Служба Пресвятой Богородице в честь Ее иконы «Снетогорская»
Пра́зднование Пресвяте́й Влады́чице на́шей
Богоро́дице и Присноде́ве Мари́и ра́ди ико́ны Ея́,
имену́емыя «Снетого́рская»
НА ВЕЛИ́ЦЕЙ ВЕЧЕ́РНИ
Блаже́н му́ж: 1-й антифо́н.
На Го́споди, воззва́х: стихи́ры, глас 1:
Прииди́те, ве́рнии,/ воспои́м Госпожу́ и Влады́чицу на́шу Богоро́дицу/ и явле́нию чудотво́рныя Ея́ ико́ны возра́дуемся./ Тоя́ бо покро́вом спаса́емся/ и ми́лости Госпо́дней Ея́ предста́тельством взыску́ем,/ в ра́дости духо́вней взыва́юще:// моли́твами Ма́тере Твоея́, Бо́же, поми́луй нас.
Иде́же преподобному́ченицы Снетого́рстии/ пе́рвее сожже́ни бы́ша,/ та́мо Це́рковь Богоро́дицы из ка́мене па́ки зи́ждется/ и о́бразом Пречи́стыя благоле́пно украша́ется./ Те́мже, торжество́ Ея́ ны́не соверша́юще, вопие́м:/ не лиши́ нас ми́лости Твоея́,// Пресвята́я Влады́чице.
Егда́ на горе́ Сня́тней/ чи́ну мона́шескому возобнови́тися благоволи́ла еси́,/ тогда́, во оби́тель чернори́зиц собра́вши,/ в зна́мение священнонача́лия Твоего́ пресла́вную ико́ну тем дарова́ла еси́./ И ны́не вопие́м Ти:/ Пресвята́я Богоро́дице,// сохрани́ нас под кро́вом Твои́м.
О Всеми́лостивая Госпоже́ Богоро́дице,/ Небесе́ и земли́ Цари́це,/ от безпло́тных сил восхваля́емая/ и от земноро́дных воспева́емая,/ при́зри благосе́рдием на оби́тель на́шу Снетого́рскую,/ пода́ждь ей мир и благострое́ние,/ да́руй Свой покро́в и заступле́ние,// да сопричту́тся песносло́вцы Твои́ к ли́ку богоизбра́ннаго ста́да.
Сла́ва, и ны́не, глас 6:
Днесь оби́тель Снетого́рская све́тло красу́ется,/ и с ней вся земля́ Пско́вская/ в пра́здновании честна́го о́браза Пречи́стыя ра́дуется,/ Бо́жия бо Ма́ти Сы́ну предстои́т,/ небе́снии Архистрати́зи с тре́петом Ей слу́жат,/ святи́и сро́дницы на́ши ми́лости нам про́сят./ Мы же, зря́ще честно́е Ея́ изображе́ние/ в день торжества́ духо́внаго, воспои́м:// моли́твами Пречи́стыя Ма́тере Твоея́, Бо́же, поми́луй нас.
Вход. Проки́мен дне. Чте́ния три Богоро́дицы.
На лити́и стихи́ры, глас 8:
Ны́не оби́тель Снетого́рская на торжество́ ве́рных созыва́ет,/ чу́дное бо виде́ние зри́тся:/ на престо́ле Всецари́ца возседа́ет/ во объя́тиях Вседержи́теля Христа́ держа́щи./ Се торжество́ Твое́, Всеблагослове́нная,// се явле́ние святы́х святе́йшия сла́вы Твоея́.
Глас то́йже.
Подо́бен: О, пресла́внаго чудесе́:
О, пресла́внаго чудесе́!/ Небесе́ и земли́ Цари́ца,/ го́рними си́лами велича́емая/ и от преподо́бных ублажа́емая,/ ны́не го́ру Сня́тную ли́ка Своего́ изображе́нием ми́лостивно обогаща́ет./ О святы́х оби́телей Игу́мение Пресла́вная!/ Не преста́ни и на бу́дущее вре́мя/ ми́лости и чудеса́ излива́ти// на всех, во и́ночестве до́бле подвиза́ющихся.
Возлюби́ша Тя, Пречи́стая,/ Ма́ти Бо́га на́шего,/ лю́дие Пско́встии,/ егда́ храм Рождеству́ Твоему́/ на Сня́тней горе́ по заве́ту Довмо́нта благове́рнаго зда́ша,/ писа́ньми жития́ Твоего́ украси́ша/ и, я́ко не́кий многоце́нный би́сер,/ изображе́ние пренебе́сныя сла́вы Твоея́// посреде́ о́ных помести́ша.
Сла́ва, глас 2:
О́браз Твой, Влады́чице,/ у́мное зерца́ло есть,/ в не́мже доброде́тели Твоя́ зря́ще,/ немощни́и ка́емся и жизнь на́шу испра́вити тщи́мся./ На сем по́прищи бу́ди нам тве́рдая Помо́щница,// да благоуго́дни Го́сподеви обря́щемся.
И ны́не, глас то́йже:
Прообразу́емое дре́вле ны́не испо́лнися:/ Де́ва бо Ма́ти предрече́нная роди́ Сы́на,/ Сло́во О́тчее, пре́жде век Су́щее./ Сего́ ра́ди покланя́емся сла́вному о́бразу Ея́,// я́ко чу́дная вели́чия Всенепоро́чныя нам явля́ет.
На стихо́вне стихи́ры, глас 1:
Песносло́вят ны́не А́нгели на Небесе́х,/ ликовству́ют пра́веднии вси,/ мы же, лю́дие ве́рнии, Преблаго́й Засту́пнице хвалу́ пое́м смире́нно,/ Та бо честны́м Свои́м покро́вом град Псков сохраня́ет,/ во многотру́днем житии́ сем ве́рным помога́ет,/ лик и́ноческий ко спасе́нию наставля́ет,// я́ко Всеми́лостивая о лю́дех Засту́пница.
Стих: Приведу́тся Царю́ де́вы в след Ея́,// и́скренния Ея́ приведу́тся Тебе́.
Возлюби́ Тя Госпо́дь, Влады́чице,/ и па́че всех добро́ту в Тебе́ обре́те,/ смире́нием бо превознесе́на,/ кро́тостию же преукра́шена яви́лася еси́,/ чистота́ Твоя́ и А́нгелом преди́вна есть,/ сего́ ра́ди почи́ Вседержи́тель на руку́ Твое́ю,// херуви́мский Себе́ Престо́л в Тебе́ устро́ив.
Стих: Слы́ши, Дщи, и виждь,// и приклони́ у́хо Твое́.
Приклони́лася еси́ иногда́, Преблагослове́нная в жена́х,/ на целова́ние Арха́нгелово,/ те́мже род челове́ческий спасе́ние прия́т,/ та́ко и ны́не приклони́ся на моле́ния на́ша/ и приведи́ ны к блаже́нному приста́нищу ве́чныя ра́дости,/ во е́же сла́вити Го́спода и пе́ти благодаре́ние о Тебе́,// Благо́й Засту́пнице ро́да христиа́нскаго.
Сла́ва, и ны́не, глас 2:
В це́ркви сла́вы Бо́га на́шего пречу́дное виде́ние ны́не зри́тся:/ Ма́ти Госпо́дня дла́ни к Сы́ну простира́ет/ и с небожи́тели о нас хода́тайствует./ Мы же во умиле́нии серде́чнем воспои́м:/ святы́й воево́до пламеннови́дный Михаи́ле,/ благове́стниче та́ин Бо́жиих Гаврии́ле,/ преподо́бне о́тче наш Иоаса́фе,/ Довмо́нте кня́же благове́рный,// с Пречи́стою моли́те Го́спода о нас.
Тропа́рь, глас 5:
Ко о́бразу Твоему́, о Госпоже́, припа́даем,/ ми́лости Твоея́ улучи́ти ча́юще,/ Боже́ственною бо сла́вою облече́на,/ о лю́дех непреста́нно милосе́рдствуеши,/ не оста́ви у́бо си́рых нас, о Ма́ти Всепе́тая,/ сподо́би и в земне́й юдо́ли и в Небе́сных оби́телех// чи́стым се́рдцем Тебе́ пе́ти и сла́вити.
НА У́ТРЕНИ
На Бог Госпо́дь: тропа́рь Богоро́дицы, три́жды.
По 1-м стихосло́вии седа́лен, глас 4:
Приспе́ день све́тлаго торжества́,/ в земли́ Пско́встей Ма́ти Бо́жия сла́вно прославля́ется,/ дарова́ бо ве́рным Свой пречи́стый о́браз,/ ему́же ны́не покланя́ющеся,/ любо́вию Богоро́дицу восхваля́ем.
Сла́ва, и ны́не, то́йже.
По 2-м стихосло́вии седа́лен, глас 8:
О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век сый Бог наш,/ ложесна́ бо Твоя́ Престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.
Сла́ва, и ны́не, то́йже.
По полиеле́и седа́лен, глас 4:
Я́ко зве́зды благосве́тлыя,/ свод церко́вный украша́ют небожи́тели:/ Михаи́л Арха́нгел с Гаврии́лом до́блестию укра́шеннии,/ ве́рою непосты́дною Довмо́нт со Иоаса́фом блиста́ющии,/ Богоро́дица же, еди́на всех честне́йшая, сия́ет я́ко луна́ непоро́чная,/ свет от Со́лнца Пра́вды Христа́ прие́мши.
Сла́ва и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́// во вся́ком ро́де и ро́де. Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6:
Тебе́ при́сное ра́дование подоба́ет, Богоро́дице,/ Ты же благоподража́тельное милосе́рдие избра́вши,/ до́лу к нам, гре́шным, низхо́диши,/ ско́рбным мольба́м вне́млеши/ и сия́ Престо́лу Сы́на Твоего́ и Бо́га возно́сиши,/ да умоле́н бу́дет Преблаги́й хода́тайствы Твои́ми// и пода́ст нам мир и ве́лию ми́лость.
Кано́н, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.
Возжада́ душа́ моя́ воспе́ти Тя, Влады́чице!/ Ку́ю песнь принесу́ Богоро́дице, недоуме́юся окая́нства моего́ ра́ди,/ свя́зан же ми язы́к и душа́ притре́петна есть,/ сло́во ми пода́ждь, Всепе́тая, во хвале́нии велича́ти Тя.
От лет дре́вних сокрыва́шеся свяще́нное Твое́ изображе́ние,/ егда́ же в разоре́нней оби́тели жизнь и́ноческая па́ки возроди́ся,/ благоволи́ла еси́, Пречи́стая, сокрове́нный о́браз яви́ти/ и ико́ну Твою́ нам дарова́ти.
Сла́ва: Сла́вим Тя, Богоневе́сто,/ ро́ждшую Христа́, Бо́га на́шего,/ Его́же моли́ поми́ловати ду́ши на́ша.
И ны́не: Воспои́м, вси лю́дие, Госпожу́ и Влады́чицу на́шу Богоро́дицу,/ То́ю бо безбе́дно мо́ре жите́йское прехо́дим/ и приста́нище спаси́тельное в Сы́не Ея́ обрета́ем.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
Благоволи́ла еси́, Госпоже́, я́ко святы́х оби́телей Пресла́вная Игу́мения,/ на Сня́тней горе́ чернори́зиц сонм собра́ти,/ сего́ ра́ди и честну́ю ико́ну Твою́ в зна́мение ми́лости/ и неотсту́пнаго покро́ва Твоего́ дарова́ла еси́.
Пе́ние вся́кое побежда́ется песносло́вцев Твои́х, Богоро́дице,/ не возмога́ем, бре́ннии, досто́йно воспе́ти Тя,/ ниже́ исчи́слити щедро́ты Твоя́,/ ни пове́дати смире́ния глубину́,/ ниже́ Боже́ственныя любве́ та́йну.
Сла́ва: В Тебе́, Пречи́стая, я́ко в чисте́йшем исто́чнице, почерпа́ем си́лы и утеше́ние,/ неоску́дно бо милосе́рдие и любо́вь Твою́ на нас, гре́шных, преизоби́льно излива́еши/ и росо́ю умиле́ния жестосе́рдых ороша́еши.
И ны́не: Богоро́дице Де́во,/ в моли́твах Твои́х мир не оста́вила еси́,/ бу́ди нам Путеводи́тельница во Оби́тели ве́чныя.
Седа́лен, глас 2:
Днесь, све́тло лику́юще,/ припа́даем всеблагогове́йно ко о́бразу Пречи́стей,/ и́мже покро́в Ма́терний оби́тели ми́лостивно дарова́ся.
Сла́ва, и ны́не, тойже.
Песнь 4
Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:// сла́ва, Христе́, си́ле Твое́й.
И́же на о́гненных Херуви́мех седя́й и пева́емый от Серафи́м,/ во Твою́ честне́йшую утро́бу сни́де,/ ложесна́ деви́ческая Престо́лом Божества́ соде́лав./ Да́руй и нам, о Госпоже́, хра́мы Ду́ха Свята́го досто́йны соде́латися.
Я́ко дре́вле род изра́ильский в пусты́ни путеводи́вый,/ та́ко и ны́не Госпо́дь и́ноком, я́ко возлю́бленным ча́дом,/ Путеводи́тельницу ко спасе́нию, О́блак ле́гкий, Пречи́стую Ма́терь Свою́ явля́ет.
Сла́ва: Во еди́но и́ночествующих собра́вый, Го́споди,/ и заступле́ние им о́браз Пречи́стыя Ма́тере Твоея́ дарова́вый,/ источи́ благода́ть спаси́тельную,/ да не преста́нут воспева́ти:/ сла́ва, Христе́, си́ле Твое́й.
И ны́не: Вся проро́чества на Тебе́ испо́лнишася,/ и ору́жие кре́стное непоро́чную ду́шу Твою́ про́йде,/ сего́ ра́ди смире́ннейшею Послу́шницею во́ли Госпо́дни нарека́ем Тя и мо́лим:/ доброде́телию се́ю обогати́ стропти́вая сердца́ на́ша,/ скоропослу́шная А́гнице Пастыренача́льника Христа́.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
Что Тя нарече́м, о Благода́тная?/ Целому́дрие Твое́ и А́нгелом преди́вно есть,/ па́че сне́га убели́лася еси́ де́вства чистото́ю/ и святы́нею Твое́ю преизоби́льно ны́не ра́йская селе́ния благоуха́еши:/ ра́дуйся, де́вственная похвало́, велича́ем Тя.
Чу́до Твое́, Богоро́дице, ужаса́ет и А́нгелы,/ вы́шши бо яви́лася еси́ вся́кия земны́я и Небе́сныя тва́ри,/ смире́нием превознесе́на и многоразли́чными добро́тами преукра́шена,/ селе́ние соде́лалася еси́ невмести́маго Зижди́теля Твоего́.
Сла́ва: Сла́вят Тя А́нгельских во́инств чинонача́лия:/ Гаврии́л преизя́щнейший о чистоте́ веща́ет,/ Михаи́л до́блественнейший о доброде́тели пое́т,/ естество́ же все безпло́тных со стра́хом и любо́вию, я́ко Бо́жией Ма́тери, покланя́ется.
И ны́не: К Тебе́, Влады́чице, припа́даем, обрести́ разреше́ние лю́тых ча́юще,/ израсти́ша бо греси́ на́ши плоды́ жестосе́рдия и омраче́ния./ Озари́ ны све́том Сы́на Твоего́, во е́же спасти́ся нам.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.
Измла́да Бо́гу посвяще́нная,/ во свята́я святы́х, Богоотрокови́це, пребыва́ла еси́,/ в зако́не Госпо́дни поуча́ющися./ Сподо́би нас твори́ти во́лю Госпо́дню/ и во oби́тели ве́чныя вни́ти.
Я́же о бра́це в Ка́не Галиле́йстей попече́ние име́вшая,/ предста́ни и ны́не хода́тайством Твои́м/ и умоли́ Го́спода душа́м на́шим весе́лию Небе́сному приобщи́тися.
Сла́ва: Прииди́те ны́не, празднолю́бцы,/ и́ночестии собо́ри и ве́рных собра́ние,/ воскли́кнем Госпоже́ и Влады́чице на́шей Богоро́дице:/ ра́дуйся, земли́ Пско́вския покро́ве/ и оби́тели Снетого́рския Отра́до и Утеше́ние.
И ны́не: Еле́й Ма́терния ми́лости Твоея́/ преизоби́льно изле́й боле́знующим душа́м на́шим,/ я́ко да, скве́рны грехо́вныя совле́кшеся,/ возмо́жем чи́сте сла́вити Тя/ и от Тебе́ ро́ждшагося Го́спода.
Конда́к, глас 3:
Де́вы днесь свяще́нное торжество́ в Це́ркви соверша́ется:/ на Престо́ле бо Всецари́ца сла́вно возседи́т/ и подая́ние Боже́ственныя благода́ти/ нам от Спа́са приле́жно хода́тайствует,/ А́нгели и челове́цы раболе́пно Влады́чице предстоя́т,/ нас бо ра́ди мо́лит Богоро́дица// Преве́чнаго Бо́га.
И́кос:
Украси́ся ны́не, богоспаса́емый гра́де Пско́ве,/ име́я в себе́ го́ру Сня́тную богопокрове́нную,/ иде́же бо честны́й о́браз Богома́тере в хра́ме Рождества́ Ея́ сла́вно возсия́./ Ли́цы и́ночестии и мирсти́и, вку́пе ра́дуйтеся:/ Иоаса́ф бо преподо́бный о святе́й оби́тели свое́й ко Пречи́стей Де́ве припа́дает/ и Довмо́нт благове́рный о земли́ на́шей Богоро́дице предста́тельствует,/ Михаи́л Арха́нгел с Гаврии́лом благове́стником Всецари́це слу́жат,/ нас бо ра́ди мо́лит Богоро́дица Преве́чнаго Бо́га.
Песнь 7
Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, поюще:// препе́тый отце́в Госпо́дь и Бог, благослове́н еси́.
Настиго́ша ны супоста́ты лука́вии,/ и, я́ко в пещи́ о́гненней, от мно́жества искуше́ний обурева́емся,/ ороси́ ны иссо́пом моли́тв Твои́х/ и изведи́ из горни́ла стра́стнаго,/ да в ми́ре душе́внем вопие́м Ти:/ ра́дуйся, Купино́, огне́м Божества́ не опа́льшаяся.
Я́коже дре́вле зе́млю Пско́вскую от инове́рных наше́ствия мно́гажды сохраня́ла еси́,/ та́ко и ны́не Взбра́нная Воево́да яви́ся,/ спаси́ ду́ши на́ша и набе́ги лука́вых супоста́т потреби́.
Сла́ва: Не престае́т лик и́ноческий по вся дни сла́вити Тя, Всепе́тую Ма́терь Бо́га на́шего./ Ты бо, я́ко благоуха́нный крин, чистото́ю де́вства благоуха́еши/ и ко а́нгельстей жи́зни мона́хов наставля́еши.
И ны́не: Приведи́ ны, Госпоже́, в благоче́стии и пра́вде пожи́ти,/ возведи́, во е́же в преподо́бии и чистоте́ Сы́ну Твоему́ послужи́ти,/ да, избе́гше шу́иих, сопричте́мся десны́м/ и сподо́бимся отце́в Го́спода и Бо́га сла́вити во ве́ки.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ то́гда у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся́ ве́ки.
Трие́ о́троцы в пещи́ вавило́нстей благоче́стием дре́вле спасо́шася,/ ду́ши же на́ша, грехо́м плене́нныя,/ на па́жить спаси́тельных за́поведей Христо́вых, Влады́чице, напра́ви,/ да непоро́чным путе́м оправда́ний Госпо́дних/ го́рняго Иерусали́ма дости́гнем.
Бо́га Преблага́го умоли́, Пречи́стая Богоро́дице,/ от бед лю́тых изба́витися нам,/ любо́вию чту́щим Тя, Всепе́тая.
Сла́ва: И́же кре́пость ве́ры отроко́в в пещи́ кре́постию огня́ искуси́вый/ и ре́вность па́че огня́ тем пода́вый,/ све́тлым огне́м Божества́ Твоего́ гре́шныя ду́ши на́ша озари́,/ моли́твами Пречи́стыя Ма́тере Твоея́.
И ны́не: Предста́ Цари́ца одесну́ю Спа́са в ри́зах позлаще́нных оде́яна/ и мно́гими доброде́тельми преукра́шена,/ Боже́ственным же смире́нием преиспещре́на, взыва́ющи:/ Го́спода по́йте, дела́, и превозноси́те Его́ во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,// Чи́стая Присноде́во.
Велича́ет Богоро́дицу Пречи́стую Небе́сная Це́рковь и земна́я вку́пе,/ Отроча́ бо даде́ся нам,/ я́ко дождь на руно́ в де́вственную утро́бу Тоя́ сни́де/ и чре́во простра́ннее небе́с соде́ла.
Вси святи́и о Тебе́ ра́дуются,/ проро́цы же исполне́нию предрече́ннаго лику́ют:/ Сло́во бо Единоро́дное, во Оте́ческих не́дрех безнача́льно седя́щее,/ на руку́ Ма́тере Де́вы отроча́ зри́тся,/ Емману́илом нарица́емое.
Сла́ва: Пресла́вная Бо́жия Ма́ти и святы́х А́нгел святе́йшая,/ немо́лчно воспева́ем Тя се́рдцем и усты́:/ ра́дуйся, кро́тостию препросла́вленная;/ ра́дуйся, вели́чием смире́ния превознесе́нная.
И ны́не: Рождество́м Твои́м, Пречи́стая, спасе́ние нам прии́де,/ го́рняя бо до́льним совокупи́шася./ Те́мже вопие́м Ти:/ ра́дуйся, Прозябе́нием чревоноше́ния благослове́ние ми́рови источи́вшая.
Свети́лен:
Ма́ти Све́та, Благослове́нная Богоро́дице,/ просвети́ омраче́нная сердца́ на́ша огне́м любве́ Боже́ственныя,/ да, то́ю просвеща́еми, востече́м ко Све́ту всех све́тов,/ Сладча́йшему Сы́ну Твоему́.
Сла́ва, и ны́не, то́йже.
На хвали́тех стихи́ры, глас 4:
По глаго́лу Твоему́, Богоро́дице,/ ублажа́ют Тя вси ро́ди,/ сия́ния бо всех доброде́телей/ пречу́дно в Тебе́ соедини́шася,/ и па́че со́лнца чу́вственнаго духо́вному о́ку на́шему блиста́еши.// Вои́стину досто́йно есть велича́ти Тя, Цари́це Небе́сная.
Вся проро́чества на Тебе́, Де́во, испо́лнишася,/ Бог Сло́во из Тебе́ воплоти́ся/ и, не руши́в ключи́ де́вства, ми́ру возсия́,/ правове́рныя же Тобо́ю спаса́ются./ Сего́ ра́ди не умолчи́м сла́вы Твоея́, Всепе́тая,/ и в весе́лии духо́внем вси та́ко рцем:// ве́лия Ти похвала́ подоба́ет, Ма́ти Бо́жия.
Естество́ челове́ческое рождество́м Твои́м превзошла́ еси́,/ естество́ же а́нгельское всесоверше́нным смире́нием,/ сего́ ра́ди земноро́днии о Тебе́ хва́лятся,/ чи́ни же Небе́снии в свяще́нном тре́пете изумля́ются./ Приими́ ны́не с ли́ком А́нгельским сонм и́ноческий:/ честне́йшую Херуви́м и сла́внейшую без сравне́ния Серафи́м,// Тя воспева́ющий.
Во гла́сех тру́бных воспои́м Де́ву Всенепоро́чную,/ ра́ди о́браза Ея́ Снетого́рскаго,/ псалти́рми и гу́сльми доброгла́сными ублажи́м,/ уста́ми и сердцы́ умиле́нными просла́вим,/ чудеса́ бо Богоро́дицы пове́дати пресла́вно есть,/ нам же прилепля́тися Ей, бла́го:// ра́дуйся, Наде́ждо на́ша и упова́ние.
Сла́ва, и ны́не, глас 2:
Я́ко на огнезра́чнем Престо́ле,/ почи́ на руку́ Всецари́цы И́же А́нгелов Царь,/ и Того́ Всеблага́я дерзнове́нною десни́цею ми́лостивно приклоня́ет,/ я́ко да, рабо́ты грехо́вныя изба́вльшеся,/ ца́рское свяще́ние и язы́к свят// Го́сподеви приведе́мся.
Славосло́вие вели́кое и отпу́ст.
На Литурги́и слу́жба вся Богоро́дицы.
