Служба новомученикам Богородским
Ме́сяца ноября́ в 7-й день
Новому́чеников Богоро́дских
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2.
Подо́бен: Ки́ими похва́льными венцы́:
Ки́ими похва́льными пе́сньми/ возсла́вим му́ченики земли́ Богоро́дския,/ и́же, любо́вию Христо́вою уязви́вшеся,/ пла́мень зло́бы гони́телей/ кровьми́ свои́ми угаси́ша./ Ны́не же со все́ми святы́ми предстоя́ще Престо́лу Влады́чню,// мо́лятся о спасе́нии душ на́ших.
Ки́ими хвале́бными славосло́вии/ воспое́м новому́ченики Богоро́дския,/ и́же, себе́ Бо́гу преда́вше,/ посреде́ о́бщаго отступле́ния по́двиг ве́ры яви́ша/ и Христу́ да́же до сме́рти послужи́ша./ Ны́не же Ему́ мо́лятся// дарова́ти земли́ на́шей мир и ве́лию ми́лость.
Ки́ими похва́льными венцы́/ увязе́м новому́ченики земли́ Богоро́дския,/ си́и бо я́ко же́ртва непоро́чная/ прино́сятся Бо́гови,/ и дар жи́зни ве́чныя от Него́ прие́млют./ Те́мже Це́рковь Ру́сская/ хода́таев но́вых обрета́ет,// утвержда́ющих ве́рныя во спасе́нии.
Сла́ва, глас 8:
Богоро́дския земли́ похвало́,/ до́блественнии во́ини Христо́вы,/ вы, по́двигу священному́ченика Константи́на после́довавше/ и богобо́рцев зло́бу отрази́вше,/ пред лице́м страда́ния ве́рность Бо́гу яви́ли есте́./ И ны́не моли́те Тро́ицу Единосу́щную// спасти́ ду́ши на́ша.
И ны́не, Богоро́дичен, глас то́йже: Царь Небе́сный:
Вход. Проки́мен дне. И чте́ния новому́чеников.
Дея́ний святы́х апо́стол чте́ние (глава́ 4):
В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ Изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.
К Тимофе́ю посла́ния
свята́го апо́стола Па́вла чте́ние (глава́ 4):
Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и Ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.
Ко Евре́ем посла́ния
свята́го апо́стола Па́вла чте́ние (глава́ 11):
Бра́тие,/ святи́и вси ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ львов,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и уз и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.
На лити́и стихи́ра хра́ма, и святы́х, глас 6:
Лю́тое нечести́вых воста́ние/ и зло́бное их неи́стовство/ кро́тце претерпе́ли есте́,/ новому́ченицы Богоро́дстии,/ и я́ко о́вцы заколе́ния вмени́вшеся,/ кровь свою́ непови́нную пролия́ли есте́,/ от безбо́жных убие́ние прие́мше./ Ны́не же в Небе́сных оби́телех/ со все́ми святы́ми ликовству́юще,// моли́теся о нас ко Го́споду.
Сла́ва, глас 8:
Прииди́те, мучениколю́бцы,/ прииди́те, соста́вим лик,/ торжеству́юще и Бо́га прославля́юще/ в ра́достный пра́здник новому́чеников Це́ркве Ру́сския,/ си́и бо гоне́ний не убоя́шася/ и от пути́ спаси́тельнаго не уклони́шася,/ го́рькими рабо́тами, гла́дом и хла́дом изнуря́еми/ и многови́дными му́ками умерщвля́еми,/ я́ко а́гнцы незло́бивии смерть прия́ша,/ и в ра́дость Го́спода своего́ внидо́ша,/ ны́не же предсто́ят Престо́лу Пресвяты́я Тро́ицы// и мо́лятся о спасе́нии душ на́ших.
И ны́не, глас то́йже:
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
На стихо́вне стихи́ры, глас 5.
Подо́бен: Ра́дуйся, Живоно́сный Кре́сте:
Ра́дуйтеся, новому́ченицы Богоро́дстии,/ вы бо, росо́ю благода́ти Христо́вы ороша́еми,/ зно́ем безбо́жия не опали́стеся,/ но па́че испове́данием ве́ры возблагоуха́сте/ и, до́бре му́ченичества по́двиг соверши́вше,/ кровьми́ свои́ми зе́млю Ру́сскую напои́сте./ Те́мже о нас непреста́нно моли́те,/ да, доброде́тельми украси́вшеся,// принесе́м досто́йныя плоды́ покая́ния.
Стих: Го́споди, Госпо́дь наш,// я́ко чу́дно и́мя Твое́ по всей земли́.
Ра́дуйтеся, страда́льцы сла́внии,/ Це́ркве Ру́сския столпи́ непоколеби́мии,/ похвало́ на́ша и утвержде́ние/ и в житии́ благооти́шное приста́нище,/ ва́ми бо земля́ Богоро́дская украша́ется/ и, я́ко сокро́вище духо́вное, страда́ния ва́ша прие́млет./ Те́мже моли́те просла́вльшаго вас Го́спода,/ в ве́ре тве́рдей нам при́сно пребыва́ти// и Ца́рствия Небе́снаго дости́гнути.
Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.
Ра́дуйтеся, святи́и сро́дницы на́ши,/ Небе́снаго Иерусали́ма гра́ждане,/ вам прино́сим похвалы́ сия́/ и со умиле́нием взыва́ем:/ путеводи́те нас ко спасе́нию,/ наставля́юще к нелицеме́рному покая́нию./ Да ва́шею по́мощию и заступле́нием/ доброде́тельно в ми́ре пожи́вше,// Ца́рствия Небе́снаго сподо́бимся.
Сла́ва, глас 8:
Ра́дуйтеся, страстоте́рпцы Богоро́дстии,/ вы бо, в броню́ пра́вды обо́лкшеся,/ му́жественне ко́зни вра́жия отрази́ли есте́,/ ны́не же ри́зами бе́лыми и му́ченичества венцы́ укра́шени,/ предстои́те Престо́лу Бо́жию,/ прославля́юще Отца́ и Сы́на и Свята́го Ду́ха,// Тро́ицу Единосу́щную и Неразде́льную.
И ны́не, Богоро́дичен, глас то́йже:
Ра́дуйся, Богоро́дице Де́во,/ зе́млю на́шу чудесы́ при́сно исполня́ющая,/ приими́ моли́твы на́ша,/ со умиле́нием благода́рственне Тебе́ возноси́мыя,/ и изба́ви ны от вся́кия беды́,// Ты бо еси́ наде́жда на́ша и утвержде́ние.
На благослове́нии хле́бов тропа́рь новому́чеников, два́жды, и Богоро́дице Де́во: еди́ножды.
Тропа́рь, глас 4:
Христа́ Спа́са ве́рнии ученицы́,/ Це́ркве Ру́сския блаже́нная ча́да,/ святи́и новому́ченицы Богоро́дстии,/ вы, ве́ру правосла́вную тве́рдо испове́давше,/ стезе́ю кре́стною к Небе́сному гра́ду востекли́ есте́./ Те́мже я́ко те́плии хода́таи на́ши,// при́сно моли́теся ко Го́споду спасти́ся душа́м на́шим.
НА У́ТРЕНИ
На Бог Госпо́дь: тропа́рь новому́чеников, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Новому́ченицы Це́ркве Ру́сския, кро́вию свое́ю любо́вь ко Христу́ запечатле́вшии и венцы́ побе́дныя от Него́ прие́мшии, Влады́ку всех моли́те Оте́чество на́ше ве́рою просвети́ти, нас же во благоче́стии утверди́ти, да прича́стницы жи́зни ве́чныя бу́дем.
Сла́ва, и ны́не, Богоро́дичен, глас то́йже:
Под кров Твой, Пречи́стая Де́во, прибега́ющих, мольбу́ прие́млеши от нас, не преста́й моля́щи Человеколю́бца, спасти́ рабы́ Твоя́. По 2-м стихосло́вии седа́лен, глас 4:
Прииди́те, лю́дие, воспои́м торже́ственно и просла́вим по́двиги святы́х сро́дников на́ших! Ти́и бо, Христа́ дерзнове́нно испове́давше, стра́ха гони́телей ника́коже убоя́шася, ниже́ смути́шася, взыва́юще: с на́ми Бог. Тех моли́твами, Го́споди, поми́луй нас.
Сла́ва, и ны́не, Богоро́дичен, глас то́йже:
Воево́до взбра́нная и непобеди́мая, во́инствы го́рними при́сно воспева́емая, Богоро́дице Мари́е, земна́го оте́чества на́шего Засту́пнице и всему́ ми́ру блага́я Помо́щнице! Моли́твами новому́ченик Богоро́дских от бед и лю́тых обстоя́ний нас изба́ви и соблюди́ под кро́вом Твои́м.
Велича́ние:
Велича́ем вас,/ святи́и новому́ченицы Богоро́дстии,/ и чтим честна́я страда́ния ва́ша,/ я́же за Христа́// претерпе́ли есте́.
Псало́м избра́нный: Бог нам прибе́жище и си́ла:
По полиеле́и седа́лен, глас 4:
Кровьми́ новому́ченик и испове́дник Твои́х, Христе́ Бо́же, я́ко багряни́цею и ви́ссом, Це́рковь Ру́сская украси́вшися, вопие́т Ти: лю́дем щедро́ты Твоя́ низпосли́, мир жи́тельству Твоему́ да́руй и душа́м на́шим ве́лию ми́лость. Сла́ва, и ны́не, Богоро́дичен, глас то́йже:
Благода́рно от се́рдца воспева́юще и приле́жно Твоея́ ми́лости прося́ще, Богоро́дице Влады́чице, раби́ Твои́ взыва́ют: Пресвята́я Де́во, предвари́ и изба́ви от враг ви́димых и неви́димых и вся́каго преще́ния, Ты бо еси́ на́ше заступле́ние.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.
По 50-м псалме́ стихи́ра, глас 6:
Це́ркве Ру́сския столпи́ непоколеби́мии,/ новому́ченицы Богоро́дстии,/ се́рдцем ве́рующе в пра́вду,/ усты́ свои́ми Го́спода Иису́са Христа́/ испове́дали есте́ во спасе́ние;/ изгна́ние, заточе́ние, го́рькия рабо́ты и смерть/ Бо́га ра́ди сла́дце претерпе́ли есте́./ Те́мже те́пле моли́теся ко Го́споду,/ зе́млю на́шу во благоче́стии утверди́ти// и спасти́ ду́ши на́ша.
Кано́н, глас 5, его́же краегране́сие: Непобеди́ми пребыва́ют страстоте́рпцы.
Песнь 1
Ирмо́с: Коня́ и вса́дника в мо́ре Чермно́е,/ сокруша́яй бра́ни мы́шцею высо́кою,/ Христо́с истрясе́, Изра́иля же спасе́,// побе́дную песнь пою́ща.
Припе́в: Святи́и новому́ченицы Богоро́дстии, моли́те Бо́га о нас.
Недоуме́ю, Спа́се мой, ка́ко восхвали́ти по достоя́нию святы́я Твоя́, Константи́на и сонм весь му́чеников Богоро́дских, во сла́ве Твое́й пребыва́ющих, сего́ ра́ди молю́ся, разсе́янный ум мой собери́, Смыслода́вче, да воспою́, ра́дуяся, тех по́двиги.
Егда́ прии́де ве́лия ско́рби вре́мя, священному́чениче Нико́лае, поноше́ние от сро́дник свои́х кро́тце прия́л еси́ и, си́лою Боже́ственною укрепля́емь, неи́стовство мучи́телей смире́нно претерпе́л еси́, те́мже и венца́ сла́вна в Ца́рствии Бо́жии сподо́бился еси́.
Попечи́тель милосе́рдый лю́дем стра́ждущим яви́лся еси́, священному́чениче Се́ргие, и неуста́нно разуме́нию кни́жному и Зако́ну Бо́жию науча́ти я́ потща́лся еси́. Те́мже моли́ся о нас ко Го́споду, да све́том богоразу́мия просвети́т ду́ши на́ша.
Богоро́дичен: Облиста́ние земли́ на́шея, Богоро́дице Всеблагослове́нная, град Твой сохраня́й, и́менем бо Твои́м нарече́н быв иногда́, в годи́ну гоне́ния лю́таго красе́н плод произрасти́л есть, новому́чеников лик сла́вный.
Песнь 3
Ирмо́с: Водрузи́вый на ничесо́мже зе́млю повеле́нием Твои́м,/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х,// Це́рковь Твою́ утверди́, еди́не Бла́же и Человеколю́бче.
Благода́ти Боже́ственныя дар прия́л еси́, Дими́трие, избра́нниче Бо́жий, и, крест свой взем, Христу́ до конца́ после́довал еси́. Ны́не же со все́ми святы́ми на Небесе́х лику́я, моли́ся о душа́х на́ших.
Егда́ прии́де безбо́жных воста́ние, не устраши́лся еси́ гоне́ний, священному́чениче Иоа́нне, и, Христу́ в кро́тости подража́я, Правосла́вия ревни́тель да́же до сме́рти пребы́л еси́. Ны́не же в го́рних оби́телех пребыва́еши и мо́лишися о спасе́нии душ на́ших.
До́брый о сирота́х попечи́телю и о́бразе ве́рности в житии́ супру́жестем, Се́ргие священному́чениче, за́поведи Бо́жия усе́рдно испо́лнил еси́. Те́мже подража́ти Христу́ вразуми́ ны и на путь благоче́стия наста́ви.
Богоро́дичен: Испо́лнися чуде́с Твои́х, Богоро́дице, земля́ Ру́сская, я́же днесь ликовству́ющи прославля́ет чад свои́х, новому́чеников Богоро́дских сла́вный собо́р, тех моли́твами сохрани́ нас под кро́вом Твои́м.
Седа́лен, глас 6:
Мужа́йся, Це́рковь Христо́ва, и держа́вствуй над всу́е борю́щими! Христо́ви бо дру́зи о тебе́ пеку́тся, и предстоя́ще, и обстоя́ще, и́хже о́бщий пра́здник ны́не соверша́еши све́тло.
Сла́ва, и ны́не, Богоро́дичен:
Я́ко Де́ву и еди́ну в жена́х, без се́мене ро́ждшую Бо́га пло́тию, Тя вси ублажа́ем, ро́ди челове́честии: огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода. Тем, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти: моли́ Христа́ Бо́га, согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Песнь 4
Ирмо́с: Боже́ственное Твое́ разуме́в истоща́ние/ прозорли́во Авваку́м, Христе́, со тре́петом вопия́ше Тебе́:/ во спасе́ние люде́й Твои́х,// спасти́ пома́занныя Твоя́ прише́л еси́.
Малоду́шия пле́велы исто́ргни из серде́ц на́ших, священному́чениче Нико́лае, и ду́ши на́ша моли́твами твои́ми зе́млю до́бру сотвори́, да, плод духо́вен произрасти́вше, принесе́м сей Влады́це на́шему.
Исхити́ ны пучи́ны искуше́ний и страсте́й, страстоте́рпче диа́коне Нико́лае, мо́лим ти ся, ру́ку по́мощи простри́ нам, в волна́х суеты́ мирски́я потопля́емым.
Пе́нием сладкогла́сным слу́жбу церко́вную украша́л еси́ в годи́ну гоне́ния, му́чениче Михаи́ле, ве́рность Христу́ соблюда́я. Того́ ны́не с Богоро́дицею моли́ Правосла́вие в земли́ на́шей утверди́ти и нас во благоче́стии наста́вити.
Богоро́дичен: Ра́дости сердца́ на́ша испо́лни, Богоро́дице, да, грехо́вныя печа́ли изба́вльшеся, Ца́рствия Сы́на Твоего́ сподо́бимся.
Песнь 5
Ирмо́с: Одея́йся све́том я́ко ри́зою,/ к Тебе́ у́тренюю, и Тебе́ зову́:/ ду́шу мою́ просвети́ омраче́нную, Христе́,// я́ко еди́н Благоутро́бен.
Егда́ разлуче́н был еси́ с па́ствою и ро́дом и дру́ги твои́ми, страстоте́рпче Фео́доре, ника́коже отлучи́ся любве́ Бо́жия. Е́юже укрепля́емь, тя́жкая страда́ния, ра́ны и глад претерпе́л еси́; те́мже ти зове́м: ра́дуйся, Фео́доре, пресви́теров украше́ние.
Безбо́жных стра́ха ника́коже убоя́вся, священному́чениче Фео́доре, во дни гоне́ния па́стве твое́й о́браз ве́ры незы́блемыя яви́л еси́ и, крест страда́ний му́жественне взем, Христу́ после́довал еси́. Сего́ ра́ди Престо́лу Бо́жию ны́не предстоя́, моли́ся о почита́ющих любо́вию святу́ю па́мять твою́.
И́же в годи́ну лю́тую труды́ па́стырския усе́рдно сверша́я и в ку́знице трудолю́бно подвиза́яся, священному́чениче Алекси́е, в горни́ле гоне́ний я́ко зла́то очище́но просия́л еси́. Те́мже ти вопие́м: моли́твами твои́ми изба́ви ны огня́ гее́нскаго.
Богоро́дичен: Влады́чице Всепе́тая, све́том богоразу́мия озари́ сердца́ на́ша, Богоро́дице, и на путь спаси́тельный наста́ви нас, Одиги́трие Преблагослове́нная.
Песнь 6
Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.
А́гнца Христа́ служи́телю благогове́йный, диа́коне Се́ргие! Ты, в хра́ме Святы́я Тро́ицы со стра́хом Бо́жиим предстоя́, моли́твы благово́нное кади́ло возноси́л еси́, и ны́не, венца́ му́ченическаго сподо́бився, и́мя Триеди́наго Бо́га на Небесе́х восхваля́еши.
Юдо́ль пла́ча земля́ Богоро́дская бысть, пору́ганная безбо́жными, от ни́хже гоне́ния и всяк зол глаго́л претерпе́в, священному́чениче Се́ргие, заключе́н был еси́ в темни́це Аму́рстей и по мно́зех страда́ниих за Христа́ убие́н был еси́. Тем яви́ тя Госпо́дь му́ченика сла́вна всем конце́м земли́ Ру́сския.
Ти́хим нра́вом и кро́тостию любо́вь па́ствы твоея́ стяжа́л еси́, священному́чениче Иоа́нне, Христо́вою же любо́вию укрепля́емь, глад и тесноту́ претерпе́л еси́, да́же до сме́рти му́ченическия Воскре́сшаго Христа́ пропове́дав.
Богоро́дичен: Светоза́рная Влады́чице, внутрь носи́вшая Христа́, Пра́вды Со́лнце, облиста́й сердца́ на́ша, тьмо́ю греха́ омраче́нная, зол мно́жества очи́сти, и приведи́ нас к све́ту невече́рнему Сы́на Твоего́.
Конда́к, глас 5:
Ча́да ве́рная Це́ркве Ру́сския,/ муче́ний и сме́рти не убоя́вшеся,/ за Христа́ страда́ния прия́ли есте́,/ и зе́млю Богоро́дскую кровьми́ свои́ми освяти́ли есте́./ Ны́не же у Престо́ла Бо́жия веселя́щеся,/ о земне́м оте́честве ва́шем непреста́нно моли́теся,/ ве́ру и благоче́стие в нем укрепи́ти// и нам победи́тельми греха́ яви́тися.
И́кос:
Светоза́рнии и боже́ственнии свети́льницы, богоблаже́ннии му́ченицы, Све́ту вели́кому предстоя́ще при́сно, просвеща́еми невече́рним сия́нием Божества́, све́том присносу́щныя ра́дости озари́те нас, и страсте́й те́мных и мра́чныя зло́бы изба́вите, да, в ве́ре и благоче́стии укрепи́вшеся, победи́тельми греха́ яви́мся.
Песнь 7
Ирмо́с: Превозноси́мый отце́в Госпо́дь,/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.
Ты, священному́чениче Влади́мире, ве́рность Го́споду при́сно храня́, гоне́ний лю́тых не устраши́лся еси́ и, от богобо́рцев до сме́рти пострада́в, вене́ц неувяда́емый от Христа́ прия́л еси́. Те́мже ликовству́я, воспева́еши: Бо́же, благослове́н еси́.
Риз мона́шеских и обе́тов не отве́ргся, те́сным и́ноческим путе́м проше́л еси́, преподобному́чениче Иоаса́фе, и, Боже́ственною любо́вию укрепля́емь, я́ко до́блий во́ин Христо́в, не убоя́лся еси́ те́ло убива́ющих, души́ же уби́ти не могу́щих. Ны́не ра́достию воспева́еши: Бо́же, благослове́н еси́.
Алава́стр драгоце́нный, благоуха́ннаго ми́ра преиспо́лненный, показа́лся еси́, диа́коне Ио́сифе, измла́да бо благоче́стие воспри́ем, живо́т свой служе́нию Це́ркви Христо́вой преда́л еси́. Во дни же гоне́ния дерзнове́нно Го́спода испове́дал еси́, взыва́я: Бо́же, благослове́н еси́.
Богоро́дичен: Славосло́вят чи́ни А́нгельстии и новому́ченик собо́ри воспева́ют Тя, Пречи́стая. Мы же гре́шнии, святы́х сро́дник на́ших предста́тельство иму́ще, мо́лим Тя, Богоро́дице: спаси́ ду́ши на́ша.
Песнь 8
Ирмо́с: Тебе́, Вседе́телю,/ в пещи́ о́троцы всеми́рный лик спле́тше, поя́ху:/ дела́ вся́кая, Го́спода по́йте,// и превозноси́те во вся ве́ки.
Ты, преподобному́ченице Варва́ро, мона́шества путь у́зкий избра́вши, моли́твою и посто́м вооружи́лася еси́ и, да́же до кро́ве му́ченическия подвиза́вшися, ко́зни диа́вольския посрами́ла еси́. Те́мже, ма́ти, хода́таица те́плая о нас бу́ди, да ку́пно с тобо́ю Го́спода пое́м и превозно́сим во вся ве́ки.
О а́гнице незло́бивая, преподобному́ченице Алекса́ндро! Ты, в ве́ре и благоче́стии живу́щи, о́браз смире́ния и кро́тости явля́ла еси́. В заточе́нии же и рабо́тах го́рьких пребыва́ющи, любо́вь ко Христу́ храни́ла еси́, при́сно взыва́ющи: Го́спода по́йте и превозноси́те во вся ве́ки.
Тве́рдыя ве́ры испове́дницы, Алекса́ндро и Варва́ро, ла́стовицы богогла́сныя! Вы, любо́вию Боже́ственною окрыля́емы, страда́ния му́жественне претерпе́ли есте́ и на Не́бо ле́гце воспари́ли есте́. Те́мже мо́лим вас: помози́те и нам избе́гнути сете́й вра́жиих, да Го́спода пое́м и превозно́сим во вся ве́ки.
Богоро́дичен: Еди́ну Тя ве́рнии сте́ну неруши́му и покро́в и́мамы, Богоро́дице, Твои́м бо заступле́нием Це́рковь Ру́сская в ле́та гоне́ний спасе́на бысть. Те́мже и ны́не от вся́каго зла сохрани́ ча́да Твоя́, воспева́ющая: ра́дуйся, Де́во Пречи́стая, Богоро́дския земли́ похвало́ и украше́ние.
Песнь 9
Ирмо́с: Иса́ие, лиќуй,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к и́мя Ему́,// Его́же велича́юще, Де́ву ублажа́ем.
Ра́дуйся, Константи́не блаже́нне, па́стырем похвало́! Ты, доброде́тельми весь украси́вся, ве́ру пра́вую да́же до сме́рти соблю́л еси́, е́реси и раско́лы обличи́л еси́, и па́ству твою́ во благонра́вии упа́сл еси́. Ны́не же моли́ся о почита́ющих па́мять твою́.
Пе́ние прино́сим вам, святи́и новому́ченицы, земли́ Богоро́дския прозябе́ние, я́ко покрови́тели на́ши и предста́тели пред Бо́гом яви́стеся. Те́мже взыва́ем: не премолчи́те о нас, те́пле моля́щеся ко Го́споду.
Цельбы́ оби́льно излива́ете всем притека́ющим к вам, святи́и новому́ченицы Богоро́дстии, и просвеща́ете лю́ди земли́ на́шея све́том ве́ры правосла́вныя. Те́мже мо́лим вас, мир ми́рови дарова́ти и душа́м на́шим ве́лию ми́лость.
Богоро́дичен: И́мамы Тя Засту́пницу всему́ ро́ду христиа́нскому, Богоро́дице, сле́зы людски́я отира́ющую и я́звы врачу́ющую. О Влады́чице Держа́вная, моли́ся за Русь Святу́ю, да пребу́дет в ве́ре, наде́жди и любви́ до сконча́ния ве́ка.
Свети́лен:
Просвети́лися есте́ све́том и́стины, новому́ченицы Христо́вы, те́мже и лю́ди гра́да Богоро́дска науча́ете взыва́ти си́це: Светода́вче, сла́ва Тебе́.
Сла́ва, и ны́не, Богоро́дичен:
Просвети́ нас, греха́ми омраче́нных, Пречи́стая, и на путь спасе́ния напра́ви, да с новому́ченики Це́ркве Ру́сския вопие́м Сы́ну Твоему́: Светода́вче, сла́ва Тебе́.
На хвали́тех стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́!/ Це́ркве Ру́сския благо́е украше́ние,/ святи́и новому́ченицы Богоро́дстии,/ я́ко ве́ры свети́льницы горя́ще,/ в нощи́ гоне́ния лю́таго просия́ли есте́,/ ника́коже безбо́жных стра́ха убоя́вшеся,/ све́тлый му́ченичества по́двиг подъя́ли есте́,/ ны́не же побе́дными венцы́ облиста́еми,// во све́те невече́рнем пребыва́ете.
О, боже́ственныя кро́тости!/ Незло́бия Христо́ва подража́телие,/ а́гнцы новозакла́ннии, страстоте́рпцы Богоро́дстии,/ страда́ния многоразли́чная и убие́ние кро́тце претерпе́вше,/ днесь я́ко зве́зды на тве́рди церко́вней сия́ете,/ ко Христу́ путь ве́рным указу́юще,/ мы же, высоте́ по́двига ва́шего дивя́щеся,/ со умиле́нием и ве́рою взыва́ем:// моли́теся о нас ко Го́споду.
О, пресла́вныя све́тлости!/ Ве́ры правосла́вныя свещи́ лучеза́рныя,/ новому́ченицы Богоро́дстии,/ во́ини добропобе́днии,/ преще́ний безбо́жных не убоя́вшеся,/ ника́коже и́стины отреко́стеся/ и, ре́вностию по Бо́зе пламене́юще,/ му́ки за Христа́ прия́ли есте́,// ны́не же во Ца́рствии Небе́снем ликовству́ете.
Сла́ва, глас и подо́бен то́йже:
О, ди́вныя кре́пости!/ Ни скорбь, ни теснота́, ни смерть, ни гоне́ние/ возмого́ша разлучи́ти вас от любве́ Бо́жия,/ блаже́ннии новому́ченицы Богоро́дстии,/ вы бо, му́жественне крест страда́ний взе́мше,/ после́довали есте́ Христу́ Бо́гу,/ те́мже вас усе́рдне прославля́юще,/ с лю́бовию взыва́ем:// ра́дуйтеся, земли́ на́шея украше́ние!
И ны́не, Богоро́дичен, глас и подо́бен то́йже:
О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Бог нам прибе́жище// и си́ла. Стих: Помо́щник в ско́рбех, обре́тших ны зело́. Апо́стол к Ри́мляном, зача́ло 99 (гл. 8, ст. 28–39). Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 105–106 (гл. 21, ст. 8–19). Коне́ц: В терпе́нии ва́шем стяжи́те душа́ ва́ша. Прича́стен: Ра́дуйтеся, пра́веднии, о Го́споде, пра́вым подоба́ет похвала́.
Моли́тва
О святи́и новому́ченицы и испове́дницы Богоро́дстии, в годи́ну лю́тых гоне́ний за Христа́ пострада́вшии, ве́рность Ему́ да́же до сме́рти сохрани́вшии и вене́ц жи́зни от Него́ прие́мшии! Вы, во дни искуше́ния тя́жкаго, прише́дшаго на Це́рковь Ру́сскую от безбо́жных, муче́ния многоразли́чная и лю́тую смерть претерпе́вше, любо́вь ко Го́споду и о́браз непосты́днаго упова́ния на Него́ му́жественно яви́ли есте́. И ны́не в раи́ сла́дости наслажда́ющеся, пред Престо́лом Бо́жиим во сла́ве предстои́те и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите. Сего́ ра́ди мы недосто́йнии мо́лим вас: умоли́те Го́спода Сил, да утверди́т Це́рковь Ру́сскую непоколеби́му в многомяте́жном ми́ре сем, да возроди́т в земли́ на́шей дух братолю́бия и ми́ра, и приведе́т нас заблу́ждших к покая́нию, да водворя́тся в душа́х на́ших мир, любо́вь и благогове́ние, да испо́лнятся уста́ на́ша непреста́ннаго благодаре́ния Спаси́телю на́шему. Предста́тельством ва́шим святы́м да возроди́тся во Оте́честве на́шем ре́вность о сла́ве Бо́жией и о вся́ком де́лании пра́вды, да сподо́бимся при́сно с ва́ми прославля́ти Еди́наго во Святе́й Тро́ице и́стиннаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
