́ претерпе́/ и Це́ркви Ру́сстей похвала́ и сла́ва яви́ся./ Его́же мо́щи святы́я лобыза́юще,/ моли́тву к нему́ простира́ем:/ огради́ нас, священному́чениче Пе́тре, заступле́нием твои́м// и испроси́ нам у Го́спода ве́лию ми́лость.
От младе́нства позна́в Христа́, богоблаже́нне,/ во́лю свою́ Тому́ предаде́,/ на ка́мени за́поведей Его́ вся созида́я:/ те́мже ка́мень ве́ры Христо́вы во дни гоне́ний яви́лся еси́,/ первоверхо́вному апо́столу Госпо́дню подобообра́зен быв./ Моли́ся, архиере́ю Бо́жий, не оскуде́ти ве́ре на́шей// и Правосла́вию сохрани́тися в земли́ на́шей.
Защи́тителю Це́ркве Правосла́вныя,/ наро́да ру́сскаго, скорбьми́ обурева́емаго, уте́шителю,/ в час лю́тых испыта́ний тве́рдо Христа́ испове́дал еси́,/ священному́чениче сла́вне Пе́тре,/ заступи́ и ны́не сро́дники твоя́/ те́плою твое́ю к Бо́гу моли́твою,/ уте́ши стра́ждущия ду́ши на́ша// и от ра́спрей и раско́лов Це́рковь Ру́сскую благонаде́жно огради́.
И́ны стихи́ры, глас 5:
Боже́ственней слу́жбе зело́ прилежа́, священноде́йствителю,/ со благогове́нием ве́лиим Престо́лу Госпо́дню предстоя́л еси́,/ о всем ми́ре же́ртву благоприя́тну Бо́гу принося́,/ и моли́твою твое́ю благомо́щною укроти́ти преще́ние Бо́жие умоля́л еси́,// на ми́лость к па́дшим созда́нием Го́спода приклоня́я.
Па́стырь до́брый яви́лся еси́, о́тче Пе́тре,/ на па́жити доброде́телей ева́нгельских воспитова́я па́ству свою́/ и глаго́лом Боже́ственным ра́достно внима́я,/ о ко́емждо овча́ти душе́ю боле́зновал еси́./ Испроси́ у Го́спода, моли́твенниче боголюбе́зне,/ Оте́честву на́шему мир и благоде́нствие,/ ве́рным лю́дем на враги́ ви́димыя и неви́димыя одоле́ние,// и душа́м на́шим спасе́ние.
В ми́ре ско́рбни бу́дете, рече́ Госпо́дь,/ предвозвеща́я ра́дость Небе́сную./ Сие́ вои́стину на тебе́ испо́лнися, священному́чениче,/ я́ко ско́рби мно́гия о Го́споде,/ я́же претерпе́л еси́ в житии́ твое́м,/ в ра́дость ве́чную души́ твое́й преложи́шася./ Испроси́, страстоте́рпче, и нам/ си́лу вся за Христа́ претерпе́ти,// и спасе́ние душа́м стяжа́ти.
Моли́тва пла́менная се́рдцу твоему́ усво́ися, досточу́дне,/ си́лу и кре́пость ти содева́ющи,/ му́дрость ду́ху твоему́ и любо́вь Боже́ственную да́рующи,/ те́мже трудо́в изря́дных де́латель показа́лся еси́,/ и ны́не на Небесе́х моле́нием твои́м// вся ко спасе́нию благопотре́бная нам испроси́.
Сла́ва, глас 2:
Па́ству Воро́нежскую/ от поруга́ния и разделе́ния ре́вностно храни́л еси́, святи́телю,/ и Оте́честву твоему́ в годи́ну лю́тую ве́рен до конца́ яви́лся еси́./ На вся́ком же ме́сте служе́ния твоего́, достоблаже́нне,/ вся укрепля́л еси́ словесы́ ве́чными пропове́дания Христо́ва,/ се́рдце испо́лнено любве́ лю́дем простира́я:/ мно́зем бо градо́м и ве́сем/ святи́тельство твое́ ко утвержде́нию во и́стине послужи́ло есть./ Те́мже и ото́ком Солове́цким, кро́вию му́чеников но́вых напое́нным,/ иде́же вене́ц му́ченический чу́дному житию́ твоему́ сплете́н бысть,// архипа́стырь нарече́ся.
И ны́не, Богоро́дичен: Пре́йде сень зако́нная:
Вход. Проки́мен дне. И чте́ния 3 му́ченическая.
На лити́и стихи́ра хра́ма, и священному́ченика, глас 7:
Пропове́дника изя́щнаго/ и священнотаи́нника Христо́ва пе́сньми восхва́лим:/ той бо, песнь воспева́я своему́ Влады́це,/ пла́мень се́рдца в поуче́ниих о́гненных излива́л есть,/ возжига́я ду́ши ве́рою/ и собира́я ста́до Бо́жие, от неве́рных расхища́емое./ Те́мже моли́твою твое́ю укрепи́, святи́телю,/ ве́рныя, собла́знами ве́ка сего́ смуща́емыя,/ и враги́ ви́димыя и неви́димыя прожени́// си́лою Боже́ственнаго Ду́ха.
Осужде́ние прие́м судо́м непра́ведным и беззако́нным,/ в вы́шних оправда́ние обре́л еси́, блаже́нне./ Дерзнове́ние ве́лие име́я ко Влады́це,/ оправда́нием Госпо́дним научи́ ны, избра́нниче Христо́в,/ да, во и́стинных путе́х ходи́ти тща́щеся,// Того́ благоутро́бием всеми́лостивно оправди́мся.
Сла́ва, глас 1:
Исполне́ние любве́ Христо́вы стяжа́л еси́, боголюбе́зне,/ устна́ма пра́ведныма и се́рдцем непоро́чным Го́спода испове́дуя,/ пра́во пра́вил еси́ сло́во и́стины,/ си́лу вра́жию безстра́шно сокруша́я./ Те́мже на спасе́ния стези́ наста́ви нас, святи́телю,// и в Ца́рствие Бо́жие прему́дре упра́ви.
И ны́не, Богоро́дичен, глас то́йже:
Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во,/ спаси́ ны, и́же к Тебе́ прибега́ющия:/ я́ко на Тя упова́ние по Бо́зе,// Богоро́дице, возложи́хом.
На стихо́вне стихи́ры, глас 1:
Ве́ру Христо́ву пропове́дуя, апо́столом подобообра́зен был еси́,/ и ча́шу страда́ний, по словеси́ Госпо́дню,/ я́коже ти́и, да́же до конца́ испи́вый,/ венце́м нетле́нным со о́ными увенча́лся еси́, архипа́стырю,/ и, досто́йно прие́м Небе́сную сла́ву,// украше́ние Це́ркве Ру́сския яви́лся еси́.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
К высоте́ святи́тельстей му́ченичества добро́ту приложи́л еси́/ и испове́дничества красото́ю посреде́ тьмы неве́рия в земли́ на́шей возсия́л еси́,/ победи́вый си́лу вра́жию И́менем Христа́, сме́рти Победи́теля,/ и себе́ не пощади́л еси́ ра́ди Живу́щаго во ве́ки,/ те́мже блаже́нства ве́чнаго от Того́ сподо́бился еси́,// Пе́тре достоблаже́нне.
Стих: Честна́ пред Го́сподем// смерть преподо́бных Его́.
О сла́ве фаво́рстей незаходи́мей ду́хом пламене́я,/ Голго́фы Госпо́дни о́браз в се́рдце при́сно носи́л еси́, страстоте́рпче,/ в Голго́фе А́нзерстей кончи́ну му́ченическую прия́ти сподо́бился еси́,/ е́юже, спаси́тельную же́ртву Христо́ву пропове́дав,// Кро́вию А́гнчею убели́л еси́ ри́зы своя́.
Сла́ва, глас 8:
О́браз Христа́ воскре́сшаго/ пред очи́ма души́ твоея́/ при́сно име́л еси́, святи́телю,/ и глаго́лы испыту́ющия Госпо́дни: лю́биши ли Мя,/ к первоверхо́вному апо́столу рече́нныя,/ в се́рдце твое́м благогове́йно храни́л еси́./ Си́ми словесы́ к подвиго́м ве́ры воздвиза́емь,/ ре́вностию ве́лиею по Бо́зе распаля́лся еси́,/ те́мже упаси́ ду́ши на́ша, па́стырю святы́й, о́тче Пе́тре,/ да не погубя́т нас хи́щныя стра́сти,// и от Го́спода да не отлуча́т во ве́ки.
И ны́не, Богоро́дичен: Безневе́стная Де́во:
Тропа́рь, глас 4:
Ве́рою пла́менною апо́столу Петру́ подо́бяся,/ ра́достию страда́ния за Христа́ претерпе́ти изво́лил еси́,/ святи́телю о́тче Пе́тре,/ ка́меню тве́рдый Це́ркве Правосла́вныя,/ со испове́дники и страстоте́рпцы ру́сскими во мра́це беззако́ний доброде́тельми сия́яй,/ моли́ся с ни́ми о нас,// архиере́ю Бо́жий, священному́чениче пресла́вне.
НА У́ТРЕНИ
По 1-м стихосло́вии седа́лен, глас 3:
Егда́ Ца́рствие Бо́жие возвеща́л еси́ велегла́сно,/ проника́я вну́тренняя челове́ков о́гненными словесы́,/ в пла́мене души́ твоея́ ражда́ющимися,/ в Ду́се Свя́те и́стину Христо́ву лю́дем пропове́дал еси́, о́тче Пе́тре,/ се бо дар апо́стольскаго благове́стия чу́дно в тебе́ яви́ся.
Сла́ва, и ны́не, Богоро́дичен, глас то́йже:
Немо́лчная уста́ апо́столом,/ си́ла духо́вная святи́телем,/ Мари́е, Ма́ти Бо́жия,/ вся́цей души́, тружда́ющейся Бо́гу, Предста́тельница Благода́тная,/ немоту́ нечу́вственных душ на́ших разреши́,/ благоуха́нием Боже́ственнаго Ду́ха исполня́ющи,/ да от се́рдца избыва́юще моли́твенными воздыха́нии,/ устна́ма ра́дости хвалу́ Госпо́дню возвеща́ем неуста́нно.
По 2-м стихосло́вии седа́лен, глас 8:
Ду́шу свою́ не прия́л еси́ всу́е, святи́телю,/ николи́же в беззако́ния ру́це свои́ простира́я,/ свят житие́м твои́м яви́лся еси́, преподо́бне,/ тем и же́ртва твоя́ свя́та Бо́гу бысть,/ И́же от горы́ кра́ниевы прие́м ю́ непоро́чну,/ в го́ру Боже́ственную Свою́ возведе́ тя,/ в приосене́нныя ча́щи Небе́сныя сла́вы.
Сла́ва, и ны́не, Богоро́дичен, глас то́йже:
Печа́лей утоле́ние,/ скорбе́й отгна́ние яви́лася еси́, Влады́чице Пречи́стая,/ ра́дости Небе́сныя нело́жное обетова́ние,/ печа́ль и скорбь земну́ю святи́теля Петра́ наве́ки утоли́вшая/ и во о́бласть ра́дости приснотеку́щия того́ прие́мшая./ Печа́ли души́ моея́ всеще́дрою добро́тою Твое́ю утоли́, молю́ Тя,/ наше́ствия творя́щих ей боле́знь изба́ви/ и от огня́ ве́чнаго неврежде́нну сохрани́.
Велича́ние:
Велича́ем тя,/ священному́чениче Пе́тре,/ и чтим честна́я страда́ния твоя́,/ я́же за Христа́// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́ и прииди́, во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся, я́ко о́вцы заколе́ния.
Кре́пость моя́ и пе́ние мое́ Госпо́дь и бысть мне во спасе́ние.
По полиеле́и седа́лен, глас 8:
Христа́ распя́таго еди́ным Го́сподем и Бо́гом испове́дуя,/ во вну́тренних души́ твоея́ о́браз Его́ свя́то соблюда́л еси́, священному́чениче Пе́тре,/ до часа́ сме́ртнаго креста́ твоего́ не оставля́я, страстоте́рпче,/ и я́ко а́гнец заколе́ния вмени́лся еси́,/ вся побежда́я си́лою Возлю́бльшаго тя./ Сего́ ра́ди ото́ка А́нзерскаго освяще́ние и Це́ркве Ру́сския похвала́ высо́кая яви́лся еси́.
Сла́ва, и ны́не, Богоро́дичен, глас то́йже:
Предста́тельнице те́плая и Засту́пнице усе́рдная,/ в годи́ну безбо́жия от коне́чныя поги́бели зе́млю Ру́сскую/ всемо́щным хода́тайством к Сы́ну Твоему́ изба́вльшая,/ и ны́не не оста́ви нас моли́твами Твои́ми,/ Влады́чице Богоро́дице.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Из глубины́ взыва́л еси́ ко Го́споду, священному́чениче:/ гото́во се́рдце мое́, Бо́же, гото́во се́рдце мое́,/ по во́ли Твое́й сотвори́ со мно́ю./ Сего́ ра́ди благода́тию в тебе́ животворя́щею/ не себе́ живя́ше, о́тче, но Влады́це и Творцу́ твоему́,/ вся ко спасе́нию ста́да Христо́ва му́дрствуя и де́я./ Престо́лу сла́вы Бо́жия ны́не предстоя́, преподо́бне,/ моли́ Боже́ственною ми́лостию избра́нных ча́сти нам сподо́битися// и мзду ве́рных восприя́ти в день пра́веднаго воздая́ния.
Кано́н священному́ченика, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.
Сло́во прему́дрости Госпо́дни испроси́вше,/ просла́вим по достоя́нию ди́внаго в ли́це святы́х Петра́ достоблаже́ннаго,/ святи́теля, му́ченика же и испове́дника,/ во дни гоне́ния по́двигом до́брым просия́вшаго/ и зало́г Христо́в до после́дняго издыха́ния неврежде́нно сохра́ньшаго.
От ю́ности благонра́вными роди́тели твои́ми благоче́стию науча́емь,/ о́браз Христо́в любо́вию в се́рдце твое́м носи́л еси́, свя́те Пе́тре,/ та́же и, доброде́телем ева́нгельским подража́ти тща́ся,/ в стра́се Бо́жии возраста́л еси́.
Чи́стым се́рдцем да́ры благода́ти во мно́жестве прие́м,/ предызбра́ние твое́ от Бо́га оправда́л еси́, святи́телю,/ пра́востию же ду́ха и дея́ний угоди́в Избра́вшему тя,/ вои́стину ца́рское свяще́ние яви́лся еси́.
Богоро́дичен: Спа́са и Изба́вителя во утро́бе де́вственней вмести́вшая, Животода́вца Ма́ти Чи́стая;/ к Тебе́ у́бо в моли́твах прибега́ем, Богоизбра́нная Мари́е,/ Твои́м предста́тельством к животу́ ве́чному упра́ви нас,/ во е́же спасти́ся нам.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.
Ре́вность Петро́ву по Бо́зе стяжа́в, святи́телю,/ соиме́нник тому́ достосла́вен яви́лся еси́/ и, я́коже той, в лови́тву спасе́ния Бо́жия челове́ки управля́л еси́,/ воспреща́я си́лам вра́жиим, хотя́щим ду́ши людски́я погуби́ти.
Учи́тель духо́вный и нача́льник оби́телем и́ноческим был еси́, достоблаже́нне,/ благоче́стию и́стинному неле́ностне науча́я,/ и, во́ины росси́йския во бране́х ми́лостивно утеша́я,/ пропове́дник ре́вностный Сло́ва Бо́жия яви́лся еси́,/ пита́я ду́ши от жи́тницы Христо́вы.
Жезл святи́тельский от десни́цы Ти́хона Святе́йшаго,/ Первопресто́льника Росси́йскаго и испове́дника сла́внаго,/ досто́йно восприя́л еси́, блаже́нне Пе́тре,/ и, си́лою свы́ше оболки́йся, ни́вы Христо́вы де́латель му́дрый яви́лся еси́,/ плод творя́ в терпе́нии и Творца́, Господи́на жа́твы, воспева́я немо́лчно.
Богоро́дичен: Приклони́ благоутро́бие Царя́ Небе́снаго к нам, гре́шным, Пресвята́я Де́во,/ и душ на́ших ху́дость обнови́ всеси́льною держа́вою Твое́ю,/ тех стро́потная покая́нием исправля́ющи и доброде́тельми исполня́ющи,/ да Ца́рству Бо́жию, прише́дшу в си́ле,/ угото́виши их неврежде́нны.
Седа́лен, глас 2:
Ве́руяй в Мя, рече́ Госпо́дь, дела́, я́же Аз творю́, и той сотвори́т./ Те́мже ве́ра твоя́ ве́лия, святи́телю Пе́тре, и сло́во, е́же со вла́стию/ мно́ги заблу́ждшия, преда́ния церко́вная отве́ргшия и ло́жными нововвожде́ньми прельсти́вшияся/ в Це́рковь Правосла́вную па́ки приведо́ша./ Сего́ ра́ди вопие́м ти:/ моли́ся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, Богоро́дичен, глас то́йже:
Блаже́нство и́стинныя ве́ры явля́еши нам, Богоро́дице,/ Твое́ю благода́тию ве́ру нам приложи́, Пренепоро́чная,/ терпе́нием снабдева́ющи,/ я́ко да вся возмо́гше ве́рою/ и то́ю упова́ние спасе́ния иму́ще,/ услы́шим глас Небе́снаго Влады́ки глаго́люща:/ ве́ра ва́ша спасе́ вы.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.
Во дни богоборе́ний лю́тых яви́ Госпо́дь земли́ Ру́сстей ве́рныя служи́тели Своя́,/ и́же, стра́ха вра́жия не устраши́вшеся,/ ду́ши своя́ за о́вцы слове́сныя полага́ху,/ я́коже и Петр, священнострада́лец Солове́цкий,/ Небе́сному Архиере́ю подо́бяся.
Священному́чениче досточе́стне, святи́телю Моско́вскому Петру́ тезоимени́те,/ ты, жезл архипа́стырский прие́м,/ в вертогра́де Госпо́днем, я́коже о́ный, усе́рдно потруди́лся еси́, сло́во и́стины испpавля́я,/ се бо и́стинен Зва́вый тя, Пребыва́яй во ве́ки.
Слу́жбу Боже́ственную все́ю душе́ю возлюби́в, досточу́дне,/ со ве́лиим тща́нием сию́ благогове́йне соверша́л еси́/ и, ни еди́ному словеси́ слух се́рдца своего́ затворя́я,/ псалмопе́нию любо́вию навы́кл еси́.
Лю́дем ве́рным ра́дость приноси́л еси́,/ и́же, с тобо́ю вку́пе Бо́га славосло́вяще, утеше́ние в ско́рбех обрета́ху./ Ты же, и в заточе́нии сый, с соу́зники твои́ми же́ртву благодаре́ния Бо́гу приноси́л еси́,/ престо́л живы́й Трапе́зы Госпо́дни собо́ю явля́я.
Богоро́дичен: Я́ко боговмести́мое Жили́ще, Та́йне Сове́та Преве́чнаго послужи́ла еси́, Пречи́стая Де́во,/ Тобо́ю бо даде́ся нам Заве́та Но́ваго Пода́тель благ и кро́ток,/ любо́вию спаси́тельною зако́на сме́рти у́зы разруши́вый.
Песнь 5
Ирмо́с: Ты, Го́споди мой,/ Свет в мир прише́л еси́,/ Свет святы́й, обраща́яй из мра́чна неве́дения,// ве́рою воспева́ющия Тя.
Духо́вным о́ком созерца́яй Го́спода воскре́сшаго/ и серде́чным слу́хом вне́мляй Боже́ственным глаго́лом,/ сла́достию любве́ Христо́вы исполня́лся еси́, о́тче Пе́тре,/ и па́ству твою́ му́дре упра́вил еси́.
К тебе́, стяжа́вшему Христа́ в се́рдцы свое́м,/ мно́жество взыску́ющих Его́, я́ко ко вмести́лищу благода́ти Бо́жия, прихожда́ху/ и утеше́ние в ско́рбех во святы́ни любве́ твоея́ обрета́ху.
По́двиг и́ноческий всем се́рдцем возлюби́в,/ посту́ и моли́тве, терпе́нию и нестяжа́нию усе́рдно прилежа́л еси́, священному́чениче Пе́тре,/ Вы́шним же изволе́нием по́двиг ве́лий испове́дничества подъе́м,/ му́ченически житие́ твое́ на ото́це А́нзерстем сконча́л еси́.
Богоро́дичен: Богора́дованною душе́ю гла́су Арха́нгельскому вне́мшая/ и ра́дость ми́ру Христа́ несказа́нно ро́ждшая, Богоро́дице Мари́е,/ всех родо́в весе́лие яви́лася еси́, Влады́чице./ Простри́ над все́ми земноро́дными Покро́в Твой держа́вный/ и мене́ утеше́ния и ра́дования о Тебе́ сподо́би, Ма́ти Бо́жия,/ я́ко да ублажа́ю Тя.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.
Мно́гим уго́дником Бо́жиим собесе́дник бы́ти сподо́бился еси́, Пе́тре:/ ста́рцем оби́тели О́птинския и Диве́евским ста́рицам,/ та́же и вели́кому па́стырю Кроншта́дтскому Иоа́нну,/ и́хже наставле́ния и моли́твы/ в по́двизе кре́стнем тя укрепля́ху.
Тьма, в ню́же погрузи́ся земля́ Ру́сская отступле́нием от Бо́га и ве́ры ослабле́нием,/ не возмо́же объя́ти све́та Бо́жия, во и́стинных Его́ свети́льницех горя́щаго./ Ты же, священному́чениче Пе́тре, еди́н от сих избра́нных,/ учине́нных во мра́це беззако́ния пропове́дати Христа́ на спасе́ние мно́гим.
Благода́тию Бо́жиею и вели́чием ду́ха твоего́/ люде́й, во узи́лищах с тобо́ю су́щих, утеша́л еси́, присноблаже́нне,/ и, немо́лчныма устна́ма Христа́ пропове́дуя,/ из глубины́ неве́дения их возводи́л еси́/ и све́том И́стины просвеща́л еси́.
Богоро́дичен: Пресвята́я Влады́чице, Ма́ти Бо́га на́шего,/ Свет живота́ нам всесве́тло возсия́вшая,/ сподо́би нас по сло́ву Сы́на Твоего́/ мир и любо́вь между́ собо́ю име́ти/ и научи́ печа́ли на́ша на Го́спода возлага́ти,/ во е́же спасти́ся нам.
Конда́к, глас 8:
Во святи́тельстве твое́м до́бре подвиза́лся еси́, богому́дре,/ и му́ченичества венце́м све́тло украси́лся еси́,/ преще́ния враго́в Христо́вых не устраши́вся,/ страда́ньми твои́ми ото́ки Солове́цкия освяти́л еси́,/ сего́ ра́ди Си́лы Небе́сныя удиви́шася терпе́нию твоему́,/ мы же с ве́рою и любо́вию притека́ем ко святы́м моще́м твои́м, досточу́дне./ Ны́не со все́ми новому́ченики Це́ркве Ру́сския/ моли́ о нас Христа́ Бо́га, всеблаже́нне Пе́тре, да зове́м ти:/ Ра́дуйся, о́тче приснопа́мятне,// земли́ Воро́нежския в ве́ре утвержде́ние.
И́кос:
Соверше́н быв в ре́вности по Бо́зе и любви́ Боже́ственней, святи́телю,/ благода́тию ди́вная дела́ в простоте́ и кро́тости серде́чней соверша́л еси́,/ служи́телю Госпо́день и́стинен,/ и, по́двиг архипа́стырский со усе́рдием исполня́я,/ па́ству Христо́ву в Ду́се Бо́жии возраща́л еси́,/ си́лою же и чистото́ю ду́ха твоего́ вра́жиим си́лам противоста́в,/ свеща́ горя́щая во тьме безбо́жия яви́лся еси́, богоизбра́нне о́тче,/ и за Христа́ и ве́ру пра́вую гоне́ния и му́ки претерпе́л еси́./ Ники́ими же скорбьми́ от любве́ Бо́жия отлучи́вся,/ смерть Его́ ра́ди в приобре́тение себе́ вмени́л еси́/ и, вене́ц нетле́нен от Христа́ Бо́га в Ца́рствии Небе́снем восприе́м,/ священному́ченик и страстоте́рпец до́блий яви́лся еси́,/ Це́ркве Ру́сския ди́вная похвало́ и неувяда́емая сла́во./ Моли́ся о нас ко Го́споду, всеблаже́нне Пе́тре, да зове́м ти:/ Ра́дуйся, о́тче приснопа́мятне,/ земли́ Воро́нежския в ве́ре утвержде́ние.
Песнь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:// благослове́н еси́ в хра́ме сла́вы Твоея́, Го́споди.
Ве́лию любо́вь ко святи́телем Воро́нежским Митрофа́ну, Ти́хону и Анто́нию име́я,/ в ме́сте по́двигов святи́тельства их труд подъя́л еси́, достоблаже́нне Пе́тре,/ и гра́ду Воро́нежу ра́дость ве́лию яви́л еси́,/ утвержде́ние и благода́тную по́мощь подава́я.
В стеня́щем мо́ри безбо́жия земли́ Ру́сския,/ тве́рдый ото́к благода́ти яви́лся еси́, святи́телю Пе́тре,/ иде́же бо мно́жится грех, та́мо и благода́ть изоби́лует,/ излива́ющися ще́дро на спасе́ния ча́ющих.
Ре́вностию о до́ме Госпо́дни снеда́емь,/ отсту́пником, преда́ния церко́вная отверга́ющим/ и нововведе́ния льсти́вая вводя́щим, противоста́л еси́, о́тче Пе́тре,/ и, Предте́чевым гла́сом к покая́нию заблу́ждшия приводя́,/ мно́гия о́вцы во огра́ду церко́вную возврати́л еси́.
Богоро́дичен: Исто́чник любве́ Бо́жия/ испо́лни во оскудева́ющих сердца́х на́ших, Благода́тная Мари́е,/ теплото́ю Ма́терних Твои́х моли́тв согре́й хла́дность моле́ний на́ших/ и до конца́ не оста́ви нас,/ в ми́ре житие́ на́ше соблюда́ющи,/ и к Ца́рству Сы́на Твоего́ прему́дре нас уготовля́ющи.
Песнь 8
Ирмо́с: Ру́це распросте́р Дании́л,/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы взыва́юще:// благослови́те, вся дела́ Госпо́дня, Го́спода.
Мно́гажды искуше́ние темни́цею и у́зами прия́л еси́,/ от беззако́нник му́чимь бе боле́зньми и гла́дом, скорбьми́ и непра́вдами лю́тыми./ Оба́че стра́ха их не устраши́лся еси́, страстоте́рпче,/ и любо́вь твоя́ к Бо́гу николи́же преста́,/ страда́ния же твоя́ ве́ре твое́й утвержде́ние де́яху/ и му́ки безви́нныя дая́ху души́ возвыше́ние.
Во святы́х ото́цех Солове́цких верх подвиго́м твои́м обре́теся, священному́чениче,/ ты бо, зва́ние архиере́йское благогове́йно храня́ и заточе́нных в Бо́зе утвержда́я,/ архиепи́скоп Солове́цкий нарече́н бысть ве́рными соу́зники твои́ми, Пе́тре,/ я́коже и брат твой во Христе́, священному́ченик Иларио́н богоблаже́нный.
Во удале́нии от па́ствы твоея́ в заточе́нии ти бы́вшу,/ востаю́щия на тя наве́ты вра́жия сокруша́л еси́ моле́нием приле́жным, любе́зная же ча́да твоя́, я́же отлуче́на от тебе́ теле́сне, во еди́нем ду́се совоку́плена с тобо́ю бя́ху/ и во и́стинных путе́х Госпо́дних хожде́ние при́сно творя́ху.
Тро́ичен: Благослови́м Тя, Всеси́льне Го́споди, Бо́же Вседержи́телю,/ Присносу́щне О́тче,/ Сло́ве Бо́жий, нас ра́ди плоть прие́мый,/ и Ду́ше Всесвяты́й Животворя́щий,/ Тро́ице Единосу́щная и Неразде́льная,/ воспева́ем Тя со стра́хом и вопие́м:/ благослови́те, вся дела́ Госпо́дня, Го́спода.
Богоро́дичен: Сло́во от нача́ла бы́вшее,/ ко спасе́нию ми́ра плоть прия́ло есть от Тебе́, Богоневе́сто,/ и дарова́ Ду́ха ра́зума в сердца́ на́ша,/ я́ко да, оправда́ние прие́мше от слове́с любве́,/ во избы́тце се́рдца излива́ющихся,/ глаго́лов неизрече́нных слы́шателие при́снии яви́мся,/ с небе́сными ли́ки воспева́юще:/ благослови́те, вся дела́ Госпо́дня, Го́спода.
Песнь 9
Ирмо́с: Ка́мень нерукосе́чный/ от Несеко́мыя Горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́,/ тем, веселя́щеся,// Тя, Богоро́дице, велича́ем.
Всем житие́м Твои́м ве́рность Христу́ показа́в,/ се́рдце, любве́ испо́лнено, со благодаре́нием ко Го́споду простира́л еси́, священному́чениче Пе́тре,/ те́мже с Вы́шними чи́ны ны́не пред лице́м Госпо́дним предстои́ши/ и со все́ми святы́ми Бо́га хвале́бными пе́сньми прославля́еши.
Боже́ственныя слу́жбы отлуче́н быв/ и скорбьми́ мно́гими истязу́емь,/ моли́твою и богомы́слием жа́жду души́ твоея́ утоля́л еси́, о́тче Пе́тре,/ те́мже открове́ние Ду́ха дарова́ ти словеса́ богому́драя/ ко прославле́нию первонача́льника Солове́цкаго, Ге́рмана преподо́бнаго.
Лю́тою боле́знию уязви́вся/ и страда́ния тя́жкая претерпе́в, присноблаже́нне,/ сме́ртию всехва́льною просла́вил еси́ Го́спода./ Те́мже и Той ублажи́ тя в Це́ркви святы́х,/ явле́нии чу́дными назна́меновав души́ твоея́ свя́тость,/ и мо́щи честны́я твоя́ в поклоне́ние и почита́ние свяще́нное нам ми́лостивно оста́ви.
Богоро́дичен: Па́че всех земноро́дных страда́ние в любви́ ко Го́споду позна́вшая,/ се́рдце любве́ испо́лнено простри́ нам, Ма́ти Де́во,/ в печа́лех на́ших немощству́ющим и в боре́ниих изнемога́ющим,/ уте́ши ду́ши на́ша в та́йне промышле́ния О́тча,/ я́ко да путе́м страда́ний о Христе́ в любо́вь Его́ Боже́ственную вни́дем/ и ра́дости Небе́сныя хода́тайством Твои́м неотлуче́ни яви́мся.
Свети́лен:
Я́ко свеща́ всесве́тлая, благода́ть Бо́жия извну́трь просвеща́ше тя, святи́телю Пе́тре,/ сего́ ра́ди избра́н бысть от Бо́га свиде́тельствовати о Све́те/ и просвеща́ти тьму неве́рия в лю́дех обраще́нием к ве́ре Христо́вой./ Просвети́ у́бо и на́шу те́мность духо́вную/ и ду́ши, сном ле́ности отягче́нныя, пробуди́,/ и ко Го́споду сердца́ на́ша обрати́.
Сла́ва, и ны́не, Богоро́дичен:
Свет открове́ния язы́ком ро́ждшая, Всесве́тлая Богоневе́сто,/ во све́те повеле́ний Бо́жиих ходи́ти нас наста́ви,/ я́ко да, до́брая творя́ще в нем,/ сла́ву Отца́ Небе́снаго умно́жим в челове́цех,/ да и Той испо́лнит ны/ Боже́ственнаго сия́ния всепобежда́ющия Своея́ любве́.
На хвали́тех стихи́ры, глас 8:
Небе́снаго Ца́рствия жи́телю,/ Боже́ственных благ соприча́стниче,/ Престо́лу Вы́шняго предстои́ши, священному́чениче Пе́тре,/ о до́льнем Оте́чествии твое́м моли́, блаже́нне,/ безчи́сленными по́двиги святы́х Его́ просла́вленнем./ Твои́ми бо и тех моли́твами/ ча́ем лю́тыя сме́рти избе́гнути// и ча́сти избра́нных Госпо́дних сподо́битися.
Ми́ру распя́ся и вся, я́же в ми́ре, презре́,/ я́звы Госпо́дни на те́ле и в се́рдце при́сно носи́л еси́, о́тче:/ о Христе́ страда́ния в ра́дость души́ твое́й вменя́хуся,/ и смерть Его́ ра́ди безсме́ртие тебе́ сотвори́./ Гра́ду Воро́нежу сла́ва и утвержде́ние быв, архипа́стырю,/ Голго́фы Ру́сския же́ртва богоуго́дна яви́лся еси́,// отсю́ду же и во оби́тели ве́чныя душе́ю возлете́л еси́.
Егда́ гоне́ния от безбо́жных зе́млю Ру́сскую постиго́ша/ и чрез о́ная испыта́ние ве́ры твоея́, священному́чениче, прии́де,/ тогда́ с ка́федры архиере́йския изгна́ние/ и с па́ствою твое́ю разлуче́ние му́жественне претерпе́л еси́/ и письмены́ свои́ми лю́ди воро́нежския/ неуста́нно в любви́ Бо́жией наставля́л еси́,/ от нея́же ни скорбь, ни теснота́, ни гоне́ния, ни глад// ника́коже возмо́же тебе́ разлучи́ти.
Пра́ведность души́ твоея́ возлюби́ Госпо́дь,/ сего́ ра́ди ра́зум свят и по́двиг кре́пок дарова́ ти,/ благода́тию и ми́лостию Свое́ю вы́ну посеща́я./ Ты же, и во у́зах сый,/ ве́рою и тве́рдым упова́нием жив был еси́, священному́чениче,/ благове́стием и же́ртвою хвале́ния непреста́нно Бо́га прославля́я,/ И́же, соверша́яй тя во вся́цем де́ле бла́зе,/ к ли́ку избра́нных Свои́х причте́// и сла́вою нетле́нною тебе́ просла́ви.
Сла́ва, глас 5:
Излия́ся благода́ть во устна́х твои́х, о́тче Пе́тре,/ е́юже пра́вде Бо́жией побе́ду соде́ловал еси́,/ глаго́лы бо жи́зни ве́чныя дарова́ни тебе́ бы́ша открове́нием Христо́вым/ к разуме́нию слы́шавших/ и ко спасе́нию по словеси́ твоему́ ве́ровавших,/ к низложе́нию сопроти́вных,/ не могу́щих глаго́лом сим противоста́ти./ Се бо Сло́во Бо́жие суди́ти и́мать вселе́нней в пра́вду:/ зло́бе гре́шных запрети́ти наве́ки,// сыново́м же ми́ра обетова́нное Ца́рство дарова́ти.
И ны́не, Богоро́дичен, глас то́йже:
Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́./ Ты бо челове́ком боле́зни отго́ниши,/ и гре́шных ско́рби разруша́еши:/ Тебе́ бо вси стяжа́хом наде́жду и утвержде́ние,// Пресвята́я Ма́ти Де́во.
НА ЛИТУРГИ́И
Блаже́нны от кано́на песнь 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106 (гл. 21, ст. 12-19). Прича́стен: В па́мять ве́чную бу́дет пра́ведник:
Моли́тва
О досточу́дне Пе́тре, священному́чениче сла́вный, еди́н от со́нма новому́чеников Солове́цких и всея́ земли́ Ру́сския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя! Все житие́ твое́ любве́ ко Го́споду и страда́ний о Христе́ испо́лнено бысть, ты бо, мно́гая муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́ и венце́м нетле́нныя твоея́ сла́вы Це́рковь Ру́сскую украси́л еси́. Вся преда́в в ру́це Бо́жии, до́блественне служе́ние твое́ на земли́ соверши́л еси́ и на Голго́фе А́нзерстей кончи́ну му́ченическую прия́ти сподо́бился еси́, богоблаже́нне. Ны́не к Небе́сному ли́ку причте́нный, и вене́ц му́ченический за Христа́ прие́мый, со мно́гими жи́тели Го́рняго Иерусали́ма в Ца́рстве Боже́ственныя любве́ пребыва́еши. О блаже́нне о́тче наш Пе́тре, помози́ нам хра́мину се́рдца своего́ незапусте́вшу храни́ти, научи́ нас ра́дость во страда́ниих о Христе́ обрета́ти, озари́ путь наш кре́стный сия́нием твоея́ святы́ни. Бу́ди и ны́не нам утвержде́ние в ве́ре, да, прише́д, обря́щет ю́ Госпо́дь не уга́снувшу в сердца́х на́ших. Умоли́ Творца́ вся́ческих дарова́ти нам си́лу и кре́пость, да, не устраши́вшеся стра́ха лука́ваго, испове́даем тве́рдо Христа́ Спа́са на́шего и Его́ милосе́рдием ча́сти злых да изба́вимся в день стра́шный воздая́ния, и в ра́дость ве́чную всели́мся, сла́вяще о всем Вседержи́теля Бо́га, и твое́ благода́тное к Нему́ о нас предста́тельство во ве́ки веко́в. Ами́нь.
И́на моли́тва
О свяще́нная и многострада́льная главо́, земны́й а́нгеле и Небе́сный челове́че, священному́чениче и чудотво́рче Пе́тре, архиере́ю Бо́жий! Ты в годи́ну лю́тых гоне́ний яви́лся еси́ я́ко церко́вное свети́ло и и́стинныя ве́ры утвержде́ние, зане́ пред богобо́рцы дерзнове́нно Христа́ испове́дал еси́, и я́ко кади́ло благово́нное, в же́ртву Бо́гу себе́ прине́сл еси́. Яви́ нам, смире́нным и гре́шным, ко святы́м моще́м твои́м притека́ющим, многомо́щное твое́ заступле́ние, и вку́пе со все́ми святы́ми, во ото́цех Солове́цких просия́вшими, испроси́ у Го́спода вся́кий дар, коему́ждо благопотре́бен ко спасе́нию. Се бо грех на́ших ра́ди не и́мамы дерзнове́ния ко Го́споду и Влады́це на́шему, и пра́ведный гнев Его́ на ны наведо́хом, и вся́кия ми́лости Его́ недосто́йны сотвори́хомся. Те́мже, не сме́юще возвести́ очеса́ на́ша к высоте́ Небе́сней, ниже́ моле́бный глас ко Го́споду, се́рдцем сокруше́нным и смире́нным ду́хом тебе́ моли́твенника благоприя́тнаго к Нему́ предлага́ем, и про́сим тя со усе́рдием ве́лиим: бу́ди засту́пник и хода́тай наш пред Бо́гом, Судие́ю Пра́веднейшим, се бо вы́ну прогневля́ем Его́ согреше́нии мно́гими. Ны́не у́бо, во сла́ве Небе́сней пребыва́я и с ли́ки святы́х непреста́нно славосло́вя Пресвято́е И́мя Го́спода, при́зри на нас, гре́шных, и изба́ви всех, ве́рою несумне́нною к Бо́гу приходя́щих, от вся́ких бед, наве́тов и прило́гов диа́вольских. Укроти́ во́лны страсте́й и искуше́ний, востаю́щих на ны, да ра́ди святы́х твои́х моли́тв не обы́мет нас напа́сть, и не поги́бнем в пучи́не грехо́вней и в ти́не страсте́й на́ших. Вознеси́, богоно́сне о́тче наш, сие́ ма́лое моле́ние недосто́йных раб твои́х Влады́це Христу́, да утверди́т зе́млю на́шу в пра́вой ве́ре и благоче́стии, Це́рковь Святу́ю да сохрани́т непреобори́му от ересе́й и раско́лов, и соблюде́т невреди́му от вся́каго зла. Испроси́ у великодарови́таго Христа́ Бо́га на́шего скорбя́щим утеше́ние, неду́гующим исцеле́ние, оби́димым заступле́ние, па́дшим во грехи́ покая́ние и возста́ние, стра́ждущим от бесо́в ско́рое свобожде́ние, от Це́ркве Христо́вы отпа́дшим вразумле́ние и на путь спасе́ния обраще́ние. Ты му́ченически ду́шу твою́ за ве́ру положи́л еси́, да́руй и нам му́жество подража́ти тебе́, да ничто́же в жи́зни сей вре́менней возмо́жет отлучи́ти ны от любве́ Бо́жия. О святи́телю Христо́в, огради́ и укрепи́ моли́твами твои́ми град сей, да процвете́т в нем ре́вность ко спасе́нию и благоче́стие. Ты, непреста́нно о часе́ сме́ртнем па́мять име́вый и благу́ю часть избра́нных Бо́жиих от Го́спода получи́вый, сподо́би и нас в ми́ре и покая́нии живо́т свой сконча́ти, и Ца́рствия Бо́жия насле́дники бы́ти, иде́же ты водворя́ешися со А́нгелы и все́ми святы́ми, хваля́ Бо́га в Тро́ице сла́вимаго, Отца́, и Сы́на, и Свята́го Ду́ха, во ве́ки веко́в. Ами́нь.
