Служба блаженному Василию Кадомскому
Ме́сяца ма́я во 2-й день
Блаже́ннаго Васи́лия Ка́домскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5:
Ми́ру чужд быв,/ су́щих в ми́ре не чужда́лся еси́,/ юро́див нарече́н,/ му́дрости наставля́л еси́,/ страда́ния терпя́й,/ стра́ждущих исцеля́л еси́,/ те́мже в житии́ твое́м привре́меннем/ ми́лость Бо́жию улучи́л еси́,// блаже́нне Васи́лие.
О́браз терпе́ния и незло́бия явля́я,/ многострада́льному И́ову подража́л еси́,/ се́рдце в жили́ще Ду́ху Свято́му уготовля́я,/ по вся дни и но́щи в моли́тве пребыва́л еси́,/ стра́нствию Христо́ву ревну́я,/ Ца́рствия Бо́жия дости́гл еси́,// блаже́нне Васи́лие.
Возлюби́в усе́рдно Го́спода/ и трудолю́бне подвиза́яся,/ Боже́ственною благода́тию просвети́лся еси́/ и да́ры Ду́ха Свята́го стяжа́л еси́./ Те́мже дерзнове́ние твое́ к Бо́гу ве́дуще,/ к тебе́ с моли́твою притека́ем,// блаже́нне Васи́лие.
Сла́ва, глас 6:
О блаже́нне Васи́лие,/ гра́да Ряза́ни похвало́,/ ми́ра чужда́яся,/ смире́н, целому́др, пра́веден/ и за́поведей Боже́ственных храни́тель яви́лся еси́,/ моли́ся за ны ко Го́споду,// да спасе́т ду́ши на́ша.
И ны́не, Богоро́дичен, глас то́йже: Кто Тебе́ не ублажи́т, Пресвята́я Де́во:
Вход. Проки́мен дне. И чте́ния три преподо́бническая.
На лити́и стихи́ра хра́ма, и свята́го, глас 3:
Блаже́нне Васи́лие чу́дне,/ челове́че Бо́жий,/ я́ко юро́д на земли́ пожи́л еси́/ и, я́ко зла́то в горни́ле, ду́шу свою́ очи́стил еси́./ Грехо́в проще́ние нам испроси́/ и неду́гов избавле́ние,// да Ца́рствия Небе́снаго сподо́бимся.
Сла́ва, глас 2:
Все упова́ние на Бо́га возложи́в,/ пучи́ну жития́ земна́го преплы́л еси́/ и, бре́га го́рняго Оте́чества дости́гнув,/ со А́нгелы на Небесе́х ны́не ра́достне лику́еши,/ уго́дниче Христо́в Васи́лие./ Те́мже помози́ нам, на земли́ живу́щим,// печа́ли го́рькия изба́витися.
И ны́не, глас то́йже: О, чудесе́ но́ваго, всех дре́вних чуде́с:
На стихо́вне стихи́ры, глас 8:
А́нгельски пожи́в, свя́те,/ по́двиги на всяк день подъя́л еси́,/ моли́тву я́ко щит, воздержа́ние я́ко лук,/ и смире́ние я́ко шлем име́я,/ те́мже ве́рныя лю́ди назида́л еси́/ за́поведи Бо́жия усе́рдно исполня́ти/ и страх Бо́жий име́ти./ Помози́ и нам, блаже́нне Васи́лие,/ ве́ру до́бре соблюсти́// и Ца́рствия Небе́снаго дости́гнути.
Стих: Госпо́дь храни́т прише́льцы,// си́ра и вдову́ прии́мет.
Ми́ра красоту́ и вся́ческая, я́же в ми́ре, оста́вив,/ Еди́ному Христу́ после́довал еси́/ и се́тей вра́жиих избежа́л еси́,/ прему́дре Васи́лие,/ ны́не же на Небесе́х с ли́ки святы́х Престо́лу сла́вы предстоя́,/ моли́ся грехо́в проще́ние нам дарова́ти// и Ца́рствия Небе́снаго дости́гнути.
Стих: Госпо́дь возво́дит низве́рженныя,// Госпо́дь лю́бит пра́ведники.
Безу́мен в ми́ре нарече́н,/ жи́телей гра́да Ряза́ни му́дрости Христо́вой наставля́л еси́,/ нищету́ духо́вную стяжа́в,/ ми́лостыню бе́дным ще́дро раздава́л еси́,/ ско́рби же и ну́жды претерпева́я,/ в печа́ли су́щих утеша́л еси́./ Помози́ и нам, свя́тче Бо́жий,/ крест жития́ земна́го безро́потне понести́// и Ца́рствия Небе́снаго дости́гнути.
Сла́ва, глас 7:
Лик святы́х земли́ Ряза́нския житие́м пра́ведным украси́в,/ но́вый предста́тель о Оте́честве на́шем яви́лся еси́,/ уго́дниче Христо́в Васи́лие,/ те́мже ны́не со святи́телем Васи́лием и новому́ченики Це́ркве на́шея/ предста́тельствуй о всех нас,// любо́вию тя почита́ющих.
И ны́не, глас то́йже:
Под кров Твой, Влады́чице,/ вси земноро́днии прибега́юще, вопие́м Ти:/ Богоро́дице, упова́ние на́ше,/ изба́ви ны от безме́рных прегреше́ний,// и спаси́ ду́ши на́ша.
Тропа́рь, глас 4:
Моли́тва усе́рдная пи́ща и питие́ тебе́ бысть,/ блаже́нне Васи́лие,/ в несе́нии креста́ жития́ стра́нническаго/ любо́вь Христо́ву позна́л еси́./ О́ком чи́стым бу́дущая я́ко настоя́щая прозрева́я,/ ра́дость и от бед избавле́ние тре́бующим твоея́ по́мощи дарова́л еси́./ Те́мже и нас, я́ко Бо́жий избра́нник,/ не забу́ди твои́ми хода́тайствы,// Христа́ Бо́га о нас умоля́я.
НА У́ТРЕНИ
По 1-м стихосло́вии седа́лен, глас 1:
Безу́мием мни́мым безу́мие ми́ра обличи́в, блаже́нне Васи́лие, о́браз терпе́ния и незло́бия яви́л еси́. Мы же, предста́тельство твое́ к Бо́гу ве́дуще, про́сим тя: моли́ся за ны ко Го́споду, да спасе́т ду́ши на́ша.
Сла́ва, и ны́не, Богоро́дичен, глас то́йже:
Влады́чице Пречи́стая, арха́нгельский глас прино́сим Ти: ра́дуйся, Благода́тная, Госпо́дь с Тобо́ю.
По 2-м стихосло́вии седа́лен, глас 2:
Даде́ся ти благода́ть от Бо́га, блаже́нне Васи́лие, пещи́ся о лю́дех, неду́жныя цели́ти и ско́рбныя утеша́ти. Те́мже мы, ны́не па́мять твою́ соверша́юще, те́пле зове́м: помяни́ и нас в твои́х святы́х моли́твах.
Сла́ва, и ны́не, Богоро́дичен, глас то́йже:
Печа́ли отло́жше, возведе́м о́чи на́ши горе́, да у́зрим в Небесе́х Цари́цу Богоро́дицу, покро́вом Свои́м светоно́сным нас покрыва́ющую.
Велича́ние:
Ублажа́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.
Псало́м избра́нный: Терпя́ потерпе́х Го́спода, и внят ми, и услы́ша моли́тву мою́.
По полиеле́и седа́лен, глас 5:
Просвеще́н ум име́я, богому́дре Васи́лие, бу́дущая я́ко настоя́щая зрел еси́. Мы же, уго́дника Христо́ва тя ве́дуще, от любве́ серде́чныя взыва́ем: не оста́ви нас заступле́нием твои́м, свя́тче Бо́жий.
Сла́ва, и ны́не, Богоро́дичен, глас то́йже:
Просвети́, Чи́стая, души́ моея́ о́чи, Свет ро́ждшая, да не покры́ет тьма грехо́вная мя окая́ннаго.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Ева́нгелие от Луки́, зача́ло 78.
По 50-м псалме́ стихи́ра, глас 6:
Омраче́ние грехо́вное возненави́дев, свя́те Васи́лие,/ и пла́менем чистоты́ пла́мень страсте́й пресе́к,/ терпе́нием и мудре́йшим юро́дством,/ я́ко златы́ми крила́ми, на Небеса́ возлете́л еси́// и степе́нь равноа́нгельный дости́гл еси́.
Кано́н, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.
Ца́рствие ве́чное улучи́ти жела́я, ду́шу твою́ от многомяте́жных страсте́й вои́стину очи́стил еси́, Васи́лие блаже́нне, гра́да Ряза́ни ди́вное украше́ние.
Па́мять твою́ пречестну́ю почита́ет ны́не вся земля́ Ряза́нская, в не́йже усе́рдно подвиза́лся еси́, пресла́вне Васи́лие. Те́мже пло́ти твоея́ стра́сти с похотьми́ подви́жнически умертви́в, бога́тство нетле́нное стяжа́л еси́.
Вся́каго мирска́го пристра́стия отре́кся и ум твой к нетле́нным бла́гом возве́д, я́же уготóва Госпо́дь всем лю́бящим Его́, на земли́ чи́сто пожи́л еси́, Васи́лие му́дре.
Богоро́дичен: Го́ру святу́ю, превы́шшую А́нгельских Сил, Ма́терь Бо́жию и Де́ву и́стинную по рождестве́, еди́ными усты́ воспои́м.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
В моли́тве усе́рдней по вся дни и но́щи пребыва́я, блаже́нне, руга́ния и наве́ты терпели́вне подъя́л еси́, Христа́ ра́ди, от Него́же и вы́шняго прича́стия сподо́бился еси́.
Юро́да себе́ во́лею сотвори́в, богому́дре, преми́рнаго разуме́ния испо́лнился еси́. Те́мже и Ду́ха Свята́го сосу́д избра́нный яви́лся еси́, житие́м твои́м странноле́пным укра́шен.
Моли́твы твоя́ обно́щь к Небесе́м возсыла́я, дневно́ю же ми́лостынею больны́м и стра́ждущим благотворя́, сердца́ их любо́вию согрева́л еси́, Васи́лие небому́дренне, ча́до ве́рное Отца́ Небе́снаго.
Богоро́дичен: Неискусобра́чная Де́во, Бо́га пло́тию ро́ждшая, утверди́ мя, стра́стными прило́ги приклоне́на, несть бо ра́зве Тебе́ ины́я Помо́щницы.
Седа́лен, глас 5:
Плотско́е мудрова́ние отри́нув изде́тска, нищету́ и стра́нство Христа́ ра́ди стяжа́в, венцено́сец Бо́жий на земли́ яви́лся еси́, Васи́лие блаже́нне. Ны́не мо́лим тя: бу́ди нам, омраче́нным страстьми́ землере́тными, све́тлый путево́ждь ко Христу́, Со́лнцу пра́вды.
Сла́ва, и ны́не, Богоро́дичен, глас то́йже:
Милосе́рдия Твоего́ ра́ди, Богороди́тельнице Пречи́стая, изба́ви нас, Тя смире́нно умоля́ющих, от всех ко́зней вра́жиих и ско́рбных обстоя́ний.
Песнь 4
Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
Ми́лостыню с благодаре́нием от простецо́в прие́мля и ни́щей бра́тии ю́ предава́я, снег и дух бу́рен, мраз и вар дневны́й благоду́шно претерпе́л еси́, свя́те, си́лою Бо́жиею укрепля́емь.
Мо́лим тя ны́не, блаже́нне Васи́лие, услы́ши проше́ние на́ше и, по́мощь моли́тв твои́х подава́я во благовре́мении, усмири́ вся бра́ни жите́йския, да предста́тельство твое́ обре́тше, просла́вим Ми́лостиваго Бо́га.
Мо́лим тя па́ки, сла́вне Васи́лие: ю́ныя вразуми́ путе́м за́поведей ходи́ти, ста́рцы и в не́мощи су́щия укрепи́, подвиза́ющияся же на дела́ блага́я напра́ви.
Богоро́дичен: Госпоже́, Всепе́тая Богоро́дице, Ма́ти всех Творца́, помышле́ния моя́ моли́твами Твои́ми очи́сти и благопло́дна покажи́.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
В светлосия́нный день пра́здника твоего́, преблаже́нне, услы́ши умиле́нныя мольбы́ на́ша; не лиши́ по́мощи твоея́ всех, почита́ющих па́мять твою́ в хра́ме сем, во гра́де на́шем и в преде́лех земли́ Ряза́нския.
Испо́лнися вои́стину Госпо́дне обетова́ние на тебе́, чудотво́рче: блаже́ни ни́щии ду́хом, я́ко тех есть Ца́рствие Небе́сное. И ны́не во сла́ве лучеза́рней Престо́лу всех Царя́ предстои́ши, поне́же ве́рный раб в час испыта́ний яви́лся еси́.
Усе́рдно взыва́ем к тебе́, богоблаже́нне: не оста́ви нас, сро́дник твои́х, и́же на земли́, ты бо а́лчущих вы́ну пита́л еси́, жа́ждущих напая́л еси́, ни́щих же одаря́л еси́ преизоби́льно.
Богоро́дичен: Воплоти́ся неизрече́нно Бог из Тебе́, Чи́стая, и, пло́ти соединя́емь, по Боже́ственному существу́ неизме́нен пребы́сть.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.
Вознеси́, ми́лостиве, твое́ моле́ние о нас гре́шных, да испра́вятся стопы́ на́ша к де́ланию за́поведей Госпо́дних, и да не облада́ет на́ми вся́кое беззако́ние.
Приведи́ нас ко приста́нищу благооти́шному, посреде́ мо́ря жите́йскаго бе́дствующих, Васи́лие свя́те, и укажи́ путь ве́рен ко Творцу́ вся́ческих, Бо́гу на́шему.
За́поведи жи́зни ве́чныя запечатле́ны во уме́х иму́ще, во окамене́нии грехо́внем мно́гажды преступа́ем и согреша́ем на всяк день умо́м и се́рдцем. Те́мже на по́мощь прииди́ к нам, свя́те Васи́лие.
Богоро́дичен: Воплоще́нное Сло́во Бо́жие на́шего ра́ди спасе́ния на земли́ родила́ еси́, Де́во Чи́стая. Тем Тя, Богоро́дицу и́стинную, се́рдцем и усты́ в пе́снех велича́ем.
Конда́к, глас 2:
Вся́кое мирско́е попече́ние во́лею отри́нув,/ чистоту́ же душе́вную юро́дством утаи́в,/ Бо́гу и бли́жним усе́рдне послужи́л еси́,/ те́мже благода́ти Ду́ха Свята́го испо́лнився,/ а́нгельски на земли́ пожи́л еси́./ Ны́не ми́лостию твое́ю нас посети́,/ исцеля́я не́мощи душ и теле́с,// Васи́лие блаже́нне, те́плый наш хода́таю.
И́кос:
Теплото́ю Боже́ственною согрева́емь и благода́тию, я́ко оде́ждею боготка́нною, оболче́н, глад, мраз и вар дневны́й му́жественне претерпе́л еси́, и лю́ди ве́рныя земли́ Ряза́нския оби́льне сло́вом напита́л еси́. Ны́не ми́лостию твоею нас посети́, исцеля́я не́мощи душ и теле́с, Васи́лие блаже́нне, те́плый наш хода́таю.
Песнь 7
Ирмо́с: Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Христо́вою любо́вию всем се́рдцем уязви́вся, му́дре Васи́лие, дом твой и сро́дники благоду́шне оста́вил еси́. В дому́ же Бо́жием на всяк день а́нгельски пребыва́я, душе́ю воспева́л еси́: препе́тый отце́в Госпо́дь и Бог благослове́н еси́.
Ника́коже о пло́ти твое́й попече́ние име́я и о сла́ве Бо́жией присно́ раде́я, свя́те Васи́лие, на по́двиги па́че естества́ устреми́лся еси́, воспева́я: препе́тый отце́в Госпо́дь и Бог благослове́н еси́.
Восхва́лим, ве́рнии, Васи́лия блаже́ннаго, подви́жника сла́внаго! Той бо ны́не со А́нгелы и ли́ки святы́х в черто́зех Небе́сных воспева́ет: препе́тый отце́в Госпо́дь и Бог благослове́н еси́.
Богоро́дичен: Ра́дуйся, кра́сная Царе́ва пала́то; ра́дуйся, Де́во Чи́стая, Помо́щнице христиа́ном, с любо́вию пою́щим: препе́тый отце́в Госпо́дь и Бог благослове́н еси́.
Песнь 8
Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Возлюби́л еси́ Христа́ все́ю кре́постию твое́ю, достоблаже́нне Васи́лие, те́мже смире́н и кро́ток се́рдцем яви́лся еси́ и, я́ко ревни́тель за́поведей Бо́жиих, ве́рныя науча́л еси́ взыва́ти: Го́спода по́йте, дела́, и превозноси́те Его́ во вся ве́ки.
Вои́стину смерть твоя́ честна́ пред Го́сподем яви́ся, ты бо, венцено́сче святы́й, от земли́ пло́тию преста́вився, ны́не с на́ми ду́хом пребыва́еши и подвиза́еши взыва́ти ра́достне: Го́спода по́йте, дела́, и превозноси́те Его́ во вся ве́ки.
Ум наш озари́, му́дре Васи́лие, да све́том Трисия́нным просвеща́еми, просла́вим Пресвяту́ю Тро́ицу во дво́рех Бо́га на́шего и вку́пе с тобо́ю вопие́м: Го́спода по́йте, дела́, и превозноси́те Его́ во вся ве́ки.
Богоро́дичен: Всесвята́я Де́во, Бо́га Сло́ва ро́ждшая пло́тию, мрак душ на́ших моли́твами Твои́ми просвети́, да взыва́ем вы́ну: Го́спода по́йте, дела́, и превозноси́те Его́ во вся ве́ки.
Песнь 9
Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
О преблаже́нне Васи́лие, уго́дниче Христо́в, юро́де на земли́ и ангелоподо́бниче на Небесе́х! Ты ны́не мзду трудо́в ве́лиих прие́м, у Престо́ла го́рния Сла́вы помина́й нас, почита́ющих тя сыно́вне.
О моли́твенниче те́плый Васи́лие! Ты, посреде́ преде́лов земли́ Ряза́нския богоуго́дне пожи́в и ду́шу мно́гими по́двиги очи́стив, от Влады́ки Христа́ награ́ду Небе́сную восприя́л еси́. И нам грехо́в проще́ние испроси́ и в доброде́телех преспе́яние.
О ди́вне Васи́лие, предста́телю кре́пкий за град наш и зе́млю Ряза́нскую! Моли́ ны́не Всеще́драго Влады́ку изба́витися нам от вся́каго лука́вства вра́жия, страсте́й и каменосерде́чия окая́ннаго, да восприи́мем от десни́цы Го́спода с тобо́ю бога́тство некра́домое.
Богоро́дичен: Под кров Твой, Влады́чице, вси земноро́днии прибега́ем и вопие́м: Богоро́дице, упова́ние на́ше, изба́ви ны от безме́рных прегреше́ний и спаси́ ду́ши на́ша.
Свети́лен:
Да возра́дуется днесь земля́ Ряза́нская, в той бо яви́ся свети́льник све́тлый и уго́дник Бо́жий чудото́чный Васи́лий, боля́щих исцеля́яй, тесни́мых защища́яй, бесо́в тьму отгоня́яй и о чту́щих его́ пред Бо́гом предста́тельствуяй.
Сла́ва, и ны́не, Богоро́дичен:
Богороди́тельнице Де́во, Свет душ на́ших, Христа́, ро́ждшая! Во све́те присносу́щнем водвори́тися всем нам испроси́, воспева́ющим Твое́ милосе́рдие.
На хвали́тех стихи́ры, глас 8:
Земно́е бога́тство презре́л еси́, свя́те Васи́лие,/ и дóма роди́тельскаго кров отве́ргл еси́,/ ми́лостию Бо́жиею покрыва́яся./ Стра́нствию же Христо́ву ревну́я,// дости́гл еси́ Ца́рствия Небе́снаго. Два́жды.
Ми́ру юро́див яви́лся еси́,/ прему́дрость Бо́жию лю́дем гра́да Ряза́ни возвеща́я,/ моли́ся, блаже́нне Васи́лие,/ да просвети́т Госпо́дь и на́ша сердца́// моли́твами твои́ми.
День пра́зднственный соверша́ем усе́рдно/ от земли́ преставле́ния твоего́, свя́те Васи́лие,/ проле́й ны́не те́плую моли́тву ко Го́споду,/ да утверди́т Оте́чество на́ше в ми́ре и благоде́нствии// и спасе́т ду́ши на́ша.
Сла́ва, глас то́йже:
По́двиг ве́лий на земли́ подъя́л еси́/ и, мирска́я мудрова́ния отве́рг,/ юро́див ми́ру яви́лся еси́,/ благода́тию же Христо́вою просвеще́н,/ суеты́ жите́йския избега́ти лю́ди поуча́л еси́./ Не забуди́ и нас, пра́ведниче Васи́лие, хода́тайствы твои́ми,// Христа́ приле́жно о нас умоля́я.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О пресла́вный уго́дниче Святы́я и Единосу́щныя Тро́ицы, свя́те блаже́нне Васи́лие, пресла́внаго гра́да Ряза́ни те́плый засту́пниче, в беда́х, ско́рбех и печа́лех ско́рый помо́щниче! Воззри́ ми́лостивне на нас, припа́дающих к ра́це честны́х моще́й твои́х и сле́зно взыва́ющих к твоему́ предста́тельству: не пре́зри смире́нная проше́ния на́ша и моли́ Всеми́лостиваго Бо́га, да да́рует нам проще́ние согреше́ний во́льных и нево́льных, да проба́вит ми́лость Свою́ и пода́ст вся ну́жная к житию́ сему́ вре́менному, и к ве́чному спасе́нию благопотре́бная. А́ще и многогре́шни и зело́ недосто́йни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и сподо́битися и́стиннаго покая́ния и непоро́чными в Ца́рствие Небе́сное вни́ти. О свя́те блаже́нне Васи́лие! Ты ны́не а́ки со́лнце сия́еши во Ца́рствии Небе́снем: научи́ нас во́лю Бо́жию исполня́ти и безро́потне испыта́ния претерпева́ти, просвети́ помраче́нныя ду́ши на́ша и на стезю́ за́поведей Бо́жиих наста́ви нас, да понесе́м благо́е и́го Христо́во во смире́нии и долготерпе́нии до конца́ дний, ча́юще бу́дущаго живота́ безконе́чнаго, да сподо́бимся мы недосто́йнии, вку́пе с тобо́ю и все́ми святы́ми, сла́вити и воспева́ти Еди́наго в Тро́ице Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
