Служба преподобному Мисаилу Абалакскому
Ме́сяца а́вгуста в 19-й день
Преподо́бнаго Мисаи́ла Абала́кскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 8:
Прииди́те, лю́бящии по́двиги святы́х,/ восхва́лим преподо́бнаго Мисаи́ла,/ той бо, кра́сная ми́ра сего́ ни во что́же вмени́в и крест свой взем,/ Христу́ смире́нием после́дова./ Мы же прославля́ем Бо́га, ди́внаго во святы́х Свои́х,// подаю́щаго нам мир и ве́лию ми́лость.
Преподо́бне о́тче Мисаи́ле,/ ты, житие́м свои́м Бо́га просла́вив,/ жите́йскую пучи́ну му́жественне преше́л еси́/ и ти́хаго приста́нища дости́гл еси́./ И ны́не моли́ Христа́ Бо́га,/ ди́внаго во святы́х Свои́х,// дарова́ти нам мир и ве́лию ми́лость.
На ни́ве Бо́жией в са́не иере́йстем усе́рдне подвиза́вся/ и по́двиг и́ноческаго жития́ восприе́м,/ Бо́гу и лю́дем неле́ностне послужи́л еси́./ Те́мже пребыва́я ны́не во Ца́рствии Христа́ Бо́га,/ ди́внаго во святы́х Свои́х,// моли́ дарова́ти нам мир и ве́лию ми́лость.
Сла́ва, глас 6:
Ум свой в де́лании за́поведей Боже́ственных утверди́в/ и стра́сти по́стнически победи́в,/ иере́йское служе́ние и́ноческими по́двиги украси́л еси́./ И ны́не чи́стым се́рдцем прославля́еши/ Отца́, и Сы́на, и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ со святы́ми апо́столы,// поми́ловати ду́ши на́ша.
На стихо́вне сти́хиры, глас 1.
Подо́бен: Небе́сных чино́в:
День све́тлаго пра́здника твоего́ наста́/ и ра́дости сердца́ ве́рных испо́лнишася,/ ты же, преподо́бне о́тче Мисаи́ле,/ я́ко име́я дерзнове́ние ко Го́споду,// моли́ непреста́нно о всех нас.
Стих: Честна́ пред Го́сподем// смерть преподо́бных Его́.
Послуша́нием смире́нию научи́вся/ и воздержа́нием безпло́тным уподо́бився,/ любо́вию бли́жним послужи́л еси́./ Ны́не же, в Небе́сных селе́ниих водворя́яся,// моли́ о спасе́нии душ на́ших.
Стих: Блаже́н муж, боя́йся Го́спода,// в за́поведех Его́ восхо́щет зело́.
Блаже́нне о́тче Мисаи́ле,/ вра́жия искуше́ния презре́в/ и ко́зни лука́ваго си́лою Христо́вою препобеди́в,/ житие́ равноа́нгельное лю́дем страны́ Сиби́рския яви́л еси́.// Моли́ спасти́ся душа́м на́шим.
Сла́ва, глас 8:
Па́стыря благогове́йнаго и мона́ха смире́ннаго,/ тя почита́ем, о́тче Мисаи́ле,/ А́нгелов собесе́дниче и преподо́бных соприча́стниче,/ с ни́миже моли́ся Го́сподеви// поми́ловатися душа́м на́шим.
И ны́не, Богоро́дичен, глас то́йже: Безневе́стная Де́во:
Тропа́рь, глас 3:
Це́ркви усе́рдный служи́телю,/ па́стырем ве́рный помо́щниче,/ отроко́м му́дрый наста́вниче,/ стра́ждущим благоду́шный уте́шителю,/ житие́ в труде́х свяще́нных провожда́л еси́/ и блаже́нное упокое́ние восприя́л еси́,/ преподо́бне о́тче Мисаи́ле,// моли́ Христа́ Бо́га спасти́ся душа́м на́шим. Ин тропа́рь, глас 2:
Це́ркве Христо́вы свети́льниче,/ Абала́кския оби́тели засту́пниче,/ гра́да Тобо́льска пресла́вное украше́ние,/ преподо́бне о́тче Мисаи́ле,/ моли́ Христа́ Бо́га// спасти́ся душа́м на́шим.
НА У́ТРЕНИ
По 1-м стихосло́вии седа́лен, глас 4.
Подо́бен: Ско́ро предвари́:
Равноа́нгельным житие́м твои́м Христу́ после́дуя, вся кра́сная ми́ра сего́ ни во что́же вмени́л еси́, блаже́нне Мисаи́ле. Те́мже па́мять твою́ достодо́лжно прославля́ем.
Сла́ва, и ны́не, Богоро́дичен:
Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся от сме́рти к животу́ нетле́ния. Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
По 2-м стихосло́вии седа́лен, глас 5.
Подо́бен: Собезнача́льное Сло́во:
Уго́дника Христо́ва пе́сньми восхва́лим, я́ко посто́м и моли́твою лука́ваго врага́ посрами́. И ны́не мо́лит Го́спода поми́ловатися душа́м на́шим.
Сла́ва, и ны́не, Богоро́дичен:
Преесте́ственно чу́до зача́тия и несказа́нен о́браз Рождества́ в Тебе́ позна́ся, Чи́стая Присноде́во, ужаса́ет ми ум и удивля́ет по́мысл, сла́ва Твоя́, Богоро́дице, всем простре́ся во спасе́ние душа́м на́шим.
Велича́ние:
Ублажа́ем тя,/ преподо́бне о́тче Мисаи́ле,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Псало́м избра́нный:
Терпя́ потерпе́х Го́спода, и внят ми и услы́ша моли́тву мою́.
Блаже́н муж, боя́йся Го́спода, в за́повeдех Его́ восхо́щет зeло́.
В па́мять ве́чную бу́дет пра́ведник, от слу́ха зла не убои́тся.
Благовeсти́х пра́вду в це́ркви вели́цeй.
Ди́вен Бог во святы́х Свои́х.
Той даст си́лу и держа́ву лю́дем Свои́м.
По полие́леи седа́лен, глас 1:
Распя́тием стра́стныя пло́ти и смире́нием стяжа́л еси́ безстра́стие, преподо́бне о́тче Мисаи́ле. Те́мже, дерзнове́ние име́я ко Христу́ Бо́гу, моли́ о спасе́нии душ на́ших.
Сла́ва, и ны́не, Богоро́дичен:
Прему́дрости сокро́вище ве́мы Тя, Пречи́стая, и точа́щую благода́тию исто́чник приснотеку́щий ра́зума; ка́пли ве́дения одожди́ нам, Влады́чице, е́же воспева́ти Тя при́сно.
Степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Восхва́лим днесь, ве́рнии,/ преподо́бнаго Мисаи́ла Абала́кскаго,/ той бо, собла́зны лука́ваго победи́в/ и земно́е житие́ труды́ по́стническими соверши́в,/ моли́твами те́плыми к Бо́гу прибли́жися/ и в Небе́сныя оби́тели всели́ся./ Те́мже со умиле́нием к нему́ возопии́м:/ я́ко име́я дерзнове́ние ко Христу́ Бо́гу,// мир испроси́ душа́м на́шим.
Кано́н, глас 8, его́же краегране́сие: О́тче преподо́бне Мисаи́ле, моли́ Бо́га о мне гре́шнем.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Припе́в: Го́споди, Иису́се Христе́, Бо́же наш, поми́луй нас.
О Иису́се Сладча́йший, Све́те ми́ра! Да́ждь ми ра́зум и си́лу, да досто́йно с любо́вию воспою́ по́двиги уго́дника Твоего́, преподо́бнаго Мисаи́ла Абала́кскаго.
Припе́в: Преподо́бне о́тче Мисаи́ле, моли́ Бо́га о нас.
Те́пле в моли́тве Го́сподеви предстоя́ и в послуша́нии роди́телем благоче́стию навы́кнув, к животу́ ве́чному устреми́лся еси́, сла́ву Бо́гови воспева́я.
Человеколю́бца Христа́ от ю́ности возлю́бив, при́сно о́ком серде́чным к Нему́ взира́л еси́. Те́мже, к ли́ку преподо́бных причте́н быв, ны́не на Небеси́ Изба́вителя и Бо́га воспева́еши.
Богоро́дичен: Ева́нгельския за́поведи исполня́ти мя наста́ви, молю́ Тя, Пречи́стая Де́во, испра́ви мя, заблу́ждшаго умо́м, и стра́сти пло́ти моея́ утоли́, да сла́влю Бо́га во ве́ки.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.
Преподо́бне о́тче Мисаи́ле, о́браз ве́рным явля́я, са́ном иере́йским почте́н был еси́ и служе́ние непоро́чное Бо́гу и Це́ркви соверша́л еси́. Те́мже тя ны́не ублажа́ем.
Ра́дуйся, о́тче Мисаи́ле, ты бо, плотски́я стра́сти и прило́ги бесо́вския победи́в, я́ко луч све́та Боже́ственнаго во оби́тели Абала́кской просия́л еси́.
Егда́ возложи́ша на тя бра́тия послуша́ние и́ноческое во оби́тели Абала́кстей, тогда́ со смире́нием и лю́бовию им послужи́л еси́, Христу́ подража́я. Моли́ся и нам в соверше́нном послуша́нии Бо́гу пребыва́ти.
Богоро́дичен: Про́мыслом Свои́м вся ко бла́гу направля́я, Госпо́дь Ма́терь Свою́ дарова́ в по́мощь и заступле́ние лю́дем земли́ Сиби́рския. Ея́же моли́твами, Иису́се Христе́, сподо́би и нас путь земна́го жития́ во благоче́стии соверша́ти и Ца́рствия Небе́снаго дости́гнути.
Седа́лен, глас 4.
Подо́бен: Ско́ро предвари́:
О́тче преподо́бне Мисаи́ле, ко стяжа́нию Боже́ственныя благода́ти путь твой направля́я, плотско́е мудрова́ние ду́хови покори́л еси́ и, и́ноческия обе́ты до́бре исполня́я, о́браз благоче́стия бра́тии яви́л еси́. Сего́ ра́ди тя усе́рдно прославля́ем.
Сла́ва, и ны́не, Богоро́дичен:
Де́во Богоро́дице, стена́ непобеди́мая нам, христиа́ном, еси́, к Тебе́ бо прибега́юще, невреди́ми пребыва́ем и, па́ки согреша́юще, и́мамы Тя Моли́твенницу. Тем благодаря́ще вопие́м Ти: ра́дуйся, Влады́чице, Ми́лостивая о нас пред Бо́гом Засту́пнице.
Крестобогоро́дичен:
О Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема во́лею ви́дела еси́ Сы́на и Бо́га Твоего́, Его́же, Преблагослове́нная, моля́щи не преста́й, проще́ние прегреше́ний нам дарова́ти.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Служе́ние церко́вное ре́вностне соверша́я, насле́дник го́рняго Ца́рствия с Вы́шними Си́лами яви́лся еси́. Те́мже во благоче́стии укрепи́ всех, чту́щих па́мять твою́.
Неуста́нно пред чудотво́рным о́бразом Бо́жия Ма́тере Абала́кским моли́лся еси́ и плод духо́вный в ми́ре, ра́дости и любви́ прине́сл еси́, Засту́пницу усе́рдную ро́да христиа́нскаго прославля́я.
Еди́ному и́стинному Бо́гу усе́рдне послужи́в, преподо́бне о́тче, да́ра благода́ти Ду́ха Свята́го сподо́бился еси́. Те́мже и ны́не всем, призыва́ющим тя, по́мощь благовре́менне подае́ши.
Богоро́дичен: Многопло́дная ни́ва духо́вная су́щи, Присноде́во, из бразды́ Клас спаси́тельный ми́ру израсти́ла еси́, всю тварь Пита́ющаго, Бо́га вся́ческих.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.
Иере́й благогове́йный архиере́йскаго до́ма быв, блаже́нне, со слеза́ми моле́ния Христу́ Бо́гу пред престо́лом возноси́л еси́. Помоли́ся и о нас, свя́тче Бо́жий.
Со смире́нием послуша́ние исполня́я, дух ми́рен в се́рдцы стяжа́л еси́. Помози́ и нам, о́тче, сего́ да́ра сподо́битися и земно́е по́прище до́бре соверши́ти.
А́нгельски на земли́ пожи́в, кро́тостию же и смире́нием Бо́гу угоди́в, о́браз благоче́стия лю́дем Тобо́льским яви́л еси́, на спаси́тельный путь доброде́тели наставля́я.
Богоро́дичен: Исцели́ неду́гующаго ума́ моего́ омраче́ние, Врача́ ро́ждшая, Христа́, Всенепоро́чная Влады́чице, и стра́ждущую ду́шу благода́тию Бо́жиею озари́.
Песнь 6
Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
Любо́вию Христо́вою уязви́вся, апо́стольски не́мощи бли́жних носи́л еси́, преподо́бне, вы́ну моля́ся ко Го́споду и не прилага́я се́рдца к попече́нию жите́йскому.
Еди́наго на потре́бу взыску́я, блаже́нне о́тче, к слу́жбе Бо́жией усе́рдне прилежа́л еси́ и же́ртву безкро́вную умо́м неколе́блемым за лю́ди приноси́л еси́.
Мона́шескаго жития́ усе́рдный рачи́тель быв, преподо́бне, а́нгельскому житию́ поревнова́л еси́ и ны́не с Небе́сными Си́лами мо́лишися о всех, почита́ющих тя.
Богоро́дичен: О Де́во Пречи́стая, Влады́чице, поми́луй, и изба́ви мя вся́каго лука́вствия, и озлобле́ния, и ве́чнаго муче́ния.
Конда́к, глас 3:
Лю́дие гра́да Тобо́льска почита́ют тя, о́тче Мисаи́ле,/ я́ко па́стыря до́браго и моли́твенника неусы́пнаго,/ подви́жника терпели́внаго и наста́вника смире́ннаго,/ Це́ркви Христо́ве в житии́ свое́м усе́рдне послужи́вшаго,/ ны́не же во оби́телех Небе́сных моля́щагося// о спасе́нии душ на́ших.
И́кос:
И́ноческое житие́ возлюби́в, преподо́бне, мирска́я наслажде́ния отве́ргл еси́ и, я́ко свети́льник Бо́жия благода́ти просия́в, во благоче́стии мно́гия лю́ди утверди́л еси́. Те́мже помина́й нас, чту́щих святу́ю па́мять твою́, да зове́м ти: ра́дуйся, земли́ Сиби́рския благода́тный свети́льниче; ра́дуйся, гра́да Тобо́льска пресла́вная похвало́. Ра́дуйся, оби́тели Абала́кския ре́вностный подви́жниче; ра́дуйся, преподо́бне о́тче Мисаи́ле, те́плый моли́твенниче о душа́х на́ших.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Богослуже́бное пе́ние возлюби́в, ре́вностне и благогове́йно Бо́га сла́вил еси́, о́тче, и ны́не со А́нгелы пое́ши: оте́ц на́ших Бо́же, благослове́н еси́.
От ю́ных лет мно́гия тру́ды и по́двиги подъе́м и боле́зни теле́сныя претерпе́в, преподо́бне, ны́не в дому́ Бо́жием доброде́тельми духо́вными благоуха́еши, со А́нгелы поя́: оте́ц на́ших Бо́же, благослове́н еси́.
Глаго́лы Бо́жия со усе́рдием лю́дем Тобо́льским пропове́дал еси́, Мисаи́ле блаже́нне, вся науча́я по во́ли Бо́жией жи́ти и воспева́ти: оте́ц на́ших Бо́же, благослове́н еси́.
Богоро́дичен: Арха́нгельский глас вопие́м Ти, Чи́стая: ра́дуйся, Благода́тная, Госпо́дь с Тобо́ю, и Тобо́ю с на́ми, пою́щими: оте́ц на́ших Бо́же, благослове́н еси́.
Песнь 8
Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.
О насле́дниче Боже́ственных селе́ний! Ты доброде́тельно и чи́сто на земли́ пожи́л еси́. Те́мже со А́нгелы ны́не лику́ет дух твой.
Ма́терь Бо́жию усе́рдно почи́тая, пред ико́ною Ея́ Абала́кскою моле́ние те́плое непреста́нно возноси́л еси́. И ны́не Цари́цу Небесе́ и земли́ со все́ми святы́ми прославля́еши.
На одре́ боле́зни блаже́нную кончи́ну прие́м, о́тче преподо́бне, в го́рняя селе́ния пресели́лся еси́, иде́же мо́лиши Христа́ Бо́га о душа́х на́ших.
Богоро́дичен: Еди́наго Бо́га, сотво́ршаго небеса́ воле́ю, Его́же не вмеща́ет не́бо, Богоро́дице, я́ко ши́ршая небе́с, вмести́ла еси́, слове́сное не́бо и одушевле́нное.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу ве́рнии велича́ем.
Припе́в: Го́споди, Иису́се Христе́ Бо́же наш, поми́луй нас.
Го́споди, Иису́се Христе́, благода́тную по́мощь ще́дро источа́еши моли́твами преподо́бнаго Мисаи́ла всем, ве́рою чту́щим святу́ю па́мять его́.
Ра́дуйся, земли́ Сиби́рския благода́тный свети́льниче, я́ко насле́довал еси́ оби́тели Небе́сныя. Те́мже и нас моли́твами твои́ми сия́ улучи́ти сподо́би.
Еди́ну мысль име́я, е́же по́двигом до́брым Христа́ ра́ди подвиза́тися, око́вы страсте́й сокруши́л еси́. И нас немощны́х от уз грехо́вных разреши́ моли́твами твои́ми, Мисаи́ле блаже́нне.
Шу́ия ча́сти изба́ви нас, Го́споди, на Стра́шнем Суди́щи Твое́м моли́твами преподо́бнаго Мисаи́ла и всех святы́х, в земли́ Сиби́рстей просия́вших.
Богоро́дичен: Ны́не просвети́ сердца́ на́ша, Де́во Чи́стая, при́сно омрача́емая жите́йскими страстьми́, и не оста́ви нас враго́м лука́вым в поноше́ние, да ра́достно сла́вим Тя, Всепе́тая.
Свети́лен:
Естество́м челове́к быв, а́нгельски на земли́ пожи́л еси́ и, я́ко луч со́лнечный, в стране́ Сиби́рстей возсия́л еси́, преподо́бне Мисаи́ле. Ны́не же, Свет невече́рний созерца́я, моли́ спасти́ся душа́м на́шим.
Сла́ва, и ны́не, Богоро́дичен:
Моле́ньми немо́лчными ублажа́ем Тя, Де́во Богоро́дице, я́ко Еди́наго от Тро́ицы родила́ еси́ Христа́ Жизнода́вца, Его́же моли́ спасти́ся всем нам.
На хвали́тех стихи́ры, глас 6:
Преблаже́нне о́тче Мисаи́ле,/ ве́рою кре́пость ду́ха явля́я,/ доброде́тельми любо́вь Христо́ву стяжа́л еси́/ и, суету́ мирску́ю презре́в,/ по́прище мона́шескаго жития́ до́бре соверши́л еси́.// Помина́й нас, чту́щих святу́ю па́мять твою́.
Па́мять твоя́, я́ко у́тро пресве́тлое, нам возсия́/ просвеща́ющи вся ве́рныя лю́ди земли́ Сиби́рския/ и честну́ю бра́тию оби́тели Абала́кския./ Сего́ ра́ди, пе́сньми духо́вными тя прославля́юще,// мо́лимся спасти́ся душа́м на́шим.
Блаже́нне, о́тче Мисаи́ле,/ ре́вностный де́латель за́поведей Христо́вых яви́лся еси́/ и, мно́гия доброде́тели усе́рдне соверши́в,/ в го́рния оби́тели всели́лся еси́.// Те́мже тя вси с любо́вию ублажа́ем.
Ра́дуйся, земли́ Сиби́рския благода́тный свети́льниче!/ Ра́дуйся, гра́да Тобо́льска сла́вная похвало́!/ Ра́дуйся, оби́тели Абала́кския некра́домое украше́ние!/ Ра́дуйся, преподо́бне Мисаи́ле,// те́плый моли́твенниче о душа́х на́ших!
Сла́ва, глас то́йже:
Преподо́бне о́тче Мисаи́ле,/ измла́да доброде́тели приле́жно навы́к/ и серде́чную моли́тву все́ю душе́ю возлюби́в,/ презира́ти вре́менная, взыска́ти же ве́чная/ челове́ки увеща́л еси́./ Ны́не же, в Боже́ственнем све́те Пресвяте́й Тро́ице предстоя́,// моли́ спасти́ся душа́м на́шим.
И ны́не, Богоро́дичен:
Все упова́ние мое́/ на Тя возлага́ю,/ Ма́ти Бо́жия,// сохрани́ мя под кро́вом Твои́м.
На Литурги́и слу́жба вся преподо́бническая
Моли́тва
О богому́дре о́тче Мисаи́ле! Ты, и́стиннаго Па́стыря Христа́ за́поведи ре́вностне исполня́я, вся́кое пра́здное весе́лие возненави́дел еси́ и, от си́лы в си́лу восходя́, житие́ твое́ в труде́х свяще́нных и послуша́нии и́ночестем провожда́л еси́. Те́мже мы, ве́дуще о да́нной ти благода́ти, со смире́нием припа́даем ти и взыва́ем: моли́ся о нас ко Го́споду Иису́су Христу́ и Пречи́стей Его́ Ма́тери, о е́же сохрани́ти страну́ на́шу в ми́ре и благоде́нствии, па́стырем до́брое попече́ние о лю́дех име́ти, отроко́м послуша́ние и прилежа́ние в уче́нии дарова́ти, нам же всем в ве́ре, благоче́стии и взаи́мной любви́ ти́хое и безмяте́жное житие́ провожда́ти, да, спасе́ние улучи́вше, единоду́шно воспое́м в Тро́ице сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
