Служба преподобномученикам Вениамину и Никифору Соловецким
Ме́сяца апре́ля в 4-й день
Преподобному́чеников Вениами́на архимандри́та
и Ники́фора иеромона́ха Солове́цких
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5:
Прииди́те, христолюби́вии лю́дие,/ восхва́лим ревни́телей и защи́тителей до́блественных оби́тели Солове́цкия,/ Вениами́на, нача́льника ея́ после́дняго,/ вку́пе и Ники́фора, его́ сподви́жника,/ ти́и бо ве́лию скорбь разоре́ния оби́тели прия́ша,/ во времена́ же гоне́ний на Це́рковь Ру́сскую/ со́нму новому́чеников Солове́цких сопричте́ни бы́ша./ Ны́не же предстоя́т Престо́лу Госпо́дню// и мо́лятся о спасе́нии душ на́ших.
Крест страда́ний дан бысть ти свы́ше, богоизбра́нне Вениами́не,/ е́же оби́тель Солове́цкую от беззако́ний и бу́йства безбо́жных храни́ти,/ ты же, преподо́бне, заступа́я вве́ренную ти святы́ню,/ тверд и непрекло́нен яви́лся еси́/ и, вся́чески утесня́емь и изгоня́емь от враг быв,/ все упова́ние на Го́спода возлага́л еси́,/ оби́тели Солове́цкия после́дний нача́льниче// и сла́вный страстоте́рпче.
Я́коже пла́мень зло́бный попали́ во дни гоне́ний/ сла́вную оби́тель Солове́цкую,/ та́ко и Вениами́н многострада́льный,/ строи́тель сея́ оби́тели прехва́льный,/ вку́пе с преподобному́чеником Ники́фором,/ ду́ши скорбьми́ тя́жкими очи́стивше,/ паля́щим огне́м смерть прия́ша./ Те́мже, венцы́ му́ченическия от Го́спода прие́мше,/ ны́не Престо́лу Бо́жию во Ца́рствии Небе́снем предстоя́т// и мо́лятся о душа́х на́ших.
Мно́гия ско́рби и страда́ния на земли́ претерпе́вше/ и крест му́ченический со смире́нием и любо́вию в житии́ поне́сше,/ ны́не на Небеси́ ра́дости неизрече́нныя наслажда́етеся,/ преподобному́ченицы Вениами́не и Ники́форе,/ и в со́нме святы́х Го́спода воспева́ете./ Того́ моли́те и нам по́прище земно́е досто́йно соверши́ти// и Ца́рствие Бо́жие насле́довати.
Сла́ва, глас 8:
Во изгна́нии су́ще,/ моли́тву непреста́нную слеза́ми растворя́ли есте́/ о оби́тели Солове́цтей, от безбо́жных разоря́емей,/ святи́и Вениами́не и Ники́форе,/ в не́йже мно́гия по́двиги и труды́ понесли́ есте́./ Во дни же Свята́го Воскресе́ния/ смерть му́ченическую за Христа́ прии́мше,/ Того́ победоно́сне просла́вили есте́./ Ны́не же, Престо́лу Бо́жию предстоя́ще,/ прославля́ете Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен: Царь Небе́сный:
Та́же вход. Проки́мен дне. Чте́ния му́ченическая.
На лити́и стихи́ра, глас 1:
Огне́м веще́ственным смерть прие́мше,/ пла́мене гее́нскаго избе́гли есте́,/ богоблаже́ннии Вениами́не и Ники́форе,/ ли́ку же неисче́тному до́блественных му́чеников приобщи́вшеся/ и собо́ру Солове́цких новому́чеников основа́ние тве́рдо положи́вше,/ с те́ми ны́не песнь побе́дную на Небеси́ воспева́ете,/ сего́ ра́ди к вам уми́льно вопие́м:// моли́те Го́спода о спасе́нии душ на́ших.
Сла́ва, глас 4:
Во оби́тели преподо́бных Зоси́мы, Савва́тия и Ге́рмана,/ и́хже труды́ и моли́твами/ цве́том благоче́стия ото́к пусты́нный Солове́цкий процвете́,/ по́двигом и́ноческим до́бре подвиза́стеся,/ сла́внии Вениами́не и Ники́форе,/ и, досто́йно зва́нию ходи́вше,/ преподо́бия же о́браз чи́сте сохрани́вше,/ па́че по́двиг страстоте́рпчества во времена́ гоне́ний му́жественне подъя́ли есте́/ и му́ченичества красото́ю све́тло просия́ли есте́./ Сего́ ра́ди преподобному́ченицы наре́кшеся/ и от Христа́ Бо́га увенча́вшеся,/ о оби́тели ва́шей Того́ приле́жно моли́те// и нам проси́те ми́ра и ве́лия ми́лости.
И ны́не, Богоро́дичен: При́зри на моле́ние:
На стихо́вне стихи́ры, глас 1.
Подо́бен: Небе́сных чино́в:
По днех поста́ прише́дшу Пра́зднику Вели́кому и Све́тлому,/ наста́ вам, преподобному́ченицы, путь кре́стный соверши́вшим,/ вре́мя к До́му О́тчу преселе́ния,/ те́мже, сме́ртию мучи́тельною предочи́стившеся,/ с весе́лием во след Христу́ воскре́сшу на Не́бо вознесо́стеся./ Сия́ после́дняя земна́я ва́ша па́сха// в Небе́сную и ве́чную вам преложи́ся.
Стих: Проидо́хом сквозе́ огнь и во́ду,// и изве́л еси́ ны в поко́й.
Воскресе́ние Христо́во вам све́тло сла́вящим,/ Сам Госпо́дь, воскресы́й из ме́ртвых,/ страда́ния коне́чная ва́ша предваря́я,/ посреде́ вас неви́димо пребы́сть/ и, си́лу к терпе́нию му́ки о́гненныя подава́я,/ от юдо́ли сме́ртныя вас возведе́// в вы́шняя Небе́сная селе́ния.
Стих: Свет возсия́ пра́веднику,// и пра́вым се́рдцем весе́лие.
Ве́рою нетще́тною во Христа́ окриля́еми,/ все упова́ние на Него́ возложи́ли есте́,/ преподобному́ченицы Вениами́не и Ники́форе,/ и сердца́ ва́ша, ра́дости пасха́льныя испо́лнена,/ на по́двиг му́ченический угото́вали есте́./ Те́мже, Царю́ Христу́ воскре́сшу,// ду́шы своя́, ра́дующеся, преда́ли есте́.
Сла́ва, глас 6:
Распе́ншемуся за ны Христу́ Бо́гу,/ смерть попра́вшему и ад плени́вшему,/ сораспина́лися есте́, страстоте́рпцы приснопа́мятнии,/ страда́ния мно́гая претерпе́вше да́же до сме́рти му́ченическия,/ ны́не в невече́рнем дни Ца́рства Бо́жия сла́дость ра́йскую вкуша́ете,/ исполне́ние наде́жды ва́шея улучи́вше./ И нам, Христо́ву Воскресе́нию покланя́ющимся/ и па́мять ва́шу пра́зднующим,// всегда́ сию́ наде́жду подава́йте.
И ны́не, Богоро́дичен: Творе́ц и Изба́витель:
Тропа́рь, глас 5:
Преподóбнии новомýченицы Вениами́не и Ники́форе,/ дóбрым пóдвигом во оби́тели Соловéцтей просия́вше,/ настáвницы брáтии в завéтех и́ноческих яви́лися естé/ и, от безбóжник беды́ и изгнáние претерпе́вше,/ в плáмени огня́ дýши своя́ Влады́це Христý предáли естé,/ Емýже ны́не предстоя́ще,// моли́те спасти́ся душа́м на́шим.
НА У́ТРЕНИ
На Бог Госпо́дь: тропа́рь преподобному́чеником, два́жды. Сла́ва, и ны́не, Богоро́дичен: Ра́дуйся, Две́ре Госпо́дня непроходи́мая:
По 1-м стихосло́вии седа́лен, глас 2:
Сове́ту нечести́вых неприча́стни,/ страда́ния о Христе́ избра́ли есте́, Вениами́не и Ники́форе,/ вмени́вше сия́ в ра́дость себе́ и во спасе́ние./ Те́мже, сме́ртию му́ченическою жизнь ве́чную обре́тше,/ мзду досто́йну от Го́спода восприя́ли есте́/ и преподобному́ченицы во святы́х Его́ нарекли́ся есте́.
Сла́ва, и ны́не, Богоро́дичен, глас то́йже:
Предста́тельство неусы́пное и́мамы Тя, Пресвята́я Влады́чице,/ мольба́м и пла́чем земны́м ско́рое Услы́шание,/ боле́знем и ско́рбем те́плое Сострада́ние,/ Ру́це, просте́ртеи в по́мощь обремене́нным грехми́ и беда́ми,/ Глас, непреста́нно моля́щий милосе́рдие Бо́жие за род челове́ческий.
По 2-м стихосло́вии седа́лен, глас 3:
Нестерпи́мому огню́ соедини́вшеся теле́сне,/ ду́ши, пла́менем любве́ Боже́ственныя объя́ты,/ в ру́це Го́спода преда́ли есте́, страстоте́рпцы,/ сме́ртию страда́льческою от земли́ отше́дше,/ при́сно жи́ви обрета́етеся во Ца́рствии Небе́снем,/ Воскресе́нием Христо́вым вше́дше в рай.
Сла́ва, и ны́не, Богоро́дичен, глас то́йже:
Возжада́ душа́ моя́ Тебе́, Спа́се мой,/ я́ко живота́ исто́чник и́маши вои́стину,/ Свет ми́ру Невече́рний Богоро́дицею возсия́вый./ Тоя́ всеси́льными мольба́ми/ Небе́сных благ сокро́вище отве́рзи ми, Влады́ко Многоми́лостиве.
Велича́ние:
Велича́ем вас,/ преподобному́ченицы Вениами́не и Ники́форе,/ и чтим честна́я страда́ния ва́ша,/ я́же за Христа́// претерпе́ли есте́.
Псало́м избра́нный: Бог нам прибе́жище и си́ла:
По полиеле́и седа́лен, глас 8:
А́нгелом собесе́дницы на земли́ бы́сте, Вениами́не и Ники́форе досточу́днии,/ мы́сленныма очи́ма зря́ще Небе́сная/ и слу́хом серде́чным вне́млюще свяще́нным глаго́лом Госпо́дним,/ гоне́ния и му́ки претерпе́сте/ и победи́тели во бра́ни яви́стеся./ Ны́не же, в Небе́сных оби́телех жи́тельствующе,/ моли́теся о нас, страда́ния ва́ша чту́щих,/ да ве́рни повеле́нием Госпо́дним пребыва́ем,/ друг дру́га лю́бяще и мир в себе́ иму́ще.
Сла́ва, и ны́не, Богоро́дичен, глас то́йже:
Небе́сная Цари́це, Госпоже́ Блага́я,/ любве́ Боже́ственныя сосу́де преиспо́лненный,/ Твои́м всеми́лостивным заступле́нием сея́ животворя́щия любве́ сосу́ды че́стны спаса́емых нас сотвори́,/ да ве́рни повеле́нием Госпо́дним пребыва́ем,/ друг дру́га лю́бяще и мир в себе́ иму́ще.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Ма́рка, зача́ло 37.
По 50-м псалме́ стихи́ра, глас 6:
Где твое́, сме́рте, жа́ло?/ Где твоя́, а́де, побе́да?/ Всу́е и́щете ве́рных Госпо́дних пожре́ти,/ вла́сти же не и́мате,/ победи́л бо есть вы Спас душ на́ших Христо́с Бог,/ дарова́в живо́т ве́чный всем земноро́дным,/ ве́рным Ца́рство Свое́ запове́да,/ Того́ насле́дницы Вениами́н и Ники́фор/ житие́м пра́ведным и кончи́ною му́ченическою яви́шася./ Ны́не, па́мять тех воспева́юще,/ нача́ло ве́чнаго жития́ их в Бо́зе пра́зднуем// и к по́мощи их моли́твенней взыва́ем.
Кано́н, глас 6.
Песнь 1
Ирмо́с: Волно́ю морско́ю/ Скры́вшаго дре́вле/ гони́теля мучи́теля,/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.
Припе́в: Святи́и преподобному́ченицы Вениами́не и Ники́форе, моли́те Бо́га о нас.
Сподо́би, Го́споди, просла́вити по достоя́нию преподобному́чеников Солове́цких, Вениами́на и Ники́фора,/ ти́и бо, си́лою Христо́вою вооружи́вшеся,/ искуше́нием вра́жиим противоста́ша/ и со́нма му́чеников украше́ние пресве́тлое яви́шася.
От ко́рене благочести́ваго произше́д, свя́те Вениами́не,/ ве́ре Христо́ве и любви́ Боже́ственней измла́да прилежа́л еси́/ и, боле́зни и труды́ благоду́шно претерпева́я,/ посреде́ мяте́жей мно́гих до конца́ сия́ сохрани́л еси́.
От святы́я ико́ны Вседержи́теля глас услы́шав, о́тче Вениами́не,/ мирска́я вся отри́нул еси́/ и ко ото́ку Солове́цкому стопы́ своя́ напра́вил еси́,/ иде́же, во оби́тели святе́й всели́вся,/ в послуша́ние Бо́гу всеце́ло себе́ вдал еси́.
Богоро́дичен: Путь ко спасе́нию откры́ла еси́ нам, Богоро́дице,/ жития́ непоро́чнаго о́браз чисте́йший явля́ющи./ Те́мже, на Тя взира́юще и Тебе́ моля́щеся,/ из глубины́ серде́чныя взыва́ем:/ я́звы грехо́в и стру́пы страсте́й на́ших исцели́ слеза́ми покая́ния.
Песнь 3
Ирмо́с: Тебе́, на вода́х/ пове́сившаго всю зе́млю неодержи́мо,/ тварь, ви́девши на ло́бнем ви́сима,/ у́жасом мно́гим содрага́шеся,/ несть свят,// ра́зве Тебе́, Го́споди, взыва́ющи.
По́двиги мно́гими подвиза́вся, Вениами́не всеблаже́нне,/ восходи́л еси́ от си́лы в си́лу/ и, к мона́шескому чи́ну и са́ну свяще́нному сопричте́н быв,/ служе́ние твое́ усе́рдно соверша́л еси́/ под покро́вом первонача́льников оби́тели Солове́цкия,/ к ни́мже умиле́нною душе́ю моли́твы простира́л еси́.
Мно́гих ра́ди доброде́телей и кро́ткаго твоего́ ду́ха, богоблаже́нне Вениами́не,/ нача́льник Си́йския оби́тели поста́влен был еси́, иде́же, Боже́ственным Покро́вом Пресвяты́я Тро́ицы/ и предста́тельством преподо́бнаго Анто́ния, первонача́льника оби́тели сея́, укрепля́емь,/ до́бре потруди́лся еси́,/ путеводя́ ста́до Христо́во ко спасе́нию.
Нестрое́нию во оби́тели Солове́цтей бы́вшу,/ избра́ша тя бра́тия в наста́вника духо́внаго себе,/ ве́дуще тя благонра́вием и послуша́нием укра́шена,/ любо́вию к Бо́гу и бли́жним обдержи́ма/ и му́дрость духо́вную стяжа́вша, Вениами́не достохва́льне.
Богоро́дичен: Обре́тши благода́ть у Сы́на Твоего́ заступа́ти немощны́й род челове́ческий, Богоро́дице,/ неусы́пно назира́еши лю́ди христиа́нския,/ и́ноком наипа́че покрови́тельствуеши,/ я́ко а́нгельскому чи́ну подража́телем,/ Сама́ бо вы́шши а́нгельскаго жи́тельство нам яви́ла еси́.
Седа́лен, глас 5:
Пла́мень о́гненный проше́дше, преподобному́ченицы,/ ве́чнаго поко́я сла́дость обрели́ есте́/ и, по́двиг во Христе́ жи́тельства му́жественне соверши́вше,/ пра́ведною кро́вию блаже́нство ра́йское сниска́ли есте́./ Мо́лим вас, святи́и:/ моли́теся за ны ко Го́споду,/ по́прище жития́ на́шего нам досто́йно проити́,/ стрел вра́жиих избе́гнути/ и ве́чныя поги́бели изба́витися.
Сла́ва, и ны́не, Богоро́дичен:
Засту́пницу Тя и́мамы пред Бо́гом, Пречи́стая Дево,/ не пре́зри раб Твои́х, на предста́тельство Твое́ наде́ющихся,/ моле́ние на́ше приими́ и по́мощь с Небесе́ низпосли́,/ да спасе́ние душ на́ших обря́щем.
Песнь 4
Ирмо́с: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,// я́ко Всеси́лен.
Повеле́нию Госпо́дню повину́яся,/ крест настоя́тельства оби́тели Солове́цкия, тя возрасти́вшей, со смире́нием прия́л еси́, Вениами́не достоблаже́нне./ Егда́ же си́ла вра́жия безу́мно на Це́рковь Правосла́вную воста́,/ страда́ния, предугото́ванная тебе́, безро́потне восприя́л еси́.
До́брое жи́тельство попра́вше,/ не́цыи от и́нок солове́цких послуша́нию не поревнова́ша/ и, самохоте́нием ме́сто супоста́ту в се́рдце свое́м да́вше,/ скорбь ве́лию оби́тели Солове́цтей и богоизбра́нному Вениами́ну, настоя́телю своему́, сотвори́ша,/ ду́шу свою́ за о́вцы своя́ положи́ти хотя́щему.
Ду́хом в Го́рняя простира́яся,/ до́льними скорбьми́ обремене́н быва́ше, Вениами́не преподо́бне,/ но моли́твою и любо́вию бу́рю мяте́жа посреде́ непокори́вых/ во оби́тели дре́вней укроща́л еси́, о́тче богому́дре,/ ста́до разобще́нное и́ноков во еди́но собира́я/ и Бо́га в Тро́ице Неразде́льнаго о поми́ловании умоля́я.
Богоро́дичен: Мо́лим Тя, Богоро́дице Де́во, вра́жиими злоде́йствы обурева́емии:/ сете́й злоухищре́нных свободи́,/ мучи́тельства страсте́й нас изба́ви,/ мир Бо́жий в ду́ши на́ша водвори́,/ терпе́нием Христо́вым снабдева́ющи.
Песнь 5
Ирмо́с: Богоявле́ния Твоего́, Христе́,/ к нам ми́лостивно бы́вшаго,/ Иса́ия, Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.
Оте́честву земно́му в чи́не во́инстем че́стно послужи́в, богоблаже́нне Ники́форе,/ во́инству Христо́ву приобщи́тися и еди́ному Бо́гу порабо́тати зело́ возжела́л еси́/ и, во оби́тель Солове́цкую всели́вся,/ досто́йно в чи́не и́ночестем и са́не иере́йстем Го́сподеви послужи́л еси́.
Обе́ты и́ноческия усе́рдно исполня́я,/ наста́вника ти Бо́гом да́ннаго Вениами́на любо́вию почита́л еси́, Ники́форе прехва́льне,/ те́мже и, стезе́ю страстоте́рпческою вку́пе ше́ствовав,/ му́ченичества красото́ю с ним украси́лся еси́.
Тве́рдо Христа́ испове́давше/ и напа́сти вра́жия ни во что́же вмени́вше,/ пострада́ти за Того́ сподо́билися есте́, Вениами́не и Ники́форе,/ уничиже́ние от беззако́нных,/ изгна́ние из оби́тели, во юдо́ль муче́ний нечести́выми обраще́нныя,/ труды́ поднево́льныя, поноше́ния и клевету́,/ вся претерпе́ли есте́, преподо́бнии.
Богоро́дичен: Над земле́ю Ру́сскою Покро́в держа́вный распросте́рши,/ не оста́вила еси́ нас от злодея́ний льсти́ваго поги́бнути, Засту́пнице Всеми́лостивая./ Помози́ нам и ны́не ве́ру и́стинную без стра́ха испове́дати/ и Правосла́вия побо́рником бы́ти.
Песнь 6
Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию Да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,// ми́лость сию́ оста́вили есте́.
Егда́ мрак безбо́жия пости́же зе́млю Ру́сскую/ и Солове́цкую оби́тель в темни́цу обрати́,/ тогда́ многоско́рбная сердца́ ва́ша испо́лнишася боле́зней и скорбе́й,/ я́же и до конца́ му́жественне понесли́ есте́, Христо́вы страстоте́рпцы,/ Про́мысл Бо́жий благи́й во всем разумева́юще.
Не́мощь челове́ческую ве́дуще,/ все упова́ние на Бо́га всеце́ло возложи́ли есте́, преподо́бнии,/ и, со смире́нием и кро́тостию пра́ведное Его́ попуще́ние восприи́мше,/ ве́рность Влады́це и зва́нию вы́шнему досто́йно сохрани́ли есте́./ Не оста́вите у́бо нас, святи́и,/ па́мять ва́шу све́тло почита́ющих.
Преподо́бным отце́м поревнова́вше/ и испове́дником ве́ры, за Христа́ страда́ния с ра́достию прие́мшим, после́довавше,/ соприча́стницы Солове́цким новому́чеником яви́стеся/ и Це́рковь Ру́сскую по́двиги све́тло украси́сте, богому́дрии.
Богоро́дичен: Влады́чице ми́ра, Ма́ти Всепе́тая,/ приими́ серде́чную моли́тву раб Твои́х, во умиле́нии Ти приноси́мую,/ и не лиши́ нас ми́лостиваго Твоего́ заступле́ния,/ но, я́ко Блага́я, спаси́ ду́ши на́ша.
Конда́к, глас 7.
Подо́бен: Разруши́л еси́:
Божéственными страдáнии,/ я́же за Христá претерпе́вше,/ отцы́ всеблажéннии,/ я́ко злáто в горни́ле дýши своя́ во огни́ очи́стили естé/ и во оби́тели гóрния ко Влады́це своемý ны́не пресели́лися есте́./ Сегó рáди прилéжно чтим и ублажáем вас,// преподобномýченицы Вениами́не и Ники́форе.
И́кос:
Благода́тию Госпо́днею на по́двиг испове́днический избра́ннии, Вениами́не и Ники́форе,/ преподо́бием и пра́вдою Бо́гу потруди́лися есте́ во святе́й оби́тели Солове́цтей,/ си́лою же вра́жиею во времена́ безбо́жная от нея́ удале́ннии,/ в моли́тве, и терпе́нии, и тве́рдом упова́нии дни жития́ своего́ провожда́ли есте́./ Смире́нию же кре́стному прилежа́вше,/ ра́достне сла́вили есте́ Го́спода, вся воскреси́вшаго Собо́ю,/ и, страда́льческую смерть прие́мше во дни Святы́я Па́схи,/ красото́ю му́ченическою украси́лися есте́ во Ца́рствии Спа́са на́шего./ Сего́ ра́ди приле́жно чтим и ублажа́ем вас,/ преподобному́ченицы Вениами́не и Ники́форе.
Песнь 7
Ирмо́с: Неизрече́нное чу́до:/ в пе́щи Изба́вивый преподо́бныя о́троки из пла́мене/ во гро́бе мертв, бездыха́нен полага́ется/ во спасе́ние нас пою́щих:/ Изба́вителю Бо́же,// благослове́н еси́.
Яко пусты́нницы, во изгна́нии пребыва́ли есте́, Вениами́не и Ники́форе,/ труды́ и моли́твами подвиза́ющеся день и нощь/ и славосло́вие Бо́гу в Тро́ице Единосу́щному и Неразде́льному возсыла́юще:/ Изба́вителю Бо́же, благослове́н еси́.
Ме́сто по́двигов после́дних в де́брех се́верных избра́ли есте́, досточу́днии,/ иде́же, мно́го потруди́вшеся,/ житие́ земно́е му́ченически сконча́ли есте́./ Ны́не Престо́лу Всевы́шняго предстои́те и победоно́сно взыва́ете:/ Изба́вителю Бо́же, благослове́н еси́.
Земны́я юдо́ли го́рести во мно́жестве позна́вше,/ благ неизрече́нных ны́не наслажда́етеся, Христо́ви страстоте́рпцы,/ ве́рен бо Госпо́дь, обетова́вый Ца́рствие Небе́сное лю́бящим Его́ и вопию́щим:/ Изба́вителю Бо́же, благослове́н еси́.
Богоро́дичен: Заве́та ве́чнаго Богоизбра́нная Таи́ннице,/ и Ца́рства Христо́ва Всеми́лостивая Врата́рнице!/ Го́спода и Влады́ку веко́в умоли́ о нас немощны́х, озлобле́нием вра́жиим му́чимых,/ Ты бо, Благосе́рдая Ма́ти, Помо́щница те́плая/ и Хода́таица живота́ ве́чнаго христиа́ном при́сно явля́ешися.
Песнь 8
Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в вы́шних Живы́й/ и во гроб мал странноприе́млется./ Его́же, о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Четыредеся́тницу святу́ю по́стнически соверши́вше,/ Па́сху Госпо́дню воспева́ли есте́, ду́хом пламене́юще./ Огнь же мучи́тельный, челове́ки зло́бными разжже́нный, му́жественне претерпе́вше,/ в Черто́г украше́нный внидо́сте,/ Христа́ воскре́сша пою́ще и превознося́ще во вся ве́ки.
Па́мять ва́шу пра́зднующе, новому́ченицы святи́и, ра́дуемся и ликовству́ем,/ днесь бо Па́сха ва́ша соверша́ется от земли́ в селе́ния Небе́сная восхо́дом невозбра́нным,/ вы же, я́ко ве́рнии служи́телие Христо́ви,/ насле́дницы благослове́ннии Небе́снаго Оте́чества яви́стеся,/ пою́ще и превознося́ще Го́спода во вся ве́ки.
Ве́рою и тве́рдым испове́данием ве́чнаго блаже́нства достиго́сте, преподо́бнии Вениами́не и Ники́форе,/ сме́ртию бо страда́льческою к Животу́ безсме́ртному преста́вилися есте́/ и кро́вию безви́нною багряни́цу Це́ркве Правосла́вныя украси́ли есте́,/ пою́ще и превознося́ще Го́спода во вся ве́ки.
Тро́ичен: Триипоста́сный Бо́же,/ Сло́вом сотвори́вый вся́ческая и Ду́хом к животу́ призва́вый земна́я и небе́сная!/ Ты челове́ческое естество́ в подо́бие Свое́ созда́л еси́,/ оскверне́нное же грехо́м Кро́вию Христа́ Твоего́ па́ки возста́вил еси́,/ Его́же, о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Послужи́вши Та́йне Бо́жией, челове́ческому разуме́нию непостижи́мей,/ сподо́би нас благода́ти Сы́на Твоего́, Пренепоро́чная,/ не́мощь на́шу укрепи́,/ житие́ уны́лое ми́лостию Твое́ю обогати́/ и ску́дную моли́тву на́шу Ду́ха Свята́го животво́рными дыха́нии раствори́.
Песнь 9
Ирмо́с: Не рыда́й Мене́, Ма́ти,/ зря́щи во гро́бе,/ Его́же во чре́ве без се́мене зачала́ еси́, Сы́на:/ воста́ну бо и просла́влюся,/ и вознесу́ со сла́вою непреста́нно, я́ко Бог,// ве́рою и любо́вию Тя велича́ющия.
Благода́рною душе́ю сла́вяще Творца́ и Бо́га,/ испове́дником и страстоте́рпцем Христо́вым приобщи́лися есте́, Вениами́не и Ники́форе./ Сердцеве́дец же Госпо́дь страда́льческия ра́ди кончи́ны/ венцы́ му́ченическими украси́ вас./ Те́мже помина́йте нас, ве́рою и любо́вию вас велича́ющих.
Я́коже Вениами́н, еди́н от сыно́в Изра́илевых, юне́йший бе в дому́ отца́ своего́,/ та́ко и ты, Вениами́не преподобному́чениче, после́дний нача́льник в Солове́цтей оби́тели был еси́./ И, я́коже Вениами́н, священнонача́льник Петрогра́дский,/ ты и́менем Христо́вым злоде́йства вра́жия препобеди́л еси́./ Те́мже помина́й нас, ве́рою и любо́вию тя велича́ющих.
Ча́шу страда́ний му́жественне испи́вше,/ венцы́ неувяда́емыми украси́лися есте́ во Ца́рствии Небе́снем, досточти́мии Вениами́не и Ники́форе./ Те́мже моли́те о оби́тели ва́шей Солове́цтей,/ да ми́р и любо́вь Госпо́дня во ве́ки с не́ю пребыва́ет,/ и нас помина́йте, ве́рою и любо́вию вас велича́ющих.
Богоро́дичен: Ца́рства Бо́жия би́сер драгоце́нен/ да возсия́ет в душа́х на́ших Твои́ми мольба́ми,/ Пречи́стая Де́во, Нача́льника жи́зни ве́чныя Ма́ти./ Помози́ нам, Блага́я,/ да, терпе́нием ду́ши стяжа́вше,/ воскресе́ния све́тлую ра́дость невозвра́тно Тобо́ю обря́щем.
Свети́лен, глас 3:
Све́том Христо́вым просвеща́еми,/ мрак беззако́ния попра́ли есте́, преподо́бнии,/ и испове́данием Трисо́лнечнаго Све́та тьму а́дову посрами́ли есте́,/ муче́ния же от сыно́в поги́бели прие́мше,/ безпеча́льное жи́тельство насле́довали есте́./ Те́мже, све́тлости святы́х прича́стницы яви́вшеся,/ ми́ру просвеще́ние испроси́те/ и душа́м на́шим ве́лию ми́лость.
Сла́ва, и ны́не, Богоро́дичен:
Свет Живота́ ве́чнаго возсия́ нам Тобо́ю, Благода́тная Мари́е,/ пло́тию бо родила́ еси́ Жизнода́вца Бо́га,/ смерть попра́вшаго, мир Собо́ю обнови́вшаго/ и всем ве́рным Воскресе́ние да́рующаго.
На хвали́тех стихи́ры, глас 7:
Ре́вностию по Бо́зе распаля́еми/ и жа́лостию о до́ме Госпо́дни снеда́еми,/ святы́ни оби́тели ва́шея от расхище́ния/ и поруга́ния нечести́вых сохраня́ли есте́,/ преще́ний же беззако́нныя вла́сти не устраши́вшеся,/ до конца́ страда́ния претерпе́сте/ и спасе́ние душа́м обрето́сте,/ преподобному́ченицы пресла́внии.// Ны́не сия́ете во сла́ве Госпо́дни.
Бре́мя поруга́ния и уничиже́ния оби́тели своея́ поне́сше/ и закла́ние, я́ко а́гнцы незло́бивии, безро́потне восприе́мше,/ ми́ру безу́мному укоре́ние бы́ли есте́/ и, а́нгелом по му́ченичестей кончи́не ва́шей совокупи́вшеся,/ в сла́ву Христо́ву добропобе́дне возшли́ есте́,/ страда́льцы преподо́бнии Вениами́не и Ники́форе,/ моли́те Влады́ку Христа́ Бо́га// спасти́ся душа́м на́шим.
По́двиг преподо́бных отце́в подъе́мше,/ богоблаже́ннии Вениами́не и Ники́форе,/ о́браз и́ноческаго жития́ благоче́стно показа́ли есте́,/ мно́жество же лише́ний и гоне́ния претерпе́вше,/ страстоте́рпцем Христо́вым уподо́билися есте́/ и, му́чеников мзду восприе́мше,/ я́ко зве́зды светоза́рныя в Ца́рствии Небе́снем возсия́ли есте́./ Мы же, па́мять ва́шу ны́не пра́зднующе,// усе́рдне мо́лим спасти́ся душа́м на́шим.
Прииди́те, мучениколю́бцы,/ возвели́чим и́стинных преподобному́чеников Вениами́на и Ники́фора,/ и́же Христа́ ра́ди, ско́рби и гоне́ния,/ поноше́ния и уничиже́ния претерпе́вше,/ лю́тую смерть от безбо́жных прия́ли суть./ Сего́ ра́ди с ли́ки преподо́бных и новому́чеников Солове́цких/ Престо́лу Бо́жию предстоя́т// и мо́лятся о душа́х на́ших.
Сла́ва, глас 1:
Егда́ во всесве́тлыя дни Воскресе́ния Христо́ва/ Бо́гу побе́дную песнь возноси́ли есте́, Вениами́не и Ники́форе,/ умерщвле́ние сме́рти пра́зднующе/ и утвержде́ние жи́зни торжеству́юще,/ кончи́не му́ченичестей приложи́лися есте́/ и, нетле́нию Небе́сному приобщи́вшеся,/ рая́ отве́рстыми враты́ в ра́дость соверше́нную востекли́ есте́,/ Па́сху ве́чную сла́вяще.
И ны́не, Богоро́дичен, глас то́йже:
Огнь Божества́ во утро́бе неопа́льне вмести́вши,/ Киво́т благода́ти свяще́ннейший яви́лася еси́, Де́во Пречи́стая,/ те́мже пла́менем Ду́ха Боже́ственнаго возжига́еши сердца́ ве́рных/ и ве́чнующему вра́жию пла́мени сих неприкоснове́нных твори́ши./ Возсия́й, Богома́ти, и в нас любве́ Бо́жия немерца́ющий свет,/ от борю́щих враг огражда́ющи,// и огнеды́шащия про́пасти а́довы изба́ви ду́ши на́ша.
И а́ще по́ст: на стихо́вне Сла́ва, глас 6:
Распе́ншемуся за ны Христу́ Бо́гу,/ смерть попра́вшему и ад плени́вшему,/ сораспина́лися есте́, страстоте́рпцы приснопа́мятнии,/ страда́ния мно́гая претерпе́вше да́же до сме́рти му́ченическия,/ ны́не в невече́рнем дни Ца́рства Бо́жия сла́дость ра́йскую вкуша́ете,/ исполне́ние наде́жды ва́шея улучи́вше./ И нам, Христо́ву Воскресе́нию покланя́ющимся/ и па́мять ва́шу пра́зднующим,// всегда́ сию́ наде́жду подава́йте.
И ны́не, Богоро́дичен от седми́чных, глас то́йже.
А́ще ли в сре́ду или́ пято́к, Крестобогоро́дичен:
Возведи́ сердца́ на́ша, Де́во,/ к па́мятствованию Страсте́й спаси́тельных Христа́ Бо́га/ и Твои́х Богома́терних страда́ний,/ я́же претерпе́ла еси́, ви́дящи Сы́на Твоего́ уничиже́на/ и пригвожде́на ко дре́ву Креста́,/ и́мже смерть упраздни́ся и мир спасе́ся./ Того́ у́бо Живоно́сною си́лою и Твои́ми всеси́льными моли́твами/ помози́ и нам от сете́й вра́жиих изба́витися// и милосе́рдием Бо́жиим спасти́ся.
В то́йже день на вече́рни, на Го́споди, воззва́х: стихи́ры, глас 5:
Прииди́те, христолюби́вии лю́дие,/ восхва́лим ревни́телей и защи́тителей до́блественных оби́тели Солове́цкия,/ Вениами́на, нача́льника ея́ после́дняго,/ вку́пе и Ники́фора, его́ сподви́жника,/ ти́и бо ве́лию скорбь разоре́ния оби́тели прия́ша,/ во времена́ же гоне́ний на Це́рковь Ру́сскую/ со́нму новому́чеников Солове́цких сопричте́ни бы́ша./ Ны́не же предстоя́т Престо́лу Госпо́дню// и мо́лятся о спасе́нии душ на́ших.
Крест страда́ний дан бысть ти свы́ше, богоизбра́нне Вениами́не,/ е́же оби́тель Солове́цкую от беззако́ний и бу́йства безбо́жных храни́ти,/ ты же, преподо́бне, заступа́я вве́ренную ти святы́ню,/ тверд и непрекло́нен яви́лся еси́/ и, вся́чески утесня́емь и изгоня́емь от враг быв,/ все упова́ние на Го́спода возлага́л еси́,/ оби́тели Солове́цкия после́дний нача́льниче// и сла́вный страстоте́рпче.
Я́коже пла́мень зло́бный попали́ во дни гоне́ний/ сла́вную оби́тель Солове́цкую,/ та́ко и Вениами́н многострада́льный,/ строи́тель сея́ оби́тели прехва́льный,/ вку́пе с преподобному́чеником Ники́фором,/ ду́ши скорбьми́ тя́жкими очи́стивше,/ паля́щим огне́м смерть прия́ша./ Те́мже, венцы́ му́ченическия от Го́спода прие́мше,/ ны́не Престо́лу Бо́жию во Ца́рствии Небе́снем предстоя́т// и мо́лятся о душа́х на́ших.
Мно́гия ско́рби и страда́ния на земли́ претерпе́вше/ и крест му́ченический со смире́нием и любо́вию в житии́ поне́сше,/ ны́не на Небе́си ра́дости неизрече́нныя наслажда́етеся,/ преподобному́ченицы Вениами́не и Ники́форе,/ и в со́нме святы́х Го́спода воспева́ете./ Того́ моли́те и нам по́прище земно́е досто́йно соверши́ти// и Ца́рствие Бо́жие насле́довати.
Сла́ва, глас 8:
Во изгна́нии су́ще,/ моли́тву непреста́нную слеза́ми растворя́ли есте́/ о оби́тели Солове́цтей, от безбо́жных разоря́емей,/ святи́и Вениами́не и Ники́форе,/ в не́йже мно́гия по́двиги и труды́ понесли́ есте́./ Во дни же Свята́го Воскресе́ния/ смерть му́ченическую за Христа́ прии́мше,/ Того́ победоно́сне просла́вили есте́./ Ны́не же, Престо́лу Бо́жию предстоя́ще,/ прославля́ете Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен от седми́чных, глас то́йже.
А́ще ли к среде́ или́ к пятку́, Крестобогоро́дичен:
И́же от крове́й Твои́х чи́стых воплоще́нна/ и па́че мы́сли от Тебе́, Чи́стая, рожде́нна,/ на Дре́ве ви́сима посреде́ злоде́ю зря́щи,/ утро́бою боле́ла еси́/ и, ма́терски рыда́ющи, вопия́ла еси́:/ увы́ Мне, Ча́до Мое́,/ ко́е Боже́ственное и неизрече́нное смотре́ние Твое́,/ и́мже оживи́л еси́ созда́ние Твое́?// Воспева́ю Твое́ благоутро́бие.
НА ЛИТУРГИ́И
Блаже́нны от кано́на, песнь 3-я и 6-я. Проки́мен, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 96.
Моли́тва
O досточýдная двóице отéц преподóбных, новомýчеников и страстотéрпцев Соловéцких, богомýдре Вениами́не начáльниче монáхов и вéрный егó помóщниче Ники́форе! Вы, благонрáвием и твéрдою вéрою благодáть у Бóга сниска́вше, и́ноком óбраз и́стиннаго служéния яви́ли есте́, наставля́юще их в путéх прáведных неуклóнно ходи́ти. Си́лою Бóжиею и вéлиею любóвию вáшею нестроéния в житии́ брáтстем укроща́юще, в ми́ре и благочéстии святýю оби́тель Соловéцкую до концá соблюдáли естé. Егдá же во дни гонéний лю́тых на Цéрковь Бóжию мрак беззакóний нáйде на свято́е ме́сто сие́, вы, стрáха не убоявшеся, в пóдвизе исповéдания вéры Христóвы свéтло просия́ли естé. В земли́ Архáнгельстей кончи́ну мýченическую во изгнáнии приéмше, в рáдость вéчную Цáрствия Небéснаго невозбрáнно возшли́ есте́. Те́мже мóлим вас, уго́дницы Христо́вы: сохрани́те оби́тель Солове́цкую невреждéнну от враг ви́димых и неви́димых, нам же помози́те пóдвигом дóбрым подвизáтися и дни своя́ на земли́ в ми́ре и покая́нии скончáти, да сподо́бимся насле́дницы бы́ти Ца́рствия Небе́снаго, иде́же вку́пе с ва́ми досто́йни яви́мся прославля́ти в Тро́ице сла́вимаго Бо́га, Отца́, и Сы́на, и Свята́го Ду́ха. Ами́нь.
