Служба святителю Антонию, архиепископу Воронежскому и Задонскому

Ме́сяца декабря́ в 20-й день
Cвяти́теля Анто́ния, архиепи́скопа Воро́нежскаго и Задо́нскаго

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8: предпра́зднства Рождества́ Христо́ва 3, и святи́теля 5, глас 2.

Подо́бен: Ки́ими похва́льными:

Ки́ими похва́льными венцы́/ увязе́м святи́теля Анто́ния,/ от ю́ности все́ю душе́ю Бо́га взыска́вшаго/ и па́че всего́ слу́жбу церко́вную возлюби́вшаго,/ ти́хостию нра́ва и смире́нием укра́шеннаго,/ гра́да Воро́нежа похвалу́/ и Ру́сския земли́ свети́льника,/ его́же избра́ Христо́с Бог наш,// име́яй ве́лию ми́лость. Два́жды.

Ки́ими досто́йными пе́сньми/ просла́вим святи́теля Анто́ния,/ ми́ра тле́ннаго отре́кшагося,/ по́стника не то́кмо те́лом, но и душе́ю,/ у́зким путе́м за́поведей Госпо́дних ше́ствовавшаго,/ гра́да Воро́нежа похвалу́/ и Ру́сския земли́ свети́льника,/ ему́же благода́ть дарова́ Христо́с Бог наш,// име́яй ве́лию ми́лость.

Ки́ими церко́вными хвала́ми/ воспое́м святи́теля Анто́ния,/ сло́вом Бо́жиим ум пита́вшаго/ и по́двиги святы́х оте́ц во́лю свою́ укре́пльшаго,/ моли́твою серде́чною чу́вства освяти́вшаго,/ гра́да Воро́нежа похвалу́/ и Ру́сския земли́ свети́льника,/ его́же просвети́ Христо́с Бог наш,// име́яй ве́лию ми́лость.

Ки́ими пе́сненными гла́сы/ воспое́м святи́теля Анто́ния,/ па́стыря мона́шествующих изря́днаго,/ во игу́менстве свое́м/ всем вся́ко послужи́вшаго,/ гра́да Воро́нежа похвалу́/ и Ру́сския земли́ свети́льника,/ его́же умудри́ Христо́с Бог наш,// име́яй ве́лию ми́лость.

Сла́ва, глас 8:

Что тя нарече́м, святи́телю Анто́ние?/ Мона́хов ли украше́ние,/ я́ко целому́дрием, нището́ю и послуша́нием себе́ украси́л еси́?/ Архиере́ев ли похвалу́,/ я́ко свет твой пред челове́ки просия́л еси́?/ Святи́телей Митрофа́на и Ти́хона досто́йнаго прее́мника,/ я́ко свети́льник земли́ Воро́нежския яви́лся еси́?/ Сего́ ра́ди со дерзнове́нием моли́ся Христу́ Бо́гу// о спасе́нии душ на́ших.

И ны́не, предпра́зднства, глас то́йже: Восприими́, Вифлее́ме:

Вход. Проки́мен дне. И чте́ния три святи́тельская.

На лити́и стихи́ра хра́ма.
Сла́ва, святи́теля Анто́ния, глас 3:

О́тче святи́телю Анто́ние,/ ты во дни смертоно́сныя я́звы и гла́да губи́тельнаго,/ Го́спода приле́жно умоля́л еси́,/ о е́же отступи́ти преще́нию сему́ лю́тому./ И ны́не моли́ Всеми́лостиваго Бо́га,/ е́же изба́витися нам от губи́тельнаго пове́трия, на ны дви́жимаго,/ та́же о́гненнаго запале́ния/ и неи́стовства водны́я стихи́и,/ гла́да и ины́х бед, по грехо́м на́шим находя́щих на ны;/ да да́рует Госпо́дь моли́твами твои́ми/ лю́дем правосла́вным и всей земли́ Ру́сской// мир и ве́лию ми́лость.

И ны́не, предпра́зднства от стихо́вны, глас 2: Се вре́мя прибли́жися:

На стихо́вне стихи́ры предпра́зднства со стихи́ их, глас 2.
А́ще кроме́ пра́здника, стихи́ры святи́теля, глас то́йже.

Подо́бен: До́ме Евфра́фов:

Дом доброде́телей/ и оби́тель Свята́го Ду́ха/ яви́лся еси́, свя́те Анто́ние,/ Воро́нежская похвало́// и Це́ркве Ру́сския украше́ние.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Па́стырю до́брый/ и моли́твенниче при́сный,/ свя́те Анто́ние,/ огради́ ста́до твое́// от волко́в, губя́щих е́.

Стих: Восхва́лятся преподо́бнии во сла́ве// и возра́дуются на ло́жах свои́х.

Бе́дствующих помо́щниче,/ во у́зах томя́щихся укрепле́ние,/ свя́тче Бо́жий Анто́ние,/ не преста́й моли́тися// о призыва́ющих тя.

Сла́ва, глас 1:

Прииди́те, ве́рнии, просла́вим Го́спода,/ дарова́вшаго нам уго́дника Своего́,/ святи́теля Анто́ния,/ и́же по преставле́нии от земны́х к Небе́сным/ чудесы́ па́че луч со́лнечных сия́ет,/ и всем вся́ко ко бла́гу спосо́бствует:/ боля́щия исцеля́ет,/ бе́дствующия спаса́ет,/ скорбя́щия утеша́ет,/ путеше́ствующия сохраня́ет,/ немощны́я в ве́ре укрепля́ет,/ неве́рующия вразумля́ет,/ злонаме́ренныя наказу́ет,/ небрегу́щия о зако́не и пра́вде облича́ет// и мо́лится о спасе́нии душ на́ших.

И ны́не, предпра́зднства, глас то́йже: Предпра́зднуим, лю́дие, Христо́во Рождество́:

Тропа́рь, глас 4:

Преди́внаго селе́ния Бо́жия Ма́тере жи́тель сый,/ кро́тостию и смире́нием изря́дно украша́емь,/ гра́ду Воро́нежу тре́тие свети́ло благода́ти яви́лся еси́,/ святы́х Митрофа́на и Ти́хона сонасле́дниче,/ святи́телю о́тче наш Анто́ние,/ моли́ Ми́лостиваго Бо́га,/ гра́ду твоему́ мир дарова́ти,/ Оте́честву на́шему утвержде́ние// и душа́м ве́рных спасе́ние.

Сла́ва, и ны́не, предпра́зднства, глас то́йже: Гото́вися, Вифлее́ме:

НА У́ТРЕНИ

На Бог Госпо́дь: тропа́рь предпра́зднства, два́жды. Сла́ва, святи́теля. И ны́не, предпра́зднства.

По 1-м стихосло́вии седа́лен, глас 1:

А́ще и сокрове́ни бы́ша по́двизи твои́, свя́те Анто́ние, оба́че подви́жницы Христо́ви я́ко уго́дника Бо́жия тя почита́ху, свет бо добро́ты души́ твоея́ пресла́вно просия́л есть.

Сла́ва, и ны́не, предпра́зднства, глас то́йже: Приклони́вый Небеса́:

По 2-м стихосло́вии седа́лен, глас 4:

А́нгелов собесе́дник и святы́х подража́тель был еси́, свя́те Анто́ние, те́мже му́дрость и благоче́стие твое́ в ми́ре просия́ша, а́ще и доброде́тели своя́ от люде́й ева́нгельски сокрыва́л еси́.

Сла́ва, и ны́не, предпра́зднства, глас то́йже: Ра́дуйся, Сио́не:

Велича́ние:

Велича́ем тя,/ святи́телю о́тче Анто́ние,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный: Услы́шите сия́, вси язы́цы:

По полиеле́и седа́лен, глас 3:

Днесь святи́тель Анто́ний у Престо́ла Бо́жия, вку́пе с Митрофа́ном и Ти́хоном и все́ми святы́ми земли́ Воро́нежския, за ны предстои́т Святе́й Тро́ице; днесь во хра́мех архиере́и и свяще́нницы ликовству́ют, и вси ве́рнии ра́дости исполня́ются, ти́и бо мо́лят усе́рдно о нас Преве́чнаго Бо́га.

Сла́ва, и ны́не, предпра́зднства.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Святи́телю о́тче Анто́ние,/ па́стырю до́брый и му́дрый,/ гра́да Воро́нежа похвало́,/ и Це́ркве Ру́сския украше́ние,/ ско́рый пред Бо́гом хода́таю о па́стве твое́й,// моли́ спасти́ся душа́м на́шим.

Кано́н предпра́зднства со ирмосо́м на 6, и свята́го на 8, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою,/ и спа́сшему Изра́иля,// я́ко просла́вися.

Даждь ми сло́во, Христе́ Бо́же, воспе́ти досто́йно святи́теля Воро́нежскаго Анто́ния, и́же днесь ку́пно с на́ми Рождество́ Твое́ пе́сньми предпра́зднственными славосло́вит.

От земна́го свяще́нства род свой веды́й, свя́те Анто́ние, измла́да душе́ю к Небе́сным оби́телем устреми́лся еси́. Сего́ ра́ди Бог сохрани́ тя во всех путе́х твои́х.

Еще́ о́трок сый, свя́те Анто́ние, му́дрость кни́жную возлюби́л еси́, те́мже и в словесе́х Госпо́дних со тща́нием поуча́лся еси́.

Богоро́дичен: Еде́ме, украси́ся, Евфра́фа бо Созда́телю угото́вася, роди́тися хотя́щу от Де́вы Ма́тере, в верте́пе Вифлее́мстем, за благоутро́бие мно́гое.

Песнь 3

Ирмо́с: Ка́мень, его́же небрего́ша зи́ждущии,/ сей бысть во главу́ у́гла:/ той есть Ка́мень,/ на не́мже утверди́ Це́рковь Христо́с,// ю́же от язы́к искупи́.

Ти́хостию нра́ва и смире́нием укра́шен, свя́те Анто́ние, Смирни́цким во учи́лищи духо́внем нарече́н был еси́, да по житию́ прозва́ние твое́ бу́дет.

От ю́ности Бо́гу всем се́рдцем служи́ти восхоте́в, свя́те Анто́ние, в оби́тель первонача́льников жития́ мона́шескаго на Руси́ прите́кл еси́ и, ми́ра отре́кся, преподо́бнаго Анто́ния и́мя восприя́л еси́.

Жития́ и творе́ния святы́х оте́ц я́ко путь к Со́лнцу Пра́вды Христу́ возлюби́л еси́, писа́ния же мирска́я я́ко тьму и суесло́вие отве́ргл еси́, свя́те Анто́ние.

Богоро́дичен: Гряди́, Иса́ие, возопи́й: се Де́ва и́мать во чре́ве Изба́вителя ми́ра, и роди́т в верте́пе, и нареку́т Ражда́емаго Емману́ил, е́же есть сказа́емо: с на́ми Бог.

Конда́к и и́кос предпра́зднства.

Седа́лен свята́го, глас 8:

Стопа́м преподо́бнаго Анто́ния после́довал еси́, блаже́нне, той бо в пеще́ре Ки́евстей нача́ло ру́сскому мона́шеству положи́; ты же, от си́лы в си́лу восходя́, блюсти́тель Бли́жних пеще́р и игу́мен ла́вры Пече́рския наре́клся еси́.

Сла́ва, и ны́не, предпра́зднства, глас то́йже: Из чре́ва пре́жде век:

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́ вопия́:/ внегда́ прибли́житися ле́том, позна́ешися:/ внегда́ приити́ вре́мени, пока́жешися.// Сла́ва си́ле Твое́й, Го́споди.

Преподо́бным отце́м Пече́рским насле́дуя, по́двигами воздержа́ния, поста́ и моли́твы просия́л еси́, свя́те Анто́ние, ра́зумом же богопросвеще́н, бра́тию ко спасе́нию наставля́л еси́.

Предста́тельством Пресвяты́я Богоро́дицы укрепля́емь, блаже́нне Анто́ние, я́ко иску́сный ко́рмчий ла́врою Пече́рскою пра́во пра́вил еси́, те́мже и благоволе́ние Алекса́ндра Благослове́ннаго стяжа́л еси́.

Храни́тель па́ствы Воро́нежския Бо́жиим изволе́нием поста́влен был еси́, свя́те Анто́ние, да ве́тхая обнови́ши, не́мощная укрепи́ши, блага́я удобри́ши, омертве́лая отсече́ши.

Богоро́дичен: В верте́пе убо́зем роди́тися нас ра́ди Бог Сый изво́лил еси́, обнища́в, Бла́же, на́шею нището́ю за милосе́рдие, и из Де́вы проше́д воплоще́н, пребы́в еди́н Сын из Отца́ Предве́чен.

Песнь 5

Ирмо́с: Твой мир даждь нам,/ Сы́не Бо́жий,/ ино́го бо ра́зве Тебе́ Бо́га не зна́ем:/ и́мя Твое́ имену́ем,// я́ко Бог живы́х и ме́ртвых еси́.

Труды́ ве́лии на земли́ Воро́нежстей угото́вани бы́ша тебе́, святи́телю Анто́ние, я́коже в виде́нии чу́днем показа́ ти Госпо́дь, те́мже со упова́нием ру́ку на ра́ло возложи́л еси́.

Слу́жбу Бо́жию неотсту́пно соверша́л еси́, святи́телю Анто́ние, па́ству Воро́нежскую сло́вом благода́тным ко спасе́нию назида́я.

Ми́лостынею никогда́же оскудева́я, богому́дре Анто́ние, иму́щих стяжа́ние мно́гое пра́ведно расточа́ти то поуча́л еси́, наипа́че же су́щим в темни́цах пита́тель и уте́шитель был еси́.

Богоро́дичен: Бог челове́ком подо́бен быв из Тебе́, Младе́нец нас ра́ди ражда́ется, Богоневе́сто, и пребыва́ет весь неизме́нен, и во пло́ти ви́дится Бог вочелове́чивыйся.

Песнь 6

Ирмо́с: Проро́ка Ио́ну подража́я вопию́:/ живо́т мой, Бла́же, свободи́ из тли,// и спаси́ мя, Спа́се ми́ра, зову́ща: сла́ва Тебе́.

Во дни смертоно́сныя я́звы и гла́да губи́тельнаго па́ству твою́ призыва́л еси́, о́тче Анто́ние, усе́рдно Бо́гу моли́тися и Святы́х Та́ин приобща́тися, да поми́ловани бу́дут.

Преподо́бный ста́рец Серафи́м я́ко вели́каго архиере́я Бо́жия почита́ше тя, святи́телю Анто́ние, ты же, в любви́ Христо́вой с ним пребыва́я, преставле́ние его́ к Бо́гу ду́хом прови́дел еси́.

Я́ко наста́вника иску́сна почита́ху тя, святи́телю Анто́ние, Гео́ргий Затво́рник, ста́рец Му́ромский Анто́ний, слу́жка Серафи́мов Никола́й и мно́зи ини́и, на ни́хже явле́на бы́ша чрез тебе́ чудеса́ и зна́мения Бо́жия.

Богоро́дичен: Украси́ся, Вифлее́ме, угото́вися, Евфра́фо: без ма́тере бо от Отца́, и без отца́ Ма́терию Сын чревоно́сится, и ражда́ется спаса́я ны.

Конда́к, глас 3:

Днесь земля́ Воро́нежская весе́лия исполня́ется,/ во иера́рсех вели́каго Анто́ния па́мять честву́ющи:/ той бо любо́вию Христо́вою воспламени́вся,/ моли́твами, бде́нием и поще́нием оби́тель Ду́ха Свята́го себе́ сотвори́,/ от Него́же вразумля́емь,/ па́ству церко́вную прему́дре упа́сл еси́;/ мы же, такова́го хода́тая ко Христу́ Бо́гу иму́ще,/ с ве́рою и любо́вию вопие́м:/ ра́дуйся, святи́телю Анто́ние,// те́плый о нас пред Бо́гом предста́телю.

И́кос:

А́нгелом подража́теля и па́ствы Воро́нежския любвеоби́льнаго архипа́стыря, святи́теля Анто́ния пе́сньми просла́вим, ве́рнии, и́же от ю́ности Христа́ всем се́рдцем возлюби́в, добронра́вное житие́ яви́л еси́, и мно́гия лю́ди на путь и́стины наста́вил еси́. Ему́же днесь по достоя́нию прино́сим похвалы́ сия́: ра́дуйся, я́ко от младе́нства хра́му Госпо́дню прилежа́л еси́; ра́дуйся, я́ко му́дрость Бо́жию па́че суему́дрия ми́ра возлюби́л еси́. Ра́дуйся, от ю́ности обе́ты мона́шеския избра́вый; ра́дуйся, и́ноков оби́тели Пече́рския до́бре упра́вивый. Ра́дуйся, па́стыри прему́дре наставля́яй; ра́дуйся, я́ко и па́ству твою́ сло́вом и́стины пита́яй. Ра́дуйся, я́ко святи́теля Митрофа́на на земли́ просла́вил еси́; ра́дуйся, я́ко святи́теля Ти́хона мо́щи нетле́нныя обре́л еси́. Ра́дуйся, я́ко во дни я́звы и гла́да Бо́га умоли́л еси́; ра́дуйся, я́ко всем призыва́ющим тя ско́рый помо́щник яви́лся еси́. Ра́дуйся, ве́рныя чудесы́ твои́ми укрепля́яй; ра́дуйся, неве́рныя к Бо́гу обраща́яй. Ра́дуйся, святи́телю Анто́ние, те́плый о нас пред Бо́гом предста́телю.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́ поя́ху,/ и благословля́ху глаго́люще:// благослове́н Бог оте́ц на́ших.

Вои́стину а́нгел па́ствы Воро́нежския был еси́, святи́телю Анто́ние, крила́ми моли́твы твоея́ ю́ огражда́я и неотсту́пно к Бо́гу взыва́я: при́зри с Небесе́, Бо́же, и виждь, и посети́ виногра́д сей, его́же насади́ десни́ца Твоя́.

В милосе́рдии, моли́тве и терпе́нии па́стыри утвержда́л еси́, святи́телю Анто́ние, да, я́ко ре́вностнии служи́телие и строи́телие Та́ин Бо́жиих, до́брый отве́т даду́т на Стра́шном Суди́щи Христо́ве.

Сугу́бое попече́ние о мла́дости неразу́мней име́я, о́тче Анто́ние, поуче́нием кро́тким и любо́вию в ю́ных сердца́х страх Госпо́день насажда́л еси́.

Богоро́дичен: Проро́ком дре́вле прорече́нный приближа́ется мне, Младе́нец из Де́вы рожде́йся: ра́дуется Ада́м, и прама́ти Е́ва боле́зней разреши́ся, и сликовству́ет Дави́д, Ражда́ющия оте́ц.

Песнь 8

Ирмо́с: Его́же ужаса́ются А́нгели, и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,// и превозноси́те во вся ве́ки.

Святи́теля Митрофа́на, архипа́стыря Воро́нежскаго, всем се́рдцем почита́я, нетле́нныя мо́щи его́ обрести́ потща́лся еси́, о́тче Анто́ние, и я́ко но́ваго засту́пника земли́ Ру́сския того́ просла́вил еси́.

О мона́шестем жи́тельстве ревну́я, святи́телю Анто́ние, оби́тель Благове́щения Пресвяты́я Богоро́дицы во гра́де Воро́неже основа́л еси́, иде́же и честны́я мо́щи святи́теля Митрофа́на я́ко драгоце́нное сокро́вище положи́л еси́.

Те́лом боле́знуя, святи́телю Анто́ние, возжеле́л еси́ ра́ди спасе́ния души́ в ла́вру Пече́рскую удали́тися, оба́че, святи́теля Митрофа́на явле́нием вразумля́емь, да́же до сме́рти па́ству Воро́нежскую не оста́вил еси́.

Богоро́дичен: Звезда́ возсия́ Христо́с от Иа́кова, и волсви́ стека́ются во град Вифлее́м, пе́ти, чествова́ти и поклони́тися Ему́, рожде́нному из ложе́сн Чи́стыя Богоро́дицы.

Песнь 9

Ирмо́с: Живоприе́мный Исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,// Богоро́дицу ве́рнии велича́ем.

На коне́ц дний твои́х, свя́те Анто́ние, дарова́ ти Госпо́дь обрести́ мо́щи святи́теля Ти́хона, да явле́н бу́дет на све́щнице Воро́нежстем пред о́чи всех, я́ко свети́льник ве́ры и до́брых дел.

По́двигом до́брым подвиза́лся еси́, тече́ние жития́ твоего́ непосты́дно сконча́в, ве́ру соблю́л еси́, святи́телю Анто́ние, сего́ ра́ди угото́ва ти Госпо́дь вене́ц пра́вды.

Се ны́не вре́мя благоприя́тно, се ны́не день спасе́ния! Па́ства Воро́нежская и вся Це́рковь Ру́сская ра́дуется, святи́теля Анто́ния, моли́твенным предста́тельством и чудесы́ Бо́гом просла́вленнаго, досто́йно велича́ющи.

Богоро́дичен: Ра́дуйся, Чи́стая, Бо́жий гра́де одушевле́нный, в не́мже Бог вмести́тися благоволи́, не оста́вль бо го́рних к Тебе́ сни́де, я́ко дождь на зе́млю, Богороди́тельнице, и во гра́де Вифлее́ме Младе́нец ражда́ется.

Свети́лен:

Све́тлостию доброде́телей просия́в, в ме́сте све́тле, иде́же пра́зднующих глас непреста́нный, и безконе́чная сла́дость зря́щих ли́ка Христо́ва добро́ту неизрече́нную, всели́лся еси́, свя́тче Анто́ние, хода́таю наш пред Бо́гом непосты́дный.

Сла́ва, и ны́не, предпра́зднства: Украси́ся, Вифлее́ме:

На хвали́тех стихи́ры на 8: предпра́зднства 4, и святи́теля 4, глас 5.

Подо́бен: Ра́дуйся, Живоно́сный Кре́сте:

Ра́дуйся, святи́телю Анто́ние,/ архипа́стырю преди́вный Це́ркве Ру́сския,/ я́ко по вся дни жития́ твоего́/ трудо́м, моли́твою и неле́ностным попече́нием/ ре́вностно па́ству твою́ охраня́л еси́,/ и повеле́нная ти от Го́спода со усе́рдием исполня́л еси́,/ блага́я терпели́вне возраща́яй,/ него́дная же искореня́яй./ И ны́не не преста́й моли́тися Христу́ Бо́гу на́шему,// дарова́ти нам ве́лию ми́лость. Два́жды.

Ра́дуйся, святи́телю Анто́ние,/ архипа́стырю до́брый земли́ Воро́нежския,/ ты бо, боле́знуя о па́стве твое́й, Бо́га умоля́л еси́,/ да да́рует ти помо́щники ве́рныя,/ служи́тели Христо́вы и строи́тели Та́ин Бо́жиих,/ с ра́достию бдя́щия о душа́х христиа́нских,/ путево́дствующия лю́ди в Ца́рство Небе́сное./ И ны́не не преста́й моли́тися Христу́ Бо́гу на́шему,// дарова́ти нам ве́лию ми́лость.

Ра́дуйтеся, святи́телие тричи́сленнии,/ Митрофа́не, Ти́хоне и Анто́ние,/ столпи́ благоче́стия и зако́на Бо́жия пропове́дницы,/ па́стырие и учи́телие богодухнове́ннии,/ путеводи́телие в Ца́рствие Небе́сное,/ земна́го оте́чества на́шего засту́пницы,/ земли́ Воро́нежския утвержде́ние,/ всея́ Руси́ чудотво́рнии моли́твенницы./ Моли́теся Христу́ Бо́гу на́шему,// дарова́ти нам ве́лию ми́лость.

Сла́ва, глас 5:

Востру́бим трубо́ю пе́сней,/ просла́вим святи́теля Анто́ния:/ архипа́стыри и свяще́нницы, мона́си и прости́и,/ ста́рцы и ю́нии, му́жие и жены́,/ ни́щии и бога́тии,/ власти́телие и и́же под вла́стию су́щии,/ скорбя́щии и ра́дующиися,/ всех бо созыва́ет наш архипа́стырь до́брый,/ дарова́ти коему́ждо, по серде́чному проше́нию,// мир и ве́лию ми́лость.

И ны́не, предпра́зднства, глас 6: За́висть же и огнь:

НА ЛИТУРГИ́И

Блаже́нны от кано́на предпра́зднства, песнь 3, и святи́теля, песнь 6. Проки́мен, глас 1: Уста́ моя́ возглаго́лют прему́дрость,// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости, и язы́к его́ возглаго́лет суд. Стих: Зако́н Бо́га его́ в се́рдце его́, и не за́пнутся стопы́ его́. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О святи́телю о́тче наш Анто́ние, па́стырю до́брый, чудотво́рче изря́дный и моли́твенниче преди́вный! Ты во дни земна́го жития́ твоего́ нището́ю духо́вною, кро́тостию и чистото́ю се́рдца себе́ украси́в, жа́ждою пра́вды, ми́лостынею и пла́чем покая́нным за́поведи Ева́нгельския испо́лнил еси́. Дух ми́рен стяжа́в и да́же до конца́ дней твои́х бли́жним послужи́в, Бо́гу угоди́л еси́ и Ца́рствия Небе́снаго дости́гл еси́. Ны́не же со святи́тели Воро́нежскими Митрофа́ном и Ти́хоном Престо́лу Бо́жию предстоя́, моли́ Пресвяту́ю Тро́ицу па́ству твою́ до́бре упра́вити и всем вся, я́же ко спасе́нию поле́зная, пода́ти. Испроси́ у Отца́ Небе́снаго, Врача́ душ и теле́с, боля́щим исцеле́ние, скорбя́щим и озло́бленным утеше́ние, гре́шным покая́ние, неве́дущим вразумле́ние. Моли́ Сы́на Бо́жия, Го́спода на́шего Иису́са Христа́, о́троки в стра́се Бо́жии наста́вити и в целому́дрии возрасти́ти, ю́ныя во благоче́стии утверди́ти, ста́рыя без попече́ния не оста́вити. Умоли́ и Ду́ха Свята́го, Уте́шителя Животворя́щаго, Це́ркви Правосла́вней в еди́нстве сохраня́тися, па́стырем ре́вность о спасе́нии пасо́мых дарова́ти, да лю́дие в ве́ре, наде́жди и любви́ Бо́жией утвердя́тся, и сла́вится от всех пречестно́е и великоле́пое и́мя Пресвяты́я Тро́ицы, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.