Служба преподобномученикам Иоанникию и Серафиму Оптинским
Ме́сяца ноября́ в 10-й день
Преподобному́чеников Иоанни́кия и Серафи́ма О́птинских
НА ВЕЧЕ́РНИ
На Го́споди, воззва́х: стихи́ры Иоанни́кия, глас 8.
Подо́бен: О, пресла́внаго чудесе́:
О, пресла́внаго чудесе́!/ Благоле́пную све́тлость души́ твоея́/ доброде́телей соу́з явля́ет,/ и красота́ богоразу́мия испове́дание твое́ показу́ет./ Те́мже, о́тче Иоанни́кие досточу́дне,/ восхваля́юще по́двиги твоя́, си́це вопие́м:/ сла́ва Да́вшему ти кре́пость,/ сла́ва Венча́вшему тя,// сла́ва Просла́вльшему тя с новому́ченики земли́ на́шея.
О́тче Иоанни́кие сла́вне!/ Ты изде́тска труды́ возлюби́л еси́,/ стада́ пасы́й и оде́жду иску́сно исправля́яй,/ те́мже Бог вручи́ тебе́ о́вцы слове́сныя,/ и́хже до́бре упа́сл еси́,/ и, багряни́цею страда́ний оде́явся,/ му́ченический вене́ц досто́йне прия́л еси́,/ и да́же до сме́рти ве́рен Христу́ оста́лся еси́,// Его́же моли́ спасти́ся душа́м на́шим.
О, пресла́внаго чудесе́!/ Ве́рный учени́к Христо́в,/ тве́рдый страда́лец и моли́твенник о нас те́плый/ в собо́ре О́птинских святы́х явля́ется,/ по́стническими по́двиги укра́шенный/ и кровьми́ свои́ми испещре́нный./ О, каковы́й предста́тель нам дарова́ся,/ его́же моли́твами, Христе́ Бо́же,// спаси́ ду́ши на́ша, я́ко Милосе́рд.
И́ны стихи́ры, Серафи́ма, глас то́йже.
Подо́бен: Что вы нарече́м:
Что тя нарече́м, Серафи́ме?/ Кро́тости ли учи́теля,/ я́ко стра́сти своя́ обузда́л еси́?/ Сла́достнаго ли исто́чника умиле́ния,/ я́ко сле́зы твоя́ Бо́га приклони́ша на ми́лость?/ И́же сотвори́ враго́м твои́м отмще́ние/ и утверди́ Правосла́вие// во спасе́ние душ на́ших.
Что тя возымену́ем, Серафи́ме?/ О́браз ли смире́ния и послуша́ния,/ я́ко жизнь свою́ во́ли Бо́жией пре́дал еси́?/ Столп ли терпе́ния и му́жества,/ я́ко страда́ния и са́мую смерть великоду́шне восприя́л еси́?/ Мно́гая твоя́ дарова́ния,/ и́миже Христа́ Бо́га просла́вил еси́,// Его́же моли́ спасти́ся душа́м на́шим.
О́тче Серафи́ме доблему́дре,/ доброде́тельми, я́ко оде́ждею све́тлою, себе́ украси́в,/ непобеди́м враго́м яви́лся еси́/ и злонача́льника тьмы ве́ка сего́ посрами́л еси́,/ Христу́ же сраспя́вся,/ ра́ны огнепа́льныя Его́ ра́ди претерпе́л еси́./ Те́мже моли́ся Го́сподеви о нас,// па́мять твою́ любо́вию соверша́ющих.
Сла́ва, глас 6:
Па́мять святы́х на земли́/ торжество́ Це́ркве явля́ет,/ ти́и бо, по́двиги свои́ми зе́млю удобри́вше,/ и доброде́тельми, я́ко нетле́нныя ло́зы, созре́вше,/ весе́лие ве́рным сердца́м источа́ют./ Сего́ ра́ди прииди́те, любому́дрия рачи́телие,/ просла́вим до́блести преподобному́чеников О́птинских/ и с любо́вию им возопии́м:/ ра́дуйтеся, мона́шествующих столпи́ светоза́рнии,/ ра́дуйтеся, победи́телие зло́бы вра́жия,/ ра́дуйтеся, предста́телие на́ши непосты́днии,/ Серафи́ме и Иоанни́кие присносла́внии,/ моли́теся за ны ко Го́споду,// поми́ловатися душа́м на́шим.
И ны́не, Богоро́дичен, глас то́йже:
Творе́ц и Изба́витель мой, Пречи́стая,/ Христо́с Госпо́дь,/ из Твои́х ложе́сн проше́д,/ в мя оболки́йся,/ пе́рвыя кля́твы Ада́ма свободи́./ Те́мже Ти, Всечи́стая,/ я́ко Бо́жии Ма́тери же и Де́ве вои́стину/ вопие́м немо́лчно:/ ра́дуйся, а́нгельски, ра́дуйся, Влады́чице,/ предста́тельство, и покро́ве,// и спасе́ние душ на́ших.
На стихо́вне стихи́ры, глас 2.
Подо́бен: Егда́ от Дре́ва:
Па́стырь слове́сному твоему́ ста́ду,/ преподобному́чениче сла́вне Иоанни́кие,/ добронра́вен и благоче́стием укра́шен яви́лся еси́,/ любому́дрием же мона́шеским возвы́шен,/ достоя́ние Христо́во на па́жити уче́ний оте́ческих воспита́л еси́,/ и себе́ сама́го в же́ртву живу́ю Бо́гови прине́сл еси́./ Ему́же ны́не моли́ся,/ в Правосла́вии лю́дем земли́ на́шея утверди́тися// и спасти́ся душа́м на́шим.
Стих: Честна́ пред Го́сподем// смерть преподо́бных Его́.
Отре́кся во́ли своея́ и крест свой взем,/ преподобному́чениче Серафи́ме досточу́дне,/ в О́птину пу́стынь прите́кл еси́/ и, богому́дрыми отцы́ наста́влен,/ в кро́тости и смире́нии бра́тии послужи́л еси́,/ и о́браз благоче́стия светосия́нен яви́лся еси́./ Те́мже моли́ся о нас, воспева́ющих тя,/ в Правосла́вии лю́дем земли́ на́шея утверди́тися// и спасти́ся душа́м на́шим.
Стих: Что возда́м Го́сподеви о всех,// я́же воздаде́ ми?
Иоанни́кие, свяще́нников сла́во,/ Серафи́ме, кро́тости похвало́,/ О́птинстии страда́льцы/ и преподо́бных отце́в сы́нове,/ за Христа́ пострада́вшии и безбо́жныя посрами́вшии,/ о нас Христа́ Бо́га моли́те,/ в ми́ре и благоче́стии до́бре нам пожи́ти,/ стра́сти плотски́я умертви́ти,// и досто́йныя плоды́ покая́ния стяжа́ти.
Сла́ва, глас 4:
От оби́тели О́птинския изгна́ннии,/ по градо́м и ве́сем Христа́ пропове́дасте/ и за Него́ усе́рдно пострада́сте,/ всехва́льнии преподобному́ченицы Иоанни́кие и Серафи́ме./ Ны́не же во оби́телех Небе́сных водвори́вшеся,/ дерзнове́ннии предста́телие к Бо́гу о нас бу́дите/ и моли́теся Ему́ приле́жно,// умири́ти мир и спасти́ ду́ши на́ша.
И ны́не, Богоро́дичен, глас то́йже:
При́зри на моле́ние Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи:/ Тя бо еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице, Тя призыва́ющии./ Потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте, и покро́ве,// и спасе́ние душ на́ших.
Тропа́рь, глас 3:
Я́ко мона́шествующих утвержде́ние/ и преподобному́чеников похвалу́/ О́птина пу́стынь вас велича́ет,/ Иоанни́кие и Серафи́ме досточу́днии,/ вы бо, ду́ши своя́ за Христа́ положи́вше,/ венце́м страда́ния увенча́стеся./ Те́мже моли́теся Христу́, добропобе́днии,/ страну́ на́шу в Правосла́вии утверди́ти// и душа́м на́шим дарова́ти ве́лию ми́лость.
НА У́ТРЕНИ
По 1-м стихосло́вии седа́лен, глас 1:
По́стнически пожи́вших и за Христа́ смерть прии́мших, преподо́бных отце́в Серафи́ма и Иоанни́кия в пе́снех восхва́лим ра́достно, я́ко в селе́ниих ра́йских ны́не водворя́ются и мо́лятся непреста́нно о душа́х на́ших.
Сла́ва, и ны́не, Богоро́дичен:
Невмести́мый Бог, от Твои́х де́вственных крове́й вопло́щься, в Тебе́, Де́во Чи́стая, вмести́ся. Те́мже мя, в тесноте́ грехо́вней сло́во Его́ не вмеща́юща, свободи́ и в за́поведех Сы́на Твоего́ ходи́ти наста́ви.
По 2-м стихосло́вии седа́лен, глас 8.
Подо́бен: Прему́дрости:
Я́ко зве́зды пресве́тлыя вои́стину яви́стеся на тве́рди церко́вней, преподобному́ченицы всехва́льнии, Серафи́ме и Иоанни́кие. Сего́ ра́ди Христа́ непреста́нно моли́те, долго́в разреше́ние дарова́ти чту́щим любо́вию честна́я страда́ния ва́ша.
Сла́ва, и ны́не, Богоро́дичен:
Помышля́ю День Су́дный и трепе́щу истяза́ния! Увы́ мне! Что сотворю́ и ка́ко студ стерплю́, егда́ кни́ги отве́рзутся и дея́ния облича́тся? Сего́ ра́ди припа́даю Ти, Богоро́дице Пречи́стая, и вопию́: предста́ни ми, ну́жды о́ныя изба́ви, Тебе́ бо и́мам прибе́жище, Влады́чице.
Кано́н, глас 4.
Песнь 1
Ирмо́с: Порази́вый Еги́пта,/ и фарао́на мучи́теля погрузи́вый в мо́ри,/ лю́ди спасл еси́ из рабо́ты,/ Моисе́йски пою́щия песнь побе́дную,// я́ко просла́вися.
Дво́ицу сла́вную, Иоанни́кия и Серафи́ма, и́же не то́чию ве́ровати во Христа́, но и по Нем страда́ти благода́ть стяжа́ша, пе́сненно восхва́лим, я́ко просла́вишася.
Серафи́мово воспои́м житие́ и доброде́тели Иоанни́киевы восхва́лим, я́ко сла́вою Христо́вою в житии́ свое́м просла́вишася.
Тро́ицы служи́телие Иоанни́кий и Серафи́м Ду́хом Святы́м Сы́на испове́даху, те́мже и во оби́тели О́тчи взыдо́ша, сла́вно бо просла́вишася.
Богоро́дичен: Отрокови́цу Боже́ственную в пе́снех почти́м, утро́бою де́вственною Бо́га прии́мшую, Ю́же Предста́тельницу на́шу показа́л есть И́же от Нея́ вочелове́чивыйся.
Песнь 3
Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:// свят еси́, Го́споди.
Посто́м и бде́нием в мона́шеском житии́ укрепи́вшеся, и терпе́нием я́ко броне́ю обо́лкшеся, Серафи́м и Иоанни́кий равноа́нгельнии в темни́чных у́зах благоду́шно Бо́га сла́вляху, пою́ще: свят еси́, Го́споди.
На Бо́га все упова́ние возложи́вше и воста́ния страсте́й победи́вше, преподобному́ченицы сла́внии, стра́ха безбо́жных не убоя́стеся и в пра́вости се́рдца Христу́ непреста́нно взыва́сте: свят еси́, Го́споди.
Я́ко ста́рцев богому́дрых богому́дрии ученицы́, Иоанни́кие и Серафи́ме многотерпели́вии, плод уче́ния в страда́ниих принесли́ есте́, Христу́ вопию́ще: свят еси́, Го́споди.
Богоро́дичен: Я́ко Исто́чник жи́зни ро́ждшая, жи́зни ве́чныя сподо́би, Де́во, Ма́ти Пречи́стая, к всемо́щному заступле́нию Твоему́ прибега́ющих.
Конда́к преподобному́ченика Серафи́ма, глас 4.
Подо́бен: Вознесы́йся:
Кро́вию твое́ю зе́млю Ру́сскую удобри́в,/ и страда́нием Це́рковь Христо́ву украси́в,/ преподобному́чениче Серафи́ме,/ злонача́льника ору́жием кре́стным победи́л еси́,/ я́ко сие́ есть ми́ра непобеди́мая побе́да.
И́кос:
Крест и́ночества на ра́мо подъе́м, небоя́зненно на по́двиг поте́кл еси́, Серафи́ме небоше́ственне, си́це взыва́я: теле́сная сия́ муче́ния весе́лие суть рабо́м Твои́м, Христе́, умертви́ бо смерть ору́жие Твое́, ми́ра непобеди́мая побе́да.
Седа́лен, глас то́йже. Подо́бен: Ско́ро предвари́:
Ста́рцев О́птинских добротолю́бие стяжа́вше и и́ноческое житие́ возлюби́вше, преподо́бием просия́сте и муче́ния вене́ц прия́сте, святи́и Иоанни́кие и Серафи́ме. Те́мже па́мять ва́шу любо́вию почита́ющих от бед изба́вите, богоуго́дными ва́шими ко Христу́ моли́твами.
Сла́ва, и ны́не, Богоро́дичен, глас то́йже:
Покро́в ми́лости Твоея́ простри́ на рабы́ Твоя́, Всеми́лостивая, и па́дшую мою́ ду́шу возста́ви, вем бо, Де́во Богоро́дице, я́ко вся мо́жеши, ели́ка хо́щеши.
Песнь 4
Ирмо́с: Внегда́ прибли́житися ле́том, позна́ешися;/ внегда́ приити́ вре́мени, яви́шися;/ внегда́ смути́тися души́ мое́й,/ во гне́ве ми́лости помяне́ши:// Го́споди, сла́ва Тебе́.
О́птинстии све́точи, Иоанни́кие и Серафи́ме, ста́рцев досто́йнии ученицы́ и пропове́дницы Христа́ ра́спята, стра́сти на́ша умертви́те богоприя́тными ва́шими моли́твами.
Адама́нтова кре́пость души́ твоея́ ко́зни богопроти́вных сокруши́, о́тче Серафи́ме, не бо в се́рдце твое́м зла помы́слил еси́, ниже́ усты́ твои́ми ложь изре́кл еси́, но Христа́ се́рдцем и усты́ небоя́зненно испове́дал еси́.
На суди́щи непра́веднем во́инствовал еси́, до́бльственне Иоанни́кие, я́ко во́ин Христо́в непобеди́мый, власть лжеиме́нную облича́я, и суд Бо́жий беззако́нным возвеща́я.
Богоро́дичен: Из де́вственныя утро́бы воплоти́лся еси́, Христе́, да спасе́ши от тле́ния род челове́ческий. Те́мже Ма́терь Твою́, я́ко вину́ всех благ и Богоневе́сту Чи́стую, в пе́снех ублажа́ем.
Песнь 5
Ирмо́с: Ре́вность прии́мет лю́ди ненака́занныя,/ законопресту́пныя евре́и,/ и огнь поя́ст супоста́ты Твоя́,/ я́ко Тя распя́таго,// лестца́ именова́ша.
Пред А́нгелы и челове́ки зако́нно подвиза́стеся, Серафи́ме и Иоанни́кие сла́внии, те́мже днесь пе́сненными венцы́ досто́йно венча́етеся.
О́браз па́стыря до́браго восприи́м, о́тче Иоанни́кие, ста́до слове́сное до́бре упа́сл еси́, и ду́шу твою́ за о́вцы духо́вныя положи́л еси́, от богобо́рных я́ко а́гнец закла́н быв.
Храм Бо́жий всем се́рдцем возлюби́в, о́тче Серафи́ме, с Ни́коном преподо́бным после́днюю слу́жбу во оби́тели соверши́л еси́, разоре́ние тоя́ опла́кав.
Богоро́дичен: Чистоте́ Твое́й, Де́во, удиви́ся Арха́нгел, черто́г Царе́в в Тебе́ предзря́. Те́мже ра́дуйся Тебе́ вопия́ше, Цари́це, я́ко заче́нши роди́ши Христа́ Бо́га.
Песнь 6
Ирмо́с: Возопи́ша с весе́лием пра́ведных ду́си:/ ны́не ми́ру Заве́т Но́вый завеща́ется,// и кропле́нием да обновя́тся лю́дие Бо́жия Кро́ве.
А́ще и в пучи́ну лю́тых злострада́ний вве́ржени бы́сте, преподобному́ченицы пресла́внии, оба́че я́ко прему́дрии ко́рмчии, в ти́хое приста́нище Небе́сное корабли́ душ ва́ших невреди́мо привели́ есте́.
Му́жественне пострада́л еси́, свя́те Серафи́ме, и, кро́вию свое́ю испове́дание ве́ры твоея́ запечатле́в, безбо́жных зло́бу низложи́л еси́.
Труды́ и́ноческими ри́зу спасе́ния угото́вал еси́ себе́, о́тче Иоанни́кие, в ню́же обле́кся, па́че багряни́цы ца́рския кро́вию твое́ю украси́л еси́.
Богоро́дичен: Я́ко ца́рская пала́та чре́во Твое́ боговмести́мое бысть, Влады́чице Всепе́тая, те́мже пред Царе́м ми́ра и Спа́сом душ на́ших яви́ся на́ша Всеми́лостивая Хода́таица.
Конда́к преподобному́ченика Иоанни́кия, глас 2.
Подо́бен: Тве́рдыя:
Непоро́чное твое́ житие́ во и́ночестве, Иоанни́кие,/ и любо́вь ко Христу́ неутоли́мая,/ Правосла́вия побо́рника и преподобному́ченика сла́вна тя показа́./ Сего́ ра́ди во дворы́ ра́йския всели́ тя Госпо́дь,/ еди́ный све́дый серде́чная.
И́кос:
В скиту́ Предте́чевом пятьна́десять лет пожи́л еси́, благоути́шием безмо́лвия наслажда́яся, и, го́речь страсте́й отри́нув, мед духо́вный оте́ческих наставле́ний вкуша́л еси́, Иоанни́кие сла́вне. Те́мже в ме́ру му́жа соверше́нна дости́гл еси́ и, страда́льческое соверши́в по́прище, возше́л еси́ ко Христу́, Его́же всем се́рдцем взыска́л еси́, еди́наго све́дущаго серде́чная.
Песнь 7
Ирмо́с: Спасы́й во огни́ Авраа́мския Твоя́ о́троки,/ и халде́и уби́в,/ я́же пра́вда пра́ведно уловля́ше,/ препе́тый Го́споди// Бо́же оте́ц на́ших, благослове́н еси́.
Пе́сньми похва́льными ны́не венча́ются страда́льцы О́птинстии, по́двиг му́ченический к по́двигу и́ноческому и благода́ть к благода́ти приложи́вшии, в кре́пости пою́ще: Бо́же оте́ц на́ших, благослове́н еси́.
Во изгна́нии телесы́ разделе́ни бы́вше, ве́ру единоду́шно сохрани́ли есте́, сего́ ра́ди, еди́ному Христу́ послужи́вше, ны́не в весе́лии воспева́ете: Бо́же оте́ц на́ших, благослове́н еси́.
Серафи́ме и Иоанни́кие, свети́льницы не под спу́дом стоя́щии, просвети́те нас, па́мять ва́шу све́тло соверша́ющих, да ку́пно с ва́ми зове́м: Бо́же оте́ц на́ших, благослове́н еси́.
Богоро́дичен: Наве́ты вра́жия отжени́ от раб Твои́х, Всенепоро́чная Де́во, и от смертоно́сныя печа́ли певцы́ Твоя́ изба́ви, вопию́щия: Богороди́тельнице Чи́стая, благослове́нна еси́.
Песнь 8
Ирмо́с: Во огни́ пла́меннем предстоя́т Тебе́/ Херуви́ми, Серафи́ми, Го́споди,/ и вся тварь песнь Тебе́ пое́т кра́сную:/ по́йте, благослови́те, лю́дие, превозноси́те Христа́,// еди́наго Соде́теля во вся ве́ки.
Я́ко о́гненный Серафи́м, ре́вностию по Бо́зе распала́емь, стра́сти грехо́вныя в души́ попали́л еси́, Серафи́ме чу́дне, и безбо́жныя небоя́зненно обличи́л еси́, смерть же за Христа́ прии́м, непреткнове́нно к све́ту Боже́ственному возне́слся еси́.
Мре́жею сло́ва твоего́, о́тче Иоанни́кие, мно́гия, в пучи́не безбо́жия блужда́ющия, улови́л еси́ и с до́брою лови́твою твое́ю, я́ко ве́рный раб, пред Го́сподем предста́л еси́.
Ца́рствия Небе́снаго вожделе́в, ве́тхое ру́бище греха́ растерза́л еси́, Иоанни́кие блаже́нне, и, в оде́жду безстра́стия, я́ко багряни́цу ца́рскую, оде́явся, кровьми́ твои́ми ю́ испещри́л еси́.
Богоро́дичен: Нощь грехо́вную разгна́ возсия́вшее из Тебе́ Со́лнце Пра́вды, Пренепоро́чная Де́во, те́мже и мене́, усну́вшаго в смерть, возбуди́ к покая́нию.
Песнь 9
Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
И́стины побо́рницы, благоче́стия столпи́, сонасле́дницы сла́вы О́птинския, страда́льцы му́жественнии Серафи́м и Иоанни́кий в пе́снех духо́вных да восхва́лятся днесь.
К преми́рным оби́телем взыдо́сте, из оби́тели О́птинския изгна́ни, и, от безбо́жных умерщвля́еми, к преподо́бным отце́м приложи́стеся. Те́мже, святи́и, моли́теся о нас, в пе́снех вас любо́вию велича́ющих.
О́птинская похвало́ и мона́шествующих утвержде́ние, преподобному́ченицы Серафи́ме и Иоанни́кие, от бед сохрани́те нас, в пе́снех свяще́нных вас восхваля́ющих.
Богоро́дичен: На́ше обнища́вшее естество́, Де́во, Творе́ц и Зижди́тель, из Тебе́ воплоти́выйся, Собо́ю обогати́. Те́мже Тя, я́ко Богоневе́стную Ма́терь, в пе́снех свяще́нных воспева́ем.
Свети́лен.
Подо́бен: Не́бо звезда́ми:
Огне́м любве́ Боже́ственныя воспламени́вшеся, преподобному́ченицы сла́внии, ре́вностнии де́лателие ева́нгельския ни́вы яви́лися есте́, и ве́ру правосла́вную да́же до сме́рти испове́дали есте́, я́ко и́стиннии ученицы́ Христо́вы.
Сла́ва, и ны́не, Богоро́дичен:
Свет Невече́рний из Тебе́ возсия́, Де́во, просвеща́яй су́щия во тьме, те́мже, я́ко черто́г све́та солнцезра́чный, просвети́ пою́щия Тя.
На хвали́тех стихи́ры, глас 1.
Подо́бен: Небе́сных чино́в:
Во оде́жду белу́ оде́ястеся,/ очервле́нную кро́вию А́гнчею,/ преподобному́ченицы О́птинстии,/ и страда́льчеством све́тло украси́стеся./ Те́мже светоно́сную ва́шу па́мять сла́вим// и про́сим, е́же моли́тися о нас.
Тве́рдии побо́рницы Правосла́вия,/ мона́шества непоколеби́мии столпи́,/ ста́рцев О́птинских сынополо́жницы/ и Оте́честву на́шему изря́дная похвало́,/ Серафи́ме и Иоанни́кие,// Христа́ моли́те о душа́х на́ших.
Серафи́ме, го́лубю кро́ткий,/ Иоанни́кие, па́стырю до́брый,/ Ева́нгелия ученицы́ приле́жнии/ и ста́рцев О́птинских сы́нове ве́рнии,/ моли́теся за ны ко Го́споду,// е́же спасти́ся душа́м на́шим.
Сла́ва, глас 2:
Ве́рнии Христу́ пребы́ли есте́/ в страда́ниих и гоне́ниих/ и в злоключе́ниих и ра́нах темни́чных,/ воспева́юще в сердца́х, благодаря́ще и моля́ще Го́спода,/ да гнев Свой пра́ведный преложи́т на ми́лость,/ прости́т грехи́ сыново́м ру́сским,/ пода́ст времена́ ми́рная и благоуспе́шная// и поми́лует нас в День Су́дный.
И ны́не, Богоро́дичен, глас то́йже:
Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся, кля́тва потреби́ся, Е́ва свободи́ся,/ смерть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вый та́ко, сла́ва Тебе́.
Вели́кое славосло́вие. И отпу́ст.
