Служба преподобноисповеднику Гавриилу Мелекесскому
Ме́сяца октября́ в 18-й день
Преподобноиспове́дника Гаврии́ла, архимандри́та Мелеке́сскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6:
Ду́ха Свята́го благода́ть/ в тебе́ излия́ся, о́тче Гаврии́ле,/ те́мже па́стырь до́брый/ Це́ркве Христо́вы яви́лся еси́/ и, за и́стину пострада́в,// ду́шу твою́ за о́вцы своя́ положи́л еси́.
Доброде́телей де́ланием/ но́вое зерца́ло благода́ти быв,/ све́том Со́лнца мы́сленнаго возсия́л еси́/ и мглу челове́ческих согреше́ний разсе́ял еси́,/ сего́ ра́ди, о́тче Гаврии́ле, моли́твами твои́ми// и нас све́та невече́рняго сподо́би.
Я́ко свети́льник ве́ры неугаси́мый,/ и́стину Христо́ву свиде́тельствовал еси́,/ о́тче Гаврии́ле,/ и, вся до́блестне претерпе́в,/ благода́ть Свята́го Ду́ха стяжа́л еси́;// испроси́ и нам от Христа́ мир и ве́лию ми́лость.
Испове́дниче тве́рдый/ и подви́жниче изря́дный,/ преподо́бне о́тче Гаврии́ле,/ житие́м твои́м Христу́ после́дуя,/ во дво́рех Бо́га Вы́шняго всели́лся еси́,/ и ны́не предстоя́ Престо́лу Царя́ Небе́снаго,// моли́ спасти́ся душа́м на́шим.
Сла́ва, глас то́йже:
Восхва́лим, ве́рнии, по до́лгу/ преподобноиспове́дника Гаврии́ла,/ той бо, мно́гая страда́ния му́жественне претерпева́я,/ сове́ты безбо́жных разори́л еси́/ и, от сла́вы по́стническия в сла́ву испове́дническую восходя́,/ блаже́нства ве́чнаго дости́гл еси́,/ иде́же с новому́ченики и испове́дники Це́ркве Ру́сския/ прославля́ет Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен: Кто Тебе́ не ублажи́т, Пресвята́я Де́во:
Вход. Проки́мен дне. И чте́ния три.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух cи́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́диe же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ра хра́ма, и свята́го стихи́ры, глас 1.
Подо́бен: Небе́сных чино́в ра́дование:
Влады́ки Христа́ стопа́м после́дуя,/ све́том Боже́ственным просвети́лся еси́/ и, виде́нии преми́рными возвыша́яся,/ нощь жите́йскую без преткнове́ния преше́л еси́./ Те́мже Госпо́дь насле́дника тя Ца́рствия показа́/ и сожи́теля со все́ми святы́ми,/ е́же улучи́ти и нам, о́тче, моли́ся,// соверша́ющим любо́вию па́мять твою́.
Ду́ха Свята́го благода́ть стяжа́в,/ о́тче богоно́сне Гаврии́ле,/ огне́м ре́вности и ду́хом кро́тости/ па́ству твою́ ко Христу́ путеводи́л еси́,/ гони́телей же безбо́жных не убоя́вся,/ нечести́вая уста́ словесы́ ева́нгельскими дерзнове́нно загражда́л еси́./ Те́мже и просла́ви тя Госпо́дь,// Его́же моли́ о спасе́нии душ на́ших.
Сла́ва, глас 6:
Ве́рен Бо́гу и Це́ркви был еси́/ от ю́ности твоея́, о́тче Гаврии́ле,/ ве́рных до́брый предста́телю/ и те́плый моли́твенниче,/ испроси́ нам, тя почита́ющим,// мир и ве́лию ми́лость.
И ны́не, глас то́йже:
Под кров Твой ны́не прибега́ем,/ Пресвята́я Богоро́дице,/ и мо́лим Тя земноро́днии,/ прибе́жище на́ше, Влады́чице,// спаси́ нас от безме́рных прегреше́ний.
На стихо́вне стихи́ры, глас 5.
Подо́бен: Ра́дуйся, Живоно́сный Кре́сте:
Ра́дуйтеся, лю́дие,/ се бо но́вый чудотво́рец нам яви́ся,/ ве́рный путево́ждь ко спасе́нию,/ врач и помо́щник во вся́кой ско́рби,/ засту́пник и враго́в неви́димых прогони́тель,/ моли́твенник неусы́пный ко Го́споду// о всех, ве́рою к нему́ притека́ющих.
Стих: Честна́ пред Го́сподем// смерть преподо́бных Его́.
Ра́дуйся, свяще́нная главо́,/ ве́рный Христа́ служи́телю,/ о́тче преподо́бне Гаврии́ле,/ доброде́телей вмести́лище,/ боля́щих цели́телю и стра́ждущих утеше́ние,/ непосты́дная наде́ждо// всех, с ве́рою тя призыва́ющих.
Стих: Блаже́н муж боя́йся Го́спода,// в за́поведех Его́ восхо́щет зело́.
Ра́дуйся, тве́рдый испове́дниче,/ преподо́бне о́тче Гаврии́ле,/ ты бо, незло́бием и смире́нием украси́вся,/ мно́гая страда́ния претерпе́л еси́,/ и ве́рным путь ко Христу́ указа́л еси́,/ по отше́ствии же твое́м нас не оставля́еши,// моля́ся о спасе́нии душ на́ших.
Сла́ва, глас 1:
Испове́дниче до́блий и служи́телю ве́рный Та́ин Бо́жиих,/ Христо́в уго́дниче Гаврии́ле,/ ны́не пра́зднующе твою́ па́мять,/ из глубины́ души́ со умиле́нием вопие́м:/ сла́ва Да́вшему ти кре́пость,/ сла́ва Храни́вшему тя,// сла́ва Спаса́ющему нас твои́ми моли́твами.
И ны́не, Богоро́дичен, глас то́йже:
От всех бед рабы́ Твоя́ сохраня́й,/ Благослове́нная Богоро́дице,/ да Тя вси сла́вим,// я́ко наде́жду душ на́ших.
На благослове́нии хле́бов тропа́рь свята́го, два́жды, и Богоро́дице Де́во: еди́ножды.
Тропа́рь, глас 3:
Вельми́ све́тел яви́ся нам по́двиг жития́ твоего́,/ испове́дниче Христо́в Гаврии́ле,/ любве́ ра́ди ко Го́споду ра́достию на скорбь и лише́ния изше́л еси́,/ крест же свой нося́й и о́браз терпе́ния показу́яй,/ ве́рныя в годи́ну озлобле́ния па́стырски в ве́ре соблю́л еси́,/ и оби́тель Ду́ха Свята́го яви́лся еси́./ Те́мже у́бо вопие́м ти:// моли́твами твои́ми спаси́ ду́ши на́ша.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Излия́ся благода́ть Свята́го Ду́ха в житии́ твое́м, о́тче преподо́бне Гаврии́ле, и яви́лся еси́ до́брый па́стырь Христо́ва ста́да, поуча́я ча́да твоя́ бли́жнему я́коже себе́ угожда́ти, Бо́га же всем се́рдцем и кре́постию свое́ю люби́ти, и ве́рными бы́ти Ему́ да́же до сме́рти.
Сла́ва, и ны́не, Богоро́дичен:
Предста́тельнице Всеблага́я христиа́ном, предстоя́щи у Креста́ Сы́на Твоего́ и Бо́га на́шего, скорбь ве́лию претерпе́ла еси́, и благода́ть су́щия в ско́рбех утеша́ти прия́ла еси́. И ны́не Ма́терними Твои́ми моли́твами вся́ких бед изба́ви нас, и моли́ Христа́ Бо́га согреше́ний оставле́ние нам дарова́ти.
По 2-м стихосло́вии седа́лен, глас 3:
Попече́ний мирска́го жития́ отве́ргся, а́нгельское житие́ восприя́л еси́ и, пла́менною любо́вию ко Христу́ распали́вся, дарова́ние чуде́с от Него́ бога́тно прия́л еси́, Гаврии́ле боголю́бче. Те́мже моли́ся о нас, благоче́стно восхваля́ющих тя.
Сла́ва, и ны́не, Богоро́дичен:
Яви́лася еси́ па́че всех А́нгел сла́внейшая и всея́ тва́ри честне́йшая, Пречи́стая Влады́чице, Засту́пнице оби́димым и ненаде́янным наде́ждо! Пода́ждь и нам, в ско́рби су́щим, утеше́ние, и моля́щися простри́ пречи́стеи Твои́ ру́це к Сы́ну Твоему́, поми́ловатися душа́м на́шим.
По полиеле́и седа́лен, глас 3:
Серафи́мскою любо́вию пламене́я, о́тче Гаврии́ле, я́ко безпло́тен на земли́ пожи́л еси́, и равноа́нгельнаго стоя́ния на Небеси́ сподо́бился еси́. Те́мже тя я́ко челове́ка Бо́жия ублажа́юще, па́мять твою́ ра́достне соверша́ем, ча́юще моли́твами твои́ми улучи́ти мир и ве́лию ми́лость.
Сла́ва, и ны́не, Богоро́дичен:
Пресвята́я Де́во, па́че ра́зума Христа́ Бо́га ро́ждшая, всем христиа́ном Ма́ти преблага́я! Заступи́ и спаси́ нас, грехми́ мно́гими обремене́нных, изведи́ из бе́здны страсте́й и сохрани́ под кро́вом Твои́м, Всенепоро́чная.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть препо́добных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 24.
По 50-м псалме́ стихи́ра, глас 6:
Днесь, ве́рнии, па́мять преподо́бнаго Гаврии́ла соверша́юще,/ в ра́дости серде́ц восхва́лим Христа́ Бо́га на́шего,/ просла́вльшаго ди́внаго уго́дника Своего́,/ испове́дника тве́рдаго и па́стыря до́браго,/ ему́же со усе́рдием та́ко возопии́м:/ о всеблаже́нне о́тче,/ я́ко име́яй дерзнове́ние ко Го́споду,/ мир Оте́честву на́шему испроси́// и душа́м на́шим ве́лию ми́лость.
Кано́н, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.
Отве́рзи уста́ моя́, Го́споди, и просвети́ ум, омраче́нный суето́ю, и разреши́ ко́сный мой язы́к, да све́тло и ра́достно воспою́ испове́дника Твоего́ и до́браго па́стыря на́шего, преподо́бнаго Гаврии́ла пречу́днаго.
Душе́вную чистоту́ стяжа́в, без нея́же никто́же когда́ у́зрит Го́спода, Гаврии́ле преподо́бне, стра́сти окая́нныя души́ моея́ исцели́ моли́твами твои́ми.
Ра́зум от Бо́га восприи́м, уста́ нечести́вых отсту́пников и гони́телей загражда́л еси́, дерзнове́нно Христа́ испове́дуя.
Богоро́дичен: Ра́дости се́рдце мое́ испо́лни, Богоро́дице, прии́мшая от Арха́нгела ра́дости весть, и ду́шу любо́вию к Сы́ну Твоему́ уязви́, печа́ль грехо́вную потребля́ющи.
Песнь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́;/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден па́че Тебе́, Го́споди.
Я́ко крин ра́йский, процве́л еси́ ко украше́нию Це́ркве Ру́сския, удобре́нный непоро́чностию жития́ твоего́, помози́ и нам, о́тче преподо́бне, украси́тися благопло́дием духо́вным.
Любо́вию Христо́вою испо́лнен, исто́чник благода́ти яви́лся еси́, о́тче Гаврии́ле, напая́яй нас словесы́ уче́ний твои́х. Те́мже любо́вию па́мять твою́ соверша́ем.
Теплото́ю ве́ры согре́й ду́ши на́ша, неизче́тными грехи́ олядене́вшия, дух же благоче́стия вкорени́ в сердца́ нас, па́мять твою́ чту́щих.
Богоро́дичен: Святе́йшая Сил безпло́тных, честне́йшая всея́ земны́я тва́ри, Де́во Пречи́стая, моли́ся ко Го́споду со святы́м Гаврии́лом, от бед нам изба́витися.
Седа́лен, глас 5:
Испове́дниче честны́й, о́тче Гаврии́ле, Це́рковь Ру́сскую украша́яй, тала́нт, от Бо́га тебе́ да́нный, бога́тно преумно́жил еси́, и в ра́дость Го́спода твоего́ вни́ти сподо́бился еси́. Ему́же ны́не предстоя́, моли́ спасти́ся душа́м на́шим.
Сла́ва, и ны́не, Богоро́дичен:
По́мощь Твою́ призыва́ющих не пре́зри, Богороди́тельнице, упова́ние бо еси́ ро́да христиа́нскаго, но предвари́ и спаси́ нас, грехи́ мно́гими поглоще́нных, Цари́це Всеблага́я.
Песнь 4
Ирмо́с: Услы́шах, Го́споди, глас Твой, его́же рекл еси́,/ глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/ весь быв соше́дшаго Ду́ха, возопи́:// Ты еси́ Христо́с, Бо́жия му́дрость и си́ла.
Свя́тче Бо́жий, ны́не предстоя́ Престо́лу Святы́я Тро́ицы, моли́ся о лю́дех, в заблужде́нии ума́ су́щих, и напра́ви нас на путь покая́ния.
Свети́льник пресве́тел ча́дом твои́м яви́лся еси́, преподо́бне Гаврии́ле, и́же, ви́девше до́брая дела́ твоя́, прославля́ху Отца́ Небе́снаго, да́вшаго им такова́го предста́теля.
У́зы и страда́ния Христа́ ра́ди претерпе́в, сосу́д благода́ти Ду́ха Свята́го яви́лся еси́, о́тче Гаврии́ле, и, мно́гими дара́ми обогати́вся, лю́дем до́бре послужи́л еси́.
Богоро́дичен: Упова́ем на по́мощь Твою́, Богоро́дице, ве́рующе в толи́кое Твое́ милосе́рдие к лю́дем согре́шшим, и про́сим Тя приле́жно: испра́ви пути́ жития́ на́шего, Ма́ти Пречи́стая.
Песнь 5
Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас:// разве́ бо Тебе́ ино́го Бо́га не зна́ем.
О́тче Гаврии́ле, пе́рвых христиа́н страда́ний подо́бник быв, у́зы и гоне́ния за Христа́ му́жественне претерпе́л еси́, Его́же моли́ о душа́х на́ших.
Си́лою Госпо́днею укрепля́емь, преподо́бне Гаврии́ле, льсти́выя наве́ты гони́телей отве́ргл еси́, и зло́бу их смире́нием низложи́л еси́, зовы́й: ра́зве Христа́ ино́го Бо́га не зна́ю.
Непрело́жное терпе́ние показу́я, я́ко адама́нт тве́рдый яви́лся еси́ и, мно́гия ско́рби и у́зы со смире́нием прие́мля, богобо́рцем глаго́лал еси́: ра́зве Христа́ ино́го Бо́га не зна́ю.
Богоро́дичен: Оставле́ние мно́гих согреше́ний моли́твами Твои́ми, Де́во, упова́ем получи́ти, Ты бо еси́ наде́жда ро́да христиа́нскаго.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.
Яви́ся благода́ть ве́лия лю́дем правосла́вным в прославле́нии твое́м, о́тче Гаврии́ле, те́плаго бо тя моли́твенника пред Бо́гом обрето́ша.
Па́стыря тя до́браго ве́мы, блаже́нне о́тче, му́дре ста́до твое́ во дни ско́рбныя упа́сшаго, те́мже и нас в ве́ре и единомы́слии сохрани́.
А́лчущия пра́вды во дни гла́да духо́внаго пи́щею Небе́сною пита́л еси́, свобожда́я тех тьмы грехо́вныя и ко Христу́ приводя́.
Богоро́дичен: От ско́рби душе́вныя вопие́м Ти, Влады́чице: приими́ недосто́йныя на́ша моли́твы, Ты бо еси́ наде́жда и упова́ние душ на́ших.
Конда́к, глас 2:
Кре́пости Бо́жия соиме́нник,/ и прича́стник Бо́жия благода́ти яви́лся еси́,/ о́тче Гаврии́ле,/ преподо́бием и испове́дничеством/ и́стину правосла́вныя ве́ры утвержда́я,/ и́го Христо́во до конца́ восприя́л еси́,/ те́мже и просла́влен еси́ со святы́ми,// моли́ Христа́ Бо́га спасти́ся душа́м на́шим.
И́кос:
От ю́ности твоея́ вся блага́я земли́ ни во что́же вмени́в, блаже́нне, Еди́ному Го́споду, Его́же изде́тска возлюби́, всем се́рдцем послужи́ти возжеле́л еси́ и, чин а́нгельский в годи́ну тя́жкую восприи́м, я́ко до́блий во́ин Це́ркве Христо́вы, в броню́ ве́ры и пра́вды оболче́нный, на духо́вную брань изше́л еси́, мно́гия же ско́рби и гоне́ния за и́стину претерпе́в, Ца́рствия Небе́снаго сонасле́дник яви́лся еси́. Ны́не же Престо́лу Бо́жию со все́ми святы́ми предстоя́, моли́ Христа́ Бо́га спасти́ся душа́м на́шим.
Песнь 7
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,// Сый благослове́н и препросла́влен.
Днесь ра́достно лику́ют лю́дие преде́лов Симби́рских, соше́дшеся прославле́ния твоего́ ра́ди, о́тче Гаврии́ле, и еди́ным се́рдцем прославля́ют просла́вльшаго тя Го́спода, И́же благослове́н и препросла́влен.
О́тче честны́й, предстоя́й на Небесе́х, не забу́ди нас, до́лу су́щих, от вся́ких находя́щих бед сохрани́, раздо́ры и бра́ни умири́ моли́твами твои́ми ко Христу́ Бо́гу, И́же благослове́н и препросла́влен.
Ду́ха Свята́го благода́ть на тебе́ почи́, свя́те Гаврии́ле, свети́льник бо ве́ры и благоче́стия показа́лся еси́, и цели́тель душ и теле́с к тебе́ притека́ющих, Христа́ же велича́ющих, И́же благослове́н и препросла́влен.
Богоро́дичен: Влады́чице, угаси́ милосе́рдием Твои́м пещь страсте́й на́ших, да воспое́м Тя со все́ми избра́нными Твои́ми, я́ко благослове́нна еси́ и препросла́влена.
Песнь 8
Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.
Я́ко луча́ све́та Христо́ва во тьме грехо́вней возсия́л еси́, блаже́нне Гаврии́ле, помози́ и нам Све́та Невече́рняго дости́гнути, да не уклони́мся пути́ спаси́тельнаго, но вку́пе с тобо́ю возопие́м: благослови́те, вся дела́ Госпо́дня, Го́спода.
Во дни ско́рби ничто́ возмо́же разлучи́ти тя от любве́ Бо́жия, о́тче Гаврии́ле, те́мже в любви́ ева́нгельстей помози́ пребы́ти и нам, моли́твенно чту́щим тя и пою́щим: благослови́те, вся дела́ Госпо́дня, Го́спода.
Непреобори́м во́ин духо́вный яви́лся еси́, о́тче Гаврии́ле, во всем покори́вый себе́ во́ли Госпо́дни, и, нима́ло взира́я на у́зы и гоне́ния, си́лою Христо́вою вся побежда́л еси́, вопия́: благослови́те, вся дела́ Госпо́дня, Го́спода.
Богоро́дичен: Свят день, во́ньже собра́ нас Ма́ти Бо́жия просла́вити уго́дника Своего́ Гаврии́ла, чудесы́ свои́ми пе́ти нас науча́ющаго: благослови́те, вся дела́ Госпо́дня, Го́спода.
Песнь 9
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная.// Тем Всепе́тую Богоро́дицу велича́ем.
Ве́ру соблю́л еси́, и тече́ние жи́зни до́бре сконча́л еси́, те́мже даде́ся тебе́ в Ца́рствии Небе́снем неувяда́емый сла́вы вене́ц; утверди́ и нас, малове́рием коле́блемых, ве́ру правосла́вную сохрани́ти и спасе́ние улучи́ти.
Всяк с ве́рою моля́йся по проше́нию прие́млет, те́мже мо́лим тя, уго́дниче Бо́жий Гаврии́ле: не оста́ви нас, во ско́рбех су́щих, моли́твами твои́ми.
Се́рдцем твои́м в го́рняя устреми́лся еси́ и вся, я́же на земли́, отри́нул еси́. Помози́ и нам, о́тче Гаврии́ле, от пути́ пра́ваго не уклоня́тися.
Богоро́дичен: Ма́терь Бо́жию, утеше́ние на́ше, прииди́те, вси восхва́лим: Та бо нело́жно обеща́ся бы́ти нам Помо́щница до сконча́ния ве́ка.
Свети́лен:
Благода́ть Ду́ха Свята́го бога́тно всели́ся в тя, о́тче Гаврии́ле, и, предугото́вавши чистото́ю ду́шу твою́, сотвори́ тя насле́дника Небе́снаго Ца́рствия, и моли́твенника те́пла о душа́х на́ших.
Сла́ва, и ны́не, Богоро́дичен:
Пе́ти Тебе́ похва́льная сподо́би, Де́во Всесвята́я, Свет бо Невече́рний от чре́ва Твоего́ ми́рови возсия́, и мрак души́ моея́ озари́, и мглу страсте́й прогони́, еди́на Всепе́тая.
На хвали́тех стихи́ры на 4, глас 4:
Воздержа́нием до́бре воспита́вся,/ на высоту́ доброде́телей возше́л еси́,/ испове́дничества же оде́ждею украси́вся/ и жития́ преподо́бием просвети́вся,/ дара́ми Ду́ха Свята́го обогати́лся еси́./ Его́же благода́ть и нам стяжа́ти помоли́ся,/ чту́щим святу́ю па́мять твою́,// Гаврии́ле о́тче на́ш.
О́тче Гаврии́ле преподобноиспове́дниче,/ Це́ркви Христо́вой до́бре послужи́л еси́/ и, дарова́нный тебе́ от Бо́га тала́нт умно́жив,/ в ра́дость Го́спода твоего́ вшел еси́,/ Ему́же предстоя́ со А́нгелы,// моли́ся о душа́х на́ших.
Я́коже зла́то, огне́м искуша́емо, чи́сто явля́ется,/ та́ко и ты, о́тче Гаврии́ле,/ у́зами заточе́ния искуше́н быв,/ гоне́ния му́жественно претерпе́л еси́,/ и ны́не житие́ твое́ озаря́ет ду́ши на́ша,/ малове́рия о́блаком омраче́нныя,/ во е́же сла́вити Христа́ Бо́га на́шего,// и Того́ ве́лию ми́лость.
Сла́ва, глас 8:
О́тче преподо́бне Гаврии́ле,/ благи́й ра́бе Госпо́день/ и ве́рный учениче́ Христо́в,/ ты, па́ству твою́ водо́ю живо́ю напоя́я,/ се́менами ве́ры и благоче́стия напита́л еси́./ Ны́не же Бо́гу предстоя́ со все́ми святы́ми,// моли́ся о спасе́нии душ на́ших.
И ны́не, Богоро́дичен, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
Славосло́вие вели́кое, и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, воспо́йте Го́сподеви, вся земля́. Апо́стол к Ефесе́ем, зача́ло 233. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 64. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О па́стырю до́брый и до́блий во́ине Христо́в, ско́рый помо́щниче и те́плый засту́пниче, богоблаже́нный уго́дниче Бо́жий и Правосла́вия тве́рдый испове́дниче Гаврии́ле! Не оста́ви нас моли́твами твои́ми, с любо́вию к тебе́ притека́ющих, ве́лие бо дерзнове́ние ко Го́споду стяжа́л еси́. Ты бо, от ю́ности жизнь всеце́ло Бо́гу посвяти́в, огнь любве́ Боже́ственныя в се́рдце твое́м возже́гл еси́, наипа́че же нищету́ духо́вную стяжа́в, я́ко раб благи́й, дела́ богоуго́дная кро́тко и смире́нно твори́л еси́. Те́мже моли́твами твои́ми, всечестны́й о́тче, уврачу́й ду́ши на́ша, грехо́м изъязвле́нныя, неду́гующия исцели́, младе́нцы воспита́й, ю́ность наста́ви, ста́рость поддержи́, малоду́шныя уте́ши, вдови́цам предста́ни, си́рых защити́, супру́жество в ми́ре и единомы́слии соблюди́, расточе́нныя собери́, прельще́нныя обрати́ и соедини́ Святе́й Це́ркви. Ей, свя́тче Бо́жий! Моли́твами твои́ми умягчи́ сердца́ на́ша, помози́ нам ми́лостивыми бы́ти и бли́жним с любо́вию послужи́ти; по отше́ствии же на́шем от земны́х, глас Влады́ки Христа́ Бо́га на́шего услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.
