Служба священномученику Григорию, епископу Шлиссельбургскому
Ме́сяца сентября́ в 4-й день
Свята́го священному́ченика Григо́рия, епи́скопа Шлиссельбу́ргскаго
А́ще изво́лит настоя́тель, твори́м бде́ние.
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Прехва́льнии му́ченицы:
Прехва́льне Григо́рие,/ по до́лгу ублажа́ем тя,/ я́ко па́стыря вои́стину до́бра/ и подража́теля своему́ Влады́це,/ заблу́ждшия о́вцы взыска́вша/ и на па́жить безсме́ртия приве́дша./ Те́мже Христо́ви моли́ся,/ дарова́ти душа́м на́шим// мир и ве́лию ми́лость.
Прехва́льне Григо́рие,/ сле́зы у́бо и по́ты твоя́,/ я́ко ка́мение многоце́нное сия́ют,/ тече́ния же крове́й твои́х,/ ко благопло́дию удобря́ют/ ни́вы духо́вныя Ру́сския земли́./ Те́мже Христо́ви моли́ся,/ дарова́ти душа́м на́шим// мир и ве́лию ми́лость.
Прехва́льне Григо́рие,/ сугу́б тебе́ сплете́ся вене́ц/ святи́тельства у́бо и муче́ния,/ и́мже досто́йно увязе́ся,/ я́ко до́бре тече́ние сконча́вый/ и ве́ру до конца́ соблюды́й./ Те́мже Христо́ви моли́ся,/ дарова́ти душа́м на́шим// мир и ве́лию ми́лость.
Сла́ва, и ны́не, Богоро́дичен, глас и подо́бен то́йже:
Всеми́рная ра́дость/ Тобо́ю, Де́во, ми́рови возсия́:/ из Твои́х бо пречи́стых ложе́сн/ Цвет израсте́ безсме́ртныя жи́зни,/ сра́сленый Отцу́ безнача́льну и Ду́хови,/ благоуха́нием ве́рныя веселя́,/ и неизрече́нныя сподобля́я добро́ты,/ и подава́я душа́м на́шим// мир и ве́лию ми́лость.
На стихо́вне стихи́ры, глас 2.
Подо́бен: До́ме Евфра́фов:
Дом спасе́ния,/ Бо́жия Це́рковь,/ в пречестне́м пра́зднице све́тится/ па́стыря и учи́теля,// священнострада́льца Григо́рия.
Стих: Честна́ пред Го́сподем// смерть преподо́бных Его́.
До́му Пречи́стыя,/ Руси́ правосла́вней,/ в ли́це моли́твенник ея́/ но́вая днесь возсия́ звезда́,// богосве́тлый Григо́рий.
Стих: Что возда́м Го́сподеви о всех,// я́же воздаде́ ми?
Правосла́вных сла́ву,/ испове́дника Христо́ва,/ па́стыря овца́м нело́жна,/ апо́столом единонра́вна// ублажа́ем тя, Григо́рие.
Сла́ва, и ны́не, Богоро́дичен, глас и подо́бен то́йже:
Ве́рным Предста́тельнице,/ упова́ние ми́рови,/ богора́дованная Влады́чице,/ моли́ Сы́на Твоего́,// спасти́ ду́ши на́ша.
Тропа́рь, глас 8, пи́сан на вели́цей вече́рни: Росси́йскую звезду́: Сла́ва, и ны́не, Богоро́дичен, глас то́йже: И́же нас ра́ди рожде́йся от Де́вы:
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Егда́ неве́рствия и братоненави́дения/ те́рние прозябе́ в Ру́сской земли́,/ подавля́я и погубля́я/ до́брую пшени́цу Христо́ву,/ тогда́ человекоуби́йственныя зло́бы,/ Григо́рие, не убоя́лся еси́,/ но Бо́жие зва́ние ра́достно прии́м,/ стезе́ю моли́твы и трезве́ния после́довал еси́,/ нестяжа́ния же и послуша́ния,/ те́мже и па́стве слове́сных ове́ц да́руешися,/ и я́ко свети́льник высо́це поставля́ешися,// во сла́ву еди́наго Человеколю́бца.
Егда́ во и́ночестем о́бразе/ подвиза́лся еси́, сла́вне Григо́рие,/ тя благоразсу́дне избра́л есть,/ па́стыря овца́м слове́сным Петро́ва гра́да,/ первосвяти́тель треблаже́нный Ти́хон,/ и́же ко испове́данию укрепля́я тя/ и покро́ву Небе́сныя Цари́цы вруча́я,/ многоце́нный тя же́мчуг нарече́,/ от при́тчи Спа́совы именова́ние прие́м/ и би́серу сло́во спасе́ния уподо́бив,/ е́же неуста́нно пропове́дал еси́/ и мре́жи по́лныя Влады́це улови́л еси́, вопия́:// сла́ва Тебе́, еди́не Человеколю́бче.
Егда́ бу́ря собла́зна и разделе́ния/ кора́бль церко́вный зело́ поколеба́,/ к наве́том же мучи́тельским/ шата́ния лжебра́тии приложи́шася,/ тогда́ сбы́стся на тебе́ глаго́л,/ и́же верхо́вному Своему́ апо́столу Госпо́дь рече́:/ моли́хся, да не оскуде́ет ве́ра твоя́,/ я́ко да утверди́ши бра́тию твою́./ Сие́ у́бо де́лом испо́лнил еси́,/ Григо́рие святи́телю,/ и ны́не на Небесе́х мо́лиши о на́с// еди́наго Человеколю́бца.
И́ны стихи́ры, глас 4.
Подо́бен: Зва́нный свы́ше:
Свы́ше зва́нию после́довав,/ Григо́рие всему́дре,/ отве́ргл еси́ су́етную мглу/ и бо́дренно устреми́лся еси́ к Тро́ичному све́ту;/ те́мже и ле́гце возлете́л еси́/ на криле́х богоразу́мия,/ и е́же о Христе́ страда́ния,/ к неизрече́нному Небе́сному Престо́лу,/ иде́же непреста́нно со А́нгелы сла́виши/ Христа́ Бо́га на́шего,/ Его́же моли́// спасти́ и просвети́ти ду́ши на́ша.
Ве́ры правосла́вныя млеко́м,/ Григо́рие пречу́дне,/ от младе́нства воспита́н был еси́,/ благочести́ваго ко́рене святы́й плод,/ ча́до послуша́ния,/ те́мже да́нный ти тала́нт умно́жил еси́,/ пропове́дник Христо́ва Ева́нгелия я́влься,/ моли́твенник ве́лий о ста́де Его́ и па́стырь душа́м преизря́ден,/ и́стинен свяще́нник Бо́га Вы́шняго,/ Его́же ны́не моли́// спасти́ и просвети́ти ду́ши на́ша.
Ду́хом Бо́жиим умудря́емь,/ Григо́рие свяще́нне,/ та́ин Бо́жиих приле́жный зри́телю/ и предо́брый тех сказа́телю,/ пропове́дник боговеща́нный яви́лся еси́,/ во всеору́жие во́инов Христо́вых оболче́н,/ шлем спасе́ния восприя́л еси́,/ и стре́лы разжже́нныя лука́ваго/ щито́м ве́ры угаси́в,/ врага́ мече́м духо́вным порази́л еси́,/ и ны́не Христу́ моли́ся// спасти́ и просвети́ти ду́ши на́ша.
Сла́ва, глас 6:
Святи́тельскую похвалу́ и ве́рным побо́рника вели́ка,/ апо́столом единонра́вна, свяще́нному Богосло́ву тезоимени́та,/ заблу́ждшим наста́вника, скорбя́щим душа́м уте́шителя,/ А́нгелом подража́теля и му́ченика венцено́сна,/ прииди́те, празднолю́бцы, пе́сньми просла́вим Григо́рия,/ страда́нии свои́ми днесь на Небеса́ возше́дшаго,/ и по́чести побе́дныя от Влады́ки восприе́мшаго,/ псало́мски вопию́ще:/ честна́ вои́стину пред Го́сподем// смерть преподо́бных Его́.
И ны́не, Богоро́дичен догма́тик, глас то́йже:
Кто Тебе́ не ублажи́т, Пресвята́я Де́во?/ Кто ли не воспое́т Твоего́ пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся,/ естество́м Бог сый/ и естество́м быв Челове́к нас ра́ди,/ не во двою́ лицу́ разделя́емый,/ но во двою́ естеству́ несли́тно познава́емый./ Того́ моли́, Чи́стая, Всеблаже́нная,// поми́ловатися душа́м на́шим.
Вхо́д. Проки́мен дне. И чте́ния три.
Проро́чества Иса́иина чте́ние (глава́ 26):
Отве́рзите врата́, да вни́дут лю́дие/ храня́щии пра́вду и храня́щии и́стину, прие́млющии и́стину и храня́щии мир./ Я́ко на Тя наде́янием наде́яшася, Го́споди, во век,/ Бо́же вели́кий, ве́чный, И́же смири́в низве́л еси́ живу́щия в высо́ких:/ гра́ды кре́пкия разори́ши и обни́зиши я́ да́же до земли́./ И поперу́т я́ но́ги кро́тких и смире́нных./ Путь благочести́вых прав бысть,/ и приугото́ван путь благочести́вых./ Путь бо Госпо́день суд:/ упова́хом на и́мя Твое́ и па́мять, ея́же жела́ет душа́ на́ша./ От но́щи у́тренюет дух мой к Тебе́, Бо́же,/ зане́ свет повеле́ния Твоя́ на земли́:/ пра́вде научи́теся, живу́щии на земли́./ Преста́ бо нечести́вый:/ всяк, и́же не научи́тся пра́вде на земли́, и́стины не сотвори́т:/ да во́змется нечести́вый, да не ви́дит сла́вы Госпо́дни.
Проро́чества Малахи́ина чте́ние (главы́ 3 и 4):
Сия́ реко́ша боя́щиися Го́спода, ки́йждо ко и́скреннему своему́:/ и внят Госпо́дь, и услы́ша,/ и написа́ кни́гу па́мяти пред Собо́ю/ боя́щимся Го́спода и благогове́ющим и́мя Его́./ И бу́дут Ми, глаго́лет Госпо́дь Вседержи́тель,/ в день, его́же Аз творю́ в снабде́ние, и изберу́ я́,/ и́мже о́бразом избира́ет челове́к сы́на своего́,/ до́бре рабо́тающа ему́./ И обратите́ся и уви́дите между́ пра́ведным и между́ беззако́нным,/ и между́ служа́щим Бо́гови и не служа́щим Ему́./ Я́ко се, день гряде́т горя́щ я́ко пещь и попали́т я́,/ и бу́дут вси иноплеме́нницы и вси творя́щии беззако́нная я́ко сте́блие:/ и возжже́т я́ день Госпо́день гряды́й, глаго́лет Госпо́дь Вседержи́тель,/ и не оста́нется от них ко́рень ниже́ ветвь./ И возсия́ет вам боя́щимся и́мене Моего́/ со́лнце пра́вды и исцеле́ние в криле́х его́.
При́тчей чте́ние (глава́ 12):
Ничто́же непра́ведное уго́дно есть пра́ведному:/ нечести́вии же испо́лнятся злых./ Ме́рзость Го́сподеви устне́ лжи́вы:/ творя́й же ве́рно прия́тен Ему́./ Муж разуми́вый престо́л чу́вствия:/ се́рдце же безу́мных сря́щет кля́твы./ Рука́ избра́нных одержи́т удо́бь:/ льсти́вии же бу́дут во плене́нии./ Стра́шное сло́во се́рдце му́жа пра́ведна смуща́ет,/ весть же блага́я весели́т его́./ Разуми́в пра́ведник себе́ друг бу́дет:/ мы́сли же нечести́вых некро́тки:/ согреша́ющих пости́гнут зла́я, путь же нечести́вых прельсти́т я́./ Не улучи́т льсти́вый лови́твы:/ стяжа́ние же честно́е муж чи́стый./ В путе́х пра́вды живо́т:/ путие́ же злопо́мнящих в смерть.
На лити́и стихи́ра хра́ма.
Та́же стихи́ры свята́го, глас 3, самогла́сны:
Весели́ся и свети́ся, Це́рковь Бо́жия,/ сни́дитеся, ве́рнии, в честне́м торжестве́ священнострада́льца,/ и́стины пропове́дника,/ Крест Христо́в на ра́мо взе́мшаго,/ и пред мучи́тели Спа́са испове́давша,/ и в са́мый час кончи́ны своея́ о убива́ющих его́ моли́вшася:/ Го́споди, не поста́ви им греха́ сего́./ Но и мы у́бо, ча́да твоя́, святи́телю,/ кро́вом моли́твы твоея́ покрыва́ющеся,/ грехо́в оставле́ния ча́ем,/ и ве́рою днесь вопие́м:// ра́дуйся, богоно́сне о́тче Григо́рие.
Ра́дуйся, благи́й ра́бе и ве́рный,/ ра́дуйся, де́лателю виногра́да Бо́жия,/ ра́дуйся, тяготу́ и дневны́й вар понесы́й,/ ра́дуйся, да́нный ти тала́нт умно́живый,/ ра́дуйся, понесы́й на ра́му поги́бшее овча́,/ ра́дуйся, ко́рмчий, и́же кора́бль церко́вный до́бре упра́вивый,/ ра́дуйся, го́рняго Иерусали́ма жи́телю,/ ра́дуйся, Ца́рствию Небе́сному насе́льниче,// ра́дуйся, богоно́сне о́тче Григо́рие.
Что глас пра́зднующих быва́ет?/ Це́рковь у́бо Христо́ва торжеству́ет,/ и с не́ю земля́ Ру́сская воспева́ет в па́мять Бо́жия святи́теля;/ весели́теся, гра́де Коло́мно/ и Оки́ реки́ брега́, и́же в пелены́ его́ пови́ша;/ кра́суйся, гра́де Петро́в,/ и Не́вския струи́, све́тло возблещи́те,/ архиере́йства его́ святы́ню почита́юще;/ лику́й, гра́де Ка́шине,/ му́дростию слове́с его́ обогати́выйся;/ воспо́й, Тверска́я земле́,/ ка́пли свяще́нныя кро́ве его́ испи́вши,/ и цве́ты благоче́стия и испове́дания израсти́вши,/ и ве́рою ны́не возопи́й:// ра́дуйся, богоно́сне о́тче Григо́рие.
Сла́ва, глас 6:
Па́мять пра́веднаго с похвала́ми,/ наипа́че же се́ятеля Сло́ва Бо́жия,/ ни́ву Христо́ву возде́лавшаго/ и кла́сы стори́чныя в жи́тницы Небе́сныя собра́вшаго,/ неусы́пнаго стра́жа па́ствы церко́вныя,/ де́лателя та́йнаго виногра́да,/ вино́м но́вым веселя́ща ве́рных сердца́// в невече́рнем дни Воскресе́ния.
И ны́не, Богоро́дичен, глас то́йже:
Творе́ц и Изба́витель мой, Пречи́стая,/ Христо́с Госпо́дь,/ из Твои́х ложе́сн проше́д,/ в мя оболки́йся,/ пе́рвыя кля́твы Ада́ма свободи́./ Те́мже Ти, Всечи́стая,/ я́ко Бо́жии Ма́тери же и Де́ве вои́стину/ вопие́м немо́лчно:/ ра́дуйся, а́нгельски, ра́дуйся, Влады́чице,/ предста́тельство, и покро́ве,// и спасе́ние душ на́ших.
На стихо́вне стихи́ры, глас 6.
Подо́бен: Все отло́жше:
Всю восприя́л еси́/ па́стырскую му́дрость,/ и с Моисе́евою кро́тостию/ Илиину́ ре́вность совокупи́в,/ Же́ртву Безкро́вную непоро́чне соверша́я,/ и пра́веднеи ру́це к Бо́гу о ста́де воздева́я,/ те́мже доброде́тель твоя́/ на гне́в безу́мныя мучи́тели подви́же,/ и́же тя суди́щу беззако́нному преда́вше,/ неми́лостивно уби́ша,/ со дерзнове́нием моля́щагося// о душа́х на́ших.
Стих: Честна́ пред Го́сподем// смерть преподо́бных Его́.
Вся от Христа́ улучи́в/ священносло́вная дарова́ния,/ во утвержде́ние благоче́стия/ посла́ния и кни́ги мно́гия списа́л еси́,/ ду́ши удруче́нныя утеша́я,/ сердца́ же и смы́слы исцеля́я/ пра́вою ве́рою Тро́ическою,/ Небе́снаго Ца́рствия наде́ждею/ и преми́рною любо́вию,/ назида́я ча́да своя́ на краеуго́льном Ка́мени,/ и свято́е Возноше́ние о тех принося́,/ и со дерзнове́нием моля́ся// о душа́х на́ших.
Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.
Вся оста́вльше/ земна́я мудрова́ния,/ единомы́сленная ча́да твоя́,/ Григо́рие, архиере́ю Христо́в,/ на му́ки безме́рныя влеко́мая, не преда́ша спаси́тельныя ве́ры,/ но я́ко избра́нная овча́та,/ в же́ртву своему́ Влады́це вознесо́шася,/ и́хже страда́ния пою́ще,/ Подвигополо́жника велича́ем,/ и тя наста́вника их почита́ем,/ со дерзнове́нием моля́щагося// о душа́х на́ших.
Сла́ва, глас 8:
Я́ко свеща́ на све́щнице,/ предстои́т святи́тель Бо́жий Григо́рий,/ облиста́яй Оте́чества на́шего концы́/ ве́ры и доброде́тели сия́нием,/ подвиго́в же и страда́ний свои́х,/ в не́мже изобрази́ся и прослави́ся/ пострада́вый и воскресы́й,/ и на Небеса́ со сла́вою возше́дый,/ Архиере́й Вели́кий Христо́с,// И́же вчера́ и днесь, То́йже и во ве́ки.
И ны́не, Богоро́дичен, глас то́йже:
Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.
На благослове́нии хле́бов тропа́рь, глас 8:
Росси́йскую звезду́, Коло́мны благу́ю о́трасль,/ гра́да Петро́ва цвет неувяда́емый,/ Ка́шина облиста́ние и похвалу́,/ Григо́рия богому́драго восхва́лим,/ ди́внаго во святи́телех и пресла́внаго в му́ченицех:// той бо мо́лится при́сно о душа́х на́ших.
Та́же други́й тропа́рь, глас 2:
Архиере́ю Христо́в Григо́рие,/ Бо́гу по благода́ти ча́до,/ нам же оте́ц благосе́рдый,/ во дни помраче́ния безбо́жнаго/ добрый вои́стину па́стырь яви́лся еси́,/ богосло́в и богопропове́дник,/ и му́ченик свяще́нный,/ моли́ Христа́, за Него́же пострада́л еси́,/ да изба́вит зе́млю Ру́сскую от вся́ких бед и зол,// по вели́цей Свое́й ми́лости.
И Богоро́дице Де́во: еди́ножды.
А иде́же несть всено́щнаго бде́ния, на вели́цей вече́рни по Ны́не отпуща́еши: глаго́лем вторы́й тропа́рь еди́ножды. Сла́ва, и ны́не, Богоро́дичен воскре́сен по гла́су тропаря́.
НА У́ТРЕНИ
На Бог Госпо́дь: тропа́рь священному́ченика пе́рвый, два́жды. Сла́ва, вторы́й. И ны́не, Богоро́дичен: Вся па́че смы́сла:
По 1-й кафи́зме седа́лен, глас 4.
Подо́бен: Вознесы́йся на Крест:
Возше́д на высоту́ святи́тельства, гра́да Петро́ва основа́ния поколе́бленная па́ки укрепи́л еси́ си́лою слове́с Бо́жиих, и во оби́тели благове́рнаго кня́зя Алекса́ндра я́ко звезда́ возблиста́л еси́, лучу́ прие́м от преве́чнаго Со́лнца Пра́вды, И́же испо́лни тя благода́ти Своея́ и Боже́ственнаго сия́ния.
Сла́ва, и ны́не, Богоро́дичен, глас то́йже:
И́же на Престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бог вои́стину, воцари́ся над все́ми язы́ки, и разу́мно ны́не пое́м Ему́, Его́же умоли́ спасти́ся рабо́м Твои́м.
По 2-й кафи́зме седа́лен, глас 3.
Подо́бен: Красоте́ де́вства:
Благоче́стно в по́стничестве пожи́в, на престо́ле архиере́йства посажда́ешися, на не́мже не сла́ву и по́чести, но гоне́ния и у́зы, последи́ же и вене́ц му́ченический восприя́л еси́. Ны́не у́бо моли́ся, Григо́рие, о соверша́ющих па́мять твою́, да усе́рдно во след тебе́ потече́м, сла́вяще тя Просла́вльшаго.
Сла́ва, и ны́не, Богоро́дичен, глас то́йже:
Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю А́нгелы превозше́дшая, па́че всех мене́ персть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.
Велича́ние:
Велича́ем тя,/ священному́чениче Григо́рие,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Псало́м избра́нный:
Бог нам прибе́жище и си́ла.
Го́споди, воздви́гни си́лу Твою́, и прииди́ во е́же спасти́ нас.
Глаго́лах о свиде́ниих Твои́х пред цари́ и не стыдя́хся.
Вси язы́цы обыдо́ша мя, и и́менем Госпо́дним противля́хся им.
Тебе́ ра́ди умерщвля́емся весь день, вмени́хомся я́ко о́вцы заколе́ния.
Кре́пость моя́ и пе́ние мое́ Госпо́дь, и бысть мне во спасе́ние.
По полиеле́и седа́лен, глас 8.
Подо́бен: Прему́дрости:
Благочести́ваго ко́рене свята́я о́трасль, изде́тска па́че всех земны́х Бо́га возлюби́л еси́, и в за́поведех Его́ возраста́л еси́, те́мже и и́ноческий о́браз со тща́нием на ся восприя́л еси́. Но я́ко град верху́ горы́ стоя́й и не моги́й укры́тися, гра́ду Петро́ву да́руешися, я́ко би́сер многоце́нен и я́ко добр вои́стину па́стырь, о ста́де ду́шу полага́яй, Ти́хоном первосвяти́телем предызбра́н, Григо́рие всече́стне. Моли́ Христа́ Бо́га грехо́в оставле́ние дарова́ти, чту́щим любо́вию святу́ю па́мять твою́.
Сла́ва, и ны́не, Богоро́дичен, глас то́йже:
Я́ко Де́ву и еди́ну в жена́х, Тя без се́мене ро́ждшую Бо́га пло́тию, вси ублажа́ем, ро́ди челове́честии. Огнь бо всели́ся в Тя Божества́, и я́ко Младе́нца дои́ши Зижди́теля и Го́спода. Тем, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га, согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Кро́ток и незло́бив я́ко го́лубь,/ оба́че за и́стину Христо́ву ратобо́рец богому́дрый,/ су́етных по́честей бежа́щ,/ апо́стольския же ре́вности испо́лнь,/ и́менем же и уче́нием, и нра́вом/ Богосло́ву Григо́рию подо́бяся,/ святи́телем украше́ние, испове́дником и му́чеником сла́ва,/ тьмы отгони́тель, сын вои́стину Све́та Невече́рняго,// при́сно нам сия́еши, Григо́рие.
Кано́н Богоро́дицы со ирмосо́м на 6, глас 8: Во́ду проше́д: и свята́го кано́на два на 8.
Кано́н пе́рвый, имы́й краестро́чие:
Пою́ ти хвалу́, Григо́рие, архиере́ю Христо́в. Глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.
Похвалы́ твоя́, Григо́рие, предначина́ющу, умоли́ Влады́ку всех, да очи́стит ми к пе́нию устне́, доброде́тели и страда́ния твоя́ пове́дати по достоя́нию тща́щемуся.
О́браз Созда́вшаго тя нося́й, Григо́рие, и е́же по подо́бию стяжа́ти от ю́ныя версты́ потща́лся еси́, не на вре́менная и тле́емая взира́я, но на неги́бнущая и ве́чная.
Ю́же А́нгельский лик немо́лчными гла́сы я́ко Цари́цу пое́т, от младе́нства возлюби́л еси́ и Тоя́ избра́нное ча́до яви́лся еси́, Григо́рие, ма́тери земне́й уме́рши.
Богоро́дичен: Та́йных цвето́в рай яви́лася еси́, Чи́стая: из Тебе́ бо произше́д, Единоро́дное Сло́во О́тчее мир Своея́ красоты́ испо́лни, и нетле́нием Свои́м естество́ челове́чо облагоуха́л есть.
Други́й кано́н свята́го, имы́й краестро́чие:
Свяще́ннаго страда́льца сла́вим любо́вию. Глас 7.
Песнь 1
Ирмо́с: Ма́нием Твои́м на земны́й о́браз преложи́ся/ пре́жде удоборазлива́емое водно́е естество́, Го́споди./ Те́мже, немо́кренно пешеше́ствовав, Изра́иль// пое́т Тебе́ песнь побе́дную.
С вы́шними Си́лами ны́не Престо́лу Бо́жию предстоя́, Григо́рие, чту́щих всечестну́ю па́мять твою́ сквозе́ мо́ре жите́йское веде́ши, Го́сподеви пою́щих песнь побе́дную.
В несве́тлая времена́ и́стинный световоди́тель ве́рным от Христа́ да́лся еси́; Кресто́м я́ко столпо́м о́гненным в зе́млю спасе́ния веды́й, Го́сподеви пою́щих песнь побе́дную.
Я́ко Моисе́й жезло́м от су́ха ка́мене во́ду изведе́, та́ко и ты, Григо́рие, лю́ди Христо́вы, жа́ждею нестерпи́мою му́чимыя, ева́нгельскою струе́ю напая́л еси́, Го́сподеви пою́щия песнь побе́дную.
Богоро́дичен: Щедро́ты Твоя́, Влады́чице, незави́стно источа́ются ве́рою призыва́ющим Тя рабо́м Твои́м, оба́че и проти́ву враг неви́димых Воево́да нам взбра́нная бу́ди, Сы́ну Твоему́ пою́щим песнь побе́дную.
Катава́сия: Крест начерта́в Моисе́й:
Песнь 3
Ирмо́с: Еди́не ве́дый челове́ческаго существа́ не́мощь,/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.
Искуше́ний ю́ности пучи́ну немо́кренно преше́л еси́, ве́рою и благода́тию Христо́вою, я́ко рука́ма кре́пкима, держи́мь, и вопия́л еси́: благослове́н еси́ в хра́ме сла́вы Твоея́, Человеколю́бче.
Христо́с от нача́ла благосты́ню души́ Твоея́ ве́дый, я́ко жениху́ вене́ц избра́ния возложи́ ти, и я́ко неве́сту, красото́ю целому́дрия украси́, зову́щаго: свят еси́ в хра́ме сла́вы Твоея́, Человеколю́бче.
Во́лю покори́в ду́хови, еди́ны во́ли Бо́жия во всем житии́ твое́м иски́й, Григо́рие, при́сно взыва́л еси́: стопы́ моя́ напра́ви по словеси́ Твоему́, да не облада́ет мно́ю вся́кое беззако́ние, еди́не Бла́же и Человеколю́бче.
Богоро́дичен: А́гница Всенепоро́чная, Я́же А́гнца и Па́стыря ми́рови неискусому́жно ро́ждшая, при́зри на моли́твы ве́рою зову́щих: благослове́н еси́ в хра́ме сла́вы Твоея́, Го́споди.
Ин
Ирмо́с: В нача́ле Небеса́ всеси́льным сло́вом Твои́м/ утвержде́й, Го́споди Спа́се,/ и Вседе́тельным и Бо́жиим Ду́хом всю си́лу их,// на недви́жимем мя ка́мени испове́дания Твоего́ утверди́.
Еди́ный в Тро́ице сла́вимый Бо́же, дух мой укрепи́ во е́же при́сно Тя люби́ти, Тебе́ служи́ти, Тя сла́вити, святы́й Григо́рий во дни и в нощи́ моля́шеся. Бу́ди со мно́ю, и никто́же на мя.
На церко́внем недви́жимем ка́мени стопы́ твоя́, Григо́рие, от младе́нства утверди́шася, те́мже су́етнаго ве́ка, ересе́й, мяте́жей и бра́ней бесну́ющиися пото́цы ни ма́ло тя поколеба́ша.
Не ла́ска корми́лиц, ниже́ теплота́ дома́шная, но оби́тели Коло́менския, та́кожде труды́ и бде́ния, послуша́ние же и смире́ние воспита́ша тя изде́тска, пречу́дне Григо́рие.
Богоро́дичен: Архиере́й Вели́кий, проше́дый Небеса́, всесвяты́й Храм Тя избра́, да всели́тся пло́тию весь в Тя, огне́м Божества́ Своего́ ника́коже опаля́я, Мари́е Преблагослове́нная.
Седа́лен, глас 8.
Подо́бен: Прему́дрости:
Прему́дрости Бо́жия Ипоста́сныя ве́рный пропове́дник, прему́дрости и духо́в различе́ния дар ди́вно от Нея́ стяжа́л еси́. Сего́ ра́ди во времена́ искуше́ния и собла́зна, разделе́ния же и гоне́ния и́стинен па́стырь душа́м яви́лся еси́, и богокра́сными уче́ньми и посла́нии ча́да твоя́ духо́вная утеша́л еси́, и в ве́ре утвержда́л еси́, вся́ческая всем быв, да вся́ко не́кия спасе́ши. Но и исхо́д твой и́же ко Христу́ муче́нием украси́л еси́. Сего́ ра́ди чтем труды́ твоя́ и по́двиги, боле́зни и страда́ния, архиере́ю предо́брый Григо́рие.
Сла́ва, и ны́не, Богоро́дичен, глас то́йже:
Я́ко Всенепоро́чная Неве́ста Творца́, я́ко неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́нию мя су́ща скве́рное оби́телище и де́моном игра́лище в ра́зуме бы́вша, потщи́ся от тех злоде́йства мя изба́вити, све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й, и вы́шняго прича́стия сподо́би, и све́та невече́рняго моли́твами Твои́ми.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.
Ле́том о́гненнаго искуше́ния наста́вшим, стра́хом гоне́ний не поколеба́лся еси́, но и́го Христо́во на ся возло́жь, в путь преподо́бных, испове́дник и му́ченик ра́дуяся поше́л еси́.
Убива́ющих те́ло не боя́тися поуча́яся, по всяк час взира́л еси́ на распя́тие Влады́ки, рече́нное помина́я: предадя́т вы в ско́рби и убию́т вы, претерпе́вый же до конца́, той спасе́тся.
Гто́во се́рдце мое́, Бо́же, гото́во се́рдце мое́, псало́мски восклица́л еси́, Григо́рие, во́ли Бо́жией покаря́яся, и угото́ванным бо́дренно ше́ствуя путе́м, Ти́хона первосвяти́теля внем повеле́нию.
Богоро́дичен: Ра́дости вина́ Небе́сным Си́лам была́ еси́, е́же о овча́ти и дра́хме обре́тшихся, Преблагослове́нная Мари́е. Тем и земноро́днии непреста́нно вопие́м: ра́дуйся, Обра́дованная.
Ин
Ирмо́с: О́тча не́дра не оста́вль/ и соше́д на зе́млю, Христе́ Бо́же,/ та́йну услы́шах смотре́ния Твоего́// и просла́вих Тя, еди́не Человеколю́бче.
Горя́ща ко Христу́ любо́вию Дании́лова мона́шеская бра́тия со свящéнным па́стырем ея́ Фео́дором тя прие́млет ра́достно.
О́тче Небе́сный, рече́ Григо́рий, еди́но проси́х у Тебе́, е́же жи́ти в дому́ Твое́м вся дни живота́ моего́ и при́сно зре́ти красоту́ Твою́, Человеколю́бче.
Святи́лища Бо́жия ви́дя разграбля́ема, сыноле́пно скорбе́л еси́, оба́че нетле́нных красо́т иска́ти учи́л еси́, и ко го́рнему Сио́ну взира́ти.
Богоро́дичен: Ты вся Небе́сная во́инства Рождество́м Твои́м удиви́ла еси́, и Це́рковь спаса́емых возвесели́ла еси́, Спаси́телю Ма́ти бы́вши.
Песнь 5
Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия// правосла́вно пою́щих Тя.
Иски́й Ти́хон святы́й кре́пце сло́во и́стины держа́ща, и за па́ству ду́шу полага́юща, на святи́тельство тя избира́ет во град Петро́в, и́же наипа́че от безбо́жных смуща́шеся.
Главу́ преклони́л еси́, Григо́рие, не пререка́я, ниже́ вопия́, но избра́нию послу́шен, и я́ко свы́ше сие́ прия́л еси́, подража́я Христо́ви, Па́стырю овца́м вели́кому и А́гнцу да́же до сме́рти послушли́вому.
Оби́тель Алекса́ндра свята́го, ве́ру правосла́вную дре́вле от лати́н зверонра́вных защити́вшаго, тобо́ю, свя́те Григо́рие, кре́пкое забра́ло яви́ся проти́ву льва, огне́м а́довым рыка́ющаго.
Богоро́дичен: Ра́дуйся, вся тварь Тебе́ вопие́т, я́ко Сло́во О́тчее Единоро́дное пло́тию вмести́ла еси́, земна́я с Небе́сными Рождество́м Свои́м совоку́пльши, Мари́е Богоневе́сто.
Ин
Ирмо́с: Нощь не светла́ неве́рным, Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́тренюю,// и воспева́ю Твое́ Божество́.
Ревну́йте о дарова́ниих бо́льших, ча́да своя́ духо́вная Григо́рий богому́дрый поуча́ше, па́че же всех о любви́, ея́же ничто́же в ми́ре вы́шше есть.
Алекса́ндру, свято́му вои́телю, в нищете́ духо́вней и му́жестве ревну́я, святи́тель Григо́рий вои́стину бысть во́ин, мече́м глаго́ла Бо́жия неви́димых враг полки́ отгоня́яй.
Даждь ми сло́во от Твои́х сладча́йших усте́н, Сло́ве, Григо́рий моля́шеся, и проси́мое получи́в, си́лою мно́гою слове́сною обогати́ся от Го́спода Царя́ Сил.
Богоро́дичен: А́нгельское ра́дование прии́мши, Де́во, все́ю душе́ю Твое́ю ве́ровала еси́ Бо́гу и Сама́ Себе́ вдала́ еси́ Тому́, тем по достоя́нию блажи́м Тя.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.
Исправля́юща до́бре вся я́же о Це́ркви Госпо́дни, поги́бели и гее́нны сы́нове на суди́ще непра́ведное влеку́т тя, со беззако́нными вменя́юще и я́ко не́коего та́тя у́зам предаю́ще.
Е́же ко осужда́ющим Спа́сово терпе́ние пред очи́ма име́я, кро́тце и смире́нне мучи́телем отвеща́л еси́, окамене́нная сердца́ их я́коже воск растопля́я, Креста́ Госпо́дня си́лою.
Апо́стольски о ста́де церко́внем боле́знуя и от собла́зна и поро́ка соблюда́я е́, воззва́л еси́: ко́е согла́сие Христо́ви с велиа́ром, и ко́е сложе́ние Це́ркви Бо́жией со и́долы?
Богоро́дичен: Ра́дуйся, но́вое Не́бо, в не́мже нам Со́лнце Пра́вды возсия́. Ра́дуйся, благода́ти исто́чниче, мир весь напая́яй. Ра́дуйся, потопля́емым ковче́же спасе́ния.
Ин
Ирмо́с: Пла́вающаго в молве́ жите́йских попече́ний,/ с корабле́м потопля́ема грехи́/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.
Любо́вию Бо́жиею распала́емь, поуча́л еси́, святи́телю: а́ще всем се́рдцем Све́та и́стины взы́щеши, Той возглаго́лет в се́рдцы твое́м, и тебе́ откры́ется, пленя́я тя всего́ и просвеща́я во ве́ки.
Ца́рствие Христо́во па́че всего́ земна́го возлюби́в и того́ моли́твенно ча́я, святи́телю, мни́маго рая́ земна́го, безбо́жным наси́льством созида́емаго, душеуби́йственную лжу отме́л еси́.
А́ще с престо́лом и па́ствою разлуче́н был еси́, а́ще и в це́ркви Бо́жии учи́ти возбранено́ ти бя́ше, оба́че о́вы у́бо та́йно назида́л еси́, о́вы же посла́ньми утеша́л еси́, святи́телю.
Богоро́дичен: Собо́ри Небе́сных Сил вку́пе с земноро́дных ли́ки, всяк язы́к челове́ческий и А́нгельский, та́йну Рождества́ Твоего́ не мо́гут досто́йно воспе́ти, оба́че во смире́нии Тя сла́вят, Богоблагода́тная.
Конда́к, глас 6.
Подо́бен: Рукопи́саннаго о́браза:
Безбо́жныя вла́сти повеле́ний не убоя́вся,/ но боже́ственною благода́тию укрепля́емь, Григо́рие,/ сло́вом Госпо́дним ста́до твое́ от душетле́нных волко́в огради́л еси́;/ в час же сме́ртный немо́лчно о нем Пастыренача́льника моли́л еси́:/ ускори́, о Ще́дрый,/ и потщи́ся, я́ко Ми́лостив, в по́мощь на́шу,// я́ко мо́жеши хотя́й.
И́кос:
Простри́ ру́ку Твою́ с Небесе́, Благи́й, и соблюди́ Це́рковь, кро́вию Сы́на Твоего́ искупле́нную, неколеби́му, нетле́нну и от вра́жиих кова́рств ненаве́тну, и лю́ди Твоя́ на путь за́поведей Твои́х наста́ви Ду́ха Твоего́ осене́нием, сы́ны дне и све́та показу́я, я́ко да ви́дяще вси язы́цы до́брая дела́ их, просла́вят Тя, Отца́ Небе́снаго, мо́лит ны́не, предстоя́ Тебе́, святи́тель Твой и му́ченик Григо́рий, я́коже и при честне́й кончи́не свое́й, Тебе́ ра́ди неми́лостивно убива́емь, о гони́мей Це́ркви и о лю́дех со слеза́ми взыва́ше: ускори́, о Ще́дрый, и потщи́ся, я́ко Ми́лостив, в по́мощь на́шу, я́ко мо́жеши хотя́й.
Песнь 7
Ирмо́с: Тебе́ у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.
Христо́вы пра́вды броне́ю оболче́н, вся стре́лы лука́ваго разжже́нныя угаси́л еси́, и мече́м духо́вным мы́сленных змие́в главы́ ссекл еси́, безпоро́чну соблюда́я Це́рковь хва́льнаго отце́в Бо́га и препросла́вленнаго.
Иису́сово сладча́йшее и́мя при́сно во устна́х имы́й, Григо́рие, пресе́льник бысть на земли́ Его́ ра́ди, ду́хом николи́же чад свои́х отлуча́яся, но утвержда́я и утеша́я, и наставля́я почита́ти хва́льнаго отце́в Бо́га и препросла́вленнаго.
Егда́ от безбо́жных утесне́нием томи́мь был еси́, от гра́да во град преходя́, спаси́тельное сло́во се́яти отню́д не преста́л еси́, клас стори́чный принося́ хва́льному отце́в Бо́гу и препросла́вленному.
Богоро́дичен: Ра́дости благове́стника Ти посыла́я, Боже́ственный Жени́х, на чистоту́ Твою́ взира́я, вся еси́ добра́, бли́жняя Моя́, взыва́ше, Голуби́це Моя́, вертогра́де заключе́нный, исто́чниче запечатле́нный хва́льнаго отце́в Бо́га и препросла́вленнаго.
Ин
Ирмо́с: Пещь о́троцы огнепа́льну/ дре́вле росоточа́щу показа́ша,/ Еди́наго Бо́га воспева́юще и глаго́люще:// превозноси́мый отце́в Бог и препросла́влен.
Лю́тый страсте́й огнь росо́ю моли́твы и струя́ми Святы́х Писа́ний угаша́я, в напа́стех и ско́рбех о́трочески воспева́л еси́: оте́ц на́ших Бóже, благослове́н еси́.
А́гнцу Бо́жию всем се́рдцем послушли́в быв, душегуби́тельному мудрова́нию челове́чу не повину́лся еси́, воспева́я: оте́ц на́ших Бо́же, благослове́н еси́.
Власте́м земны́м покаря́яся нелицеме́рне, во́лю Бо́жию предпоче́л еси́, Ему́же и до после́дняго часа́ служи́л еси́, взыва́я: оте́ц на́ших Бо́же, благослове́н еси́.
Богоро́дичен: И́долы человекобо́жия сокруша́яй И́же от горы́ Тебе́, Де́во, нерукосе́чный Ка́мень вся племена́ земна́я воздвиза́ет пе́ти: оте́ц на́ших Бо́же, благослове́н еси́.
Песнь 8
Ирмо́с: В пещи́ о́троцы Изра́илевы,/ я́коже в горни́ле/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.
Еле́ню подо́бяся, ко исто́чником воды́ присноживо́тныя прите́кл еси́, словесе́м ева́нгельским, и́хже подро́бне изъясня́я ча́дом, свя́те Григо́рие, взыва́л еси́: по́йте и превозноси́те Го́спода во ве́ки.
Ю́ность твоя́ в Ду́се Свя́те я́ко о́рля обновля́шеся, от си́лы бо в си́лу восходи́л еси́, благода́тию и му́дростию процвета́я. Сего́ ра́ди врази́ и́стины воста́ша на тя, и́мя твое́ мня́ще истреби́ти во ве́ки.
Христо́вы и́стиннии ученицы́, ча́да твоя́ духо́вная, о́браз страда́ния твоего́ ви́девше, в ве́ре укрепи́шася и си́лу проти́ву гони́телей восприя́ша, пою́ще и превознося́ще Го́спода во ве́ки.
Богоро́дичен: Ра́дуйся, Цари́це, одесну́ю Царя́ сла́вы предстоя́щи. Ра́дуйся, Ея́же ра́ди сонм дев святы́х, преподо́бных жен и му́чениц Жениху́ Небе́сному приведе́ся, сла́вя и превознося́ Его́ во ве́ки.
Ин
Ирмо́с: Неопа́льная огню́ в Сина́и/ прича́щшаяся купина́ Бо́га яви́/ медленноязы́чному и гугни́вому Моисе́ови,/ и о́троки ре́вность Бо́жия три непребори́мыя во огни́ певцы́ показа́:/ вся дела́ Госпо́дня, Го́спода по́йте,// и превозноси́те во вся ве́ки.
Ме́ртвенныя пло́ти тя́жесть отри́нув, на крилу́ боговиде́ния паря́ше, я́ко оре́л в вы́шняя вперя́яся, скве́рнии же богоненави́стницы состреля́ти в та́йных тя умы́слиша, зову́щаго: вся дела́ Госпо́дня, Го́спода по́йте, и превозноси́те во вся ве́ки.
Льво́м во обли́чии челове́честем пре́дан был еси́ на растерза́ние, Григо́рие, оба́че не устраши́лся еси́ зубо́в их, ни рыка́нию их внял еси́, но сострада́льцы твоя́ утвержда́я, со дерзнове́нием взыва́л еси́: вся дела́ Госпо́дня, Го́спода по́йте, и превозноси́те во вся ве́ки.
Ю́ношески презре́в гоне́ний распале́нную пещь, уже́ ты́сящи безви́нныя я́ко хле́бы сла́дки Бо́гови испе́кшую, вшел еси́ в ню́, я́коже в сад прохла́ден, свя́те, черто́ги Небе́сныя предзря́, зовы́й: вся дела́ Госпо́дня, Го́спода по́йте, и превозноси́те во вся ве́ки.
Богоро́дичен: Боже́ственная пала́то всекра́сному добро́тою Преве́чному Жениху́, одр Царе́в, во́инством Небе́сным обстои́мь, поко́ища отве́рзи и нам вы́шняго Ца́рствия, ве́рно Сы́ну Твоему́ зову́щим: вся дела́ Госпо́дня, Го́спода по́йте, и превозноси́те во вся ве́ки.
Песнь 9
Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.
Истяза́в тя и уму́чив, ничто́же преуспе́ гони́тель, но ве́рою твое́ю посра́млен, сме́рти лю́тей пре́дал есть, те́ло твое́ в безве́стии сокры́в, оба́че на Небеси́ я́ко звезда́ негаси́мая сия́еши.
С со́нмом новому́чеников и испове́дников Це́ркве Ру́сския Престо́лу Бо́жию предстоя́, святи́телю му́чениче Григо́рие, о и́же ве́рою чту́щих тя Бо́га умоли́.
Тверска́я земля́ освяти́ся, прии́мши те́ло твое́, и град Ка́шин испове́данием твои́м просла́вися, мы же, пе́сньми пою́ще тя, Спа́са и Влады́ку непреста́нно велича́ем.
Богоро́дичен: O Всепе́тая Ма́ти, со священнострада́льцем Григо́рием, Сы́на Твоего́ кончи́ною свое́ю просла́вльшим, Того́ моли́ держа́ву на́шу, гра́ды же и ве́си покры́ти от бед, да Тя вси велича́ем.
Ин
Ирмо́с: Ма́ти Бо́жия и Де́ва,/ ро́ждшая и де́вствующая па́ки,/ не естества́ де́ло, но Бо́жия снизхожде́ния:/ тем я́ко еди́ну Бо́жиих чуде́с сподо́бльшуюся,// Тя при́сно велича́ем.
О́бразу Христо́ву в душа́х чад твои́х моли́л еси́ возобрази́тися, Па́влу ревну́я, святи́телю Григо́рие. Ны́не же узре́в их Страсте́м Его́ прича́стники, А́гнца Бо́жия при́сно велича́еши.
Во след А́веля пра́веднаго отше́л еси́, Григо́рие, вку́пе со все́ми новому́ченики Це́ркве Ру́сския, и ны́не я́коже звезда́ на Небесе́х сия́еши, А́гнца Бо́жия при́сно велича́я.
Иоа́нн тайнови́дец, пя́той печа́ти отве́рзшейся, зря́ше ду́ши убие́нных за сло́во Бо́жие вопию́щия, и о суде́ и отмще́нии моля́щияся, А́гнца же Бо́жия белы́ ри́зы коему́ждо их даю́щаго, Его́же при́сно велича́ем.
Богоро́дичен: Ю́же в зе́млю кро́тких сквозе́ мо́ре жития́ Путеводи́тельницу изве́стную, и светоза́рную свещу́, в пусты́ни скорбе́й ше́ствие осиява́ющую, Тя, Богома́ти, вся племена́ земна́я при́сно велича́ем.
Свети́лен.
Подо́бен: Ду́хом во святи́лищи:
Я́коже свети́льник любве́ и благоче́стия сия́еши, Григо́рие, всем и́щущим я́же о Христе́ ве́чныя жи́зни, простира́я во вся концы́ ве́ры твоея́ лучи́. Моли́ у́бо мир ми́ру дарова́ти и душа́м на́шим спасе́ние.
Сла́ва, и ны́не, Богоро́дичен:
Под кров Твой, Чи́стая, прибега́ю окая́нный. Моли́ Благосе́рдаго, я́ко да получу́ ми́лость в День Суда́, егда́ моя́ испыта́ет та́йная дея́ния, да изба́влюся Тобо́ю осужде́ния, благослове́нная Мари́е.
На хвали́тех стихи́ры на 4, глас 4.
Подо́бен: Дал еси́ зна́мение:
Дал еси́ Це́ркви Ру́сстей,/ многоми́лостиве Го́споди,/ во времена́ те́мная/ провозве́стника Све́та и́стины,/ Григо́рия, благоче́стия рачи́теля,/ путь ко спасе́нию ве́рным показу́юща,/ и по́двиг запечатле́вшаго/ е́же о Тебе́ страда́нием,/ Иису́се Человеколю́бче,// Спа́се душ на́ших.
Дал еси́ оби́тели Дании́ловой/ ве́рнаго в ду́се ученика́,/ Григо́рия сла́внаго,/ доброде́телем первонача́льника поучи́вшагося/ и в по́двизех бра́тии поревнова́вшаго,/ и́же доброкра́сно на земли́ пожи́вше,/ во оби́тели Небе́сныя востеко́ша,/ и ны́не мо́лят Тя о нас,/ Иису́се Человеколю́бче,// Спа́се душ на́ших.
Да́л еси́ гра́ду Петро́ву/ и́стиннаго па́стыря,/ о овца́х Же́ртву Безкро́вную приноси́вшаго,/ та́же и себе́ сама́го прине́сшаго/ в же́ртву непоро́чну и благоприя́тну./ Муче́нием бо вознесе́ся/ к пренебе́сному Престо́лу Твоему́,/ иде́же о ми́ре моля́ся, предстои́т Ти,/ Иису́се Человеколю́бче,// Спа́се душ на́ших.
Просвети́лся еси́, гра́де Ка́шине,/ Григо́рия свяще́ннаго дарова́ньми,/ посто́м и моли́твою и бде́нием/ и богоглаго́ливым уче́нием,/ наипа́че же сла́внаго муче́ния венце́м,/ и́мже той на Небесе́х увязе́ся/ от руки́ Подвигополо́жника,/ за ны на Крест вда́вшагося,/ Иису́са Человеколю́бца,// Спа́са душ на́ших. Сла́ва, глас 6:
Па́стырю до́брый и овча́ заколе́ния,/ Началопа́стыря и А́гнца Бо́жия учениче́,/ пропове́дниче благогла́сный и му́чениче неустраши́мый,/ о́браз воистину ве́рным был еси́, Григо́рие./ Но и в вы́шнем Иерусали́ме торжеству́я/ и в ли́це святи́телей Святе́й Тро́ице предстоя́,/ моли́ся о Оте́честве твое́м и о ста́де церко́внем,/ да вси чту́ще па́мять твою́/ и твоему́ испове́данию подража́юще,/ во свет лица́ Бо́жия дости́гнем,// со все́ми святы́ми ра́дующеся во ве́ки.
И ны́не, Богоро́дичен, глас то́йже:
Ра́дуйся, ко́реню летора́сленный,/ ра́дуйся, же́зле Боже́ственный Ааро́нов,/ прозябы́й цвет неувяда́ющий,/ благопло́дный раю́,/ дре́во жи́зненное,/ от ко́рене Иессе́ева чи́стая процве́тши, Отрокови́це,/ и земны́я кормя́щи хле́бом разу́мным;/ ра́дуйся, багряни́це всечестна́я/ всех Царя́, Богоневе́сто,/ увязе́ние све́тлое,/ архиере́ев благоле́пие;// ра́дуйся, еди́на Пречи́стая.
Славосло́вие вели́кое. И про́чая по уста́ву.
НА ЛИТУРГИ́И
Блаже́нны от пе́рваго кано́на, песнь 3-я, и от втора́го кано́на, песнь 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О приснопа́мятне святи́телю, Христо́в уго́дниче и ве́рный Его́ свиде́телю, о́тче Григо́рие! Ты, от младе́нства во благоче́стии наставля́емь, моли́тве науча́яся и прему́дростию Госпо́днею насыща́я ду́шу твою́, к безмо́лвному созерца́нию и свяще́нному служе́нию до́бре угото́вился еси́. Егда́ же прии́де на зе́млю Ру́сскую о́гненное посеще́ние, грех ра́ди на́ших попуще́нное, тогда́ ты, о́тче, и́ноческия обе́ты Бо́гу прине́с и свяще́нства благода́тию украси́вся, всего́ себе́ пре́дал еси́ на служе́ние Це́ркви стра́ждущей и гони́мому наро́ду правосла́вному. Та́же и архиере́йства кре́стное служе́ние от первосвяти́теля Ти́хона послу́шне восприя́л еси́, во гра́де свята́го Петра́ посреде́ безбо́жнаго мяте́жа па́ству Христо́ву Сло́вом Бо́жиим наставля́я и Хле́бом Жи́зни ве́чныя напитава́я. Еще́ же и темни́чныя у́зы претерпе́ти сподо́бился еси́, последи́ же венце́м му́ченическим увя́злся еси́, ве́ру да́же до сме́рти непоро́чну соблюды́й. Те́мже ны́не к тебе́, Престо́лу Бо́жию предстоя́щему, усе́рдно притека́юще и твоего́ заступления ча́юще, вопие́м ти: о учи́телю и наста́вниче наш, при́зри на ну́жды на́ша и удовли́ я́, ели́ко поле́зно нам, и к жи́зни ве́чней приведи́ ны, да подвиго́м твои́м после́дующе, и терпе́нием твои́м укрепля́еми, и на сконча́ние жи́тельства твоего́ взира́юще, вни́дем в све́тлый черто́г Бо́жий и ку́пно с тобо́ю просла́вим Еди́наго Соде́теля и Промысли́теля на́шего, Отца́, и Сы́на, и Свята́го Ду́ха, во ве́ки веко́в. Ами́нь.
