Служба преподобному Антонию Радонежскому
Ме́сяца ма́я в 12-й день
Преподо́бнаго Анто́ния Ра́донежскаго
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8:
Преподо́бне о́тче Анто́ние,/ мла́ду в ле́тех ти су́щу,/ оба́че сме́ртнаго часа́, я́ко близ гряду́щаго, при́сно ча́ющу,/ во оби́тель Саро́вскую прите́кл еси́,/ Серафи́ма преподо́бнаго благослове́ния прося́,/ да дни жития́ твоего́ уедине́нно и в покая́нии// пред Го́сподем скончава́еши.
Преподо́бне о́тче Анто́ние,/ смотре́ние Бо́жие о тебе́ откры́ся подви́жнику Саро́вскому,/ и́же нарече́ тя игу́мена ла́вры вели́кия,/ я́ко ма́тернию любо́вию прося́ бра́тию оби́тели согрева́ти,/ и щедро́тами твои́ми сиро́т диве́евских николи́же оставля́ти,/ но о всех, и́хже вве́рит ти Госпо́дь,// изря́дное попече́ние при́сно име́ти.
Преподо́бне о́тче Анто́ние,/ четы́редесять и шесть лет/ до́брый игу́мен оби́тели всеросси́йскаго а́ввы Се́ргия был еси́,/ изря́дный же строи́тель и благоукраси́тель,/ и досто́йнейший граждани́н// гра́да Се́ргиева яви́лся еси́.
Преподо́бне о́тче Анто́ние,/ дру́га и сотаи́нника,/ та́же духо́внаго наста́вника/ Филаре́т святи́тель тя име́яше,/ та́йная души́ своея́ ти вверя́я// и николи́же о сем раска́явся, блаже́нне.
Сла́ва, глас то́йже:
Преподо́бне Анто́ние,/ Бог возлюби́в тя любо́вию вели́кою,/ три святы́я му́жи даде́ ти в дру́ги и учи́тели:/ Серафи́ма, подви́жника Саро́вскаго,/ Филаре́та и Инноке́нтия, иера́рхов Моско́вских,/ с ни́миже ны́не предстоя́ Престо́лу Святы́я Тро́ицы,// моли́ся о душа́х на́ших.
И ны́не, Богоро́дичен, глас то́йже:
Царь Небе́сный за человеколю́бие на земли́ яви́ся/ и с челове́ки поживе́:/ от Де́вы бо Чи́стыя плоть прие́мый/ и из Нея́ проше́дый с восприя́тием,/ Еди́н есть Сын, сугу́б естество́м,/ но не Ипоста́сию./ Те́мже соверше́нна Того́ Бо́га/ и соверше́нна Челове́ка вои́стину пропове́дающе,/ испове́дуем Христа́ Бо́га на́шего,/ Его́же моли́, Ма́ти Безневе́стная,// поми́ловатися душа́м на́шим.
Вход. Проки́мен дне. И чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.
На лити́и стихи́ры, глас 2:
Враче́м челове́ческих теле́с возжела́л еси́ бы́ти,/ врача́ же душ челове́ческих Бог соде́ла тя,/ блаже́нне Анто́ние,/ да утоля́еши душе́вныя боле́зни прибега́ющих ти,/ и моли́твами твои́ми приво́диши их// в Ца́рствие Небе́сное.
Пра́вило церко́вное чту́щу ти, преподо́бне,/ и́мя Сладча́йшаго Иису́са плени́ тя./ И еди́ному Го́споду рабо́тати пла́менно вожделе́в,/ и́ноческое постриже́ние прия́л еси́,/ в не́мже Анто́нием нарече́н бе,// Пече́рскаго подви́жника Небе́снаго покрови́теля твоего́ име́я.
Сла́ва, глас 6:
Строи́тель изря́дный Высокого́рския оби́тели был еси́,/ преподо́бне Анто́ние,/ оба́че призва́ тя Госпо́дь наставля́ти бра́тию ла́вры вели́кия,// и и́мя Святы́я Тро́ицы изря́дно сла́вити.
И ны́не, Богоро́дичен, глас то́йже:
О Ма́ти Бо́жия,/ Ты Престо́лу Бо́жию предстои́ши/ и за род челове́ческий хода́тайствуеши,/ не преста́ни и о нас моля́щися/ в Ца́рствии Сы́на Твоего́,// Христа́ Бо́га на́шего.
На стихо́вне стихи́ры, глас 2.
Подо́бен: До́ме Евфра́фов:
Словеса́ подви́жника Саро́вскаго,/ я́ко смире́ние и трезве́ние ума́ во всем/ украше́ние доброде́телей суть,/ в житии́ твое́м де́йственна показа́л еси́,// преподо́бне Анто́ние.
Стих: Блаже́н муж боя́йся Го́спода,// в за́поведех Его́ восхо́щет зело́.
Ра́дуйся, преподо́бне Анто́ние,/ в Собо́ре Ра́донежских святы́х водвори́выйся,/ те́мже и о ча́дех твои́х духо́вных моли́ся,/ во е́же в Небе́сных селе́ниих// им водвори́тися.
Стих: Пра́вда Его́// пребыва́ет в век ве́ка.
Ра́дуйся, о́тче Серафи́ме, усе́рднаго ученика́ име́вый,/ и ты, святи́телю Филаре́те, до́браго дру́га и отца́ духо́внаго прие́мый,/ та́кожде и ты, святи́телю Инноке́нтие,/ послушли́ваго и́нока ви́девый,// преподо́бнаго Анто́ния.
Сла́ва, глас 8:
Взыгра́йте и возвесели́теся днесь, лю́дие гра́да Се́ргиева,/ я́ко дни уничиже́ния ве́рных/ и оскверне́ния святы́ни пресече́ Влады́ка Госпо́дь,/ и Анто́ний преподо́бный ны́не просла́вися./ Сего́ ра́ди совоку́пную вознеси́те хвалу́ Еди́ному Бо́гу,// Тро́ице Единосу́щней и Неразде́льней.
И ны́не, Богоро́дичен, глас то́йже:
Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.
Тропа́рь, глас 3:
Во́лю Бо́жию в житии́ твое́м взыску́я,/ предрече́ние преподо́бнаго Серафи́ма/ и Небе́сное призва́ние чрез святи́теля Филаре́та/ на служе́ние в ла́вру вели́кую прия́л еси́./ И́стинный храни́тель заве́тов а́ввы Се́ргия быв,/ и́ноков наста́вник богому́дрый/ и ла́вры благоустрои́тель иску́сный яви́лся еси́./ Ны́не же предстоя́ Престо́лу Святы́я Тро́ицы,/ преподо́бне о́тче Анто́ние,// моли́ спасти́ся душа́м на́шим.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
И́ноцы оби́тели Се́ргия преподо́бнаго, духо́вне возра́дуйтеся днесь, свети́ло бо но́вое благоукраше́нное в со́нме Ра́донежских святы́х возсия́, благода́тне вас осиява́я, Анто́ний блаже́нный, ве́рный храни́тель заве́тов вели́каго а́ввы Се́ргия.
Сла́ва, и ны́не, Богоро́дичен:
Приими́, Всеблагомо́щная Богоро́дице, приноси́мое Тебе́ моле́ние, вси бо наде́жду на Тя и́мамы, Твои́ бо есмы́ раби́, да не постыди́мся, Влады́чице.
По 2-м стихосло́вии седа́лен, глас 2:
На одре́ сме́ртнем лежа́щу ти и лю́те стра́ждущу, блаже́нне, яви́ся ти Филаре́т святи́тель уме́рый и, моли́тву Госпо́дню сотвори́ти повеле́в, утоли́ боле́зни твоя́. Ны́не же, преподо́бне, в ли́це святы́х водвори́выйся вку́пе со святи́телем, утоли́ боле́зни на́ша душе́вныя и теле́сныя, и Бо́га милосе́рднаго моли́, во е́же спасти́ся нам.
Сла́ва, и ны́не, Богоро́дичен:
Се, Богома́ти, хода́тай те́плый Анто́ний преподо́бный за град Се́ргиев и оби́тель, наро́д и Оте́чество на́ше, вы́ну пред Тобо́ю предстои́т. Его́же моли́твами покры́й нас всех, Пречи́стая, честны́м Твои́м омофо́ром.
По полиеле́и седа́лен, глас 5:
Я́коже со́лнце, зе́млю согрева́юще, прозябе́ние многоразли́чных плодо́в в ней до́бре соде́ловает, та́кожде и любы́, Ду́хом Святы́м дае́мая, человеколю́бием же и милосе́рдием в души́ челове́честей прозяба́ющи, рай Небе́сный в той содева́ет, си́це назида́л еси́, блаже́нне Анто́ние.
Сла́ва, и ны́не, Богоро́дичен:
Ра́дуйся, Одиги́трие, Путеводи́тельнице душ на́ших, направля́еши бо нас в ме́сто поко́йное, иде́же Ца́рствия Небе́снаго оби́тели.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
До́брый блюсти́тель заве́та подви́жника Саро́вскаго яви́лся еси́,/ поро́ки и стра́сти люде́й не бра́нию и гордели́вым обличе́нием врачу́я,/ но достосла́вную красоту́ смире́ния, любве́ и кро́тости показу́я,/ к покая́нию и очище́нию от грехо́в ве́рныя подвига́л еси́,// блаже́нне Анто́ние.
Кано́н, глас 4.
Песнь 1
Ирмо́с: Под о́блаком све́тлым/ и столпо́м о́гненным наставля́емый/ проше́д мо́ре су́шею,/ и сие́ пешеше́ствуяй, я́ко в пусты́ни,/ избра́нный Твой Изра́иль, Христе́,// побе́дную песнь пое́т Тебе́, Го́споди.
Под о́блаком све́тлым благода́тным преподо́бный Анто́ний сверши́ по́двиг жития́ своего́, и яви́ся ны́не изря́дный предста́тель и моли́твенник усе́рдный о душа́х на́ших. Его́же досто́йно воспе́ти сподо́би ны, Милосе́рдне Го́споди.
Ки́ими словесы́ восхва́лим тя, блаже́нне? Кий во́зраст твой осо́бь рече́м? Бо́жие бо смотре́ние о тебе́ во вся ле́та живота́ твоего́ яви́ся и благода́тно нам показа́ся.
Земля́ Нижегоро́дская просла́вися, в селе́нии бо Лы́скове Андре́ю Кри́тскому тезоимени́т младе́нец роди́ся, до́брый служи́тель Святы́я Тро́ицы и усе́рдный учени́к Се́ргия вели́каго.
Богоро́дичен: Ма́ти Христа́ Бо́га на́шего, Засту́пницу на́шу Тя почита́ем, спаси́ нас, на Тя упова́ющих.
Песнь 3
Ирмо́с: Утвержде́ние на Тя наде́ющихся,/ утверди́, Го́споди, в ве́ре правосла́вней Твое́й,// утверди́ нас, я́ко Человеколю́бец.
Дело́м враче́бным пре́дан бе, преподо́бне, те́мже и неду́ги теле́сныя врачева́ти изря́дно навы́кл еси́, оба́че призва́ тя Госпо́дь цели́телем душ челове́ческих бы́ти и от язв грехо́вных ты́я до́бре врачева́ти.
Достодо́лжное поклоне́ние моще́м святы́х уго́дник Бо́жиих, Го́споду соде́йствующу ти, во уме́ твое́м оправда́ся, и а́бие ло́жная челове́ческая му́дрствования о сем отве́ргл еси́, и Бог во и́стинней ве́ре утверди́ тя, я́ко Человеколю́бец.
Иису́су Сладча́йшему служи́ти восхоте́в, и преподо́бному Андре́ю Кри́тскому, я́вльшуся ти во сне, внима́я, во о́битель Саро́вскую прите́кл еси́, послуша́ния прося́, блаже́нне.
Богоро́дичен: От ны́не ублажа́т Тя вси ро́ди, Пренепоро́чная Де́во, я́ко родила́ еси́ Христа́ Бо́га на́шего, и Засту́пница на́ша пред Ним, Сы́ном Твои́м, яви́лася еси́.
Седа́лен, глас 4:
Прииди́те, ве́рнии, подви́жника Ра́донежскаго согла́сно вси восхва́лим, той бо лице́ земли́ на́шея хра́мы и оби́тельми благоукраси́ и заве́ты Се́ргия вели́каго соблюда́ти научи́, нас же всех моли́твами свои́ми в правосла́вней ве́ре утверди́, пра́зднующих с любо́вию свяще́нную па́мять его́.
Сла́ва, и ны́не, Богоро́дичен:
О Всепе́тая Богоро́дице Влады́чице, преподо́бных похвало́, му́чеников сла́во, а́нгелы восхваля́емая и челове́ки воспева́емая, и всего́ ми́ра кре́пкая Помо́щнице, изба́ви нас вся́каго зла́го обстоя́ния, еди́на Благослове́нная.
Песнь 4
Ирмо́с: Внегда́ прибли́житися ле́том, позна́ешися;/ внегда́ приити́ вре́мени, яви́шися,/ внегда́ смути́тися души́ мое́й,/ во гне́ве ми́лости помяне́ши:// Го́споди, сла́ва Тебе́.
Анто́ния Пече́рскаго во и́ночестве соиме́нник яви́лся еси́, да и́ноческим пра́вилом подви́жника дре́вняго после́дуеши, блаже́нне.
Во оби́тели Саро́встей и́ноческому житию́ навы́к, досто́йный мона́х Высокого́рския оби́тели яви́лся еси́, преподо́бне.
Высокого́рския оби́тели изря́дный строи́тель и благоукраси́тель показа́лся еси́, блаже́нне, в не́йже мно́гия и́ноки, ре́вностию к подвиго́м мона́шеским горя́щия, собра́л еси́.
Богоро́дичен: Преблагослове́нна еси́, Богоро́дице Де́во, пое́м Твое́ Рождество́, сла́вим Твое́ вели́чие, покланя́емся Твоему́ смире́нию, благодари́м Твое́ о нас заступле́ние.
Песнь 5
Ирмо́с: Возсия́й ми, Го́споди,/ свет повеле́ний Твои́х,/ я́ко к Тебе́ дух мой у́тренюет, и пое́т Тя:/ Ты бо еси́ Бог наш,// и к Тебе́ прибега́ю, Царю́ ми́ра.
Свет повеле́ний Госпо́дних возсия́ Серафи́му преподо́бному, и́же и указа́ тебе́, Анто́ние преди́вне, ме́сто и́ноческих по́двигов во оби́тели Се́ргиевой.
Ду́хом пламене́я и стра́хом Бо́жиим себе́ огражда́я, о́тче Анто́ние, я́ко дре́во многопло́дное, во оби́тели Се́ргиевой преподо́бием процве́л еси́, вопия́: возсия́й ми, Го́споди, свет повеле́ний Твои́х.
Смотре́нием Бо́жиим и благослове́нием святи́теля Филаре́та игу́мен оби́тели Се́ргия преподо́бнаго яви́вся, блаже́нне Анто́ние, ре́вностне обе́ты и́ноческия исполня́л еси́ и о спасе́нии вве́ренныя ти па́ствы боле́зновал еси́.
Богоро́дичен: О Ма́ти Христа́ Бо́га на́шего! А́ще и твори́м мно́гими грехи́ червле́ны ри́зы Сы́на Твоего́, оба́че умилосе́рдися и спаси́ нас, на Тя еди́ну упова́ние нело́жное иму́щих.
Песнь 6
Ирмо́с: Морско́е рыда́ние, Христе́, Ио́нино подража́яй, зову́ Ти:/ живо́т мой от а́да прегреше́ний возведи́,/ да во хра́ме сла́вы Твоея́// со гла́сом хвале́ния пожру́ Ти.
Образо́в правосла́вных разуме́ние изря́дное даде́ся ти, преподо́бне, сего́ ра́ди во оби́тели повеле́нием твои́м мно́зи от учени́к твои́х ты́я о́бразы Христа́ и Богома́тере, та́кожде и святы́х уго́дников написова́ша и во мно́зех хра́мех земли́ на́шея водвори́ша.
Име́я любо́вь сострада́тельную, о седя́щих в темни́це при́сно боле́зновал еси́, преподо́бне, си́и та́кожде лю́дие, глаго́ля. Сего́ ра́ди ще́дрою руко́ю ми́лостыню тем подава́л еси́.
Ме́сто заточе́ния во гра́де Се́ргиеве благоустроя́я, храм в честь о́браза Бо́жия Ма́тере Утоли́ моя́ печа́ли со тща́нием устро́ил еси́, да па́дшии в грехи́ моли́твы в нем творя́т и, на путь пра́вый ста́вше, предста́тельством Пречи́стыя Богоро́дицы спасу́тся.
Богоро́дичен: И́же от Отца́ пре́жде всех век рожде́на, Ты, Ма́ти Бо́жия, неискусому́жно родила́ еси́. Те́мже Тя вси Богоро́дицу правосла́вно испове́дуем.
Конда́к, глас 2:
Вы́шних жела́я улучи́ти, блаже́нне,/ от ю́ности Христу́ после́довал еси́,/ подвиго́м же и нра́вом святы́х оте́ц ревну́я,/ благода́ть ду́ха ми́рна стяжа́л еси́,/ и мно́жеству и́ноков и всем притека́ющим к тебе́/ ми́лостный оте́ц яви́лся еси́./ Те́мже с любо́вию вопие́м ти:/ ра́дуйся, Анто́ние, ла́вры Се́ргиевы похвало́// и Це́ркве Ру́сския украше́ние.
И́кос:
Вы́шний Созда́тель, хотя́й ла́вру Се́ргия преподо́бнаго благоукраси́ти, призва́ тя, преподо́бне Анто́ние, по́двиг до́брый в той соверши́ти. Ты же, во́ли Госпо́дней повину́яся и заве́т преподо́бнаго Серафи́ма исполня́я, четы́редесять и шесть лет в не́й усе́рдно подвиза́лся еси́, я́ко ма́ти бра́тию любя́ и ми́лостивное попече́ние о всех име́я. Те́мже вопие́м ти: ра́дуйся, ве́рный учениче́ преподо́бнаго Серафи́ма Саро́вскаго; ра́дуйся, и́скренний дру́же и духо́вный оте́ц Филаре́та святи́теля. Ра́дуйся, во́лю святи́теля Инноке́нтия до конца́ дней твои́х испо́лнивый; ра́дуйся, заве́ты преподо́бнаго Се́ргия до́бре сохрани́вый. Ра́дуйся, до́брый о́тче всеми́лостивый и любвеоби́льный; ра́дуйся, пита́телю си́рых и уничиже́нных. Ра́дуйся, по заве́ту Серафи́ма Саро́вскаго сиро́т диве́евских николи́же оста́вивый; ра́дуйся, хра́мов Бо́жиих строи́телю изря́дный и достосла́вный. Ра́дуйся, жи́телю гра́да Се́ргиева честне́йший и досто́йнейший; ра́дуйся, мно́гия ко Христу́ приведы́й. Ра́дуйся, Анто́ние, ла́вры Се́ргиевы похвало́ и Це́ркве Ру́сския украше́ние.
Песнь 7
Ирмо́с: Оте́ц на́ших Бо́же, не посрами́ нас,/ но да́руй нам со дерзнове́нием вопи́ти Тебе́:// благослове́н еси́, Бо́же оте́ц на́ших.
Гла́сом благозву́чным, я́ко кимва́лом доброгла́сным, преподо́бне, при́сно воспева́л еси́: благослове́н еси́, Бо́же оте́ц на́ших.
Сло́ва Бо́жия веща́тель изря́дный и того́ пропове́дник неле́ностный, приходя́щих к тебе́ с ве́рою науча́л еси́ воспева́ти: благослове́н еси́, Бо́же оте́ц на́ших.
Уста́ва церко́внаго до́брый рачи́тель и усе́рдный его́ исполни́тель яви́лся еси́, преподо́бне о́тче наш Анто́ние, Се́ргия вели́каго досто́йный подража́телю.
Богоро́дичен: Пресвята́я Ма́ти Христа́ Бо́га на́шего, спаси́ нас всех, на Тя упова́ющих и воспева́ющих Сы́на Твоего́, я́ко Бо́га оте́ц на́ших.
Песнь 8
Ирмо́с: Земля́, и вся, я́же на ней,/ мо́ре и вси исто́чницы,/ Небеса́ небе́с,/ свет и тьма, мраз и зной,/ сы́нове челове́честии,/ свяще́нницы, благослови́те Го́спода,// и превозноси́те Его́ во ве́ки.
Сове́ты а́ввы Се́ргия исполня́я, преподо́бне о́тче, по́двиг странноприи́мства до́бре поне́сл еси́, пита́я ни́щия и убо́гия, кров и прибе́жище им дая́, во вре́мя же зно́я полу́деннаго и мра́за лю́таго науча́я воспева́ти и превозноси́ти Бо́га во вся ве́ки.
Сло́вом Бо́жиим, я́ко щито́м духо́вным, облачи́вся, и писа́ньми святы́х оте́ц умудри́вся, я́ко во́ин до́блестный ко́знем диа́вольским противуста́л еси́, преподо́бне о́тче Анто́ние, благословля́я и превознося́ Бо́га во вся ве́ки.
Не убо́йтеся у́бо слез покая́ния, рекл еси́, преподо́бне, ты́я бо, я́ко дождь зе́млю, ду́шу челове́ческую ороша́ют и очище́ние от грехо́в тоя́ содева́ют, науча́юще благословля́ти и воспева́ти Бо́га во вся ве́ки.
Богоро́дичен: Честне́йшую Херуви́м и сла́внейшую без сравне́ния Серафи́м воспои́м днесь, лю́дие, Ма́терь Христа́ Бо́га на́шего: и́мать бо дерзнове́ние пред Сы́ном Свои́м, моли́тися о спасе́нии душ на́ших.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л,/ и вознесе́ смире́нныя Бог Изра́илев./ В ни́хже посети́ нас Восто́к с высоты́,// и напра́вил ны есть на путь ми́ра.
По́двигом до́брым подвиза́вся, блаже́нне, тече́ние сконча́, ве́ру соблюде́, те́мже ны́не и во святы́х со дру́ги твои́ми пребыва́еши, и мо́лишися при́сно о спасе́нии душ на́ших.
Преподо́бне о́тче! Ты в житии́ еди́но на потре́бу до́бре иска́л еси́ и, я́ко безце́нный би́сер, Христа́ обре́л еси́, И́же призва́ тя Ему́ еди́ному служи́ти и рабо́тати. Научи́ и нас в житии́ на́шем, нело́жным путе́м ше́ствовати и Ца́рствие Бо́жие насле́довати.
Преподо́бне о́тче Анто́ние, земли́ Ра́донежския похвало́ и украше́ние! Ты в ли́це ру́сских святы́х ны́не Влады́це Христу́ предстоя́, Того́ моли́ пода́ти нам оставле́ние грехо́в и ве́лию ми́лость.
Богоро́дичен: Ки́я похвалы́ возгласи́м Ти, Пречи́стая? Ки́ими словесы́ вели́чие Твое́ возсла́вим? Я́ко Спа́са родила́ еси́ душ на́ших.
Свети́лен:
Свети́льник неугаси́мый яви́лся еси́, преподо́бне, путь спасе́ния ве́рным указу́я, на не́мже лю́дие, отло́жше вся су́етная и ло́жная, поуча́ются иска́ти еди́наго на потре́бу и Ца́рствие Бо́жие насле́довати.
Сла́ва, и ны́не, Богоро́дичен:
Свет от Све́та возсия́вый, Христе́ Бо́же, спаси́ нас моли́твами ро́ждшия Тя, Пречи́стыя Твоея́ Ма́тере.
На хвали́тех стихи́ры, глас 8:
Прииди́те, ве́рнии лю́дие,/ собо́рне велегла́сно во святы́х отце́х восхва́лим:/ Филаре́та святи́теля, Сло́ва Бо́жия изря́дна изъясни́теля,/ Инноке́нтия, да́льних стран просвети́теля,/ Серафи́ма преди́вна, христиа́нскаго благоче́стия досто́йна учи́теля,/ с ни́миже и Анто́ния, неле́ностнаго их подража́теля,// и ла́вры вели́кия досто́йнаго благоукраси́теля.
И́стый и благоле́пный соверши́тель слу́жбы церко́вныя был еси́,/ преподо́бне о́тче Анто́ние,/ та́кожде и богому́дрых сове́тов твои́х ме́ру потре́бную коему́ждо подава́л еси́,/ сего́ ра́ди лю́дие, во оби́тель Се́ргиеву притека́юще,/ вы́ну поуча́хуся благословля́ти Го́спода// и превозноси́ти Его́ во вся ве́ки.
Благодари́м Тя, Христе́ Бо́же наш,/ я́ко сподо́бил еси́ нас си́ми похвала́ми/ уго́дника Твоего́ Анто́ния воспе́ти,/ и сего́ я́ко усе́рдна хода́тая и моли́твенника пред Тобо́ю име́ти,// о спасе́нии душ на́ших.
Сла́ва, глас 6:
Го́споди Бо́же наш,/ ди́вный во святы́х Твои́х,/ уго́дника Твоего́, преподо́бнаго Анто́ния, моли́твы приими́,/ ны́не предстоя́щаго Ти и со дерзнове́нием моля́щагося// о спасе́нии душ на́ших.
И ны́не, Богоро́дичен, глас то́йже:
Богоро́дице, Ты еси́ Лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апосто́лы,// поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О преподо́бне о́тче Анто́ние, вели́каго а́ввы Се́ргия досто́йный прее́мниче, наставле́ний преподо́бнаго Серафи́ма исполни́телю, святи́теля Филаре́та дру́же и сотаи́нниче, и́ноков и всех ревни́телей благоче́стия учи́телю! Моли́ Всеми́лостиваго Христа́ Бо́га на́шего и Его́ Пречи́стую Ма́терь Це́ркви и Оте́честву на́шему в ми́ре и тишине́ пребыва́ти, оби́тели Се́ргиевой, иде́же прославля́ется вели́кое и́мя Пресвяты́я Тро́ицы, непоколеби́мой сохрани́тися, учи́лищу духо́вному, в ней пребыва́ющему, в правосла́вней ве́ре утверди́тися. Испроси́ нам моли́твами твои́ми у Пресвяты́я Тро́ицы благода́ть во́лю Бо́жию взыска́ти и исполня́ти, житие́ в по́двизех покая́ния провожда́ти, ско́рби, боле́зни и искуше́ния с благодаре́нием терпе́ти, дух ми́рен стяжа́ти и иска́ти пре́жде Ца́рствия Бо́жия, в не́мже ты прославля́еши со все́ми святы́ми Отца́, и Сы́на, и Свята́го Ду́ха. Ами́нь.
