Служба преподобным Зосиме, Савватию и Герману Соловецким
Ме́сяца а́вгуста в 8-й день
Пе́рвое и вторóе пренесе́ние честны́х и многоцеле́бных моще́й
преподóбных и богонóсных оте́ц на́ших
Зоси́мы, Савва́тия и Ге́рмана,
Солове́цких нача́льников и чудотвóрцев
В ле́то 7074 (1566 от Рождества́ Христо́ва) пренесе́ны бы́ша мóщи святы́х Зоси́мы и Савва́тия от преде́л во свою́ им це́рковь;
в ле́то 7500 (1992 от Рождества́ Христова) пренесе́ны бы́ша мóщи святы́х Зоси́мы, Савва́тия и Ге́рмана из гра́да свята́го Петра́ во оби́тель Солове́цкую.
НА МА́ЛОЙ ВЕЧЕ́РНИ
На Гóсподи, воззва́х: стихи́ры на 4, глас 1.
Подóбен: Небе́сных чинóв:
На не́бо вознося́щии,/ криле́ Ева́нгельских дóблестей восприи́мше,/ отцы́ святи́и, преми́рных достигóсте/ и, та́мо водворя́ющеся,/ Зоси́мо, Савва́тие и Ге́рмане,// наслажда́етеся неизрече́нных благ.
Небе́сных благ жела́юще,/ мирска́я сла́дкая отвергóсте,/ а́лчбою и жа́ждою томя́ще себе́,/ ненасы́тимыя сла́дости рачи́телие бы́сте,/ ю́же ны́не вои́стину обретóсте,// отцы́ преподóбнии Зоси́мо, Савва́тие и Ге́рмане.
Дóльняя, я́ко преходя́щая,/ отве́ргше разýмно,/ вы́шняя при́сно пребыва́ющая возлюби́сте,/ блаже́ннии отцы́ Зоси́мо, Савва́тие и Ге́рмане,/ и та́мо водворя́етеся// доброде́телей восхожде́ньми.
Воздержа́нием сла́сти попра́сте/ и сле́зными истóчники пла́мень погаси́сте страсте́й;/ те́мже, зе́млю ны́не крóтких насле́довавше,/ свеселя́етеся преподóбным и пра́ведным,/ отцы́ святи́и// Зоси́мо, Савва́тие и Ге́рмане.
Сла́ва, глас 2:
Прииди́те, пóстническое сослóвие,/ днесь ублажи́м сýщия вои́стину блаже́нныя отцы́;/ пóстником бо удобре́ние яви́шася,/ доброде́тельми украси́вшеся изря́дно./ Те́мже, любóвию соше́дшеся, духóвне торжествýем,/ к ни́мже возопии́м:/ о преподóбнии отцы́ Зоси́мо, Савва́тие и Ге́рмане,/ я́ко имýще дерзнове́ние ко Христý Бóгу,/ мир и оставле́ние испроси́те// любóвию чтýщим всечестнýю па́мять ва́шу.
И ны́не, пра́здника, глас 8: Мрак закóнный:
На стихóвне стихи́ры, глас 2.
Подóбен: Дóме Евфра́фов:
Дом доброде́телей/ вы показа́стеся/ и прия́телище дарова́нием,/ отцы́ преподóбнии// Зоси́мо, Савва́тие и Ге́рмане.
Стих: Честна́ пред Гóсподем// смерть преподóбных Егó.
Страсте́й победи́телие,/ пло́ти томи́телие,/ язы́ку воздержа́телие,/ сласте́м умертви́телие бы́сте,// преподóбнии Зоси́мо, Савва́тие и Ге́рмане.
Стих: Блаже́н муж боя́йся Го́спода// в за́поведех Его́ восхо́щет зело́.
Чи́стыми ва́шими моли́твами/ Бóгови прибли́жившеся,/ благода́ть и́мате/ нечи́стыя отгоня́ти дýхи от челове́к,// преподóбнии отцы́ Зоси́мо, Савва́тие и Ге́рмане.
Сла́ва, и ны́не, Богорóдичен, глас и подóбен тóйже:
Обра́дованная, ра́дуйся,/ Я́же Ра́дость ми́ру рóждшая,/ Христа́ Жизнода́вца,/ и прама́тернюю, Де́во,// печа́ль отъе́мшая.
Тропа́рь пи́сан на вели́цей вече́рни.
Сла́ва, и ны́не, пра́здника.
НА ВЕЛИ́ЦЕЙ ВЕЧЕ́РНИ
Блаже́н муж, 1-й антифóн. На Гóсподи, воззва́х: стихи́ры на 10: пра́здника 4, и преподóбным 6, глас 8.
Подóбен: О, пресла́внаго чудесе́:
Отцы́ преподóбнии/ Зоси́мо, Савва́тие и Ге́рмане,/ впери́вше ум ваш к Бóгу ве́рою,/ мирска́го смеше́ния возгнуша́лися есте́ непостоя́ннаго/ и, крест ваш взе́мше, Всеви́дцу после́довали есте́,/ те́ло непокори́вое/ пóдвиги воздержа́ния/ пóмыслу порабóтивше,// си́лою Боже́ственнаго Дýха.
Отцы́ Богомýдрии/ Зоси́мо, Савва́тие и Ге́рмане,/ вы, от утрóбы ма́терни Христý прибли́жившеся,/ всем смы́слом Томý прилежа́ли есте́/ и, доброде́тельными цве́ты украша́еми,/ от ва́ших пóдвигов Бóгу Вседержи́телю/ плоды́ достóйныя принесли́ есте́, преподóбнии;/ те́мже благи́х наслажде́ние// восприя́ли есте́, досточýднии.
Преподóбнии отцы́ и премýдрии/ Зоси́мо, Савва́тие и Ге́рмане,/ боля́щим вы яви́лися есте́ исцеле́ние/ и хромы́м хожде́ние,/ всем же, притека́ющим с ве́рою/ к цельбонóсным моще́м ва́шим/ и прося́щим пóмощи и заступле́ния,/ моли́твами ва́шими// ми́лости неоскýдно подава́ете.
И́ны стихи́ры преподóбным, глас 2.
Подóбен: Егда́ от Дре́ва:
Егда́ уязви́лися есте́/ боже́ственным жела́нием,/ тогда́ вся, я́же в ми́ре кра́сная, ни во чтóже вмени́вше,/ Христý Спаси́телю после́довали есте́;/ бога́тство же мимотекýщее дóблественне презре́вше,/ сла́ву и могýщество,/ я́ко ничтóже сýщее, отве́ргли есте́;/ моли́те, мóлим вас,// спасти́ и просвети́ти дýши на́ша.
Егда́ Боже́ственное раче́ние на́йде на вас, преподóбнии отцы́,/ тогда́ жите́йския молвы́ отлучи́вшеся,/ в Помóрие пусты́нное отыдóсте,/ та́же в морски́й óстров удали́вшеся,/ в нем мнóга ле́та терпели́вне подвиза́лися есте́,/ мýжественно со враги́ неви́димыми боря́щеся,/ и́хже и победи́сте си́лою Христóвою;/ те́мже венцы́ сла́вы прия́ли есте́ от Христа́ Бóга,// Емýже моли́теся о чтýщих честнýю па́мять ва́шу.
Егда́ обе́ты и́ночества Гóсподеви возда́ли есте́,/ тогда́ ýмное óко бóдрственно на Не́бо впери́вше,/ мы́сленныя враги́ слеза́ми потопи́ли есте́;/ и непорóчно ходи́ти в путе́х закóна Госпóдня дýшу утверди́вше,/ Зоси́мо, Савва́тие и Ге́рмане,/ дерзнове́ние к Бóгу стяжа́ли есте́./ Сегó ра́ди мóлим вас:/ Тогó моли́те// спасти́ и просвети́ти дýши на́ша.
Сла́ва, глас 1:
Днесь пресве́тлая нам наста́ па́мять/ преподóбных оте́ц на́ших/ Зоси́мы, Савва́тия и Ге́рмана,/ ю́же соше́дшеся достóйно почти́м,/ во псалме́х и пе́снех и пе́ниих духóвных взыва́юще,/ и тех чудотвóрным моще́м предстоя́ще, си́це рцем:/ ра́дуйтеся, сокрóвища неистощи́мая;/ ра́дуйтеся, истóчницы благода́ти приснотекýщии;/ ра́дуйтеся, превожделе́нныя нам цельбонóсныя мóщи вселюбе́зных оте́ц на́ших;/ ра́дуйтеся, люботрýдныя плóти показýющии;/ ра́дуйтеся, благоуха́ющии нам свяще́нныя арома́ты./ О чудотвори́выя мóщи,/ целýюще вас, прие́млем благода́ть/ и Благода́теля Бóга прославля́ем,/ прославля́ющаго рабы́ Своя́ бога́тыми дарова́нии,/ вопию́ще Емý:// о всех Благи́й Гóсподи, сла́ва Тебе́.
И ны́не, пра́здника, глас тóйже: И́же дре́вле:
Вход. Проки́мен дне. И чте́ния 3 преподóбническая.
На лити́и стихи́ра хра́ма, и преподóбным, глас 1:
Преподóбнии отцы́ Зоси́мо, Савва́тие и Ге́рмане,/ соше́дшеся любóвию в па́мять ва́шу/ ко всечестны́м и чудотвóрным ва́шим моще́м,/ све́тло торжествýюще и во гла́сех пе́сненных пою́ще, вопие́м:// моли́теся Гóсподеви, поми́ловатися душа́м на́шим.
Све́тлая ва́ша па́мять,/ преподóбнии отцы́ на́ши/ Зоси́мо, Савва́тие и Ге́рмане,/ нам сердца́ просвеща́ет:/ зря́ще бо честны́я ва́ша мóщи,/ врачевствó страсте́м неудóбь цели́мым,/ прославля́ем просла́вльшаго вас Гóспода/ и ва́ша труды́ и пóдвиги венча́вша благода́тию./ Усе́рдно и мы подвигóм и трудóм е́мшеся,/ ва́шею стезе́ю позна́хом ходи́ти восле́д Христý Бóгу,// Егóже моли́те спасти́ и просвети́ти дýши на́ша.
Глас 2:
Предстоя́ще честны́м моще́м/ преподóбных оте́ц на́ших, о празднолю́бцы,/ возопии́м похва́льными гла́сы, глагóлюще:/ ка́ко вас ублажи́м, Зоси́мо, Савва́тие и Ге́рмане,/ на земли́ пожи́вших па́че челове́к/ и в Вы́шних блажи́мых со все́ми угóждшими Гóсподеви?/ С ни́миже предстоя́ще во све́те Боже́ственнем,/ моли́те, мóлим вас,/ изба́витися нам от собла́знов греховных// и спасти́ся душа́м на́шим.
По успе́нии ва́шем, блаже́ннии Зоси́мо, Савва́тие и Ге́рмане,/ учи́тели нам быва́ют мóщи ва́ша,/ при́сно бо излива́ют чудеса́, наставля́юще:/ возлюби́те Гóспода, да обря́щете благода́ть ве́чную/ и ничтóже па́че Егó почти́те,/ да егда́ прии́дет, обря́щете покóй со избра́нными Егó.// Егóже да улучи́м ва́шими моли́твами, преподóбнии.
Глас 4:
Днесь соше́дшеся, бра́тие,/ духóвне почти́м преподóбных оте́ц на́ших/ Зоси́му, Савва́тия и Ге́рмана,/ и́же постóм телеса́ своя́ изнури́ша,/ воздержа́нием стра́сти потреби́ша и бде́нием ум очи́стиша,/ моли́твами же дýши просвети́ша,/ нищетóю бога́тство прия́ша благода́ти/ и послуша́нием Бóга благопослýшна стяжа́ша,/ чистотóю жили́ще Пресвята́го Дýха бы́ша;/ и́хже ра́ди, врагóв шата́ния Христóс низложи́в,// да́рует нам мир и ве́лию ми́лость.
Сла́ва, глас 8:
Мона́хов мнóжества/ наста́вники вас чтим, отцы́ святи́и,/ ва́ми бо путь пра́вый вои́стинну ходи́ти позна́хом./ Блаже́ни есте́, я́ко Христý рабóтасте/ и вра́жию низложи́сте си́лу,/ А́нгелом собесе́дницы, преподóбным соприча́стницы и пра́ведным;/ с ни́миже моли́теся Гóсподеви,// поми́ловатися душа́м на́шим.
И ны́не, пра́здника, глас 5: Закóна и прорóков:
На стихóвне стихи́ры, глас 8.
Подóбен: О, пресла́внаго чудесе́:
Прииди́те и приими́те, бра́тие,/ лию́щияся благода́ти/ от моще́й преподóбных оте́ц на́ших/ Зоси́мы, Савва́тия и Ге́рмана,/ ти́и бо подвиза́шася без ле́ности во вре́менней жи́зни/ и я́ко безплóтнии во плóти пожи́ша./ Те́мже и прия́ша да́ры от Христа́ Бóга,/ и нам прóсят очище́ния// и ве́лия ми́лости.
Стих: Честна́ пред Гóсподем// смерть преподóбных Егó.
Цельбонóсным ва́шим моще́м предстоя́ще,/ отцы́ на́ши Зоси́мо, Савва́тие и Ге́рмане,/ прие́млем оби́льно благода́ть,/ всяк бо приходя́й с ве́рою не посрами́тся,/ прие́млет бо, и́хже тре́бует,/ прославля́ющу вас Гóсподу,/ я́ко благоугóдных рабóв бы́вших своемý Влады́це/ и Тогó за́поведи сохра́ньших.// Те́мже вас чтим и ублажа́ем.
Стих: Блаже́н муж боя́йся Гóспода,// в за́поведех Егó восхóщет зелó.
Истóчницы приснотекýщии/ врачевства́ безме́зднаго,/ честны́я мóщи ва́ша, досточýднии отцы́/ Зоси́мо, Савва́тие и Ге́рмане:/ о вели́кия благода́ти,/ о си́лы живонóсных мертвеце́в!/ И́хже моли́твами, Иисýсе Царю́,/ спаси́ дýши на́ша,// я́ко Еди́н Милосе́рд.
Сла́ва, глас 4:
Весели́тся явле́нно Христóва Це́рковь честна́я/ и торжествýет све́тло,/ возсия́ бо днесь пресве́тлая и всепра́зднственная па́мять/ пренесе́ния честны́х моще́й преподóбных и богоблаже́нных оте́ц на́ших/ Зоси́мы, Савва́тия и Ге́рмана,/ крася́щися их многотрýдными пóдвиги, я́ко многоце́нною оде́ждею,/ и вопие́т хва́лящися и глагóлющи:/ сицева́я моя́ рожде́ния, такови́и мои́ сы́нове,/ и́хже Ева́нгелием породи́х,/ воспита́х же стра́хом Госпóдним,/ и ны́не преподóбны ви́жу./ Прииди́те, пóстническое сослóвие/ и преподóбных ликостоя́ние,/ и ра́дуйтеся со мнóю,/ име́ю бо в себе́ принесе́нное неистощи́мое сокрóвище,/ пречестны́я и всебога́тыя мóщи преподóбных оте́ц,/ и́же ны́не Престо́лу Бо́жию предстоя́т и мо́лятся,// да ми́лостив бýдет нам в День сýдный.
И ны́не, пра́здника, глас 1: Твоегó Единорóднаго Сы́на:
На благослове́нии хле́бов тропа́рь преподóбным, глас 8:
Я́ко свети́льницы яви́стеся всесве́тлии/ во отóце океа́на мóря,/ преподóбнии отцы́ на́ши Зоси́мо, Савва́тие и Ге́рмане:/ вы бо, крест Христóв на ра́мо взе́мше,/ усе́рдно Томý после́довасте/ и, чистотóю Бóгови прибли́жившеся,/ отонýдуже си́лами чуде́с обогати́стеся./ Те́мже и мы любе́зно притека́ем ко святы́м моще́м ва́шим и уми́льно глагóлем:/ о преподóбнии, моли́те Христа́ Бóга// спасти́ся душа́м на́шим.
Ин тропа́рь, глас 4:
Пóстническое и равноа́нгельное житие́ ва́ше,/ преподóбнии отцы́ Зоси́мо, Савва́тие и Ге́рмане,/ вселе́нней позна́ны сотвори́ вас:/ чудодея́нии бо разли́чными, богонóснии, просвеща́ете// ве́рою призыва́ющия вы и чтýщия честнýю па́мять ва́шу.
Сла́ва, и ны́не, пра́здника.
НА У́ТРЕНИ
На Бог Госпóдь: тропа́рь пра́здника, два́жды. Сла́ва, преподóбным. И ны́не, пра́здника.
По 1-й стихоло́гии седа́лен, глас 1:
Житие́ на земли́ благоче́стно сконча́вше,/ чи́сто селе́ние Святóму Дýху яви́стеся/ и просвеща́ете и́же ве́рою приходя́щия/ к честны́м моще́м ва́шим, блаже́ннии./ Те́мже моли́те Влады́ку Христа́ Бóга, богомýдрии отцы́ Зоси́мо, Савва́тие и Ге́рмане,/ просвети́ти дýши пра́зднующих всечестнýю па́мять ва́шу. Два́жды.
Сла́ва, и ны́не, пра́здника.
По 2-й стихоло́гии седа́лен, глас 5:
Пóстники Госпóдни пе́сньми почти́м,/ я́ко умертви́вшия вся прилóги страсте́й/ воздержа́нием тве́рдым и кре́пким терпе́нием/ и посрами́вшия сопроти́внаго всю горды́ню./ Ны́не моли́теся Гóсподеви,/ преподóбнии отцы́ Зоси́мо, Савва́тие и Ге́рмане,/ поми́ловатися душа́м на́шим. Два́жды.
Сла́ва, и ны́не, пра́здника.
Велича́ние:
Ублажа́ем вас,/ преподóбнии отцы́ на́ши Зоси́мо, Савва́тие и Ге́рмане,/ и чтим святýю па́мять ва́шу,/ наста́вницы мона́хов,// и собесе́дницы А́нгелов.
Псалóм избра́нный:
Терпя́ потерпе́х Гóспода, и внят ми и услы́ша моли́тву мою́.
Поста́ви на ка́мени нóзе мои́, и испра́ви стопы́ моя́.
Се, удали́хся бе́гая, и водвори́хся в пусты́ни.
Уподóбихся нея́сыти пусты́нней.
Бдех, и бых я́ко пти́ца осóбящаяся на зде.
Коле́на моя́ изнемогóста от поста́, и плоть моя́ измени́ся еле́я ра́ди.
Слеза́ми мои́ми посте́лю мою́ омочý.
Я́ко обыдóша мя пси мнóзи, сонм лука́вых одержа́ша мя.
Напрягóша лук свой, вещь гóрьку, состреля́ти в та́йных непорóчнаго.
Предзре́х Гóспода предо мнóю вы́ну, я́ко одеснýю мене́ есть, да не подви́жуся.
Вси язы́цы обыдóша мя, и и́менем Госпóдним противля́хся им.
Благослове́н Госпóдь, И́же не даде́ нас в лови́тву зубóм их.
Да испове́дятся Тебе́, Гóсподи, вся дела́ Твоя́, и преподóбнии Твои́ да благословя́т Тя.
И уве́дите, я́ко удиви́ Госпóдь преподóбнаго Своегó.
И утруди́ся во век, и жив бýдет до конца́.
Храни́т Госпóдь дýши преподóбных Свои́х.
Восхва́лятся преподóбнии во сла́ве, и возра́дуются на лóжах свои́х.
Честна́ пред Гóсподем смерть преподóбных Егó.
Пóйте Гóсподеви, преподóбнии Егó, и испове́дайте па́мять святы́ни Егó, во всех лю́дех чудеса́ Егó.
Сла́ва, и ны́не: Аллилýия: три́жды.
По полиеле́и седа́лен, глас 8:
Егда́, блаже́ннии, к Боже́ственному жела́нию ум свой впери́сте,/ тогда́ оста́висте вся дóлу влекýщая мудрова́ния/ и в пусты́ню всели́стеся в морски́й óстров,/ иде́же процветóсте, я́ко ке́дри, доброде́тельми прекра́снии,/ страсте́й искорени́вше те́рние,/ и в нем насади́сте плоды́ трудóв свои́х,/ те́мже и пожа́сте рукоя́тие,/ неотъе́млемо бога́тство на Небесе́х./ Зоси́мо, Савва́тие и Ге́рмане преподóбнии,/ моли́те Христа́ Бóга/ согреше́ний оставле́ние пода́ти/ чтýщим любóвию святýю па́мять ва́шу. Два́жды.
Сла́ва, и ны́не, пра́здника.
Степе́нна, 1-й антифóн 4-го гла́са. Проки́мен, глас 4: Честна́ пред Гóсподем// смерть преподóбных Егó. Стих: Что возда́м Гóсподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподóбнии отцы́,/ слух свой смире́нно Ева́нгелию Христóву приклони́вше,/ зва́ние от Вы́шняго во оби́тели Небе́сныя прия́сте/ и, Томý ве́рно после́дующе,/ ми́ра кра́сная во уме́ты вмени́сте/ и еди́ныя добрóты вожделе́сте Христа́;/ Емýже приле́жно моли́теся,/ низпосла́ти ми́рови мир и Це́рквам единомы́слие,/ стране́ на́шей на враги́ одоле́ние,/ бра́тии оби́тели ва́шея единодýшие и смиренномýдрие// и душа́м на́шим ве́лию ми́лость.
Канóна два: пра́здника, со ирмосóм на 6, ирмóс по два́жды; и преподóбным отце́м, на 8. Катава́сия, глас 4: Ли́цы изра́ильтестии:
Канóн преподóбным, глас 2.
Песнь 1
Ирмóс: Гряди́те, лю́дие,/ пои́м песнь Христý Бóгу,/ разде́льшему мóре и наста́вльшему лю́ди,/ я́же изведе́ из рабóты еги́петския,// я́ко просла́вися.
Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.
Просвеще́нием Трисóлнечнаго Божества́ озари́вшеся, премýдрии,/ свети́ла яви́стеся осиява́юща всю́ду:/ тем и нас, страстьми омраче́нных,/ просвеще́нием благода́ти озари́ти помоли́теся/ и сýщаго получи́ти спасе́ния.
Све́том Боже́ственныя благода́ти просвеща́еми,/ Зоси́мо, Савва́тие и Ге́рмане преблаже́ннии,/ ве́рно светонóсную ва́шу па́мять торжествýющих просвети́те/ и от тьмы грехóвныя моли́твами ва́шими, преподóбнии, изба́вите.
Дýху Святóму хра́ми, премýдрии, бы́сте,/ и к Немý все духóвное жела́ние обрати́сте,/ и сегó ра́ди крóтких зе́млю насле́довасте./ Те́мже бýрю стра́стей на́ших укроти́те, преподóбнии,/ да в тишине́ боже́ственней песнослóвим ва́ша пóдвиги.
Богорóдичен: Лю́тыми страсте́й наве́ты обурева́емь есмь, Отрокови́це,/ и прилóги грехóвными погружа́емь;/ к Твоемý еди́ному ти́хому и невла́емому приста́нищу любóвию прибега́ю, Всепе́тая:/ уще́дривши спаси́ мя, Присноде́во.
Песнь 3
Ирмóс: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден, па́че Тебе́, Гóсподи.
Высотóю смире́ния украша́еми,/ Зоси́мо, Савва́тие и Ге́рмане преподóбнии,/ все жела́ние ко Влады́це своемý прострóсте,/ я́ростная же движе́ния на враги́ вооружи́сте,/ со изря́дными де́лы свои́ми, постóм и моли́твами.
Плóтей свои́х воста́ния кре́пким поще́нием, преподóбнии, умертви́вше,/ оби́телище бы́сте Влады́чне;/ Егóже умоли́те изба́витися скорбе́й и мучи́тельства страсте́й/ с ве́рою притека́ющим к вам, преблаже́ннии.
Имýща споспешествýющу боже́ственную си́лу,/ исцеле́ния безчи́сленная источа́ют мóщи ва́ша, Зоси́мо, Савва́тие и Ге́рмане преподóбнии:/ отгоня́ют от челове́к боле́зни теле́сныя/ и душе́вныя стра́сти врачýют пóдвиги ва́шими, всечестни́и.
Богорóдичен: Тружда́ет мя бýря грехóвная/ и возмуще́ние безме́стных помышле́ний:/ умилосе́рдися, Всенепорóчная, и рýку ми пóмощи я́ко ми́лостива простри́,/ да спасе́н велича́ю Тя.
Конда́к и и́кос пра́здника.
Седа́лен преподóбным, глас 4:
Жите́йское мóре воздержа́нием безбе́дно преплы́сте/ и ко приста́нищу мы́сленному безстра́стия, ра́дующеся, доидóсте,/ преподóбнии отцы́ на́ши Зоси́мо, Савва́тие и Ге́рмане,/ богомýдрии и преблаже́ннии;/ моли́те Христа́ Бóга, спасти́ся душа́м на́шим. Два́жды.
Сла́ва, и ны́не, пра́здника.
Песнь 4
Ирмо́с: Прише́л еси́ от Де́вы не хода́тай, ни А́нгел,/ но Сам, Гóсподи, воплóщся/ и спасл еси́ всегó мя челове́ка.// Тем зовý Ти: сла́ва си́ле Твое́й, Гóсподи.
Умóм и душе́ю предочи́стившеся, преподóбнии,/ пре́лесть душепа́губную всеконе́чне от себе́ отвергóсте/ и, чýвства своя́ к немýтней тишине́ упра́вивше,/ во отóк морски́й, премýдрии, всели́стеся, воспева́юще:/ сла́ва си́ле Твое́й, Гóсподи.
Закóном Писа́ния Свяще́ннаго и ра́зуму святы́х поуча́ющеся,/ Зоси́мо, Савва́тие и Ге́рмане преподóбнии,/ вся́кия доброде́тели óбразу навыкóсте, мýдрей пчеле́ подóбящеся,/ и прия́телище изря́дно Дýху Святóму, премýдрии, бы́сте, воспева́юще:/ сла́ва си́ле Твое́й, Гóсподи.
Вся́ческими, преподóбнии, светя́щеся чудоде́йствы/ и боже́ственною озаря́еми благода́тию,/ всем позна́стеся сокрóвище исцеле́ний неистощи́мо,/ страсте́й отгоня́ете омраче́ние/ и вра́жия низлага́ете ополче́ния, воспева́юще:/ сла́ва си́ле Твое́й, Гóсподи.
Богорóдичен: Из утрóбы Твоея́, Чи́стая Отрокови́це, возсия́в Боже́ственное Сóлнце,/ сýщия во тьме многобóжия просвети́/ и в се́ни сме́ртней седя́щия, Влады́чице, осия́,/ Емýже воспева́юще зове́м:/ сла́ва си́ле Твое́й, Гóсподи.
Песнь 5
Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ ýтренюю, Царю́ ми́ра,/ просвети́ мя сия́нием Твои́м,// инóго бо, ра́зве Тебе́, бóга не зна́ю.
Те́сный путь простра́нному предпоче́тше,/ во отóце морсте́м вся́ческая утесне́ния ра́достию претерпева́ли есте́, преподóбнии,/ боже́ственными же поуче́нии дýши своя́ очища́юще,/ на добрóту Бóжию неизглагóланную при́сно взира́ли есте́, преблаже́ннии.
Незлóбиви, и крóтцы, и ми́лостиви бы́сте, преподóбнии,/ вся злóбы и стре́лы вра́жия до конца́ погýбльше;/ те́мже, благода́ть от Бóга свы́ше прие́мше, ми́лостивно нас посеща́йте,/ любóвию святýю па́мять ва́шу почита́ющих.
Я́ко вели́кое сóлнце, вели́чием пóдвиг ва́ших/ возсия́сте нам, Зоси́мо, Савва́тие и Ге́рмане преподóбнии,/ земны́я осиява́юще концы́/ и вся просвеща́юще све́том богоразýмия./ Те́мже мóлим вы:/ просвети́те наш ра́зум, отцы́ преблаже́ннии.
Богорóдичен: От мнóжества востаю́щих на ны в боле́зни исчезе́ живóт наш,/ погрязóхом в прóпасти безчи́сленных согреше́ний./ Спаси́ ны, Влады́чице, и возведи́ я́ко ми́лостива, Всенепорóчная,/ Тебе́ бо и́мамы Еди́ну Предста́тельницу непобеди́му, раби́ Твои́.
Песнь 6
Ирмо́с: В бе́здне грехóвней валя́яся,/ неизсле́дную милосе́рдия Твоегó призыва́ю бе́здну:// от тли, Бóже, мя возведи́.
Ева́нгельски, преподóбнии, Христа́ возлю́бльше, ми́ра отврати́стеся,/ в непроходи́мыя же и в пусты́я отóки заше́дше,/ Еди́ному Влады́це своемý прилепи́стеся,/ от Негóже и трудóм воздая́ние прие́мше, животý ве́чному я́ве причасти́стеся,/ за пою́щия вы моли́теся.
Богомýдрыми пóмыслы преудобри́вшеся, преподóбнии,/ и вся, я́же на земли́ льстя́щая, я́ко уме́ты вмени́вше,/ к нестаре́ющему преста́вистеся блаже́нству./ Ныне с ли́ки во све́те безплóтных сил о Бóзе при́сно сликовству́ете, преблаже́ннии.
Стра́нна и пресла́вна, преподóбнии, о Бóзе содева́юще чудеса́,/ всем, и́же в мóри пла́вающим и зле стра́ждущим,/ призыва́еми скóро предстае́те, от бед избавля́юще;/ и нас, бе́дствующих лю́те и напа́стьми одержи́мых,/ ми́лостивно предста́вше спаса́йте, преблаже́ннии.
Богорóдичен: Греха́ тя́жкое бре́мя, е́же отяготе́ на мне, Пречи́стая, облегчи́:/ Ты бо еси́ Предста́тельница гре́шником пресла́вная,/ Изба́вителя и Спа́са рóждши земны́м.
Конда́к преподóбным, глас 2:
Христóвою любóвию уязви́вшеся, преподóбнии,/ и Тогó крест на ра́мо взе́мше,/ понесли́ есте́, боже́ственне вооружи́вшеся на неви́димыя враги́/ и, непреста́нныя моли́твы я́ко копие́ в рука́х имýще,/ кре́пко победи́ли есте́ бесóвская ополче́ния;/ благода́ть Госпóдню прие́мше цели́ти недýги душ и теле́с/ притека́ющих ко святы́м моще́м ва́шим,/ чуде́с лучи́ испуща́ете всю́ду./ Тем зове́м вам:// ра́дуйтеся, преподóбнии отцы́ на́ши Зоси́мо, Савва́тие и Ге́рмане, мона́хом украше́ние.
И́кос:
Кто довóлен изрещи́ ва́ша чудодея́ния,/ преподóбнии отцы́ Зоси́мо, Савва́тие и Ге́рмане?/ Мы ýбо, ра́достию и боже́ственною любóвию почита́юще всехва́льную и всечестнýю па́мять ва́шу,/ от непости́жнаго ума́ на́шего недостóйнии,/ ма́лое сие́ пе́ние принóсим:/ ра́дуйтеся, испóлненнии Христóвы красоты́,/ и пресве́тла от Негó и преизоби́льна восприи́мшии ве́чнующая воздая́ния:/ телесы́ ýбо вас морски́й óстров прия́т,/ дýши же са́мое Не́бо,/ иде́же пóчести трудóв свои́х, прехва́льнии,/ восприя́сте от Христа́ всех Царя́ и Бóга./ Те́мже мóлим вы:/ посеща́йте ми́лостивно и моли́те непреста́нно о всех нас,/ преподóбнии отцы́ на́ши Зоси́мо, Савва́тие и Ге́рмане, мона́хом украше́ние.
Песнь 7
Ирмо́с: Óбразу златóму, на пóле Деи́ре служи́му,/ трие́ Твои́ óтроцы небрегóша безбóжнаго веле́ния,/ посреде́ же огня́ вве́ржени, ороша́еми, поя́ху:// благослове́н еси́, Бóже оте́ц на́ших.
В моли́твах бóдренное, и в поще́ниих кре́пкое,/ и терпе́ние во искуше́ниих неосла́бное, ума́ чистотóю, преподóбнии, показа́сте,/ земли́ бо и земны́х достóйно отстýпльше,/ Небе́сное обретóсте наслажде́ние, воспева́юще:/ благослове́н Бог оте́ц на́ших.
Плод духóвный и же́ртву непорóчную, житие́ свое́, преподóбнии, Влады́це принесóсте,/ в воздержа́нии бо вся́цем пожи́сте,/ от Негóже и пóчести трудóм я́ко подвигополóжницы восприе́мше,/ де́йствуете пресла́вная чудеса́, воспева́юще:/ благослове́н Бог оте́ц на́ших.
Страстьми́ коле́блющихся и бýрею грехóвною, преподóбнии, погружа́емых,/ я́ко вели́кое к Бóгу дерзнове́ние имýще, руковóдствуйте/ и всегда́, премýдрии, сохраня́йте почита́ющих вас благоче́стно,/ я́ко да воспева́ем:/ благослове́н Бог оте́ц на́ших.
Богорóдичен: Изба́ви нас от напа́стей и скорбе́й, и печа́лей разли́чных,/ и иноплеме́нных наше́ствия, и междоусóбныя бра́ни, Влады́чице Всепе́тая,/ я́ко да Тя сла́вим и Сы́ну Твоемý взыва́ем:/ благослове́н Бог оте́ц на́ших.
Песнь 8
Ирмо́с: Пещь иногда́ óгненная в Вавилóне де́йства разделя́ше,/ Бóжиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпóдня, Гóспода.
В пребыва́лища при́сно живýщая всели́стеся, преподóбнии,/ нетле́нных благ наслажда́ющеся и Трисóлнечныя све́тлости исполня́ющеся./ Нас, призыва́ющих вы, те́плым предста́тельством ва́шим от всех лю́тых спаса́йте, пою́щих:/ благослови́те, вся дела́ Госпóдня, Гóспода.
Нам, любóвию почита́ющим вас/ и честнóе ва́ше соверша́ющим торжествó,/ Христóвы угóдницы Зоси́мо, Савва́тие и Ге́рмане, преподóбнии отцы́,/ согреше́нием испроси́те оставле́ние, и страсте́й премене́ние,/ и Боже́ственнаго све́та осия́ние, пою́щим:/ благослови́те, вся дела́ Госпóдня, Гóспода.
Трóичен: О Пребезнача́льное естествó и Триипоста́сное еди́нство,/ Óтче и Сы́не и Дýше Пресвяты́й,/ приими́ о нас моли́твенники Твоя́ преподóбныя угóдники/ и пода́ждь прегреше́нием разреше́ние, и житию́ исправле́ние, и злых отчужде́ние,/ и сподóби ны в ми́ре воспева́ти Твою́ держа́ву:/ благослови́те, вся дела́ Госпóдня, Гóспода.
Богорóдичен: Я́ко Еди́на рóждшая безсе́менным рождествóм Христа́ Бóга,/ Ма́ти Безневе́стная Чи́стая,/ Сегó ми́лостива сотвори́, Влады́чице,/ спасти́ рабы́ Твоя́ от наси́лия и мучи́тельства вра́жия,/ вопию́щия Христý Сы́ну Твоемý:/ благослови́те, вся дела́ Госпóдня, Гóспода.
Песнь 9
Ирмо́с: Безнача́льна Роди́теля Сын, Бог и Госпóдь,/ вопло́щься от Де́вы, нам яви́ся,/ омраче́нная просвети́ти, собра́ти расточе́нная.// Тем Всепе́тую Богорóдицу велича́ем.
Выспрь к Бóгу имýще мысль, Зоси́мо, Савва́тие и Ге́рмане преподóбнии,/ земна́я оста́вльше, Небе́сная восприя́сте, Бóгу и Спа́су вас вельми́ просла́вльшу,/ трудóв ра́ди ва́ших и воздержа́ния неосла́бнаго./ Сегó ра́ди почита́ем вас, преблаже́ннии.
И́хже благ, преподóбнии, получи́сте/ и Небе́сныя сла́вы, ея́же от Бóга сподóбистеся,/ и Емýже вы́ну предстоя́ще, моли́теся и нам неотлуче́нным бы́ти, мóлим вы,/ ра́достию и боже́ственною любóвию почита́ющим пóдвиги ва́ша, всечестни́и.
О боже́ственнии и богомýдрии отцы́ Зоси́мо, Савва́тие и Ге́рмане!/ Ми́рови мир от Бóга низпосла́тися испроси́те,/ Це́рквам соедине́ние, святе́й оби́тели ва́шей утвержде́ние/ и всем правосла́вным христиа́ном предста́тельство и спасе́ние, преблаже́ннии.
Богорóдичен: Пощади́ мя, Христе́ Спа́се,/ пощади́ моли́твами Рóждшия Тя, и всех святы́х Твои́х,/ егда́ ся́деши суди́ти делóм мои́м,/ беззакóния и грехи́ моя́ пре́зри, я́ко Еди́н безгре́шен./ Мир же пода́ждь и спасе́ние воспева́ющим Тя,/ Ми́лостиве Бóже и Человеколю́бче.
Свети́лен преподóбным:
Мирска́го пристра́стия, я́ко скве́рны уклони́вшеся/ и а́лчбою плоть умертви́вше, блаже́ннии,/ Небе́сною сла́вою со А́нгелы обогати́стеся,/ те́мже непреста́нно о нас моли́те Христа́ Бóга,/ преподóбнии отцы́ на́ши Зоси́мо, Савва́тие и Ге́рмане. Два́жды.
Сла́ва, и ны́не, пра́здника.
На хвали́тех стихи́ры преподóбным, глас 8.
Подóбен: О, пресла́внаго чудесе́:
Име́юще боже́ственную благода́ть учи́теля,/ целоýмием вас наставля́ющу/ к жела́нию боже́ственному,/ отню́дуже мирска́го мяте́жа отрекли́ся есте́/ и к ра́зуму и́стинному возвели́ся есте́,/ боле́зненными же себе́ труды́ умудря́юще,/ покори́ли есте́ лýчшему хýждшее,/ Зоси́мо, Савва́тие и Ге́рмане преподóбнии,// моли́те спасти́ся нам.
Преподóбнии отцы́/ Зоси́мо, Савва́тие и Ге́рмане,/ любве́ ра́ди Христóвы,/ вся я́же на земли́ презре́ли есте́/ и, в пусты́ню всели́вшеся,/ плотски́я пóхоти мудрова́ние умертви́ли есте́,/ пóстническими труды́ свое́ житие́ уясни́ли есте́,/ тем и Христóс да́ром чуде́с обогати́ вас.// Помина́йте нас, чтýщих па́мять ва́шу, досточýднии.
Доброде́тели стяжа́ли есте́,/ преподóбнии Зоси́мо, Савва́тие и Ге́рмане,/ и́миже Бóгови/ прибли́житися разумева́юще,/ к Томý востекли́ есте́/ и при́сно хода́тайствуете о нас,/ е́же ми́рно житие́ преити́,/ спасти́ся от собла́зн льсти́ваго// и святы́х ра́дости óбщником бы́ти.
Прииди́те, вси хотя́щии исцеле́ния,/ и почерпи́те винó дýши веселя́щее,/ ника́коже сумня́щеся,/ испóлнь бо честне́йшая ча́ша/ преблаже́нных оте́ц на́ших/ Зоси́мы, Савва́тия и Ге́рмана,/ излива́ет всем/ приходя́щим с ве́рою,// душа́м и телесе́м здра́вие.
Сла́ва, глас 6:
Преподóбнии отцы́ на́ши Зоси́мо, Савва́тие и Ге́рмане,/ во всю зе́млю изы́де веща́ние исправле́ний ва́ших,/ те́мже и на Небесе́х обретóсте мзду трудóв свои́х:/ бесóвския полки́ погуби́сте/ и а́нгельским чинóм совокупи́стеся,/ и́хже житию́ дóбре поревнова́сте./ Дерзнове́ние имýще к Бóгу,// ми́ра проси́те душа́м на́шим.
И ны́не, пра́здника, глас 8. Византи́ево: Поя́т Христóс Петра́, Иа́кова и Иоа́нна:
Славослóвие вели́кое. Ектении́, и отпýст.
НА ЛИТУРГИ́И
Блаже́нна пра́здника, от втора́го канóна песнь 3-я, на 4, и преподóбным, песнь 6-я, на 4. Проки́мен пра́здника, глас 4: Я́ко возвели́чишася дела́ Твоя́, Гóсподи,// вся премýдростию сотвори́л еси́. И преподóбным, глас 7: Честна́ пред Гóсподем// смерть преподóбных Егó. Стих: Что возда́м Гóсподеви о всех, я́же воздаде́ ми? Апóстол к Гала́том, зача́ло 213. Аллилýия пра́здника, глас 8. И преподóбным, глас 6: Блаже́н муж, боя́йся Гóспода, в за́поведех Егó восхóщет зелó. Стих: Си́льно на земли́ бýдет се́мя Егó. Ева́нгелие от Луки́, зача́ло 24. Прича́стен пра́здника: Гóсподи, во све́те лица́ Твоегó пóйдем, и о и́мени Твое́м возра́дуемся во ве́ки. И преподóбным: В па́мять ве́чную бýдет пра́ведник, от слýха зла не убои́тся.
Моли́тва, что́мая в Солове́цтей оби́тели
O преподо́бнии и богоно́снии отцы́ на́ши Зоси́мо, Савва́тие и Ге́рмане, земни́и а́нгели и Небе́снии челове́цы, бли́жнии дру́зи Христо́вы и уго́дницы Бо́жии, оби́тели ва́шея сла́во и украше́ние, сея́ же се́верныя страны́, па́че и всего́ правосла́внаго Оте́чества на́шего необори́мая стено́ и вели́кое заступле́ние! Се мы, недосто́йнии и многогре́шнии, с благогове́йною любо́вию ко святы́м моще́м ва́шим припа́дающе, ду́хом сокруше́нным и смире́нным се́рдцем приле́жно вопие́м: моли́те непреста́нно благосе́рдаго Влады́ку и Го́спода на́шего Иису́са Христа́, я́ко дерзнове́ние ве́лие к Тому́ иму́щии, да не отсту́пит от нас Его́ вседе́йствующая благода́ть, покро́в же и заступле́ние Пресвяты́я Влады́чицы на́шея Богоро́дицы на ме́сте сем да пребу́дет, и да не оскуде́ют никогда́же и́стиннии ревни́тели а́нгельскаго жития́ во святе́й оби́тели сей, иде́же вы, богоно́снии отцы́ и нача́льницы, безме́рными труды́ и поще́нии, то́ки же сле́зными и всено́щными бде́нии, непреста́нными моли́твами и моле́нии нача́ло и́ноческому житию́ положи́сте. Ей, уго́дницы святи́и, моли́твенницы к Бо́гу благоприя́тнейшии, те́плыми ва́шими к Нему́ мольба́ми огради́те и сохрани́те ны и свято́е селе́ние сие́ ва́ше от тру́са, пото́па, огня́ и меча́, наше́ствия иноплеме́нных и смертоно́сныя я́звы, от вражды́ и нестрое́ний, от бед и скорбе́й и от вся́каго зла, да непреста́нно на ме́сте сем, в ми́ре и безмо́лвии, благоче́стно сла́вится пресвято́е и́мя Го́спода и Бо́га, и обрета́ют ве́чное спасе́ние и́щущии Его́. O преблаже́ннии отцы́ на́ши Зоси́мо, Савва́тие и Ге́рмане! Услы́шите ны гре́шныя, во святе́й оби́тели ва́шей и под кро́вом ва́шего защище́ния недосто́йно жи́тельствующия, и благомо́щными ва́шими к Бо́гу хода́тайствы испроси́те душа́м на́шим грехо́в оставле́ние, жития́ исправле́ние и ве́чных благ восприя́тие в Небе́снем Ца́рствии; всем же ве́рующим, и́же на вся́ком ме́сте и во вся́кой ну́жде призыва́ют вас в по́мощь и заступле́ние, и и́же с благогове́йною любо́вию во оби́тель ва́шу притека́ют, не преста́ните излива́ти вся́кую благода́ть и ми́лость, сохраня́юще их от вся́кия сопроти́вныя си́лы, от вся́кия напа́сти и от вся́каго зла́го обстоя́ния, и подаю́ще им вся потре́бная к душе́вней и теле́сней по́льзе. Наипа́че же моли́те Премилосе́рдаго Бо́га, да огради́т Це́рковь Свою́ Святу́ю от всех враго́в ви́димых и неви́димых, Оте́чество на́ше да сохрани́т в ми́ре и тишине́, правове́рии и благоче́стии, и всем нам да́рует любо́вь и единомы́слие, да просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
И́на моли́тва
O преподо́бнии отцы́, вели́цыи засту́пницы в ско́рби и услы́шателие моли́тв, уго́дницы Бо́жии и чудотво́рцы Зоси́мо, Савва́тие и Ге́рмане! Не забу́дите, я́коже обеща́стеся, посеща́ти ча́да ва́ша. А́ще бо и отыдо́сте от нас те́лом, но ду́хом при́сно с на́ми пребыва́ете. Мо́лим у́бо вы, o преподо́бнии: изба́вите ны от огня́, от наше́ствия иноплеме́нников и междоусо́бныя бра́ни, от тлетво́рных ве́тров, и от напра́сныя сме́рти, и от всех прило́гов бесо́вских, находя́щих на ны. Услы́шите нас гре́шных, и приими́те моли́тву сию́ и моле́ние на́ше, я́ко кади́ло благово́нное, я́ко же́ртву благоуго́дну, и ду́ши на́ша, злы́ми де́лы и сове́ты и по́мыслы умерщвле́нныя, оживи́те, и, я́коже уме́ршую отрокови́цу возста́висте, я́коже неисце́льныя ра́ны мно́гих исцели́сте, от духо́в нечи́стых зле му́чимых изба́висте, та́ко и нас, содержи́мых во у́зах вра́жиих, изми́те, и от сете́й диа́вола изба́вите, из глубины́ прегреше́ний изведи́те, и ми́лостивым ва́шим посеще́нием и хода́тайством от всех враго́в ви́димых и неви́димых огради́те ны, да просла́вим Всесвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
