Служба преподобному Антипе Валаамскому (Афонскому)
Ме́сяца января́ в 10-й день
Преподо́бнаго Анти́пы Валаа́мскаго (Афо́нскаго)
Слу́жба соверша́ется в соедине́нии с попра́зднством Богоявле́ния.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры пра́здника 3, и свята́го 5.
Стихи́ры свята́го, глас 4.
Подо́бен: Дал еси́ зна́мение:
Дне́шний пра́здник я́ве/ сугу́бую благода́ть светлоно́сит,/ Креще́ния Спа́сова облиста́емь заря́ми/ и успе́нием преподо́бнаго Анти́пы осиява́емь./ Стеце́мся у́бо, христолюби́вое мно́жество,/ наро́читое торжество́ досто́йно почти́м,/ в не́мже ра́дость нетле́нная подава́ется/ и неоску́дное душ и теле́с врачевство́// песнопою́щим весе́лия вино́вных.
Рожде́нием Крести́теля Иоа́нна/ свяще́нный Заха́рия со Елисаве́тою хва́лится;/ и тобо́ю, преподо́бне Анти́по,/ оте́ц и ма́ти че́сти сподобля́ются,/ я́ко сы́на моли́твы породи́ша/ и плод благоче́стия возрасти́ша./ Ны́не же прославля́ема тя зря́ще,/ с собо́ром Небе́сных и земны́х// песнопою́т тебе́, я́ко весе́лия вино́вному.
Я́коже со́лнце тече́ние свое́ соверша́ет,/ и несть и́же укры́ется теплоты́ его́,/ та́ко и ты, преподо́бне Анти́по,/ стезе́ю жи́зни шел еси́,/ све́том любве́ Христо́вы ду́ши просвеща́я,/ моли́твою и сло́вом благода́ти животворя́./ Те́мже па́мять твою́ благогове́йне чту́ще,/ Молда́вия и Афо́н, и Ру́сская земля́// ны́не песнопою́т тебе́, я́ко весе́лия вино́вному.
Глас то́йже.
Подо́бен: Я́ко до́бля:
Скажи́ мне, Го́споди, путь!/ из глубины́ воззва́л еси́, о́тче Анти́по,/ и, глас Боже́ственный восприи́м,/ мир и вся, я́же в нем, оста́вил еси́,/ и в пусты́ню Афо́нскую всели́лся еси́,/ Крести́телеву житию́ ревну́я,/ иде́же от Исто́чника приснотеку́щаго пив,/ благода́ти Свята́го Ду́ха испо́лнился еси́// и во пло́ти равноа́нгелен показа́лся еси́.
Я́ко благослове́ние Афо́нския горы́/ ты, преподо́бне о́тче Анти́по,/ ко оби́тели Валаа́мстей прише́л еси́,/ я́же не вотще́ Се́верный Афо́н имену́ется,/ и бога́тством неистлева́ющим души́ твоея́/ мона́хом и просты́м послужи́л еси́,/ о́браз ве́чнаго Бо́га ми́ру явля́я/ и к соверше́нству Его́ устремля́тися призыва́я,// да не разлучи́мся Блага́го Влады́ки на́шего во ве́ки.
Сла́ва, глас 6:
Све́та Незаходи́маго Ма́ти/ и Пречи́стая Де́ва/ возлюби́ тя, о́тче Анти́по,/ измла́да чистоту́ возлюби́вша/ и Сы́ну Ея́ ве́рно после́довавша./ Те́мже зна́менуя благоволе́ние Свое́/ и промышле́ния обеща́ние,/ изображе́ние ли́ка Своего́ тебе́ дарова́;/ е́же благогове́йне храни́л еси́,/ на вся́кий день пе́ние ака́фистное Влады́чице принося́./ Егда́ же успе́ния твоего́ вре́мя наста́,/ ра́дуйся! обы́чно Ей глаго́ля,/ от земны́х к Небе́сным преста́вился еси́./ Неве́ста же Неневе́стная/ Свои́м песносло́вцем тя причте́,// хва́лящим благослове́нное и́мя Ея́ во ве́ки.
И ны́не, пра́здника.
Вход. Проки́мен дне. И чте́ния 3 преподо́бническая.
На лити́и стихи́ры пра́здника, и свята́го, глас 8:
Прииди́те, бра́тие,/ просла́вим богоно́снаго отца́ на́шего Анти́пу,/ ве́ры и́стинныя испове́дание чисте́йшее,/ за́поведей Христо́вых хране́ние непоро́чное,/ боже́ственных восхожде́ний неудобозри́мую высоту́,/ кро́тости и смире́ния тиша́йшую глубину́,/ и́же любо́вию Творцу́ уподо́бися// и мо́лит Его́ непреста́нно о всех нас.
Сла́ва, глас 1:
О, до́браго твоего́ произволе́ния, блаже́нне Анти́по,/ и́мже путь оте́ческий неукло́нно ше́ствовал еси́,/ послуша́ние нача́льствующим всепоко́рно явля́я,/ посто́м и бде́нием страстны́я вхо́ды загражда́я,/ нището́ю, я́ко по́ясом честны́м, опоясу́яся,/ чистоту́ душе́вную и теле́сную невреди́мо храня́./ Те́мже мона́шествующим о́браз показа́лся еси́// и всем святы́м соприча́стник.
И ны́не, пра́здника.
На стихо́вне стихи́ры, глас 2.
Подо́бен: До́ме Евфра́фов:
Ду́ха Свята́го/ оби́тель честна́я/ от младе́нства был еси́,/ преподо́бне Анти́по,// и чуде́с Его́ мо́ре.
Стих: Честна́ пред Го́сподем// смерть преподо́бных Его́.
Ве́трилу души́ твоея́/ дыха́нием благода́ти дви́жиму,/ вся су́етная преплы́л еси́,/ и го́ру Афо́нскую дости́гл еси́,// сосло́вию и́ноков сочета́вся.
Стих: Блаже́н муж боя́йся Го́спода,// в за́поведех Его́ восхо́щет зело́.
Земля́ Ру́сская/ я́ко дар вы́шний тя прия́т,/ ты же сию́ возлюби́л еси́,/ я́ко оте́чество друго́е,// и на о́строве Валаа́ме всели́лся еси́.
Сла́ва, глас 6.
Подо́бен: Все отло́жше:
Смире́ние с по́стническими труды́ соедини́в,/ основа́ние незы́блемое доброде́телем положи́л еси́;/ и просвети́вся, о́тче Анти́по,/ от самого́ Боже́ственнаго светозаре́ния,/ Небеса́ отве́рстая зрел еси́/ и глас Преве́чнаго Сло́ва слы́шал еси́,/ возлю́бленным ча́дом тя имену́ющ./ Отону́дуже вседе́тельным благоволе́нием Бо́жиим/ наста́вник неле́стный ко спасе́нию яви́лся еси́,/ и ча́да мно́га духо́вне породи́л еси́./ И ны́не попече́ния оте́ческаго сподобля́еши// вся, ве́рою и любо́вию к тебе́ притека́ющия.
И ны́не, пра́здника.
Тропа́рь, глас 2:
Боже́ственную благода́ть восприи́м,/ ду́шу твою́ по о́бразу Христо́ву назда́л еси́, о́тче Анти́по;/ десни́цею же Вы́шняго путеводи́мь,/ от горы́ Афо́нския ко оби́тели Валаа́мстей прите́кл еси́/ и мно́гим наста́вник ко спасе́нию яви́лся еси́,/ де́латель изя́щный моли́твы быв/ и слове́с ева́нгельских храни́тель непоро́чный./ Те́мже Тро́ице Святе́й предстоя́,// моли́ спасти́ся душа́м на́шим.
Ин тропа́рь, глас 8:
Я́ко свети́льника пресве́тла и моли́твенника те́пла/ яви́ тя оби́тели Валаа́мстей и всем лю́дем Влады́ка Христо́с,/ преподо́бне о́тче наш Анти́по,/ благода́тию бо ста́рчества сия́я,/ в Небе́сныя оби́тели путь нам озаря́еши// и науча́еши непреста́нно пе́ти Бо́гу: Аллилу́ия.
Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь пра́здника, еди́ножды, и свята́го тропа́рь, глас 2. Сла́ва, ин тропа́рь свята́го. И ны́не, пра́здника.
По 1-м стихосло́вии седа́лен, глас 8:
На святе́й Афо́нстей горе́ и на благослове́нных Валаа́мских о́стровех, в пусты́ни, и во о́бщем житии́, и среди́ ми́ра мяте́жнаго непоро́чне пожи́л еси́, о́тче Анти́по. Сего́ ра́ди Бог тя во све́тлости го́рния прия́т, на земли́ же мо́щи твоя́ нетле́нием и чудесы́ просла́ви, к ни́мже притека́юще, моли́твами твои́ми мно́гая блага́я прие́млем.
Сла́ва, и ны́не, пра́здника.
По 2-м стихосло́вии седа́лен, глас 5:
Ка́плям ро́сным, в ни́хже со́лнце сия́ет, святи́и подо́бни суть, зане́ вся́кой души́ жа́ждущей питие́ живи́тельное предлага́ют и, све́том непристу́пным блиста́ющеся, ко умиле́нию сердца́ приклоня́ют. Те́мже в по́мощь тя, о́тче Анти́по, призыва́ем, да не изсо́хнем зно́ем страсте́й, но просвети́мся, омы́вшеся чи́сте покая́нием.
Сла́ва, и ны́не, пра́здника.
По полиеле́и седа́лен, глас 6:
За́поведи Бо́жия испо́лнил еси́, я́ко Творца́ премно́го возлюби́вый, и, о́ко души́ просвети́в, вои́стину богообра́зен соде́лался еси́, о́тче Анти́по. Те́мже ре́ки Ду́ха Свята́го истеко́ша из чре́ва твоего́, сла́ныя во́ды мо́ря жите́йскаго услажда́ющия и ве́рныя напоя́ющия. Сего́ пития́ боже́ственнаго причаща́тися и нас ми́лостивно сподо́би, да не вжа́ждемся во ве́ки.
Сла́ва, и ны́не, пра́здника.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Днесь духо́вно ликовству́юще,/ па́мять твою́, о́тче Анти́по, све́тло пра́зднуем,/ ты бо, земна́го оте́чества стра́нен быв,/ многоразли́чными по́двиги и́ноческими Бо́гу угоди́л еси́./ И на высоту́ доброде́телей возше́д,/ Оте́чества Небе́снаго дости́гл еси́,/ иде́же в Тро́ичестем незаходи́мом све́те водворя́яся,/ мо́лишися со все́ми святы́ми,/ о е́же ми́ру в ми́ре сохрани́тися// и спасти́ся душа́м на́шим.
Во оби́тели же Валаа́мстей пое́м си́це:
Днесь духо́вно ликовству́юще,/ па́мять твою́, о́тче Анти́по, све́тло пра́зднуем,/ ты бо, земна́го оте́чества стра́нен быв,/ многоразли́чными по́двиги и́ноческими Бо́гу угоди́л еси́./ И на высоту́ доброде́телей возше́д,/ Оте́чества Небе́снаго дости́гл еси́,/ иде́же в Тро́ичестем незаходи́мом све́те водворя́яся,/ мо́лишися с преподо́бными Се́ргием и Ге́рманом,/ о е́же в ми́ре и любви́ сохрани́тися оби́тели на́шей// и всем лю́дем спасти́ся.
Кано́н пра́здника пе́рвый со ирмосо́м на 8, и свята́го на 6.
Кано́н свята́го, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Мно́гими содержи́мь напа́стьми, к тебе́ прибега́ю, по́мощи иски́й: о преподо́бне Анти́по, на путь спасе́ния наста́ви мя.
Моли́твы плод и благоче́стия ты был еси́, о́тче, и Ду́ха Свята́го сосу́д предызбра́нный. Те́мже от младе́нства житие́ свято́е показа́л еси́.
Сла́ва: Спа́сова обетова́ния сбытие́ зрим на тебе́, о́тче, я́ко смертоно́сных змий рука́ми взе́млеши, и нас от лю́тых обстоя́ний избавля́еши.
И ны́не: Ма́ти твоя́, преподо́бне Анти́по, без боле́зней тя породи́. Сие́ же в зна́мение бысть, я́ко Христу́ после́дуеши ве́рно, из Де́вы па́че естества́ возсия́вшему.
Песнь 3
Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.
Оте́чество твое́, ма́лая весь Калаподе́шти, позна́ тя ю́наго моли́твы рачи́теля, и чудесе́м твои́м зело́ удиви́ся.
В ти́хой души́ твое́й, я́ко в поко́йных вода́х, Небеса́ изобрази́шася. Сего́ ра́ди возлюби́ тя Ро́ждшая Нача́льника тишины́.
Сла́ва: Свет преми́рный я́ко узре́л еси́, о́тче, всего́ себе́ возложи́ти Бо́гу потща́лся еси́ и соверше́нным житие́м Тому́ угоди́ти.
И ны́не: Е́же ко Христу́ жела́ние твое́ ми́лостивно прии́мши, преподо́бне, Богоро́дица о́браз Свой Ня́мецкий чу́дно тебе́ яви́, на путь и́ноческий благословля́ющи.
Седа́лен, глас 5:
Я́ко свет от Све́та Пе́рваго, и я́ко ра́дость от Ра́дости Вино́внаго возсия́ нам звезда́ я́сная, Анти́па преподо́бный, и́же во страна́х Молда́вских у́треневав, на горе́ Афо́нстей путь дневны́й соверши́л есть, ве́черу же предвари́вшу, к земли́ Ру́сстей прии́де и во оби́тели Валаа́мстей тече́ние сконча́, в не́йже и опочи́ святоле́пно. И ны́не в незаходи́мей сла́ве блиста́я, со дерзнове́нием мо́лится о душа́х на́ших.
Сла́ва, и ны́не, пра́здника.
А́ще моле́бное пе́ние, Богоро́дичен, глас то́йже:
О Тебе́ ра́дуются, Благода́тная, святы́х собо́ри;/ и челове́цы гре́шнии, на Тя упова́юще, никогда́же отчаява́ются,/ си́льнаго бо в кре́пости Христа́ ро́ждши,/ ма́терски ми́лость Его́ к нам приклоня́еши.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.
Страсте́й смуще́ние посто́м и бде́нием уставля́я, па́че же смире́нию и послуша́нию прилежа́, я́коже отцы́ издре́вле запове́даша, и́стинно во́ин Христо́в яви́лся еси́.
Наважде́ния бесо́вская ни во что́же вменя́л еси́, преподо́бне, кре́стным зна́мением тех побежда́я. И нас му́жески стоя́ти проти́ву враг неви́димых укрепи́.
Ни скорбь, ни теснота́, ни озлобле́ния челове́ческая, я́же терпели́вно поне́сл еси́, не разлучи́ша тя от Сла́дкаго Иису́са, но крепча́е Сему́ совокупи́ша.
Сла́ва: Го́споди Иису́се Христе́, Сы́не Бо́жий, поми́луй мя! немо́лчно взыва́л еси́, о́тче Анти́по, сна не дава́я твои́м очесе́м, до́ндеже обре́л еси́ Жела́емаго.
И ны́не: На ре́вность твою́ ве́лию по Бо́зе призира́ющи, свя́те Анти́по, Цари́ца Небе́сная во уде́л Свой земны́й, го́ру Афо́нскую, стопы́ твоя́ напра́вити благоизво́ли.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.
Во о́бщем житии́ тружда́яся, моли́тву непреста́нную я́ко ра́дость се́рдца име́л еси́, о́тче; но, Бо́гом испыту́емь, сея́ до вре́мени лиши́вся, в терпе́нии непоколеби́м пребы́л еси́.
Безмо́лвнаго жития́ усе́рдно взыска́в, я́ко ратобо́рник иску́сный в пусты́ню Афо́нскую удали́лся еси́, преподо́бне, оте́ческим благослове́нием укрепля́емь.
Сла́ва: Пост вме́сто пи́щи сла́дкия, труды́ и бде́ние вме́сто плотска́го упокое́ния, сле́зы же я́ко питие́ име́л еси́, о́тче, Христа́ сподви́жника му́жеству твоему́ стяжа́в.
И ны́не: Богома́тере святу́ю ико́ну в пусты́нней ке́лии обре́т, возра́довася зело́, преподо́бне Анти́по, я́коже Саме́й Влады́чице тя сре́тившей и по́мощию не оставля́ти обеща́вшей.
Песнь 6
Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
Христо́ви сораспя́вся во́лею, мрак тле́ния и сме́рти си́лою Бо́жиею препобеди́л еси́, о́тче, я́коже души́ твое́й до конца́ просвети́тися и те́лу благода́ти испо́лнитися.
Непоро́чному Бо́гу непоро́чно служа́, Пречи́стых Та́ин священноде́йствитель бы́ти сподо́бился еси́, о́тче, и Хле́бом Жи́зни ста́до Христо́во пита́ти, ми́ру же всему́ спасе́ние хода́тайствовати.
Сла́ва: Ку́плю духо́вную со тща́нием соверши́в, обре́лся еси́, о́тче Анти́по, я́коже кора́бль, нетле́ннаго бога́тства испо́лнь и Вы́шнею Прему́дростию окормля́емь.
И ны́не: Гла́су Бо́жию и отце́в повину́яся, от са́да Богоро́дицы, горы́ Афо́нския, восте́кл еси́, преподо́бне о́тче, в зе́млю Ру́сскую, в дом Пречи́стыя.
Конда́к, глас 3:
Днесь преподо́бный Анти́па,/ я́коже с на́ми сый, взыва́ет:/ прииди́те, вси обремене́ннии грехми́,/ очи́стите покая́нием сердца́ ва́ша/ и испо́лнитеся весе́лия неизрече́ннаго,/ во све́те за́поведей Христо́вых ходя́ще// и пою́ще Бо́га во ве́ки.
И́кос:
Я́ко Бо́жия дуга́, из о́блака восходя́щая, от кра́я небесе́ и до кра́я све́тится, заве́т дре́вний утвержда́я, та́ко и ты, преподо́бне Анти́по, доброде́телей многосве́тлыми луча́ми сия́еши, вы́шнее благоволе́ние ми́ру возвеща́я, я́ко крести́выйся Христо́с во Иорда́не пото́п грехо́вный уста́ви, и ны́не вси челове́цы покая́нием спаса́ются, пою́ще Бо́га во ве́ки.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Бо́гу ти поспешеству́ющу, о́тче, оби́тели Валаа́мския дости́гл еси́, я́же честны́м житие́м и́ноческим цветя́ше и до́брый чин во всем имя́ше, игу́меном Дамаски́ном управля́ема.
Се́вернаго Афо́на суро́вую красоту́ возлюби́л еси́, о́тче, и пусты́нную тишину́, моли́твы помо́щницу, и, под кров скита́ Всехсвя́тскаго всели́вся, от дел жите́йских упраздни́лся еси́.
Сла́ва: Свет непристу́пный Божества́ созерца́я, о вре́менных небре́гл еси́, о́тче, и в нищете́ кра́йней пребыва́л еси́, пи́щу же и питие́ на мно́ги дни не вкуша́л еси́, а́ки безпло́тен.
И ны́не: Еди́но сокро́вище име́л еси́ на земли́, преподо́бне, ико́ну Богоро́дицы, ю́же в пусты́ни Афо́нстей обре́л еси́ иногда́, и сия́ обнови́ся чу́дно и мно́гая пресла́вная чудеса́ соде́ла.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.
Соверше́нным, я́ко соверше́н сый, сподви́жник и собесе́дник чу́дный был еси́, о́тче, ученико́м же твои́м наста́вник прему́дрый, и всем ко спасе́нию поспе́шник.
Ле́гкий наш ум в серде́чную клеть потщи́мся улови́ти, о бра́тие, — глаго́ла преподо́бный, — де́ло сие́ многотру́дно есть и терпе́нием стяжава́ется.
Благослови́м Отца́, и Сы́на, и Свята́го Ду́ха, Го́спода.
Суете́ мирсте́й да не порабо́тимся, о по́стницы, — блаже́нный ста́рец рече́, — жи́тельство бо и́нока во святе́м хра́ме есть, и де́лание его́ моли́тва у́мная, боже́ственным раче́нием воскриля́емая.
И ны́не: Богоро́дице я́ко Ма́тери прилепи́мся, возлю́бленнии, — па́ки рече́ святы́й, — день от дне хвалу́ ака́фистную Ей принося́ще. Она́ же путь наш земны́й упра́вит и от сме́рти внеза́пныя сохрани́т.
Песнь 9
Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.
От духо́внаго стяжа́ния твоего́, я́ко от трудо́в пчелы́, и́ноцы и мирсти́и сла́дость цели́тельную душа́м почерпа́ху и тя, отца́ и па́стыря до́браго, сла́вляху.
Све́тло житие́ твое́ бысть, преподо́бне, и успе́ние пресве́тло, в ра́дость бо несконча́емую и поко́й досто́йно вшел еси́, Ма́терь Све́та воспева́я боголе́пно.
А́ще и в Небе́сных кро́вех живе́ши ны́не, но ве́мы, я́ко любо́вию твое́ю весь мир объе́млеши и пред Бо́гом заступа́еши. Сего́ ра́ди со упова́нием тя призыва́ем.
Сла́ва: Па́мять твою́ ны́не соверша́ющих нас, о́тче, благослови́ и свя́то жи́ти укрепи́, в час же сме́ртный помо́щник нам бу́ди.
И ны́не: К Де́ве Богоро́дице, Ея́же избра́нник и таи́нник яви́лся еси́, преподо́бне, ру́це о нас воздежи́, да с тобо́ю, я́ко ча́да со отце́м, жизнь ве́чную насле́дити сподо́бимся.
Свети́лен, глас 3:
Плотски́я стра́сти и мудрова́ние отложи́в, я́ко зерца́ло чи́стое о́браз Созда́теля твоего́ запечатле́л еси́ и, весь светоза́рен быв, нача́льника тьмы низложи́л еси́, о́тче Анти́по, ми́ру свети́льниче и пред Бо́гом наш те́плый засту́пниче.
Сла́ва, и ны́не, пра́здника.
На хвали́тех стихи́ры, глас 1.
Подо́бен: Прехва́льнии му́ченицы:
Ми́лостив и кро́ток, и се́рдцем чист/ был еси́, преподо́бне Анти́по,/ сего́ ра́ди змии́ лю́тыя тя слу́шаху/ и челове́цы зли́и на покая́ние обраща́хуся,/ о́браз Созда́теля в тебе́ познава́юще,/ де́мони же лица́ твоего́ бе́гаху,// огне́м благода́ти Боже́ственныя опаля́емии.
Не́бо у́мное душа́ твоя́ показа́ся,/ в не́йже Христо́с, я́ко со́лнце полу́денное,/ вся́кую тьму дале́че отгна́/ и свет богове́дения возсия́./ Те́мже благоле́пию твоему́, о́тче Анти́по,/ А́нгели удиви́шася и Творца́ просла́виша,// та́ко возвели́чившаго естество́ челове́ческое.
Кри́ны се́льныя одева́ет Бог,/ я́коже ни Соломо́ну пред ни́ми хвали́тися,/ кольми́ па́че украша́ет преподо́бных Свои́х,/ облека́я ри́зами нетле́ния./ Сего́ ра́ди успе́ние твое́, о́тче Анти́по,/ све́тлостию воскресе́ния блиста́ет// и ра́дости исполня́ет ду́ши на́ша.
Сла́ва, глас 6.
Подо́бен: А́нгельския:
А́нгельски/ во пло́ти пожи́л еси́/ и ко А́нгельским лико́м/ ны́не возше́л еси́,/ о́тче Анти́по,/ до́брый наш па́стырю./ Не оста́ви и́хже возлюби́л еси́,/ но при́сно хода́тайствуй/ к Царю́ Небе́сному/ мир пода́ти// душа́м на́шим.
И ны́не, пра́здника.
Славосло́вие вели́кое. Ектении́ и отпу́ст.
НА ЛИТУРГИ́И
Блаже́нны пра́здника, песнь 5-я, на 4, и свята́го, песнь 6-я, на 4. Проки́мен, Апо́стол, Аллилуиа́рий, Ева́нгелие пра́здника. И свята́го проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Ева́нгелие от Луки́, зача́ло 24. Прича́стен пра́здника, и свята́го: В па́мять ве́чную бу́дет пра́ведник, от слýха зла не убои́тся.
Моли́тва
О честна́я и свяще́нная главо́, преподо́бне о́тче наш Анти́по, Ду́ха Свята́го кра́сное жили́ще, Це́ркве Правосла́вныя многопе́сненная похвало́! К тебе́ ны́не притека́ем и тебе́ мо́лимся, я́ко ве́лие дерзнове́ние пред Бо́гом стяжа́вшу: умоли́ Его́ благосты́ню, да не погуби́т нас со беззако́ньми на́шими, но вре́мя на покая́ние да́рует и благода́ть, ко спасе́нию поспешеству́ющую. А́ще бо и ве́мы пра́выя пути́, оба́че не́мощни зело́ те́ми ходи́ти и мно́гаго милосе́рдия Бо́жия и по́мощи тре́буем. Ты же, о́тче святы́й, прелюбе́зен Творцу́ яви́лся еси́, от ю́ности неукло́нно к Нему́ ше́ствуя. Не послужи́л бо еси́ пре́лести ми́ра сего́, но всю си́лу души́ твоея́ к ве́чному устреми́л еси́, ско́рби и тесноты́ вре́меннаго жития́ му́жественне претерпева́я, наипа́че же во́льныя по́двиги к тем прилага́я. О, вели́кия твоея́ любве́, ю́же я́ко дар Христу́ прине́сл еси́, и тоя́ ра́ди соверше́нныя да́ры духо́вныя от Него́ прия́л еси́! О, вели́каго смире́ния твоего́, и́мже вся блага́я души́ твоея́ невреди́мо сохрани́л еси́ и смири́вшемуся нас ра́ди Го́споду уподо́бился еси́! Те́мже не я́ко раб, но я́ко сын возлю́блен, вшел еси́ в ра́дость Небе́снаго Отца́. И ны́не ра́дуются о тебе́ А́нгели и вси святи́и, купножи́теля тя иму́ще; весели́тся страна́ Молда́вская, тя произрасти́вшая; хва́лится гора́ Афо́нская, в му́жа соверше́нна тя воспита́вшая; земля́ Ру́сская, я́ко ма́ти втора́я, любо́вию тя прославля́ет; изря́дно же торжеству́ет оби́тель Валаа́мская, верх доброде́тельнаго жития́ твоего́ узре́вшая и ны́не мо́щи твоя́ нетле́нныя благогове́йне храня́щая. Оба́че и вси лю́дие в па́мяти твое́й ликовству́ют, такова́го засту́пника пред Бо́гом стяжа́вше. Ты же, о́тче святы́й, не преста́й посеща́ти чад твои́х, но к Ца́рствию Небе́сному путево́дствуй, да, моли́твами твои́ми ча́сти шу́ия изба́вльшеся, невече́рний свет Триипоста́снаго Божества́ сподо́бимся зре́ти и во ве́ки прославля́ти Отца́, и Сы́на, и Свята́го Ду́ха. Ами́нь.
